Шымкент келбеті

Наурыз дегенде, ұлттық идеология, ұлттық бояуы бар дүниелер, қазақы нақыштағы киім-кешек пен бұйымдар, ұлттық калориті басым құндылықтарды түгендей бастайтынымыз жасырын емес. Оңтүстікті – қазақтың қаймағы десек, бұл жерден ұлттық бояуы қанық көп дүниені табуға болады. Мәселен, «Тұмар» ұлттық киімдер тігетін сән ательесін алайық.

Ұлттық киім

Шымкенттегі «ОӘД» сауда үйінде орналасқан «Тұмар» дүкенінен ерлер мен әйелдер, балалар үшін де эксклюзивті, заманауи үлгідегі, сондай-ақ ұлттық киімдердің барлық түрлерін (шапан, пальто, күртеше), той, кешкі көйлектердің қазақы үлгілерін кездестіресіз. «Тұмардың» басшысы, жеке кәсіпкер Гүлнәзия Есімбекова, әсіресе, Наурыз мерекесінің қарсаңында ұлттық киімдерге тапсырыс берушілер көбейіп, тігіп үлгермей жатқанын айтады. Алғаш кәсібін мата сатудан бастаған Гүлнәзия ханым 2009 жылы «Тұмар» сауда белгісімен ұлттық киімдердің озық үлгісін жасау мақсатында жеке кәсібін ашқан. 

– Бізге Оңтүстік Қазақстан облысының ұлттық киімдер нарығында лайықты орын алып, сатып алушылардың сенімі мен сыйластығына ие болу оңайға түспеді. Мекеме ашылған күнінен бастап сапалы ұлттық киім шығаруды мақсат етті. Киімнің сапасы – адам өмірінің қауіпсіздігі, күнделікті өмірде қолдануға ыңғайлылық және сыртқы эстетикалық түр. Киім тігу барысының барлық кезеңдерінде өнімнің сапасына мән береміз, киімнің қағаздағы үлгісінен бутик сөресіндегі дайын өнімге дейінгі жұмыстың ұсақ-түйегіне дейін бақылауда ұстаймын, – дейді Гүлнәзия Әзімбайқызы. 

«Тұмар» сән ательесі – біздің өңіріміздегі ұлттық киім тігетін бірден-бір мекеме. Оңтүстіктен бөлек, «Тұмар»-дың киімдерін еліміздің өзге де өңірлері аттай қалап алады екен. 

Мұндағы ұлттық киімдердің сатылымдағы жиынтығы бас киім, смокинг, шалбар, галстук пен белбеуден тұрады. Бұларды тігуге табиғи тері, жаккард матасы, шыны моншақ, майда моншақ қолданылған. «Жаккард матасын таңдаған себебіміз, ол қайталанбайтын керемет эстетикалық түр түзетін қымбат маталардан саналады. Жаккард іспетті мықты матаны қиыннан қиыстырып өру арқылы пайда болатын өзінше бедерлі сурет өз кезегінде түс кілемді еске салады», – дейді кәсіпкер. Бүгінде дизайнерлер жаккард матасын ұзаққа дейін өңін бермейтіндігі үшін жиі қолданады. 

– Біздің жұмыстарымыздың өзге өндірушілерден айырмашылығы сонда, әр өнімге жеке тоқталып, нобайын асықпай ойластырып, матасын мұқияттылықпен таңдаймыз. Мәселен, табиғи барқыт матасы Оңтүстік Кореядан әкелінеді. Барқыт – әсіресе, сәнді киімдерге ерекше үйлеседі. Ерлерге арналған киімдерге де таптырмас шикізат. Бұлардан бөлек, масаты, шифон, атлас, кашемир (жұмсақ жүн мата), жібек маталары да қолданылады. «Тұмардың» сатылымдағы әр киімінің қазақи оюланған қабы болады, – деп кәсіпкер әр өнімінің қалай тігілетінін бүге-шігесіне дейін айтып берді.

Ер-тұрман

Түркістандық кәсіпкер Жанболат Сүйімбай осыдан 13 жыл бұрын «Ер Тұрман» деген атаумен өзінің жеке кәсібін бастап еді. 2014 жылы Үкімет облыстық бюджеттен қаржы бөліп, Қ.А.Яссауи кесенесінің алдынан Түркістанның барлық қолөнер шеберлеріне арналған Ұлттық қолөнер орталығын ашып берді. Шеберхана, қолөнер мектебі және сауда орындары орын тепкен орталықта жеке кәсіпкер Жанболат та кәсібін дөңгелетіп отыр. Оңтүстікте ер-тұрман, ат әбзелдерін жасайтын кім бар десе, еш іркілместен осы Жанболат Сүйімбайды айтуға болады. Өйткені, басқа да бірді-екілі шеберлер қолөнердің бұл түрін бастан-аяқ жасамайды. Ал «Ер Тұрман» ЖК терісін де өздері илейді, ағашын ояды, күмісін құяды, бір сөзбен, ер-тұрманды бастан-аяқ өздері дайындайды. Одан бөлек, ағаштан және теріден ұлттық бұйымдар, алтынмен апталып, күміспен күптелген ат әбзелдерін, белдік, сәукеле, ағаштан ойып, түрлі кәдесыйлар жасайды. 

Атадан балаға мұра болып келе жатқан қолөнер Сүйімбай әулетін ұшпаққа шығарды. Кейіпкеріміз Тасболаттың Қуаныш, Есполат, Октябрь атты інілері және Рамазан атты ұлы отбасылық кәсіпті бір кісідей иіріп жүр. Бұлардың барлығына ұсталық әкесі Тасполаттан дарыпты. Әйтпесе, Есполат пен Рамазаннан басқасының кәсіби білімі жоқ, қанмен берілген қолөнерлік қасиет. 

– Қоластымда 4 адам жұмыс істейді. Бір айта кететін нәрсе, жас қолөнершілер бұл кәсіпке шыдас бере бермейді. Өйткені, жұмысы ауыр. Теріні өзіміздің шеберханада илейтін болғандықтан, оның иісі шебердің үстіне сіңіп қалады. Сол қолқаны қабатын иістен қашып, кейбірі бұл кәсіпті тастап кетеді. Кей шеберлер қаржылық айналымның, табыстың аздығынан басқа кәсіпке бет бұрады. Ал біздің бұрыннан келе жатқан тұрақты тұтынушыларымыз бар, – дейді Жанболат Тасполатұлы. 

«Мен қазақтың ұлттық бұйымдарымен мақтанамын!» деген шебер ат әбзелінің өзі қазақы өлшеммен, математикалық дәлдікпен істелгенін айтады. Қазақтың ер-тұрманы, тіпті, американдық бақташының (ковбойский) ерлерін де жолда қалдырады. Олардың ер-тұрманы сырт көзге сұлу көрінгенімен, атқа жайсыздау болады. Біздікі метрлік өлшеммен емес, қазақы сүйем, білек қарыс өлшеммен дайындалған. Арабтардың да ер-тұрманы біздікіне ұқсас екен. Бұған Жанболат Сүйінбай 2015 жылы БАӘ-де 40 күн бойы өткізілген көрме кезінде көз жеткізіпті. «Бізден көшіріп алған болуы да мүмкін», – дейді ол. Жалпы, шетелде де ат әбзелдерін істейтін шеберлер некен-саяқ көрінеді. 

«Ер Тұрманның» ұлттық бұйымдарының барлық түрі сұранысқа ие. «Кейде тапсырысты орындап үлгере алмай жатамыз», – дейді жеке кәсіпкер. Бір ер-тұрманның ері, тоқымы, жүгені, тартпасынан тұратын жиынтығы – 60 мың теңгеге бағаланады. Оны көбінесе шаруашылыққа, көкпарға қолданады. Ал бағасы 600 мың теңгелік күміс ер-тұрманды тұтынушылар әкесінің 60, 70 жылдық мерейтойларына арнап сатып алады екен. Оның бағасының қымбаттау болатын себебі, 600 мың теңгеге сату үшін 400 мың теңге шығын шығады, күміс, былғары, құнды тастар қолданылады және ұстаның көз майын тауысқан еңбегін ескеріңіз, – дейді шебер. 

Бір қызығы, «Ер Тұрман» ЖК осы уақытқа дейін Үкіметтен қаржылай қолдау алмапты. Өзінің жанкештілігімен тырмысып, тырбанып тіршілік істеп келе жатқан кәсіпкердің талпынысы таңдануға тұрарлық.

Сөмке мен әмиян

Жанболат Сүйінбайдың үйіндегі жеңгеміз Гүлмира Күмісбаева да өз алдына «Атамұра» деп жеке кәсіпкерлік ашқан. 2016 жылдың желтоқсан айында кәсіпкер әйелдерге, мүгедектерге арналған байқауда мемлекеттік грант жеңіп алған Гүлмира Дүйсенбекқызының шеберханасы қазір қазақы нақыштағы әйелдер сөмкесін, әмиянын, ерлер мен әйелдер белдігін шығарып жатыр. Әзірге қарамағында 2 жұмысшы қыз еңбек етуде. «Болашақта кәсіпкерлік аясын кеңейтіп, жұмысшы санын арттырсам», – дейді Гүлмираның өзі.
Қазақы ою-өрнекпен бедерленген әмиян, сөмкелер өңірімізде әзірге тек Түркістан қаласында шығарылуда. Ұлттық нақыштағы дүниелер әрқашанда тартымды, сүйкімді, қай кезде де сұранысқа ие. Үш кәсіпкердің әңгімесінен ұққанымыз, қазақы нақыштағы тауарлардың саудасы болсын, болмасын, олар өзін ұлттық құндылықты дәріптеуде борышты деп санайды.

Бір мекемеде 240 қыз-келіншек қызмет етеді

Сырт-сырт еткен тігін машиналарының қосыла «шырқай жөнелген» тегеурінді үні зәулім ғимарат ішін әп-сәтте жаңғырыққа бөледі. Бұл – тігін фабрикасындағы қыз-келіншектердің күнделікті қызметі басталғанын аңғартады. Таңертеңгілік сағат 8:00-де қызмет орнынан табылатын тігіншілердің бұл «әні» осылайша, күндік жоспарлы міндеттері тәмамдалғанша, дамыл таппайды. Әрбір сәтін бағамдай білетін нәзікжандылардан бастысы, ұшқыр ой мен ұқыптылық талап етіледі. Сол себептен де, мұндағы қызмет иелері үшін үнемі ізденіс пен белсенді әрекетке бейімделу – қалыптасқан үрдіс десе де болады.

Шебер десе шебер...

Бүгінде Шымкент қаласында жеңіл өнеркәсіптің өрісін кеңейтіп, заманауи үлгідегі сапалы өнімдерін нарыққа шығарып отырған тігін фабрикалары жетерлік. Бұл қатарда, «Гауһар» тігін фабрикасы сапалы өнімдерімен республика аумағында кеңінен танылған. Жеңіл өнеркәсіптің өзіндік ауыр қиындықтары бар екенін жасырмаған тігін фабрикасының директоры Әнипа Халбаева бар жауапкершілік осында қызмет ететін 240 азаматшаға артылғанын айтады. Негізінен, арнайы киімдерге тапсырыс қабылдайтын фабрикада өз ісінің шеберлері қызмет етуде.

 Сынақтан өткізу цехының жетекшісі Айгүл Сапарәлиева соңғы 10 жылда фабрика қызметінің өз деңгейінде өсіп-қалыптасуына елеулі еңбегін сіңіріп келеді. Тапсырыс түскен бойда ең алдымен, киімнің денеге қонымдылығы, матаның сапалық деңгейі осындағы мамандардың қырағы бақылауынан өтеді. Цехтағы 20 қызметшінің бірі матаны кесумен, бірі пішумен, енді бірі кестелеумен айналысуда. Мұнан кейін сыдырма, түймелері, жаға-жеңдері тігіледі. Оның әрбіріне өз ісінің шеберлері бекітілген. Осы арқылы дайын болған киімнің алғашқы даналары талапқа толығымен сай келген жағдайда ғана жұмыстар негізгі залға ауысады. 

– Киімдердің сапалы тігіліп, денеге ыңғайлы орналасуы осы сынақтық цехта жұмыс істейтін 20 қызметші әйелдің біліктілігімен тікелей байланысты. Сол себепті, жұмыс уақытында оларға үлкен міндеттер жүктеледі. Барлық зейін, ынта-жігері бекітілген жоспарды сапалы, дер кезінде орындауға жұмылдырылады. Әйел затын мұндайда қаншалықты шыдамды, еңбекқор дегенімізбен де, олардың отанасы, өз жанұясының қадірлі мүшесі екенін де естен шығармай, еңбегін лайықты бағалауға тырысамыз. Қуаныш тойларында лайықты сыяпатпен марапатталып та жатады. Мұндағы келіншектердің арасында көпбалалы аналар аз емес, – дейді цех жетекшісі.

Қызметкерлерге – лайықты қамқорлық

Үшқабатты ғимараттың негізгі залын алып алып отырған пішушілер цехының тиісінше, жұмыс көлемі де аса ауқымды-ақ. Аудитория мүмкіндігіне сай заманауи құрылғылармен жабдықталған. Әр тігіншінің алдына итальяндық тігін мәшинесі қойылған. Қол күшін қажет етпесе де тігіншіге жүктелген міндеттің жүгі ауыр. Себебі, мұнда тігілетін қызметтік жейделерден бастап, арнайы костюмдерге де сұраныс көп. Фабриканың базалық-материалдық жағдайы әр күн сайын 500 дана киім дайындауға мүмкіндік береді.

Ғимараттың бірінші қабатында орналасқан пішушілер де мүмкіндігінше, қажетті маталарды кескіндеп, пішіп, тігіншілер үшін мата кескіндерін қажетті мөлшерде жеткізіп беруге тырысуда. Жалпы саны мұнда 25 адам еңбек етуде.

Спорттық шалбар матасын қиып жатқан Құралай Байырбекова мұндағы қызметінен бір сәт те жалыққан емес. 

– Міне, біздер мұнда қалт еткен қателікке жол бермеуге жұмыла қызмет етудеміз. Осындағы әйелдердің барлығымен тіл табысып жұмыс істейміз. Жұмыс оңай емес, өте мұқият болуды қажет етеді. Жастар келсе, оларды да үйретіп жатамыз, – дейді пішу шебері.

Шынында, ұзақ жылдар бойы осы мекемеде тапжылмай еңбек етіп келе жатқан Роза Пернебекова, Түймеқыз Оразбақова, Зағипа Райымқұлова, Рая Расулова, тағы басқалардың атқарған еңбегін ерлікке пара-пар бағалауға болатындай. Күш-қайрат пен ерік-жігердің ерен үлгісін танытып жүрген фабрика қызметшілері үшін лайықты қамқорлық та жасалуда. Азаматшалардың денсаулық жағдайы тұрақты түрде бақылауға алынып, медициналық тексеруден өтіп тұрады. Бұл үшін арнайы медициналық бақылау бекеті жұмыс істеуде.

Қазақ халқында ежелден келе жатқан ата кәсіптің бірі – қолөнер. Ол ұлттық болмысымызбен бірге сақталып келе жатқан құндылығымыз. Шеберлердің жасаған әрбір бұйымы халықтың тұрмыс-тіршілігімен, салт-дәстүрімен тығыз байланысты болған.

Ондағы сурет, ою-өрнек, бояу, барлығы да өзіндік мән-мағына береді. Біздің бүгінгі кейіпкеріміз қолөнерді кәсібіне айналдырып отырған шебер Айдабергенова Күләш Өсерқызы. 

Күләш ханым ине мен жіпті бала күннен жанына серік еткен. Ол бұл өнерді алғашында, ауыл әйелдерімен бірге киіз басудан бастаған. Кейіннен Шымкенттегі Әбілхан Қастеев атындағы өнер колледжінде түсіп, шеберлігін шыңдаған. Қазір оның жасаған бұйымдары көпшіліктің көңілінен шығып, түрлі жарыстарда жеңіске жетіп жүр. Мәселен, суреттегі кілемі Қазақстан шеберлері байқауында бас жүлдені жеңіп алды. Қойдың жүнінен иіріп жасаған кілемдегі әрбір оюдың өзіндік мән-мағынасы бар. Мысалы, кілемдегі «Ақ отау» деген ою отбасының беріктігін ұстап тұрады. Мұндай оюлар көбіне кілемнің шеткері жағына қолданады. Бұдан бөлек қазақтың шатыр гүл, әсия гүл, қабырға, шексіздік секілді оюлар пайдаланылған.

– Кілемдегі әрбір түс мұқияттылықпен таңдалады. Мысалы, біз Иран, Ауғанстан және араб елдеріне барғанымызда қара түсті кілемдерді көп пайаланатынын көрдік. Себебін сұрағанымызда ол жақта күн ыстық болғандықтан үйге кіргенде салқындықты сезініп, үйдің іші қою көлеңке болуы үшін пайдаланады екен. Ал Еуропа мемлекеттерінің көпшілігі ашық түсті қолданып жүр. Өйткені, географиялық жағдайы оған мүмкіндік береді, – дейді шебер.

Кілем тоқу, оны пайдалану сақ кезеңінен басталса, ою-өрнектерді қолдану тас дәуірінен бері келе жатыр екен. Осы көне қолөнерді Күләш Өсерқызы қазіргі таңда жаңа заманға бейімдеп, ерекше туындылар тудырып жатыр. Мысалы, жақында ғана өткен өнер бәсекесінде «Жаңашылдық» номинациясына ие болды. Күләш ханымның айтуынша қазір ұлттық нақыштағы кілемдерге сұраныс артып келеді. Әсіресе, қой жүнінен тоқылған текемет, алаша, тұскиіз, жайнамаз, қоржын секілді заттарға қызығатындар көп. Өйткені, бұрынғы кезде жүнді жумаған соң лас болған. Ал қазір оны жуып, тазалап әлемдік деңгейде ұялмай көрсете алатын деңгейге жеттік. Сонымен қатар, бұған дейін біздің кілемдеріміз бос тоқылатын. Сондықтан, тез тозып кететін. Енді сол олқылықтың орнын толтырып, жаңа сапалы төсеніштер шығарудамыз дейді.

Кейіпкеріміздің камзол, бешпет, бас киім, аяқ киім және үйге арналған бұйымдарын да сатып алатындардың саны артып келеді екен. Екі ай бұрын ашылған дүкендері қазір көпшілік қызығатын дүниелерге толы. Ал оның жанынан ашылған әйелдер қауымдастығында онға жуық қыз-келіншек тоқыма тоқу мен тігіс тігуден сабақ алуда.

Ән әлемінде есімі танымал Айжігіт Қалмырзаұлы туралы көп дүние айтуға болады. Ол – өнерде өзіндік нақыш, мәнерін айшықтай білген азамат. Парасат-пайымы да бөлек. Биыл асқаралы алпыс жасқа толып отырған композитор ағамен аз-кем сырласқан едік. 

– Айжігіт аға, Шерхан Мұртаза «60-талтүс» деген екен. Сол талтүстегі шағыңызда артыңызға бұрылып, қарасаңыз не көресіз?

– Алпыс – адамның өмір жасындағы бір белес қой. Бұл, өмір мектебінен сабақ алып, тәжірибе жинап, ой түйетін кез. Иә, Шерағаң айтқандай, алпыс тал түс сияқты. Өткенге көз жіберіп, қолымнан не келді, не істедім деп өзіңе іштей есеп береді екенсің. Менің ғұмырымның 26 жылы телеарна саласында өтті. Қатардағы инженерден бастап, директордың техника жөніндегі орынбасары, директордың міндетін де атқарған кездерім болды. Телевидениемен бірге есейіп, бірге шыңдалып, оның өсіп-өркендеуіне шама-шарқымша үлес қостым. Атқарған шаруаларымның бәрін тізбектеуім шарт емес. Тек мына бір жайды айтып өткім келеді. Кезінде құны 1 млн АҚШ долларына жуық ЖТСС-ті (жылжымалы телеспутникті станция) Қарағандыға беретін болған. Корпорация басшылығының сол шешімін өзгертуге ықпал етіп, ЖТСС-ті біздің телеарнаға берілуіне себепші болғаныма қуанамын.

– Шымкентте шығармашылығыңызды дәріптеген шаралар өте ме?

– Халықпен жүздесу – әрбір өнер адамның арманы. Бірақ шығармашылығым жөнінде ел алдына шығып, есеп беру жөнінде әлі күнге ойланбаппын. «Айжігіт, қашан кеш өткізесің? Елге есеп беретін кезің болды ғой» деп достарымның айтқанына біраз болды. 60-тың асқарына шыққанда шығармашылық есеп беруім керек шығар деп ойландым. Жарыққа шықпай жатқан әндерім қаншама?! Алдымен әндер жинағымды екі кітаппен, нотаға түсіріп шығармақпын. Сондай-ақ екінші альбомым жарық көрмек. Алла жазса өнерсүйер қауымға биыл есеп берудің сәті түсетін сияқты.

– Бала күніңізде өнер адамы болам деп ойладыңыз ба, ата-анаңыздың оған қатысы бар ма?

– Өнерге қызығушылық мектеп қабырғасынан басталды. Домбыра тартып, мандалинде ойнадым. Әрі сабақты жақсы оқыдым. Бірақ сол уақытта өнер саласын үлкендер қаламайтын. Маған ұстаздарым: «Сен оқуың керек. Өнерді қуып қайтесің?» – деді. Ата-анам да әртіс болғанымды құптамады. Үлкендердің сөзі бұлжымас заң ғой. Содан құрылысшы, прораб болуды армандадым. Кейін электроника жағына көңіл ауды. Алғашқыда осы сала бойынша Қазақ политехникалық институына оқуға құжат тапсырдым. Бірақ жолым болмай, сынақтан сүріндім.
Келесі жылы әскерге шақырды. Үш күннен соң, келесі шақыртуға қалдыңдар деп қайтарып жіберді. Алып-ұшқан көңілім су сепкендей басылды. Не керек, политехникалық институтқа қайта бардым. Жолым болып, оқуға қабылдандым. Оқу орнында оқып жүріп, әскери мамандық алдым. Сол уақытта «Дос Мұқасан» ансамблінің аты дүркіреп тұрған. Политехникалық институтта оқитын оларға қатты еліктейтінбіз.
Адам композитор болып туылмайды. Бір пайыз дарын болса, 99 пайыз еңбектен тұрады. Мінезім тұйықтау болғандықтан, көпшілік ортадан шеттеп жүремін. Маған адамның ішкі жан-дүниесін тербеген иірімдер әуен арқылы сыртқа шығатындай көрінеді. Тұманбай Молдағалиев сынды ақындардың өлеңдерін жатып-жастана оқитынмын. Бірде өлең жолдарының бірі ұнап қалды. Шумақтары әнге сұранып тұр екен. Әуенін жазса қалай болар екен деген ой туды. Алғашқы әндерім 1980 жылдары институт қабырғасында оқып жүріп, жазылды. Кім біледі, егер өнерге біржола бетбұрғанымда Кеңес Дүйсекеевтей танымал композитор болар ма едім... Солай деп армандап қоятыным бар.

– Айжігіт аға, әндеріңіз республикалық байқауларда топ жарып жүр. Үлкен сахналардағы өнер додасына қалай қатыстыңыз?

– Ән көңілдің айнасы ғой. Ол жайшылықта тумайды. Жас кезімде әртүрлі тақырыптарда әндер жаздым. Менің әндерім достарымның арасында ғана орындалатын. Үлкен сахналарға 2006 жылға дейін шығарылған жоқ. Елу жастан аса патриоттық тақырыптарға жаза бастадым. Бұл бағыттағы әндер менің жаныма жақын болды. Бір күні ақын, сазгер Бақытжан Ауданбаев ұсыныс айтты. Күн сайын әскери бөлімшеде сарбаздардың сапта тұрып, орысша, қала берді той әуендерін айтатынын айтып қалды. Сапты көтеретін ән жазсақ қайтеді деді досым. Көп ұзамай «Қазақстан сарбаздары» жазылды. Жаңа әніміздің тұсауын «Мұнарлан» тобы сахнада кесті. Кейін республикалық байқауда топ жарып, бұл ән жеңімпаз болды. Іле-шала көптеген әскери әндер өмірге келді. Ойды ой қозғайды емес пе? Тәуелсiздiктi жырламаған ақын, әнге қоспаған сазгер кемде-кем. Менiң әндерiмнiң көпшiлiгi – патриоттық әндер. Сондай әндерiмнiң бiрi – «Тәуелсiздiк» әнi. 2011 жылы Ел Тәуелсіздігінің 25 жылдығы кең ауқымда өткізілді. Ұлттық мерекеге мен де өз үлесімді қосқым келді. Ой жетегінде жүргенімде әріптесім Базарбек Түкібаев келді. «Айеке, Тәуелсiздiкке арнап ән шығарсақ қайтедi, Сәкең (Саттар Қуашбаев) екеумiз бiрiгiп жазған өлеңіміз бар еді. Қарап көрсеңіз» дегенi. Мәтiндi оқып шықтым. Шумақтарынан қуаныш пен шаттықтың лебі есіп-ақ тұр. Мәтiнiн ұнатып, алып қалдым. Әуенді ұлттық нақышта жазғым келді. Сөйтіп бір әуен өмiрге келдi. Сол уақытта республикалық «Отаным менің жүрегімде» атты бейнебаяндар байқауы өтіп жатты. Жаңа әнді ойланбастан додаға қосып жібердік. Әннің мерейі үстем болып, жүлдені жеңіп алдық. Қазір патриоттық тақырыптағы әндеріміз үлкен салтанатты жиындарда орындалып жүр. Өз ұжымымда, өнерде де адал еңбек еттім деп ойлаймын. Еңбегім бағаланды, сол үшін әнсүйер қауымға рахмет! Алпысқа келдім деп, қарқынымнан тоқтап қалмаймын.

– Бүгінгі сазгерлерде салмақты туындылар сиреп барады. Көбінесе жеңіл әндерге жақын. Оның сыры неде деп ойлайсыз?

– Шынын айтқанда, өнерді құнсыздандыруға әсер ететін факторлар болады. Кейінгі кезде ол сондай құбылысқа айналды. Ерінбегеннің бәрі әнші болды. Қазір депутат та, актер де әнші. Студияға ән жаздырып, сахнада әнші болып жүр. Өкінішке қарай, музыканың мәнін де, бағасын да түсіретіндер осындай арзан, өзін-өзі жұлдыз көрсететіндер. Музыкаға хобби ретінде қарайтындар көбейді. Және сондайлар кәсіби әншілермен қатар сахнаның төрін бермейтін болды. Бүгінде музыканттарды сала-салаға бөліп, өз бағытына бағыттайтын кәсіби сыншылар да жоқ. Музыка да тірі ағза. Оның да сан-саласы бар. Халық тойда билесін, көңіл көтерсін. Бірақ, той әнін сахнаға шығаруға, талғампаз аудитория алдында орындауға болмайды.

– Ұзақ жылдар бойы «Қазақстан-Шымкент» телеарнасындағы іргелі ұжымда еңбек етіп келесіз. Шығармашылықпен еркін айналыса алмадым деген өкініш жоқ па?

– Аздап өкінішім бар. Жұмыста жүріп, шығармашылықпен еркін айналыса алмайсың. Дегенмен телеарнаға жайдан-жай келген жоқпын. Ол кезде алғашқы теледидар қандай еді?! Соның ішінде не бар? Қалай жұмыс істейді? Адамдары қалай сөйлеп жатыр деген менде қызығушылық болды. Осы мамандықты қалап, Қазақ политехникалық институтына түстім. Қосымша телемастердың курсын да аяқтадым. Сарышаған сынақ полигонында инженер де, оқытушы да болдым. 1990 жылдан бастап ҚР ТРК АҚ Оңтүстік Қазақстан облысы телерадиокомпаниясында қызмет етіп келемін. Алғашқы жылдары телеарнаның жұмысы оңай болған жоқ. Бірақ мен үшін жұмысқа бару мерекемен бірдей секілді еді. Қуанып барып, қуанып қайтатынмын. Телеарнада достарымды арттырдым. Шығармашылығымды шыңдадым. Мұнда менің жастығымның куәсіндей болып жүріп өткен жолым жатыр. Жарыққа шықпаған дүниелерім көп. Алдағы уақытта шаң басқан шығармаларымды қолға алып, ән жазсам деймін.

– Жұртшылық көбінесе сізді танымал әндеріңізбен жақсы біледі. Одан бөлек қырыңыз туралы айтыла бермейді.

– Өнер адамдарын ақсаусақ деп ойлайды ғой. Мен кішкентайымнан үй шаруасына бейіммін. Еңбекпен өстім. Электр жарығын жөндеуден кәсіби шебермін десем, мақтанғаны демеңіз. Жеңіл-желпі автокөліктің ақауларын да өзім тауып жөндей беремін. Тоңазтқыш, теледидар бұзылып қалса, қалпына келтіре қоямын.

– Отбасыңызда жолыңызды қуған балаларыңыз бар ма?

– Балаларымның өнерге икемі бар. Екі қызым Гүлжаһан мен Меруерт музыкалық мектепте оқыды. Домбыраны жақсы шертеді. Бірақ өнер жолын қуған жоқ. Ал ұлым Сәкен кішкентайынан сурет салғанды жақсы көреді. Қаладағы сурет мектебінде білім алды. Ә. Қастеев атындағы колледжді бітірді. Қазір анимациялық дүниелер жасаудың шебері. Жұбайым
Гүлзат Сейтмұратқызы. Мамандығы шет тілдер пәнінің мұғалімі. Аймақтық әлеуметтік иновациялық университетінде оқытушы.

– Әңгімеңізге рахмет!

Сұхбаттасқан
Құттыбике НҰРҒАБЫЛ

Кеңес заманының идеологиялық үрдісінің нәтижесінде Куба елі мейлінше дәріптеліп, сүйкімді сипатқа ие болды. Э.Че Гевара, Ф.Кастро тұлғалары культ дәрежесіне көтеріліп, талай жастың қиялын тербейтін. Бүкілодақтық радиодан «Куба-любовь моя» әні жиі беріліп жататын. 1960-жылдары Б.Момышұлының онда барып, Куба әскерилеріне соғыс тактикасы туралы арнайы лекция оқып қайтқаны ерекше мақтаныш болатын. Кеңес Одағында өтетін жарыстар ма, фестивальдер ме, оған қатысатын Бостандық аралының өкілдері ерекше ілтипатпен қарсы алынатын. 1960 жылдары Кеңес өкіметінің шақыруымен Сочиде демалып жатқан Э.Че Геварамен кездескен мәдениет және кәсіподақ ардагері Ж.Сейітжанов ағаның әңгімесі тіпті әсерлі.

Соңғы кездері Ф.Кастроның жеке оққағары қазақ азаматы болғанын естіп, тағы мерейленіп кеттік.

Ал шымкенттік әнші, бүгінде ҚР еңбек сіңірген әртісі, өнер ұстазы-профессор Құрман Шойынбаевтың аты аңызға айналған Фидель Кастроның алдында ән салып, испан тілді латынамерикандықтардың, Куба революциясының көсемінің ықыласына бөленгенін осы жұрт білер ме екен?!

1985 жыл. Кәсіподақ па, партия ма, әйтеуір, жақсы байланыстар арқасында Шымкент облысының үлкен өнер тобына Куба еліне бару мүмкіндігі туды. Аспаптық ансамбль (жетекшілері-Қ.Байтемиров, Э.Жолдасов), Алматы медицина институтының Шымкентегі филиалы студенттерінің би ансамблі (жетекшісі-Б.Мейірбеков), әншілер, басқалар режиссер С.Елеусізовтың жетекшілігімен әдемі, ұлттық колоритке бай концерттік бағдарлама жасап, Атлантика асып кете барды... Гавана. Сантьяго де Куба. Ауа райы ылғалды, барқыт жел есіп тұр. Жұртшылық келбетінде мамыражай, қой үстіне бозторғай жұмыртқалаған заманды білдіргендей уайымсыз, мерекелік күңіл-күй. Сәлемдері жарқын. Қаладағы ескі автокөліктер жылжуынан билеп, ойнап кетіп бара жатқан халықтың жылдамдығы екпінділеу... Гид қалада бір көшені нұсқап, осы көшемен американдық танкіге мінген Ф.Кастроның 1959 жылы қалаға кіріп келіп, Баттиста режимі талқандалғанын жариялағанын айтты. Бостандық аралы азаматтарының қастерлі орны. Әйгілі Монкада қамалы. Оқ тескен қабырғалары әлі сол күйінде, «ремонт» көрмеген бе деп қаласың. Осында орнатылған үлкен сахнада концерт болмақ. Буырқанған, еркіндік буына әлі тоймағандай халық әр номерді жақсы қабылдап жатыр. Әсіресе сахнаға Құрман шығып Фальвоның «Айтыңдаршы, аруларын» орындағанда халық нөпірі теңіздей толқып кеткендей болды.

Ертеңіне қалалық кинотеатр болса керек, бір жабық ғимаратта Кеңес-Куба достығына арналған іс-шара жоспарланған. Залда мылтық асынған әскерилер көп. Сөз сөйлеу керек. Революциялық рух, өнердегі байланыс туралы ойымызды білгір өнер иесі С.Елеусізовпен пысықтап алдық. Сол жерден «Біз-Кронштадттанбыз» фильмінің күйтабағын тауып қойғанбыз. Аты мәшһүр хореограф-балетмейстер Альберто Алонсоның кездесе кеткені қандай жақсы болды. Ол кісімен бұрын кездескендігіміз, таныстыығымыз бар болатын. Институтта испан тілін үйренгенімнің мұндайда пайдасы тигенін қараңызшы... Залдағы қол шапалақ, жарқын-жарқын лозунгтар сүйемелдеуімен бірер сөз айттық.

Құрман орыстың «Калинкасын» әуелеткенде зал гулеп, тіпті билеп кетті.

Фильм басталды. Соңғы кадрлар; Юденич басшылығындағы ақтар тұтқындалған революцияшыл матростардың мойнына тас байлап, Балтық теңізіне лақтырып жатыр. Залда ығы-жығы дауыстар естіле бастады. Енді бір сәт «но пасаран!» деген ұранмен экран атқылана бастады. Зал іші көк түтін. Еліріп кеткен кубалық патриоттар... Апырай, соғысқа дейінгі фильмнің әсер ету күшін әлі жоймағандығын қараңызшы!

Консулдық өкілі М.Голошубин Серік ағамызға келіп, азғана топты ықшамдап алып, комендантенің резиденциясында өнер көрсетуге алып баратын болды. Ескілеу советтік «Лазбен» тиісті жерге келгенде кубалық әріптес өнерпаздардың ыстық ықыластары өз алдына, әсіресе Фидель Кастроның әскери формада ширақ жүрісі, жарқын жестері, ашық мінезі, күлкісі – бәрі есте. Домбырашылар триосы бірнеше композиция орындап, өнер көрсетуін екпінді төкпе күймен аяқтады. Құрман Ж.Бизенің «Смиттің серенадасын» ерекше сызылтып шырқап берді. Комендантенің риза болғаны сондай, орнына тұрып, қол соқты. Ол топтан бір кісі келіп «рахмет, бәрекелде» дегендей жымиып, ром ұсынғаны тағы бар. Енді Құрман «Айнамкөзді» аңыратты. Сәлден соң Фидель өзінің алып денесімен әншіні құшақтап, арқасынан қағып жылы сөздер айтып жатты. «Грацияс» дегеніне, кубалық сигара ұсынғанына қарағанда көсем риза болғаны көрініп тұрды. Жас әншіміз салтанаттан көңілі тасып шықты.

Ертеңіне әскери линкорға мініп Кариб теңізінің айдынына шығу Құрманға тіпті қанат бітіргендей болды... Орыстың «ухасындай» ас әзірленген. Ромның түр-түрі... Сигаралар... – Анау Майями, яғни Америка, мына жағы – Бермуд үшбұрышы... – әңгіме-таныстыру тоқтамайды. Бір кезде Құрман «Ақбақайды» шырқады. Алыстағы Куба жағалауында, Кариб бассейнінде ол ерекше тыныспен орындалғанын әнші ұмытар емес. Капитан Эрнесто Фуэнтос матростарды сапқа тұрғызды. Бұйрық берді. Кеме зеңбіректері гүрс-гүрс атқылап кеп берді. Тәржімашы бұл қазақ әншісіне көрсетілген құрмет белгісі екенін түсіндірді. Әңгімелерінен бұл әншіге деген комендантенің кешегі ықыласының жалғасы деп ұқтық.

Содан бері Құрман әншілік өнерін шыңдаумен келеді. Орындаушылықтың жоғарғы белесі-консерваторияны, көрнекті ұстаз Н.Шәріповадан бітіріп шықты. К.Байсейітова конкурсында жүлдегер атанды. Кейінгі жетістіктері, тынымсыз концерттік қызметі, мемлекеттің ең жоғарғы құрметті атағын алғаны, ұстаздық етуі – бәрі шымкенттіктердің көз алдында. Ұлыбритания, Польша, Ресей, Монғолия, Өзбекстан сахналарында әнші әуезді үнін, жүрек жылуын қалдырған. Қазақ әуені Әміренің Парижды тамсандырған кезінен бастап талай жерде орнығып, әлем ықыласына бөленіп жатқан болса, ол үрдістің ішінде ҚР еңбек сіңірген әртісі Құрман Шойынбаевтың да үлесі қомақты.

Қазақстанның еңбек сіңірген әртісі Құрман Шойынбаев қаншама ресми қонақтар алдында, мемлекеттер жетекшілері, БҰҰ өкілдері алдында өзінің кең тынысты, тербелген лирикалық-драмалық тенор даусымен қазақтың ән әлемін жайып салды десеңізші! Ал Куба революциясының көсемін байсалды, көрнекті әншіміз ерекше ілтипатпен атайтыны осы бір эпизодты еске түсіруге түрткі болды. Әлем жұртшылығы қатарында Командантеге бақұл бол! – айтамыз. Ал елдің сүйікті әншісі, кезінде Фидельмен дәмдес болып, көсемнің ерекше ықыласына ие болған бұл күнде өнер тарланы ретінде Оңтүстік сахнасының сардарына айналған Құрман Әлтайұлына «шырқа, әуелете бер, қазақ әнін!» – дейміз.

Асқар ӘЛИХАН,
ҚР мәдениет қайраткері

Шымкент – мәдени ошақтар мен ойын-сауық орталықтарының ордасына айналған қала. Облыс әкімі Жансейіт Түймебаев осындай көпшілік орындарда  мәдени демалысты тиімді ұйымдастыру үшін  халық шығармашылығы туындыларын тыңдарманға жеткізу жөнінде ұсыныс жасаған еді.

Игі бастамаға Ш. Қалдаяқов атындағы филармония өнерпаздары қолдау білдіріп, «Шымкент плаза» және «Mega planet» ойын-сауық орталықтарына келуші қала тұрғындары мен қонақтарына өнер көрсетті. Мұндай игі шараны мұнан соң облыстық опера және балет театры іліп әкетті. 

Мәдени тынығуды тиімді ұйымдастыру мақсатында қолға алынған шарада шығармашылық ұжым Қазақстан және әлем композиторларының туындыларын орындады. Көрерменге есімдері кеңінен танымал Үралхан Сейілбекова, Марат Оразымбет, Ерлан Жандарбай, Алексей Скибин, Гүлжан Раскалиева, Қайрат Құлыншақов, Гаухар Ахетова, Мадихан Дүйсеев сынды театр әртістері өнер көрсетті. Вокалдық ансамбль, хор және балет труппасы симфониялық оркестрдің сүйемелдеуімен жиналған қауымға үздік шығармаларды ұсынды. Ойын-сауық орталықтарына келушілер әсем әуен мен тәтті күйді тыңдады. Алдағы уақытта саябақтарда тұрғындар өнер ұжымдарының мәдени шараларын тамашалап, уақыттарын көңілді өткізетін болады.

ЖАСТАР ТЕАТРЫНЫҢ ШЫМЫЛДЫҒЫН ТҮРДІ

Шымкент қаласында Жастар театрының тұсауы кесілді. Өнер көгіне ұядан ұшқан балапандай қанат қаққан жас ұжым алғашқы қойылымына Әлімбек Оразбековтің «Бір түп алма ағашы» пьесасын таңдапты. Олардың «өз театрымыз болса екен» деген ұсынысы қолдау тапты. Көрдік, көзайым болдық. Қоюшы режиссері М.Əуезов атындағы ОҚМУ-дың аға оқытушысы Айна Емкулова.

Оның актер шеберлігі маманы ретінде қолтаңбасы анық байқалды. «Немен бітер екен?» деген ойдың жетегінде тұңғиығына тартып әкетті. Дегенмен көрерменнің көңіл пернесін дөп басты. 

«Баяғыда бір түп алма ағашы болыпты. Үлкейіп өсіп, жеміс беріпті. Ағаш әрі қарай иесінен мұнан да көп алма берсем дейтін көрінеді. Бірақ бұтақтары «сенсіз де өмір сүреміз» деп тамырлы ағаштың көңілін қалдырады. Не істерін білмей күйінген ағаш күннен күнге сола береді. Қойылымда да солай... Тағылымды аңызға негізделген пьеса алма ағашының түбінде баяндалады. 

Әкеден ерте айрылған отбасы мүшелерi аналарының туған күніне жиналып, ауылдағы қарашаңыраққа жиналады. Бауырлардың отбасында бас қосуына үйдің кенжесі Мақсат ықпал етеді. Қоларбаға таңылған мүгедек жігіт анасының жанында болады. Ал көкесі мен әпкесі қалада. Әрқайсысы арман қуып, оқиды. Білім алады. Бірақ олар қарақан басының қамын ойлап, адамдық қасиеттен алыстап кетеді. Жалғызбасты анасы мен мүгедек бауырларының сенімін ақтамайды. Қуанышқа жиналған дастархан басында әрқайсысы өз басының жайын күйттейді. Бірін-бірі тыңдамай, менікі дұрыс деп бет бақтырмайды. 

Бала күнгі бауырмалдық пен сыйластықтың жұрнағы да қалмаған. Бір-бірі үшін жүрегін жұлып беруге дайын бауырлардың жанашырлығы құмға сіңген судай ғайып болған. Бүгінгі қоғамдағы отбасындағы араздық, бауырлар арасында талас-тартыс бір дастархан басындағы сюжет желісіне сыйып тұр. Қойылым соңы қайғылы оқиғамен аяқталады. Мақсат бауырларының араздығына шыдамай, өзін құрбандыққа шалады. 

Алғашқы қойылымда езу тартқызар диалог та, күлдіргі көрініс те көп. Әрине, көрерменге мұндай көңіл күй сыйлау үшін әртістік шеберлік керек. Бірақ қойылымды студенттер кейіпкерлер арқылы сәтті ойнады. Еңбек жолында сахналаған алғашқы туындысын жүрекке жеткізу үшін театр ұжымының көп күш жұмсағаны көрініп тұр. Рөлдерді М. Әуезов атындағы педагогика және мәдениет факультетінің оқытушылары мен студенттері алып шықты. 

– Жастардың өнері толқытты. Кәсіби кемшілігін, шынайы сенімдері толықтырды. Студенттердің ойыны көрермендерін сендірді. Маңыздысы сонда! Жастардың өнерін өрістету арқылы, Оңтүстік мәдениеті жаңа биікке жол ашты, – дейді Ж. Шанин атындағы қазақ драма театрының әдебиет бөлімінің меңгерушісі Сая Қасымбек. Сондай-ақ Жұмат Шанин атындағы облыстық академиялық драма театрының актері, ҚР еңбек сіңірген қайраткері Мәжит Ілиясқаров сөз сөйлеп, жастар театрына сәт-сапар тіледі. 

Алғашқы қойылымға біраз шығармаларды таңдадық. Десе де, Әлімбек Оразбековтің «Бір түп алма ағашына» тоқталдық. Бұл пьеса жастардың жан дүниесіне жақын – дейді театрдың көркемдік жетекшісі, сахна қозғалысы маманы Алмас Бауыржанұлы. 

Қазіргі таңда театр құрамында 30 студент бар. Алдағы уақытта жас ұжым 14 пен 29 аралығындағы өнерге қызығушылығы бар жастарды қабылдайды.

Оңтүстіктегі «Арай» байқауы жылдан жылға тамырын тереңге жайып келеді. Бұл – жас әншінің өнерге қадам басуына үлкен мүмкіндік, болашақ жұлдыздардың бағын ашатын айтулы алаң.

Өнер бәйгесі бүгінге дейін А. Жорабаева, Б. Исаев, В. Ступин, М. Сәдуақасова, Т. Серіков, А. Жүнісбеков сынды талай талантты танытты. Биылғы облыстық опера және балет театрында өткен байқауға 36 үміткер қатысты. 

2017 жыл «Арайдың» нағыз кемелденген кезеңіндей. Өнер бәйгесі таланттардың жарқырай көруінуіне өлшеусіз үлес қосып келеді. Жыл сайын ән додасына осы толқынға бой түзегісі келетін жас әншілер қатысады. 2016 жылы байқауға 293 үміткер қатысуға ниет білдірсе, биыл олардың қатары 500-ден асты. Биылғы байқаудың ерекшелігі де бар. Өнер бәйгесіне үміткерлер тәлімгерлердің қатысуымен іріктеліп алынды. Сөйтіп шешуші сында 24 әнші, 12 іс-жүргізішісі бақ сынады. 

21-ші рет шымылдығын түрген ән додасына нағыз жүйріктерді анықтау қазылар алқасының мүшелеріне оңайға соқпады. 

– Жастармен бірге қобалжыдық. Нағыз талантты табу қиын болды. Үміткерлердің ешқайсысы да осал емес. Бірінен бірі өтеді. Өзіндік үні, әдемі дауысы бар. Шындығында бас жүлдеге де, бірінші орынға лайықты өнерпаздар көп. Ең бастысы, байқауға қатысып, ән айтқанның бәрі бақытты, – дейді қазылар алқасының мүшесі, ҚР мәдениет қайраткері Шахизада Байбатжанова. 

Жобаның жетістігін жеңімпаздарымыз тағы да бір дәлелдеді. Бір қызығы, екі айналымда да жанды дауыста вокалдық топпен ән шырқаған Мағжан Әлтенбаевтың өнеріне көпшілік сүйсінді. Себебі, «Тенор» тобының әншісінің жетістіктері аз емес. Бұған дейін ол 2015 жылғы Ш.Қалдаяқов атындағы облыстық «Менің Қазақстаным» байқауының бас жүлдесін иеленген болатын. Сондай-ақ халықаралық ән байқауларында да жеңіспен оралып жүр. Ал Бәйдібек ауданынан келген үміткер Асан Садықов та болашағынан үміт күттіретін жас әнші. Ол кәсіби әншілер орындайтын «Мой город» әнін кең диапазонды дауысымен шырқап, көпшілікті тәнті етті. 

– Өнерпаздардан кенде емеспіз. «Арай» байқауының форматы бөлек, деңгейі жоғары. Біздің конкурсқа халықаралық фестиваль, бәйгелердің жеңімпаздары қатысып келеді. Бұл елдің назарын өзіне аударып, іле-шала із-түссіз жоғалатын шара емес. Ән додасында бақ сынаған жастардың болашағы бар деп ойлаймын, – деді облыстық мәдениет басқармасының басшысы Нұрболат Ахметжанов. 

Өңіріміздің аудан-қалаларынан үкілі үмітпен келген қатысушылардың арасында мақтаралдық Балжан Тағантұрдының бағы жанды. Жас әншінің шырқаған әні қазылар алқасынан өз бағасын алды. Сондай-ақ әншілер арасында шымкенттік Арай Серікханның (1 орын), Мағжан Әлтенбаевтың (2 орын), Бәйдібек ауданының үміткері – Асан Садықовтың (3 орын) орындаушылық шеберлігі жоғары бағаланды. Ал іс-шара жүргізушілері бойынша бас жүлде Берік 

Сабырға берілді. Бірінші орынды Шымкент қаласының қатысушысы Нұрсұлтан Дәуренбеков иеленсе, екінші орын белесінен Шымқаланың аруы Таңшолпан Имантаева көрінді. Ал, үшінші орын Сайрам ауданының үміткері Нұрлан Қылышбековке бұйырды. Өзге де қатысушылар арнайы жүлде және номинацияларға ие болды. Байқаудың соңы гала-концертке ұласты. Онда Шахизадамен қатар, Айжан Тәженова, Бейбарыс Серікбаев, Әлден Жақсыбеков сынды әншілер өнер көрсетті.

«Оңтүстік Цирк» Қытай Халық Республикасы, Хэнань провинциясының Лоян қаласында өткен III акробатикалық фестивалінен жүлдемен оралды.

Көптеген мемлекеттер бақ сынаған өнер сайысында О.Касаткин жетекшілігіндегі әуе акробаттары жеңіс тұғырынан көрінді. Халықаралық байқауда қиын да күрделі трюктерімен көзге түскен әртістер қытайлық көрерменді таң-тамаша қалдырды. Сөйтіп жүлделі орынды қанжығасына байлады. 

Қытайға сапар барысында «Оңтүстік-Цирк» МКҚК директоры Арман Алиев «Суйтаң Пəйши Чын» циркінің директоры Джаң Гоу Шинмен екіжақты меморандумға қол қойды. 

Ынтымақтастық келісімінің мақсаты – «Оңтүстік цирк» əртістерінің Қытайда өнер көрсетуіне жəне шығармашылық тəжірибе алмасуына ықпал ету болып табылады.

Өнер ұжымын халықаралық байқаудағы жеңісімен құттықтаймыз!

Қарашаның 9 күні облыстық орыс драма театрында Қазақстан Республикасының Мәдениет қайраткері, Оңтүстік Қазақстан облыстық опера және балет театрының әртісі Үралхан Сейлбекованың концерті өтеді. Ел Тәуелсіздігінің 25 жылдығына орай, опера әншісі «Әнім саған, нұрлы елім» атты шығармашылық кешін ұсынбақ. 

Концертте Абай атындағы Қазақ Мемлекеттік академиялық опера және балет театрының, Астана-Опера театрының және Өзбекстан Республикасынан солистер келеді. Сондай-ақ кешті Ш. Қалдаяқов атындағы облыстық филармониясының Сүгір атындағы ұлт-аспаптар оркестрі сүйемелдейді. Театрдың дрижерлік тізгінін Абай атындағы Қазақ Мемлекеттік академиялық опера және балет театрының дирижері Ерболат Ахмедьяров пен Сүгір атындағы ұлт-аспаптар оркестрін Қуаныш Исмаилов ұстайды. 

Бұл кеште көрермен қазақ және Еуропа композиторларының операларынан үзінділер тыңдай алады. 

Өнерсүйер қауымды Үралхан Сейлбекованың ән кешіне шақырамыз. Келіңіздер! Рухани нәр алып қайтыңыздар! 

Өтетін уақыты: 9 қараша сағ. 18.30 Анықтама телефоны: 56-77-43