«Жастар мен отбасы институтын кешенді қолдау мемлекеттік саясаттың басымдығына айналуға тиіс.»

Н.Ә. Назарбаевтың ҚР халқына арнаған
Жолдауынан үзінді.

Жандос қалтаев, Шымкент қаласы отбасы, балалар және жастар істері жөніндегі басқарма басшысы:

 DSC 1572

Жастар үлкен өмірге қадам басқанда дұрыс таңдау жасауы үшін жасөспірім кезінен-ақ өзіне не қажет екенін білуі тиіс. Сол қажеттілікке орай жастық шағын біліммен байытуға ұмтылуы керек.

Шымкент қаласында жаңадан құрылған Отбасы, балалар және жастар істері жөніндегі басқарманың басшысы Жандос Қалтаев осындай ойда. Біздің Жандос Төлембекұлымен әңгімеміз оның тың бастамалары мен 2019 – Жастар жылында атқаратын жұмыстары жайында өрбіді.

– Жандос Төлембекұлы, Шымкент қаласы республикалық маңызға ие болып, 2019 жылды бұрынғыдан ерек бастап отырған жайы бар.

Осы тарихи маңызы зор кезеңде Мемлекет басшысы 2019 жылды «Жастар жылы» деп жариялады. Жаңа басқарманың бет алысы қалай?

– Шымкент қаласының отбасы, балалар және жастар істері жөніндегі басқармасы өткен жылы-ақ бірқатар шаруаны бастап үлгерді. Есіңізде болса, 2018 жылдың желтоқсанында Шымкент қаласында алғаш рет жастар форумы өтіп, оған республикалық деңгейдегі спикерлер шақырылды.

500-дей жас қатысады деп жоспарлағанбыз. Бірақ, тіркелушілер саны тәулік өтпей 1000-нан асып жығылды. Бұл біздің қоғамдағы жастардың бей-жай жүрмегенінен хабар береді. Шымкентте қазір 250 мыңнан астам жас болса, олардың барлығы дерлік белсенді.

Қандай бастама болмасын, игілігін алуға ұмтылып-ақ тұр. Біз жастардың осы ұмтылысын дер кезінде бағалап, қажеттіліктермен қамтамасыз етуіміз керек.

– Иә, өткен жылы қызмет бабымен Финляндияға да барып қайтқан едіңіз. Әлемде білім беру саласында өте жоғары көрсеткішке қол жеткізген Фин елінің сізді қызықтырған озық тәжірибелері жайлы айтып берсеңіз?

– Финляндияда шынында, баланы өмірге мектеп жасынан дайындайды. «Он үште отау иесі» дейтін қазаққа бұл тәжірибе қажет-ақ. Олар бүгінгі заман талабына сай кәсіби бағдарлаудың керемет әдісін тапқан. Мектеп жасынан-ақ оқушыларға бағыт-бағдар беретін «Me and my city» жобасы ұнады.

«Мен және менің қалам» деген мағынаны білдіретін жобаның қызметі мынадай: шағын кафе секілді кеңсе ішінен қаладағы мекемелер бұрышын ашқан. Мұнда келген ойын баласы өзіне ұнаған мекемеде қызметкер болып «ойнайды».

Ойынды жүргізуші – мекеме басшысы ретінде жасөспірімге тапсырма береді. Мысалы, оқушы БАҚ-ты таңдады делік. Онда мекеме басшысы ретінде сіз оқушыны архитектураға немесе әкімдікке ақпарат алып келуге жұмсайсыз.

Ойын соңына дейін ол осы процесті аяқтап, мақаласын жариялап, ойыннан шыққанда жұмыстан қайтқандай әсер алып шығады.

– Қызық екен. «Ойын» деп аталғанымен, шын мәнінде жұмыс істейтін болып тұр ғой?

– Дәл солай. Біз, ересектер күнделікті қызметте қандай шаруамен бетпе-бет келсек, финляндиялық оқушылар да ойын барысында сондай сынақтардан өтеді.

Әр саланың өзіне тән қиындықтары мен қызықтарын салыстыра келе жасөспірімдер өзіне ұнайтын мамандықты осылай анықтайды. Бізде мектеп жасына дейінгі балаларға арналған ойын алаңшалары, ойын-сауық орталықтары бар.

Ал мектеп оқушылары көбіне сабағына барып келеді де, қалған уақытын үй ауласында доп қуалап немесе компьютер клубтарында ойын ойнаумен өткізеді. Сосын 14 жасқа қараған шақта бұл балалар қай мамандықты таңдау керегін, қай пәннен сынақ-емтиханға дайындалу қажет екенін білмей абдырап қалады.

Балаларын үйірмелерге апарып, дер кезінде қызығушылығын ескеретін ата-аналар аз емес, бірақ сирек екенін мойындауымыз керек. Міне, осы компьютерлік ойындардың орнына мектеп оқушылары үшін Финляндия еліндегі тәжірибені қолдансақ, жастар уақытын «Не істеймін?» деген сұраққа жауап іздеумен өткізбес еді.

Шындығында, жастар 14 жасынан бастап уақытты мамандық таңдауға емес, өзіне қажетті мамандық бойынша білім алуға жұмсауы қажет.

– «Me and my city» жобасын Шымкент қаласында ашу жағын ойланып көрмедіңіз бе? Оған мүмкіндіктер бар ма?

– Мүмкіндік әрқашан бар және бола береді. Мәселе, сол мақсатта жұмсалған қаражаттан нәтиже шығуында. Өткен жылғы форумда да біз бірқатар мекемемен меморандум түздік. Біз жастар үшін оның бәрін тиімді пайдаланып, нәтиже шығаруымыз керек.

Егер нәтижесі көзге көрінбесе, сол жобаға жұмсалған қаржы үшін менің ішім ашиды. Яғни, форум керемет ұйымдастырылды деп қорытындылап қоя салмай, биыл жазға қарай жастарды сол келісім негізінде өндірістік, оқу, іс-тәжірибелерге баруын назарда ұстаймыз.

Одан әрі қарым-қабілетіне қарай жұмысқа орналасуына да жағдай жасамақпыз. Әр жобалар мен бастама аясында осындай жауапкершілік болғанын қалаймын.

Жақында қала әкімі Ғабидолла Рахматоллаұлына бірқатар бастамаларымызды таныстырдық. Жұмыс барысында аталған танымдық ойын туралы жобаны да ұсынғым келіп отыр.

Егер қолдау тауып жатса және оны жүзеге асыру жағын сеніп тапсырса, көзбен көріп келген жобаны жүзеге асыру аса қиын болмас еді. Кәсіпкерлер мен мекеме басшыларымен келіссөздер жүргізе отырып, елде жоқ бастаманы қолға алар едік. Шымкентте ондай ойын орталықтарын ашуға толық мүмкіндік бар.

– Шаһар басшысына таныстырған бастамалар туралы толығырақ айтып өтсеңіз?

– Мемлекет басшысы Нұрсұлтан Назарбаев «2019 жыл – Жастар жылы» деп жариялап, жастарды қолдауға арналған шараларды толық қамтитын әлеуметтік сатының ауқымды платформасын қалыптастыруды тапсырды. Елбасы тапсырмасымен ҚР Үкіметі «Жастар жылын өткізу жөніндегі жол картасын» әзірледі.

Маңызды құжатта жастарды тұрғын үймен және жұмыспен қамтамасыз етуден бастап жас отбасыларды қолдауға дейінгі 11 бағытты көздейді.

Аталған құжат негізінде Шымкент жастарының білімді, денсаулығы мықты, жұмыспен және баспанамен қамтылған, жан-жақты, патриот болып қалыптасуына мүмкіндік беретін өңірлік бағдарлама жасадық. «Шымкент қаласында жастар жылын өткізу жөніндегі Жол картасы» атты бағдарлама аясында 5 бағытты басты назарға алдық.

Бірінші бағыт – білім беру, патриоттық тәрбиені нығайту.

Екінші бағыт – жастардың денсаулығы, салауатты өмір салтын қалыптастыру.

Үшінші бағыт – жастар арасында жұмыссыздықтың алдын алу, кәсіпкерлікті дамыту.

Төртінші бағыт – жастарды қоғамға бейімдеу, шығармашылық қабілетін арттыру.

Бесінші бағыт – отбасын құру, отбасы институтын нығайту, баспана мәселелері.

Осы мәселелерге байланысты басқарманың 2019 жылы жүзеге асырылатын жобалар әзірленді.
2019 жылдың қаңтар айында «Жас сарбаз» республикалық балалар-жасөспірімдер әскери патриоттық қоғамдық қозғалысының Шымкент қаласы бойынша филиалы құрылды.

Қазір білім басқармасымен бірлесіп, «Жас сарбаз» үйірмелерін ашуға кірістік. Өңірлік қорғаныс істері департаментімен де іс-шаралар жоспары бекітілді. Жобаға 3 мыңнан астам жасты қамти аламыз. Жоба барысында әскери-патриоттық клуб құрылып, арнайы лагерь ұйымдастырылады.

– «Жастарды қоғамға бейімдеу» деген бағыт қызықтырып тұр. Қоғамда ерекше пысық жастар бар, олар мемлекеттік бағдарламаны да, басқаны да күтіп отырмай, өз бетінше нәпақа тауып жүреді.

Мысалы, сатушы, даяшы, шаштараз қыздар, қарауыл, вагондарда жүк түсіруші жігіттер... Уақытша еңбек етіп жүрген осындай жастар қоғамнан алыстап кетпей ме? Олармен байланыс орнату жағын қалай ойластырдыңыздар?

– Иә, басқарманың соңғы деректеріне сүйенсек, қазіргі таңда қоғамнан шет қалған немесе маргиналды қала жастарының үлесі 8,3 пайызды құрап отыр. Олар шынында да мемлекет тарапынан берілетін көмектер мен мүмкіндіктерден бейхабар.

Осы жастардың өмірге деген көзқарасын өзгерту мақсатында Эстония мен Финляндияның #outreach (аутрич) тәжірибесін қолданбақпыз. Яғни, Қауіпсіздік Кеңесінің хаттамасына сәйкес, әр базарда «Жастарға қызмет көрсету орталығы» ашылады.

Street workout алаңшаларын құрып, әр дүйсенбі демалысқа шығатын базардағы жастарға футбол, волейбол, баскетбол т.б. спорт түрінен тұрақты жарыстар ұйымдастыруды жоспарлап отырмыз.

Тым жас кезінде қадамын шалыс басып, жолынан адасқан жастарды қоғамнан шеттетпеу керек. Мәселен, бас бостандығынан айыру орындарынан босап шыққан немесе ерте жүктілік, басқа да қателіктерге бой алдырған қыз-жігіттер «мен қателік жасап, қоғамнан шеттеп қалдым» деп ешкімнен көмек сұрамайды.

Олар өзін қабылдаған ортаға қарай жақындай береді. Оның түбі нашақорлыққа, жезөкшелікке, басқа да қауіпті өмірге апарып соғуы мүмкін. Бұл тұрғыда қоғамнан шеттеліп қалған немесе маргиналды жастарға біз өзіміз жақындауымыз керек. Біз қолға алатын «Жаңа өмір» жобасы осы бағытта жұмыс істейтін болады.

Жоба аясында психолог, заңгер, әлеуметтанушы сынды сала мамандарының қатысуымен жыл соңына дейін 200-ге жуық жасты қоғамға бейімдей алсақ, бұл біз үшін үлкен жетістік болмақ.

Дарынды жастардың шығармашылығын шыңдау және қолдау мақсатында Шымкент қаласы әкімінің жүлдесі үшін республикалық «Күміс домбыра» жас ақындар айтысы, «Көңілді тапқырлар алаңы», «Шабыт» жобасы өткізіледі.

Ал таланты бар, қаражаттан қысылып, бейнеклипін түсіре алмай жүрген әнші, биші жастарға техникалық жағынан қолдау көрсетіп, жас ақындардың өлең жинағын шығаруына да атсалысуды жоспарладық.

– Жастардың қоғамнан алшақтап қалуына, ең әуелі, дер кезінде көрсетілмеген дұрыс тәрбие мен бағыт-бағдар себеп. Ал уақыт өте келе жұмыссыздықтың салдарынан да қателікке бой алдырдым деп ақталатын азаматтар бар...

– Жылдың негізгі шарасы – Елбасымыз қатысатын республикалық жұмысшы жастар форумы. Форум Шымкент қаласында өтеді деп жоспарланған.

Күзде өтетін ауқымды шараны ұйымдастыру бойынша министрлікпен бірге дайындық жұмыстарына кірісіп-ақ кеттік. Қала әкімі Ғабидолла Әбдірахымовқа айтулы шараны арнайы экономикалық аймақта өткізуге ұсыныс жасадық.

Одан бөлек, Мемлекет басшысы Н.Назарбаевтың стартаптарды қолдау қорын құру тапсырмасына сәйкес, Кәсіпкерлік басқармасы тарапынан «Мен кәсіпкер боламын» атты жастарды кәсіпкерлікке баулу жобалары жүзеге асырылады.

«IT CAMP» жобалары ұйымдастырылады. Жоба арқылы 200 жасты IOS, Android, Java, C++ жобалары арқылы жастарға базалық білім беріліп, үздіктерді анықтайтын боламыз. Ең бастысы, олар алған практикалық дағдылары мен білімдерін пайдалана отырып, кәсіби деңгейде жұмыс істей алатын болады.

Бұлардан басқа, «Professional» жобасын іске асырамыз. Жобаның мақсаты – жоғары оқу орындарымен бірлесіп, бітіруші курс студенттеріне, қаламыздың ТОП-100 компаниясында тағылымдама ұйымдастыру. Қаламызда орналасқан жұмыс орындарында менторлық институтты қалыптастыру бағытын қолға алады.

Яғни, әр жас маманға бір тәжірибелі маман бекітіліп, жоба аясында мыңға жуық жас тағылымдамадан өтіп, кәсіби біліктілігін арттырады. Жұмысқа орналасуына жағдай жасайды.

– Жоспар нәтижелі болуына тілектеспіз, әңгімеңізге рахмет!

Шымкент қаласының аумағына 2014 жылы енген елдімекендерде жер телімін қалалық мекенжай бойынша қайта рәсімдеу жұмыстарын әлі күнге аяқтай алмай жүрген тұрғындар бар. Тұрғылықты жері нақты заңдастырылмағандықтан Абдулабад, Тұрдыабад, Базарқақпа, Шаңырақ елдімекенінің кей тұрғындары мекенжай анықтамасын ала алмай, соның салдарынан түрлі мүмкіндіктерден қағылып отыр.

DSC 4065

Шымкент қаласы мәслихатының депутаты Марат Тамабаев №21 сайлау округінің тұрғындарымен кездесіп, жер телімін әлі күнге қалалық мекенжай бойынша заңдастыра алмай жүрген тұрғындардың арыз-шағымын тыңдады. Қала аумағына енген елдімекендер мен тұрғын алаптардағы өзекті мәселелерді зерделеу мақсатында Шымкент қалалық мәслихаты бірқатар басқармаға шақыру жіберген.

Тұрғындар арызын тыңдауға Шымкент қалалық жолаушылар көлігі және автомобиль жолдары басқармасының өкілі Қ.Баймендиев пен Шымкент қаласы жер қатынастары және жердің пайдаланылуы мен қорғалуын бақылау басқармасының бас маманы С.Мұратов келді.

Еңбекші аудан әкімі аппаратының Қаратөбе аумағы бойынша халықпен жұмыс жүргізу бөлімінің басшысы Самат Жүнісбаевтың төрағалығымен өткен жиынға Абдулабад, Тұрдыабад, Базарқақпа, Шаңырақ елдімекендерінің ауыл билері және тұрғындары жиналды.

Ауыз су мәселесі шешімін тапты

– Мемлекет басшысы Н.Назарбаев 2019 жылды «Жастар жылы» деп жариялады. Сондай-ақ, Шымкент республикалық маңызы бар қала мәртебесін алды. Бюджет көлемі бұрынғыдан артты. Ал мәселелерді қарау, оны шешу жолдары оңайланды. Бірқатар заңнамалық өзгерістер орын алды. Осының бәрін негізге алатын болсақ, халық арызын қарау бұрынғыдан жедел атқарылуы тиіс, – деді Марат Сәрсекұлы.

DSC 4136

Депутаттың айтуынша, 2018 жылы Қаратөбе аумағында 30-дан аса жол белгісі орнатылып, әлеуметтік бағыттағы 1 қоғамдық көлік жаңа кестемен өз жұмысын бастаған. Бұған дейін ауыз суға жарымай отырған Тұрдыабад, Абдулабад елдімекендерінде аталған мәселе шешімін тапты.

Қала бюджетінен қаражат бөлініп, су құбырларын тарту құрылысы аяқталды. Енді жазға дейін аталған елдімекендерде абоненттеу жұмыстары жүргізілмек. Ауыз су бойынша аталған жұмыстар биылғы жыл соңына дейін Базарқақпа тұрғын алабында да жалғасады.

– Ескеретін бір нәрсе бар: белгілі бір жұмыстарды жүргізу үшін жобалық-сметалық құжаттарға биыл қаражат қаралған болса, келесі жылы ол жоба орындалу мақсатында бюджетке ұсынылуы керек. Егер ол жоба әзірленбей немесе әзірленген жоба жоба күйінде 2-3 жылға шегеріліп қала берсе, демек, бюджет қаражаты босқа жұмсалды деген сөз.

Қазіргі тәртіп осындай, – деген М.Тамабаев бұдан былай «жобалық-сметалық құжаттар әзірленуде» деген жауаптың нәтижелі орындалуына баса мән беруді еске салды.

Мұрағаттағы құжаттарды сұрау қажет

Халықпен кездесуде шешуі қиын түйіннің бірі – тұрғылықты мекенжай, жер дауы мәселесі сөз болды.
Базарқақпа тұрғын алабының биі Абдумутал Исраилов тұрғындар үйдің техникалық паспортын қайта жасатуға мәжбүр болып отырғанын алға тартты.

– Біз қазіргі үйіміздің құжаттарын Базарқақпа тұрғын алабы Сайрам ауданына қарасты кезде жасатқанбыз. Енді қала аумағына енген соң жаңа мекенжайды заңдастыру мақсатында құжаттарды рәсімдейін десек, үйдің техникалық паспортын қабылдамай отыр.

Соның салдарынан біз қайтадан техникалық паспорт үшін шығындалып, жасатуымызға тура келмек. Қала аумағына енген елдімекен, тұрғын алаптардың құжаттарын аудандардан алдыру жағын неге қолға алмасқа? – дейді ауыл биі.
А.Исраиловтың айтуынша, үй құжаттары дұрыс болмағандықтан, тұрғылықты мекенжайы бойынша анықтама ала алмай отырған тұрғындар да бар.

– Қала аумағына енген елдімекендердің құжатын жинақтап өткізуге Сайрам, Төлеби ауданының мұрағаттары да құлықсыз. Шымкент қаласының мұрағат қызметі осы ақпан айында Ақпараттандыру, мемлекеттік қызметтер көрсету жəне архивтер басқармасына берілді.

Аталған басқарма аудандарға сұраныс хат жолдау жағын қарастырғаны дұрыс. Себебі, мұнда мекенжай анықтамасының жоғынан әлеуметтік төлемдер мен жәрдемақыдан қағылып, тіпті несие алуы мұңға айналған тұрғындар бар, – деп түсіндірді депутат.

Жылжымайтын мүлікті жаңа мекенжай бойынша қайта рәсімдеу барысында кездесетін қиындықтарға жиі қозғау салатын халық қалаулысы сыбайлас жемқорлықты болдырмауды алға тартты.

– Сұлтан Даниярұлы, қала аумағына енген 44 елдімекен халықтың өтінішімен жүзеге асқан жоба емес. Бұл – урбанизация үдерісі нәтижесінде жасалған Шымкент қаласының агломерациясы.

Демек, стратегиялық маңызы бар өзгерістердің орындалуына жергілікті тұрғындар ғана емес, оларға осы бағытта қызмет көрсететін әрбір мекеме қызметкері мүдделі болуға міндетті. Жерді заңдастыру, құжаттарды рәсімдеу кезінде осы мәселеге мән берулеріңізді сұраймын, – деді М.Тамабаев.

Шымкент қаласы жер қатынастары және жердің пайдаланылуы мен қорғалуын бақылау басқармасының бас маманы Сұлтан Мұратов жиында қозғалған мәселелерді басшылық назарына ұсынатынын айтты.

«Жеріме үй салып алды...»

– Біз Сайрам ауданына қарайтын кезде менің атыма берілген жерге қазір басқа біреу үй салып алды. Олар жерді қалалық мекенжай бойынша заңдастырып алған. Оның да, менің де жерге мемлекеттік актіміз бар. Салығын да төлегенбіз. Бірақ, екі ортада мен жер телімінсіз қалып отырмын, – деп көмек сұрады Гүлнар Тампиева.

С.Мұратов бұл азаматшаға көмектесетінін айтып, дәл осындай сұрақпен бетпе-бет келген қала тұрғындары болса, басқарма қызметіне жүгінуге шақырды.

Абдуллабад елдімекенінің ауыл биі И.Эргешов №148 бағытта жүре бастаған жаңа қоғамдық көліктің жол жүру кестесін Сайрамның орталығына дейін созып беруді өтінді. Бұл сұраққа Шымкент қалалық жолаушылар көлігі және автомобиль жолдары басқармасының бөлім басшысы Қайрат Байменов жауап берді.

– Шымкентте әлеуметтік бағытта жүретін 10 бағыт болса, қазір оның 4 бағыты қызмет көрсете бастады. №148 қоғамдық көлік – соның бірі. Биыл Шымкент қаласына тағы жаңа автобустар алынады. Сонда қалған 6 әлеуметтік бағытты іске қосамыз. Сіздердің өтінішіңізді сол кезде қарап, кестеге аздаған өзгеріс енгізуді басшылық назарына ұсынатын боламыз, – деді бас маман.

DSC 4158

Халықпен кездесу барысында айтылған бірқатар сұрақтарды Шымкент қаласы мәслихатының депутаты М. Тамабаев және әкімдік, басқарма қызметкерлері назарда ұстайтынын мәлімдеді. Оң шешімін тапқан мәселелерді біз – тілшілер де тасада қалдырмаймыз.

Үш басқарманың атауы өзгерді

Среда, 13 Февраль 2019 04:06

Шымкент қаласы мәслихатының кезектен тыс қырық төртінші сессиясы өтті. Қала әкімі Ғабидолла Әбдірахымовтың қатысуымен өткен сессия отырысында «Шымкент қаласының басқару схемасы туралы» шешіміне өзгерістер енгізу мəселесі қаралды.

DSC 2372

Шымкент қаласы əкім аппаратының басшысы Е.Əлімқұлов қалалық мəслихат депутаттарының назарына үш басқарманың атауын редакциялауды ұсынды.

– Шымкент қаласы мәслихатының 2018 жылғы 22 маусымдағы шешіміне сәйкес «Шымкент қаласының басқару схемасы» 22 басқарма болып бекітілген болатын.

Бүгінгі таңда аталған схемаға бірқатар өзгеріс енгізу қажеттілігі туындап отыр. Елбасының тапсырмасымен «Цифрлы Қазақстан» мемлекеттік бағдарламасы өз нәтижесін беруде. Ағымдағы жылы «ақылды технологиялар» 12 саланы қамтиды және 20-дан астам жоба іске аспақ. Осыған байланысты бөлек профильді басқарма құру қажеттігі туындады. Қазірдің өзінде еліміздің 8 өңірінде цифрландыруды жүргізетін басқармалар құрылған, – деді Еркеғали Амантайұлы.

Сондай-ақ, Аппарат басшысының айтуынша, Шымкент қаласының Туризм жəне сыртқы байланыстар басқармасы қызмет көрсетудегі негізгі басымдықты қаладағы туристік әлеуеттің дамуына ықпал етуге және инфрақұрылымдық жағдайдың жақсаруына бағыттауы тиіс.

Сыртқы байланыстар функциясын Шымкент қаласы әкімінің аппаратына беріп, басқарма атауын өзгертуді ұсынды.
Аппарат басшысының ұсынысын Шымкент қаласы мəслихатының депутаттары бірауыздан қолдады.
Шымкент қаласының басқару схемасының:

«Туризм жəне сыртқы байланыстар басқармасы» деген жолы «Туризм басқармасы» болып;
«Мəдениет жəне тілдерді дамыту басқармасы» деген жолы «Шымкент қаласының мəдениет, тілдерді дамыту жəне архивтер басқармасы» болып;

«Ақпараттандыру, мемлекеттік қызметтер көрсету жəне архивтер басқармасы» деген жолы «Цифрландыру басқармасы» болып, өзгерту енгізілді.

Елбасымыз Жарлыққа қол қойғаннан кейін Шымкент республикалық маңызы бар қала мәртебесін алды. Жаңа статус жаңа мүмкіндіктерге жол ашты. Құрылымдық бөлімдер басқарма болып қайта құрылды. Сонымен қатар, қала әкімі Ғабидолла Әбдірахымовтың қаулысымен республикалық маңызы бар қалалар мен облыстарда ғана болған бірқатар басқармалар Шымкент қаласының жаңа тарихымен бірге өз жұмысын бастады.

Сондай жаңа басқарманың бірі – Мемлекеттік сәулет-құрылыс бақылау басқармасы. Басқарма басшысы Берік Тастанбекұлы Дүйсеновпен жаңа ұжымның жұмыс барысы туралы сұхбаттастық.

DSC 0572

– Берік Тастанбекұлы, жаңа басқарманы тізгіндедіңіз, құтты болсын! Аты жаңа болғанымен, жұмысы «нөлден» басталатын ұжымды қалыптастыру оңай емес. Жаңа басқарманың міндеттерін атап өтіңізші?

– Жаңа өзгерістер баршамызға құтты, игілікті болсын! «Қазақстан Республикасындағы сәулет, қала құрылысы және құрылыс қызметі» туралы Заңына сәйкес мемлекеттік сәулет-құрылыс инспекциясына:

салынып (реконструкцияланып, кеңейтіліп, жаңғыртылып, күрделі жөндеуден өткізіліп) жатқан және пайдалануға берілген нысандардың мониторингі;
жойылмайтын бұзушылықтарға жол берген, не жол берілген бұзушылықтарды белгіленген нормативтік мерзімде жоймаған заңды және лауазымды тұлғаларға қатысты заңнамада белгіленген шараларды қолдану;
техникалық және авторлық қадағалаулар қызметіне бақылауды жүзеге асыру;

нысандарды салу кезiнде тапсырыс берушiнiң (меншiк иесiнiң) техникалық және авторлық қадағалауларды ұйымдастыруына жүзеге асыруын бақылайды.
Мемлекеттік сәулет-құрылыс бақылау басқармасына қала аумағында кәсіпкерлік нысаннан бастап бюджет қаражатына салып жатқан құрылыстарды басқармаға бастайтыны туралы хабарлама жіберуі шарт. Басқарма міндетінің бірі – нысандарда құрылыс-монтаж жұмыстарының басталуы жөніндегі хабарламаның болуын бақылау.

Екіншіден, құрылыс-монтаж жұмыстарының сапасын бақылайды, пайдалануға берілген нысан адам өміріне қауіпсіз болуы тиіс. Сондай-ақ, басқарманың бұдан басқа да міндеттері туралы Шымкент қаласы әкімдігінің ресми сайтынан білуге болады.

– Құрылыс бастайтын кез келген азамат Басқармаға хабарлама жіберуі тиіс дедіңіз. Құжатты рәсімдеу жұмыстары күрделі емес пе?

2

– Жоқ. Ешқандай қиындығы жоқ. Тіпті, ол үшін Басқармаға келудің де қажеті жоқ. Қазір мемлекеттік мекемелердің барлығы «Цифрлы Қазақстан» бағдарламасына орай электронды түрде қызмет көрсетуде. Сол қызметті пайдаланып, «Құрылыс болатын мекенжайды, құрылыстың атауын, тапсырысшыны яғни меншік иесін, мердігерді, техникалық және авторлық қадағалаушыларды, құрылыс нысанның басталуы мен аяқталу мерзімін көрсетіп, құрылысты бастайтындығыңыз туралы» хабарламаны электронды түрде жолдай аласыздар.

– Бұл хабарламаның маңызы неде?

– Мәселен, біреу ауыл шаруашылығы мақсатында пайдалануға тиіс жерге коммерциялық нысан салып алады немесе үй салу үшін берілген жерге дүкен, әсемдік салонын, монша, жекеменшік балабақша тұрғызады. Жер телімінің қожайыны алдымен жердің нысаналы мақсатын өзгерту жағын заңдастырып алуы қажет. Яғни салынатын құрылыс нысанымен жердің нысаналы мақсаты сәйкес болу қажет.

Бұл жұмыстар біздің әріптесіміз – Шымкент қаласының жер қатынастары және жердің пайдаланылуы мен қорғалуын бақылау басқармасы және Сәулет және қала құрылысы басқармасымен қаланың Бас жоспарына сәйкес жүргізіледі. Жер құжаттарын заңдастырылған соң, құрылыс нысанның жұмыс жобасы жасап сараптаманың оң қорытындысы алынуы қажет. Жоғарыда айтылғандай бұдан кейін біздің басқармаға электронды түрде «Құрылыс Монтаж Жұмыстарын Бастаймын» деп, хабарламаны жолдайды. Маңызы сол, құрылыс жүргізу барысында заңсыздыққа жол бермеу.

– Басқарма басшылыққа алатын заңнамаларға тоқтала кетсеңіз...

– Әрине. Біріншіден, әр азаматтың күнделікті басқармаға арыз-шағым келтіруіне байланысты ол «Жеке және заңды тұлғалардың өтініштерін қарау тәртібі туралы» ҚР Заңы, салалық жұмысымызға байланысты «Сәулет, қала құрылысы және құрылыс қызметі туралы» ҚР Заңы, «Рұқсаттар және хабарламалар» туралы ҚР Заңы. Бұдан бөлек, ҚР Кәсіпкерлік Кодексі, ҚР Азаматтық Кодексі және құқықбұзушыларға жауапкершілікке тартуға байланысты ол ҚР әкімшілік құқық бұзушылық туралы Кодекс пен тағы 5 бұйрық негізінде әрекет етеміз.

– «Құрылыстың жобасы алдын ала жасалып, бекітілуі тиіс» дедіңіз. Талаптың бұл түрі жекеменшік үй салатындарға да қатысты ма?

– Бұл талап ғимараттың қабатына байланысты. Егер жекеменшік тұрғын үй 2 қабаттан аспаса, бұл нысанға құрылыс жобасы және оның оң сараптама қорытындысы талап етілмейді. Ал одан биік ауқымды ғимараттардың барлығында құрылыс жобасы жасалып және сараптамадан өтуі міндетті.

– Хабарламаны жібермей құрылысты бастаған жағдайда...

5

– Егер, Мемлекеттік сәулет-құрылыс бақылау басқармасына аталған хабарламаны жібермей, өз бетінше құрылысты бастағаны туралы біздің мекемеге шағым түссе, біз ол құрылыс нысанның меншік иесіне басқармамен тексеретіндігі туралы ескерту хат жолдаймыз. Сосын шағымды Прокуратурада тіркеп, шағымда көрсетілген нысанның құжаттарын тексеруді бастаймыз. Құжаттары болмаған жағдайда ҚР ӘҚБтК-нің 316, 321, 318, 463-баптары бойынша айыппұл саламыз.

Құрылысты заңсыз бастаған кәсіпкерлік нысанға салынатын айыппұл көлемі 1 млн теңгеден асады. 2018 жылғы өзгерістерге сәйкес, құрылыс иесі айтылған айыптармен келісіп, айыппұлды 7 күнде төлейтін болса, 50%-ға жеңілдетіледі. Содан кейін құрылысты тоқтату туралы нұсқама береміз. Айыппұл төлеуден бөлек құрылысты одан әрі жалғастыру үшін заңдастыруға міндетті. Яғни, жоғарыда аталған құжаттар айыппұл төлегеннен кейін де талап етіледі. Бұл талаптарды орындамай жұмысты жалғастыруға тыйым салынады.

– Түсінікті. Енді ұжымдағы қызметкерлер туралы айтып берсеңіз.

– Біздің Басқарма Шымкент қаласы әкімдігі ғимаратының 9-қабатында орналасты. Ұжымда басшы және үш бөлім бар, жалпы басқармада 12 мемлекеттік қызметкер жұмыс істейді. Қазір 3 орын бос тұр. Сонда Басқармада жалпы 15 штат бар. Сонымен бірге, тағы 8 адам келісім-шарт негізінде жұмыс істейді. Бөлімдердің жұмысына келетін болсақ, Әкімшілік- құқықтық бөлімі негізінен ішкі әкімшілік жұмыстарды атқарады. Екіншісі, қалалық мемлекеттік сәулет-құрылыс инспекциясы бөлімі.

Құрылыс нысандарын тексеретін, мониторинг жүргізіп, хабарламаны бақылайтын осы бөлім қызметкерлері. Үшіншісі, лицензиялау және аттестаттау бөлімі. Құрылыс-монтаж жұмыстарын жүргізу үшін және жобалау үшін лицензияны мердігерлер осы бөлім арқылы алады. Ал техникалық қадағалаушылар тест тапсырып, аттестат алады. Олар жоғарыда атап өткен заң талаптарын жетік біліп, құрылыс саласына қатысты сұрақтардан сүрінбей өтуі қажет.

– 2018 жылдың ІІ жартысында құрылған Басқарма жылды қалай қорытындылады? Нәтижені әріптестеріңізбен салыстырып, мақтана аласыз ба?

– Мақтануға да болады (күлді). Басқарма құрылғаннан кейін өзінің тікелей функционалдық міндетіне қазан айынан бастап кірісті. Себебі тамыз, қыркүйек айларында қызметкерлер конкурс арқылы қабылданды. Қазан, қараша, желтоқсан айы. Осы үш ай тым аз болғанымен, көрсеткіш жаман емес. Бірінші кезекте (shymkent.gov.kz сайтында орналасқан) 1 минуттық қысқа бейнероликтер дайындадық.

Одан қала тұрғындары жерге мемлекеттік акт алудан бастап, құрылысты бастауға дейін қандай саладан өту керегін біле алады. Үш айдағы бақылау барысында 145 адамды әкімшілік жауапкершілікке тарттық. Салынған айыппұл көлемі 34 млн теңгеден астам қаржыны құрайды. Бұдан бөлек нысаналы мақсатына сай қолданылмаған 8 құрылыс нысанын заңсыз деп тану және оны мәжбүрлеп бұзу туралы сотқа 8 талап-арыз жолдадық.

– Құрылыс нысаны өрт жолдарын жаппауы тиіс дедік. Осы талапты бұзған коммерциялық құрылыс нысандарын байқаған қала тұрғындары Басқармаға арыздана ала ма?

– Әрине! Барлығымыздың мақсатымыз – Шымкент қаласын көркейту. Осы жолда заңсыздыққа жол бермеу, қаланың Бас жоспарына сәйкес сәулеттік келбетін дұрыс қалыптастыру. Шаһардың шырайын арттыруға әрбір тұрғын мүдделі болса, бұл бізді тек қуантады.

– Әңгімеңізге рахмет!

Ардагерлермен кеңесті

Пятница, 08 Февраль 2019 04:27

Шымкент қаласының ардагерлері және зиялы қауым өкілдері Шымкент қаласы мəслихатының депутаттарымен Елбасының «Ұлы даланың жеті қыры» атты мақаласы төңірегінде пікір алмасып, еліміздің ертеңі болар жастардың тəрбиесіне байланысты ойларын ортаға салды.

ардагерлер мен депутаттар

Дөңгелек үстелді Шымкент қаласы мəслихатының хатшысы Ғани Ташқараев ашып, мəслихаттың атқарған жұмыстары жайлы мəлімдеме жасады. Алқалы жиынға қалалық ардагерлер кеңесінің төрағасы Исамудин Рысбай бастаған Мамыт Құрманбеков, Бекет Тұрғараев, Махамбет Сапарбаев сынды ел ағалары мен Хабибі Есенқараева, Сайлаукүл Барахова, Балхия Көмекбаева сынды елге сыйлы ханымдар қатысты.

– Президентіміз Нұрсұлтан Назарбаев «Ұлы даланың жеті қыры» бағдарламалық мақаласында тарихты тереңнен қозғап, әлемдік деңгейдегі мәселенің түйінін ағытты. Елбасы мақаласына Түркия, Өзбекстан, Қырғызстан, басқа да елдердің қоғам қайраткерлері, ғалымдары, елшілері қуана үн қосты. Біз «мәдениет Батыстан басталады» дейміз. Олай емес, мәдениет те, өркениет те Шығыстан бастау алған. «Ұлы Жібек жолының» бойымен жүріп өткендерге жайлы қоныс болудың өзі қазақ жеріндегі қонақжайлылықты көрсетеді. Яғни, бүгінгі туризм деп атап отырған үрдіс сол заманда көрініс тапқан, – деді Бекет Тұрғараев.

Елбасы мақаласына орай баяндама жасаған Б.Тұрғараев бір ғана «Атқа міну мәдениеті» ұлы даланың ат баптау, атты әскерді қалыптастыру өнерінің отаны екенін атап өтті.
Күн тәртібіндегі екінші мәселе – «Жастары белсенді елдің ертеңі жарқын» тақырыбында өрбіді. Мыңжасар Асқаров жастарды отансүйгіштікке тәрбиелеу Мемлекет басшысының мақаласын дәл түсіндіруден, тапсырмаларын дұрыс орындаудан басталатынын айтты.

– Шымкентте тұрып кафе-тойханаға барсаң, олардың аты басқа елді еске салады. Аттап бассаң «Ташкент палауы». Күріші – Қызылордадан, суы – Шымкенттен, сәбізі мен пиязы да осы жердікі, еті – Қазығұрттан болса, тұзы – Аралдан. Жұмыртқасы болса да, болмаса да «Шымкент құстан» екені анық. «Шымкенттің палауы» десек, тақиямызға тар келе ме? Әрине, тарихи қала Ташкентті құрметтеу керек. Бірақ Шымкентті де ұмытпаған жөн шығар? Отанды сүю осындайдан басталады. Біздің кәсіпкерлеріміз де бұл жағын ойлана жүруі тиіс, – деді М.Асқаров.

Ардагерлер мен зиялы қауым өкілдері Шымкент қаласы мәслихатының депутаттарына кеңесін айтып, ұсыныстарын білдірді.
– Ұлттың болашағы жастар, ал діңгегі – бүгінгі басқосуда отырған біздің зиялыларымыз, ардагерлеріміз. Біз осы аға-апаларымыздың жанында жүріп, «Өмір» деген үлкен академияның сабағын алдық. Ағалардың баяндамасында айтылған өзекті мәселелерді ескереміз. Олардың орындалуына осында отырған Шымкент қаласының барша мәслихат депутаттары ықпал етеміз, – деді депутат Еркін Сатқанбаев.

Ал Шымкент қаласы мәслихатының хатшысы Ғани Ташқараев ел ынтымағының ұйытқысы деп білетін ардагерлерді сыйлап, жиынды қорытындылады.

Биыл Шымкентте көпқабатты 51 тұрғын үй салынады. Ол үшін мемлекеттік бюджеттен 14,2 млрд теңге қаржы қаралған. Тұрғын үй құрылысына байланысты мәлімет алу барысында қыс маусымында да құрылыс жұмыстарының қайнап жатқанына куә болдық.

DSC 0630

Шымкентте тұрғын үй салынып жатқан екі ірі құрылыс алаңы бар дейді қалалық құрылыс басқармасы басшысының орынбасары Ғ.Өтенбаев.
– Оның бірі – «Shymkent city», екіншісі – әкімшілік-іскерлік орталық. Бүгінде осы әкімшілік-іскерлік орталығының Қайтпас елдімекенімен арадағы бос жатқан аумағында жаңа құрылыс алаңы қарқын алды. Жаңа құрылыс алаңы уақытша «21,5 гектар орамы» деп аталады, – дейді Ғалымжан Әмірбекұлы.

21,5 гектар орамында 12 қабатты 8 тұрғын үйдің құрылысы жүріп жатыр. Ондағы 53,2 мың шаршы метрге 528 пәтер орналасады. Басқарманың тұрғын үй бөлімінің басшысы Шухрат Мұхтаров құрылысы жүріп жатқан үйдің нобайымен таныстырып, аталған орамнан орын тебетін бірқатар нысандарды атап өтті.
– Шымкент қаласының Бас жоспарына сәйкес мұнда 30-ға тарта көпқабатты үй бой көтереді. Қазіргі іргетасы қаланған 8 үйдің құрылысына «Отау Строй» құрылыс компаниясы, «Корпорация Сити Строй» ЖШС және «АРТ Құрылыс» ЖШС жауапты, – дейді Ш.Мұхтаров.

«Корпорация Сити Строй» ЖШС құрылысшылары 12 қабатты сегіз үйдің 7 қабатын қалап жатыр. Учаске басшысы Пердебек Әбдісаламұлының айтуынша, мұнда 60 адам құрылыс жұмыстарына тартылған.
– 60 құрылысшының 20-сы қыш қалаушылар, қалған 40 адам монолитте жұмыс істейді. Қыс айы деген аты болмаса, құрылысқа, әсіресе монолитке өте қолайлы ауа райы болып тұр. Сондықтан, жоспардан кешігу орын алған жоқ. Жұмыс күші жеткілікті, құрылыс заттары да тапшы емес. Бәрі өзіміздің отандық өнім, – дейді құрылыс учаскесінің басшысы.

Пердебек Әбдісаламұлының айтуынша, құрылыстың негізі темір, арматураны Қарағандыдан алдырса, цемент, тас, құм атаулыны Шымкент қаласынан алу оп-оңай. Құрылыстың техникалық бақылаушысын күнде осы маңнан көруге болады.
Құрылысшылар Шымкент шаһарын «құрылысқа жайлы қала» деп атайды екен. Себебі, ауа райы жылы. Жауын-шашынсыз, қоңыр салқын күн райы әуелі құрылысты тұрақты жалғастыруға сеп. Сосын, мұндай жылы күні құрылыс заттарын, тас-құмды аршып алу да оңай дейді сала мамандары.

DSC 0616

Жаңа құрылыс алаңындағы 12 қабатты 8 тұрғын үйді пайдалануға тапсыру мерзімі 2019 жылдың желтоқсан айы. Мердігерлер нысанды кешіктірмей тапсыратынына сенімді.
Қалалық құрылыс басқармасы берген мәліметтерге сүйенсек, Шымкентте 2019 жылы, жалпы, 51 тұрғын үйдің құрылысы жүргізіледі. Көпқабатты 51 үйдің 35-і кредиттік болса, тағы 16-сы арендалық тұрғын үй. Бұл – 280,3 мың шаршы метрді құрайтын 3130 пәтердің құрылысы.

Шымкенттегі Ж.Адырбеков көшесінің Т.Рысқұлов көшесі мен Ж.Алдияров көшесіне дейінгі 2 жолақты аралығы 4 жолақты болып қайта құрылады. А.Байтұрсынов көшесіндегі орташа жөндеу жұмыстары да 2019 жылы аяқталады. Сондай-ақ, көптен күткен Д.Қонаев даңғылының жалғасын салу, Қарабастау елдімекеніндегі «Бадам» өзенінен өтетін көпірді жаңарту жобаларына да биыл қаражат қаралды.

DSC 0133

«Қорғас – Алматы – Шымкент – Өзбекстан Республикасының шекарасы» А-2 автомобиль жолының 674-705+621 шақырымын, яғни қала сыртындағы айналма жолды қайта құру VІІІ кезеңді қамтып отыр. Аталған жобалармен қала әкімі Ғабидолла Әбдірахымов танысып, ондағы жол құрылысына кедергі келтіретін өзекті мәселелерді мердігер мекеме басшыларымен талқылады.

Құрылыс басталған көшелердегі көшпелі жиынға шаһар басшысымен бірге қала әкімінің бірінші орынбасары Қ.Нұртай, Әл-Фараби ауданының әкімі Ғ.Мәуленқұлов, Еңбекші ауданының әкімі Ғ.Ілиясов, қалалық жолаушылар көлігі және автомобиль жолдары басқармасының басшысы Қ.Жұматаев, мердігер компания басшылары қатысты.Жол құрылысы жұмыстарын таныстырған Қуатжан Жұматаев Адырбеков көшесін кеңейту барысында 65 жер телімі мемлекет меншігіне алынатынын мәлімдеді.

– Адырбеков көшесіндегі құрылыс жұмыстары 5 кезеңге бөлініп жобаланған. Жол құрылысына жауапты мердігер – «Kaz Construction» ЖШС. Екі бағыттағы көшені жаңарту барысында жолдың екі шеті де жаяу жүргіншілерге арналған тротуармен толығып, абаттандырылады. Адырбеков көшесінің бүгінгі көлік өткізу қабілеті тәулігіне 13 450 көлікті көрсетіп отыр. Соның салдарынан көлік кептелістері орын алуда. Қайта құру жұмыстарынан кейін көше 4 жолақты болады және бұл көлік қозғалысына да оңтайлы болмақ, – деді басқарма басшысы.

ЖОЛ ЖАБЫЛМАЙДЫ

DSC 0024

Адырбеков көшесіндегі жол құрылысына «Kaz Construction»ЖШС жауапты. Мердігер қала әкіміне «Жұмысшылар екі кезеңмен, күндіз және түнде істейді. Техникалық жағынан да сақадай саймыз. Жер мен коммуналдық сұрақтар тез шешімін тапса, біз де жол құрылысын ерте аяқтауға күш саламыз» деді. Қайта құру жұмыстары 2019-2021 жылдар аралығын қамтиды деп жоспарланған.

– Біз әкімдік тарапынан шешілетін сұрақтардың бәрін қолға аламыз. Бастысы, құрылыс сапалы болсын, – деп тапсырды Ғабидолла Рахматоллұлы.
Қала әкімі, сонымен бірге, жол құрылысына байланысты қалалық жер қатынастары және жердің пайдаланылуы мен қорғалуын бақылау, энергетика және коммуналдық шаруашылық басқармаларына тапсырма берілетінін айтып, Қ.Жұматаевқа аталған көшенің қайта құру жобасына велосипед жолағын қосуды ескертті.

Қ.Жұматаевтың айтуы бойынша, жол құрылысына байланысты Ж.Адырбеков көшесі жабылмайды. Көшенің 3,7 шақырымын қайта құру жұмыстары 5 кезеңге бөлінген. Əр кезеңде əуелі 2 жолақтың құрылысы аяқталып, келесі 2 жолаққа содан соң өтеді.

– Жобаға сəйкес, Адырбеков көшесі 4 жолақты, 2 шетінен жаяу жүргіншілерге тротуар, қала əкімінің тапсырмасына орай веложол қаралады. Сондай-ақ, көше бойын толық абаттандырамыз. Алдымен 4 жолақтың екеуін салмайынша, ескі жолға тиіспейміз. Көлік жолдың сол бөлігімен қатынай береді. Сосын, құрылысшылар көшенің келесі 2 жолағына кіріскенде жолдың жаңарған жағымен жолаушыларға жүре береді, – деп түсіндірді басқарма басшысы.

МАҚСАТ – ЖОЛ КЕПТЕЛІСІН АЗАЙТУ

Шымкент қаласынан Ташкентке жол жүру үшін Республика даңғылымен өтетін көлік саны тәулігіне 55 600-ді құрап отыр. Әрине, бұл көлік кептелісін туындатады. Бұл мәселені шешудің жолы Шымкент қаласының Бас жоспарында қаралған. Бас жоспарға сәйкес, Қонаев көшесінің жалғасы Түркістан көшесінен басталады. Теміржолға дейінгі аралық 0,58 шақырымды құрайды. Бұл аралықта 77 жер телімі түскен. Бүгінде оның 47-сі мемлекет мұқтаждығы үшін қайтарылды. Ал 25 жер теліміне төлемақы төлеу, ғимараттарды бұзу жұмыстары атқарылуда. Дәл осы жұмыстар қалған 5 жер телімі бойынша да атқарылады. «Үлкен қаланың күре тамыры» атанған жолдың құрылысын «ОтауСтрой» ЖШС жүргізеді.

ҮШ КӨПІР

Шымкент қаласында ірі жол құрылыстарынан бөлек көпір салу, ескі көпірді қайта құру да қарқын алды. Ең әуелі Қарабастау елдімекеніндегі Бадам өзенінен өтетін көпір жаңарады. Тозығы жеткен көпірдің жайы туралы Қарабастау, Жұлдыз, Текесу елдімекенінің тұрғындары қала әкіміне арызданған болатын. Бүгінде мердігер анықталды. Қаржы бөлінді. Ұзындығы 132 метр өткелдің құрылысын «АРТ-Құрылыс» ЖШС жүргізеді.

Мақаламыздың басында атап өткен Шымкент қаласының айналма жолы – А-2 автомобиль жолының 698+450 шақырымында тағы бір көпір бар. Мұнда да Бадам өзенінің үстінен өтетін көпірді қайта құру жұмысы 2018 жылы басталған. Қолданыстағы көпірдің бүгінгі ені – 11 метр. Құрылыс жұмыстарынан кейін көпір ұзындығы – 144 м, ені 28,2 метр болады. Жауапты мердігер «ЖБИ-С» ЖШС нысанды жоспар бойынша 2020 жылдың мамырында тапсыруы тиіс.
Үшінші көпір жаңадан салынады. Автокөпір Шымкент қаласының оңтүстік жағынан айналып өтетін жол бойында орналасады. Көпірдің ұзындығы – 222 метр. Мердігер – «Корпорация Береке А» ЖШС.

ҮЛГІЛІ КӨШЕНІҢ БІРІНЕ АЙНАЛАДЫ

Шымкент қаласының әкімі Ғ.Əбдірахымов бастаған жұмысшы топ бұдан кейін А.Байтұрсынов көшесін аралады. Ондағы бастапқы үлгілермен танысып, тротуар дизайнына таңдау жасады.
– Мегаполис атанған соң қала барлық жағынан сол атауға сай болуы тиіс. Сондықтан біз Шымкент қаласының негізгі көшелерін де еуростандартқа сай жаңартуды қолға алып отырмыз, – деді Ғабидолла Рахматоллаұлы. –А.Байтұрсынов көшесі қаладағы үлгілі көшенің біріне айналады. Жолдың екі шеті біркелкі əдемі тротуармен толықса, велосипед айдаушыларға қосымша жолақ салынады. Ал ағаштар қырқылмайды, түбіне таудың тасы төселеді. Сонда көше шаң-тозаңнан таза болады.

DSC 0229

Ғ.Әбдірахымов жобаларды талдап, Т.Тәжібаев атындағы №47 мектеп-гимназиясының тұсында алдын ала дайындалған тротуар үлгілеріне таңдау жасады.
Қала әкімі айтқандай, А.Байтұрсынов көшесі – қаладағы маңызды көшелердің бірі. Бұл көшеде оқу орындары, мектеп, балабақша көп. Елімізге белгілі қонақ үй, мұз сарайы, іргелі оқу орындары да бар. Көшеде тәулік бойы қозғалыс үзілмейді десек те болғандай. Халық тығыз орналасқан. Қоғамдық көліктің көбі осы көшенің бойымен өтеді.

Бұған дейін Байтұрсынов көшесінің бойындағы құбырлар жаңартылып, жолды жөндеу жұмыстары кейінге жоспарланған болатын.
– Шымкент республикалық маңызы бар қала атанды. Енді қалада стратегиялық маңызы бар ірі құрылыс жұмыстары қарқын алады. Көптеген тұрғын үйлер салынады. Ірі жолдар түсіп, жаңа нысандар бой көтереді. Шымкент қаласының Бас жоспарына сәйкес ауқымды жобаларды Елбасымыз Н.Назарбаев өзі қолдап, республикалық бюджеттен қаражат бөлді. Қазіргі таңда аталған құрылыс нысандары бойынша жұмысын бастаған мердігерлердің тəжірибесі де зор.

Ал құрылыс заттарына отандық өнімді таңдадық. Енді жол құрылысын жүргізу барысында орын алуы ықтимал уақытша жайсыздықтар үшін жергілікті тұрғындар мен жолаушылардан қала əкімдігі атынан кешірім сұрап, түсіністік танытуын сұраймын. Халық қолдап тұрса, біз бірігіп, аталған жобаларды тез əрі сапалы етіп аяқтаймыз, – деді Ғабидолла Рахматоллаұлы.

Айта кетейік, А.Байтұрсынов көшесіндегі ағаштар қырқылмайды. Ал Адырбеков көшесінің бойына жаңа көшеттер отырғызу жоспарланған.

Сапалы электр жарығы қосылады

Среда, 30 Январь 2019 04:23

Бадам тұрғын алабының 195-орамы мен Сәуле шағынауданына қарасты 276-орам 2014 жылы Сайрам ауданынан Шымкент қаласының аумағына өткен-ді. Мұндағы 2000-ға жуық тұрғын сапалы электр жарығымен қамтамасыз етуді сұрайды.

89967

195-орамдағы халық саны 1300-ге жуық. Оларға жеке тұрғын үй салу үшін 600 жер телімі егжей-тегжей жоспарына сәйкес берілген. Соның 300-інде қазір тұрғын үй құрылысы жүргізілген. Ал Сәуле шағынауданына қарасты 276-орамда шамамен 110 тұрғын үй салынған. Қазіргі таңда 500-ден астам тұрғыны бар. Жергілікті тұрғындар арасында «жаңа құрылыс» атанып кеткен бұл аумақ ауыз су, табиғи газбен қамтылмаған. Ал электр қуатын сол маңдағы жеке кәсіпкер Н.Ережеповтің өндірістік базасынан жалғап отыр.

– Қуанатынымыз сол, бұрынғыдай лайға батып жүрмейміз. Әкімдік көшелерімізге тас төсетіп берді. Отты жаға тұрармыз, суды құйып алып, әупірімдеп жатырмыз. Бірақ, жарық мәселесі өзекті болып тұр. Биыл сапалы электр бағаналарын жүргізіп берсе, жақсы болар еді, – дейді 276-орамның ауыл биі Талғат Жантасов.

Тұрғындар айтқан электр бағаналарын көзбен көрдік. Стандартқа сай емес. Бұл жайлы қалалық мәслихаттың депутаты Хайрулла Үсенов те өз ойын қосты.
– Аталған орам тұрғындары шошқа фермасынан жарық алып отыр. Алайда ферманың жұмысына кей тұрғындар шағым түсірсе, кәсіпкер жарықты сөндіреді де, орам халқы түгел жарықсыз қалады. Дегенмен орам ішінде электр желілері әу баста уақытша тартылғандықтан, сапасыз ғана емес, қауіпті де. Бағана орнына ағаштың қалың бұтақтары қолданылған. Сол себепті де жауынды, желді күні орам тұрғындары жарықсыз қалатыны рас, – дейді Х.Үсенов.

Қала аумағына енген елдімекеннің жағдайымен таныс болған соң тұрғындардың сұранысы бойынша әкімдік тарапынан қандай жұмыстар атқарылып жатқаны жөнінде білуге тырыстық.
Әл-Фараби ауданының әкімі Ғ.Мәуленқұловтың айтуынша, 2019 жылы 195-орамда инфрақұрылымдық жұмыстар басталады.

– Шымкент қаласының тұрғын үй-коммуналды шаруашылық басқармасының тапсырысымен Бадам тұрғын алабындағы 195-орамды инфрақұрылыммен қамтамасыз ету мақсатында құжаттар әзірленді. Яғни, ауыз су, электр қуаты және табиғи газбен қамтамасыз ету үшін «Строй Проект Инвентаризация» ЖШС тарапынан әзірленген жобалау-сметалық құжаттамасы дайын. Шымкенттің әлеуметтік-экономикалық даму картасына сәйкес, қала әкімі Ғ.Әбдірахымов бұл жұмыстарды 2019 жылдың бюджетіне енгізді. Ал Сәуле елдімекеніне қарасты 276-орам – жаңақұрылыс аумағын инфрақұрылыммен қамтамасын ету жұмыстары 2020 жылға жоспарлануда, – дейді аудан әкімі.

Осылайша, 1300-дей тұрғынның өтініші аз уақытта орындалмақ. Ал 500-ден аса тұрғыны бар 276-орамның ауыл биі Ережеп мырза «біз жақтағы 110 үйге де сапалы жарықты 2019 жылы «бадамдықтармен» бірге қамтып өтсе игі болар еді» деген тілегін білдірді.

Страница 1 из 33