«Ерлік» музейінің ұйымдастыруымен белгілі мәдениет қайраткері, қалалық әдет-ғұрып және салт-дәстүр орталығының директоры Жәнібек Тағаевпен кездесу өтті. «Ерлік дәстүрі - ұлтымыздың ерекшелігі» атты сырласу кешіне ақын- жазушылар, ҚР еңбек сіңірген мәдениет саласының қайраткерлері мен жастар қатысты.
Сәрсенбілік сырласу сағатына Елбасының «Болашаққа бағдар: рухани жаңғыру» және «Ұлы даланың жеті қыры» бағдарамалық мақалалары арқау болды. Кешті тыл және еңбек ардагері Шерім Медеуов ақ батасымен ашып беріп, белгілі журналист Мархабат Байғұт жүргізіп отырды.
Іс-шарада Ж.Тағаевтың өмірі мен еңбегі жайлы кеңінен айтылып, атқарған еңбегі жастарға дәріптелді. Көрермендер кеш қонағына сауалдарын қойып, оның өмірі мен еңбегі жайлы тың деректерге қанықты. Кеш қонағының бүгінгі күнге дейінгі өмір жолынан құралған фото көрме жасақталды. Жиын соңында Жәнібек Тағаев мұражайдың экскурсия залына арнап жәдігерлерін тарту етті.
