Облыс орталығында «Ontustik Invest-2016» халықаралық инвестициялық форумы (28-29 сәуір) басталды. Форумның алғашқы күні облыстық «Көрме» орталығында жергілікті тауар өндірушілердің көрмесі өтуде. Оған 700-ден астам адам қатысуда.
Көрмеде Шымқалада орналасқан «Бал Текстиль», «Кирал достык» бастаған 60-тан астам кәсіпорынның өнімдері ел іші-сырты қонақтарының назарына ұсынылды. Әрі 50-ге жуық инвестициялық жобалар шетелдік қаржы салымшыларға көрсетіліп отыр.
Үш күнге созылатын форумда Оңтүстік өңірінің әлеуетті жобалары шетелдік алпауыт инвесторлардың экономикалық қызығушылығын тудырады деп күтілуде. Осы уақыт ішінде Шымкент қаласындағы арнайы экономикалық және индустриялық аймақтарға ақпараттық тур ұйымдастырып, бизнес көшбасшыларының шебер-класстары өтеді.
