Қаланың қысқа дайындығы қалай?
Среда, 13 Сентябрь 2017 04:31
Шымкентте жылу құбырларын ауыстыру жұмыстары қазан айына дейін аяқталады
Синоптиктердің болжауынша, Шымкент қаласында биылғы күз айлары ылғалды болмақ және жауын-шашын мөлшерінің артуына қарамастан, жылы ауа райы сақталмақ. Дегенмен, «жаз шанасын түгендеген» қалалықтар алдағы жылу маусымына айтарлықтай алаңдаушылық білдіруде. Себебі, қаланың бірқатар шағынаудандарында негізгі және ішкі орамдағы жылу жүйелерін ауыстыру, жөндеу жұмыстары әлі күнге дейін жалғасуда.
Осы орайда, салаға жауапты қалалық тұрғын үй-коммуналдық шаруашылығы бөлімінің мамандары жылу маусымына дайындық жұмыстары белгіленген кесте аясында жүргізіліп жатқанын айтады. Яғни, бүгінде орталықтандырылған жылумен қамтамасыз етілген 1 811 көпқабатты тұрғын үйдің 1 307-сі жылу маусымына толығымен дайын.
Қаладағы орталықтандырылған жүйеге қосылған 1 811 көпқабатты тұрғын үйге 13 сервистік компания қызмет көрсетеді. Күні бүгінге дейін 1 130 тұрғын үймен келісім шарт жасалған. Бұл көрсеткіш қаладағы жалпы тұрғын үй қорының 62 пайызын құрайды. Ендігі жерде аталмыш көпқабатты ғимараттарда қызмет сапасы бойынша ешбір қиындық туындамауы тиіс.
– Жалпы алғанда, көпқабатты тұрғын үйлерді орталықтандырылған жылу жүйесіне қосу және сапалы қызмет түрін пайдалану орайында өзекті мәселелер жыл өткен сайын өз шешімін тауып келеді, – дейді қалалық тұрғын үй-коммуналдық шаруашылығы бөлімі басшысының орынбасары Нұрлан Жаманкөз. – Әзірге 1 307 көпқабатты тұрғын үй (қала аумағындағы жалпы көпқабатты тұрғын үй қорының 72 пайызы) жылу қабылдауға дайын. Қала аудандары бойынша дайындық көрсеткіштерін саралайтын болсақ: Абай ауданында – 304 үй (71%), Әл-Фараби ауданында – 444 (72%), Еңбекші ауданында – 380 (72%) және Қаратау ауданында – 179 (72%) көпқабатты үйде дайындық жұмыстары аяқталды.
Сала маманының айтуынша, негізгі жылу желілерін қайта құру жұмыстары бойынша биыл «Нұрлы жол» бағдарламасы аясында республикалық бюджеттен қажетті қаражат бөлініпті. Нәтижесінде, жалпы ұзындығы 5,2 шақырымды құрайтын жылу жүйелері жаңартылған.
Бұл қатарда, Байтұрсынов көшесінің бойында Рысқұлов – Желтоқсан көшесіне дейінгі аралықта магистралдық жылу құбырын қайта құру жұмыстары жүргізілді. Ауыстырылған құбырлардың диаметрі 219-530 милиметрлік қалыңдықты құрайды. Сонымен қатар, жылу шығынын едәуір төмендететін соңғы үлгідегі құбырлар пайдаланылған. Жобаны «3-Қуат жылу орталығы» мемлекеттік кәсіпорны жүзеге асыруда. Қазіргі кезде жаңа құбырларды орналастыру жұмыстары аяқталған. Енді тек жылу камералары орнатылуда. Аталмыш көше қазан айына дейін толық қалпына келтірілмек. Бұл бағытта мекеме қызметкерлері екі ауысымда еңбек етуде.
Ал ішкі орамдық жылу жүйелеріне ағымдағы жөндеу жұмыстарын жүргізу үшін облыстық бюджет есебінен қаражат бөлінген. Қаланың оңтүстік аймағында аталмыш жұмыстар 70, ал солтүстік аймағында 85 пайызға аяқталды. Қазан айының алғашқы жұлдызына дейін жұмыстар толық тапсырылуы тиіс. Осы жұмыстардың нәтижесінде, қаланың солтүстік бөлігіндегі тозығы жеткен жалпы ұзындығы 139 шақырымды құрайтын жылу құбырының 38 пайызы жаңартылмақ. Сондай-ақ, қаланың оңтүстік бөлігінде 13 шақырымдық ішкі орамдық жылу жүйелері ағымдағы жөндеуден өтті.
Сала мамандары кестеге сәйкес, қазан айының 15-жұлдызында орталықтандырылған жылу жүйесіне қажетті судың толық қуатында жіберілетінін айтады. Жылуды жеткізу міндетін «3-Энергоорталық» АҚ-ы, ал оған дайындық жұмыстарын жүргізу «3-Қуат жылу орталығы» мемлекеттік кәсіпорны жүзеге асырады.
Сондай-ақ, қала аумағындағы 352 бюджеттік нысан жылу қабылдауға толығымен дайын. Бұл қатарда, автономды қазандықтары бар 172 бюджеттік мекемеге қажетті 5 058 тонна көмір, 353 мың литр сұйық отын жеткізілген.
Арбаттың кереметін тамашалауға келіңіз!
Среда, 02 Август 2017 06:04
Шымкент қаласының әкімдігі жергілікті тұрғындар мен қала қонақтары үшін игілікті жобаны қолға алды. Ендігі жерде жаңа бұйымдар мен ғажайып өнер туындыларына жаны құмар жандар іздегенін Арбат көшесінен табуға мүмкіндігі бар.
– Оңтүстік Арбат – тұрғындардың арнайы іздеп келетін таңдаулы орындарының біріне айналмақ, – дейді жоба жетекшісі Лилия Ишмурзина. – Мұндай әйгілі көшені қолға алу идеясы көптен бері сөз болып жүрген-ді. Қазір міне, қала тұрғындары мен қонақтары мұнда суретшілердің көрмесін, кәдесыйлардың алуан түрлерін тамашалай алады. Іс-шара концерттік қойылымдармен үйлесім тауып, көше театрларының әртістері өз өнерлерін паш етпек.
Айта кетерлігі, мұндай Арбат көшесі елімізде тек Астана мен Алматы қаласында ғана бар. Мұнда жоғары сән дүкендері, көркемсурет галереясы, театр, дәмхана мен мейрамханалар да тұрғындарға көтеріңкі көңіл күй сыйлайды. Әншілер классикалық, заманауи әндерді орындаса, жастар арасында флешмоб ұйымдастырылады. Суретшілер достық шарждарын немесе өз бейнеңізді салып береді.
Егер де сіз мұндай ғажайып сәттерге куә болғыңыз келсе, әр аптаның жұма, сенбі және жексенбі күндерінде түс ауа сағат 16:00-ден бастап Әл-Фараби алаңында, нақты айтқанда, «Жастар ресурстық орталығы» ғимаратының алдында өтетін көрме-жәрмеңкеге келіңіз!
Қажылыққа қанша адам барады?
Пятница, 28 Июль 2017 09:18
Мұсылмандықтың бес парызының бірі – Меккеге қажылыққа бару сапары биыл тамыз айының 24-жұлдызында басталады. Бұл сапар үшін Қазақ Еліне 2500 квота бөлінген. Қазіргі таңда, Шымкент қаласында Орталық мешіт жанынан ашылған «Қажыларды оқыту орталығында» қажылық сапарын өтеуге ниетті жандар шілде айының алғашқы жұлдызынан бастап арнайы дәрістен өтуде.
– Қажылық – сауапты сапар, қиындығы мол, әрбір қажыдан үлкен сабырлылық, терең төзімділікті, риясыз тақуалықты талап етер ғибадаттың түрі. Пайғамбарымыз (с.ғ.с.): «Кімде-кім Алла тағала ризашылығы үшін қажылық жасаса, жаман сөзден, жаман қылықтардан, күнәлардан сақтанса анасынан туылғандай пәк болып қайтады», – деген. Ендеше, қажылықтың әр минутын құлшылықпен, дұға-тілекпен өткізудің сауабы мол, – дейді ҚМДБ-ның ОҚО бойынша өкіл имамының орынбасары Мұхамеджан Естеміров.
2015 жылдан бері ел аумағында Жидда (яғни, Мекке қаласына) бағыты бойынша Астана, Алматы қалаларымен қатар, Шымкенттен де тікелей әуе рейсі қатынауда. Қажылық сапарын ұйымдастыруда Оңтүстік өңірден Сембекова, Мина Тур, Әл Маруа, Ордабасы сынды 13 фирма өз қызметін ұсынуға әзір. Бұл ретте, жуырда ҚМДБ тарапынан құрылған Тауаф қажылық фирмасын айрықша атап өтуге болады. Басқарма өкілінің айтуынша, бұйыртса, алдағы бірер жылда аталмыш мекеме қажылық сапарды ұйымдастыруда бірден-бір жетекші рөлге ие болмақ. Фирманың қызметтік құны эконом пакет – 3800, стандарт пакеті – 4200 АҚШ доллары көлемінде.
Айта кетсек, 1993 жылдың жазында елімізден тұңғыш рет 300 адам қажылық сапарына аттанды. Сол жылдан бастап қажылыққа ниет білдірген жерлестеріміздің саны жылдан-жылға артып келеді. Тіпті, 2013 жылы қажылық парызын өтегендер қатары 4400-ге жеткен.
Зираттарды күтіп ұстауға көңіл бөлінсе...
Пятница, 28 Июль 2017 08:38
Зират басын таза ұстау арқылы біз өлілерге құрмет көрсете аламыз. Тазалықты сақтау үшін алдымен халықты тәрбиелеп, оларға діни түсінік беру қажет. Осылай деген қала әкімі Ғабидолла Әбдірахымов жуырда өткен әкімдік жиынында жауапты сала мамандарына нақты міндеттер жүктеген еді.
Айта кетейік, бүгінде Шымкент қаласы аумағында барлығы 44 мұсылман және христиан мазараты бар. Биыл зираттардың аумағын санитарлық тазалау, қорғау жұмыстары үшін қала бюджетінен 98 миллион теңге қаржы қаралған. Дегенмен, қорымдарды күтіп ұстау жұмыстары қаншалықты жүйеге келтірілсе де, ондағы ретсіздік, адамдардың бей-берекет әрекеттері мазараттардың ішкі-сыртқы келбетіне нұқсан келтіруде.
«Самал» шағынауданында орналасқан «Ақмырзабай ата» мазараты қаладағы 6 мұсылман зиратының бірі. Аумағы 40 гектарды жуықтайтын қорым айналасында алғашқы аңғарғанымыз, жел ұшырған қоқыс қалдықтары, үйіліп тасталған қапшықтар, ұйысып өскен әрі әбден сарғайған тікенекті шөптер... Сорақысы сол, қабір қазып, құлпытас орнататындар артылып қалған құрылыс заттарын «кері алып кетуге» болмайды деген сылтаумен сол жерге тастап кетуді әдетке айналдырған. Соның салдарынан қорымдар қоқыс алаңына айналуда.
– Ислам дінінде зиратқа яғни қабірдің аяқ асты болмауына ерекше көңіл бөлінген. Бұған көптеген хадистер дәлел. Пайғамбарымыз (с.ғ.с.) бір хадисінде: «Қабірлерге намаз оқып, үстіне отырмаңдар» десе, тағы бір хадисте: бірде Амр ибн Хазм деген сахабаның қабір үстіне сүйеніп тұрғанын Расулуллаһ (с.ғ.с.) көріп «Оған сүйенбе. Бұл қабірдің иесіне зиян келтіресің» дегені де бар. Олай болса, қабірге сүйенудің өзі иесіне кесірін тигізетін болса, ондағы тазалыққа самарқаулықпен қарау тіпті сорақылық екені сөзсіз. Зират басына қоқыс қалдығын қалдыру марқұмдардың рухына деген құрметсіздік болмақ, – дейді ҚМДБ-ның ОҚО бойынша өкіл имамының орынбасары Мұхаметжан Естеміров.
Осы орайда, Діни Басқарма тарапынан «Өткенге құрмет – елге құрмет!» атауымен арнайы Үндеу аясында жыл сайын Қатра күніне орай, сәуір айында қорымдарда тазалық жұмыстары жүйелі түрде жүргізіліп тұрады. Бұл іске үн қатқан қалалықтар мұсылмандар мазаратына арнайы барып, орындарды күл-қоқыстан тазалайды. Басқарма өкілі бұл ретте, қорымдарды таза ұстау – сауапты іс екенін, сондықтан, мұндай шаралардың жиі ұйымдастырылып тұрғаны жөн болатынын айтады.
– Жуырда ҚМДБ-ның кеңейтілген мәжілісінде мазараттарды күтіп ұстауға байланысты бірқатар тың ұсыныс-пікірлер айтылған болатын. Атап айтқанда, зират шырақшылары мен қорым орнын дайындаушылар қызметіне арнайы айлық жалақы тағайындау, оларға арнайы көлік бөліп, қажетті коммуникация жүйелерін жүргізу жайы ұсынылды. Осы арқылы оларға қорымдардағы ағаштар мен сарғайған шөптерді отап, жас тал-көшеттерін отырғызу, тазалықты қалыптастыру міндеттерін жүктеу мәселесі талқыланды. Мәселен, бұл істе бізге Түркия еліндегі қалыптасқан бүгінгі ахуал үлгі бола алады. Ондағы қорымдар шын мәнінде, абаттандырылып, жасыл желектермен көмкерілген. Ол ең алдымен марқұмдардың рухына көрсетілген адамдардың шексіз құрметі болса, қала берді экологиялық ахуалды жақсартуға, құран бағыштай келген жандардың еркін тыныс алуына барынша мүмкіндік береді, – дейді өкіл имам орынбасары.
Шымкент қаласында 6 мұсылман зираты бар. Оның ішінде аумағы жағынан үлкені және жаңасы Шымкент-Ташкент бағытындағы 75 гектар алқапты алып жатқан Жаңа Мұсылман қорымы. Зират шырақшысы Шералы Әбдалиев күнделікті бос уақытын зиратты қоқыс қалдықтарынан тазартуға жұмсайтынын айтады. Биыл қорым айналасына өзі әкеліп 300-ге таяу ағаш көшеттерін отырғызыпты.
– Қорымдардағы тазалық жұмыстары, оны көгалдандыру, абаттандыру – әрбір тұрғынның ортақ парызы болуы тиіс, – дейді шырақшы. – Ал мазарат айналасына қоқыс қалдықтарын қалдыру білімсіздіктен, сауатсыздықтан туындап отырғаны өкінішті жайт. Ислам дінін дұрыс түсінген жан мұндай келеңсіз істерге бармас еді. Өйткені бұл өз басына ғана емес, тұтас Ислам дініне кір келтіретін жағымсыз әрекет.
Иә, біз көрген мазараттарда қалыптасқан жағдай осындай. Бұл ретте, жергілікті атқарушы биліктің де, Діни Басқарма өкілдерінің де айтар ойы бір, ол – бұл ортақ істе тұрғындар жұмыла іске кірісіп, тазалық жұмыстарына мүдделілік таныту, жанашырлық көрсету. Себебі, «өткенге құрмет – елге құрмет» екенін назарда ұстағанымыз жөн.
Бағдарламаның игілігін сезінуде
Пятница, 28 Июль 2017 06:16
Бүгінде «екі қолға бір күрек іздеген жандар» үшін атқарар іс жетерлік. Ол үшін салаға сай мамандығың, біліктілігің мен білімің қажет болары сөзсіз. Бұл орайда, мемлекеттік «Жұмыспен қамту-2020» бағдарламасы жұмыссыз жандарды еңбекпен қамтуда оң нәтижесін беруде.
Бүгінде Шымкент қаласында жұмыспен тұрақты және нәтижелі қамтуға жәрдемдесу арқылы халықтың табысын арттыруды мақсат тұтқан бағдарламаның игілігін сезінгендердің қатары көп. Солардың бірі, кәсіби оқытудың қайта даярлау курсынан өткен қала тұрғыны Бақытжан Молдабеков Шымкент қаласы әкімдігінің «Халықты жұмыспен қамту орталығы» коммуналдық мемлекеттік мекемесінде электр құрылғыларын жөндеуші (электрик) мамандығын игерген. Және алған мамандығы бойынша «Оңтүстік Жарық Транзит» мекемесіне жұмысқа орналасты.
– Бүгінде «жұмыс жоқ» дегенді желеу етіп, бос жүрген жандардың әрекеті ақылға сыйымсыз дүние. Жұмыссыздық деңгейін төмендету бағытында мемлекеттік бағдарламаның баршаға берер тиімділігі мол. Мұнда қысқа оқу курстарынан өту арқылы арнайы мамандық алып, тұрақты жұмыс табуға мүмкіндік мол, – дейді Бақытжан Қамбарбекұлы.
Айта кетейік, бағдарламаның бірінші бағыты – қысқа мерзімді кәсіптік оқыту курстары бойынша биыл Шымкент қаласы бойынша мамандықтар тізбесі бекітіліп, онда 1739 білім алушы білім беру ұйымдарына жолданған. Онда талапкерлер аспаз, тігінші, электрик, кондитер, шаштараз, күтуші, визажист, жиһаз жинақтаушы, электргазбен дәнекерлеуші және тағы басқа жұмысшы мамандықтарын игеріп шығатын болады.
Шымкент қаласы бойынша 1739 білім алушы білім беру ұйымдарына жолданған. Онда талапкерлер аспаз, тігінші, электрик, кондитер, шаштараз, күтуші, визажист, жиһаз жинақтаушы, электргазбен дәнекерлеуші және тағы басқа жұмысшы мамандықтарын игеріп шығатын болады.
Мемлекеттік бағдарламалар дамуға серпін береді
Пятница, 28 Июль 2017 06:00Биыл Шымкент қаласында «Нұрлы жол» бағдарламасы аясында 6 мектеп ғимараты пайдалануға беріледі. Бұл жөнінде қала әкімі Ғабидолла Әбдірахымовтың төрағалығымен өткен мәжілісте мемлекеттік бағдарламаның орындалу барысы бойынша баяндама жасаған қалалық құрылыс бөлімі басшысының орынбасары Абай Тұрханов мәлім етті.
Баяндамашының айтуынша, қазіргі таңда қала аумағында 7 мектеп және 11 тұрғын үйдің құрылысы жүргізілуде. Ол үшін республикалық бюджеттен 12 миллиард теңге бағытталған. Салынып жатқан 6 мектеп ғимараты биыл жыл соңына дейін, ал 558 пәтерлі 11 тұрғын үй ғимараты алдағы қыркүйек айына дейін пайдалануға тапсырылмақ.
Ал қалалық тұрғын үй-коммуналдық шаруашылық бөлімінің басшысы Нұрлан Бектұрсынов бағдарлама аясында қала аумағында салынып жатқан кәріз жүйелерінің бүгінгі ахуалын мәлім етті. Атап айтқанда, бұл бағытта несиелі қайтарма негізінде 4 жоба қарастырылған. Яғни, «Самал», «Самал-2», «Солтүстік-Батыс» және «Қайтпас-1» шағынаудандарындағы 19 көшеге кәріз жүйелері салынып, нәтижесінде, 15 695 абонент қажеттілікпен қамтылмақ.
Тиісінше, қала аумағын кәріз жүйесімен қамту жұмыстары 42-ден 49,1 пайызға ұлғаймақ.
– Аталмыш бағдарламаның тиімділігі жөнінде жергілікті БАҚ арқылы тұрғындарға нақты түсінік берілуі тиіс, – деді Ғ. Рахматоллаұлы.
– Жыл өткен сайын бағдарлама шеңберінде әлеуметтік нысандар мен тұрғын үй құрылысы жанданып, бағытталған қаражат пен жұмыс ауқымы айтарлықтай арта түсуде. Әсіресе, «Шымкент сити» және «Әкімшілік-іскерлік орталығында» заманауи талапқа сай бой көтерген нысандар қаланың әлеуметтік-экономикалық әлеуетін көтеруге, қаланың сәулеттік кескін-келбетін мегаполис атына сай етуге мүмкіндік берері сөзсіз.
Күн тәртібінде «Нұрлы жер» бағдарламасы аясында атқарылған ауқымды шараларға арнайы талдау жасалды. Атап айтқанда, бұл салаға 371 тұрғын үйдің құрылысы үшін республикалық бюджеттен 7,8 миллиард теңге бағытталған. Оның 85-і биыл пайдалануға беріледі.
Жиынды қорытындылаған қала әкімі күн тәртібіндегі мәселелердің өзектілігіне тоқталып, сала мамандарына нақты міндеттер жүктеді.
Қазіргі таңда қала аумағында 7 мектеп және 11 тұрғын үйдің құрылысы жүргізілуде. Салынып жатқан 6 мектеп ғимараты биыл жыл соңына дейін, ал 558 пәтерлі 11 тұрғын үй ғимараты алдағы қыркүйек айына дейін пайдалануға тапсырылмақ
Қала тазалығын сақтау – маңызды міндет
Пятница, 28 Июль 2017 05:15
Шымкентте игілікті дәстүрге айналған «Таза қала» акциясына қатысуға ниеттілер қатары жыл өткен сайын арта түсуде. Айта кетсек, акцияның басты мақсаты – тұрғындарды өз ауласын, көшесін, жалпы қала аумағын таза ұстауға біріктіру.
Қазірдің өзінде акцияға қатысуға Қаратау ауданы бойынша 40 аула, 45 көше өтінім берген (өткен жылы аудан бойынша 27 аула, 43 көше өтінім берген болатын). Өз ауласы мен көшесінің тазалығын сақтауда тұрғындардың ынта-ықыласын арттырған шара бүгінде айтарлықтай нәтижесін беруде.
– Күнделікті кешке барлығымыз ауламызға шығамыз. Бір-бірімізге жәрдем көрсетіп, тазалық шарасына қатысамыз. Ағаш көшеттерін отырғызамыз. Әктеп-сырлау жұмыстарын ұйымдастырамыз. Бұрын бір-бірімізді танымайтын едік, енді міне, ортақ мақсатта күш біріктіріп, қала тазалығына үлес қосудамыз, – дейді «Нұрсәт» шағынауданындағы №142 үй комитетінің төрағасы Зайнулла Баймуханбетов.
Бұл ретте мамандар алдағы уақытта да тұрғындар қала тазалығына осы ынтамен үлес қосар болса, келешекте көшелер мен аулалар көркейіп, гүлдене түсеріне сенімді.
«Таза қала» акциясы қыркүйек айында қорытындыланады. Жеңімпаздар «Қала күніне» орай марапатталмақ. Байқаудың жалпы жүлде қоры – 4 миллион теңге
– Айта кететін жайт, акцияға қатысуға ниет білдіргендер қатарында аудан аумағына қосылған тұрғын алабтардың да белсенділігі жоғарылаған. Қазіргі таңда біздің мамандар өтініш берген аулалар мен көшелерде зерделеу жұмыстарын жүргізіп, ондағы оң өзгерістерді мақтаныш сезіммен әңгімелеуде, – дейді Қаратау ауданы әкімі аппаратының Халықпен жұмыс жүргізу бөлімінің басшысы Бауыржан Қалдыбаев.
Мамыр айының 3-жұлдызында бастау алған «Таза қала» акциясы қыркүйек айында қорытындыланады. Облыстық «Азаматтық альянс» қауымдастығы ұйытқы болған акцияның жеңімпаздары «Қала күніне» орай марапатталмақ. Байқаудың жалпы жүлде қоры – 4 миллион теңге.
Қысқа дайындық жұмыстары пысықталуда
Среда, 26 Июль 2017 04:03Шымкент қаласындағы 1811 көпқабатты тұрғын үйдің 1052-сі орталықтандырылған жылу жүйесіне қосылған. Алдағы жылу маусымында аталмыш үйлерге 13 сервистік мекеме қызмет көрсетпек. Бұл ретте, қаланың қысқы жылу маусымына дайындығы жуырда қала әкімі Ғабидолла Әбдірахымовтың төрағалығымен өткен мәжіліс жиынында күн тәртібінде қаралған болатын.
Айта кетейік, жеке автономды қазандығы бар пәтерлерді орталықтандырылған жүйеге қосу, сығымдау жұмыстарын жүйелі әрі дер мерзімінде аяқтау қала әкімінің ұдайы назарында тұрған мәселе. Қазіргі таңда, 759 тұрғын үйде қысқы дайындық жұмыстары пәтер иелерінің өз күштерімен жүргізілуде.
Қалалық тұрғын үй-коммуналдық шаруашылық бөлімінің басшысы Нұрлан Бектұрсыновтың айтуынша, биыл қаланың бюджеттік нысандары қыркүйек айында толығымен жылу қабылдауға әзір болмақ. Қала аумағында бүгінде 352 бюджеттік нысан, оның ішінде, 223 білім, 78 денсаулық сақтау, 6 спорт, 42 мәдениет және 3 әлеуметтік нысан бар. Қазір ондағы ғимараттардың 33 пайызында сығымдау жұмыстары толығымен аяқталды. Жылуды автономды қазандықтар арқылы алатын 172 бюджеттік мекеме үшін 5058 тонна көмір, 353 мың литр сұйық отынның қажеттігі анықталған. Қазіргі таңда бұл қажеттіліктің 53 пайызы тиісті орындарға жеткізілген.
– Айта кету керек, бекітілген жұмыстар арнайы кесте аясында жүргізілуде, – дейді Нұрлан Қарабалаұлы. – Биыл «Нұрлы жол» бағдарламасы шеңберінде Байтұрсынов көшесі бойындағы 5,2 шақырымдық магистралдық жылу құбыры ауыстырылуда. Сондай-ақ, «3-Энергоорталық» АҚ-ның балансындағы қаланың солтүстік бөлігіндегі жылу құбырлары коммуналдық меншікке қабылданды. Ондағы жүйелердің 80 пайызында тозығы жеткені ескеріліп, бірқатар қайта құру жұмыстары қолға алынды. Яғни, биыл жалпы ұзындығы 40 шақырымдық ішкі орамдық жылу жүйелерінде ағымдағы жөндеу жұмыстары жүргізілуде.
«Шымкент қаласының 2020 жылға дейінгі әлеуметтік-экономикалық даму Тұжырымдамасында» көрсетілгендей, қала халқы бұл бағыттағы ауқымды жұмыстардың игілігін енді бірер жылда толығымен сезінуі тиіс. Қазіргі таңда, жылу жүйелерін қайта құру бойынша нақты іс-шаралар жоспары түзілген. Сондай-ақ, мамандар бүгінде табиғи газбен қамтылған қала халқының үлесі 92 пайызға ұлғайғанын айтады. Биыл «Бозарық-1, 2, 3», «Ынтымақ-2», «Жаңа Тұрлан» және «Тұран» шағынаудандарындағы 4194 тұрғын үйге табиғи газ жүйесі жеткізілмек.
