Шымкент келбеті

Бүгінгі қазақ әдебиеті мен театр өнерінде өзіндік қолтаңбасы бар, ән өнерінің биікте қалықтауына зор үлес қосқан Исраил Сапарбай Оңтүстікке сапарлап келіп, бірқатар игі шараға қатысты. Соның бірі – Шәмші Қалдаяқов атындағы «Менің Қазақстаным» халықаралық ән фестивалі. Бұдан кейін драматург-ақынды облыс әкімі қызметіне жақында ғана тағайындалған өңір басшысы Жансейіт Түймебаев қабылдаған болатын. Бір айдан бері туып-өскен ортасында жүрген Исраил Сапарбаймен сұхбаттасу бізге де бұйырды.

– Исраил аға, Оңтүстікке қош келдіңіз! Сұхбатымызды кеше ғана Ж.Шанин атындағы облыстық қазақ драма театрында өткен «Төрткүл дүние – төрт мезгіл» атты шығармашылық кешіңізден бастайықшы.

– Мұның жаңа жоба екенін көрермендер білген жоқ. Әлемдік классикалық музыканы, әсіресе, италиялық Вивальди мен Чайковскийдің шығармаларын жақсы көремін. Екеуінде де «Времена года» деген табиғаттың төрт мезгіліне арналған туындылар жинағы бар. Сол жинақтарды соңғы он-жиырма жылдан бері зерттеп, зерделеп келемін. Содан, «менің де өмірімнің төрт мезгілі бар, неге осылай топтап, жақсы бір дүние жасамасқа?» деген ой келді. Шығармаларымды саралай бастадым. Балалық, жастық шағым, бүгінге дейінгі өмірімде лирикаға толы шығармаларым өте көп екен. Осының бәрін жылдың төрт мезгілімен үйлестіру керек болды. Ұзақ ойлану мен жемісті жұмыстың арқасында «Төрткүл дүние – төрт мезгіл» деген атау дүниеге келді. Өлеңдерді таңдап алдық. Оған өзімнің әндерімді дайындадым. Адам бала күнінен-ақ бойжеткеннің кім екенін, сұлулықтың не екенін білмейді ғой. Жаңадан бүр жара бастаған сезімге ұқсас әндерді де дұрыс таңдауға тырыстым. Әр мезгілге ән-жырды таңдап болған соң биге көңіл бөлдім. Көптен бері сценарийі дайын тұрған жобама әртістерді театрлардан таңдап аламын ба деп жүргенімде жас қыз-жігіттер хабарласты. «Аға, бізге бүгінгі заманның көзқарасына сай келетін жаңа образдарыңыз бар ма, біз сахналап көрейік» деген ұсыныстарын айтты. Мен ойымда жүрген сценарийді көрсеткенімде: «Іздегеніміз осы еді. Сіздің бізге берген батаңыз болсын, жолымызды осымен ашайық» деп қуанды. Бұл жастардың бишілері де бар, режиссерлық білімдері де бар екен.

– Осындай керемет дүниені өнердің ордасына айналған Алматыда сахналамай, Шымкентті таңдауыңызға не себеп болды?

– Бір ай дайындық жұмыстарын жасап, нәтижесі жақсы болатынына сендік. Ал «қай жерде сахналау» туралы сөз қозғалғанда Оңтүстікті әдейі таңдадым. Өйткені, қиялға толы балалығым, сезімге толы жастығым осында өтті. Шымкентте білім алдым, ғашықтық сезімді бастан кешірдім, отбасын құрдым. Еңбек жолымды бастадым. Мені өмірге қалыптастырған өңірдің халқы бүгінге дейін де қадірімді арттырып, қаланың да, облыстың да «Құрметті азаматы» атағын берді. Осыншама қошеметшіл Оңтүстік жұртшылығына жасаған сыйым болсын деп ойладым. Сол оймен облыстың экс-әкімі Бейбіт
Бәкірұлына кірдім.
Ол кісі шығармашылық кештерім туралы сұрай келе, жеке авторлық кеш өткізбегеніме таңданды. Ресми емес, таза шығармашылық кешімді Шымкентте өткізуге ұсыныс жасады. «Іздегенге сұраған» деген осы болар, қуана келістім. Облыс әкімі көмекшілеріне арнайы тапсырмасын беріп, қазан айының соңына жоспар құрдық. Белгіленген күн жақын қалғанда Оңтүстікте әкім ауысты. Тура сол кезде біз де Шәмші әндерінің фестиваліне қонақ болып келген едік. Жаңа әкім Жансейіт Түймебаев фестивальдан кейін «жақсы ырым болсын, алғашқылардың бірі ретінде сіздерді қабылдайын» деп М.Шахановты, К.Әмірбекті және мені кабинетіне шақырды. Ж.Қансейітұлымен таныса отырып, қолға алған бастамамыз жайлы да сұрадым. «Сол жоспармен жұмыс істеуді тоқтатпаңыз» деп қолдау танытқан әкім «Төрткүл дүние – төрт мезгілдің» жоғары деңгейде көрермен назарына ұсынылуына мүмкіндік берді.

– Кештің ерекше өткені соншалықты көрермен керемет әсер алып қайтты...

– Менің мақсатым да сол. Қазір адамдарды күлдіретін емес, жүректің пернесін дәл шертетін заман. Бүгінде адамдар тым қатыгез болып барады. Жүректің орнында тас тұрғандай. Оған себеп болған жағдайларды ұмыттырғым келеді, жүректерді жібіткім келеді. Адамдар бүгінде бір-бірін жұбатпайды. Әркім өз қайғысын ішіне жұтып, шері шемен болып қатып кеткендей. Абай «Жүректің көзі ашылса, Хақтың түсер сәулесі» деген, мен осы сөздің үдесінен шығуға тырысып жүрмін. Жүректерге лирикамен еніп, көзінен жас болып қайта шықсам, жүректегі мұңды, кірді шайып шыққаным. Күні кеше театрға келген 500-дей көрерменнің бір-бірімен қолтықтасып, жадырай қайтқаны соның жемісі.

– Сіздің авторлық кешіңізді, керемет үйлесімді қойылымдарды Шымкент жұртшылығы сағынатыны рас. Шығармашылық кеште өнер көрсеткен жастар қай театрдан келді?

– Шынымды айтсам, бұрын еш жерде қойылмаған дүниені жоғары деңгейде алып шыққан жастарға таңғалдым. Шын өнерлі екен! Олар Алматыда эстрадалық училищені бітіріп, Т.Жүргенов атындағы өнер академиясында білім алып жүргенде Ресейдің Ярослав
деген ескі қаласына оқуға шақырған екен. Сонда төрт жыл оқып елге оралғаны осы еді. Елден ұзақ уақыт алыстап кетсе де ана тілін тамаша меңгеріпті. Әсел, Дархан, Ұлар, Нұрсұлтан есімді жастармен бірге жұмыс бастадық. Бишілері де бар. Дәл қазір құрамы толық, бір театрға сұранып тұрған команда деуге болады. Бір ғана өкініштісі, ертең жан-жаққа жұмысқа орналасып кетсе, дәл мынадай дайын театрды жоғалтып аламыз.

– Оларды таратып жібермей, алып қалуға не кедергі болып тұр?

– Әрине, ойланбай-ақ алып қалар едім. Біздің Оңтүстікке «Жастар» теарты қажет-ақ. Алматыда мұндай театр бар. Ал Шымкентте жастарға орналасатын үй-жай керек. Тұрақты айлық-табысы керек. Оны қаржыландыруға дүние жимаған екенмін. Оңтүстіктен «Жастар» таетрын ашуға демеушілік жасайтын мәдениет жанашырлары табылып жатса, бізге ұсыныс жасаса, осы құраммен жемісті жұмыс істеуге қуана келісер едік.

– Өнерлі жастарға қолдау көрсетуден біз не ұтамыз?

– Ұтарымыз көп. Біріншіден, Оңтүстік тарихында мұндай театр әзірге жоқ. Екіншіден, миллионға жуық тұрғыны бар еліміздің үшінші қаласында Мәдениет саласының жаңа толқыны жүрер еді. Үшіншіден, облыс орталығы, қала тұрғындары театр саласындағы жаңалыққа бетбұрыс жасайды. Ал қолдау болмаса, біз мынадай үйлесімді жұмыс жасайтын шетелдерде шыңдалған білімді жастарды жинай аламыз ба? Олар ертең әр театрдан жұмыс іздеп шашырап кететінін ойласам мазам кетеді...

– Қазір театрдің әртістері тойларда өнер көрсетіп жүр ғой.

– Мейрамханада өлең оқу өмірімде бір рет осыдан 10 жыл бұрын Қызылорда жақта болған. Театрға сыймай қалған көрермен шығармашылық кешті мейрамханаға барып кешкі ас үстінде жалғастыруға ұсыныс жасады. Ол жақтың мейрамханасы Шымкенттегідей үлкен емес, шағын ғана 200-300 орынға арналған. Бірақ соның өзі толып, ән мен әуені жарасқан әдемі кеш болды. Әндерімді келген жұрт әншілермен бірге орындады. Мен өлең оқыдым. Кеш өте көңілді өтті. Содан кейін бұл әдісті ой елегінен өткізіп көрдім. Болмайды екен. Өйткені, біз өнердің адамымыз. Тойға неше түрлі адам келеді. Әркімнің ой деңгейі әртүрлі. Ақшаға шақырған соң ондағы естіген әр сөзге шыдауың керек. Дәл осылай талантты табыс көзіне айналдырып, өнерді арзандатқым келмеді. Бұған дейін де мал-мүлікке құнығып әрекет жасамадым. Шашым ағарған шақта да қадірімді түсіргім келмейді. Тойға ақша іздеп барғанымнан, елдің таетрға лириканы іздеп келгені әлдеқайда жақсы.

– Аға, әңгімені поэзияға бұрайықшы. Бүгінгі жас ақындардан кімдердің атын атап мақтана аласыз?

– Абай «өлеңге әркімнің-ақ бар таласы» дейді ғой. Аллаға шүкір, маған берген талантты өлеңмен көрсеткім келеді. Сол талантты елге беру үшін барымды салдым. Ал бүгінгі ақындық атты бақты көтеріп жүрген жастардың қатарында Ақберен Елгезекті, Алмас Темірбайды, Тоқтарәлі Таңжарықты, Ерлан Жүністі, Қалқаман Саринді ерекше атап өтемін. Олармен үнемі шығармашылық байланыс жасаймын, «әке» деп сыйлап жатады.

– Тәуелсіз еліміздің бүгіні мен осыдан 25 жыл алдыңғы өмірін салыстыра отырып, не айтар едіңіз?

– Біз 300 жыл бодандықта болған елміз. Еңсемізді тіктеу үшін 25 жыл тым аз уақыт. Елдің әл-ауқаты артқанымен рухани құлдыраудың аз-ақ алдында тұр. Жеңіл-желпі ән мен дарақы ойын күлкі рухани азықтың орнын толтырып жүр. Халықтың көбі кітап оқымайтын болды. Ұлттық құндылықтың не екенін ажырата білмейтін күйде. Арзан күлкі, сүйексіз әңгімеге құмар жандар ұлтымыздың солқылдақ тұсы.
Қазақ «бірін-бірі дос» тартудың орнына жік-жікке бөлініп отырады. Міне, осы жаман әдеттен арылу үшін елді бірлікке, ынтымаққа жұмылдыруға әлі талай жұмыстар атқарылуы тиіс.

– Отбасыңыз туралы айтып өтсеңіз.

– Осында өткен шығармашылық кешіме тұңғышым Жанар мен анасы да қонақ болып келді.
Жанарым соңғы кездері менің шығармаларымды жинақтап, сайт ашып, электронды нұсқасын жасап жатыр. Ұлым Еркебұлан
скрипкада ойнауда еліміздегі үшінші орында аталып жүрген мақтанышым. Ортаншы ұлым да өнерден кенде емес еді, сонысына қарамай талантын құрбан етіп, кәсіпкерлікті қолға алған.

– «Шымкент келбеті» газетіне айтарыңыз бар ма?

– Мен оқу бітіріп, облыстық мәдениет басқармасында автоклуб меңгерушісі болып жүргенімде «Оңтүстік Қазақстан» газеті жұмысқа шақырды. 6-7 жылдай журналист болдым. Сол жылдары қалалық «Шымкент келбеті» газеті ашылғаны есімде.
Жұмамұрат Тұяқбаев ол газетті өте жоғары деңгейге көтерді. Елдің бәрі тез таныды, маған да ұнайтын. 1983 жылдары отбасыммен Алматыға көштім. Қазір Шымкентте 200-ден аса газет-журнал бар дейді ғой. Бірақ, «Шымкент келбеті» газетінің бүгінге дейін жарық көріп келе жатқанын естіп қуандым. Аты да өзгермепті. Бүгінгі ұжымға шығармашылық табыс тілеймін. Қаланың атын арқалаған газет елге абыроймен қызмет ете берсін.

– Әңгімеңізге рахмет!

Сенбі-жексенбі күндері «Оңтүстік цирк» ғимаратында «Африка алыптары» өнер көрсетті. Арыстан жолбарыстармен бірге цирк алаңына шығып, көрерменнің көзайымына айналды. Ал әлемдегі үйретілген жалғыз керік Багирді жаттықтырушылары ерттеп мінді.

Халықаралық табиғат қорғау одағының «Қызыл кітабына» енгізілген мүйізтұмсық атаулының жалғыз үйретілгені – Бонни. 3 тоннаға жуық салмағы бар жануар Оңтүстік жұртшылығына таңсық. Сондықтан болар, Бонни ортаға шыққанда көрермендер демін ішіне тартып өнеріне сүйсініп отырды.

Циркке келушілер бұдан бөлек иттердің, тауешкі, маймылдардың шоуы мен акробаттардың таңғажайып өнеріне куә болып, күлкілі сайқымазақтардың ойындарын тамашалады. Екі бөлімнен тұратын қойылымның үзілісінде көрермендер 6 метрлік керікпен суретке түсуге мүмкіндік алды.

– «Африка алыптары» Шымкент қаласында 27 қарашаға дейін болады. Демалыс күндерін қызықты өткізгісі келген қала тұрғындарына біздің есігіміз ашық, – дейді «Оңтүстік цирк» МКҚК директоры Арман Әлиев.

Шымкент – өнерді ұлықтай білген қала. Дәстүрлі республикалық көңілді тапқырлар клубының кешіне жиналған елдегі таңдаулы құрамалар сахналық қойылымдарында осы ұғымды басты тақырып өзегі етті. «Шымкент қаласы әкімінің жүлдесі» үшін өткен бұл жолғы ойындар ел Тәуелсіздігінің 25 жылдығына арналды. «Түркістан» сарайындағы көрермендерін күлкімен көмкерген көңілді кешті Шымкент қаласының әкімі Ғабидолла Әбдірахымов та тамашалады.

КТК ойындарын «Қазақстан КВН Одағының» президенті Есен Елеукен жүргзіп отырды. 

Әзілкештер сайысына Семей, Орал, Қарағанды, Талдықорған, Қызылорда, Тараз, Алматы қалалары мен Оңтүстік өңірдің Шымкент, Түркістан, Жетісай қалаларынан барлығы 11 команда қатысты. 

Сәлемдесу сынында кешегі сал-серілерден қалған «соңғы тұяқтың» рөлін сомдаған семейлік «Достар» тобының ойыншысы Олжас Тұрғалидың «Бұл өмірден не пайда, Шымкентте ғұмыр кешпесең...» – деп толғануы жиналған көпшіліктің көңілін бір серпілтіп тастады. 2 сағатқа созылған әзіл сайысында командалар ой ұтқырлығы мен қағытпа қалжыңның өзіндік үлгісін танытты.

– Бүгінде айтар әзіл-қалжыңың өткір де жарасымды, шынайы болмаса, көпшілікті таңғалдыру қиын. Заман талабына сай көрерменнің талғамы өзгерген. Адамдардың көбі әзіл-қалжың мен сатиралық шығармалардың мәнін, ерекшелігін түсіне бермейді. Сол себепті, мақтамен бауыздағандай, өмірде болып жатқан оқиғалар мен құбылыстарды сатира арқылы, яғни ащы күлкімен жеткізуге тырысамыз, – дейді алматылық «Ханшайым» құрамасының жетекшісі Рысбала Мейрамханқызы.

Көрерменін күлкіге көміп, жанын жадыратқан жас өнерпаздар өнерін таразылау қазылар алқасына жүктелді. Нәтижесінде, әділқазылар шешімімен Қазақ ұлттық аграрлық университетінің «Ханшайым» командасы (300 мың теңге) қала әкімінің кубогын иеленді. Ал жүлделі І орынды (200 мың теңге) Шымкент қаласының «Байдың балалары» құрамасы жеңіп алса, ІІ орын Алматының «АТУ құрамасына» (150 мың теңге), ІІІ орын (100 мың теңге) Ақмола облысынан келген «Қорғалжын» құрама командасына бұйырды. Ерекше тартымдылығымен көзге түскен «ХҚТУ тарифі» жайдарман тобының ойыншысы Бекұлан Жолдықожа ойындағы «Үздік әзілкеш» номинациясына ие болды.

Жеңімпаздарға дипломдар мен бағалы сыйлықтар табысталды.

Жас таланттарды шыңдап, жаңа табыстарға ынталандырған көңілді тапқырлар кеші алдағы уақытта да жалғасын таппақ.

Цирк – ерекше өнер. Көрерменді көркемдік пен сұлулыққа тәрбиелейді. Биік мақсат пен арманға қанаттандырады. «Оңтүстік Цирктің» қабырғасы қаланған күннен бастап, адамзат баласының қолынан бәрі келетінін дәлелдей бастады. 5 жылда биік белестерді бағындырған. Бүгінгі тыныс-тіршілігімен танысу мақсатында цирктің директоры Арман Әлиевпен сұхбаттасқан едік.

– Арман Махмұтұлы, мекеме жаңа аңдармен толығып жатыр. Жас абдандардың күтімі қалай?

– Бес жылдық мерейтойымызға орай, Шымкент зообағының басшысы Нұрғазы Бұхарбаев екі абданды сыйға тартты. Жас аңдарға ат қоюда қала тұрғындары белсенділік көрсетті. Сөйтіп біріне Шири, біріне Тано есімін бердік. Мағынасына келсек, шири африка тілінен 20, тано 5 деген ұғымды білдіреді. Бұл Тәуелсіздігіміздің 25 жылдығына ерекше тарту болды. Қазір абдандардың жағдайы жақсы. Аң үйретушіміз Азиз алғашқы жаттығуларды үйрете бастады. Жаңа жыл қарсаңында аңдар алғаш рет манежге шығып, өнер көрсетеді.

– Циркте қандай жан-жануарлар бар? Аңдардың күтімі, манежге дайындығы жайлы әңгімелеп берсеңіз.

– Бізде екі арыстан, бір аю, алты жылқы, үш пони, екі итіміз бар. Кейбір адамдардан цирктегі жан-жануарларды қинап үйретеді деген сөзді естіп қаламыз. Бұл – өнерден бейхабар адамның сөзі. Өйткені жануарда адамның баласы сияқты санасы бар. Адам жүрегінің жылуын сезіп, жылы сөйлегенді түсінеді. Біздің үйретушілеріміз де аңдарды ешқашан ренжітпейді. Көңілін табуға, қолдан келгенше мейірімі мен қамқорлығын көрсетуге тырысады. Қыста суық тиіп қалмау үшін жылқыларды жерге жатқызбаймыз. Оларға үнемі ветеринарлық көмек көрсетіліп тұрады. Әртүрлі ауруларға қарсы екпе жасалады. Жануарларға күтушілер кезекшілікпен қарайды. Алдағы уақытта цирк аңдарын жолбарыс, тотықұс, маймылдармен толықтыру жоспарда бар.

– Ал көрермен Маймақ, Жайнақ, Мойнақ атты қонжықтардың өнерін қашан тамашалайды?

– Олар шетелдерде гастрольде жүр. Қазір үш қонжығымыз да манежге үйренді. Нөмірлерді орындау деңгейі қалыптасқан. Бұйырса, өнерін тамашалайтын күн алыс емес.

– Арман Махмұтұлы, Тәуелсіздігіміздің 25 жылдық мерейтойына орай, қаламызда бірқатар шаралар атқарылуда. Мерекеге дайындықтарыңыз қалай?

– Мемлекетіміздің тарихындағы маңызды мерекенің өтуіне өз үлесімізді қосып жатырмыз. Ел Тәуелсіздігінің 25 жылдығын мерекелеуге байланысты облыс әкімі Б.Атамқұловтың төрағалығымен аудандар мен қалаларға, шалғайда орналасқан елдімекендердің тұрғындарына мәдени қызмет көрсету мақсатында облыстық өнер мекемелерінің гастрольдік іссапарлары ұйымдастырылған болатын. «Өнерім саған – ауылым» атты 25 гастрольдік іссапарды Оңтүстік Цирк ұжымы Ордабасы ауданы, Шұбарсу елдімекенінен бастады. Цирктік керуен облыстың барлық аудан, қалаларын қамтитын болады. Сондай-ақ 5 жылдыққа орай, жаңа қойылымдарға дайындық жүргізілуде. Оған Қытай, Ресей, Өзбекстан, Қырғызстан және еліміздегі цирк ұжымдарынан халықаралық қызықты бағдарламалар ұйымдастырылуда.

– Ұжымда кадрдан тапшылық жоқ па?

– Қазір Қазақстанда 4 цирк жұмыс істейді. Жыл сайын
Ж. Елебеков атындағы эстрада-цирк колледжінің 2-3 түлегін жұмысқа қабылдаймыз. Бұрын маман тапшы десек, қазір ұжымымыз жас өнерпаздармен толығуда. Екі манежіміз әртістен босамайды. Қызу қарбалас пен дайындық жүріп жатыр. Бұрынғы басшылық қызмет атқарған достарым келгенде әртістерді көріп: «Осы күнді көрсек деп армандайтын едік. Бәрекелді!» – деп қуанады. Осы орайда, облыс әкімі Б. Бәкірұлының қамқорлығын айтып өткім келеді. Өңір басшысының қолдауымен материалдық-техникалық базамыз нығаюда. Жуырда екі автокөлік алдық. Шапитоға, шағын микроавтобусқа қол жеткіздік. Ал бес жылдығымызға ауыз толтырып айтарлықтай жетістіктеріміз көп. Ұжымдағы өсіп келе жатқан жастарға, кәсіби әртістерге ризамын. Ұжымымыз жас болса да, кәсіби цирктермен үлкен додаларда иық тірестіріп, өнер көрсетіп жүр. Өткен жылы халықаралық «Шабыт» фестивалінде акробатика жанры бойынша бірінші орынды жеңіп алдық. Ал биыл халықаралық «Азия жаңғырығы» фестивалінде «Канат» нөмірімен әртістеріміз күміс жүлдені еншіледі.

– Гастрольге жиі шығасыздар ма?

– Оңтүстік Цирк өзінің труппасымен еліміздің бірнеше қаласында гастрольдерде болды. Жас ұжым болса да, шығармашылық деңгейіміз халықаралық цирктерден кем емес. Әуе гимнасттары және басқа жанрдағы өнерпаздарымыз бірқатар цирк әртістерінен көш ілгері тұр. Биыл Қарағанды қаласына гастрольдік сапармен бардық. Өнерпаздарымыздың шеберлігіне тұрғындар шын көңілден ризашылықтарын білдірді. Бірқатар әртістеріміз келісім-шартпен Қытай, Түркия, Египетте гастрольдік сапарда жүр. Яғни, цирк өнері кез келген мемлекетте бір ғана жерде болмайды. Оның үстіне айына жаңа қойылым қою мүмкін емес. Циркте бір қойылым қойылғаннан кейін бір жыл бойы оны айналдырып, көпшілікке көрсетіп шығуы керек. Ал бір қалада бір нөмірді қайталап қоя алмаймыз. Оған көрермен келмейді.

– Циркке көрерменді тарту жөніндегі ой-пікіріңізді білсек.

– Өнерге баланы мектептен бастап баулыған абзал. Циркке, театрға барған бала кейін өнер ордаларына барғысы келіп тұрады. Болашақта ата-ана болғанда перзентін өнермен тәрбиелейді. Ал жастайынан өнерге қызығушылығы жоқ адамның есейгенде де ықыласы болмауы мүмкін. Өйткені әлі күнге циркімізге, театрға келмеген, есігін ашпаған жандар бар. Сондықтан, өнер мен мәдениет ошақтарына баруға баланың бойын оқушы кезінен үйрету керек. Ал әрбір көрермен қойылымдарымыздан демалуы үшін барымызды саламыз.

– Кейде нөмір жиі қайталанады деген пікірді естиміз...

– Әрбір нөмір әнді фонограмамен айтатындай жеңіл жұмыс емес. Бір кісі осы сауалды маған қойды. «Сіз шпагатка отыра аласыз ба?» дедім. Ол екі айда да істей алмаймын деп уәж айтты. Цирк қойылымындағы кез келген нөмір жақсы шығуы үшін оған кемінде жарты жыл уақыт қажет.

– Өзіңіз де өнерден алыс емессіз. Жоспарларыңызбен бөліссеңіз...

– Менің негізгі мамандығым режиссура және актер. Сондықтан кезінде әзіл әндерді де орындадым. Құқық қорғау органында полицей де болдым. Алайда цирк әлеміне келгелі өнерге құштарлық артты. Өз қызметімді жақсы көремін. Кабинеттен гөрі манежде жүргенді ұнатамын. Ендігі мақсатым актерлік шеберлігімді сынау. Екі метрден асатын еркін сатыға сақтандырусыз шығып трюктерді көрсетуге жаттығудамын. Дегенмен жеке шығармашылығымды да тоқтатпаймын. Әзірге көңілімнен шығатын ән таппай жүрмін.

– Еуропаның танымал Монте-Карлодағы халықаралық цирк фестивалінде бақ сынау ойда бар ма?

– Ол фестивальге қатысу үшін үлкен еңбек, мол тәжірибе қажет. Себебі, ол әлемдегі талабы жоғары әрі мықты доданың бірі. Оған ең үздік деген ұжым ғана қатысады. Монте-Карлодан алтын жүлде алу бақыт қой. Кім біледі, «Оңтүстік Цирк» Монте-Карлоның манежінде өнер көрсетіп жатса таңғалмаңыздар!

– Алдағы мақсаттарыңыз қандай?

– Біріншіден, «Шабыт» халықаралық фестиваліне абыроймен барсақ, жүлде алсақ деген ой бар. Содан кейін жаңа жылдық қойылымдарға дайындықты бастаймыз. Ұжымдық тапсырыстар қабылдап, қосымша қайырымдылық шаралар атқармақ ниеттеміз. Болашақта «Мұздағы цирк» нөмірін бағдарламамызға енгізуді жоспарлап отырмыз. Голландия, Малайзияға әртістеріміз өнер көрсетуге шақырту алып отыр. Мұның бәрі еңбегіміздің нәтижесі деп ойлаймын. Қазір Моңғолия, Қытай, Грузия елдерімен жақсы қарым-қатынастамыз. Өнерлі жастарды циркке тарту үшін балалардың өнер студиясын ашқымыз келеді. Негізгі мақсатымыз – Қазақ циркін дүниежүзіне таныту.

– Әңгімеңізге рахмет!

Сұхбаттасқан

Құттыбике Нұрғабыл

Шымкентте жас суретшілердің көрмесі өтті. Қылқалам өнеріне жаңадан қадам басқан жас дарындардың туындылары Ел Тәуелсіздігінің 25 жылдығына арналды.

Бейнелеу өнері музейінде өткен шара өңірімізде жас суретшілердің шығармашылығын қолдау мақсатында ұйымдастырылды. Тәуелсіздік, Отан, туған жер тақырыптарындағы шығармалар көрермен назарына ұсынылды. Ал туындылар тың тақырыптарды қамтыды. Тамашалаушыларға ой салып, эстетикалық сезім сыйлады. Сондай-ақ, көрме арқылы жас суретшілер тәжірибе алмасып, шығармашылықтарын шыңдауға мүмкіндік алды. Іріктелген еңбектер Астанада өтетін «Шабыт» халықаралық байқауына қатысады. Облыстық жас суретшілер шығармашылық бірлестігінің төрағасы Берік Бейісбековтің айтуынша, "Шабыт" байқауына қатысушыларға облыстық мәдениет басқармасы демеушілік жасайды.

Шымкентте еліміздің түкпір-түкпірінен келген көркемсөз оқу шеберлері бас қосты. 18 жылдан бері дәстүрге айналған Оралхан Бөкей атындағы сайысқа облыстық және қалалық іріктеу кезеңдерінің 16 жеңімпазы қатысты.

Прозалық шығармалардан үзінді оқу және поэтикалық туындыны мәнерлеп оқу бойынша сайысқа түскен оларға жазушы Мархабат Байғұт, қоғам қайраткері Оразгүл Асанғазықызы,
ақын, «Жұлдыз» әдеби журналының бас редакторы Ұлықбек Есдәулет, филология ғылымдарының докторы, фольклортанушы Кенжехан Матыжанов және «Айқын» газетінің бас редакторы Нұртөре Жүсіп баға берді.

– 1998 жылы бірінші рет тіл мерекесін атап өту жөнінде мәдениет министрлігінде шешім қабылданды. Сол кездегі министр Алтынбек Сәрсенбайұлы қалай өтетіні жайлы ақылдасып, сұрау салғанда Оралхан Бөкей атындағы көркемсөз оқу шеберлерінің байқауын өткізуді ұсындық. Өйткені Оралхан жиындарда бас қосқанда «Өзі де Шұға десе, Шұға-ау» деп Бейімбет Майлиннің шығармасынан шашын қайырып қойып, нақышына келтіріп, үзінді оқитын. Ережесін бекіттік. «Атамұра» баспа корпорациясын басқарып жүрген Мұхтар Құл Мұхамедке қоңырау шалдық. Ол қаржылай қолдау көрсетіп, осылайша 1998 жылы бірінші рет байқау өткіздік. Алғашқы жеңімпаз атанғандардың ішінде бүгінде театр сахнасында ойнап жүрген танымал әртістер бар, – дейді Ұлықбек Есдәулет.

Сонымен байқау қорытындысы бойынша бас жүлдені (180 000 теңге) Алматы облысынан келген Қадыржан Сабырақын қанжығасына байлады.

– Мен Алматы облысы, Райымбек ауданы, Қарасаз ауылынан келдім. Бұл жерге келгеннің өзі де жеңіс деп білемін. Қатысушылардың барлығы өз облыстарында дара шығып, үмітін үкілеп келген кіл мықтылар. Жеңімпаз атанғаныма өте қуаныштымын. Оралхан Бөкейдің «Атау керек», сондай-ақ, Мұқағали Мақатаевтың «Шәмілге жазған хаттардан» шығармасынан үзінді оқыдым. Сөз өнерін, киесін түсінетін жастардың көп екеніне тағы бір көзім жетті, – дейді жас ұстаз Қадыржан Серікбекұлы.

Ал қостанайлық Айдана Камелге жүлделі І орын бұйырса (150 мың теңге), қарағандылық Айсұлу Нұртай ІІ орын (120 мың теңге), Солтүстік Қазақстан облысынан келген Ақмарал Хехнай ІІІ орынды (100 мың теңге) иеленді.

Белсенді қатысқаны үшін Елдос Құлшаровқа (Атырау облысы), Мақсұтбек Абылайға (Шығыс Қазақстан облысы), Бақыт Мыңбайға (Оңтүстік Қазақстан облысы), Айнұр Қапановаға (Павлодар облысы) ынталандыру сыйлығы (50 мың теңге) табысталды.

Ал қалған 7 үміткерге байқауға қатысқаны үшін 20 мың теңге көлемінде сыйақы берілді.

Айта кетейік, бұл байқауды ҚР Мәдениет және спорт министрлігі Тілдерді дамыту және қоғамдық-саяси жұмыс комитетінің тапсырысымен «Ш.Шаяхметов атындағы тілдерді дамытудың республикалық үйлестіру-әдістемелік орталығы» ұйымдастырды.

Жуырда Шымкентте өткен «Алтын сақа» балаларға арналған кинофестивалінде Ләйлә Сұлтанқызымен кездесудің сәті түсті. Белгілі тележүргізушімен болған сұхбатты назарларыңызға ұсынамыз.

– Ләйлә Сұлтанқызы, Шымкентке қош келдіңіз! «Алтын сақа» қысқа метражды фильмдердің фестиваліне қазылар алқасының құрамында болдыңыз. Фестивальдің ұйымдастырылуы, қатысушылардың деңгейі қалай болды?

– Фестиваль Оңтүстіктегі киноөндірістің өз деңгейінде дамығандығын көрсетті деп ойлаймын. Егер әлемде, анимацияның отаны үндістер немесе қытайлар десек, ОҚО анимациялық студияларымен еліміздің кино өнімдерінің 80, 90 пайызын құрап отыр. «Алтын сақаның» Шымкент өңірінде өтуінің басты себебі де осы.

– Қатысушылардың арасынан болашағынан үміт күттіретін кинорежиссерлер болды ма?

– Мен анимацияға көп мән бердім. Және қосымша таңдалған 5 туынды алдағы уақытта «Балапан» телеарнасынан көрсетілетін болады. Байқағаным Шымкентте таңдаулы кино режиссерлері бар. Ең қызығы, студенттердің салған туындылары, түсірген дүниелері мені таңғалдырды.

– Ләйлә Сұлтанқызы, өз кітабыңыздың «Менің екінші кітабым» аталуын немен түсіндіресіз?

– Қазақта «қызға қырық үйден тыйым» деген сөз текке айтылмаған. Қыз баласы ретінде маған да отбасында тыйым салынған дүниелер көп болды. Сондықтан болса керек, ешкімге көп ашылған емеспін. Шынымды айтайын, өзімді мазалайтын дүниені өзгеден сұрауды жөн көрмедім. Бұл, бәлкім, қазақ қызына тән биязылық шығар. Содан жан дүниемді мазалаған ойларды ақ параққа түсіре бастадым. Күнделік жазуды әдетке айналдырдым. Меніңше күнделік әр адамның өміріндегі бірінші кітабы деп ойлаймын.

– Кітабыңыздың ерекшелігі неде? Өз ойыңызды бүкпесіз жеткізе алдыңыз ба?

– Әрине ойымды бүкпесіз жеткіздім. Өз өміріме байланысты оқиғалардың басым бөлігі қаз-қалпында берілді. Кейбір жерде ашық жазғаным бар. Бір жыл ішінде алғашқы туындымды жеңіл жазуға тырыстым. Себебі, оқырмандарға жақын болғым келді.

– «Балапан» телеарнасында шетелдік киноөнімдер, соның үшінде анимациялық фильмдер қазақша сөйлей бастады. Осы орайда, отандық киноөнімдердің үлесін арттыру мақсатында не істеп жатырсыздар?

– Бүгінде арнамыз еліміздегі жекелеген студиялармен әріптестік байланыс орнатуда. Олардың анимациялық өнімдерін көрсету құқығын сатып алды. Мәселен, «Сақ» киностудиясынан «Түлкі және тасбақа», «Аңқау батыр», «Мақта қыз бен мысық», «Ала қоңыз», мультфильмдерін алып отырмыз. Сонымен қатар, «Балапан» телеарнасы көрермен назарына әлемдік анимациялық студиялардың озық кинотуындыларын ұсынуда. Бес жыл ішінде эфирімізден 1000-нан аса aнимациялық сериал мен толықметражды мультфильм көрсетілді. Бұл фильмдер мемлекеттік тілде дубляжданып, қазақ баласының танымына негізделіп экранға шықты. Мұның дәлелі, «Николодеон» кинокомпаниясының брендке айналған «Дара», «Диего, алға!», «Кәйлан» сынды мультхикаялары. Сонымен қатар әлемнің ең үздік кинокомпаниялары «Уолт Дисней» және «Сони Пикчерспен» келісім-шарт жасастық. Оған қоса, «Сони Пикчерс», «Синемоушн», «Глобал Медиа Партнер» кинокомпанияларымен келісімге келдік. Демек, «Балапан» ұсынатын анимациялық фильмдердің сапасы арта түспек.

– Балаларымызды батыстық «Tiji» мен «Nickelodeon» арналарынан арашалап алудың қандай жолдары бар?

– Бізді кішкентай көрермендермен алдымен, өзіміздің менталитет, тіл, салт-дәстүр сонымен қатар экрандағы әр қатысушының қазақ болғандығы бір қадам жақындастырады. Ауылдың баласы «Tiji» мен «Nickelodeon» телеарналарын көрмейді. Сіз қаланың баласымен шектеліп отырсыз. Біздің арнаны ауылдың да, қаланың да баласы тамашалайды. Сол себепті біз орыс тілді арналармен бәсекелес бола алмаймыз. Өйткені, қазақ тілді жалғыз телеарна болғандықтан және де оларда жоқ дүниені басқа арналардан бірінші беруге және сапалырақ дубляждауға тырысамыз. Сізге өтірік, маған шын, әрбір дубляждалған анимация не туралы, қандай кейіпкерлер бар екенін мен жақсы білемін. Өйткені, алдын ала «Микки Маус», 6 айдан соң «Черепашка» сынды мульфильмдерді таңдап жоспарлап, біліп отырамыз. Сондықтан, бұл арналармен бәсекелестен гөрі, өзіміздің контентіміздің мықтылығы басты назарда.

– Сізді көрермен тікелей эфирдің шебер жүргізушісі ретінде жоғары бағалайды. Тележүргізуші нендей қабілетімен ерекшеленуі керек деп ойлайсыз?

– Алғаш рет 21 жасымда музыкалық бағдарлама жүргіздім. Камерамен дос болдым. Камера мені, мен камераны жақсы көрдім. Еш уақытта мені мына камераның ар жағында миллион адам көріп отыр деп ойлаған емеспін. Мен досым ретінде қабылдап, досыма әңгіме айтып отырғандай әсер алатынмын. Сол камерамен әлі күнге дейін дос болып келемін. Ерекшелену үшін ең алдымен тәжірибе мен біліктілік қажет. Егер телеарнаға кеше келсем, менің де қолымнан келмес еді. Уақыт өткен сайын шыңдаласың. Барлық қырыңнан бір қадам алға жүріп отыруың керек. Өйткені, бізді көретін көрермен сан түрлі. Сондықтан, мұның бәрі уақыттың, біліктіліктен соң келетін тәжірибенің арқасында ерекшелене түседі.

– Бүгінгі журналистиканың кемшілігі не?

– Өкінішке қарай, бүгінде отандық журналистикада тыңғылықты зерттеулер жоқ. Белгілі бір салаға машықтанған тілшілер саусақпен санарлық. Тіпті, қазір экономика, медицина, мәдениет деп сала таңдамайтын болдық. Сондықтан журналист бесаспап болуға мәжбүр. Біздің басты кемшілігіміз де осында жатқандай. Меніңше, журналист белгілі бір салаға бейімделіп, сол тақырыпта тереңірек үңілгенде ғана өз ісінің нағыз маманы болады деп ойлаймын.Тағы да айта кетерлік жайт – журналист мамандарды дайындау ісінің жолға қойылмағандығы. 3-4 курсты бітіріп, телевизияға өндірістік іс-тәжірибеден өтуге келген студенттер қарапайым ғана дүниелерден бейхабар болып шығады. Яғни, журналистерді дайындау барысында тәжірибе мен теорияның алшақтығы бірден байқалады.

– Ләйлә Сұлтанқызы, «Әйел бақыты» хабарын жүргізу арқылы нәзік жандылардың өміріне тереңірек үңіліп келесіз. Айтыңызшы, әйел бақыты неде екен?

– Әйел бақыты туралы сөз қозғағанда әйелдің өмір бойы бақытты болып жүрмейтінін ескеруге тиіспіз. Біле білсек, әйелдің бақыты бақытты сәттерден ғана тұрады. Мәселен, біреудің бақыты жолдасымен алғаш рет жүздескен сәті болса, енді бірінікі ұлымен қатар отырып кешкі ас ішкен кезі болуы мүмкін. Ең бастысы – жүрегінің тыныштығымен ұласқан сәттер әйелдің бақыты дер едім. Мұндай сәттер күнде болмауы да мүмкін. Десе де, мен барлық әйел затының бақытқа бөлейтін сәттері көбірек болуын тілеймін.

– Алдағы жоспарларыңызбен бөліссеңіз...

– Кез келген жұмыс жоспармен болады. Үлкен-үлкен жобалар жасау, «Әйел бақыты» бағдарламасы деңгейін көтеру. Бағдарламаның ағылшынша нұсқасын жасап, әлемдік деңгейдегі түрлі байқауларға қатыстыру ойда бар. Журналистерге арналған әдістеме де шығарғым келеді.

– Әңгімеңізге рахмет!

Оңтүстік көрермендеріне, әсіресе кішкентай бүлдіршіндерге бес жылдан бері қуаныш сыйлап келе жатқан «Оңтүстік цирк» мекемесі тағы бір жаңа маусымның шымылдығын түрді.

«Балақай-алақай», «Джунгли», «Жаңа жылдық таңертеңгілік», «Таңғажайып керуен» атты төл қойылымдарымен қуантқан цирк ұжымы бұл жолы Ресейден келген «Мұздағы шоу» циркінің қойылымымен ашуды жөн көріпті.

Осылайша Оңтүстік көрермендері алғаш рет көңілді клоундар мен әуе гимнасттарды, үйретілген аң-жануарлар шоуын мұз үстінде тамашалады. Ал қар жауған сәті көрермендерге таңғажайып әсер сыйлады.

– Біздің ұжымның цирк сахнасына аяқ басқанына енді бес жыл толады. Басқа цирктерден ерекшелігіміз сол, біздің әртістер де, жан-жануарларымыз да мұз үстінде өнер көрсетеді. Қойылымымыз кішкентай көрермендер мен олардың ата-аналарына ұнайды деп ойлаймыз, – дейді «Мұздағы шоу» циркінің директоры Оксана
Сергеева.

Ашылу салтанатында ОҚО мəдениет басқармасының басшысы Нұрболат Ахметжанов ізгі лебізін білдіріп, цирктің арнайы қонағы, Олимпиаданың күміс жүлдегері Жазира Жаппарқұлға сый-сияпат тарту етті.

– Біз үнемі жарысқа дайындалып, жаттығу залында жүретіндіктен циркте болмаппын. Бірінші рет қойылым тамашаладым. Қатты ұнады. Енді кішкентай іні-сіңлілерімді ертіп келіп тұрамын, – дейді Ж. Жаппарқұл.

Айта кетейік, қойылым қазанның 2-не дейін жалғасады.

Түрлі ертегі мен мультфильм бейнесінде жасалған бұл қуыршақтар Құралай Күлменова есімді бойжеткеннің қолынан шыққан. Ол «Азат» шағынауданындағы №34 «Ақжелкен» бөбекжай-балабақшаның қызметкері. Кішкентай бүлдіршіндерге ағылшын тілінің әліппесін үйретеді. Ал бос уақытында қолына ине мен мата алып, осындай әдемі туындыларды жасайды.

– Қолөнерге қызығушылық бала кезден оянды. Қуыршақтарыма түрлі көйлектер тігіп, кигізіп қоятынмын. Бірақ мектепті аяқтаған соң таңдауым ағылшын тілі мұғалімі мамандығына түсті. Шымкент Университетіне құжат тапсырып, ойдағыдай аяқтап шықтым. Ал алғашқы еңбек жолым «Ақжелкен» балабақшасынан басталды. Кішкентай балалармен жұмыс жасаған ұнайды, – дейді біздің кейіпкеріміз.

Құралайдың қолөнерге деген ептілігін балабақша меңгерушісі Нұрсұлу Қамбарова мен әдіскер Ләззат Абдукаримова байқаған. Бұл балабақшада балдырғандарға ұлттық тәрбиемен сусындатып, оларды өнердің сан қырына үйрету үшін түрлі байқаулар мен көрмелер жиі ұйымдастырылып тұрады. Сондай көрменің бірінде Құралайдың қолынан шыққан қуыршаққа көпшіліктің назары бірден ауады. Басшылық тарапынан ары қарай сүйікті ісін жалғастыруға қолдау танытып, қажетті материалдармен қамтамасыз етеді. Бағы жанып, бірнеше қалалық, облыстық деңгейдегі көрме, байқаулардан жүлделі оралды. Қуыршақтарға қызығушылық танытқан, қала-аудандардағы өзге балабақшалар да тапсырыс бере бастаған.

– Жыл басына таласқан хайуанаттар жайлы жұмсақ ойыншық жасауды жөн көрдім. Ерекше болу үшін оларды тоқуға кірістім. Ойыншықтардың күрделілігене қарай бір аптадан бастап бір айға дейін уақыт кетеді. Оларды қолына алған бүлдіршіндердің қуанышын елестетемін де бар махабатымды арнаймын. Бүгінде 40-қа жуық қуыршақ жасадым. Болашақта осы кәсібімді жандандырып, ары қарай кеңейтсем деймін. Өйткені табиғи заттардан жасалған бұл қуыршақтар экологиялық таза, бала ағзасына зияны жоқ, – дейді Құралай.

Бүгінгінің балаларын таңғалдыру қиын. Десе де балабақша ұжымы олардың кітапқа деген қызығушылығын арттырып, әр ертегі саналарында тез жатталуы үшін, ересектер тобында шағын қуыршақ театры үйірмесін ашқан. Кішкентай бүлдіршіндер Құралай жасаған жұмсақ ойыншықтардан «Мақта қыз бен мысық», «Шалқан», «Бауырсақ», «Күншіл үйрек», «Кім неден күшті?», «Жеті лақ» сынды ертегілерді қояды.

Тәуелсіздіктің 20 жылдығына орай ел игілігіне берілген бұл балабақша қызметкерлерінің бәрі өнерлі ме дерсіз?! Өйткені аулаға енгеннен-ақ, қолдан жасалған туындыларды көп байқайсыз. Қажетсіз резеңке, сусыннан босаған бөтелкелер көз қуантатын тамаша дүниеге айналған. Балаларға арналған орындық, көліктер, қоян, аю, күн бейнесіндегі ойыншықтар резеңкеден жасалып, түрлі түске боялып, балабақша ауласына ерекше көрік беріп тұр.

Шымкент қаласындағы 75 жылға жуық тарихы бар Жамал Омарова атындағы №1 балалар саз мектебінің шәкірті Карина Нажмеддинова жуырда Италияда өткен халықаралық «Sun of Italy» фестиваль-байқауының Гран При иегері атанып қайтты. 15 жастағы өнерлі қыз үшін биыл өте жемісті жыл болды. Тарата айтар болсақ, ақпан айында Эстонияда өткен Георг Отс атындағы халықаралық байқауда жүлделі 1-ші орынды иеленген болатын. Тағы бір қуанышты жаңалық, Карина биыл мектепті ойдағыдай бітіріп, Астанадағы Өнер университетінің музыка колледжінің студенті атанды.

– Карина, операның отаны Италиядағы өнер сапарың туралы айтып өтсең?

– Байқау Италияның Монтекатини-Терме қаласында өтті. Дүниежүзі бойынша 10-ға жуық мемлекеттен үміткерлер қатысқан конкурс біздерге үлкен сын болды. Әрине, мұндай өнер бәйгелерінде әркімнің де жүлделі орындардан көрінуге тырысатыны анық. Маған да оңай соқпады. Бірақ, ұстазым Халида Исмагилованың ақыл-кеңесімен күнделікті жүргізілген репертуарымызды шыңдаудағы тыңғылықты дайындығымыз өз жемісін берді.

– Репертуардың көптеген жағдайда шешуші рөл атқаратыны белгілі жай. Осы жөнінде ойың қандай?

– Иә, дұрыс айтасыз, ағай. Мұны осы уақытқа дейінгі өткен бірқатар байқаулардың барысында аңғаратынмын. Біз ұстазымыз екеуміз ақылдаса келе қазақ және батыс классиктерінің бірсыпыра дүниелерін електен өткізіп дайындап жүрдік. Сөйтіп, дарынды композитор Латиф Хамидидің «Бұлбұлы» мен Италян әншісі Андрея Бачеллидің репертуарынан «Time to say goodbay» әніне тоқталдық. Екеуі де өзіне тән орындау ерекшеліктері мен қиыншылықтары жетерлік туындылар. Бірақ, бар мүмкіндігімді пайдаланып қалыпты деңгейде орындап шықтым деп айта аламын. Олай болмаған жағдайда Бас жүлдені алуым мүмкін болмас еді.

– Еңбегің жанып тек мектебіміздің ғана емес, сондай-ақ Қазақ елінің абыройын асқақтатып қайттың. Ендігі жерде алға қойған қандай мақсат, армандарың бар?

– Бірінші кезекте колледжді ойдағыдай бітіріп, одан кейінгі оқуды операның отаны Италияда жалғастырсам ба деген ниетім бар. Әрине, армансыз адам болмайды. Менің де болашақтағы арманым қазақтың «бұлбұл қызы» атанған Бибігүл апа Төлегеновадай әнші болу.

– Айтпақшы, биыл көктемде Алматы қаласында атақты әншімен кездескен едің ғой...

– Мектебіміздің атын иеленген Қазақстанның халық әртісі, жезтаңдай әнші Жамал Омарова апамыз туралы кітаптың тұсаукесеріне мектеп басшылығы мені де ала барған еді. Осы салтанатты кештің үстінде «Бұлбұл» әнін шырқағанымда даңқты өнер иесі сахнада маңдайымнан сүйіп ақ батасын берді. Бұл менің өмірімдегі ең бір есте қалар сәт болды.

– Енді, ұшқан ұяңа деген лебізіңді тыңдасақ.

– Мені ән өнеріне баулыған ұстазым Халида Исмагиловаға, концертмейстер Вилен Исмагиловқа, сондай-ақ басқа да музыкалық пәндерден сабақ берген барша мұғалімдеріме «Шымкент келбеті» газеті арқылы үлкен алғысымды айтамын.

– Ендеше, Карина, біз де саған өз тарапымыздан өмірде де, өнерде де тек сәттілік тілейміз!

Сұхбаттасқан
Қалмахан ОМАР,
Ж.Омарова атындағы №1 балалар саз мектебі
директорының орынбасары,
Қазақстан Журналистер одағының мүшесі