Британдықтар – Шымкентте
Британдық BBC телеарнасы «Top Gear» бағдарламасының Шымкент қаласы туралы эпизоды наурыз айында көрермендерге ұсынылады.
Осыдан ілгері «Top Gear» бағдарламасының өкілдері Шымкент қаласында болып, танымал шоудың жаңа сериялының көрінісін түсірген болатын.
«Түсірілім өте табысты өтті», – деген бағдарлама редакторы Алекс Рентон осы сәтті сапар үшін Шымкент қаласының әкімі Ғабидолла Әбдірахымовқа Алғыс хат жолдады. Ол фильм түсру барысындағы ең әсерлі эпизодтар Оңтүстік Қазақстан облысында, оның ішінде шырайлы Шымкент қаласында өткенін, осы түсірілімге қолдау көрсеткені үшін қала әкіміне ризашылығын білдірді.
«Top Gear» британдық телеарналардағы ең танымал бағдарламалардың бірі. Бұл бағдарлама 1977 жылдан бастап шығарыла бастаған. 350 миллионнан астам ресми аудиториясы бар. Эфирдегі көрсетілім ұзақтығы – шамамен 60 минут. Құрылғаннан бері «Эмми» және тағы басқа телевизиялық марапаттардың иегері.
– 2020 жылға қарай, Шымкент тұрғындар мен туристер үшін тартымды, ыңғайлы қала болуы тиіс. Бұл біздің қаламыздың дамыту тұжырымдамасының басты мақсаты болып табылады. Біз үшін, «Top Gear» әуелі тұтастай алғанда ерімізді, оның ішінде Шымқаламызды халықаралық аудитория назарын аудартуға тамаша мүмкіндік болып табылады. Біз аталған бағдарлама тобының Шымкентті түсірілім алаңы ретінде таңдағаны үшін алғысымызды бірдіреміз, – деп хабарлайды қала әкімдігінің баспасөз қызметі.
Қазақстан-Корея: ынтымақтастықтың жаңа көкжиегі
Елбасы Нұрсұлтан Назарбаев осы аптада Жапонияға жасаған ресми сапарынан соң Корея Республикасына келді. Мемлекет басшысы алдымен ел астанасы Сеул қаласындағы Отан үшін құрбан болғандар монументіне гүл шоғын қою рәсіміне қатысып, бір минут үнсіздікпен боздақтар рухына тағзым етті. Сондай-ақ Қазақстан Президенті Құрметті қонақтар кітабына қолтаңба қалдырды.
Сапар барысында Қазақстан Президенті Корея Республикасының Президенті Пак Кын Хемен кеңейтілген құрамда келіссөз жүргізді. Екі елдің басшылары Қазақстан мен Кореяның стратегиялық серіктестігін жаңа сапалы деңгейге көтеру бағытындағы жұмысты жалғастыруға уағдаласты. Қазақстан Президенті Тынық мұхиты жағалауындағы Қытайдың Ляньюньган портының қазақстандық терминалы құрылысының аяқталғанын атап өтті.
– Бұл терминал арқылы қазірдің өзінде миллионға жуық контейнер тасымалданды. Сонымен бірге Қытаймен шекаралас Қорғас «құрғақ портын» Каспий теңізіндегі Ақтау теңіз портымен жалғайтын теміржол салынып, Түрікменстан және Иран арқылы Парсы шығанағына дейін теміржол төселді. Осы бағыттардың бәрін корей бизнесінің пайдалануына болады, – деді Мемлекет басшысы.
Пак Кын Хе Нұрсұлтан Назарбаевпен елдеріміз арасында дипломатиялық қарым-қатынас орнағанына 25 жыл толу қарсаңында кездесіп отырғанына айрықша қуанышты екенін жеткізді.
– Мемлекеттер басшыларының арасындағы өзара сенімге негізделген жеке достық қарым-қатынастың қалыптасқаны елдеріміздің стратегиялық әріптестігінің де нығая түсуіне септігін тигізеді. Қазақстан мен Кореяның қарым-қатынасы бір-бірін өзара толықтырушы ынтымақтастық негізінде жедел қарқынмен дамып келеді, – деді Корея Республикасының Президенті.
Бұдан соң Мемлекет басшысы Корея Республикасының іскер топтар өкілдерімен кездесті. Кездесуге ірі корей компанияларының өкілдері қатысты. Мемлекет басшысы Корея Республикасы Қазақстанның Шығыс Азиядағы негізгі әріптестерінің бір екенін, тәуелсіздік жылдары осы елден келген инвестицияның жалпы көлемі 9 млрд долларға жеткенін атап өтті. Қазақстан Президенті 2015 жылы бірқатар сыртқы факторлар мен объективті себептерге байланысты өзара сауда-саттық көлемі біршама азайғанын айтты.
– Осы орайда біздің экономикалық ынтымақтастығымызға тың серпін беру маңызды. Энергетика, ауыл шаруашылығы, машина жасау, құрылыс, қаржы және инвестициялар, көлік-логистика жүйесі өзара іс-қимылдың перспективалы бағыттары болып саналады, – деді Н. Назарбаев.
Қазақстан Президенті атап өткендей, біздің елде оңтүстіккореялық капиталдың үлесі бар 465 бірлескен кәсіпорын жұмыс істеуде, соңғы үш жылдың өзінде жалпы құны 160 млн доллар болатын 14 инвестициялық жоба іске асты. Бұдан бөлек, Мемлекет басшысы корей компанияларын Қазақстандағы мемлекеттік кәсіпорындарды жаппай жекешелендіру үрдісіне, алдағы «ЭКСПО-2017»: болашақтың энергиясы» халықаралық мамандандырылған көрмесінің жұмысына, «Астана» халықаралық қаржы орталығының қызметіне белсене атсалысуға шақырды.
– Біз корей компанияларымен экономиканың барлық секторында ынтымақтастық орнатуға әзірміз. Бүгінгі біздің кездесуіміз елдеріміздің іскер топтарының өзара тиімді ынтымақтастығының жаңа мүмкіндіктері мен перспективаларын анықтап береді деп үміттенемін, – деді Елбасы.
Мемлекет басшысы сапар аясында Оңтүстік Кореяның Президентімен жүргізілген келіссөздің жемісті болғанын айтып, онда іскерлік ынтымақтастық аясын кеңейтудің жаңа мүмкіндіктері, соның ішінде Қазақстанның көлік инфрақұрылымын дамыту, ЕАЭО нарығына шығу перспективалары талқыланғанын атап өтті.
Өркендеуге өріс алған қала
ӨҢІР БАСШЫСЫ ШЫМКЕНТТЕГІ ӨНЕРКӘСІП ОРЫНДАРЫМЕН ТАНЫСТЫ
Шымкентте бірқатар жаңа нысандар бой көтермек. «Нұрсәт» шағынауданы аумағындағы 8 мың орындық мешіттің құрылысы басталғанына жарты жылға жуықтады. Тағы бір қолға алынған әлеуметтік нысан – «Қазақ инновациялық университеті» қалашығы. Оның құрылысы келесі жылға жоспарланып отыр. Облыс әкімі Жансейіт Түймебаев қалада салынып жатқан жаңа нысандарды аралап, бірқатар өндіріс орындарының тыныс-тіршілігімен танысты.
Аймақ басшысы ең алдымен көкөніс өсіретін «SMG Greenhouse profit» ЖШС-нің жылыжай кешенінде болды. «Достық» елдімекеніндегі төрт гектардан астам аумақтағы өндіріс орны түркиялық және нидерландиялық технология бойынша жұмыс істейді. Мұнда жылына 1 мың тоннадан астам қияр өндірілуде. Бас директор Ділмұхаммед Сейділдаевтың айтуынша, бүгінде аптасына 29-30 тонна көкөніс өнімдері жиналып, Ресей нарығына шығарылуда. Мекемеде 45 адам еңбек етеді. Жұмысшылардың бәрі «Достық» ауылынан.
Шымкентте жалпы 141 гектар жылыжай бар болса, оның 25 гектары – өнеркәсіптік. Биылдың өзінде қалада 12 гектар жылыжай ашылды. Шымкент қалалық ауылшаруашылығы және ветеринария бөлімінің басшысы Ғани Құрманбай жыл басынан бері 13 мың тонна қызанақ, 7 мың тонна қияр өндірілгенін мәлімдеді. Өнім желтоқсанға дейін жиналатындықтан, бұл көрсеткіш әлі де ұлғая түспек.
Өңір басшысы өнімді ең алдымен ішкі нарыққа, одан кейін ТМД елдеріне экспорттауды, жұмысшылардың жалақысын мүмкіндігінше жоғарылатуды тапсырды.
«Стандарт Цемент» ЖШС-і еліміздегі өндірістік әлеуеті жоғары кәсіпорынның бірі. Кәсіп-орында экологиялық талаптарды сақтайтын заманауи құрылғылар орнатылған. Өңір басшысы 1100-ден астам адам еңбек ететін компанияның жұмыс барысымен танысып, өндірістің әлеуетіне жоғары баға берді.
Келешегі қаланың сәулеттік келбетін дамытып әрі руханият орталығына айналдыратын жобаның бірі – ӘІО аумағында салынып жатқан 8 мың орындық мешіт. Нысан аумағында автокөлік қоюға арналған паркинг, күннен қуат алатын құрылғылар орналасады. Қазір 12 гектарды қамтитын аумақта алғашқы құрылыс жұмыстары жүргізілуде.
Мұнда мұсылмандық жоралғыларды жасайтын орындар, конгресс-холл, асхана, неке сарайы, медресе, кітапхана мен әкімшілік бөлмелер салынады. Жоспар бойынша мешіт 2018 жылы ел игілігіне беріледі.
– Мешіттің айналасына баса мән беріңіздер. Мешітке келушілер үшін тартымды әрі ыңғайлы болуы тиіс. Яғни, кең болуы керек, – деді Жансейіт Қансейітұлы.
Бүгінде инновациялық-технологиялық мамандықтарға деген сұраныс артып отыр. Қаладағы инновациялық – технологиялық колледжде білім алған студенттер жұмыссыз қалмайды. Қазір оқу орнында 970 студент мұнай-газ саласы, құрылыс, темір-бетон өндірісі, қонақүй шаруашылығы, цемент өндірісінің технологиясы, т.б. тоғыз мамандық бойынша білім нәрімен сусындауда. Олардың бәрі де «Стандарт Цемент» ЖШС-да өндірістік тәжірибеден өтіп, басым бөлігі осында жұмысқа орналасуға мүмкіндік алған.
«Саутс Ойл» ЖШС-нің басшысы, облыстық мәслихаттың депутаты Серікжан Сейітжанов облыс басшысына «Бозарық» шағынауданы аумағынан бой көтеретін «Қазақ инновациялық университетінің» жобасымен таныстырды. Жаңа университет қалашығына бүгінде 150 гектар жер бөлініп, сәулеттік-құрылыс жобасы бекітілген. 10 мыңнан аса шәкірттерді даярлайтын оқу орнында үш бағытта (медицина, химия-технология, жоғарғы бизнес мектебі) білім беріледі.
Сәулеттік жобалау тобының жетекшісі Смат Саухатовтың айтуынша, қалашық аумағынан тұрғын үй кешені, мейманхана, сауда үйі, спорт залы және жоғары мәртебелі қонақтарға арналған резиденция орналасады.
Қазақстандағы ең үлкен университеттердің біріне айналатын нысанның іргетасы келесі жылы қаланады. Жалпы, 3-4 жылда аяқтау жоспарда.
Жапония – Қазақстан үшін сенімді серіктес
ҚР Президенті Нұрсұлтан Назарбаев Жапонияға ресми сапармен барды. Онда Елбасы Жапония Императоры Акихитомен кездесті. Кездесу барысында Қазақстан мен Жапония арасындағы қазіргі қарым-қатынастың ахуалы және оны алдағы уақытта қарқынды дамыту мүмкіндіктері талқыланды.
Нұрсұлтан Назарбаев екі елдің түрлі саладағы өзара іс-қимылына, соның ішінде Жапонияның Астанада өтетін Әлемдік және дәстүрлі діндер көшбасшыларының съезіне тұрақты түрде қатысып келе жатқанына тоқталып, бұл елмен халықаралық қауіпсіздікті қамтамасыз ету, атап айтқанда, ядролық қаруды таратпау және қарусыздану саласында сенімді серіктестік орнағанын айтты.
Қазақстан Президенті жаһандық қақтығыстарды реттеуге және өңірдің тұрақты дамуына ықпал етуге Жапонияның баға жетпес үлес қосқанын атап өтті. Бұдан бөлек, Нұрсұлтан Назарбаев 2017-2018 жылдары еліміз БҰҰ-ның Қауіпсіздік кеңесінің тұрақты емес мүшесі ретінде жауапты миссия атқару барысында ядролық қарусыз әлем қалыптастыру, энергетика, азық-түлік және су қауіпсіздігі мәселелерін шешуге бағытталған шараларды қолға алатынын жеткізді.
Сондай-ақ, Қазақстан Президенті Жапония Премьер-Министрі Синдзо Абэмен кеңейтілген құрамда келіссөз жүргізді. Кездесу барысында Нұрсұлтан Назарбаев пен Синдзо Абэ екі ел ынтымақтастығының ауқымды мәселелерін, соның ішінде саяси өзара іс-қимыл, сауда-экономикалық және мәдени-гуманитарлық қарым-қатынастың жайын талқылады.
Нұрсұлтан НАЗАРБАЕВ:
– Бүгінде Астана Еуразияның ірі ғылыми және білім беру орталығының біріне айналды. Біз қазір жастарды білім алу үшін өзіміздің университетімізге тартудамыз. Онда жапон жастары да оқитын болады деп үміттенеміз.
Нұрсұлтан Назарбаев Қазақстан мен Жапония серіктестігінің жоғары деңгейге жеткенін және сапар аясында өтіп жатқан келіссөздер алдағы уақытта оның аясын кеңейтуге бағытталатынын атап өтті.
– Біздің елдеріміз ядролық қарудың зардабын тікелей өз басынан өткерді. Жапония мен Қазақстан антиядролық қозғалыстың көшбасшылары болып саналады. Бұл жұмысты біз бірлесіп жалғастырамыз деп сенемін. Менің Хиросимаға алдағы сапарымның мақсаты – жапон халқымен ниеттестігімізді білдіру, біз ХХІ ғасырда ядролық қарусыз әлем қалыптастыру жолында бірлесе жұмыс жүргізудеміз, – деді Мемлекет басшысы.
Сондай-ақ, Қазақстан Президенті екі елдің халықаралық аренадағы өзара іс-қимылының белсенді түрде жүргізіліп отырғанына назар аударды. Тәуелсіздік жылдарында бір ғана Жапониядан келген инвестицияның жалпы көлемі 10 млрд долларға жеткенін атап өтті.
Мемлекет басшысы Tokyo Rope компаниясында болды. Елбасы компания қызметімен танысып, шығарған өнімдерін көрді. Сондай-ақ, телекөпір арқылы Қазақстандағы болат бұйымдар шығаратын «Токио Роуп Алматы» зауытын салтанатты түрде іске қосу шарасына қатысты.
Мұнан кейін Н. Назарбаев «Токай» университетіне ат басын бұрды. Қазақстан Президенті университетті аралау барысында күннен қуат алатын «Токай челленджер» автокөлігін көріп, «Болашақ» бағдарламасы бойынша осында оқып жатқан қазақстандық студенттермен әңгімелесті. Елбасы оқу орнының ұжымы алдында сөйлеген сөзінде «Токай» университеті мен Назарбаев Университеті арасында қалыптасқан серіктестік қарым-қатынасқа назар аударды.
Тұрғын үй мен кәсіпкерлікті дамыту – тұрақты назарда
Осы аптада Оңтүстікке «Бәйтерек» Ұлттық басқарушы холдингі» АҚ басқарма төрағасы Ерболат Досаев іссапармен келді. Сапар барысында басқарма төрағасының қатысуымен өңірдегі тұрғын үй құрылысы мен кәсіпкерлікті дамыту бойынша жиын өтті. Басқосуда сөз алған облыс әкімі Жансейіт Түймебаев Елбасының облыс орталығы – Шымкентті еліміздің үшінші мегаполисіне айналдыру туралы тапсырмасына орай, шаһардың бүгінгі таңда үлкен құрылыс алаңына айналғанын жеткізді.
БИЫЛҒЫ МЕЖЕ – 1 496 ПӘТЕРЛІ 34 ТҰРҒЫН ҮЙ
Өңір басшысы мұндай ауқымды істердің сәтті атқарылуына мемлекет пен бизнестің жүйелі ара-қатынасы, оның ішінде, «Бәйтерек» холдингінің үлесі орасан екенін атап өтті. Мәселен, облысымызда «Бәйтерек девелопмент» арқылы былтыр көпқабатты 36 тұрғын үй пайдалануға беріліп, 1 572 отбасы тұрғын үймен қамтамысыз етілген. Ал биыл көлемі шамамен 93 мың шаршы метр болатын 1 496 пәтерлі 34 тұрғын үйді пайдалануға тапсыру жоспарланып отыр. Жиында облыс әкімінің бірінші орынбасары Дархан Сатыбалды тұрғын үйге баға құнын Алматы мен елордадағы пәтер құнымен теңестіру жағын ойластыруды ұсынды. Бұл құрылыс компанияларына материал үнемдемей, жұмыс сапасын арттыруға мүмкіндік береді. Сондай-ақ пәтер шаршы метрін де өзгерту ұсынысы жасалды, себебі ОҚО-да көп балалы отбасылар көп.
Бүгінде өңірімізде 43 мыңнан астам азамат үй кезегінде тұрса, бұл көрсеткіш бойынша Оңтүстік өңірі Астанадан кейінгі екінші орында тұр. «Қазір өңірде 243 тұрғын үй салынуда. Оның басым бөлігі мемлекеттік бағдарлама аясында. Жаңа әкімшілік-іскерлік орталығында және «Шымкент-сити» аумағында 316 тоғыз қабатты үй бой көтеруде», – деді өңір басшысының бірінші орынбасары.
Өз кезегінде Е.Досаев Оңтүстік өңіріндегі тұрғын үй құрылысы мен кәсіпкерлік салаларын дамытып, барлық ұсыныстарды қолдауға дайын екенін жеткізді. «Үкіметтің негізгі мемлекеттік және үкіметтік бағдарламаларын жүзеге асыруда қаржылық операторы болып табылатын «Бәйтерек» холдингі ҚР Мемлекеттік индустриалды-иннновациялық даму бағдарламасы аясында 2020 жылға дейінгі индустриалды жобаларды қаржыландырып, Мемлекеттік «Нұрлы жол» бағдарламасының тұрғын үй құрылысы жұмыстарына қатысады. Сонымен бірге, «Бизнестің жол картасы-2020» бағдарламасы шеңберінде шағын және орта кәсіпкерлікті дамытуға жан-жақты қолдау көрсетеді», – деді басқарма төрағасы.
Жиында сонымен қатар, бірқатар тиісті сала өкілдері тақырып аясындағы аймағымызға қатысты өзекті мәселелерді шешуде өз ойларымен бөлісіп, жан-жақты қолдауға әзір екендіктерін айтты. Мәжілісті қорытындылаған облыс әкімі өңірдегі кәсіпорындардың дамуына септігін тигізген «Бәйтерек» холдингінің басшылығына алғысын білдіріп, алдағы уақытта осы бағыттағы жұмыстарды жандандыруда, оның ішінде тоқыма кластерін дамытуда бірлесе жұмыс жасауға шақырды.
Жиын соңында Оңтүстік Қазақстан облысының әкімдігі мен «Даму» Кәсіпкерлікті дамыту қорының арасында шағын және орта кәсіпкерлікті қолдауға бағытталған ортақ меморандум түзілді. Сондай-ақ, жобаларды қаржыландыруға әзірлеу аясында «Kazakhstan Project Preparation Fund» ЖШС-мен меморандумға қол қойылды.
ӨНДІРІС ОРЫНДАРЫНЫҢ ЖҰМЫСЫМЕН ТАНЫСТЫ
Бұдан соң Басқарма төрағасы Е.Досаев өңір басшысы Ж. Түймебаевпен бірге Шымкенттегі холдингтің еншілес компаниялары қаржыландырған бірқатар нысандарда болды. Ең алдымен, «Асар» шағынауданына барып, «Нұрлы жол» инфрақұрылымдарды дамытуға арналған мемлекеттік бағдарламасының шеңберінде «Бәйтерек» Ұлттық холдингінің қолдауымен бой көтеріп жатқан көпқабатты үйлердің құрылысымен танысты.
Бүгінгі таңда шағынауданда 1496 пәтерден тұратын 5 қабатты 34 үйді 4 мердігер компания салуда. Өз кезегінде, басқарма төрағасы таныстырылған жұмыстарды оң бағалап, құрылысты сапалы әрі уақытылы істейтін мердігер мекемелерді қолдауға әрқашанда дайын екенін жеткізді.
Сапар аясында Ерболат Асқарбекұлы «Оңтүстік» арнайы экономикалық аймағында орналасқан «БалТекстиль» кілем фабрикасында болды. «Бизнестің жол картасы 2020» бағдарламасы аясында қолдау тауып, қаржыландырылған жоба 2014 жылы іске қосылып, кілем фабрикасымен 1722,6 мың ш.м. кілем мен кілем өнімдері дайындалған. Бүгінгі таңда мұнда 245 адам жұмыспен қамтылған.
Сонымен қатар, «AzalaTextile» ЖШС-і тоқыма-тігін фабрикасының өндірісімен де танысты. Аталған фабрика холдинг тарапынан «Бизнестің жол картасы 2020» бағдарламасы бойынша қолдау алған. «AzalaTextile» ЖШС-нің ерекшелігі сол, мұнда қолданылатын шикізаттардың барлығы отандық саналады. Бүгінгі таңда компанияның өнімдері Литва, Латвия, Италия мен Германия, Чехия, Ресей, Қытай мен Эстония сынды бірқатар мемлекеттерге экспортталады.
ОҢТҮСТІК ӨНІМДЕРІ ШЕТЕЛГЕ ЭКСПОРТТАЛУДА
Облыс әкімі Жансейіт Түймебаев пен «Бәйтерек» Ұлттық басқарушы Холдингі» АҚ Басқарма төрағасы Ерболат Досаев Қазығұрт ауданында болып, бірқатар кәсіпорындар мен шаруашылықтардың жұмысымен танысты. Алдымен Шарапхана ауылдық округіндегі Индустриалды аймақта орналасқан «Lotus Food Company LLC» жауапкершілігі шектеулі серіктестігінің «Тез әзірленетін тағамдар» өндірісімен және ауыл шаруашылығы саласына арналған биоорганикалық тыңайтқыштар шығаратын фабрика жұмысын аралап көрді. Жобалық құны 472 млн теңгені құрайтын кәсіпорын жылына 620 мыңнан аса қаптама әзірлеуге қауқарлы. Өнімді республика аумағының барлық қалаларына өткізу жоспарда бар. Күнделікті тұрмыста жоғары сұранысқа ие, тез дайындалатын өнімдер шығаратын кәсіпорын 48 адамды жұмыспен қамтуда.
Қазіргі таңда аудандағы индустриалдық аймақта 5,8 млрд теңгелік 7 жоба мақұлданып, осы жылы жалпы сомасы 722,7 млн теңгелік 2 жоба Индустрияландыру картасына енгізілген. Олар «Отырабат Құрылысы» ЖШС-ның құны 120 млн теңгелік газоблок өндірісі мен «Асыл Бастау КZ» ЖШС-нің құны 602,7 млн теңге болатын майсыздандырылған құрғақ сүт және сары май өндіру жобалары. Мұнан соң, облыс әкімі бастаған делегаттар Қызылқия ауыл округіндегі 500 гектардан астам жерге қарқынды бау шаруашылығын дамытып отырған «Аманкелді» ЖШС-нің жұмысымен танысты. Сапар барысында шаруалардың жұмысымен танысқан өңір басшысы тұқымбақтағы өндірілетін көшеттерді кеңінен насихаттап, өзге де аудандарға ұсынуды тапсырды. «Елбасы Оңтүстікке жасаған сапарында облыстың көкөніс пен жеміс-жидек өндіретін нағыз «фабрикаға» айналуға барлық мүмкіндігі бар деген болатын. Осы мүмкіндікті барынша қолдану үшін барлық аудан, қалалар аталған серіктестіктен тәжірибе алып, бау-бақша шаруашылығын дамытуымыз керек», – деді әкім. Ерболат Досаев өз сөзінде шағын және орта кәсіпкерліктің дамуына қашанда қолдау көрсетілетінін айтып, облыстағы өндірілетін өнімдерді өзге де өңірлерге кеңінен таныстыру қажеттігіне тоқталды.
Өзбекстанға сапарлап барды
Қасиетті жұма күні Ташкент қаласында Өзбекстан Республикасының бірінші Президенті Ислам Каримовтың құрметіне «Ислом ота» мешітінің ресми ашылуы болып өтті.
Шараға Қазақстан мұсылмандары діни басқармасы атынан ҚМДБ-ның ОҚО бойынша өкіл имамы Ахметжан қажы Керімбек және оның орынбасары Мұхамеджан Естеміров қатысты.
Онда облыс имамы Ахметжан Керімбек Бас мүфти Ержан қажы Малғажыұлының құттықтау хатын оқып, қазақи дәстүр негізінде қала басшысының иығына шапан жауып, сый құрмет көрсетті.
Жалпы, «Ислом ота» мешітінің сыйымдылығы 2400 адамға арналған.
Бүгінде, Өзбекстан аумағында 2225 мешіт ресми тіркелген.
Бұл күні Өзбекстан діни басқармасының ұйытқы болуымен Қазақстаннан барған бір топ делегат Самарқанд қаласы Хазреті Қыдыр мешіті жанында жерленген марқұм Ислам Каримовтың мазарына барып, зиярат етіп, Құран бағыштады.
Германия делегациясы келді
Қала әкімінің орынбасары Бейсенбек Жанбосынов Германияның Экономика министрлігінің өкілі бастаған неміс бизнес делегациясымен кездесті.
Қала әкімдігінде өткен екі жақты кездесу барысында қала әкімінің орынбасары Шымкент қаласының айтарлықтай экономикалық әлеуеті бар екенін атап өтіп, қонақтарға болашақтағы инвестициялық мүмкіндіктерді таныстырды. Шетелдік инвесторлар Шымкенттің қонақжай қала екендігін айтып, өз алғысын білдірді. Әрі Қазақстан өз кезегінде Орталық Азиядағы негізгі экономикалық серіктесі болып табылатынын атап өтті.
Алқалы жиында неміс кәсіпкерлері өз компанияларының қызметі туралы айтып берді. Айта кетерлігі, неміс кәсіпорындары шойын су құбырларын, жер асты суларының жай-күйін қадағалайтын және сарқынды суды тазарту жабдығына арналған сүзгілер, ұңғымаларды салу және ағынды суларды ағызу жұмыстарымен айналысады.
Кездесу соңында тараптар одан әрі жемісті ынтымақтастыққа сенім білдірді. Осы реткі жұмыс сапары аясында шетелдік кәсіпкерлер Шымкент су компаниясының жұмысымен танысады.
Шымкент пен Арика бауырлас қалаға айналмақ
Шымкентке Чили Республикасының құрметті консулы Леонид Шейнгезихт келді. Екіжақты кездесу барысында шетелдік қонақ Чилидің ауыл шаруашылығы, шарап қабылдау, медициналық техниканы өндіру, топырақ ресурстарын және туризмді дамыту, өндіру кезінде пайдаланылатын өңдеу зауыттарын салу, экономикалық және инвестициялық мүмкіндіктері туралы әңгімелеп берді.
Сондай-ақ, Қазақстан-Чили арасындағы технология нарығын қолдану жөнінде мысалдар келтірді. Қала әкімінің орынбасары Қайрат Нұртай мен аппарат басшысы Рашид Аюпов Шымкент қаласының агрорлық саладағы болашақ мүмкіндіктері туралы айтып, ірі кәсіпорындар өз тауарларын экспорттауға қабілетті екендігін тілге тиек етті. Кездесу барысында қала іргесіндегі қорғасын-фосфат қалдықтарды қорыту жұмыстарына шетелдік мамандарды шақырды.
Сонымен қатар, Чили Республикасының құрметті консулы Леонид Шейнгезихт Шымкент пен Арика қалалары арасында экономикалық ынтымақтастық қарым-қатынасты дамытуға шақырды.
Сенімді әріптестік серпіліске бастайды
Қазақстан мен Ресейдің өңіраралық ынтымақтастық форумы 2003 жылдан бері өткізіліп келеді.
– Сочиде өткен форумда қол жеткізілген келісімдерді орындау үшін елдеріміздің үкіметтері жемісті жұмыс жүргізді, – деді Мемлекет басшысы кездесу барысында. – Бүгінгі форумда екі елдің 900 бизнесмені кездесуде. Сондай-ақ, Қазақстан мен Ресейдің көршілес өңірлерінің басшылары келіссөз жүргізіп, нәтижесінде қазірдің өзінде нақты уағдаластықтарға қол жеткізілді. Мұның бәрі екіжақты қарым-қатынастың жоғары деңгейде екенін дәлелдейді.
2015 жылдың қорытындысына сәйкес екі елдің арасындағы тауар айналымы 14,57 млрд долларды құрады
В.Путин көрсетілген қонақжайлық үшін ризашылық білдіріп, Қазақстан мен Ресей қарым-қатынасы стратегиялық серіктестік пен одақтастыққа негізделгенін атап өтті.
– Біз барлық бағыт бойынша өзара іс-қимыл жасаймыз. Сіздің бастамаңызбен өткізіліп отырған өңіраралық форумға Қазақстанмен бірлесіп тығыз жұмыс жүргізетін Ресейдің 400 бизнесмені қатысуда. Бүгінгі форумның тақырыбы өңірдің көлік-логистика инфрақұрылымын дамыту үшін маңызды әрі пайдалы болмақ, – деді Ресей көшбасшысы.
Ресей Қазақстанның ең ірі сауда әріптесі саналады. Мәселен, 2015 жылдың қорытындысына сәйкес екі елдің арасындағы тауар айналымы 14,57 млрд долларды құрады. Екіжақты бизнес форум аясында инвестиция және сауда-экономика саласындағы екіжақты ынтымақтастық аясын кеңейту жолдары қарастырылды.
– Бізде Ресеймен бірлескен 6 мыңнан астам кәсіпорын жұмыс жүргізуде. Мұнай химиясы, тау-кен металлургиясы кешені сияқты көптеген салада екіжақты инвестициялық жобалар іске асырылуда. Қазіргі уақытта бізде құны 20 миллиард доллар болатын 60-тан астам жоба бар. Олардың іске асырылуына қолдау көрсетілетін болады, – деді Қазақстан Президенті.
Форум барысында Қазақстан мен Ресейдің 2016-2018 жылдарға арналған бірлескен іс-қимыл жоспары рәсімделді. Құжатқа Елбасы Нұрсұлтан Назарбаев пен РФ Президенті Владимир Путин қол қойды.
Соңында Қазақстан Президенті талқыланып жатқан бастамалардың тиімді іске асырылатынына сенім білдіріп, қатысушыларға табыс тіледі.
Елбасының Қытайға сапары елдің дамуына серпін береді
Қыркүйек айының 4-5 күндері Елбасы Нұрсұлтан Назарбаев Қытай Халық Республикасына іссапармен барды. Сапар барысында ҚХР төрағасы Си Цзиньпинмен екіжақты келіссөздер жүргізіп, G-20 саммитіне қатысты.
Нұрсұлтан Назарбаев G20 саммитіне екінші рет әрі ҚХР төрағасының шақыруымен арнайы келіп отыр. Алдымен Елбасы Қытай Халық республикасының төрағасы Си Цзиньпинмен кездесіп, бірқатар келіссөздер жүргізді.
Нұрсұлтан НАЗАРБАЕВ:
– Біз бұған дейінгі уағдаластықтың барлық мәселесі бойынша, мәселен, Қазақстан аумағында бірлескен заманауи кәсіпорын салуға қатысты келісімге келдік. Бұл тізімге 51 нысан кіреді, бүгінде оның екеуі салынды, жалпы құны 2,5 млрд доллар болатын төрт нысанның құрылысы биыл аяқталады. Бес жылдың ішінде жалпы құны 26 млрд доллар болатын 5 кәсіпорын салу жоспарлануда. Алғаш рет Қытайға дәнді-дақылдарды, асбұршақтар мен майлы дақылдар түрлерін, сондай-ақ ет пен құс жеткізу туралы келісімге келдік. Осылайша, ауыл шаруашылығы тауарларын өндірушілеріміз үшін жол ашылып отыр
– Біздің байланысымыз мемлекетаралық қарым-қатынастың үлгісі бола алады. Стратегиялық серіктестіктің үлгілі моделін құрып, экономикалық ынтымақтастықты жаңа деңгейге көтердік. Қазақстан мен Қытай Үкіметі қол жеткен келісімдер қорытындысы бойынша өз міндеттерін атқаратынына сенемін, – деді Елбасы.
Келіссөздер қорытындысы бойынша екі Мемлекет басшысы 4 құжатқа қол қойды. Атап айтқанда, Қазақстан Республикасы Үкіметі мен Қытай Халық Республикасы Үкіметі арасындағы 2004 жылғы 17 мамырдағы ҚР-ҚХР ынтымақтастығы жөніндегі комитет құру туралы келісімге қосымшалар енгізу туралы хаттама рәсімделді. ҚР Ұлттық экономика министрі Қуандық Бишімбаев пен ҚХР Даму және реформалар жөніндегі мемлекеттік комитетінің төрағасы Сюй Шаоши «Нұрлы жол» мен «Жібек жолы экономикалық белдеуі» бағдарламаларын түйіндестіру жөніндегі ынтымақтастық жоспарын рәсімдеді.
Елбасы көрші елге жасаған сапарында «Үлкен жиырмалықтың» саммитіне қатысты.
– G20 мен дамушы мемлекеттер арасындағы диалог орталығын анықтап алу керек. Мәселен, Қазақстанда құрылған және барлық қатысушылар үшін ашық G-Global ақпараттық-коммуникативтік алаңын бір нұсқа ретінде қарастыруды ұсынамын. Ол 140 мемлекеттің 30 мыңнан астам сарапшысының басын қосып отыр. 2017 жылы Астанада «Болашақтың энергиясы» тақырыбымен өткізілетін «ЭКСПО» халықаралық көрмесі осыған қызмет ететін болады. Сонымен қатар, біз «Астана» халықаралық қаржы орталығын құрып жатырмыз. Барлық мемлекеттерді Астанадағы «ЭКСПО-2017» көрмесіне қатысуға шақырамын. Онда БҰҰ-ның қолдауымен тиісті іс-шаралар өткізуге болар еді, – деді ҚР Президенті.
Нұрсұлтан Назарбаев G20 саммиті аясында Америка Құрама Штаттарының Президенті Барак Обамамен, Ресей президенті Владимир Путинмен, Біріккен Ұлттар Ұйымының Бас хатшысы Пан Ги Мунмен, Еуропалық комиссияның төрағасы Жан-Клод Юнкермен, Ұлыбритания Премьер-Министрі Тереза Мэймен, Түркия Республикасының Президенті Режеп Тайип Ердоғанмен, Жапонияның Премьер-Министрі Синдзо Абэмен де кездесіп, әңгімелесті.
Осылайша, Мемлекет басшысының ҚХР-ға жасаған жұмыс сапары табысты аяқталды. Бұл сапар елдің дамуына серпін береріне толық негіз бар. Жақын арада Мемлекеттік Кеңестің төрағасы Ли Кэцян Қазақстанға сапармен келеді деп жоспарланып отыр.
