Шымкент келбеті

Түркияда халықаралық деңгейдегі «Таланттар шоуы» байқауы өтіп жатыр.

Осы халықаралық сайыста Оңтүстіктің цирк өнерпазы Қазақстанның намысын қорғауда. Бес елдің 40-қа жуық үздік әртісі бас қосқан сайыста «Оңтүстік цирк» мекемесінің өнерпазы Зоя Гладкова бақ сынауда.

Жерлесіміз «Әуе шеңбері» нөмірін сәтті орындап, биікте арқанмен күрделі өнер көрсеткен. Осылайша әділқазылардың жоғары бағасына ие болып, алғашқы сыннан сүрінбей өтіп, келесі кезеңге жолдама алды. Жартылай финал 25 қаңтар күні басталады. Оған 15 өнерпаз қатысады.

Жартылай финалға дейін Зоя Шымкентке келіп, дайындығын пысықтауда. Өнерпаз қазір «Оңтүстік циркте» жаттығып жүр. Жас өнерпаз цирк өнерімен 5 жылдан бері айналысады. Айта кетейік, өнерпаздың халықаралық сайысқа қатысуға қажетті қаржысы жарысты ұйымдастырушылар тарапынан қарастырылған.

"Ертегідегі ертегі"

2017 жыл «Оңтүстік-Цирк» мекемесі үшін жемісті болды. Біздің ұжым жылдың басында екі ірі қойылым жоспарлағанбыз. Оның алғашқысы – Астанадағы ЭКСПО-2017 көрмесіне арнайы дайындалған «Томирис» қойылымы. Өзіміздің төл туындымыз. Астана төрінде сахналанған қойылымымыз сондағы көрерменнің көңілінен шықты. Елорда тұрғындары мен қонақтары жылы қабылдады. Оған дейін облыс әкімі Жансейіт Түймебаев арнайы келіп, дайындығымызды байқап, жоғары бағасын берген. Аймақ басшысының сын-ескертпесімен қажет жерін қайта өзгертіп, дайындап апардық.
Одан кейін жыл соңына қарай жаңа жылдық қойылым әзірледік. 21 желтоқсанда басталған «Ертегідегі ертегі» деп аталатын сахналық қойылымды 13 қаңтарға дейін тамашалауға болады. Оны тек балғындар ғана емес, ересектер де көре алады. Сценарийінде ертегі кейіпкерлерімен қоса қолға үйретілген аңдар мен түрлі жануарлар да бар.

Томиристің жас кезін сахналадық

Халықаралық көрмеден келген соң «Томиристі» Оңтүстіктің көрермендері де тамашалады. Өзімізде қыркүйек айының екінші жартысынан бастап қараша айының ортасына дейін сахналадық. «Томирис» - цирктік-сахналық нөмірлері бар тарихи қойылым. Сақтардың батыл патшайымы туралы. Жалпы, Томиристің ер жігітке бергісіз ерлігі туралы естігенімізбен, оның жас кезі туралы ешқандай нақты мәлімет жоқ. Сондықтан біз өзіміз жобалап, режиссерлық-көркемдік идеямен Томиристің жас кезінен дала аңдарымен бірге өскенін, арыстандарды ертіп жүргенін сахналадық. Ержүрек қыздың жастайынан батыл өскенін, есейе келе ел басқарғанын балаларға да, үлкендерге де түсінікті түрде жеткізуге тырыстық.

Цирк – отбасылық орын

Негізі, цирктік қойылым жасқа бөлінбейді. Цирк – отбасымен келіп, тынығатын орын. Күрделі акробатикалық нөмірлер негізінен үлкендерге арналса, балалар сайқымазақтар мен жануарлардың өнеріне қатты қызығады. Осылайша көп болып тамашалайтын нөмірлерді біріктіруге тырысамыз әрдайым.

Жетістіктер жетерлік

2017 жылы Астанада жастардың халықаралық «Шабыт» шығармашылық фестивалі өтті. Оған цирк жанры бойынша Өзбекстан, Қырғызстан, Украина мен Қазақстанның түрлі өңірлерінен ұжымдар қатысты. Сол сайыстан біздің кішкентай ғана Айша Сайранбай деген қызымыз қола жүлдегер атанып келді. Жалпы, 2017 жыл біз үшін жаман жыл болған жоқ. Шетелдік әріптестермен байланыс уақыт өткен сайын нығайып келеді. Енді биылғы жоспарымыз – Наурызға дайындық. Ұлыстың ұлы күніне үлкен қойылым әзірлеуді жоспарлап отырмыз. Оған қоса гастрольдік сапарлар мен қойылымдарды да ұмыт қалдырмаймыз.

Арман ӘЛИЕВ,
«Оңтүстік-Цирк» МКҚК директоры

«Оңтүстік Цирк» ұжымындағы ең жас үйретуші Айша Сайрамбай «Шабыт» фестивалінде жүлделі  3 орынға ие болды.

Сегіз жасар дарынды қыз «Пеппидің үйретілген күшіктері» нөмірін көрсетіп, шетелден келген әріптестерін таңғалдырды. Манежде аты таныс Гарий мен Гердамен өнер көрсеткенде, оның батылдығын көрген Ресейдің халық әртісі Эдгард Запашный жануарлармен жұмыс істеу кішкентай өнерпаздардың қолынан келе бермейтінін айтып, қазақ қызының жанкештілігіне жылы лебізін білдірген.

Айша «Оңтүстік Циркте» 5 жасынан бері өнер көрсетіп келеді. Жетекшісі – анасы Жанат Калметова. 

Айта кетейік, Астана қалалық мәдениет және мұрағаттар басқармасының ұйымдастыруымен өткен фестивалде «Оңтүстік Цирк» өнер ұйымының атынан гимнастикалық трюктен Диана Миралиева да қатысты. Ол Украина мемлекеттік цирк директорының арнайы сыйлығымен марапатталды.

«Оңтүстік Цирк» Қытай Халық Республикасы, Хэнань провинциясының Лоян қаласында өткен III акробатикалық фестивалінен жүлдемен оралды.

Көптеген мемлекеттер бақ сынаған өнер сайысында О.Касаткин жетекшілігіндегі әуе акробаттары жеңіс тұғырынан көрінді. Халықаралық байқауда қиын да күрделі трюктерімен көзге түскен әртістер қытайлық көрерменді таң-тамаша қалдырды. Сөйтіп жүлделі орынды қанжығасына байлады. 

Қытайға сапар барысында «Оңтүстік-Цирк» МКҚК директоры Арман Алиев «Суйтаң Пəйши Чын» циркінің директоры Джаң Гоу Шинмен екіжақты меморандумға қол қойды. 

Ынтымақтастық келісімінің мақсаты – «Оңтүстік цирк» əртістерінің Қытайда өнер көрсетуіне жəне шығармашылық тəжірибе алмасуына ықпал ету болып табылады.

Өнер ұжымын халықаралық байқаудағы жеңісімен құттықтаймыз!

Сенбі-жексенбі күндері «Оңтүстік цирк» ғимаратында «Африка алыптары» өнер көрсетті. Арыстан жолбарыстармен бірге цирк алаңына шығып, көрерменнің көзайымына айналды. Ал әлемдегі үйретілген жалғыз керік Багирді жаттықтырушылары ерттеп мінді.

Халықаралық табиғат қорғау одағының «Қызыл кітабына» енгізілген мүйізтұмсық атаулының жалғыз үйретілгені – Бонни. 3 тоннаға жуық салмағы бар жануар Оңтүстік жұртшылығына таңсық. Сондықтан болар, Бонни ортаға шыққанда көрермендер демін ішіне тартып өнеріне сүйсініп отырды.

Циркке келушілер бұдан бөлек иттердің, тауешкі, маймылдардың шоуы мен акробаттардың таңғажайып өнеріне куә болып, күлкілі сайқымазақтардың ойындарын тамашалады. Екі бөлімнен тұратын қойылымның үзілісінде көрермендер 6 метрлік керікпен суретке түсуге мүмкіндік алды.

– «Африка алыптары» Шымкент қаласында 27 қарашаға дейін болады. Демалыс күндерін қызықты өткізгісі келген қала тұрғындарына біздің есігіміз ашық, – дейді «Оңтүстік цирк» МКҚК директоры Арман Әлиев.