Шымкент келбеті

Шымкент қаласының әкімі Нұрлан Сауранбаев жаңадан тағайындалған орынбасарын таныстырды. Қала әкімінің өкімімен Шымкент әкімі орынбасары лауазымына Мәуленқұлов Ғабит Патшаханұлы тағайындалды.

Ғабит Патшаханұлы 1977 жылы 22 наурызда Созақ ауданында дүниеге келген. Білімі – жоғары, заңгер.

Еңбек жолы 2000 жылы Атырау қаласындағы Каспий экологиялық прокуратурасының маманы ретінде бастады. Одан кейін Қазақ-стан Республикасы Жоғарғы соты аппаратында қарапайым референт болып бастап, түрлі жылдар арасында бөлім меңгерушісі лауазымына дейін жоғарылаған.

2016 жылдың шілдесінен бүгінгі таңға дейін Шымкент қаласы Қаратау ауданының әкімі қызметін атқарып келді.

Шымкентте қалалық қоғамдық кеңестің отырысы өтті.

Онда шаһар әкімі Нұрлан Сауранбаев 2017 жылы атқарылған жұмыс жайлы есеп берді. Мегаполистегі жұмыстың қорытындысы мен алдағы жоспар туралы баяндады.

Қала әкімінің айтуынша, былтыр қала бюджетінің көлемі 131 миллиард теңгені құрап, 99,9%-ға игерілген. Негізгі капиталға тартылған инвестиция көлемі 206 миллиард теңгені құрады. 4310 отбасы «Нұрлы жер» бағдарламасы аясында баспаналы болды. Сондай-ақ, елдімекендерді коммуналды инфрақұрылыммен қамтамасыз ету бағытында ауқымды жұмыс атқарылған.

Нұрлан Сауранбаев, бұған қоса, Шымкентте 2020 жылғы ТМД елдерінің мәдени астанасы жылына дайындық күшейтіліп, бірқатар мәдени іс-шаралар ұйымдастырылғанын жеткізді.

Сондай-ақ, жиын барысында қалалық мәслихаттың хатшысы Н.Бекназаров қалалық мәслихаттың былтыр атқарылған жұмысы туралы есеп берді.

Бұдан кейін қоғамдық кеңестің төрағасы М.Битеміровтың құрылымның 2017 жылғы жұмысы жайлы баяндамасы да тыңдалды.

Биыл Шымкент қаласы бойынша жұмыссыз ретінде тіркелген 6 мыңға таяу азамат бос жұмыс орындарына жолданбақ. Өткен 4 ай мерзімінде 2 мың адам жұмысқа орналасқан.

Қалалық мәслихат хатшысы Нұрлан Бекназаровтың төрағалығымен өткен Қоғамдық кеңес мәжілісінде саланың бүгінгі ахуалы сараланды. Қалалық халықты жұмыспен қамту және әлеуметтік бағдарламалар бөлімінің басшысы Бауыржан Қуанышбековтің айтуынша, жұмыссыздық деңгейінің көрсеткіші 5,3 пайызды құрайды. Бұл бағытта азаматтарды кәсіптік негізде оқыту, шағын несиемен қамту, қоғамдық жұмыстарға жолдауға негізгі басымдық берілмек.

Сондай-ақ, күн тәртібінде қалалық ішкі саясат бөлімінің «Жастар ресурстық орталығы» КМК-нің директоры Абзалбек Убелтаев мемлекеттік жастар саясатының жүзеге асырылу барысын баяндады. Нақты дерек бойынша, қаладағы 14 пен 29 жас аралығында азаматтардың саны 240 мыңнан асады. Бұл – жалпы қала тұрғындарының 27 пайызы. Осы орайда, жас отбасыларды тұрғын үймен қамту, салауатты өмір салтын қалыптастыру, қоғамдық белсенділігін арттыру, жұмыспен қамту және кәсіпкерлікке баулу – мемлекеттік саясаттың негізгі басымдығы болуда.

Өз кезегінде, сала басшысы жастар арасында WhatsApp әлеуметтік желісі арқылы арнайы чат ашылып, «Шымкент – қауіпсіз қала» акциясына қолдау көрсетіліп жатқанын жеткізді. Сондай-ақ, өз жобаларын жүзеге асыру үшін де жастардың жеке ғимаратқа зәру болып отырғаны Қоғамдық кеңес мүшелерінің талқылауына ұсынылды.

Жасөспірімдерді қоғамдық қызметке тарту, белсенділігін ынталандыру – негізгі үш бағыт бойынша жүзеге асырылмақ. Мемлекеттік жастар саясатын жүзеге асыру барысындағы жоспарлы жұмыстардың жай-күйі қала әкімі Ғабидолла Әбдірахымовтың төрағалығымен өткен әкімдік мәжілісінде кеңінен талқыланды.

Жиында қалалық ішкі саясат бөлімінің басшысы Қанат Қалыбеков негізгі үш бағыт бойынша іс-шаралар жоспары түзілгенін мәлім етті. Яғни, алғашқы бағыт – бұқаралық спортты дамыту, білім беру мекемелеріндегі жастарды қолдауды көздесе, екінші бағыт – жастар арасында қылмыс пен құқықбұзушылықтың алдын алуды, үшіншісі – жұмыссыздықтың алдын алу, кәсіпкерлікті дамытуға бағытталмақ. 

– Қала аумағында жалпы саны 240 мыңнан астам жас тіркелген, – деді Қанат Жұмағұл-ұлы. – Бұл – қала халқының 27 пайызын құрайды. Әлеуметтік жағдайын жақсарту мақсатында тек өткен жылда 216 жас отбасы тұрғын үймен қамтылды. Жұмыссыз ретінде тіркелген 4212 жастың 2454-і тұрақты жұмысқа орналасты.

«I-mektep» құқықбұзушылық деңгейін төмендетеді

Жиында өзекті мәселе ретінде жасөспірімдер арасындағы құқықбұзушылық деңгейінің көрсеткіштері сараланды. Атап айтқанда, өткен жылдың алғашқы 2 айында кәмелеттік жасқа толмағандар қолымен 30 қылмыс жасалған болса, биыл есепті мерзімде 48 қылмыс тіркелген. 

Өзекті мәселенің шешімін табу орайында, қала әкімдігі жуырда «I-mektep» электронды журналын пилоттық жоба ретінде іске қосқан еді.

Әкімдіктің прокуратура және полиция қызметкерлерімен бірлесіп әзірлеген электрондық бақылау жүйесі ендігі жерде еліміздің өзге өңірлерінде де тәжірибеге енгізілмек. Аталмыш пилоттық жобаны жүзеге асыруды ҚР Парламентінің депутаттары ұсынып отыр.

Қазіргі таңда «I-mektep» электронды жүйесі оқушылардың үлгерімі мен сабаққа қатысуын бақылау бойынша қала аумағындағы 29 мектепте жұмыс істеуде. Қалалық жергілікті полиция қызметінің басшысы Данияр Мейірханның айтуынша, электронды бақылау жүйесі оқушылардың үлгерімін арттыруға толық мүмкіндік береді.

– Оқушылардың сабаққа жүйелі түрде қатысуы – қылмыстық жағдайдың алдын алуда маңызды орын алады, – деді Данияр Мейірхан. – Бұл жүйе өз кезегінде, біздің ұзақ жылдар бойы атқарып келген қызметімізді едәуір жеңілдетіп, құқықбұзушылық деңгейін төмендетуге айтарлықтай септігін тигізуде.

Шымкент қаласының мектептерінде қолданысқа енген аталмыш пилоттық жүйе ҚР Білім және ғылым министрлігі мен Ішкі істер министрлігі тарапынан зерделеніп, ел аумағындағы өзге де орта мектептерде жүзеге аспақ.

Шымкентте жасөспірімдер спорт лигасы құрылады

Жастар арасындағы қылмыс пен құқықбұзушылық деңгейін төмендетудің бірден-бір жолы – салауатты өмір салтын қалыптастыру және бұқаралық спортты дамыту. Осы орайда, қала әкімі Ғабидолла Әбдірахымов спорттық ойын түрлерінен жастар спорт лигасын құруды ұсынды.

– Түрлі командалық спорт түрлері бойынша мектеп лигасын құрып, оны қаржыландыруда қаладағы ірі кәсіпкерлерді демеуші ретінде тартуға болады, – деді Ғабидолла Рахматоллаұлы. – Жеңімпаз деп танылған команда мүшелерін бағалы сый-сияпатпен марапаттап, Астана немесе Түркия қалаларына саяхаттауына мүмкіндік жасауымыз керек.

Ол үшін жастардың қоғамдық қызметтерге белсенділігін арттыру және оларды жүйелі ақпараттандыру мақсатында әлеуметтік желілерді кеңінен пайдаланып, түрлі бағыттағы флешмобтарды ұйымдастыру күн тәртібіндегі алғашқы мәселе болмақ.

– Салауатты өмір салты және ізгі бастамалар трендке айналуы тиіс, – деді Ғ. Рахматоллаұлы. – Кеңес заманында, қарт адамдарға жәрдем қолын соза білген «тимуршылар» қызметін қазір де жандандыру керек. Бүгінгі идеология ретінде жастарға осындай бастамаларды ұсына аламыз.

Сондай-ақ, жиында ОҚМУ-нің ғимаратына қарсы бетте орналасқан, «Гарант» аталатын дүкен маңында ұялы телефондарды саудалаумен айналысатын азаматтардың мәселесі де сөз болды. Бұл орайда, қала әкімі жауапты сала мамандарына аталмыш орында бей-берекет әрекеттерді шектей отырып, ұялы телефондарын саудалаушы азаматтар үшін өз алдына жеке ғимаратты пайдалануға беруді тапсырды.

Жиынды қорытындылаған қала әкімі Ғ. Әбдірахымов күн тәртібіндегі мәселелердің өзектілігіне тоқталып, сала мамандарына нақты міндеттер жүктеді. Берілген тапсырмалардың орындалу барысын өз қадағалауына алатынын жеткізді.

Шымкент қалалық мәслихаты аппараты қала ардагерлері және зиялы қауым өкілдерімен кездесу ұйымдастырды. Жиында қаланың экономикалық-әлеуметтік ахуалы сарапталып, мәслихаттың, депутаттық корпустың жұмыс жоспары зерделенді. Қала шаруашылығына қатысты ұсыныс-пікірлер айтылып, мемлекеттік бағдарламалардың орындалу барысы таныстырылды. ҚР Президенті Н. Назарбаевтың 31 қаңтардағы: «Қазақстанның үшінші жаңғыруы: жаһандық бәсекеге қабілеттілік» атты Жолдауы және еліміздің Конституциясына енгізілген өзгерістер мен толықтырулар кеңінен талқыланды. Жиынды қалалық мәслихат хатшысы Нұрлан Бекназаров жүргізіп отырды.

– Өткен жылда қалалық мәслихат 14 сессия өткізді. Онда жалпы саны 170-тен астам мәселе қаралыпты. Мегаполис қаланың бүгінгі бюджеті 110 миллиард теңгеге толығып, халық саны 930 мыңға жетті. Ендігі жерде, аға буын өкілдерімен ұдайы бірлесе, кеңесе отырып, қаладағы шалғай орналасқан елдімекендердің әлеуметтік ахуалын көтеру – негізгі міндет, – деп атап өтті қалалық мәслихат хатшысы Нұрлан Құдиярұлы.

Басқосуда сөз алған қалалық ардагерлер кеңесінің төрағасы Исамудин Рысбай жиынға шақырылған ардагерлер мен зиялы қауым өкілдерін таныстырды. ҚР «Құрметті журналисті», «Дүниежүзі қазақтары қауымдастығының» ОҚО аймақтық филиалының төрағасы, «ОҚО құрметті азаматы» Байдулла Қонысбек қалалық мәслихат депутаттарын қала бюджетінің иегерілуі, қала тазалығы, көп қабатты үйлердің аулалары мен алаңшаларын абаттандыруға баса көңіл бөлуге шақырды. Ал Еңбек ардагері, «Шардара ауданының құрметті азаматы» Өстемір Тілеген қаламыздың коммуналдық шаруашылығы, оның ішінде көгілдір газ бағасының негізсіз шарықтап кеткендігін, яғни басқа қалалармен салыстырғанда өте жоғары екендігін жеткізіп, мәселені реттеуді ұсынды. Бұдан бөлек, «Шымкент қаласының құрметті азаматы», ҚР «Құрмет Грамотасының» иегері Дәметер Бөлегенова, ҚР мәдениет қайраткері, Қазақстан журналистер одағының мүшесі, білім саласының үздігі, «Созақ ауданының құрметті азаматы» Мыңжасар Асқаров, «Шымкент қаласының құрметті азаматы», милиция генерал-майоры Жеңісбай Сұлтанов өз ұсыныс-ойын жеткізіп, бірқатар өзекті мәселелердің оң шешім табуына депутаттардың ықпал етуін сұрады. 

Өз кезегінде, қалалық мәслихат хатшысы Н. Бекназаров ардагерлер мен зиялы қауым өкілдерінің айтқан ұсыныстары қараусыз қалмайтынын, тиісті құзырлы органдарға депутаттық сауалдардың жолданатынын жеткізді. Жолданған сын-ұсыныстар қалалық мәслихат аппаратының тұрақты бақылауына алынбақ.

Еркін пікір алмасу жағдайындағы мұндай жиындар алдағы уақытта дәстүрлі түрде жалғасын табады.

Аауылшаруашылығы өнімдері қала тұрғындарының қажеттілігін толық қамтамасыз етуі тиіс. Бұл жөнінде қала әкімі Ғабидолла Әбдірахымовтың төрағалығымен өткен мәжілісте кеңінен талқыланды.

Алдымен қала әкімі күн тәртібіндегі түйткілді мәселелерге тоқталды.

– «Шаңырақ» бағдарламасы аясында апатты жағдайдағы есі үйлер көп ұзатпай бұзылуы тиіс. Істі тездетпеген жағдайда тұрғындардың қауіпсіздігіне нұқсан келтіретін үлкен мәселелер орын алуы мүмкін, – деді Ғабидолла Рахматоллаұлы. – Сондай-ақ, Түркістан көшесінің бойындағы көлік және аяқжолдар күрделі жөндеуді қажет етеді. Дегенмен, «Қырғы базар» маңындағы көлік жолдарының аралығына темір қоршаулар орнату арқылы жүргіншілердің қауіпсіздігіне байланысты бірқатар өзекті мәселелер шешімін тапқаны байқалып отыр. Ал ирригация жүйелер ретке келтіру жұмыстарында әлі де олқылық бар. Қала тазалығы мен көгалдандыру бағытындағы негізгі міндеттерді наурыз айында жүзеге асыруды тапсырамын.

Күн тәртібіне сәйкес, ауылшаруашылығы саласындағы қызмет сапасын мейлінше жетілдіру жайы талқыланды. Көлемі 117 мың гектарды құрайтын Шымкент қаласының аумағындағы ауылшаруашылық жерi – 62,219 мың гектар. 38 мың гектар аумаққа елдiмекендер орналасқан. Жалпы, облыс орталығында ауылшаруашылық өнімдерін өндірумен айналысатын 4 152 кәсіпкер тіркелген.

Жиынды қорытындылаған қала әкімі Ғ. Әбдірахымов күн тәртібіндегі мәселелердің маңызы жоғары екенін айта келе, алдағы уақытта тиісті жұмыстардың атқарылатынын жеткізді. Сонымен қатар, сала мамандарына нақты міндеттер жүктеп, орындалу барысын өз қадағалауына алатынын айтты.

Қала әкімдігінің мәжіліс залында Ғ. Әбдірахымовтың төрағалығымен кезекті жиын өтіп, онда көпқабатты ғимараттардың қауіпсіздігін қамтамасыз ету және жылжымайтын мүліктерді қайта заңдастыру жайы талқыланды.

Мәжіліс басында қала әкімі Ғ.Әбдірахымов әкімдіктің «фронт-офисі» бұдан былай «Халық кеңсесі» деп аталатынын хабарлады. Мұндай ұсынысты қала тұрғындары жасаған. Бұдан кейін қалалық тұрғын үй коммуналдық-шаруашылық бөлімінің басшысы Т.Қасымбеков көпқабатты ғимараттардың қауіпсіздігін қамтамасыз ету туралы баяндама жасады. Бөлім басшысының айтуынша, Шымкент қаласы сейсмоқауіпті аймақта орналасқан. Қаладағы көпқабатты тұрғын үйлердің көбі 50-60 жыл бұрын салынғанын ескере келе, бұл ғимараттар сейсмонығайту жұмыстарын қажет ететінін айтты. Әсіресе, олардың басым бөлігі қала орталығына жақын жерден орын алған. Мамандар сейсмонығайтуды қажет ететін аудандарға жаңа тұрғын үй салу жобасын қолға алуды ұсынды. Бүгінгі таңда қала тұрғындарынан көпқабатты үйлердің қауіпсіздігін арттыру, яғни сейсмонығайту жұмыстарын жүргізу мақсатында көптеген өтініштер тіркелуде. Мәселен, қазіргі кезде көпқабатты 140 тұрғын үй сейсмикалық зерттеуді қажет етеді және келесі екі жылда 90 үйге сейсмонығайту жұмыстарын өткізу жоспарланған.

Мәжілісте Төтенше жағдайлар басқармасының бастығы М.Жақсыбаев қала аумағында бірнеше көпқабатты тұрғын үйдің апатты жағдайда тұрғанын мәлімдеді. Атап айтқанда, Түркістан көшесіндегі №14, Абай даңғылындағы №9, Қазыбек би көшесінде орналасқан «Адвокаттар үйі» және Жылқышиев көшесіндегі №28 үй апатты деп танылды. Дегенмен, аталған үйлерге байланысты әлі толық шешім шыққан жоқ. Баяндамашыларды тыңдағаннан кейін Ғ.Әбдірахымов бұл бағыттағы жұмыстарды жандандыруға тапсырма берді.

Жиын соңында қала әкімдігі аппараты Заң бөлімінің басшысы А.Қайыпов жылжымайтын мүлікті заңдастыру жұмыстарының нәтижесі туралы есеп берді. Оның айтуынша, мүлікті жария ету бойынша Шымкент қаласының тұрғындарынан барлығы – 4 729 өтініш келіп түскен. Бұл өтініштердің 3 607-сі мақұлданып, 1 122-сі жылжымайтын мүлікті жария етуден бас тартылған. Жария етілген мүліктердің жалпы сомасы шамамен 44 млрд теңгені құрады.

ҚР Президенті Н. Назарбаевтың халыққа арнаған «Қазақстанның үшінші жаңғыруы: жаһандық бәсекеге қабілеттілік» Жолдауын талқылау бойынша облыстық ақпараттық-насихаттық топтың қала активімен кездесуі өтті. Жиынға қалалық бөлім басшылары, мәслихат депутаттары, үкіметтік емес ұйым өкілдері мен жастар ұйымдарының мүшелері қатысты.

Жиында баяндама жасаған облыс әкімінің бірінші орынбасары, облыстық ақпараттық-насихаттық топ жетекшісі Дархан Сатыбалды бұл стратегиялық құжаттың мемлекеттің өркендеуіне негіз қалайтынын айта келе, оның ішінде аймақтың дамуына жол ашатын басым бағыттарына кеңінен тоқталды.

– Еліміздің тарихи жаңа белесін бастаған маңызды құжатта Президент дамудың жаңа бағыттарын белгілеп берді. Онда, әсіресе, ұлттық экономиканы көтеруге ерекше көңіл бөлінді. Осыған сәйкес, агроөнеркәсіп саласын дамытуға, өңірге тартылған инвестициялар көлемін 2020 жылға қарай 14,5 пайыздан 25 пайызға дейін ұлғайтуға басымдық беріледі. Бұл үшін өңірдің барлық аудан-қалаларында инвесторлармен жұмыс істейтін арнайы мобильді топтар құрылды. Осы арқылы өңірдің экспорт айналымын еселеуге нақты жоспарлы қадам жасалуда, – деді Дархан Амангелдіұлы.

Елбасымыздың биылғы Жолдауында бизнес-ортаны түбегейлі жақсартуға және кеңейтуге, елімізде инвестициялық климатты нығайтуға, жаппай кәсіпкерлікті қолдау тетіктерін одан әрі жетілдіруге, соның ішінде отбасылық кәсіпкерлікті дамыту бағытында кешенді шаралар жүргізу қажеттігіне басымдық беріліп отыр. Бұл тұрғыда өңірде дамыған елдердің озық стандарттары мен тәжірибесін енгізу арқылы жүйелі жұмыстарды қолға алу қажеттігі нақтыланды.

Келелі кеңесте сөз алған облыстық ақпараттық-насихаттық топ мүшелері ОҚМПИ-ның Қазақстан тарихы және қоғамдық пәндер кафедрасының доценті, тарих ғылымдарының кандидаты Қайрат Сапарханұлы, қалалық мәслихат хатшысы Нұрлан Бекназаров, облыстық жұмыспен қамтуды үйлестіру және әлеуметтік бағдарламалар басқармасының басшысы Әсия Темірбаева Елбасы Жолдауындағы басым бағыттарды атап өтті. 

Жиынды қала әкімі Ғ. Әбдірахымов қорытындылады.

– Жолдауда негізінен кәсіпкерлікті дамыту, жұмыспен қамту сынды әлеуметтік салаларға басымдық берілген. Жұмыссыз жастардың қатарын азайту мақсатында мемлекет өз тарапынан ниетті азаматтарды кәсіпкерлік саласына баулып, ол үшін 16 миллион теңгеге дейін микронесие де ұсынуда. Тұрғындар саны 1 миллионға жуықтайтын Шымкент қаласында инвестиция тартудың мүмкіндігі де жоғары. Ендігі жерде, Елбасының алға қойған мақсат-міндеттерін жүзеге асыруда бірлесе қызмет атқарғанымыз жөн, – деді Ғабидолла Рахматоллаұлы. 

Ақпараттық-насихат топтары Елбасы Жолдауын халық арасында кеңінен түсіндіру шараларын жүргізетін болады.

Елбасы Н. Назарбаевтың «5 институционалдық реформаны жүзеге асырудың 100 нақты қадамы» Ұлт жоспарының 32-қадамы  бойынша  «Қылмыстық құқық бұзушылықтар картасы» интернет-порталын құру жөнінде тапсырма берілген болатын. Президенттің осы тапсырмасын орындау аясында ҚР Прокуратурасы «Қылмыстық құқық бұзушылық картасы» интернет-порталын іске қосты.

Кеше Шымкент қаласы әкімдігінің үлкен мәжіліс залында жаңа жобаның таныстырылымы өтті. Жиынға Шымкент қаласы әкімінің орынбасары Қайрат Нұртай, Құқықтық статистика және арнайы есепке алу жөніндегі комитетінің Оңтүстік Қазақстан облысы бойынша басқармасының басшысы Асқар Сапарғалиев, орта білім беру мекемелерінің директорлары және құқық қорғау саласының қызметкерлері қатысты.

– Бұл жоба қолданыстағы «Қылмыстылық картасы» ақпараттық сервисінің негізінде жүзеге асырылады. Сотқа дейінгі тергеп-тексерудің бірыңғай тізілімінде тіркелген қылмыстық құқықбұзушылықтар туралы мәліметтер порталға тұрақты түрде енгізіліп тұрады. Қазіргі уақытта «Қылмыстылық картасы» сервисі барлық облыс орталықтарында, Астана, Алматы қалалары мен 19 моноқалада жұмыс істеп тұр. Әлі де жобаны толыққанды жүзеге асыру үшін 8 моноқала мен 250-ден астам аудан орталықтарында осындай жағрафиялық карта құру жоспарланған, – деді Асқар Сапарғалиев.

Таныстырылым барысында ақпараттық сервисі арнайы LED-экран арқылы тәжірибе жүзінде көрсетілді. http://service.pravstat.kz электронды мекен жайына тіркелген кез келген азамат сервис қызметін пайдалана отырып, республиканың қай ауданында, қай көшесінде қашан, қандай оқиға орын алғанын анықтай алады. Тіпті, сервис қызметін ұялы телефонға жүктеп алуына да мүмкіндік бар. Аталмыш жоба қылмыс жағдайының ашықтығын қамтамасыз етіп, тұрғындарды болуы ықтимал қауіп-қатерлерден сақтандыруға мүмкіндік бермек.

Шымкент қаласының әкімдігінде өткен Қоғамдық кеңес мәжілісінде қала әкімі Ғабидолла Әбдірахымов 2016 жылы атқарған жұмыстары бойынша есеп берді. Әкім облыс орталығының дамуы мен еліміздің үшінші мегаполисіндегі өмір сүру деңгейін жақсарту туралы сөз етті.

Оның айтуынша, аталған кезеңде «Нұрлы жол» және «Өңірлерді дамытудың 2020 жылға дейінгі бағдарламасы» шеңберінде 64 көпқабатты тұрғынүй салынған (3777 пәтер). Одан бөлек, 32 тұрғынүй кешені (996 пәтер) «Қазақстан ипотекалық компаниясы» мен «Бәйтерек development» АҚ қолдауымен пайдалануға берілді. Нәтижесінде 1302 отбасы баспанамен қамтамасыз етіліп, 35 отбасы жатақханаға орналастырылды. 52 жобаның іске асуы үшін 20 миллиард теңге бөлініп, оның 27-сі пайдалануға берілді. Көлік инфрақұрылымын дамыту үшін 13 миллиард теңге игерілді, 2015 жылмен салыстырғанда қаржыландыру 6,7 миллиард теңгеге көбейген.

– Өнеркәсіп өндірісінің көлемі 327 миллиард теңгені құрап, 4 %-ға

өсті, – деді әкім. – Ауыл шаруашылық өндірісінің көлемі 3  % құраса, құрылыс жұмыстарының көлемі  14 %-ға, ал пайдалануға берілген тұрғынүй саны 23 %-ға  өскен.

Қала әкімі өткен жылы атқарған есебінен кейін Қоғамдық кеңес мүшелерінің сұрақтарына жауап берді.

Мәселен, «Шымкент келбеті» және «Панорама Шымкента» газеттерінің бас редакторы Айгүл Қапбарова қаланың жасыл желекке айналуына байланысты сауал қойды. Ғабидолла Әбдірахымов таяуда Шымшаһарда Қырым қайыңы мен талшын ағаштары отырғызылатынын хабарлады, мұндай мәңгі жасыл көшеттер қала тұрғындарын тек жазда ғана емес, қыста да қуантатынын жеткізді.

– Қылқанжапырақты ағаштарға байланысты айтар болсақ,

орталықтағы көшелерге біздің жергілікті ауа райына әбден бейімделген шынар ағаштарын отырғызудамыз. Әсіресе, биыл күрделі жөндеуден өткізілетін Байтұрсынов көшесінің бойын шынар ағаштарымен абаттандыру жоспарда тұр. Бұл көшедегі 900-дей қара ағаш басқа көшелерге көшіріледі, -деді әкім.

Облыстық орыс театрының бас режиссері Игорь Вербицкий жарнама ілетін орын берілуін өтінді. Әкім өз жауабында мәдени мекемелер – театрлар мен цирктер, сонымен қатар зоопарк те өткізіп жатқан іс-шараларын қаланың қақ ортасындағы жарнама билбордтарына ілуіне болатынын жеткізді.

Ғ.Әбдірахымовтың айтуынша, қала бойынша аялдамалар мен таксопарктер мәселесі реттелетін болады. Нақтырақ айтсақ, такси тұрақтары жойылмайды, еуропалық стандарттарға сай қайта салынады. Ол тұрақтарға тек тіркелген автокөліктер ғана кіре алады.

Өз кезегінде қалалық Қоғамдық кеңес төрағасы Мұхтар Битеміров 2016 жылы 12 мәжіліс өткізіліп, онда 20 нормативтік-құқықтық актілер мен жобалар қаралып, 1 қоғамдық тыңдау, 15 мемлекеттік орган басшыларының есептері тыңдалғанын айтты. Қоғамдық кеңесте қаладағы қоғамдық-әлеуметтік мәселелер  қаралып, жауапты мемлекеттік мекемелерге міндетті түрде назарға алуға жіберілген. Айта кететін ауқымды жұмыстардың бірі Шымкент қаласы Қоғамдық кеңесінің отырысында кеңес тарапынан Шымкент қаласының әкімі Ғ.Әбдірахымовқа Оқушылар сарайының алдындағы алаңшаға автотұрақ құрылысын жүргізу туралы ұсыныс түсіп, Кеңестің шешіміне сәйкес бұл мәселе сәтті шешімін тапқан.

Мәжіліс соңында жуырда ғана қабылданған Елбасы Жолдауында белгіленген мақсат-міндеттерді орындау мақсатында Қоғамдық кеңес пен атқарушы биліктің алдағы уақытта да бірлесіп жұмыс істеуі үшін бірауыздан Қарар қабылданды.