Шымкент келбеті

Өткен ғасырдың басында қазақ халқының көрнекті перзенті, белгілі қоғам және мемлекет қайраткері Тұрар Рысқұлов «Түбі бір түркі, түгел бол!» деген ұран тастаған еді. Уақыт өткен сайын тұтас Түркі әлемі осы бір сөзге көбірек көңіл аудара бастағаны байқалады. Оның бір дәлелі, рухани астанамыз Түркістан шаһарында өткен «Түркі әлемі және ақпараттық кеңістік» атты тақырыпта өткен халықаралық медиафорумы.

Ауқымды шара «Түркістан – Түркі әлемінің мәдени астанасы» жылы аясында ұйымдастырылды. Оңтүстік Қазақстан облысының әкімдігі мен Халықаралық Түркі академиясы ұйытқы болған бұл медиафорумға Қазақстаннан бөлек, Түркия, Әзірбайжан, Өзбекстан, Қырғызстан және Башқұртстан елдерінің ірі БАҚ басшылары қатысты. Форумның ашылу салтанатында сөз алған облыс әкімі Жансейіт Түймебаев бұл шараның мән-маңызына тоқталды.

– Ақпараттық кеңістік құрудағы басты мақсатымыз – Қазақстан, Түркия, Әзірбайжан, Түркіменстан, Қырғызстан, Өзбекстан, Татарстан сияқты түркі елдерімен қатар Жер шарындағы түркі қауымдастықтарымен ақпарат саласында ынтымақтастық орната отырып, жедел ақпарат алмасу, баспасөзде серікестік құру, түбі бір түркіге ортақ тарих, мәдениет, білім, өнер, рухани құндылықтарды бірге насихаттау болмақ. Яғни, ол біздің бірлігімізге, рухани, саяси және экономикалық байланыстарымыздың нығаюына жұмыс істейтін үлкен дүние болады деген сенімдемін, – деді Жансейіт Қансейітұлы. 

Сонымен қатар, форумда ТҮРКСОЙ халықаралық ұйымының Бас хатшысы Дүйсен Қасейінов түркі халықтарының мәдени, рухани интеграциясындағы ақпарат құралдарының маңызын баяндап өтті. Форум жұмысына қатысқан түркі тілдес журналистер мемлекеттер арасында ақпарат алмасудың тиімділігін арттыру жайын сөз етіп, өзекті тақырыптар төңірегінде кеңінен пікір алмасты. Халықаралық Түркі академиясының президенті Дархан Қыдырәлі форум аясында қабылданған негізгі мәселелерді тарқатып айтып берді. 

– Түркі елдері арасында Қазақстан Республикасы Президенті Нұрсұлтан Назарбаевтың ортақ телеарна құру және ақпарат кеңістігін қалыптастыру бойынша тапсырмасы бойынша жүйелі жұмыстар жүргізу, оған қолдау көрсету – жиынның басты мақсатының бірі. Сондай-ақ түркі елдеріне ортақ құндылықтар мен рухани мұраларды, киелі жерлерді, ортақ тұлғаларды айқындап, елдігімізді бірге насихаттау, бір-бірімізбен ақпарат алмасулар арқылы бір-бірімізбен бөлісіп тұрсақ деген ұсыныс бар. Ол әлеуметтік желілер, ақпарат агенттіктері, басылымдар арқылы болуы мүмкін. Ортақ мәдениетіміз бойынша Қожа Ахмет Ясауи, Қорқыт ата сияқты сериалдар түсіруді ұйымдастыруға ұсыныс жасау. Мұндай ұсыныстар бұған дейін де болған. Сол жобаларды жүзеге асыруымыз қажет. Түркі әлемі журналистерінің достық клубын Түркі Академиясы жанында құруға ықыластымыз. Біз бұл міндетті өз мойнымызға аламыз. Сосын жақсы ұсыныстар мен баяндамаларды, материалдарды басып шығару, оны тиісті мекемелерге, мемлекет басшыларына жеткізу. Осындай жобалар бар. Бүгінгі жиын алдағы үлкен кеңестердің басы болады деп үміттенеміз, – деді Дархан Қыдырәлі. 

Ортақ телеарна ашу мәселесі де журналистер форумында назардан тыс қалған жоқ. Бұл ретте түркиялық «NTV» телеарнасының бағдарлама редакторы Ахмет Йешильтепе телеарнаның ғимараты Түркістанда болуы тиіс деген ұсынысын жеткізді. Басқосуда сөз болған келелі мәселе төңірегінде Түркі кеңесінің жоба жетекшісі Джейхун Шахвердиев, «TRT-Avaz» телеарнасының директоры Мұрат Аккоч пен бас кеңсесі Брюссель қаласында орналасқан «EURELIZ» Медиа және стратегиялық коммуникациялар компаниясының директоры, журналист Эли Хаджиевалар да өз пікірлерін білдірді. Түркі елдері үшін ашылатын ортақ телеарна құру мәселесі туралы ұсыныстар ескеріліп, барлық мемлекеттердің министрліктеріне жолданатын болды. Бұл мәселе сондай-ақ «ЭКСПО -2017» халықаралық көрме аясында өтетін Еуразиялық медиафорумда да талқыланбақ. 

Форумда шынайы жанашырлық сын да айтылды. «Айқын» газетінің бас редакторы Нұртөре Жүсіп болашақта түркі баласының кез келген жетістігін кеңінен насихаттап, маңызды оқиғаға айналдыруымыз керек екенін айтты.

– Бірлік қарапайым нəрселерден де байқалады. Мысалы, жуырдағы əнші Димаш Құдайбергеннің жеңісі түркі тілдес елдердің БАҚ-тарында сондай бір қуанышпен атап өтілмегенін байқауға болады. Əрбір түркі баласының жетістігі бізді біріктіретін маңызды қадам болуы тиіс. Түркі баласы ғарышқа ұшатын болса да, жаңағыдай үлкен жетістікке жететін болса да біз сол ақпараттың маңыздылығын кеңінен көрсетуге тырысуымыз керек. Мәселен сол Димашты Франция еліндегідей шақырып, Түркияда, Әзірбайжанда, Қырғызстанда шақырып ән айттырса, несі айып?! Алдымызда «ЭКСПО-2017» халықаралық көрмесіне бауырлас елдердің танымал әншілері келіп, қазақ, түрік елдерінде ән айтса деген ойлар келеді, – деп ұтымды ұсынысын жеткізді белгілі журналист. 

Форум барысында Түркі əлемін насихаттаған журналистерге Исмаил Гаспыралы сыйлығы тапсырылды. Сондай-ақ Оңтүстік Қазақстан облысының әкімі Жансейіт Түймебаев «2016 жылғы үздік дипломат-елші» атағымен марапатталды. Әлем журналистері ұйымының шешімімен берілген бұл сыйлықты ұйым басшысының орынбасары, белгілі журналист Орxан Селен мырза табыстады. Осы ретте, аймақ басшысы түркі елдерінің рухани байлығын молайтуға қосқан елеулі үлесі үшін халықаралық Түркі академиясының президенті Дархан Қыдырәліні «Оңтүстік Қазақстан облысына сіңірген еңбегі үшін» медалімен марапаттады.

Форумда түркітілдес мемлекеттер арасында бұқаралық ақпарат құралдарының өкілдері өзара тәжірибе алмасып, алдағы уақытта тығыз қарым-қатынаста жұмыс істеу туралы келісімге келді.

Ташкент қаласының әкімдігі Шымкенттен жеке сауда орталығын ашуды жоспарлап отыр. Осылайша Шымкент пен Ташкент қаласының ынтымақтастығы одан әрі дами түспек. Өзбекстан делегациясының облысымызда өткен екі күндік тауар өндірушілер көрмесі барысында екі қала басшылығы осындай меморандумға қол қойды.

Мұндай жаңалықты өзбекстандық Podrobno.uz. сайты да жариялады. Екіжақты құжат Шымкентте сауда үйін ашуды, сондай-ақ сауда-экономикалық және мәдени байланыстарды одан әрі нығайтуды көздейді.

Шымкентте екі күн бойы өзбекстандық тауар өндірушілердің көрмесі ұйымдастырылған-ды. Оның аясында шымкенттіктердің назарына ташкенттік артистердің өнері, өзбек асханасының фестивалі ұсынылды.

Кеше Мемлекет басшысы Нұрсұлтан Назарбаев Оңтүстік Қазақстан облысына екі күндік жұмыс сапарымен келді. Алдымен, Елбасы облыс орталығындағы бірқатар әлеуметтік нысандарды аралап, «Қазақстан халқы Ассамблеясы» ғимаратының алдынан бой көтерген «Қазақ еліне мың алғыс!» монументінің ашылу рәсіміне қатысты.

«ҚАЗАҚ ЕЛІНЕ МЫҢ АЛҒЫС!» МОНУМЕНТІ АШЫЛДЫ

Бүгінде өңірдегі қоғамдық келісім мен саяси тұрақтылықты қалыптастырған Ассамблея құрамына 20 этномәдени бірлестік енеді. Аталмыш бірлестіктердің бастамасымен салынған монумент түрлі ұлттардың қазақ халқына деген алғысы мен адал ниетінің нышаны болып саналады. ҚР Президенті салтанатты жиында түрлі ұлттар мен ұлыс өкілдерінің татулығы Тәуелсіз Қазақстанның басты байлығы екенін атап өтті.

– Әр уақытта біз өзімізді Қазақстан азаматы екенімізді қуанышпен айта аламыз. Себебі, Тәуелсіз жылдар ішінде өзіндік даму жүйесі қалыптасқан қазақ халқын, Қазақстан елін дүние жүзі толық танып-білді. Өзге мемлекеттермен тереземіз тең жағдайда жарқын келешекке нық басып келеміз. Мұның барлығы да, елдегі тұрақтылықтың, этносаралық келісімнің нәтижесінде жүзеге асып келеді. Мемлекеттің ішкі дамуы үшін бізге дәл осы құндылықтар қажет еді, – деді Нұрсұлтан Әбішұлы.

Монументтің биіктігі 7,5 метрді құрайды. Нысан еліміздегі барлық этностарға ортақ Отанымызды қос алақанымен көкке көтеріп тұрғандай күн бейнесін сипаттайтын шаңырақтан, іргеміздің берік болуын көрсететін керегеден және болашаққа басқан әрбір қадамымыздың нық болуын әспеттейтін таға іспеттес жарты шеңберден жасалған. Жарты шеңберге «Тағдыр тәлкегімен қазақ жеріне қоныстанған барлық этностар атынан ҚАЗАҚ ЕЛІНЕ мың алғыс!» деген жазу бар.

Кезінде солақай саясаттың салдарынан ата-бабалары Қазақстанға күштеп қоныстанған этностардың өсіп-өнген ұрпақтары бүгінгі бейбітшіл, берекелі заманға аман-есен жетуін, Қазақстандағы жергілікті халықтың бауырмалдығының арқасы деп біледі. Осы орайда, аталмыш монумент – өңірдегі түрлі ұлт пен ұлыстың қазақ еліне деген кіршіксіз ризалығы мен шынайы алғысының символикалық көрінісі іспетті. 

Елбасы қайта жөндеуден өткен «Қазақстан халқы Ассамблеясының» (бұрынғы «Қазақстан» кинотеатры) ғимаратын аралады. Облыстық бюджет есебінен жөндеуден өткен үш қабатты нысанда «Қоғамдық келісім» мекемесінің қызметкерлері мен өңірдегі этномәдени бірлестіктердің кеңселері орналасқан. Ғимараттың 800 орынға арналған көрермен залы бар. Мұнда түрлі үйірмелер мен жексенбілік мектептердің тұрақты әрекет етуіне жағдай жасалған. Алдағы уақытта бұл ғимаратта Оңтүстік жұртшылығын берекелі бірлік пен ырысты ынтымаққа үндейтін іс-шаралар жүйелі түрде ұйымдастырылмақ.

Мемлекет басшысының назарына этномәдени бірлестіктер өкілдерінің орындауындағы «Бірлігіміз жарасқан» деп аталатын музыкалық композиция ұсынылды.

МЕМЛЕКЕТ ҚОЛДАУЫ – КӘСІПКЕРЛІККЕ СЕРПІН

Елбасы облыс орталығындағы терезе шығаруға арналған алюминий профильдерін әзірлейтін «Gold Aluminum» ЖШС-нің жұмыс барысымен танысты. Ондағы ақпараттық стендтер мен экспозициялық макеттерді көріп, алдағы жоспарларына қанықты. 

2014 жылы индустриаландыру картасы аясында іске қосылған зауытта 70 адам тұрақты жұмыспен қамтылған. «GOLD Aluminum» брендімен профильдер шығаратын кәсіпорын түрік инвесторларының қатысуымен құрылған.

Серіктестік өткен жылы 750 тонна алюмин профильдерін шығарса, оның 20 пайызы Ресей, Украина, Қырғызстан, Тәжікстан және Түрікменстанға экспортталған. Елімізде 2010 жылдан бері жүзеге аса бастаған индустриаландыру картасының аясында өңірде 159 жоба жүзеге асып, 100,9 млрд. теңгенің өнімі шығарылған. Оның өңдеу өнеркәсібіндегі үлесі 21 пайызды құрайды.

Бұдан соң Елбасы қарқынды бау өсіру және жеміс-жидектерді сақтаумен айналысатын «DALA-FRUIT.KZ» ЖШС-нің жұмысымен танысты. Онда Президентке облыстың әлеуметтік-экономикалық көрсеткіштері баяндалып, ауыл шаруашылық өнімдерінің көрмесі ұсынылды. Мемлекеттік индустриялық-инновациялық даму бағдарламасы аясында іске қосылған серіктестікке бастапқыда 83 адам тұрақты жұмыспен қамтылып, компания жұмысын бастаған үш жылда оның саны 277 адамға жеткен. «Агробизнес-2020» және «Бизнестің жол картасы-2020» бағдарламалары арқылы жеңілдетілген несиенің есебінен 400 млн теңге алған қожалық басшылығы бүгінгі таңда ел қазынасына 607 млн теңге салық түсірген. 

Жалпы көлемі 106,5 гектар болатын «DALA-FRUIT.KZ» ЖШС-нің бауына 215 мың түптен астам жеміс ағаштары егілген. Мұнда алманың «Гренни», «Смит», «Фуджи», «Голден делишес», «Гала», «Айдаред» алхоры мен шиенің «Стенлей» атты шетелдік сұрыптарын кездестіруге болады. Заманауи техникамен жабдықталған бау тамшылатып суару жүйесі арқылы жұмыс істейді. 

Сапар барысында облыс әкімі Жансейіт Түймебаев пен қала әкімі Ғабидолла Әбдірахымов Мемлекет басшысына Шымкент шаһарының бүгінгі даму жоспарын таныстырып, жаңадан бой көтеріп жатқан «Шымкент Сити» іскерлік және тұрғын үй кешенінің құрылыс жұмыстары жөнінде баяндады. Сонымен қатар, Мемлекет басшысы аталған бау шаруашылығының ғимаратында өңірдің зиялы қауым өкілдерімен және жергілікті кәсіпкерлермен кездесіп, елімізде қызу қолдауға ие болған «Болашаққа бағдар: рухани жаңғыру» мақаласы жайында әңгімелесті. 

– Мен таяуда жариялаған мақаламда заманға сәйкес жаңғыру, оның ішінде рухани жаңғыру мәселесін жан-жақты баяндаған болатынмын. Біздің бүгінгі ең басты мақсатымыз – елімізді дамыған 30 елдің қатарына қосу. Оңтүстік өңірі бүгінгі таңда әлеуметтік-экономикалық тұрғыдан өсіп, өркендеп келеді. Облыс орталығы Шымкент қаласының дамуына да мемлекет тарапынан жоғары деңгейде көңіл бөлінуде. Үшінші мегаполистің халқы биыл миллионға жетеді деп жоспарланып отыр, – деді Мемлекет басшысы. 

Жиында сөз алған жазушы-журналист Мархабат Байғұт пен белгілі кәсіпкер, «САУТС-ОЙЛ» ЖШС-нің бас директоры Серікжан Сейітжанов Елбасы мақаласының маңыздылығына тоқталып, онда айтылған мәселелердің елдің әлеуетін нығайтуға зор септігін тигізетінін жеткізді. Сондай-ақ Оңтүстік жастары атынан Елбасыға ізгі лебізін білдірген Облыстық жастар ресурстық орталығының директоры Береке Дүйсебеков бүгінгі таңда жастардың білім алуына және кәсіпті меңгеруге үлкен қолдау бар екенін айтып өтті. 

Мемлекет басшысы Н. Назарбаев кездесу соңында Оңтүстікте мемлекеттік бағдарламалардың орындалуы өз деңгейінде екенін тілге тиек ете келе, атқарылып жатқан жұмыстарға оң бағасын берді. Президент өз сөзінде ірі табысқа жетуде қоғамның рухани жаңғыруы қажет екендігін, бұл жолда жаңа міндеттерді іске асыратын білімді де, білікті мамандар екенін ерекше қадап айтты. 

– Оңтүстік – еліміз үшін ерекше маңызы бар аймақ. Мұнда 800-ге жуық тарихи ескерткіш бар. Өңірдің туризмнің ордасы болуға да мүмкіндігі мол. Ендігі ретте облыста шағын кәсіптің одан әрі қарқынды дамуына қолайлы жағдай жасалуы тиіс. Кәсіпкерлік – экономиканың басты тірегі. Мен мұны үнемі айтып келе жатырмын. Мәселен, Германия бюджетінің 80 пайызы шағын кәсіптен түсіп отыр. Оңтүстік халқы еңбекқор, шаруаның көзін таба біледі. Мемлекет тарапынан жасалып жатқан қолдауды игілікке пайдаланып, осы саланы барынша жандандыру қажет, – деді Елбасы қорытынды сөзінде.

Сәбит ТАСТАНБЕК
Жеңiсбек СЕРІКҰЛЫ

Шымкенттегі «Kazmedpribor Holding» ЖШС-де шығарылатын қондырғылар озық шетелдік құрылғылардан кем түспейді. Бүгінде елімізді арзан бағадағы медициналық бұйымдармен қамтамасыз етіп отырған аталған кәсіпорынның жұмысымен танысуы кезінде облыс әкімі Ж. Түймебаев осылай деп мәлімдеді.

150-ге жуық адам еңбек ететін кәсіпорын 2005 жылы "Бизнестiң жол картасы – 2020» мемлекеттiк бағдарламасы аясында ашылған. Қазіргі таңда өндiрiс орны рентген аппараттары мен медициналық жиһаз-жабдықтар шығарып, дәрілік өнім өндірумен айналысады. Халықаралық стандартқа сәйкестiк сертификатын алған зауыт бүгінде еліміздегі ауруханалар мен емханаларды УДЗ аппаратынан бастап ота бөліміне қажетті құрал-жабдықтарына дейін қамтып отыр. Соңғы үлгідегі инновациялық жобаларды іске асыруда кәсіпорын Жапония, Испания, Корея сынды алпауыт мемлекеттердің зауыттарымен тығыз байланыста жұмыс істейді.

Қазіргі таңда “ҚазМедПрибор” мекемесінде медициналық құрал-жабдықтың 400-ден аса түрі шығарылады. Жалпы зауыт жылына 60 мың дана медициналық техниканы шығаруға қауқарлы. Сондай-ақ, мұнда жедел-жәрдем көлігіне қажетті құралдардан бөлек, электрокардиографтар, медициналық мониторлар жасалады. Әрi сапалы, әрi бағасы көңiлге қонымды кәсiпорынның өнiмiне деген сұраныс жыл санап артып келеді. Бүгінде зауыт өнімдеріне Ресей, Өзбекстан, Тәжікстан мен Түркіменстан сынды көршілес елдерден сұраныстар түсе бастаған.

Оңтүстікке ҚР Энергетика министрі Қанат Бозымбаев іссапармен келді. Сапар барысында ведомство басшысы мен облыс әкімі Жансейіт Түймебаев  Шымкент  мұнай өңдеу зауытына барып, мұндағы жаңғырту жұмыстарының барысымен танысты.

Бүгінде еліміздегі үш бірдей мұнай өңдеу зауытында жаңғырту жұмыстары жалғасып жатыр. Ағымдағы жылдың екінші жартыжылдығында Павлодар мұнай-химия және Атырау мұнай өңдеу зауыттарын жаңғырту жұмыстары аяқталады деп күтілуде. Ал Шымкент мұнай өңдеу зауытын жаңғырту жұмыстарының аяқталу мерзімі 2018 жылдың бірінші жартжылдығына жоспарланған. 

«ҚазМұнайГаз» АҚ-ның басшылығы министрге жобаның бірінші кезеңі бойынша атқарылған механикалық жұмыстардың аяқталып, екінші кезең нысандарында құрылыс-монтаждау жұмыстарын жүргізу кестесі туралы баяндады. Бүгінде «ПетроҚазақстан» мұнай өңдеу зауытындағы құрылыс жұмыстарына 4 мыңға жуық маман тартылған. Оның 1 мыңға жуығы қазақстандық мамандар. 

– Жаңғырту жұмыстары толығымен аяқталса, еліміздегі бензин сапасы жақсарып, дизель және керосин өнімдерінің бағасы тұрақтанатын болады. Ең бастысы, 2019 жылы Қазақстан Ресей бензиніне тәуелділіктен арылып, еуразиялық одақтың талаптарына сай өнім өндіре бастаймыз, – деді Қ. Бозымбаев. 

Еске сала кетсек, биыл екінші жартыжылдықта Шымкент мұнай өңдеу зауытын жаңғыртудың бірінші кезеңі аяқталған соң елімізде Еуро-4, Еуро-5 стандарттарына сай жанармай мен дизель отыны шығарыла бастайды.

Министр бастаған жұмысшы топ бұдан кейін «Нұрлы жол» бағдарламасы аясында 2015 жылы пайдалануға берілген Шымкенттегі 160 гкал/сағ. болатын қазандықты аралап көрді. Қазандық бүгінде әкімшілік іскерлік орталығындағы 38 көпқабатты тұрғын үйді және 6 әкімшілік ғимаратты жылумен қамтамасыз етіп отыр.

Оңтүстікте өңіраралық бос жұмыс орындары жәрмеңкесі өтті

Бүгінде облыстағы экономикалық тұрғыда белсенді халықтың ішінде 62, 7 мың адам жұмыссыздар қатарында. Қазір халықты жұмыспен қамтуға, жаппай кәсіпкерлікке тартуға көңіл бөлініп отырғаны белгілі. Облыс азаматтарының бірқатары жұмыс күші аз солтүстік облыстарға қоныс аударып, кәсібін дөңгелетіп отыр. Мәселен, 2016 жылы облыстан Солтүстік Қазақстан облысына 125, Қостанай облысына 18, Шығыс Қазақстан облысына 3 отбасы қоныс аударған. Бәрі де жұмыспен қамтылған: кооперативтерге бірігіп, жер игеріп, тіршілік етуде. Биыл осы мақсатта қанша отбасы қоныс аударуға ниетті? Қанша шәкірт «Серпін» бойынша білім алмақ? ҚР Еңбек және халықты әлеуметтік қорғау министрі Тамара Дүйсенованың халықты жұмыспен қамту бағдарламасын жан-жақты түсіндіру бойынша облысқа келген сапарында маңызды мәселелер айтылды.

700-ГЕ ЖУЫҚ ОТБАСЫ КӨШУГЕ НИЕТТІ

Облыста сәуір айының 3-5 аралығында өңіраралық бірігуді дамыту жөніндегі шаралар бойынша бос жұмыс орындары жәрмеңкесі өтті. Қостанай, Солтүстік Қазақстан, Павлодар және Шығыс Қазақстан облысынан 60-тан аса өкіл келді. Жалпы, бұл өңірлердің 1785 бос жұмыс орыны ұсынылды: өндірістік салада – 664 (37, 1 пайыз), білім саласында – 551 (31 пайыз), денсаулық сақтау саласында – 373 (21 пайыз), мемлекеттік басқару ісінде – 108 (6 пайыз), ауыл шаруашылығында – 64 (3,6 пайыз), т.б., бос орындар. 

Сондай-ақ, жәрмеңкеде Шымкент қаласынан 30 ірі кәсіпорын 2500-ге тарта бос орын ұсынды. 

Мақтарал, Сарыағаш ауданында және Шымкент қаласында өткен бос жұмыс орындары жәрмеңкесі табысты қорытындыланды. Мәселен, облыс әкімінің орынбасары Ербол Садырдың айтуынша, 700-ге жуық отбасы көшті одан әрі жалғастыруға ниетті. «Серпін» бағдарламасы бойынша облыстың 700-ге тарта түлегі қызығушылық танытқан. 

ҚР Еңбек және халықты әлеуметтік қорғау министрлігі Елбасының Жолдауында айтылғандай, Нәтижелі жұмыспен қамту және жаппай кәсіпкерлікті дамыту бағдарламасын жүзеге асыруды бастап кетті. Алғашқы жәрмеңке де Оңтүстіктен бастау алды. ҚР Еңбек және халықты әлеуметтік қорғау министрі Тамара Дүйсенова, облыс әкімі Жансейіт Түймебаев, қала әкімі Ғабидолла Әбдірахымов жәрмеңкеге қатысып, жұмыс берушілердің талап-тілектерін тыңдады. 

Бұл бағдарламаны іске асыруда өңіраралық интеграцияны дамыту маңызды.Алда өңіраралық бос жұмыс орындары жәрмеңкелері, мектеп бітіруші түлектеріне «Серпін» бағдарламасы бойынша түсіндіру жұмыстары жүргізіле бермек.

ЖОБА ЖЕМІСІН БЕРУДЕ

Іс-шара барысында ұйымдастырылған «Еңбек нарығының ұтқырлығын дамытудың» өңіраралық бизнес-форумында бірқатар мәселелер айтылды. Жоспарлар талқыланды. Жиында ҚР Еңбек және халықты әлеуметтік қорғау министрі Тамара Дүйсенова, облыс әкімі Жансейіт Түймебаев, Қостанай, Павлодар, СҚО және ШҚО облыстары әкімдерінің орынбасарлары, ОҚО қалалары мен аудандарының әкімдері, облыстық мәслихат депутаттары қатысып, пікір алмасты. 

Тамара Қасымқызының айтуынша, биыл Қазақстанда 630 мыңнан астам жұмыс орны ашылады. Нәтижелі жұмыспен қамту және жаппай кәсіпкерлікті дамыту бағдарламасының алғашқы бағыты аясында 2, 5 жыл оқу мерзімімен колледждерде тегін кәсіби-техникалық білім беру ұйымдастырылады. Бұл орайда ең алдымен мектепті бітірген соң оқуға түспеген жастарға назар аударылады. Кәсіп ашамын деген азаматтарға қалалық жерде «Даму» қоры арқылы, ауылда және шағын қалаларда «Ауыл шаруашылығын қаржылай қолдау» қоры мен «Аграрлық несие корпорациясы» арқылы несие беріледі. 

Министрлік 2011-2016 жылдары аралығында «Жұмыспен қамту – 2020» бағдарламасын жүргізді. Бұның аясында мектептер, ауруханалар, мәдениет ошақтары жөнделді. Ауылдар абаттанды. 800 мыңнан астам азамат осы жобаға қатысты. 

2017 жылы бағдарламаның атауы неліктен өзгерді? Т.Дүйсенова бұл мәселені егжей-тегжейлі түсіндіріп берді. 

–. Елбасы өз Жолдауында бүкіл әлем төртінші ғылыми-техникалық революцияға өткенін атап көрсетті. Қазір жаңа жұмыс орындары ашылып жатыр. Енді барлық жұмыс берушілер мамандарға жоғары талап қояды. Өткен жылы жұмыс берушілерден жалпы 100 мыңнан аса жаңа бос орын бойынша хабарландыру ілінді. Онда ұсынылған қызметке сай келмеген талапкерлер де кезікті. Себебі, мектеп бітіргеннен кейін ешқандай мамандық иесі бола алмаған жастар көп. Біз алдыңғы бағдарлама аясында біраз азаматтарды жұмысқа тарттық. Уақытша істегендер де бар. Жұмыс берушілердің тапсырмасына сәйкес, азаматтарды оқыттық. Бірақ, бүгінгі нарыққа қажетті мамандарды толық қамти алғанымыз жоқ. Сондықтан, жаңа бағдарламаның негізгі мақсаты – азаматтардың өз бетінше жұмысқа орналасуы, оларға қолдау көрсету, өздерінің кәсібін ашу үшін несие алуға қолдау көрсету, – деді министр. 

Облыс әкімі Жансейіт Түймебаев форумда сөйлеген сөзінде өңіраралық ынтымақтаса даму ең алдымен агроөнеркәсіптің ілгірілеуіне жол ашатынын айтады. 

– Солтүстік облыстардан картоп, мал азығы сынды өнімдерді алып, өңіраралық кооперативтерді қалыптастыру жолдарына мән беруіміз қажет. Дайын өнімдерді ішкі нарықтан бөлек, шекарадан асырып, Ресей федерациясының аумағына өткізуге мүмкіндік бар. Мұндай бағыт Еуразиялық экономикалық одақ аясында көршімізбен экономикалық байланысымызды нығайта түседі. Бірлескен одақтың шартына сәйкес, Қазақстан тарапынан өтетін тауарларға көптеген жеңілдіктер бар. Бүгінде облыстың бақша өнімдері Ресейге жіберіліп жатыр. Ал сол көкөніс өсіруді солтүстік облыстарда дамытып, шекара асыру тиімді болмақ. Сондай-ақ, шаруалар солтүстіктен Оңтүстікке жеткізетін ауылшаруашылық өнімдерін де молынан дайындап, осында жіберуге мүмкіндік болады. Бұл өз кезегінде елімізде азық-түлік нарығын жеңілдетуге оң ықпал ететіні анық. Бүгінде Қазығұрт ауданындағы «Аманкелді» корпорациясы Ақмола облысында 5 мың гектарға бидай дақылын егумен айналысады, – деді облыс әкімі. 

Форум соңында барлық облыс әкімдерімен бос жұмыс орындарын анықтау бойынша меморандумға қол қойылды. Солтүстікке қарай басталған көшті әрі қарай жалғастыру керек. Ниет білдірген әрбір азамат солтүстікте әлеуметтік көмектің көрсетілетінін, жұмыссыз қалмайтынын білуі тиіс.

Адамда екі отан болмайды. Қай жерде жүрсек те, қай өңірде еңбек етсек те, елдің дамуына үлес қосқан боламыз. Әрбір азамат осыны ұғына білсе, ұтарымыз көп. 

Сөз соңында айта кетсек, бүгінде «Серпін» бағдарламасы бойынша 5627 студент солтүстік аймақтарда білім алуда. Олардың басым бөлігі сол жақта жұмыс істеуге ниетті. Мінекей, биыл тағы 700 түлек олардың қатарын толықтыруға ынталы.

Данияр ДҮЙСЕМБАЕВ, 
ШҚО, Риддер қаласы әкімінің орынбасары:

Бізге келуге қызығушылық артуда

– 2013-2015 жылдары жұмыспен қамту бағдарламасы аясында Риддерде 60 пәтерлі 3 үй салынды. Оңтүстіктен 17 отбасыны көшіріп әкелдік. Әр отбасының ішінде бір адам міндетті түрде жұмыспен қамтылды. Оларға пәтер берілді. Қалған отбасы мүшелері кәсіпке тартылуда. Көбісі мектепте мұғалім, балабақшада тәрбиеші болып жұмыс істейді. 
Қазір қалада 264 бос жұмыс орны бар. Қалалық ауруханаға 13 дәрігер жетіспейді. Білім саласына 34, медицина саласына 35 маман керек. Бізге терапевт дәрігер, рентгенолог, лаборанттар қажет. Осы жәрмеңке аясында Оңтүстіктен 20 отбасы бізге келуге қызығушылық танытып отыр. Әр адамға 35 айлық есептік көрсеткіште көші-қон шығындары төленеді.
Сондай-ақ, «Серпін» бағдарламасы бойынша қаладағы аграрлық техникалық колледжде ОҚО-дан 22 студент білім алып жатыр. Бәрі де 2017 жылы оқуын аяқтайды. Біз олардың ата-анасына, әр отбасыға хат жолдадық. Оларды да осында жұмысқа орналастыруға жағдай жасауға мүдделіміз. 
Риддерде кен байыту өндірісі дамыған. «Қазмырыш» компаниясында 8 мыңнан аса астам адам жұмыс істейді. Риддер қысқы спорт түрлері бойынша да облыстағы көшбасшы қала. Тағы бір айта кетерлігі, бізде 3-6 жас аралығындағы бүлдіршіндерді балабақшаға қамтуда ешқандай кезек жоқ.

Қазір ауыруға болмайды. Құдай бетін аулақ қылсын, егер ауыра қалсаңыз, ол сырқат сізге қымбатқа түседі. Иә, тым қымбатқа түседі. Президент те отандық фармөндірістің оңалмай тұрғанына қынжылып, биылғы Жолдауында Үкіметке заңнамалық тұрғыдан барлық дәрі-дәрмектің бағасын реттеуді енгізуді тапсырды.

Елбасы бұған дейін еліміздегі дәрі сатып алумен айналысатын «СҚ-Фармация» компаниясын «мафия» деп атаған еді. Президент мемлекет бөлетін ақшаға дәрі-дәрмек сатып алып, таратумен айналысатын компанияны майшелпекке айналдырып, отандық фармацияны дамытқысы келмей отырғандарды сөккен. Елбасының айтуынша, шетелдік дәрілерге тапсырыс беріп, пайдаға батып отырғандар фабрика салуды сұраған кәсіпкерлерді маңдарына жуытпай отыр. Мемлекет басшысының сөзінен кейін сең қозғалды. Күн сайын көк жәшіктен кешкі жаңалықтарды жібермей көретін жұртшылық Жолдауға іле-шала Ақтөбе облысының әкімі Бердібек Сапарбаевтың дәрі-дәрмекке бағаны көтермеу туралы меморандумды орындамаған меморган басшыларын анықтап, қатаң шаралар қолданғанын естіді. 

Ал біздің Оңтүстік Қазақстан облысында тегін медициналық көмектің кепілді көлемі шеңберінде 2017 сатып алынатын отандық өндірушілермен өндірілген дәрілік заттардың үлесі 20 пайыз құраған. Бұл дегеніңіз, өзіміздің Шымкенттегі «Химфарм» фармзауытының өнімінің үлесі деген сөз. Яғни, 80 пайыз – импортпен әкелінетін дәрі-дәрмек. Әлбетте дәрінің басым бөлігі шетелден жеткізілетін болған соң, халықтың қалтасын қағары сөзсіз. Одан кейін «сырқаттың «құны» – қымбат», «дәрі бағасы удай» деп ұлардай шулап жатқанымыз... Шын мәнінде, «Химфарм»-ның өнімдері белгіленген бағада сатыла ма? Шымкентте дәрі-дәрмек қымбат па? 

Жалпы өңіріміздегі дәріханалар саны – 1526. Ал Шымкент қаласында – 862, ауылдық жерлерде – 620 дәріхана бар. 

Мемлекет жыл сайын дәрі-дәрмектерді сатып алуға бөлінетін қаржы көлемін арттыруда. Осы орайда ОҚО бойынша 2017 жылы дәрі-дәрмекке – 21 938 298 мың теңге бөлінген. Былай қарағанда, аз қаржы емес. Мемлекеттің қолдауы жеткілікті. Дәрі-дәрмекті тұрақты бағада ұстау үшін Денсаулық сақтау министрлігі «Дәрілік заттардың бағасын өсірмеу туралы» меморандумға қол қойған. 

– 2016 жылы ОҚО ДСБ қатысуымен халықтың әлеуметтік жағынан қорғалмаған топтарына қолдау көрсету мақсатында ОҚО әкімдігі, «ДАМУ» фармацевтикалық және медициналық қызметкерлер қауымдастығы, отандық өндіруші «Химфарм» АҚ және ОҚО-дағы дәрілік заттар мен медициналық мақсаттағы бұйымдарды көтерме сауда жасаушы дистрибьютерлер арасында төртжақты Меморандумға қол жеткізілген. Аталған Меморандумға сәйкес, облыс тұрғындарымен жиі қолданылатын 106 атаудағы дәрілік заттар мен медициналық бұйымдарға шекті бағалар қойылып бекітілген. Ал таяуда 2017 жылға тағы да Меморандумға қол қойылды. Енді отандық дәрілік заттар мен медициналық бұйымдарды өндіруші компаниялар мен шетелдік тауарлардың ресми дистрибьюторлары 150 дәрілік заттың бағасын жыл соңына дейін көтермейтін болады, – дейді Медициналық және фармацевтикалық қызметті бақылау комитетінің ОҚО бойынша департаменті басшысының орынбасары Қ.Меңдібаев. 

Бұл жолғы келісім облыстағы фармацевтік мекемелер мен дәріханаларда сатылатын дәрілік заттарды тұрақты бағада ұстауға, сонымен қатар бағаның негізсіз көтерілуінен тұтынушылар құқығын қорғау және әлеуметтік алаңдаушылықты болдырмауға арналғанымен, әлі де құзырлы органдар тарапынан қатаң қадағалау болмаса, баға тұрақталмайтыны белгілі. 

Сөзіміз негізсіз болмас үшін, қаладағы дәріханалардың бірнешеуіне кіріп, бағасын сұрастырған болатынбыз. Әр дәрінің атын атап, оқырманды шатастырмас үшін бір-екеуін ғана мысалға алайық. Жергілікті «Химфарм»-ның дәрі-дәрмегі шекті бағада сатылуда. 36+ дәріханаларында мия тамырының шырыны 375 теңгеден, парацетамол (0,5 №10) – 35 теңгеден саудалануда. Дәл осы «Химфарм»-ның парацетамолы «Зерде» дәріханаларында – 29 теңге, «Еурофарма» дәріханалар желісінде – 33 теңгеден. Бір ғана парацематолдың өзі әр дәріханада әр түрлі бағада. 

Мәселен, сол меморандумда аты аталған «Оксолин» жақпамайының көтерме бағадағы құны 78 теңге болса, дәріханада 400 теңгеге дейін көтерілген. Сол тізімдегі «Хилак-форте» бұрын 1200 теңге болса, қазір 2400 теңгеден саудаланып жатыр. Халыққа ең керекті дәрілер – суықтағанға қарсы қолданылатын препараттар. Мәселен, парацетамоллдың бағасы меморандумда 13-28 теңге аралығында сатылсын делінсе, қазір 60 теңгеге дейін көтерілді. Аспирин құны – 25 теңге деп көрсетілгенімен, қазір оны 60 теңгеден әрең табасыз. Антигриппиннің бағасы бұрын 50-70 теңге болса, қазір 120-150 теңгеден толып тұр. Гормондар 2 мыңнан 7 мыңға дейін жетті. Көптеген дәріханалар меморандумды әрі қарай ұзартуға қарсы болған. Себебі оларға пайдасы жоқ. Демек, бағаға ешкім әсер ете алмайды. Тіпті, мемлекет те. Бәрі дәріханалардың өз еркінде.

Тассай елдімекенінің тұрғыны Гүлбаршын әжейден «Дәрі-дәрмек бағасына көңіліңіз тола ма?» деп сұрап едік. 

– Өзім екінші топтағы мүгедекпін. Қант диабетімен ауырамын, осыдан 10 жыл бұрын инсульт алғанмын. Қан қысымым да жиі көтеріледі. Қысқасын айтқанда, бір күнім дәрісіз өтпейді. Ішім – «аптекаға» айналған. Ал сол дәрі-дәрмекті алу үшін зейнетақымды тұстастай жұмсауыма тура келеді. Себебі әр дәріханада баға әртүрлі. Әрқайсысы бағаны қалай қойса да, халықтың дәріні еріксіз тұтынатынын біледі. Соңғы кездері дәрі-дәрмек қатты қымбаттап кетті. Бұрын 100 теңгеге алатын мукалтинді қазір 160 теңгеге әзер аламын. Басқа да дәрілердің бағасы шарықтап тұр, – деді.

«Europharma» дәріханалар желісінің басшысы Жүсіп Алмас: «Дәрі бағасы барлық дәріханада бірдей бағада сатылуы мүмкін емес», - дейді. Себебі, әр дәріхананың тиісті дәріханалық тәжірибесі және онда қызмет көрсететін фармацевтердің де білім-білігі бірдей емес. Мәселен «Europharma»-ның Қазақстан бойынша 16 қалада 150-ден астам, ал ОҚО бойынша 49 дәріханасы бар. Отандық фармацевтика нарығында 10 жылдан бері қызмет көрсетіп келетін «Europharma»-да 430-ға жуық қызметкер жұмыс істейді. ОҚО бойынша 49 дәріханасының 48-інің ғимараты жалға алынады. Жүсіп Алмастың айтуынша, жалдау төлемі, коммуналдық қызметақысы мен осыншама қызметкердің айлық жалақысын шығару да оңай емес. 

Аталған дәріханалар желісі 12 дәріханасына елімізде бірінші болып JPP (тиісті дәріханалық тәжірибе) сертификатын алыпты. Енді тағы 10 дәріханасына осы сертификатты алуға күш салуда. JPP сертификаты 3 жылға дейін жарамды. Негізінен Қазақстандағы барлық дәріханалар бұл сертификатты 2018 жылдың 1 қаңтарына дейін толықтай алып бітуге тиіс. «Europharma» 3 жылда бір рет мемлекеттік аттестациядан өтіп тұрады. Дегенмен «бұл дәріханалар желісінде дәрі-дәрмек басқаларына қарағанда қымбаттау» деген пікірді де жиі естиміз. Ол туралы Жүсіп Алмас егжей-тегжей тоқталды: 

– Дәріхана саны көбейген сайын баға төмендей береді. Өйткені дәл қазіргі нарықтық жағдайда дәріні қымбат бағада сатып, дәріхананы ұстап тұру мүмкін емес. Біздің дәріханаларда дәрі-дәрмек басқаларына қарағанда қымбаттау деген пікірлерге орай арнайы зерттеу жүргізіп көрдім. Біздегі дәрілердің жарамдылық мерзімі 4 айдан кем болмайды. Сосын біз фармацевтерімізді жыл сайын біліктілік курсына оқытамыз. Содан да болар, біздің мамандар тұрғындарға сапалы қызмет көрсетеді. Басқа жақта қымбат дәрі бізде арзан немесе керісінше болуы мүмкін, – дейді. 

«Europharma» «Ақниет» компаниясы арқылы отандық және шетелдік 270 тауар өндірушімен тікелей келісімшартқа отырады. Дәріханалар желісінде зейнеткерлерге, ҰОС ардагерлеріне 5 пайыз қарапайым тұрғындарға 3 пайыздық жеңілдік картасы да қарастырылған. Сонымен қатар, мүгедектерге арналған пандустар салынған. Аталған дәріханаларда дәрігер-кеңесші тегін қызмет көрсетеді. 

Ауру батпандап кіріп, мысқалдап шығады. Сырқатыңнан жазылам дегенше, дәрі-дәрмек бағасы да титықтатып жіберетінін кез келгеніміз мойындаймыз. 

Қазір не көп, дәріхана мен дәрінің түрі көп. Қол қойылып, мөр басылатын қаптаған құжат та аз емес. Алайда сол құжаттарда көрсетілген шекті баға шын мәнінде шеңберінен шықпаса, қанеки?! Медициналық және фармацевтикалық қызметті бақылау комитетінің ОҚО бойынша департаменті жуырда ғана 2017 жылға бекітілген 150 дәрілік заттың ғана бағасын бақылай алады. Алайда басқа да дәрілік заттардың бағасы ше? Сол 150-нің жыл соңына дейін көтеріліп немесе тұрақты қалыпта болатынын уақыт көрсетеді. Сөзбен емес, іспен көрсететін сәт жетті.

Соңғы жылдары Қазақстан Қарулы күштерінің қатары білікті мамандармен толықты. Әскери бөлімдердің соңғы үлгідегі техникамен жарақтандырылуы, әр түрлі қажетті құралдармен қамтамасыз етілуі жоғары деңгейде. ҚР Парламент Сенатының Халықаралық қатынастар, қорғаныс және қауіпсіздік комитетінің төрайымы Дариға Назарбаева бастаған комитет мүшелері өңірімізге келген екі күндік жұмыс сапарында осыған көз жеткізді. Алдағы уақытта әскерилердің әлеуметтік жағдайы да жақсара бермек.

Сенат депутаттары Дариға Назарбаева, Икрам Адырбеков, Мұхтар Алтынбаев, Серік Жақсыбеков, Ләззат Қиынов және Георгий Ким сапар барысында өңірдегі Әуе қорғанысы күштерінің әскери бөлімдері, Ұлттық ұлан және Шекара қызметі бөлімшелерінің жауынгерлік әзірлігі мәселелерін зерделеуді мақсат еткен. 

Алдымен, сенаторлар Қазақстан Қарулы Күштерінің Шымкент гарнизонында болып, жеке құрамның күнделікті тыныс-тіршілігімен танысты. Сонымен қатар, авиациялық базаның әскери бөлімдеріндегі жауынгерлік кезекшіліктің ұйымдастырылуын, Су-25, МиГ-29 ұшақтары мен Ми-17, Ми-171Ш және Ми-35М тікұшақтары тұрған әуе шабуылына қарсы қорғаныс әскерлерін көріп шықты. Радиотехникалық және зениттік зымыран бөлімшелері мен әскери авиация экипаждарының жауынгерлік мүмкіндіктерін де тамашалады. 

Одан кейін делегаттар ҚР Ұлттық ұланы «Оңтүстік» өңірлік қолбасшылығының Шымкент қаласындағы 6506 әскери бөлімінде болды. Онда «Оңтүстік» өңірлік қолбасшылығының қолбасшысы, генерал-майор Қайрат Ақтанов депутаттарды әскери бөлімнің жауынгерлік қызметі мен әскердің жеке құрамына жүктелген құқық қорғау міндеттерін, қару-жарақ пен қорғаныс құралдарының жаңа үлгілерімен таныстырып, сондай-ақ, әскери құрылымды одан әрі дамытудағы келешекте атқарылатын істерден хабардар етті. 

Сондай-ақ, сенаторлар ішкі әскердің 1995 жылы тәжік-ауған шекарасында қаза тапқан жаужүрек 17 жауынгердің ескерткішіне гүл шоғын қойып, тағзым етті. «Жас бүркіт» әскери-патриоттық клубының жауынгерлік әдіс-тәсілдері де халық қалаулыларының көңілінен шықты. 

– «Оңтүстік» бағыт – өте маңызды. Террористік қауіптің алдын алу, шекарамызды күшейту сынды жағдай баса назарда тұрғанын білесіздер. Сол себептен, бүгінгі әскери қорғанысымыздың, шекарашылардың, басқа да әскери құрылымдардың атқарып жатқан жұмыстарының деңгейін білуіміз керек. Әскерилердің қазіргі заман талабына сай қажетті құрал-жабдықтармен қамтылуына жоғары баға беруге болады. Әсіресе, кадрлар мәселесінің уақыт сәтімен шешімін табуы қуантады. Офицерлер өте тәжірибелі. Өздерінің мамандықтарын меңгерген, – деді Сенат депутаты Икрам Адырбеков. 

Бұл саладағы негізгі мәселелердің бірі – әскерлердің әлеуметтік жағдайы. Сенаторлар осы жағдайды терең зерттемек. 

И.Адырбековтың айтуынша, Отан қорғаушылардың баспана, жалақы мәселесі, басқа да әлеуметтік қосымша төлемдеріне байланысты сауал болса, ол мәселе тиісті органдарға жеткізілмек. 

Жұмысшы топ екі күндік сапар барысында Сабыр Рахымов атындағы «Жас ұлан» республикалық әскери мектебі және Оңтүстік Қазақстан аумағындағы кедендік бекеттердің жұмысымен танысуды жоспарлап отыр. Сарыағаш ауданындағы әскери бөлімде комитеттің жылжымалы отырысы өтпек.

Өзбекстан астанасы Ташкентте және облыс орталығы Шымкент қаласында фармацевтика компанияларының өнімдері сатылатын сауда үйі ашылмақ. Бұл келісімге Астана қаласында өткен қазақ-өзбек бизнес форумынан кейін қол жеткізілді.

Өзбекстанда ашылатын сауда үйінде ОҚО фармацевтика компанияларының өнімдері сатылса, Шымкент қаласында ашылатын сауда үйінде өзбекстандық фарм өнімдері саудаланады.

Бүгінде Оңтүстікте фармацевтика кластері дамып келеді. Республикадағы өндіріліп жатқан фармацевтикалық препараттардың жартысына жуығы Оңтүстіктің үлесінде екені белгілі.

Естеріңізге сала кетсек, өткен аптада Өзбекстан Республикасының Президенті Шавхат Мирзиеевтың Қазақстанға мемлекеттік сапары шеңберінде Астанада қазақ-өзбек бизнес форумы өткен болатын. Онда В2В форматында келіссөздер жүргізіліп, оңтүстікқазақстандық делегаттар фарм өнімдері нарығының өрісін кеңейтуді талқылаған еді.

Оңтүстік Қазақстан облысының әкімі Жансейіт Түймебаев бастаған, құрамында Шымкент қаласының әкімі Ғабидолла Әбдірахымов, сонымен қатар, индустрия, кәсіпкерлік, ауыл шаруашылығы саласына жауапты өкілдері бар жұмыс тобы Өзбекстанға іссапармен барды, – деп хабарлайды ҚазАқпарат ХАА тілшісі.

Оңтүстікқазақстандық делегация мүшелері алдымен Ташкенттің сәулеттік сәнімен танысты. Бауырлас елдің мәдени-рухани байланысы бойынша бірқатар кездесулер өтті. Аймақ басшысы Өзбекстан Республикасы Премьер-Министрінің орынбасары - Ауыл және су шаруашылығы министрі Заир Мирзаевпен кездесті. 

– Оңтүстік Қазақстан облысын Өзбекстанда жақсы дамыған жеңіл өнеркәсіп, өндіріс, ауыл шаруашылығы салаларындағы жетістіктер қызықтырады. Аталған салаларда тәжірибе алмасып, бірігіп еңбек етсек, қос мемлекетке де тиімді жобалар жүзеге асады деген сенімдемін. Мәселен, Сіздерде шығарылатын ауыл шаруашылығы тракторларын сатып алып, Өзбекстанның сауда үйін ұйымдастыруымызға болады. Немесе арнайы жұмысшы тобын құрып, шекаралық аймақтағы кейбір мәселелерді реттеуге атсалыссақ деген ұсынысым бар. Өйткені, Қазақстан Сіздер үшін өзге мемлекеттерге шығатын қақпа іспеттес. Мәселен, өткен жылдың өзінде, 9 млн 400 адам қазақ-өзбек кеден бекетінен өтіп, өзге елдерге бет алыпты. Сондықтан, Оңтүстік өңірі мен Өзбекстан Республикасы барлық салада мүмкіндіктерін біріктіруі керек деп есептеймін, – деді облыс әкімі. 

Өзбекстанға сапары кезінде облыс әкімі Жансейіт Түймебаев Ташкент қаласының әкімі Рахманбек Усмановпен кездесті. Көрші ел астанасы әкімімен болған әңгімеде Ташкенттің сәулеттік сәні де сөз болды. Бұл бойынша қазақстандық тарап бірлескен жобаларды қолға алуға болатынын айтты. Көрші елдің сан саладағы үздіктерін облыс басшысы өңірге арнайы шақырды. Сәуір айының соңына қарай Оңтүстік Қазақстанда өзбекстандық тауар өндірушілердің көрмесін ұйымдастыру бойынша келісімге келді.

Сапар барысында оңтүстікқазақстандық делегация трактор шығаратын зауыт пен жеміс-жидектерден құрғақ өнім дайындайтын өндіріс орындарын, табиғи тас алатын карьерді аралады. Туысқан елдегі Жоғарғы Шыршық ауданы мен Алмалық қаласында болды. Ондағы қандастарымыздың наурыз дастарханынан дәм татты.