Шымкент келбеті

Бір аптаға жуық тойланған қала күні мерекесі «Наурыз» алаңындағы гала-концертпен қорытындыланды. Еліміздің және ресейлік эстрада жұлдыздары қатысқан мерекелік концертті тамашалауға 20 мыңнан астам адам жиналып, керемет кештен көңілді әсер алып қайтты.

Мерекелік думанда облыс әкімі Жансейіт Түймебаев кешке жиналғандарды қала күні мерекесімен құттықтап, Шымкент қаласының қарқынды дамып келе жатқанын атап өтті. 

Қаланың әлеуметтік-экономикалық дамуына әрбір тұрғынның қосар үлесі мол. Мерекелік жиында қаланың әлеуметтік-экономикалық дамуына айрықша үлес қсоқан бірқатар азаматқа қала әкімі Ғабидолла Әбдірахымов пен қалалық мәслихат хатшысы Нұрлан Бекназаров «Шымкент қаласының құрметті азаматы» төсбелгісін тапсырды. Мұндай марапатқа ие болғандар – еңбек ардагері Сембіғали Әлімбеков, облыстық мәслихаттың депутаты Нұрмахан Жолдасов, облыстық мәслихаттың депутаты Саттар Қуашбаев, кәсіпкер Әбдіқаһар Пайзахметов, қалалық ардагерлер кеңесінің төрағасы Исамуддин Рысбай және қоғам қайраткері Сатыбалды Ибрагимов. 

Бұдан соң мерекелік кеш көңілді гала-концертке ұласты. "Қызық TIMES" бағдарламасының форматында өткен думанды кеш қала тұрғындарының есінде ұзақ сақталары анық. «Наурыз» алаңын 5 сағатқа жуық думанға бөлеген кешті жүргізген Еркебұлан Мырзабек пен Марат Оралғазин көрермен көңілін жауласа, Қарақат пен Қыдырәлі, Формат тобы, Абай Бегей, Бейбіт Құшқалиев, Ерке Есмахан, MBAND тобы (Ресей) және Қайрат Нұртас сынды эстрада жұлдыздары Шымкент халқына өз өнерлерін ұсынды. 

Кеш соңы мерекелік отшашулармен аяқталды. Сондай-ақ, думанды кешті көпшілік қала әкімдігінің ресми сайтынан және «Оңтүстік» телеарнасының эфирінен тікелей тамашалауға мүмкіндік алғанын айта кетейік.

Қала күні мерекесінде биыл ыстық бауырсақ, жеміс-жидектерден дайындалған карвингтер «Наурыз» алаңына жиналған шымкенттіктерді расында таңғалдырды.

Бұл күні алаңда ақ шаңқай киіз үйлер тігіліп, дастарханға қазақтың ұлттық тағамдары қойылды. Шымкент қаласы әкімдігі бөлімдерінің қызметкерлері күздің соңғы жиын-терімінен ерекше карвинг жасап, келушілердің назарын аударды. Бірі – қауын-қарбызды түрлі пішінде ойып, ерекше сәнге айналдырса, екіншілерінің қонаққа ұсынған жемістерінің туралуының өзі үлкен өнермен жасалған. 

Карвинг байқауы өтіп жатқанда, «Алтын дән» компаниясының аспаздары ұлттық тағамымызды жаңғыртты. Таң азаннан 10 қазан отқа қойылып, аспаздар түске дейін 1136 келі бауырсақ пісіріп, Қазақстанның «КИнЭС» рекордтар кітабына тіркелді. 

Бұған дейін, көп мөлшерде бауырсақ пісіруді алғаш рет алматылықтар бастаған болатын. Олардың дайындаған бауырсағы 856 келіге жеткен. Бұдан кейінгі рекордты шымкенттіктер жаңғыртты.

Ұлттық тағамымызды ұлықтауға Шымкент қаласы әкімдігі мен «Алтын дән» компаниясы қолдау білдірген. 30 мың тұрғынға лайықталып пісірілген бауырсақ сол күні халыққа тегін таратылды. 

Рекорд орнатушыларға сертификатты облыс әкімі Жансейіт Түймебаев пен Шымкент қаласының әкімі Ғабидолла Әбдірахымов табыстады.

Бұдан бөлек, «Наурыз» алаңында қолөнер бұйымдарының көрмесі өтті. Ұлттық қиімдер, зергерлік бұйымдар, киізден дайындалған бұйымдарды тамашалаумен қатар, сатып алушылар қарасы көп болды. Мерекелік шара концерттік бағдарламаға ұласып, қалалықтарға ерекше көңіл-күй сыйлады.

Шымкентте биылғы Қала күні мерекесі апта бойы атап өтіледі. Бұл жөнінде бүгін қала әкімінің орынбасары Қайрат Нұртай жергілікті БАҚ өкілдеріне арнайы ұйымдастырылған брифингте мәлім етті.

Қыркүйек айының 23-30 жұлдызы аралығын қамтитын мерекелік бағдарламаны қалалық мәдениет бөлімі ұсынуда. 

– Биылғы Қала күні мерекесі Елбасының жариялаған «Болашаққа бағдар: рухани жаңғыру» атты мақаласымен үндес, орайлас аталып өткелі отыр, – дейді Қайрат Ырзақұлұлы. – Мерекелік бағдарлама 23 қыркүйек, яғни, сенбі күні арнайы жалпықалалық сенбіліктен бастау алады. Кең ауқымды мәдени, спорттық шаралар көпшіліктің көңілінен шығуы тиіс. Мерекені қорытындылаған гала концертке Қазақстан эстрада жұлдыздары – Қайрат Нұртас, Ернар Айдар, Қарақат пен Қыдырәлі сынды өнерпаздар қатысады деп күтілуде. Сондай-ақ, бұл күндері Гиннестің рекордтар кітабына ұсыну үшін ғажайып шараларды да қамту жоспарда бар.

(Қала күніне арналған іс-шаралардың бағдарламасы)

«Рухани жаңғыру: Оңтүстіктің басты брендтерін насихаттаудың заманауи технологиялары». Осындай тақырыпта Оңтүстік Қазақстан Мемлекеттік педагогикалық институтының ғимаратында респубилкаға танымен журналист-блогерлердің қатысуымен форум өтті. Ұйымдастырушы – облыстық ішкі саясат басқармасы мен «Медиакратия» қоғамдық бірлестігі.

Шараға ҚР Ақпарат және коммуникациялар министрінің кеңесшісі Қ.Ахметов, Оңтүстік Қазақстан мемлекеттік педагогикалық институтының ректоры О.Аяшев, ҚР Жазушылар одағы басқарма төрағасының орынбасары, «Қазақ әдебиеті» газетінің бас редакторы Ж.Әшімжан, «Егемен Қазақстан» газетінің ОҚО меншікті тілшісі Ғ.Елшібай, «Жас Алаш» газетінің Бас редакторы Р.Ербота, жапонтанушы, аудармашы, дипломат Б.Құрмансейіт және депутат, ұстаздар мен студенттер қатысты. 

Жиын барысында ОҚО өңірінде бренд қалыптастыру және оның жолдары, тарихи-мәдени орындарды қайта жаңғырту сондай-ақ, туризм саласын жетілдіру технологиялары талқыланды. Ресми бөлімде баяндамалар тыңдалған соң, қатысушылар жарыссөзге шығып, өз пікірлерін білдірді.

– Брендті тұлға арқылы да қалыптастыруға болады. Мәселен, Мұқағали Мақатаев. Ол Райымбек ауданы, Қарасаз ауылының тумасы. Қазір сол жерге ақынның туған өлкесін өз көзімен көру үшін республиканың әр өңірінен тіпті, шетелдерден туристер келеді. Соның арқасында жергілікті халық пайда тауып, Қарасаз ауылының экономикалық жағдайы жақсаруда. Оңтүстікте де мұндай тұлғалар көп. Сондықтан оларды қадірлеп, кеңінен насихаттауымыз керек, – деді Жанарбек Әшімжан. 

Сонымен қатар, 2017 жылғы Республикалық «Үркер» Ұлттық сыйлығының Қазақстан бойынша «Үздік аймақтық басылым» номинациясының тұңғыш иегері – «РЕЙТИНГ» ақпараттық-сараптамалық газетінің 9 жылдығына орай журналистер мен блогрерлерге арналған футбол жарысы ұйымдастырылды. Оған баспасөз хатшыларынан, блогерлерден, мерзімді басылым және телерадио журналистерінен құралған командалар қатысты. Жарыс қорытындысы бойынша 1-орынды «Дәнекер», 2-орынды «Талғам», 3-орынды «Обьектив» командалары иеленді. 

Айта кетейік, осы күні ҚР мемлекеттік қызмет істері және сыбайлас жемқорлыққа қарсы іс-қимыл агенттігінің ОҚО бойынша департамент басшысының орынбасары А.Шілманов, «Егемен Қазақстан» газетінің ОҚО меншікті тілшісі Ғ.Елшібай және журналист-блогерлер мен аудан әкімдерінің баспасөз хатшыларының қатысуымен семинар өтті.

Мұсылман жұртшылығының асыға күткен қасиетті мерекесі – Құрбан айт үстіміздегі жылдың 1 қыркүйегі күніне сәйкеседі.

Құрбан – араб тілінде «жақындау» дегенді білдіреді, яғни жасаған сауап істер арқылы жүректі тазартып, Аллаға жақындай түсу. Ал шариғаттағы терминдік мағынасы – «шарттарымен санаса отырып құлшылық ниетімен мал бауыздау» дегенге саяды.

Қасиетті Құранда «Мен жындар мен адамдарды (Мені танып), маған ғана құлшылық жасасын деп жараттым» (Зариат сүресі, 56-аят) деп білдірген. Демек, құлшылық жасаудың түп мәні – Жасаған Иенің жарлығына бағыну, разылығына ұмтылу, сауап жинау.

Құрбандық шалу тек мал бауыздаумен ғана шектелмейді. Онда адамның ішкі ниеті, шын пейілі, дінге бекемдігі, тақуалығы, басқаларға жанашырлығы таразыға түседі. Сондай-ақ пенденің пендешілігі мен мәрттігі, сараңдығы мен жомарттығы да сыналады.

Құрбандық шалу кімдерге уәжіп?

Төмендегідей төрт шартқа ие жандарға құрбан шалу уәжіп (міндет):

1. Мұсылман болуы;
2. Ақылды және балиғат жасына толуы;
3. Құрбан айт уақытында жолаушы болмауы;
4. Негізгі қажеттерден тыс нисап мөлшеріндегі қаржыға ие болуы.
Нисап мөлшері – 85 грамм алтын яки соның құнына тең келетін ақша. Зекет ғибадаты сияқты құрбанның уәжіп болуы үшін нисап мөлшеріне жеткен малға бір жыл толу шарт емес. Құрбан шалған уақытта міндетті түрде ниет ету керек. Өйткені, малды ғибадат үшін соятыны секілді, тек қана еті үшін де союға болады. Мұндай байлық мөлшері қолында жоқ адамдарға құрбандық шалу міндет болмағанмен жағдайы келсе құрбандық шалуына рұқсат.
Құран Кәрімде өзара таласқан Абыл мен Қабылдың кімнің ақтығын анықтау үшін құрбандық мал шалғандары, соңында Абылдың құрбандығының қабыл болғандығы айтылады. Осы оқиғадан бастау алған құрбандық шалу Аллаға ғибадат ретінде Жаратқанның елшілері арқылы жүздеген жылдар бойы жалғасып, Ибраһим (а.с.) мен Исмаилдың (а.с.) дәуірінен бүгінгі біздің дәуірімізге дейін келіп жетті.

Неге «Арапа» деп аталған?

Арапа күнінің уақыты – зүл-хижжа айының тоғызы, яғни құрбан айттан бір күн бұрын. Бұл күні қажылық парызын өтеуге барған кісілер түс ауғаннан кейін кеш батқанша Арафат тауына бір мезет тұрақтайды. Ал қажылыққа бармаған азаматтар осы күні бір күн нәпіл ораза тұтып, келер күнгі айт намазына дайындық шараларына дайындалады.
«Арапа» араб тіліндегі "білу", "түсіну" деген мағынаға саятын «ъарафа» етістігінен шыққан. Бұл күннің «арапа» деп аталуының себебі, зүл-хижжа айының сегізі күні Ибраһим пайғамбар түсінде құрбандыққа баласын Исмайылды шалу жайында түс көреді. Алғашқыда көрген түсін «жәй түс пе әлде аян ба» деп ойлаған Ол, ертесіне (айдың тоғызына) тағы көреді. Осыдан кейін оның Алладан келген аян екенін біледі. Осы себепті бұл күнді «арафа (арапа)» деп атап кеткен деседі.
Біздің елде арапа күні ертесі болатын айт күніне шелпек-бауырсақ пісіріп, дастархан әзірлігі жасалып жатады. Сонымен қоса, бір күн ораза ұстаған да дұрыс болады.

Құрбандыққа шалынатын малдар және олардың ерекшеліктері

Кез-келген мал құрбандыққа жарамайды. Құрбандық ретінде шалынатын малдың ерекшеліктері мынадай болуы қажет:
1. Құрбандыққа қой, ешкі, сиыр, түйе секілді малдар жарамды. Ал, үйрек, қаз тауық, түйетауық, елік секілді т.б. аң-құстар құрбандыққа жарамсыз. Бұларды құрбандық ретінде шалу харамға жақын мәкрүһ болып табылады. Өйткені мұнда мәжусиларға (отқа табынушылар) еліктеушіліктің нышандары бар. Қой, ешкі, сиыр және түйенің еркектері де, ұрғашылары да құрбандыққа жарамды.
2. Құрбандыққа жарайтын қой мен ешкі ең кемі бір жасар болуы қажет. Дегенмен алты айлық қозы бір жасар қой секілді ірі, қоңды болса құрбандыққа жарамды. Ал ешкінің міндетті түрде бір жасқа толған болуы қажет. Сиыр екі жасқа, түйе бес жасқа толғанда құрбандыққа шалуға болады.
3. Құрбандық малдың дені сау, етті және дене мүшелері түгел болуы керек. Оның бойында құрбандық ретінде шалуға кедергі келтіретін кемшіліктер болмауы қажет.
4. Құрбандық мал ғибадат ретінде бауыздалуы шарт. Шын мәнісінде Алла пенделердің құлшылығына да, құрбандық шалуына да зәру емес. Құрбан шалудың бізге мәлім әрі беймәлім көптеген пайдалары мен хикметтері бар. Дегенмен негізгі мақсат – Алла тағаланың разылығына бөлену. Мал шалғанда пенделердің ниетінің негізге алынатындығы Құран Кәрімде былайша баяндалған: «Ұмытпаңдар, олардың еті де, қаны да ешқашан Аллаға жетпейді. Оған жететін жалғыз нәрсе – жүректеріңізге ұялаған тақуалық, Аллаға деген құрмет» (Хаж сүресі, 37).

Малды құрбандыққа жарамсыз ететін кемшіліктер

•  Екі немесе бір көзінің соқыр болуы;
•  Бауыздалатын жерге өздігінен жүріп бара алмайтындай әлсіз, көтерем болуы;
•  Екі құлағының не бір құлағының басым бөлігінің жоқ болуы;
•  Тістері түгелдей немесе бір бөлігі түсіп қалған болуы;
•  Қос мүйізі немесе бір мүйізі түбінен сынып қалған болуы;
•  Желін ұшының түсіп қалуы;
•  Құйрығының жартысы немесе үштен бір бөлігі кесілген болуы;
•  Жілігі майсыз, ауру болуы;
•  Тумысынан құлағы мен құйрығының болмауы;
•  Жетекке көнбейтін және үйірге қосуға жарамайтындай немесе жем беруі қиын тентек болуы;
•  Ауру екендігі анық белгілі болуы.
•  Құрбандық шалуға ниеттенген адамның, сатып алған малында жоғарыда аталған кемшіліктер сатып алғаннан кейін пайда болса, орнына басқа мал алып бауыздағаны абзал. Алайда жағдайы төмен жандарға сатып алған құрбандық малында жоғарыда аталған кемшіліктер пайда болса, орнына басқасын алудың қажеті жоқ. Алған малын құрбандық ретінде бауыздай беруіне болады. Тіптен осындай кемістігі бар малды сатып алып құрбан ретінде бауыздауына да болады. Себебі жоқ-жітік жанға құрбандық шалу – нәпіл ғибадат болып саналады. Ал нәпіл ғибадаттар үшін дінімізде кеңшілік пен жеңілдік бар.

Құрбандық шалудың жөн-жобасы

Мүмкін болса құрбандық шалатын жан өз құрбандығын өзі шалғаны – мұстахаб (ұнамды іс). Дегенмен өкілеттік беру арқылы басқа адамға да бауыздатуға болады. Құрбандық шалатын жанның мұсылман болғаны абзал.
Құрбандық шалған кезде төмендегі жәйттарға да назар аударған жөн:
– Құрбан шалынатын жердің таза болуына көңіл бөлу;
– Құрбан шалатын жерге малды ұрмай-соқпай апару;
– Құрбан малын құбылаға қаратып, сол жағымен жатқызу;
– Құрбан шалатын адам малды қинамай жұмсақ бауыздауға көңіл бөлуі керек. Малдың көзінше жалаңдатып пышақ қайрауға болмайды. Пышақ өткір болуы тиіс;
– Малды құбылаға қарата жатқызғаннан кейін оң қолымен «Бисмиллаһи, Аллаһу акбар» деп бауыздайды. Құрбандық малды басқа адамға бауыздатқан кісі мал бауыздалып жатқанда «Бисмиллаһи, Аллаһу акбар» деп қоса айтқаны жөн;
– Малдың жаны бойынан толық шығып болғанға дейін оның терісін сыпыруға болмайды;
– Малдың қаны толық ағып біткенше күтіледі;
– Құрбан шалғаннан кейін сол маңайдың тазалығына да көңіл бөлу керек.

Құрбандық шалудың уақыты туралы

Құрбан шалудың уақыты құрбан айттың бірінші күні айт намазынан кейін басталып, айттың үшінші күні ақшамға аз уақыт қалғанға дейін жалғасады.
Жарықтандыру жүйесі нашар орындарда түрлі қателіктерге жол бермеу үшін түнде құрбандық шалу мәкрүһ болып саналады. Ал жарықтандыру мүмкіндігі жеткілікті жерлерде түнде де құрбандық шалына береді. Құрбан айтқа арнап алынған мал құрбан айтта бауыздалмаса, малдың өзін садақа ретінде атау қажет.
Үзір себептерге байланысты құрбан айт намазына бара алмай қалған адамның, намаз оқып болатындай уақыт өткеннен кейін құрбанын шала беруіне болады. Пайғамбарымыздан (саллалаһу аләйһи уәсәллам) құрбан шалудың уақытына байланысты бірнеше хадис риуаят етілген. Бәрә ибну Азибтің риуаяты бойынша:
«Алланың Елшісі (Оған Алланың салауаты мен сәлемі болсын): «Біздің бұл күнде алғашқы жасайтын - ісіміз намаз оқу, сосын қайтып келіп, құрбанымызды шалу. Кім осылай істесе біздің сүннетімізе ергені. Ал кімде-кім бұдан бұрын құрбанын шалатын болса, бұл құрбанының отбасына берілген еттен айырмашылығы жоқ. Бұның құрбан болуы мүмкін емес». Басқа бір хадисте: «Кімде-кім намаздан бұрын құрбанын шалса, қайтадан шалсын», – деп, намаздан бұрын шалынған малдың құрбандыққа есептелмейтінін ескертеді.

Құрбандыққа шалынған малдың еті мен терісі

Бай болсын, кедей болсын құрбан айтта шалған құрбандығының етін жеуіне болады. Құрбандыққа шалынған малдың етін үш бөлікке бөліп тарату – мұстахаб. Бір бөлігі – туған-туыс, көршілеріне бай болса да сыйға тартылады, екінші бөлігі – кедей және мұқтаж адамдарға, үшінші бөлігі – өзінің отбасына, бала-шағасына тиесілі. Бірақ шалынған малдың етін түгелдей кедей-мұқтаждарға таратуға да болады. Егер құрбандық шалған адам аса дәулетті болмаса және жанұясында адам саны көп болса онда құрбандықтың етін түгелдей өзінің отбасына да қалдыра алады.
Алла Тағала Құран Кәрімде құрбанның еті турасында былай дейді: «Құрбанның етінен өздерің жеңдер әрі міскіндер мен кедейлерге жегізіңдер».
Пайғамбарымыздың шалған құрбанының етін қалай таратқандығы турасында Ибн Аббас былай деп риуаят етті: «Пайғамбарымыз (Оған Алланың салауаты мен сәлемі болсын) шалған құрбандығының үштен бірін – отбасына, үштен бірін – кедей көршілеріне, қалған үштен бірін садақа ретінде тарататын».
Уәжіп болсын, нәпіл болсын құрбандыққа шалынған малдың етін, терісін, сирақ-басын және сүтін сату – мәкрүһ. Құрбан малының аталмыш бөлшектері сатылған жағдайда құны кедейлерге садақа ретінде беріледі. Құрбанға шалынған малдың ешқандай бөлшегінен қасаптың ақысы ретінде төлеуге болмайды. Құрбандыққа шалынған малдың терісін кедейлерге, қайырымдылық қорларына беруге болады.

Бірігіп құрбан шалуға бола ма?

Қой немесе ешкі іспетті ұсақ малды құрбандық ретінде тек бір адам ғана шала алады. Ал түйе немесе сиыр секілді ірі-қара малдарды бір кісіден жеті адамға дейін бірігіп немесе бір адам жеке өз атынан да соя алады. Құрбандық шалуға біріккен кісілердің барлығының ниеті құрбандық құлшылығын өтеу мақсатында болуы керек. Егер осы адамдардың ішінен біреуі құбандыққа тек ет алу ниетімен қосылса, барлығының да құрбандығы құрбандық ретінде саналмайды.

Тәшриқ тәкбірі

Бұл тәкбір құрбан айт күндеріне ғана тән. «Тәшриқ тәкбірінің» айтылу тәртібі төмендегідей: «Аллаһу акбар, Аллаһу акбар, ләә иләһә иллаллаһу уаллаһу әкбар, Аллаһу акбар уә лиллаһил-хамд»
Мағынасы: «Алла Тағала аса ұлық (2 рет), Алладан басқа тәңір жоқ! Алла тағала аса ұлық (2 рет)! Күллі мадақ тек Аллаға ғана лайық!».
Тәшриқ тәкбірінің уақыты Зүл-хижжаның тоғызыншы күні, яғни айттан бір күн бұрынғы «арапа» күні таң намазынан бастап құрбан айттың төртінші күнінің намаздыгер уақытына дейін парыз намаздарының сәлемінен соң айтылады. Бұл тәкбірлерді айту – намаз оқуға міндетті әрбір жанға уәжіп. Мейлі жеке оқысын, мейлі жамағатпен оқысын тәшриқ тәкбірлерін айтуы керек. Егер қандай да бір намаздан кейін тәшриқ тәкбірін айтуды үмытып кетсе, онда сол күндері оқылатын кез-келген намаздың парызынан кейін қаза етіп айтады.

Құрбан айт мерекесін қалай атап өтеміз

Бір күн бұрын жақсылап ғұсыл құйынғаннан (денені толықтай жуу) кейін әдемі, таза киімдерін киіп, үстіне хош иіс сеуіп, мешітке айт намазына бару – мұстахаб (жақсы амалдарға жатады). Айт намазын оқығаннан кейін құрбан шалу міндеттелген жандар құрбандықтарын шалады.
Айт күні мұсылмандар көрші-қолаң, туыс-туғанды қыдырыстап, «Айт құтты болсын» айтысады. Айт күндері мейлінше көтеріңкі көңіл-күйде, жылы жүзді, кешірімді болуға тырысу керек. Ренжіскен кісілер қайта табысып, Айтта бір-бірін кешіріскен жөн. Ауырып жатқан кісілердің көңілін сұрап, арнайы бас сұғу, жетім, жесір, мұң-мұқтаждарға көмектесу, оларға да айттың қуанышын сездіру өте сауапты істерге жатады.
Құрбан айт намазы 2017 жылғы 1 қыркүйек күні, таңғы сағат 7.30-да Оңтүстік Қазақстан облысы бойынша барлық мешіттерде бір мезгілде оқылады.

Мұхамеджан ЕСТЕМІРОВ,
Қазақстан мұсылмандары діни басқармасының
Оңтүстік Қазақстан облысы
бойынша өкіл имамының орынбасары, дінтанушы

Қымбатты шымкенттіктер! Қадірлі қонақтар!

Сіздерді Конституция күнімен шын жүректен құттықтаймыз!

Бұл күн – біздің еліміз үшін ең ұлық мерекелердің бірі. Биыл еліміздің Конституциясының қабылданғанына – 22 жыл толды. Конституцияны басшылыққа ала отырып, біз, мемлекеттігімізді нығайту жолында ауқымды істер атқарып, алдымызға айқын мақсат қойдық. Мемлекет басшысының – жалпыұлттық «Мәңгілік Ел» идеясы, «Нұрлы Жол» Жаңа Экономикалық Саясаты және Бес институттық реформасы Ата Заңымыздың аясында жүзеге асатын жүйелі жобалар. 

Ата Заң қабылданған 22 жыл ішінде Шымкенттің әлеуметтік, экономикалық, өндірістік дамуында тың серпілістер орын алды. Халық саны өсіп, еңбек өнімділігі артты. Құқықтық қоғамдық пікір қалыптасты. 

Қазіргі Шымкент жыл санап түрленіп, әлеуметтік-экономикалық тұрғыдан өсіп, өркендеп келеді. Таяу уақытта біз миллионды қалаға айналмақпыз. Экономикалық белсенділік артып, жұмыссыздық деңгейі төмендеді. Бұның бәрі, Бас Құжатымыз – Ата Заңның аясында жасалып жатқан игі істер. 

Елбасы Н.Ә.Назарбаевтың «Шымкент Алматы мен Астанадан кейін мегаполис атағы бар Қазақстандағы үшінші қалаға айналатын болады» дегені, біз үшін үлкен абырой ғана емес, сондай-ақ әрбірімізге жүктеліп отырған үлкен жауапкершілік. Президентіміздің осы сенімі әлеуметтік және мәдени деңгейімізді арттырады. Соның нәтижесінде әрбір қала тұрғындарының өмір сапасы артады деп ойлаймыз.

Құрметті қала тұрғындары!

Конституция – Тәуелсіз елдің қоғамдық қағидасын бекітті, демократия дамуына импульс берді, азаматтық бейбітшілік пен келісімді ұзартты. Елдегі ұлт пен ұлыстың бірлігін нығайтты. Бүгінде, Шымкентте 130-дан астам әр түрлі ұлт өкілдері татулықта өмір сүруде. Олар әр түрлі салада қаланың дамуына, мегаполис атануына ерекше үлес қосып жүр. 

Сіздерге зор денсаулық, отбасыларыңызға бақыт тілейміз және алдағы уақытта Шымкентімізді Қазақстандағы үшінші мегаполиске жеткізу үшін аянбай еңбек етейік.

Қала әкімі
Ғабидолла ӘБДІРАХЫМОВ

Қалалық мәслихат хатшысы
Нұрлан БЕКНАЗАРОВ

«Айбары асқақ – Ата Заң». Шымкентте осындай атаумен Қазақстан Республикасының Конституция күні мерекесіне арналған салтанатты іс-шара өтті.

Мерекелік жиынға облыс әкімі Жансейіт Түймебаев, ардагерлер мен қала тұрғындары қатысты.

– Конституция – мемлекетіміздің мызғымас алтын қазығы. Бірлігі мен ынтымағы жарасқан елдігіміздің бұлжымас бағдары. Кемел келешегіміздің кепілі. Халықтың өзі дауыс беріп қабылданған ата заңымыз өркениетті мемлекеттердің барлығына тән демократиялық қағидалармен толық қамтылды. Конституция – бірлігіміздің тұрақтылығын, мемлекеттік құрылымы мен еліміздің тұтастығын бекітіп берді. Әрбір азаматтың өзін тең сезінуіне және құқықтарының сақталуына негіз болды, – деді өңір басшысы Ж. Түймебаев. 

Шара барысында халыққа еңбегі сіңген 15 азаматқа облыс әкімінің грамотасы және алғыс хаты табысталды. Конституциямыздың қабылданғанына биыл 22 жыл толуына орай ұйымдастырылған іс-шара соңы мерекелік концертке ұласты.

Шымкент қаласы әкімі аппаратының басшысы Рашид Аюпов «Болашақ» халықаралық бағдарламасы аясында Queen Mary University of London (Ұлыбритания) университетінде мемлекеттік басқару мамандығы бойынша білім алған. Кәсібилік пен жаңашылдық – оның басты қағидасы.
Өз ана тілімен қатар, ағылшын, орыс тілдерін жетік меңгерген азамат әрдайым өз-өзін жетілдіріп отырады. Шет тілдерін білу, халықпен етене жұмыс істеу – бүгінде мемлекеттік қызметкерге жүктелер басты міндет.
Мемлекеттік қызметкерлер күні қарсаңында Рашид Абатоллаұлымен сұхбаттасқан едік.

– Рашид Абатоллаұлы, қазір мемлекеттік кәсіби аппарат құруға мән беріліп отыр. Бүгінгі мемлекеттік қызметкер қандай болуы керек? 

– Елбасының 100 нақты қадам – Ұлт жоспарында айтылғандай, мемлекеттік қызметкер патриот, адал, өзінің саласы бойынша нағыз маман болуы тиіс. Күн сайын өзінің білімін жетілдіріп, алға қарай дамып отыруға міндетті. Қазір бұған барлық жағдай бар. Әрбір мемлекеттік орган жылына бір немесе екі рет қызметкерлерін оқытып жатыр. Семинарлар өткізеді. 

Бүгінде Шымкент қаласы әкімінің аппаратында конкурс жарияланса, бір орынға кемінде отыз адам үміткер болады. Оның 70-80 пайызы – жастар. Олардың көпшілігі жаңадан оқу бітіргендер немесе мемлекеттік қызметті енді бастағандар. Бәрі де жұмысқа құлшынып тұр. Еліміз 30 елдің қатарына кіруді мақсат етіп қойды. Бұл ретте әсіресе мемлекеттік қызметкерлердің қосар үлесі мол. 

Қазір меритократия қағидасына мән беріліп жатыр. Бүгінде мемлекеттік органда жұмыс істеуіңіз үшін арнайы тест тапсырасыз. Білім-біліктілігіңізді танытуыңыз қажет. Конкурстық комиссия ашық түрде өткізіле бастады. Комиссия құрамына қоғамдық бірлестіктер, БАҚ өкілдері қосылды. Мұның бәрі ашықтықты, жалпы, мемлекеттік қызметтің маңыздылығын таныту мақсатында қолға алынып отыр. 

– Таяуда Елбасы Н. Назарбаевтың «Болашаққа бағдар: рухани жаңғыру» атты мақаласы жарияланды. Яғни, бүгінгі кезеңде мемлекеттік қызметкерлердің санасы сергек болуы керек. Жастар қаншалықты мемлетшіл, қаншалықты Отанға адалдық танытып жүр? 

– Әрине, мемлекеттік қызметкер үшін де рухани жаңғыру өте өзекті. Кез келген адам мемлекеттік қызметкерден саяси бағдарламалар туралы сұрауы мүмкін. «Неге үш тілде сөйлеуіміз керек? Неге латын тіліне көшіп жатырмыз?» деп кейбіреулер сұраса, оған жауап бере ала ма? Міне, мемлекеттік қызметкерге қояр талап та осы. Қызметкер мінберге шығып, жай баяндап ғана қоймауы керек. Мемлекеттің саясатын толық біліп, кез келген сұраққа жауап беретін деңгейде болса ғана, оның мәртебесі биік болмақ. 

Бүгінде қала әкімдігінде 504 қызметкер болса, оның ішінде 20-ға жуығы ағылшын тілін біледі. Түрік, араб тілін меңгергенде де бар. Корей тілінде сөйлейтіндер де кездеседі. Жалпы, ағылшын тілін білуге басымдық беріліп отыр. Биыл біздің үш қызметкеріміз «Болашақ» бағдарламасы арқылы оқуға аттанды. Дайындалып жүргендер де баршылық. Өз қаражаттарына оқып келген қызметкерлеріміз де бар. 

– Қалада кәсіби мемлекеттік аппарат құру мақсатындағы «Ашық әкімдік» жобасы негізінде «Ресепшн қызметі», «Халықтық кеңсе» жобасы қолға алынды. Бұл жобалардың маңызы қандай?

– Бұл – мемлекеттік басқару жүйесіне енгізілген жаңа технологиялар. Жоба бойынша тұрғындардың өзіне қажетті құжаттарды бір орталықтан-ақ рәсімдеуіне мүмкіндік жасалды. Қала әкімі Ғабидолла Әбдірахымовтың тікелей идеясымен қолға алынған бастамалар. Негізінен, Еуропа елдерінің бәрінде осындай ресепшн қызметі жұмыс істейді. Өткен жылы қалада қолайсыз жағдайлар кезіккенін білесіздер. Кейбір алаяқтардың кесірінен «Шымкент қаласында жер тегін беріліп жатыр екен» деген ақпарат шыққан еді. Халық абыр-сабыр күйге түскен. Күніне 400-ден 1500-ге дейін адамдар әкімдікке қарай ағылды. Бұл – жалған ақпарат деп түсіндірдік. 

Бұрын тұрғындар рұқсат қағазын алу үшін әр бөлімге барып, сабылатын еді. Осы мәселені шешу үшін «Халықтық кеңсені» аштық. Шағымыңызды, мәселеңізді айтсаңыз, жедел түрде бір жерде-ақ шешіледі. «Халықтық кеңсеге» келіп, шағымыңызды айтсаңыз, сізге штрих-код беріледі. Сіз сол арқылы құжатты бақылап отырасыз. Кез келген реформа халық тарапынан қолдауға ие болып, халыққа ыңғайлы болуы тиіс.

Алдағы уақытта жер мәселесін тиімді басқару үшін «Спутникті мониторинг» жобасы да іске қосылады. Ол арқылы жер учаскелерін заңсыз түрде игерудің алдын алып, бақылауға мүмкіндік тумақ. Сондай-ақ, білім саласында мектептердің жаңа функционалдық деңгейге өтуін қамтамасыз ететін жоба қарастырылып жатқанын айта кетейін. 

– Өзіңіз шығыс жекпе-жек түрлерінің бірі – каратэ-до шотоканмен шұғылданасыз. Кентау қаласы біріншілігінің жеңімпазы, шахматтан облыс біріншілігінің жүлдегері атандыңыз. Жалпы, мемлекеттік қызметкерлер жұмыстан тыс уақытта да өз-өзін дамытуға мән беруі керек қой...

– Рас айтасыз, қызметкердің санасы да, бойы да сергек болуы қажет. Бізде арнайы кесте түзілген. 2016 жылдың мамыр айынан бері әкімдіктегі барлық қызметкерлер, бөлімдер топқа бөлініп, спортпен айналысу керектігі жайында тапсырма бар. Аптасына бір рет спортпен шұғылданамыз. Олардың арасында футбол, күрестен жүлдегерлеріміз жетерлік. Ол – тек салауатты өмір салтын насихаттау ғана емес, ұжым арасында достықты, ынтымақты арттыруға зор мүмкіндік. Қазір өзім аптасына бір рет жүзуге барамын. Біздің қызметкерлеріміздің арасында спортшымен қатар, өнерпаз қыз-жігіттеріміз де көп. 23 маусым күні мерекеге орай жиын өтпек. Қызметкерлеріміз сол жиында өз өнерлерін көрсетуге дайындалып жүр. 

– Лондонда білім алдыңыз. Ол жақтағы мемлекеттік қызметтің ерекшеліктері жайында не айтасыз? 

– Лондонда оқып жүргенде жергілікті әкімшілікте іс-тәжірибеден өткен едім. Жалпы, олар жоспарларын 50 немесе 100 жылға бағдарлайды. Біріншіден, онда қаланың экологиясы, ыңғайлылығы, адамдарды спортқа қызықтыруға мән беріледі. Қазір олардың 50 жылдық жоспары бар. Оған сәйкес, Лондон қаласының әрбір тұрғыны үшін үйі мен жұмысының арасында жүретін жолы 15 минуттан аспауы керек. Яғни, жаяу жүруді насихаттайды. Оның денсаулыққа, қала тіршілігіне қаншалықты пайдасы бар? Міне, осыған назар аударылады. Жоспарлары елеусіз болуы мүмкін. Бірақ, көздеген мақсаттары өте ауқымды. Мемлекетті дамуға бастайтын бірден-бір жобалар. 

Мемлекеттік қызметкерлер туралы айтсақ, біріншіден, оларда әлеуметтік қолдау зор. Екіншіден, әкімнен басқа ешбір қызметкер халықпен жүзбе-жүз кездеспейді. Сұрағыңызды пошта арқылы жібересіз. Егер шешілмейтін сұрақ болса ғана шақырады. Яғни, тайм менеджмент өте дамыған. Уақыттарын үнемдейді. Олар жұмысын сол күні бітіріп кетеді. 

– Мемлекеттік қызметтегі мансабыңызға 13 жылға жуықтапты. Алдағы жоспарларыңыз қандай? Кейде қала көшелерінде велосипедпен жүргеніңізді көріп қаламыз. Қарапайым болу да басты қағидаңыз-ау...

– Қоғамдық көлікке мінбесеңіз, ондағы жағдайды білмейсіз. Велосипедке отырмасаңыз жолдың, жаяу жүрмесеңіз аяқ жолдың жағдайынан хабарыңыз болмайды. Міне, осының бәрінен құлағдар болу үшін халыққа жақын болуымыз керек. Мемлекеттік қызметкер әрбір қабылдаған шешімін, әрбір жұмысын өзінің жүрегінен өткізуі керек деп ойлаймын. 

Өз-өзін дамыту жайын айттық. Қазір өзімді жетілдіру үшін кітап оқуға ден қойып жүрмін. Негізінен, экономикалық кітаптар. Бұл сала бұрыннан қызықтырса да, еш мүмкіндік болмай жүрді. Макроэкономика саласының ішінде менеджмент жағын білуді міндет етіп қойдым. Келесі жылы елімізде қаржылық орталық ашылайын деп жатыр. Мінекей, осы тұрғыда көбірек мағлұмат жинап, білуім – міндет. Ертең халыққа түсіндіре алуым керек қой. 

Мемлекетке қызмет ету – абырой. Жалпы, өзім бала кезімнен мемлекеттік қызметте жұмыс істеуді, елдің дамуына үлес қосуды мақсат еттім. Осы мақсат-мүдде жолында тер төгіп келемін.

– Әңгімеңізге рахмет!

Сұхбаттасқан
Т. ҚАСЫМ

Журналистердің төл мерекесіне орай облыстық ғылыми-әмбебап «Отырар» кітапханасында айтулы шара өтті. Кітапхананың екінші қабатында журналистерге арналған «Мерзімді баспасөз» бөлімі ашылды. Онда белгілі қаламгер, Оңтүстік журналистикасының корифейі саналған Әмірсейіт Әлиев пен Жұмамұрат Тұяқбаевқа арналған қос бұрыштың салтанатты таныстырылымы болды.

Маңызды жиынға елімізге белгілі ақын-жазушылар мен зиялы қауым өкілдері, қос қаламгердің ұрпақтары қатысты. «Мерзімді баспасөз» бөлімінің ашылу салтанатының лентасын ҚР Парламенті Мәжілісінің экс-депутаты, қоғам қайраткері Шалатай Мырзахметов пен Оңтүстік журналистикасының абыз ақсақалы Байдулла Қонысбек қиды. 

Журналистер күнінің қарсаңында ашылған «Мерзімді баспасөз» бөлімі жалпы оқырманға, әсіресе қолына қалам ұстаған қауымға қымбат тосын сый болғаны рас. Залдағы қос мүйістің оң жағы – «Шымкент келбеті», «Панорама Шымкента» газеттерін ұзақ жыл басқарған Жұмамұрат Тұяқбаевқа арналса, сол жағы – облыстық «Оңтүстік Қазақстан» газетінде ширек ғасырға жуық бас редактор қызметін атқарған Әмірсейіт Әлиевке бағышталған. Қос қаламгердің үлкен портреті мен кітап сөрелері, жазу үстелі мен орындығы залға кіргеннен-ақ көз тартады. Бұл екі тұлғаның да өткен өмір жолы, қаламгерлік ізі оңтүстік журналистикасының қазыналы тарихы.

Қос редакторға арналған мүйіске қарымды қаламгерлердің авторлық кітаптары мен алған марапаттары, тұтынған заттары қойылған. Кітапхана басшысы Күлия Айдарбекованың айтуынша, қос қаламгердің жазу үстелі мен орындығы үйлерінен арнайы алдыртылған. 

«Мерзімді баспасөз» залында өңір журналистикасының қара шаңырағы «Оңтүстік Қазақстан» газетін басқарған басқа да бас редакторларға арналған мүйістер бар. 

Жиында Әмірсейіт Әлиев пен Жұмамұрат Тұяқбаев жайлы баяндамалар оқылып, сағынышқа толы естеліктер айтылды. Солардың ішінде 90 жылдан астам тарихы бар «Оңтүстік Қазақстан» газетінің бүгінгі бас редакторы Абай Балажанның сөзі жиналған қауымды бей-жай қалдырмады. Абай Бекназарұлы қос қаламгердің табиғаты ұқсас болмағанымен, ұлттық мүдде, ел намысы тұрғысында сіңірген еңбек жолы ұқсас екенін айтты. Өзінің журналистикаға енді қадам басқан кезіндегі редакторы Жұмамұрат Тұяқбаевпен кезекті лездемеден кейінгі 7-8 минуттық әңгіме қағаз бен қаламның қадірін ұқтырғанын тебірене жеткізді. Ал газетті 22 жыл үзіліссіз басқарған редактор Әмірсейіт Әлиев хақында да қандай биік баға, құрметке лайық тұлға екенін ерекше атап өтті. 

Оңтүстік журналистикасының айтөбелі Байдулла Қонысбек қос тұлғамен ұзақ жылдар бірге қызметтес болғанын, олармен қоян-қолтық араласқанын мақтанышпен жеткізді. 

– Ол кезде таңертең сағат 9.00-де жұмысқа келсек, түнгі 4-5-тер шамасында үйге әрең жететінбіз. Екі-үш сағат көз шырымын алар-алмас қайта жұмысқа келеміз.

Жұмамұрат ағамыз да, Әмірсейіт ағамыз да газеттің қара жұмысына күн-түн демей төзді. Басылымға реформа жасады, оқырман санын арттырды. Ол кезде «Оңтүстік Қазақстанның» тиражы – 90 мыңнан асты, – деді белгілі журналист.

Шара соңында қос әулеттің ұрпақтары сөз алды. Әмірсейіт Әлиевтің кенже ұлы Дәулетияр Әлиев әкесі хақындағы естеліктерімен бөлісіп, Шалатай Мырзахметов, Еркінбек Тұрысов, Байдулла Қонысбек, Абай Балажан ағаларының иығына шапан жауып, құрмет көрсетті. Ал Әмірсейіт атамыздың шөбересі Айлун Әмірсейіт «Менің атам неге жақсы?» атты эссені оқып берді.

2017 жыл. 4 қаңтар. Кешкі сағат 20.00. Тура осы уақытта жол-патрульдік полиция полкіне жедел шақырту түсті. Күйеуі әйеліне қару қолданып, өміріне қауіп төндірген. Кезекшілікте жүрген Сафуан Батырбаев бастаған полицейлер хабарлама бойынша жедел көлікке отырды.

Кейде азаматтардың отбасындағы ұрыс-керісінің арты жанжалға ұласып, соңы өкінішті аяқталып жатады. Шұғыл жеткен топ оқиғаның үстінен түсті. Әйелдің өңінде қан-сөл жоқ. Тірі қаламын деп ойламаса керек. Бірінші болып Сафуан ер адамның қаруын қолға түсірді. Егер полицей келмегенде қайғылы жағдаймен аяқталар ма еді, кім білсін?.. Полиция қызметкері өмірі қыл үстінде тұрған әйелді қорғап қалды.

Ержүрек Сафуан 

Ішкі істер органында Жергілікті полиция қызметіне қарасты жол-патрульдік полкінің алатын орны ерекше. Мұнда полицейлерге артылатын жауапкершілік жүгі ауыр. Күні-түні қала тыныштығын күзетіп, қоғамдық тәртіп пен жол қауіпсіздігін қадағалайды. Төнген қауіпті ауыздықтау үшін жанын қиюға дайын. Қиындығы мен қызығы мол мамандықты лайықты атқарып жүрген ОҚО ІІД Шымкент қалалық жергілікті полиция қызметіне қарасты жол патрульдік полиция полкінің сақшыларын өз ісінің шебері деуге болады. Біздің кейіпкеріміз Сафуан Батырбаевты әріптестері ерекше құрмет тұтады. Қарапайым, қашанда көмекке келуге әзір, қайырымды жан деп бағалайды. Полицей жігіт патрульдік полкте қызмет істеген бес жылда 50-ге жуық қылмыстың жолын кесті. Талай оқыс оқиға мен қауіп-қатердің алдын алды. 

Ержүрек тәртіп сақшысына қала тұрғыны Анеса апайдың алғысы шексіз. Оны кездейсоқ зорлық-зомбылықтан Сафуан қорғап қалған. Бейтаныс адамның құйтырқы жоспары полицейдің қырағылығының нәтижесінде жүзеге аспады. 

Сафуан өз қызметін жақсы көреді. Жұмысының қиындығы мен жауаптылығына қарамастан абыроймен еңбек етіп келеді. 

– «Армансыз адам – қанатсыз құспен тең» демекші, бала кездегі арманым орындалды. Полиция қызметкері атанып, қаламыздың тыныштығын қорғап жүрмін. Алайда өзімді батыр санамаймын. Әрбір полиция қызметкерінің міндеті қоғамдық тәртіпті сақтау және жол ережесін қадағалау. Менің орнымда болса басқа жігіттер де осылай жасар еді. Мен үшін атақ-даңқтан халықтың сенімі қымбат,-дейді полицей.

Жуырда Сафуан Батырбаевтың ерлігі басшылық тарапынан еленіп, «Үздік полицей» номинациясына ұсынылды. Полиция кәсіби мереке қарсаңында марапатталады.

Қауіпті қарақшы, қырағы жігіттер...

Жылдың төрт мезгілінде жол бойын күзету оңай емес. Жыл сайын аумағы үлкейіп келе жатқан қалада көлік көп. Оған бағдаршамға қарамай, жарысатын көлік жүргізушілерін қосыңыз. Осылардың барлығын тәртіпке шақыру, полк қызметкерлерінің міндеті. Бірнеше күн бұрын Шымкент қалалық ішкі істер басқармасының жол-патрульдік полиция полкі бірінші взводының сержанты Оралбек Тәшімбетов және Ералы Далбаев, Дәурен Жолдасов күтпеген жерден қылмыскерді құрықтады. Полицейлер әдеттегідей кешкі ауысым бойынша жол қауіпсіздігін бақылап тұрған. Түнгі 24.00 шамасы болатын. Кең баба саябағы маңындағы қонақ үйден 5-6 азамат жүгіріп шығады. Олардың артынан іле-шала әйел шығып, полицейлерден көмек сұрайды. Сақшылар қылмыскерлердің ізін суытпай, қолға түсірді. Алдымен Оралбек екінші бағытқа бет түзеген қашқынның ізіне түсіп, оны көше бойынан тоқтатады. Әдепкіде ол қылмысын мойнына алмай, босатуын өтінеді. Алайда ойланып тұратын уақыт жоқ. Қырағы сақшы қылмыскерді құрықтады. Оқиға орнына барғанда қарақшының кассаны тонап, ақша алғаны анықталды. Тиісті тексеру мен сараптамадан соң, оның жеті бірдей қылмысы ашылады. 

Арада көп уақыт өтпей, жігіттер телефон ұрлығын анықтады. Оралбек Тәшімбетовтің айтуынша, телефонын ұрлатқан бейтаныс әйел шағым түсіреді. Полицейлер шұғыл түрде аумақты тексереді. Көп ұзамай, күдікті азамат көзге түседі. Алғашқыда ұры қарсылық көрсетпейді. Бірақ құжатын сұрағанда бой тасалағысы келіп, қашуға әрекет жасайды. Алайда жігіттер ширақ қимылдап, күдіктінің жалтарып кетуіне, тосқауыл жасады. 

– Биыл Қазақстан полициясының құрылғанына – 25 жыл. Осы жылдар аралығында елімізде қоғамдық тәртіпті күзетіп, қауіп-қатерден қырағы қорғайтын полиция қызметі қалыптасты. Ал жергілікті полиция қызметінің құрылуы екі маңызды мәселені шешуге мүмкіндік берді. Біріншіден, тәртіп күзетін қамтамасыз етуде жергілікті атқарушы органдардың рөлі мен жауапкершілігі артты. Екіншіден, жергілікті деңгейде қылмыстардың алдын алу мен құлақтандыру жүйесі әлдеқайда күшейді. Мұндағы жігіттердің бәрі жұмысын жауапкершілікпен атқарады. Бізге жаңадан келген жас қызметкер міндетті түрде тәжірибелі полицейге бекітіледі. Яғни, аға буын мен жас буынның арасында тәлімгерлік, іскерлік қарым-қатынас нық орнаған, – дейді ОҚО ІІД Шымкент қалалық полиция бөлімі жергілікті полиция жол-патрульдік полиция полкі командирінің орынбасары, полиция майоры Болатбек Иманалиев. 

Бүгінде қалалық жол-патрульдік полкінде 700-ге жуық полицей қызмет атқарады. Мұндағы жігіттердің бәрі ұйымшыл. Қызметтен қолы қалт еткенде қоғамдық іс-шараларға белсене атсалысады. Жуырда облыстық ІІД ұйымдастырған спартакиадада полк құрамының жасағы жүлделі орыннан көрінді. Статистикаға сүйенсек жыл басынан бері полк жасағына 403 қылмыс тіркелген. Оның 133-ін полицейлер анықтаған.

Иә, ант қабылдап, погон таққан полицейлердің қай қайсысы да өз ісінің шебері. Оларды бүгінгі күннің қаһарманы деуге болады. Өкінішке қарай, сақшылар күнделікті қызметте жұрттың құрметіне бөлене бермейді. Еңбегі мен жанкешті ерлігі назардан тыс қалып жатады. Бұл полицейлердің назарға түскендері ғана. Ал белгісіздері қаншама?!