Заңсыз дүңгіршектер алынды

Среда, 24 Октябрь 2018 03:53

Шымкент қаласының орталық көшелерінде көпшілікке арналған жерді заңсыз меншіктеп алып, ретсіз сауда жасайтындардың қатары азаймай тұр.

байтұрсынов5

Мегаполистің сәулеттік келбеті сақталуы шарт. Шаһар орталығы саналатын Әл-Фараби ауданында қала әкімі Ғ.Әбдірахымовтың ретсіз саудамен күрес және заңсыз дүңгіршектерді сүру жұмыстарына байланысты тапсырмасы жалғасуда. Жұмыс барысында қала көшелеріндегі аяқ жолдар мен көпшілік бірге пайдаланатын жер телімдеріне заңсыз орнатылған бірқатар дүңгіршектер алынды. Атап айтқанда, Амангелді көшесіндегі «Асхана», Арғынбеков көшесінде орналасқан «Тандыр самса», А.Байтұрсынов көшесінің бойындағы «Донер» және Қазыбек би көшесіндегі «Лаваш» саудасы тоқтады. Иісі аңқыған түрлі тағам жергілікті тұрғындардың мазасын кетірсе, санитарлық талаптарға сай келмейтін тағы бір осал тұсы бар. Соған қарамай саудасын қыздырған дүңгіршек иелеріне бұған дейін де түсіндіру жұмыстары жүргізілген.
– Бұл дүңгіршектер – бір адам үшін табыс көзі. Ал тағы 100-200 адам үшін ыңғайлы тамақтану орны. Алайда дүңгіршек орналасқан жолдан өтетін және осы маңда тұратын 5-10 мың адам үшін бұл үлкен кедергі, – дейді Әл-Фараби ауданы бойынша кәсіпкерлікті қолдау бөлімінің басшысы Н.Қаңлыбаев.
Кең көшені тарылтып, ешбір құжатсыз дүңгіршек орнатып алған тұрғындарға Әл-Фараби ауданы бойынша кәсіпкерлікті қолдау бөлімінің қызметкерлері түсіндіріп, жыл басынан бері заңсыз орнатылған 66 дүңгіршекті орнынан алуға ықпал етті. Бұл жұмыстар Шымкент қаласы әкімінің 13.04.2016 жылғы «Қала аумағындағы ретсіз сауданың алдын алу, жою жұмыстарының барысы» туралы №649 қаулысына, ҚР-ның Жер Кодексінің 43-бабына және «Әкімшілік құқық бұзушылық туралы» Кодексінің 136 және 204-бабына сәйкес жалғаса береді.

ҚР Президентінің халыққа Жолдауын насихаттау бойынша Шымкентке республикалық ақпараттық-насихат тобы іс-сапармен келді. Сол топтың бірінде ҚР Еңбек және халықты әлеуметтік қорғау вице-министрі Нариман Мұқышев пен ҚР Ақпарат және коммуникациялар вице-министрі Динара Щеглова бар. Мәртебелі қонақтарды Шымкент қаласы әкімінің орынбасары Гүлжан Құрманбекова бастап алып жүрді.

DSC 9082

Үшінші мегаполистің жұмыспен қамту жүйесі қалай жұмыс істейді? Ал әлеуметтік қорғау барысында қандай ілгерілеушілік бар? Осы салаға жауапты қалалық жұмыспен қамту және әлеуметтік қорғау басқарманың басшысы Ғалымжан Балтаев вице-министрлерге Шымкент қаласының халыққа қызмет көрсету орталығының жұмысын таныстырды. Мұнда қала халқына қызметтің 780 түрі цифрлық форматта көрсетілсе, оның 24-і жұмыспен қамту және әлеуметтік қорғау басқармасына тиесілі мемлекеттік қызмет түрі.
Азаматтарға мемлекеттік қызмет көрсету залында 83 маман жұмыс істейді. Мұнда бір күнде келушілер саны 1 600-ге жетеді. Тағы бір артықшылығы, халыққа қызмет көрсету орталығында цифрлық сауаттандыру бойынша тегін оқытатын кабинеттер ашылған. Мұнда кез келген қала тұрғыны электронды қолтаңба ашу және жабу, үйден шықпай мемлекеттік қызметтерді алу, еnbek.kz порталынан жеке кабинет ашу, құқықтық сауаттылықты арттыру бойынша өтетін сабақтарға қатыса алады.
ҚР Еңбек және халықты әлеуметтік қорғау вице-министрі Нариман Мұқышев журналистерге берген сұхбатында қызмет сапасына жоғары баға берді.
– Шымкенттегі халыққа қызмет көрсету орталығында цифрландыруды дамыту жақсы жүйеге қойылғанын байқадық. Тіпті, мұндағы ілгерілеушілік Астана мен Алматы қалаларынан да жақсы көрсеткішке ие бола алады, – деді вице-министр.
Вице-министрлер бұдан кейін Шымкент қаласы әкімдігінің басқармалары және оларға қарасты орталықтардың қызметкерлерімен жүздесіп, Елбасының Қазақстан халқына Жолдауы жайында пікір алмасты.
ҚР Ақпарат және коммуникациялар вице-министрі Динара Щеглова Елбасы Жолдауы аясында «Мемлекеттік қызметтерді цифрландыруға көшіру мәселесі» туралы баяндады. Алдағы уақытта Президенттің тапсырмаларын сала мамандарымен бірге атқаруға шақырды. Ал вице-министр Нариман Нұрланұлы ашықтық саясатын алға тарта отырып, мамандарға кез келген сұрақтар бойынша әлеуметтік желі арқылы да жауап беруге дайын екенін еске салды.

Ұядай көшенің үйдей проблемасы

Пятница, 19 Октябрь 2018 03:50

«Жайлылық дегеніміз – ең алдымен, тұрғын үйдің қолжетімділігі, ауланың әдемілігі мен қауіпсіздігі, тіршілікке және жұмыс істеуге қолайлы елдімекеннің және сапалы инфрақұрылымның болуы...
...Экологиялық ахуалды жақсарту, соның ішінде зиянды заттардың таралуы, топырақтың, жердің, ауаның жағдайы, қалдықтарды жою, сондай-ақ онлайн түрінде еркін қолжетімді экологиялық мониторинг жүргізу жүйесін дамыту жөніндегі жұмыстарды күшейту қажет».

Мемлекет басшысы Н.Ә.Назарбаевтың
2018 жылғы 5 қазандағы Қазақстан
халқына Жолдауынан үзінді

Шымкент қаласының аумағына Төле би ауданынан енген Тоғыс елдімекеніне қарасты көше бар. Бұған дейін «Нефтеразведка» деп аталған көше бойында көпқабатты 24 тұрғын үй тұр. Айналдырған 24 үйдің үшеуі 5, алтауы 3 қабатты, қалған 15-і түгел 2 қабатты үйлердегі пәтер саны – 447. Тұрғындарының саны 2000-нан сәл ғана асатын көшеде қордаланған мәселе жетерлік.

2000 адам баспалдақ орнатуды сұрайды

DSC 7203

Үлкен шаһардың бір бөлшегіне айналған Мұнай барлаушылар көшесі жаңартуды қажет етеді. Жергілікті тұрғындардың бірі балалардың ойын алаңшасын салып беруді сұраса, екіншісі шатырды жаңалап беруді өтінеді. Тағы бірі жарықтандыру қажеттігін алға тартып, келесісі тазалық тақырыбын қозғайды. Мұнда автокөлік жолдары мен жаяу жүргіншілердің аяқжолдарына қажеттілік те басым. Ал ауызсу, жылу құбырларына байланысты халық арызы да аз емес.
«Жиналыс, отырысты қысқарту керек!» деген Мемлекет басшысының сөзін негізге алған Еңбекші ауданының әкімі Ғалымжан Ілиясов халық арызын Тоғыс тұрғын алабына барып тыңдады. Айтылған әрбір мәселені көзбен көріп танысты. Көшпелі жиынға Шымкент қалалық мәслихатына осы аумақтан сайланған депутат Марат Тамабаев және Қазығұрт аумағы бойынша халықпен жұмыс жүргізу бөлімінің басшысы Данай Шуылдақ қатысып, жергілікті тұрғындармен жүздесті.
Мұнай барлаушылар көшесінің биі Талиба Бурковецкая «Смола» аялдамасына шығатын баспалдақты жаңартып беруді өтінді.
– Мұнай барлаушылар көшесінің әбден мүжіліп, тозығы жеткен баспалдағымен 2000-нан астам адам жолға шығады. Жазда баспалдақтың төгіліп жатқан тасы мен бетонынан жалаңаштанған арматураға сүрініп шалынамыз. Ал қыстың күні мұз қатқанда тайып жығылып, аяғы майып болғандар көп. Жасы үлкендер мұндай жарақаттан кейін оңай жазылмайды. Түнгі уақытта бұл маңда жарық жоқ, зуылдаған көлік. Жолдан асыға өтіп, домалап түскендей боламыз, – деген көше биінің сөзін үй төрайымдары қоштады.
Ғ.Ілиясов жол жиегінен тіке құлдилайтын баспалдақты Солтүстік, Күншығыс шағынаудандарындағы баспалдақ үлгісімен жасауға ұсыныс беретінін айтты. Ал М.Тамабаев «Смола» аялдамасы мен осы баспалдақ маңын жарықтандыру үшін күн көзінен қуат алатын батарея орнатуды қолдайтынын айтты.
– Егер жоғары сапалысын орнатуға қаржы қарастырсақ, осы тұсты жарықтандыруға бір батареяның қуаты жетеді, – дейді депутат.

«Сиырды қалай тәртіпке шақырамыз?»

Шымкент қаласының әкімі Ғ.Әбдірахымов айтқан қала көшелеріндегі үй жануарлары мен төрт түлік малдың көпқабатты тұрғын үйлердің арасында жайылып жүруі мұнда да сөз болды.
– Біздің аулаларда қоқыс контейнері жоқ. Қап-қапқа салып, қоқысты жинап алып кеткенше айналамызды жинап отырамыз. Бірақ сол жиналған қалдықты қараусыз жүрген сиырлар келіп шашып тастайды. Айналаны ластап үлгеретін малды ары-бері қуғаннан жағдай өзгермейді. Сиырды қалай тәртіпке шақырамыз? Алайда, солардың иесіне тәртіптік шара қаралса, жауапкершілікті сезінер еді, – деп шағымданды Алексей Мутиев.

Ортақ мүлікті бірге басқару қажет

Осы тұста 33/1 үйдің 1-ші қабатында тұратын Нұралы Сейітов көлік түтінінен мезі болғанын айтып, ауланы қоршап алуға рұқсат сұраса, көпқабатты үйлердің жоғарғы қабаттағы тұрғындары шатырдан аққан су жыл сайын әуреге салатынын айтады.
– Жыл сайын шатырды жамаймыз. Бірақ, ол көмектеспейді. 30-40 жыл болған ескі үйлердің шатырын ауыстыру қажет. Төменгі қабаттағылар «шатырдың бізге қатысы жоқ» деп алаңдамайды, – дейді тұрғындар.
Аудан әкімі қала аумағына енген елдімекендердің тұрмыс жағдайын жақсарту, инфрақұрылымдық жүйенің әлеуметтік қауіпсіздігін арттыру үшін кондоминиум құрудың маңызын түсіндірді.
– ҚР «Тұрғын үй қатынастары туралы» Заңының 32-бабы 1-тармағына орай, жылжымайтын мүлікке құқықтарды мемлекеттік тіркеу туралы заңнамасына сәйкес кондоминиум объектісі аумақтық әділет органдарында, жылжымайтын мүліктің орналасқан жерінде мемлекеттік тіркеуден өтуге тиіс. Кондоминиум, яғни «бірге басқару» жүйесіне көшу – бүгінгі күннің басты талабы. Кез келген жөндеу, қайта құру, тұрғын үйлердің қасбетін жаңарту, бір үйде шоғырланған бірнеше пәтердің құбырын ауыстыру сынды жұмыстардың барлығы бүгінде осы ортақ басқаруды растайтын құжат негізінде жүзеге асады, – деді Ғ.Ілиясов.
Ортақ мүлікті бірге басқару. Соңғы кездері бұл құжаттың маңызы зор. Ортақ басқаруды растайтын кондоминиум құрылса, тұрғын үйді күтіп ұстау, сервистік қызмет, техникалық жұмыстар әр пәтерді жекелемей-ақ тұтас бір үйге бағытталады. Мәселен, үйдің төбесінен су тамшылап тұрса, ақаудың қай тұста, қай пәтерде екенін анықтау үшін маман әр үймен жеке келісіп, жұмысына бөлек-бөлек ақы алады. Көршіңіз келіспеген жағдайда, бірнеше рет жөндегенімен сол су қайта тамшылап тұруы әбден мүмкін. Ал кондоминиум объектісіне айналған жағдайда бір сервистік қызмет көрсететін маман немесе ұжым 1 үйдегі барлық пәтерге толық жауапты.
Ортақ мүлікті заңдастырған жағдайда көпқабатты үйдің аумағына қарасты жер телімі де бекітіледі. Ол тұсқа сол үйдің тұрғындары бірігіп гүл егуі, көлік тұрағын жасауы, балалар ойын алаңшасын салуы әбден мүмкін.

Экологиялық сауалдың шешімі...

DSC 7298

Мұнай барлаушылар көшесіндегі көпқабатты үйлердің кәріз жүйесі істен шығып, тозығы жеткені соншалықты, Бадам өзеніне құятын кәріз қалдығы экологиялық мәселеге айналып кеткен-ді. Қолқаны қабатын қолаңса иіс қайдан шығады? Ол туралы Шымкент қаласы мәслихатының депутаты М.Тамабаев түсіндіріп өтті.
– №21 округ сайлаушыларымен алғашқы кездесуде-ақ мұндағы кәріз жүйесінің істен шыққаны туралы естідім. Кәрізден шыққан жағымсыз иіс бүкіл Тоғыс тұрғын алабына тарап, шағым одан сайын үдеді. Сайлаушылармен әр жолғы кездесуде осы сұрақ көтеріледі. Себебі, бұл тек жергілікті тұрғындардың арызы емес. Кәрізден шыққан бүкіл қалдық еш кедергісіз Бадам өзеніне төгіліп жатады. Ал қаланы қиып өтіп Арыс өзеніне қосылатын Бадамның қалаға дейінгі жағалауында бірнеше демалыс аймағы орналасқан. Онда халық шомылып жатыр, басқа да қажеттілікке жаратып, тұтынуда. Ендеше, Мұнай барлаушылар көшесіндегі кәріз жүйесінен Бадамға құйылған қалдықтан табиғи ортаға қаншалықты қауіп барын таразылай беріңіз. Ішек-құрт инфекциясы, тері аурулары осындай экологиялық ахуалдан соң орын алады. Табиғат ластануда. Жергілікті тұрғындардың арыз айтып, ашынуы өте орынды. Сайлаушылардың арыз-шағымын негізге ала отырып, депутаттық сауал тастап, ұсыныс жолдадық. Нәтижесінде бір оңды іс қолға алынды, – дейді Марат Сәрсекұлы.
– Тоғыс тұрғын алабындағы көпқабатты үйлердің кәріз жүйесіне байланысты мәселе біраздан бері өзекті тақырыпқа айналған-ды. Мұндағы жағдайды білген қала басшысы
Ғабидолла Рахматоллаұлы ұсынысымызды бірден қолдады, – деген Еңбекші ауданының әкімі Ғ.Ілиясов бізді Мұнай барлаушылар көшесіндегі кәріз жүйесінің құрылысына бастап барды. – Кәріз жүйесінің құрылысына 226,2 млн теңге қаржы бөлініп, жоба аясында 470 абонентті қамту көзделген. Мұнай барлаушылар көшесіндегі кәріз жүйесінің құрылысын бүгінде «Торлан құрылыс» ЖШС жүргізуде. 2017 жылдың қазанында басталған жұмыс биыл 30 қарашада аяқталуы тиіс.
Жұмысшылар қазірдің өзінде көпқабатты 19 үйді кәріз жүйесіне қосып үлгеріпті.

DSC 7220

– 19 үйден шыққан қалдық су тазарту бекетіне жиналады. Диаметрі 2400 метрлік жерасты кәріз бөшкесінің жалпы сыйымдылығы 500 текше. Осында жиналған су қатты қалдықтардан тазартылып, 4 түрлі әдіспен өңделеді. Содан соң сүзгіден өткен су үш кедергі арқылы әбден тазарып, ультракүлгін сәулеге жетеді. Бактерияларды жою процесі аяқталған соң ғана суды өзен арнасына қосамыз, – дейді шебер-бригадир Бекболат Төлепбергенов.
Осылайша, экологиялық сауал шешімін тапты. Соңғы технологиямен жабдықталған Тоғыс кәріз суын тазарту бекеті жыл соңына қарай пайдалануға берілмек. Мұндағы жұмысшылар саны 10 адамнан аспайды. Сөйтсе де, бұған дейін қала билігі мен жергілікті халықты алаңдатқан өзекті мәселемен техника тілін меңгерген осы 10 маман айналыспақ.

Шымкент қаласына Алматыдан делегация келді. Алматы облыстық Қазақстан халқы Ассамблеясы төрағасының орынбасары Ғабит Тұрсынбай бастаған делегация шымкенттік әріптестермен тығыз байланыс орнатып, тәжірибе алмасуды көздейді.

 DSC8783

Құрамында Алматы облыстық Қазақстан халқы Ассамблеясы жанындағы құрылым жетекшілері мен этномәдени бірлестік төрағалары, ғалымдар мен журналистер бар жетісулық делегацияны жергілікті Қазақстан халқы Ассамблеясының ұжымы қашанда қонақжай қалпынан танбайтын шымкенттік үрдіспен қарсы алды. Қала қонақтары алдымен Шымкент қаласының Қазақстан халқы Ассамблеясы ғимаратын аралады.
Бұдан кейін Шымкент қалалық Қазақстан халқы Ассамблеясы төрағасының орынбасары М.Қалмұратовтың жетекшілігімен өткен дөңгелек үстелде бас қосып, жергілікті этно-мәдени бірлестік басшыларымен танысты. Этностар арасындағы ынтымақтастық пен татулықты қалыптастыру, араздықты болдырмау тұрғысында өздерін қызықтырған сұрақтарға жауап алды.
Алматылық делегация жетекшісі Ғ.Тұрсынбай көпшілікті Түркістан облысының құрылуымен және Шымкент қаласының республикалық мәртебеге ие болуымен құттықтап, «Ынтымақ шеруі» жобасының маңызына тоқталды.
– Елдің берекелі бірлігін нығайтуға бағытталған игі іс-шаралар аз емес екен. Мемлекет басшысы айтқандай елдің берекелі бірлігі мен ырысты ынтымағы барлық жетістіктердің кілті екені даусыз. Осы бағытта Түркістан облыстық және Шымкент қалалық ассамблея мүшелерімен бірқатар жобаларды бірлесе жүзеге асыруға келісіп отырмыз, – деді ол.
Жетісулық делегация оңтүстік өңірдегі оңды істермен танысып, тың бастамаларға куә болды. Ал Алматы облысының этно-мәдени бірлестіктері жанындағы шығармашылық ұжым шымкенттіктерге концерттік бағдарлама ұйымдастырды. «Ынтымақ шеруі» жобасы аясында қала қонақтары Шымкенттің және Түркістан облысының тарихи-танымдық жерлерін аралауды да жоспарлаған.

Елбасының 5 қазанда жариялаған Жолдауына байланысты Әл-Фараби ауданы әкімі аппаратында актив отырысы өтті.

IMG-20181010-WA0010

Аудан әкімі Ғ. Мәуленқұловтың төрағалығымен өткен жиында Елбасының «Қазақстандықтардың әл-ауқатының өсуі: табыс пен тұрмыс сапасын арттыру» атты Жолдауын халық арасында насихаттау, түсіндіру, жоспарланған жұмыстардың жүйелі жүзеге асыру жайы сөз болды.
– Елбасы өзінің Жолдауында ел алдындағы 6 негізгі міндетті атады. Ең әуелгі тапсырма – халық табысының өсуі. Тұрмыс сапасын арттыру, өмір сүруге жайлы орта қалыптастыру міндеттемесін жүктеу барысында да Мемлекет басшысы ең маңызды мәселелерге тоқталды. Төртінші, азаматтар сұранысына бейімделген мемлекеттік аппарат халықтың күнделікті тіршілігінде маңызды рөл алады. Ал тиімді сыртқы саясат бізге кәсіпкерлікті дамыту мен өркениетке жол ашып, бәсекелестік қабілетті арттырары сөзсіз. Соңғы әрі маңызды міндет – әрбір қазақстандықтың еліміздегі өзгерістер үдерісіне атсалысуы. Яғни, Жолдауды әрбір азамат өзі оқып, біліп, айқын мақсат құруы тиіс және Мемлекет басшысы берген тапсырмалар негізінде баршаңызды бір кісідей жемісті еңбек етуге шақырамын, – деді Ғабит Патшаханұлы.
Жолдаудың басты басымдығы «Тұрмыс сапасын арттыру», педагог мәртебесі, сапалы білім алу жайлы №45 мектеп гимназиясының директоры Роза Пак пікір білдірді.
Ал ҚР Ұлттық Банк өкілі Абылғазы Қалназаров «7-20-25» бағдарламасын тереңірек таныстырып, ғаламтордағы «0-20-25», «5-20-25» атауларымен баспана алуға жасалып жатқан ұсыныстардың мемлекеттік бағдарламаға қатысы жоғын атап өтті.
– Көптеген азаматтар «7-20-25» бағдарламасы бойынша ипотекалық несиені тек 25 жылға алу шарт деп ойлайды. Одан кем немесе артық уақытқа берілмейді деу қателік. 25 жыл – несиенің шекті мерзімі. Ал одан аз төлеймін десе, оны 1 жылға, 5 немесе 10 жылға да азайтуға болады. Несие төлеу мерзімін пәтер алушының өзі белгілейді. Сондай-ақ, негізгі қарызды қайтаруды да белгіленген уақыттан бұрын төлеуге болады, – дейді банк өкілі.
А.Қалназаровтың айтуынша, құны 12 млн теңгеге бағаланған пәтерді 25 жылға сатып алса, ай сайынғы төлем 68 мың теңгені құрайды. Осы соманы 25 жыл бойы төлесе, қорытындысында артық төлем мөлшері 10,7 млн-ды құрайды. Ал 3 жылдан кейін несиені мерзімінен бұрын жабу мүмкін болса, үстеме ақының құны небәрі 1,9 млн теңге болмақ. Есесіне 22 жылдың пайызын төлемейді және алдын ала несиені жабуға Банк тарапынан ешқандай санкция талап етілмейді.
«Өмір сүруге жайлы орта қалыптастыру» тақырыбында өрбіген баяндаманы жиынға қатысушылар ұйып тыңдады. Бұдан кейін қала қауіпсіздігі мен құқық қорғау органдарының жұмысын жақсарту жайына Әл-Фараби ауданы прокурорының орынбасары Қайрат Мұратов тоқталды.
Аудан жастарының атынан ОҚМУ-дың «Басқару және бизнес» факультетінің Баймырза Адамбек есімді 4 курс студенті сөз алды.
– Жастар жылы тарихта жалынды атауымен таңба болып қалуы үшін біз, жастар, білек сыбана еңбек етуіміз керек, – деген жалынды жас аудан әкіміне өзінің ұсыныстарын жеткізді. – Пайдасыз флешмобтар мен жиналыстарға кететін уақытты қаладағы қараусыз ғимараттарды қайта қалпына келтіруге, коворкинг орталықтары мен спорттық клубтарды көбейтуге және уақытты тиімді пайдалануға жұмсасақ дейміз. Сонымен қатар, жас та болса кәсібін ашқан студенттерді салық төлеуден босатса, мұның өзі үлкен қолдау болар еді.
Баймырза Бекайдарұлының «Жаны жақсы ағаның етегін баспа, жолын қу.
Болайын деген баланың бетін қақпа, белін бу» деген ынталы ұранын жиынға қатысушылар қолдап, қол соқты.
Елбасы Жолдауын талдап, талқылаған жиынды аудан ардагері Шерім Медеуов қорытындылады.

Тұрғын үйлі болуға арналған мемлекеттік «7-20-25» бағдарламасы аясында жеңілдікпен несиелеу сертификаттары бойынша әкімдік баспананың бастапқы жарнасы сомасының жартысын субсидиялайды.

DSC 7021

Шымкент қаласының әкімі Ғабидолла Әбдірахымов ұлағатты ұстаздарды кəсіби мерекелерімен құттықтау шарасына қатысты.
Сөзін «Менің анам да мұғалім болып еңбек етті» деп бастаған шаһар басшысы мəртебелі мамандық иелеріне алғыс айтып, алдағы жылы Елбасы Жолдауына байланысты зор бастамалар күтіп тұрғанына жəне келер жыл ұстаздар қауымы үшін табысты болатынына тоқталды.
– Біз - біртұтас қоғамбыз. Миллионды қаламен бірге дамып, өсіп өркендейтін шаһардың тұрғындарымыз. Əртүрлі салаға бөлініп қызмет етсек те, көтерген жүгіміз бір, мақсаты айқын бір ұжымбыз. Шымкент қаласын дамыту бағытында бəріміз бірге жұмыс істейік. Сіздер білім беріп, тəрбиелеген Шымкент жастары Қазақстан халқына қызмет етіп, абыройларыңызды асқақтата берсін! - деді әкім.
Ғабидолла Рахматоллаұлы салтанатты іс-шарада бірқатар ұстазға Қазақстан Республикасының "Білім беру ісінің құрметті қызметкері", сондай-ақ, ҚР Ы.Алтынсарин атындағы төсбелгілерді тағып, Алғыс хат тапсырды.
«Нұр Отан» партиясының қалалық филиалы төрағасының бірінші орынбасары 
Бахадыр Нарымбетов өз құттықтауын жеткізсе, қалалық білім басқармасының басшысы Ақерке Абылайхан 19 мұғалімге Шымкент қаласы əкімінің тапсырмасымен қолға алынған жоба аясында «7-20-25» бағдарламасы бойынша тұрғын үйді жеңілдікпен несиелеуге арналған алғашқы сертификаттарды табыс етті. Тұрғын үйді жеңілдікпен несиелеу сертификаттары бойынша әкімдік баспананың бастапқы жарнасы сомасының жартысын субсидиялайды. Яғни, енді пәтер бағасының бастапқы жарнасының 10%-ын жинап үлгерген ұстаздардың қалалық бюджеттен бөлінетін 10% субсидияны пайдалана отырып, жақын күнде қоныс тойын тойлауға мүмкіндіктері бар.
Естеріңізге сала кетейік, қыркүйек айында қала әкімдігі мен «Баспана» компаниясы арасында меморандумға қол қойылғаннан кейін шымкенттіктерде осындай мүмкіндік пайда болды. Мегаполис басшысы жас отбасылар, мемлекеттік қызметкерлер мен бюджеттік ұйымдардың қызметкерлері үшін бастапқы жарнасы сомасының жартысын жергілікті бюджет субсидиялайтынын айтты. Айта кетейік, қазіргі таңда «7-20-25» бағдарламасына қатысу үшін 38 өтініш келіп түскен. Ондағы несиенің жалпы көлемі 394 миллион теңгені құрайды.

«Кәсіпорындарымызды жаңғыртуға және цифрландыруға бағытталған, өнімнің экспортқа шығуын көздейтін жаңа құралдарды әзірлеп, сыннан өткізу қажет.»

Мемлекет басшысы Н.Ә.Назарбаевтың
Қазақстан халқына Жолдауынан.

d0cbd806870bb626725a333b79dc1be3-small

Мемлекет басшысы Н.Назарбаев 2018 жылғы Қазақстан халқына арнаған Жолдауында «Бүгінде әлем Төртінші өнеркәсіптік революция дәуіріне, технологиялық, экономикалық және әлеуметтік салалардағы терең және қарқынды өзгерістер кезеңіне қадам басып келеді» десе, соның айқын көрінісін 2013 жылдан бері кілем-тоқыма өндірісін жолға қоя алған «Бал Текстиль» ЖШС-інен көруге болады.
Шымкенттің «Оңтүстік» арнайы экономикалық аймағында орналасқан бірнеше өндіріс орындарының арасынан бұл фабриканың тәжірибесі мол, алар асуы биік. Кәсібін түркиялық «Kartal Carpets» компаниясымен бірігіп бастаған басшы Талғат Ысқақовпен жуырда жаңа технологияның мүмкіндіктері мен жеңіл өнеркәсіп жайында сұхбаттастық.
– Талғат Жүнісбекұлы, «Бал Текстиль» - кілемдері отандық өнім болғандықтан ғана емес, еліміздегі №1 кілем өндірісін жолға қойған фабрика. Түркияда жеңіл өнеркәсіптің бұл түрін дамытқан компаниялар өте көп. Бауырлас елден кілем әкеліп сатумен бұған дейін өзіңіз де айналыстыңыз. Ендеше, қазақ жерінде кілем тоқитын цехты ашу жобаңызға кім қолдау танытқаны туралы айтып беріңізші...
– «Kartal Carpets» – түркиялық кілем өндіру нарығында өзіндік орны бар компания. Компанияның кілем және кілем бұйымдарын өндірумен қатар осы өндіріске қолданылатын полипропиленнен жасалатын жіптерді шығарумен де нарыққа аты мәлім. Ондағы технологиялық мүмкіндіктер де жоғары. Жұмысы жақсы жолға қойылған.

– Технология демекші, 250-ге жуық қызметкері бар «Бал Текстиль» кілем-тоқыма фабрикасында қолданылатын технология қандай?
– Кілем өндіру процестері әлемнің түкпір-түкпірінен келген жоғары технологиялы машиналарында жүргізіледі. Атап айтсақ, кілем тоқитын «VAN DE WIELE» машинасы Бельгиядан әкелінсе, пропиленнен жіп шығаруға Германия мен Францияның «Oerlikon Neumag», «Allma Volkmann», «SUPERBA» машиналары қолданылады.

– Әр машинаның қызметіне тоқталып өтіңізші.
– Біздің фабрика 1 жылда 5 млн шаршы метрге дейін кілем бұйымдарын өндіре алады. Ал машиналар шығарылған жылына байланысты түрлі модельдерге бөлінеді. Олардың ішіндегі ең жаңасы ені 5 метрге дейінгі кілемді тоқи алады. «Oerlikon Neumag» Германиялық машинасымен полипропиленнен жіп өндіреді. Оның жылдық қуаттылығы – 4000 тонна полипропилен жіп. «Бал Текстиль» кілемдеріне сұраныстың артуына байланысты қазір бұл станок ішкі қажеттілікті толықтай қамтамасыз ете алмай отыр. Сондықтан болашақта тағы бір станок алу жоспарымыз бар.

– Полипропиленді жіпті фабриканың өзінде өндіру қаншалықты тиімді?
– Германиядан әкелген машинаны орнатып, жіп өндіру жобасын іске қосқанда кілемнің өзіндік құны 20%-ға төмендеді. Оған дейін тоқымаға қажетті жіптерді шетелдерден импорттауға мәжбүр болатынбыз. Қазір жіпті фабриканың өз цехында өндіру шығынды біршама азайтты. Бұл біз тоқыған кілемдерің арзан бағамен сатылуына да ықпал етті.

– Күріш тәрізді түйіршіктелген полипропиленнен жіп өндіру процесінің өзі қызық екен...
– Иә, алдымен «Oerlikon Neumag» машинасынан шығатын жіп талшықтары «Allma Volkmann» машинасында иіріледі. Бір жіп 144 талшықтан құралса, келесісінде 180 талшық болады. Талшық санына қарай олардың сапасы анықталады. Осы талшықтарды түтілместей етіп ширату үшін Франциядан алдырған «SUPERBA» машинасында ширатылады. Мұнда иірілген жіптер 70-1350 С ыстық буға піседі. Ыстық буға піскен полипропиленді жіптер өзінің бастапқы иірімділік қалпын сақтайды және кілем бетіне ауыр зат қойғанда түгі құлап, сынбай бастапқы қалпын сақтайтын болады.

– Ал жіп өндіретін шикізаттың өзін қайдан аласыздар?
– Кілем өндірісінде қолданылатын негізгі шикізат көзі – пропилен. Синтетикалық материал полипропиленнің артықшылығы - ширатымдылығы жақсы. Кілемге кететін шығынды барынша азайтады. Есесіне өнімнің құны төмендейді. Ал табиғи шикізат қатарына мақта және бамбук ағашынан жасалған «JUT» жіп өнімдерін атауға болады. Көлемге табиғи шикізат көбірек қолданылған сайын оның халықаралық ISO 9000, ISO 14000, ГОСТ стандарттарына сәйкестігі арта түседі.

– Талғат Жүнісбекұлы, стандарт туралы айтқанда, «кәсіпорындағы негізгі құжаттардың бірі – кілем өндірісінде қолданылатын мемлекетаралық стандарт ГОСТ 28415-89. Бұл стандартқа сәйкес өнімдер Қазақстан Республикасында ғана емес осы стандарт мойындалған алыс-жақын мемлекеттердің барлығына шығарылады. Сонымен қатар өнімдер, бұйымдар, қызметтер ГОСТ ISO 9001-2011, ГОСТ 7000-80, СТ РК ИСО 9001-2009, ГОСТ 28003-88, ГОСТ 23364-2001, ГОСТ 29332-2006 секілді халықаралық, мемлекетаралық, мемлекеттік стандарттарына сәйкес» дедіңіз. Сонда «Бал Текстиль» кілем-тоқыма фабрикасында өндірілген кілемдер алыс-жақын шетелдерге экспортталатын болғаны ғой?
– Әрине. «Бал Текстиль» ЖШС 2016 жылы шведтің атақты «IKEA» компаниясымен сауда-саттық саласында келісім жасады. Сонымен қатар Ресей, Қырғызстан, Әзірбайжан, Тәжікістан сияқты өз төңірегіміздегі елдермен қатар еуропалық Германия мен Ұлыбритания елдері де қазақ өнімін тұтынуда. Бұл біздің фабриканы сапа арқылы қол жеткізген жетістігі. Өндіріс орны еліміздің барлық аймақтарында фирмалық дүкендер желісін ашып, отандық өнім саудасын жолға қойған. «Бал Текстиль» кілемдері 2014 жылы республикалық «Алтын Сапа» конкурсында «Халық тұтынатын ең үздік тауар номинациясы» бойынша екінші дәрежелі дипломмен марапатталса, 2015 жылы орта бизнес бойынша облыстағы субьектілер ішінде «Ең үздік салық төлеуші» деп танылды. 2016 жылы Женевада өткен халықаралық BID сапа конкурсында «GOLD» номинациясымен жеңіп алды. Ал 2017 жылы республикалық «Алтын Сапа» конкурсында «Халық тұтынатын ең үздік тауар номинациясын» екінші рет иеленді.

– Құтты болсын! «Бірінші жеңіс – сәттілік, екі дүркін жеңіс – мықтылығын мойындату» дейді ғой. Отандық кілемдердің сапалы болуы тек шикізатқа байланысты ма әлде фабрика ұжымының да елеулі үлесі бар ма?
– Қызметкерлер мұнда шығарылатын өнімнің сапасына тікелей әсер ететіндігі айтпаса да белгілі және оларға қойылатын талаптар да жоқ емес. Олар өз ісінің маманы, жауапкершілігі жоғары мамандар. Кадр мәселесіне ерекше мән береміз. Фабриканың дизайнер, технолог, машинист мамандарын жоспарлы түрде шетелге тәжірибе алмасып, біліктілігін арттыруға жағдай жасаймыз. Бұл мамандардың көбін Түркияда оқыттық. Ал бірқатарын шетелден маман алдырып шыңдадық. Бұл үрдісті тоқтатпаймыз. Түркиялық әріптесіміз «Kartal Carpetsтің» тәжірибелі мамандары да бізге бұл бағытта аянбай көмектесіп келеді. Сондай-ақ, фабрикаға диплом алмаған жастарды да тартып, ептілігіне қарай жастар ұйымының қолдауымен мамандыққа баулуды қолға алғанбыз. Бір ғана талап, мамандық алғаннан кейін сол жастар біздің кәсіпорынға жұмысқа тұруы қажет.

DSC 1944

– «Бал Текстиль» кілем-тоқыма фабрикасында қызметкерлерге, жалпы жұмысшы топқа жағдай жасалған ба?
– Кәсіпорын қала сыртында орналасқанымен жұмысшыларды фабрикаға алып келіп, жұмыс соңында үйіне жеткізіп салу үшін арнайы көлік қарастырылған. Яғни, жолға шығындалмайды. Таза су, электр қуаты, жол тағы басқа қажетті дүниелердің барлығы бар. Кәсіпорын ішіндегі асхана күндіз-түні тегін қызмет көрсетеді. Мұндағы қызметтер мен аппараттар адам денсаулығы мен қоршаған ортаның қауіпсіздігін сақтау және жұмыстарды барынша оңтайландыру үшін мүмкіндігінше автоматтандырылған. Тіпті жіп өндіру цехында арнайы медициналық бекет жұмыс істейді. Дінді берік ұстанушыларға кәсіпорынның кез келген бөлімінде намаз оқитын бөлмелер қарастырылған.

– Әр маусымда «Ұлы дала кілемдері» көрмесін ұйымдастырып, өнімдерді жеңілдетілген бағада ұсыну дәстүрі жалғаса ма? Тағы қандай жаңалықтармен тұтынушыларды қуанта аласыздар?
– Көрме жалғасады. Осы қазан айының 10-21 күндері Шымкент қаласы, «Нұрсәт» шағынауданындағы Көрме орталығында «Ұлы дала кілемдерінің» жәрмеңкесін ұйымдастырғалы отырмыз. Ал фабрика өндірісін кеңейту мақсатында жақында тағы да жаңа технологиялық өзгерістер болады. Кілемнің қазіргіден де сапалы түрлерін тоқитын станоктарға тапсырыс бердік. Оны орнатып, іске қосқан соң «Бал Текстиль» кілемдерінің сапасы бүгінгіден де арта түседі. Сонымен қатар Д.Қонаев даңғылындағы «Астана» бизнес орталығының 2-қабатынан фирмалық «Elexus» жоғары сапалы кілемдер дүкенін аштық. Мұнда шетелден келетін қымбат кілемдерді сатумен қатар кеңселерге, балабақша, мектеп, мешіт, мейрамхана сынды ауқымды нысандардың дәлізіне, бөлмелеріне кең көлемде тапсырыс беруге болады. Енді тұтынушылар көп мөлшердегі кілем өнімдеріне фабрикаға келмей-ақ, қала орталығындағы дүкенге барып тапсырыс жасай алады.

– Әңгімеңізге рахмет! Отандық өніміміз арта берсін!

DSC 1910

«ШК»-анықтама

Талғат Ысқақов 1968 жылы 3 мамырда қазіргі Түркістан облысы, Бәйдібек ауданы, Жамбыл совхозы, Жүзімдік ауылында дүниеге келген. 1984 жылы Шаян ауылы Ленин атындағы орта мектепті бітіріп, Жамбыл совхозында шопанның көмекшісі болып жұмыс атқарған. 1986-1988 жылдары Қарулы күштер қатарында әскери қызметін атқарып, 1988-1994 жылдары Шымкент қаласындағы Қ.А.Яссауи атындағы Қазақ-Түрік университетінде «Қазақ тілі мен әдебиеті пәндерінің мұғалімі» мамандығы бойынша білім алған. Еңбек жолын қарапайым мұғалім болып бастаған Талғат Жүнісбекұлы кәсіпкерлік салаға 1994 жылдан бастап бет бұрған. Жұбайы Бибідүрия Қалтаевамен 4 перзент тәрбиелеп өсірген Бәйдібек ауданының «Құрметті азаматы» бүгінде түрлі қайырымдылық шаралардың демеушісі ретінде де танылып жүр.

Шымкент қаласы әкімдігінің жаңа ғимаратында мәслихаттың кезектен тыс XXXVII сессиясы өтті. Жиынға қатысқан шаһар басшысы  Ғ.Әбдірахымов құрылыс саласында жеке кәсіпкерлігі бар депутаттарды жаңа мектеп жобасына атсалысуға шақырды.

 DSC6403

Жаңа ғимаратта алғаш рет бас қосқан мәслихат отырысына Ерлан Омаров төрағалық етіп, күн тәртібінде қаралатын бірқатар мәселені ортаға салды. Бірінші кезекте республикалық маңызға ие болған Шымкент қаласының 2018-2020 жылдарға арналған бюджетіне өзгерістер енгізу жайы қаралды. Бұл туралы қала әкімінің орынбасары Г.Құрманбекова баяндама жасап, республикалық бюджеттен қарастырылатын қаражаттың жұмсалу жоспарын таныстырды.
– Депутаттық сауалға сәйкес, жергілікті бюджетке де өзгерістер енгізіліп, қаражаттың негізгі бөлігі облыс меншігінен қабылданған 99 мекемені ұстауға, әлеуметтік маңызы бар автобус бағыттарын субсидиялауға, жаңадан ашылған «Shymkent» әлеуметтік-кәсіпкерлік корпорациясы» АҚ басқармасын қалыптастыруға, қала ішіндегі жолдар мен жылу жүйесінің ағымдағы жөндеуіне, сондай-ақ, қала шетіндегі шағынаудан көшелеріне тас төсеуге қаралып отыр, – деді Гүлжан Мамытқызы.
Қала мәслихатының депутаттары аталған өзгерістерді бір ауыздан қолдады.
Сессия барысында қайта құрылған қалалық ішкі істер басқармасын қаржыландыруға қосымша 215 млн теңге қаржы бөлу мақұлданды.
Бұған дейін Оңтүстік Қазақстан облысы мен Шымкент қаласының мемлекеттік-жекешелік әріптестік аясында 10 жоба іске асуы тиіс болған-ды. Депутаттар Шымкент шаһарының жаңа мәртебе алуына байланысты бұл жобаларды қалаға енгізу туралы шешім қабылдады.
Сондай-ақ қала əкімдігі жанынан құрылатын бірнеше комиссияның құрамы бекітілді.
Сессия соңында қала әкімі Ғ.Əбдірахымов сөз алып, мəслихат сессиясы əкімдіктің жаңа ғимаратында алғаш рет өтіп отырғанын еске салып жиынға қатысушыларды құттықтады.
– Бұл ғимаратта халқымыздың әлеуметтік жағдайын көтеретін адал шешімдер қабылданады деп сенемін және солай болуын тілеймін. Біз бұған дейін де көптеген жұмыстарды атқардық. Дегенмен алдағы мақсат пен міндеттеріміз кешегіден де маңызды, жауапты. Шымкент қаласы мəслихатының кезектен тыс XXXVII сессиясында қаланың дамуына үлкен серпін беретін мәселелер қаралды. Енді «Shymkent» әлеуметтік-кәсіпкерлік корпорациясы» АҚ басқармасының жұмысы жолға қойылады. Сонымен қатар, қалада талай жылдан бері өзекті болып отырған маршруттардың мәселесі оң шешімін табады, – деді Ғабидолла Рахматоллұлы. – Қала мәслихатының шешіміне сәйкес енді шеткі елдімекендерден орталыққа қатынайтын әлеуметтік маршруттар субсидия есебінен қаржыландырылады. Биыл қалаға 300 автобус алу туралы келісім жасадық. Ал келесі жылы тағы 700 автобус алуға қала мәслихатының шешімімен қол жеткіздік. 
Қала әкімінің айтуынша, қазіргі таңда қалада жүрген 1000 автобусқа тағы жаңа 1000 автобус қосылады. Таяуда ғана шаһардың шеткі елдімекендерінен орталығына қатынайтын 10 жаңа бағыттағы маршруттар ашылғаны белгілі. Енді автобустар саны көбейсе, қоғамдық көлікке қатысты бірқатар мәселенің оң нәтижесін көретін күн де алыс емес.
Қала әкімі республикалық маңызы бар шаһардың әкімшілік-мемлекеттік қызметкерлері қазан айынан бастап жаңа жалақы жүйесіне көшетінін мәлімдеді.
– Келесі жылдан бастап қала қауіпсіздігін қамтамасыз ететін полиция қызметкерлерінің жалақысын көтеруді де жоспарлап отырмыз. Бұл да Шымкент тұрғындарына жайлы жағдай жасауға қызмет ететін сала мамандарын, құқық қорғаушыларды қолдау мақсатында жүзеге асады, – деді қала әкімі.

Жаңа 12 мектеп және Д.Қонаев гүлзары

Шаһар басшысы үш ауысымдық мектепке байланысты тағы бір өзекті мәселені қозғады. Жаңа 2018-2019 оқу жылының 1 сыныбына 24 мың оқушы қабылданған. Демографиялық өсімнің тұрақты дамуына орай Шымкентте 20 мың орындық мектеп қажет екендігін айтты.
– Қаладағы үш ауысымда оқу жүйесін толығымен жабу үшін бізге тағы 12 жаңа мектеп керек. Қазір бұл қажеттілікке байланысты 10 мектепке республикалық бюджеттен қаржы қаралуда. Ал 2 мектеп құрылысын қала бюджетінен қаржыландыруды жоспарлап отырмыз. Сонымен қатар, қаладағы 30 мектептің жанына қосымша ғимарат салу жобасына кәсіпкерлермен келліссөздер жүргіземіз. Бұл жобаға қала мәслихатының депутаттары қатарындағы кәсіпкерлерді де шақырамын, – деді
Ғ.Әбдірахымов.
Сөз соңында қала әкімі қаржыландырудың түрлі бағытын дамыту маңызына тоқталды.
– Қаржыландыру көзін тек бюджеттен күтіп отырмай, инвестициялық жобаларды дамытуға және қала бюджетіне түсетін кіріс көзін арттыруға болады. Шымкенттің қазіргі таңдағы кірісі 80 млрд теңгені құраса, оны екі есеге дейін ұлғайтуға мүмкіндік бар. Салық органдары мен құқық қорғаушылар бірқатар бизнесті көлеңкеден шығаруда бізбен бірге жұмыс істейді деп сенемін, – деді шаһар басшысы.
Сессияны қорытындылаған қала әкімі Ғ.Әбдірахымов Д.Қонаев атындағы даңғылдың құрылысы жалғасатынын айтып, түрлі бастамалар мен ұсыныстарға қолдау білдіргендері үшін мәслихат депутаттарына алғысын білдірді.

Страница 9 из 37