Астанада Мемлекет басшысы Нұрсұлтан Назарбаевтың қатысуымен өткен «Нұр Отан» партиясының кезекті XVIII съезі партияның 2030 жылға дейінгі «Бақуатты қоғам: онжылдықтың 10 мақсаты» атты жаңа бағдарламасының қабылдануымен айшықталды.

004

Аталған құжатта Елбасының елімізді жан-жақты жаңғырту бағдарламасын жүзеге асыруға партияның қосатын нақты үлесі мен жұмысы көрсетілген. Осы белесті бағындырар жолда партияның Саяси Кеңесі мен Бюросының құрамы жаңартылып, партия жарғысына кейбір нормаларды енгізу арқылы, ең алдымен, қазақ тілінің латын әліпбиіне көшуіне байланысты партияның мемлекеттік тілдегі атауында латын әріптері қолданылады. Съезд тізгінін ұстаған «Нұр Отан» партиясы Төрағасының бірінші орынбасары Мәулен Әшімбаев алғашқы сөзді Мемлекет басшысы, «Нұр Отан» партиясының Төрағасы Нұрсұлтан Назарбаевқа ұсынды.

«Құрметті делегаттар және съезд қонақтары! Қадірлі партияластар! Баршаңызды «Нұр Отан» партиясының 20 жылдық мерейтойымен шын жүректен құттықтаймын! 1999 жылғы 1 наурыз егемен еліміздің жылнамасына партиямыздың негізі қаланған күн ретінде енді. Тарих өлшемімен қарағанда бұл – көп уақыт емес, бірақ біз үшін тұтас дәуірге пара-пар. Ғасырлар тоғысындағы күрделі экономикалық жағдай тез арада дұрыс таңдау жасауымызды талап етті. Тәуелсіздігімізді нығайтып, мықты мемлекет құру үшін бізге батыл әрі маңызды реформалар жасау керек болды. Әйтпесе, өркениет жолына бастайтын әлемдік даму көшінен қалып қоятын едік.

Осындай ұлы мақсатты көздеген «Нұр Отан» партиясы халықтың сенімін ақтап, орнықты ілгерілеуімізді қамтамасыз ететін бірден-бір саяси күшке айналды. Сындарлы жылдарда жанымнан табылып, биік белестерді бағындыруға атсалысқан партияластарыма алғысымды білдіремін. Мен бүгін өздеріңізбен бірге атқарған жұмысымызды қорытындылап, болашақ бағдарымыз туралы ой бөліссем деймін.

Ең алдымен, қол жеткізген жетістіктерімізді айшықтайтын нақты фактілерге тоқталайын. Еліміздің экономикасы айтарлықтай өсті. Сыртқы сауда айналымының көлемі 9 еседен астам артты. Қазақстанға шетелден 320 миллиард долларға жуық тікелей инвестиция тартылды. Азаматтарымыздың кірісін 16 есе көбейттік. 141 миллион шаршы метрден астам тұрғын үй салынды.

Бүкіл елімізде әлеуметтік маңызы зор жаңа инфрақұрылым нысандары бой көтерді. 1 400 заманауи аурухана, емханалар мен амбулаториялар, 2 865 жаңа мектеп, колледждер мен балабақшалар ашылды. Мұның бәрі – бүкіл халқымыздың ерен еңбегінің нәтижесі. «Нұр Отан» мемлекеттік маңызы бар шешімдер қабылдауға ықпал етіп, сайлаушылардың сенімін ақтап келеді», – деп атап өткен Мемлекет басшысы жаңа уақыт жаңа сын-қатерлерді тартып отырғанын, әлем перманентті турбуленттілік жағдайына дендей еніп бара жатқанын айтты.

Елбасының айтуынша, бұл жағдай рухымызды түсіріп, болашақ алдында жүрексінуге себеп болмауы тиіс. Кез келген дағдарыс түрлі сілкіністермен қатар жүреді, сонымен бір мезгілде өсуге қажетті кеңістік қалыптастырып, мүмкіндіктер терезесін ашады.

Бастысы, дамудың дұрыс бағытын таңдап, қоғамды алға қойған мақсаттарға жұмылдыра білу. Кез келген экономикалық жетістіктер мен геосаяси жеңістер, әрбір адамның әл-ауқатының артуына әкелмесе, оның үлкен мәні де, құны да болмайды.
«XXI ғасырдағы мемлекеттердің орнықты даму формуласы мен өркендеуінің құпиясы осында жатыр», – деп атап өткен Нұрсұлтан Назарбаев съезде өзінің тапсырмасымен әзірленген, партияның 2030 жылға дейінгі «Бақуатты қоғам: онжылдықтың 10 мақсаты» бағдарламасын қарастыратынына тоқталды.

Елбасының айтуынша, бағдарлама стратегиялық көзқарастың ауқымды көкжиегін ашады және қоғам мен мемлекеттің алдағы онжылдықтағы дамуының негізгі қырларын айқындайды.
Өйткені алдағы он жыл Қазақстанның озық отыз мемлекеттің қатарына ұмтылуымыздағы шешуші кезең болмақ. Мемлекет басшысы бұл орайда ұлттық идеямызды басшылыққа алуға тиіс екенімізді айтты. Ал оның базалық құрамдауыштары ұлттық бірлік, бәсекеге қабілетті қуатты экономика, өркендеуші зияткер қоғам, әлемде лайықты құрметке ие ел екені белгілі.

Осының бәрі Қазақстанның табысты дамуының негізі болып саналады. Өз кезегінде, Ұлттық бірлік доктринасы төрт тірекке сүйенеді: 1.Ортақ тарих; 2.Ортақ құндылықтар; 3.Ортақ Отан; 4.Ортақ болашақ.
Елбасы бұдан әрі басты басымдық – азаматтардың тұрмыс деңгейін және Қазақстанның дамуын әлеуметке бағдарланған мемлекет ретінде қамтамасыз ету екеніне тоқтала келіп, тіпті ең күрделі кезеңдерде әлеуметтік міндеттемелердің орындалғанын атап айтты.

«Біз даму шығындарын төмендетпей, мұқтаждарға көмектесуге тиіспіз. Биыл әлеуметтік салаға республикалық бюджеттің барлық шығыстарының 45 пайыздан астамы бағытталды. Сонымен бір мезгілде бізде белгілі бір теңсіздіктер мен әлеуметтік бөлікте проблемалы нүктелер пайда болды. Осыған байланысты мен Ұлттық қордан азаматтарымыздың өмір сапасы мен әл-ауқатын арттыруға қаражат бөлу жөнінде шешім қабылдадым. Үкімет осы мақсатқа бөлінетін шығыстарды дұрыс әкімшілендіруі тиіс», – деген Елбасы біз қазір үлкен сын-қатерлер мен жаһандық белгісіздік жағдайында өмір сүріп жатқанымызды, жинақтаған қорымыз бұдан да күрделі уақыттарда керек болуы мүмкіндігін ұмытпауды ескертті.

Мемлекет басшысы атап өткендей, әлеуметтік саясат теңгерімді болуы әрі масылдық көңіл күйдің өсуіне жол бермеуі тиіс. Көмек аса мұқтаж жандарға беріліп, атаулы сипатта болуы керек. Бөлінген қаражат әрбір отбасына және нақты адамға жетуін Елбасы өзі қадағалайтын болады.

Съезде мәлім болғанындай, Президенттің тапсырмасымен партия азаматтарды қатты толғандыратын мәселелерге сараптама жүргізген. Олардың қатарында балалар жәрдемақысын көтеру, көп балалы отбасылардың жағдайын жақсарту, баспанамен қамту, әлеуметтік инфрақұрылымды жаңғырту сынды басқа да мәселелер бар.
Елбасының айтуынша, осындай мәселелерді шешудегі партияның елеулі үлесі үш бағыттағы әлеуметтік саясатты жүзеге асыру арқылы көрінбек.

Бұлар:
1. Табысты арттыру және халықтың аз қамтылған бөліктерін қолдау.
2. Табысы төмен азаматтардың баспана мәселесін шешу және білім беру, денсаулық сақтау салаларын жақсарту.
3. Өңірлерді кешенді дамыту.

БІРІНШІ.
«Бүгінде қазақстандық отбасылардың әл-ауқат деңгейін көтеру шараларын күшейту маңызды. Бұл денсаулық сақтау, білім беру, әлеуметтік қорғау, мәдениет, спорт, ауыл шаруашылығы және басқа салаларда жұмыс істейтін 1 миллионнан астам азаматтық қызметшілерді тікелей қамтиды» – деп атап көрсеткен Мемлекет басшысы 2019 жылғы 1 шілдеден бюджеттік саланың төмен жалақылы жұмыскерлерінің еңбекақысын 30 пайызға дейін арттыруды; аудандық, облыстық деңгейлерде тікелей азаматтармен жұмыс істейтін атқарушы органдардың төменгі қызметкерлерінің еңбекақысын орташа 25 пайызға көтеруді тапсырды.

Бұл мақсаттарға 2019-2021 жылдары қосымша 980 миллиард теңге бөлінеді.
Елбасы атап өткендей, жүргізіліп жатқан реформаның нәтижесін әрбір отбасы алыс болашақта емес, дәл бүгіннен бастап сезінуі тиіс.

«Әсіресе, көп балалы отбасыларды қолдау шараларын күшейту қажет деп санаймын. Бүгінде елімізде шамамен 340 мың отбасының төрт және одан көп баласы бар. Балалы отбасыларды қолдауға жыл сайын 500 миллиард теңгеден аса бөлінеді. Бұл отбасылардың табыс деңгейі әртүрлі. Сондықтан мемлекет бірінші кезекте табысы төмен көп балалы отбасыларға айрықша қамқорлық танытып, назар аударуы қажет.

Қазіргі кезде мемлекеттен атаулы әлеуметтік көмекті 111 мыңнан астам отбасы (571,6 мың адам) алады. Аз қамтылған, әсіресе көп балалы отбасыларды қамту аясын кеңейту үшін Үкіметке атаулы көмек көрсету өлшемдерін ең төменгі күнкөріс шегінен (14849 теңгеден 20789 теңгеге дейін) 70 пайызға дейін арттыруды тапсырамын.

Атаулы әлеуметтік көмек алуға құқығы бар балалы отбасыларды адрестік қолдау үшін көп балалы отбасындағы әрбір балаға төленетін ең төменгі төлемді 20 789 теңге көлемінде белгілеу керек. Әлеуметтік көмек тағайындаудың барлық үдерістері барынша жеңілдетілуі және проактивті форматқа көшірілуі тиіс.

Осындай отбасылардың жиынтық табысын есептегенде көп балалы отбасылар мен көп балалы аналарға берілетін мемлекеттік жәрдемақылар, мүгедектігі үшін балаларға берілетін жәрдемақы, стипендия сияқты жекелеген жәрдемақыларды есепке алмау керек. Нәтижесінде, 2019 жылы 830 мыңнан астам адам, соның ішінде 550 мың бала атаулы әлеуметтік көмекпен қамтылады», – деп атап өткен Қазақстан Президенті сондай-ақ мүгедек бала тәрбиелеп отырған ата-аналарға, қамқоршылар мен отбасыларға (тұлғаларға) жәрдемақыны 30 пайызға көтеруді тапсырды.

Бұл шара 100 мыңнан астам адамды қамтиды. Оны жүзеге асыруға 2019-2021 жылдары қо-сымша 300 миллиард теңгеден астам қаражат бөлу тапсырылып отыр.
Бұл ретте әлеуметтік көмек көрсетудің негізгі қағидаты әлеуметтік келісім-шарт және отбасының еңбекке қабілетті мүшелерінің жұмыспен қамту шараларына міндетті түрде қатысуы болып қала беретінін айтқан Мемлекет басшысы әкімдерге әрбір отбасына баруды және көмекке мұқтаждарды қолдау шараларын өңірлік мүмкіндіктерді ескере отырып, жергілікті бюджет есебінен күшейтуді тапсырды.

Елбасының айтуынша, толық емес көп балалы отбасыларға үйде отырып жұмыс істеуге жағдай жасау, ал ауылдағы көп балалы отбасыларға гранттар мен шағын несиелердің жекелеген квотасын бөлу қисынды болмақ. Бұл жұмыстарды Үкімет пен әкімдер «Нұр Отан» партиясымен және «Атамекен» ҰКП-мен бірлесіп жүзеге асыруы тиіс. Бұл ретте әкімдер мұқтаж отбасыларға көмектің өңірлік бағдарламаларын «Бақытты отбасы» партиялық жобасы аясында қайта қарауы керек.

ЕКІНШІ.
«Білім беру және денсаулық сақтау салаларын жақсарту және баспанамен қамтамасыз ету жөніндегі жұмыстарды да белсендіру керек. Үкіметке негізінен көп балалылар қатарындағы аз қамтылған отбасылар үшін «Нұрлы жер» бағдарламасы аясында 40 мыңнан астам жалдамалы пәтер салуды тапсырамын. Бұл мақсатқа таяу 7 жылда қосымша 50 миллиард теңге жыл сайын бөлу қажет.

Сонымен қатар табысы төмен көп балалы және толық емес отбасылар, мүмкіндігі шектеулі балалары бар отбасылар үшін баспана алудың қолжетімділігін арттырған жөн. Азаматтардың осы санаттары үшін тұрғын үй жинақ жүйесі арқылы жылдық 2-3 пайызбен тұрғын үй қарыздарын ұсынудың жеңілдікті тетіктерін әзірлеуді тапсырамын. Тұрғын үй жинақ банкіне осы мақсатқа жыл сайын 50 миллиард теңге бөлінетін болады», – деді Елбасы.

Мемлекет басшысы білім беру саласындағы реформаны қисынды нәтижеге жеткізу керектігін де қаперге салды. Қазіргі заман балаларымыздың бойында жаңа машықтар мен дағдыларды дамытуды талап ететініне тоқталып, бұл тұстағы табыстылықтың жиынтығы педагогтардың біліктілігін ұдайы арттыру, озық материалдық база мен өзекті оқыту бағдарламасы екенін атап өтті.
Елбасының айтуынша, әрбір өңірде кемінде бір озық ЖОО және 10 заманауи колледж болуы тиіс. Оқу орындары тиімділігінің басты көрсеткіші – түлектердің жұмысқа орналасуы.

Еліміздің әрбір тұрғыны білімді және денсаулығы мықты болуы тиіс. Сондықтан тұрғылықты жеріне қарамастан, сапалы денсаулық сақтау қызметіне қолжетімділікті қамтамасыз ету қажет. Отандық медицина, ең алдымен, профилактика мен саламатты өмір салтын ынталандыруды бағдар еткені жөн. Қоғамдық денсаулық сақтау қызметі мен бастапқы медициналық-санитарлық көмек шығыстары денсаулық сақтауды қаржыландырудың жалпы көлемінде 40-тан 60 пайызға дейін ұлғайтылуы тиіс.

«Бұл – әлемдегі барлық дамыған елдердің тәжірибесі. Денсаулық сақтау саласын дамытуға қосымша 120 миллиард теңге бөлуді тапсырамын», - деді Елбасы. Соның нәтижесінде 7 өңірде жылына 100 мың пациентті қамтитын стационарлық-медициналық көмек көрсетудің сапасы мен қолжетімділігі арта түсетін болады.

«Үшінші, - деп атап өтті Елбасы, - бүкіл еліміз бойынша өмір сапасын жақсартуға бағытталған өңірлік саясатты жүзеге асыра бастау қажет. Бізде өңірлердің дамуында айтарлықтай айырмашылықтар байқалады. Неліктен бір облыстарда жолдар жақсы, ал басқаларында жаман? Неліктен бір жерлерде ТКШ тұрақты жұмыс істейді, екіншілерінде дәл ондай емес?

Шын мәнінде жұмыс істейтін, адамдардың проблемаларын білетін және шешетін әкімдер бар. Халықпен кездесулерден ат-тонын ала қашатын және өңір халқының қажеттіліктері мен мұқтаждықтарына жүрдім-бардым қарайтындары да кездеседі. Әкімдерге халыққа жақын болып, оның игілігі үшін бәрін істеуге ұмтылу керек».

Қазақстан Президенті елімізде түрлі бағдарламалар бар екеніне, оған жеткілікті ресурстар бөлініп отырғанына, алайда адамдардың нақты нәтижені көрмей келе жатқандарына назар аударды. Мемлекет басшысы атап көрсеткендей, мұндайға жол беруге болмайды.

Үкімет пен барлық деңгейдегі әкімдер бүкіл әлеуметтік проблемаларды табандылықпен шешулері тиіс және жалған көрсеткіштерді қумаулары керек. Өйткені әр өңір стратегиялық тұрғыдан маңызды.
«Еліміздің өңірлік өмір сапасының жаңартылған стандарттарына негізделген Жаңа карта қалыптастыру қажет.

Соңғы жылдары республикалық автокөлік желілері құрылысы бойынша аса зор, тарихи маңызды жұмыстар жүргізілді. Тұтастай алғанда, біз 12,5 мың км автомобиль жолы мен 2,5 мың км теміржол, теңіз порттарын салдық және жөндеуден өткіздік. Әрине, автобандар салған маңызды, бірақ үйге дейін жол салған одан да маңыздырақ. Заманауи жергілікті жолдар желісін кеңейту – бұл орындалуын партия бақылауына алуы тиіс Үкіметтің шешуші міндеті.
Аталған мақсаттарға қосымша 350 млрд теңге бөлуді тапсырамын. Бұл шаралар 2025 жылға қарай облыстық және аудандық маңыздағы автожолдардың 95 пайызын жақсартуға жәрдемдеседі», - деді Н.Назарбаев.

Елбасы, сондай-ақ, өңірлік көлік инфрақұрылымдарының барлық нысаны, оның ішінде аэропорттар, авто және теміржол вокзалдары жаңғыртылуы тиіс екендігін атап көрсетті. Астана, Алматы және Шымкент сияқты ірі қалалардың шет аумақтарында қалыптасқан проблемаларды шешу үшін 2019-2021 жылдарға қосымша 90 млрд теңге бөлінеді.

«Шағын және моноқалаларды дамытуға да таяудағы үш жыл бойы жыл сайын қосымша 10 млрд теңге қарастырылады. Еліміздің барлық тұрғынының таза ауыз суға қол жеткізуі, кең ауқымды газдандыру жұмыстарын жүргізу аса маңызды басымдық болып табылады. Сумен және кәріз жүйелерімен қамтамасыз ету үшін қосымша 140 млрд теңге бөлуді тапсырамын. Бұл аталған салада 2,2 млн-нан астам адамның проблемасын шешуге мүмкіндік береді.
Сондай-ақ газдандыру және электрмен қамтамасыз ету жұмыстарына шамамен қосымша 190 млрд теңге бөлуді тапсырамын. Бұл шаралар газбен 1,1 млн адамды қамтуға мүмкіндік беріп, өңірлік электрмен қамтамасыз ету сенімділігін айтарлықтай арттырады. Үкіметке аталған мақсаттарға 2019-2021 жылдарға шамамен 920 млрд теңге қарастыруды жүктеймін.

Жоғарыда айтылғандарды қаперге ала келе, «Нұр Отан» еліміздің инженерлік және әлеуметтік инфрақұрылымдарын дамытуға екпін түсіре отырып, «Құтты мекен» партиялық жобасын іске қосуы тиіс,» - деді Президент.
Мемлекет басшысы қолымызда 7,5 млн ауыл халқының әл-ауқатын жақсартуға мүмкіндік бар екенін көлденең тартты.

Бірінші кезекте Үкіметке әкімдермен және мәслихаттармен бірлесіп, болашағы бар ауылдарды анықтау, сол жерлерде әлеуметтік саланы дамыту, интернаттар құру қажеттігін тапсырды.
«Біз ауылдарымызды өсім мен орнықты дамудың ошағына айналдыруымыз қажет. Ауылда халық тұтынатын тауарлар өндірісі бойынша бизнесті дамыту, ауыл шаруашылығы өнімдерін қайта өңдеу және тағы басқалар бойынша ҚХР-дың тәжірибесін пайдалану қажет. Сол жерлерде тұрғын үйлер, жолдар салып, коммуникациялар жүргізу, әлеуметтік нысандар тұрғызу, шағын және орта бизнесті дамыту керек.

Сондай ауылдарға болашағы жоқ елді мекендерден адамдар көшіп баратын болады. Жұмыс істеп, лайықты өмір сүруге ауылдың әлеуеті жеткілікті.
Осыған орай, Үкіметке «Ауыл – ел бесігі» арнайы жобасын жүзеге асыру бойынша ұсыныс әзірлеп, оны 2019-2021 жылдары 90 млрд теңге көлемінде қаржыландыруды қамтамасыз етуді тапсырамын. Бұл жастардың ауылда орнығып қалуына көмектеседі», - деді Нұрсұлтан Әбішұлы.

Мемлекет басшысының айтуынша, жоғарыда көрсетілген барлық бағыт пен жобаның кешенді сипаты бар, партияның ұзақ мерзімді мақсаттарымен үйлеседі және көп кешікпей-ақ адамдарға сезінетіндей деңгейде пайдасын тигізеді.
Оларды таяудағы үш жылда жүзеге асыру үшін бюджеттен қосымша 2 трлн теңге бөлінетін болады. Бұл қаржы кедендік әкімшілендіру мен бюджет шығыстарын түбегейлі оңтайландыру есебінен қарастырылуы қажет. Бұл арада жергілікті жерлердегі басым ба-ғытқа ие емес, қымбат іс-шараларды күн тәртібінен шығарып тастау керек. Аталған қадамдар таяудағы үш жылда бюджетке 1 трлн теңге түсіруге мүмкіндік туғызады.

«Сондай-ақ Ұлттық қордан 2019-2021 жылдар ішінде қосымша 1 трлн 350 млрд теңге бөлу қажет. Жаңа бағдарлама әлемдік шешуші трендтерді зерттеу мен Қазақстанның барлық өңіріндегі жағдайды талдау негізінде жасалды. Онда таяудағы үш жылда мемлекеттің әлеуметтік саясатының іргетасына айналатын және бүкіл он жылдықтағы перспективаны көздейтін нақты мақсаттар мен жобалар көрініс тапқан.

Өздеріңіз білетіндей, бізде Үкімет ауысып, оның құрамы 70 пайызға жаңарды. Жаңа Министрлер кабинетіне, барлық әкімге дереу мен жариялаған тапсырмаларды жүзеге асыруға кірісу керек. Үкіметтің әр мүшесі мен әкімдер жеке жауапкершілік алады және жұмыс нәтижелеріне жеке жауап беретін болады.

Партия да халықтың күнделікті мәселелерін шешуге белсенді араласуы тиіс. Бұл жұмысты «Халыққа көмек» жобасы күшейтеді ғой деп сенемін. Бүгінде қоғамның көкейкесті мәселелеріне жедел үн қатып, оларға меморгандардың назарын аударту маңызды. Бұл ең тиімді стратегия болмақ. Ол үшін халықпен кері байланыстың қуатты жүйесін қалыптастыру керек.

Партияның қоғамдық қабылдау бөлмелерінің жұмысын күшейту маңызды. Осы мәселеде бюрократиялық сөзбұйдалыққа жол беруге болмайды. Мұның тек мемлекеттік жеңілдіктерге ғана емес, сондай-ақ волонтерлер мен кәсіпкер-меценаттар көрсететін атаулы әлеуметтік көмекке де қатысы бар», - деді Мемлекет басшысы.

Елбасы «Нұр Отанның» барлық филиалы бәрінен бұрын осы жұмысқа бағдарлануы тиіс екенін атап өтті. Партия халықтың барлық жігінің мүддесін қорғап, азаматтар мен мемлекет арасын байланыстыратын шешуші буын ретінде көрінуі тиіс.
«Бүгінде алдыңғы орынға қолданыстағы мемлекеттік бағдарламалардың, оның ішінде әлеуметтік саладағы бағдарламалардың тиімділігі мәселесі шығып отыр. Осыған орай, мен «Нұр Отан» партиясына Президент Әкімшілігімен бірлесіп Мемлекеттік бағдарламалар мен реформаларды жүзеге асырудың тиімділігі мен мониторингін бағалайтын орталық құруды тапсырамын.

Партия алаңында әр тоқсан сайын жауапты мемлекеттік органдардың мемлекеттік бағдарламаларды қалай орындап жатқаны туралы тыңдаулар өткізіп тұру қажет. Есептер маған беріліп тұратын болады. Солардың негізінде тиісті қорытындылар жасаймыз», - деді Мемлекет басшысы.

Елбасы, тұтастай алғанда, экономикалық даму халықтың әл-ауқатының нақты өсуіне бағытталатын болуы тиіс, деп атап көрсетті.
«Нұр Отан» «Атамекен» кәсіпкерлер палатасымен бірлесіп, мемлекеттің бизнесті қолдау қағидаттарын жақсарту бойынша жұмыс істеуі керек. Жемқорлықты түбірімен жою бағытындағы мақсатты жұмыстар жалғастырылғаны жөн», - деген Президент келесі кезекте жастарға ерекше назар аударылуы қажеттігіне екпін түсірді.

«Өйткені жастар – болашағымыз! Осы орайда 2019 жылды Жастар жылы деп жарияладық. Партия мемлекеттік жастар саясатының тиімділігін арттыруға қол жеткізуі тиіс. Сонымен қатар «Нұр Отан» белсенді азаматтар үшін басты «әлеуметтік лифтілердің» бірі әрі барлық деңгейдегі мемлекеттік басқару жүйесі үшін кадрлардың қайнар көзі болуы керек. Заманауи басқарушылардың жаңа генерациясы «Партияның жастар резервінен» пайда болуы қажет.

Барлық нұротандық нағыз патриоттар болулары және абырой-беделі кіршіксіз болулары тиіс. Партияның халық алдындағы беделі тек орталықтағы кең ауқымды акциялармен немесе іс-шаралармен ғана өлшенбейді. Партияның образы қарапайым қазақстандықтардың көз алдында жергілікті жерлердегі күнделікті жұмыстармен қалыптасады. Бастауыш партия ұйымдарының қызметі жергілікті жерлердегі және өңірлердегі мәселелерді оң шешуге қабілеттілігімен ерекшеленсін.

Партиялық іс-шаралардың мазмұндылығы, әсіресе өңірлердегі мазмұндылығы үшін жұмыс істеу керек. Халықтың әл-ауқатын арттырып, өмір сапасын жақсартудағы кең ауқымды міндеттер партиядан өз ісіне деген үлкен жауапкершілікті талап етеді.

009

«Нұр Отан» қоғамдық бақылаудың басты институты болуы қажет. Партияның бағдарламасында мен айтқан барлық ұсыныстар ескерілуі тиіс», – деді Н.Назарбаев.
«Нұр Отан» – толағай табыстың және болашаққа жол ашатын жарқын жетістіктердің партиясы. Біздің ұзақ мерзімді стратегиямыз, мол табиғи ресурсымыз, саяси ерік-жігеріміз бар. Мемлекеттің қуаттылығы экономиканың даму қарқынымен және тұрғындардың тұрмыс сапасымен өлшенеді.

Сондықтан мен өзіме сенім артқан халқымның болашақта емес, қазір бақытты болғанын көргім келеді. Біздің ұстанымымыз – татулық пен тыныштық, ұранымыз – береке мен бірлік. Тәуелсіз Қазақстанның арқа сүйейтін тірегі – баянды бейбітшілік пен келелі келісім!

Бас партия болу дегеніміз – басқару емес, елге адал қызмет ету! Біз – халық бірлігінің партиясымыз. Бүгінгі съезд Қазақстанды дамытудың жаңа кезеңіне жол ашады.
Ел тәуелсіздігінің 30 жылдығына бауырымыз бүтін, аман-есен, мол табыспен жете берейік! Әрекет ететін кез келді, ағайын!
Алға, «Нұр Отан»! Алға, Қазақстан!» – деп аяқтады сөзін Елбасы.

www.egemen.kz

Шымкент қаласынан әскер қатарына шақырылған сарбаз Бағлан Кадиров Қазақстан Республикасының Мемлекеттік күзет қызметі Объектілерді қорғау қызметінің Астана қаласында орналасқан «Айбын» Президенттік полкі» 0112 әскери бөлімінде Отан алдындағы борышын өтеуде.

Кадыров

«Айбын» Президенттік полкі» 0112 әскери бөлімі Қазақстан Республикасы Президентінің және бірінші тұлғаларының қауіпсіздігін, маңызды мемлекеттік нысандардың күзетін жүзеге асыратын алдыңғы қатарлы әскери құрылым болып табылады. Мерзімді жауынгерлік қызметті бұл құрылымның қатарында атқару – сарбаздар үшін үлкен абырой, асқан жауапкершілік.

Біздің жеке құрам қатарына еліміздің түкпір-түкпірінен, әр облыстардан денсаулық жағдайы, мінез-құлқы, жеке қасиеттері тұрғысынан үздік деп танылған жастар таңдалып алынады. Жауынгер Бағлан Бауыржанұлының осы қатардан табылғаны – оның туған өлкесінде: отбасында және мектебінде, оқу орны мен еңбек ұжымында алған білімі мен тәрбиесінің жемісі деп білеміз. Кезекті шақырылым кезінде үздік жастардың біздің құрылым қатарына таңдалып алынуы – аймақтағы жергілікті Қорғаныс істері жөніндегі департаменттің тиянақты жұмысының нәтижесі екенін де айта кету керек.

Бағлан Бауыржанұлы – 1999 жылы 12 мамырда, Оңтүстік Қазақстан облысы, Сарыағаш ауданы, Абай ауылында дүниеге келген. Көкшетау қаласы №17 орта мектебінің түлегі, 2016 жылы Шымкент Әлеуметтік педагогикалық университетінің денешынықтыру мамандығына сырттай оқып жүріп, әскер қатарына шақырылған.

Ол әскери қызметінің бірінші күндерінен бастап, жауынгерлік өмірдің қыр-сырын үйренуге зор ынтамен кірісті. Отанға деген жоғары патриоттық сезімімен қарулас достарына үлгі-өнеге бола білді. Өзіне жүктелген міндеттерді атқару кезінде ол белсенді, жауапты азамат ретінде танылды. Сөзі мен ісі жарасқан еңбекқорлығымен қатар қарапайым мінезді.

Жауынгерлік және мемлекеттік-құқықтық дайындық сабақтарында командирлерінен үйренген білімдерін қызмет барысында дұрыс қолдана біледі. Жауынгерлік дайындық нормативтерін әрдайым ең үздік бағаларға орындайды. Өзіне сеніп тапсырылған қарудың құрылымын, тактикалық-техникалық сипаттамасын, қызмет көрсету тәртібін жетік меңгергендіктен атыс даярлығында үздік нәтижелер көрсетіп жүр. Жауынгерлік кезекшілікте әрдайым қырағылық танытып, әскери міндеттерін жауапкершілікпен атқарғаны үшін бірнеше рет марапатталған.

Шымкент қалалық тілдерді оқыту-әдістемелік орталығы мен химия-биология бағытындағы Назарбаев Зияткерлік мектебі бірге «Жаһандану жағдайындағы тіл үйретудің инновациялық әдіс-тәсілдері» атты аймақтық семинар-тренинг өткізді.

NIS-5

Ұйымдастырушылар мемлекеттік тілдің кең ауқымды қолданысын қамтамасыз ететін үйлесімді тіл саясатын іске асыру, сандық жүйеге көшуге байланысты Google базасында жұмыс жасаудың оңтайлы тәсілдері және оны оқыту курстарында қолданудың артықшылықтары, сондай-ақ, тіл оқытудың жаңа технологияларын меңгеру және қолдану жиілігін анықтауды көздеген.

Еліміздің түрлі облыстарының тіл орталықтарынан келген қатысушылар алдымен НЗМ аралап, мектеппен танысты. Ал семинарға қалалық оқыту-әдістемелік орталығының директоры Н.Жұманова мен Шымкент қаласы химия-биология бағытындағы Назарбаев Зияткерлік мектебінің директоры Б.Қасымов та қатысты. Қазақ, орыс және ағылшын тілі секцияларына бөлінген семинарға «Сапа» оқыту орталығының және «Interpress» халықаралық тілдер орталығының оқытушылары да қатысты. Іс-шара соңында қатысушыларға сертификаттар табысталды.

Ерте жүктілік – Ұрпаққа қауіп

Пятница, 01 Март 2019 04:11

Былтыр елімізде үш мыңнан аса жасөспірім қыз оң жақта отырып, бала тапқан. Екі мыңы түсік жасатып, қалғаны ерте жастан некелескен. Бұл туралы Шымкент қаласының Әйелдер қоғамдық кеңесінің төрайымы Баян Айтбаева «Дені сау қыздар. Ерте неке. Ерте жүктілік» тақырыбымен өткен жиында мәлімдеді. №72 мектепте қоғамды толғандырған мәселеге арналған «қыздар жиналысы» өтті.

DSC 5779

– Кеңес жұмысының бір саласы қыз-келіншектердің денсаулығын сақтауға арналғандықтан, қоғамда болып жатқан келеңсіздіктерге көз жұма қарай алмаймыз. Осы мақсатта жасөспірімдермен кездесіп, ақыл-кеңесімізді айтып, жаза басудың алдын алуда тамшыдай болса да көмегімізді тигізгіміз келеді. Арамызда гинеколог, психологтар бар. Жас қыздарды толғандырған сұрақтарына жауап береміз, кеңес алуға мүмкіндік жасаймыз, – деді Баян Айтбаева.
Ал Шымкент қаласы әкімі аппараты басшысының орынбасары Айгүл Сәрсеева білім алудың маңыздылығына тоқталды.

– Елімізде оқушылардың білім алуына жағдай жасалған. Сондықтан сіздердің жастарыңызда үйде ата-ананың тәрбиесін, мектепте білім алып, жан-жақты болуға, өздеріңізді дамытуға тиіссіздер. Өйткені жақсы білім алу дегеніміз – ол сіздердің жарқын болашақтарыңыз. Қоғамда болып жатқан дерттен аулақ болыңыздар, – деді А.Сәрсеева.

Гинеколог Ақсұлу Күзембаева ерте жүктіліктің қыз баланың денсаулығына тигізетін залалын медициналық тұрғыда түсіндірді.
– Жасөспірім кезіндегі жүктіліктің үш қаупі бар. Біріншіден, бұл шақта қыздардың мүшесі дұрыс жетілмейді де, өз өміріне қатер төнеді. Дұрыс дамымаған ағзадан дені сау бала өмірге келмейді. Қоғамнан, ата-анасынан қорыққаннан сәбиін тастап кетеді, лақтырады, қазір көптеген келеңсіз жағдайлар орын алуда. Міне, соңғысы қоғамға залалын тигізеді, – дейді дәрігер.

Қалалық әйелдер кеңесі Шымкентте тұрып жатқан 400 отбасының жағдайына мониторинг жүргізген. Нәтижесінде 13 пайызы ажырасқан, 14 пайызы жалғызбасты аналар, 13 пайызындағы мұғалімдер мен тәрбиешілердің отбасында күйеулері жұмыс істемейді. Баян Айтбаева сонда ұрпақтың тәрбие жұмысымен кім айналысуда деген ойын ортаға салды.

Ашық форматта өткен кездесуге білім одасының қыздары түгел қатысып, белсенді отырды. Ата-ана беретін тәрбие мен жауапкершіліктің әлсірегенін бүгінгі ұрпақ жасырмады.
«Қыздардың ерте жүкті болып қалуына кім кінәлі?» деген сауалға жасөсірімдердің өздері ата-аналардың жұмысбастылығы, балаларына көңіл аудармайтыны мен ашық сөйлеспейтінінен деп жауап берді.

– Абайсызда опық жеп, мектеп партасында отырып жүкті болып қалғандықтан, жасөспірім қыздар жасанды түсік жасатады да болашақ өміріне балта шабады. Қалай жаза баспауға болады? Психологтар арқылы жас қыздарға өмір құндылығы, өз бағасын білуі туралы кеңес қажет екенін түсіндік. Осы мақсатта психологтарды көптеп тартуға көштік, – деп пайымдады төрайым.

Жиын соңында психологтар Клара Үсенова мен Әлия Ізбасарова қыздармен еркін әңгімелесіп, кеңестерін айтып, психологиялық тренинг өткізді.
Енді әйелдер кеңесі өрімдей жаста қателікке ұрынбаудың алдын алу мақсатында қаладағы барлық мектептегі қыздармен кездесуді жоспарлап отыр.

Мегаполис тұрғындарына медициналық қызмет көрсететін ұйымдардың саны көбейіп, дәрігерлердің жалақысы көтеріледі, оларды баспанамен қамту мәселелері қолға алынбақ. Бұл туралы Шымкент қаласы денсаулық сақтау басқармасының өкілдері журналистермен кездесуде мәлімдеп, Шымкент қаласының денсаулық сақтау саласында орын алатын жаңалықтарымен бөлісті.

DSC 2222

Жалақысы көтерілетіндер: 1473

Шымкент қаласы республикалық статус алған соң денсаулық сақтау басқармасының құрамына 36 медициналық ұйым өткен, оның 13-і – емхана. Бұл мекемелерде бүгінгі таңда 3119 дәрігер мен 7796 орта буынды медициналық қызметкер еңбек етуде. Елбасы Н.Назарбаев халыққа Жолдауында учаскелік дәрігерлердің жалақысын 20 пайызға көтеруді тапсырған болатын. Жауаптылар қазіргі таңда Шымқалада жалақыны көтеруге негіз болатын жаңа бағдарламаны оқыту жұмыстары жүріп жатқанын айтады.

–1473 дәрігер мен орта медицина қызметкерлерінің жалақысы орташа есеппен 20 пайызға артады. Осы мақсатта мемлекеттен қаржы қарастырылды. Ол үшін еңбекақысы көтерілетін мамандар алдымен ауруды басқару бағдарламасы аясында біліктілігін арттырады. Қазіргі таңда 207 дәрігер мен 475 орта деңгейлі медициналық қызметкер оқытылған, бұл учаскелік желі медицина қызметкерлерінің тең жартысын құрап отыр. Жылдың алғашқы тоқсанында мамандардың барлығы толық біліктілік курсынан өтеді, – деді Шымкент қаласы денсаулық сақтау басқармасы басшысының міндетін атқарушы Ғалымжан Абишев.

Осы тұста айта кетерлігі, учаскелік дәрігерлер мен орта буын мамандардың жалақысын өсіруде үш критерийге басты назар аударылады. Ол үшін сол аумақтағы тұрғындар арасында артериалды гипертензия, қант диабеті және созылмалы жүрек жеткіліксіздігі бойынша аурушаңдық төмен болуы қажет. Асқынулар мен өлім-жітім санын азайту, жүктемені және кезектілікті, стационарлық және жедел медициналық көмекті төмендету және пациенттердің денсаулығына деген жауапкершілігін арттыру секілді индикаторлар да есепке алынады.

Бұдан бөлек, мамандар тарапынан жаңа туған сәбилерге патронаждық көмекті ұлғайтылғанда да қосымша үстемеақы қосылады.

Бастапқы 40 медициналық ұйым ашылады

Шымкенттік дәрігерлер медициналық қызметтің сапасы мен тұрғындардың саулығын жақсартуда бастапқы медициналық қызмет көрсететін мемлекеттік-жекеменшік серіктестіктерді және шағын клиникалар санын көбейтуді жоспарлап отыр.

– Қазір жаңа талаптар бойынша мекемелер халыққа жақын болуы қажет. Сол үшін алдымен қажеттілік туындап тұрған, қаладан шалғай Исфиджаб, Жаңаталап, Игілік, Сайрам секілді тұрғын алаптарда бұл мәселелерді шешудің тетіктері қарастырылды. Биыл осы мақсатта шаһарда 40 жаңа учаскі ашылу көзделуде, – деді басқарма басшысының міндетін атқарушы.

DSC 2215

Медициналық ұйымдардың көбеюі дәрігерлердің жүктемесін азайтуға ықпал еткен. Мәселен, өткен жылы жалпы тәжірибелік дәрігерге 2084 адамнан келсе, қазір ол көрсеткіш 1905-ке, 1000 баладан келетін педиатрлардың жүктемесі 838-ге төмендеген.

Тағы бір маңызды мәселенің бірі – кадр тапшылығы. Қаладағы медициналық мекемелерде 74 орын бос тұр. Акушер-гинеколог, педиатор, анестизолог-реаниматолог, фтизиатор, неанотолог, психиатр мамандардың тапшылығы білінуде.
– Осы тізімдегі мамандарды қуана қабылдаймыз. Оларды «7-20-25» бағдарламасы арқылы баспанамен қамтамасыз ету қарастырылуда. Бұл үшін жергілікті әкімдікке бастапқы жарнасын төлеу мәселесін шешуде ұсыныс беруге дайынбыз, – дейді дәрігер.

Енді шаһарда диспансерлік есепке тұратын тұрғындарға мемлекеттен берілетін тегін дәрі-дәрмектерді алуға қолжетімділік артады.
– Қазір арадағы фармацевтикалық қызметтен бас тартып отырмыз. Енді амбулаторлық дәрілердің тапсырысы «СК- Фармациядан» тікелей медициналық ұйымның өзіне жеткізіледі. Ол үшін емханалардан дәріханалар ашылды. Нәтижесінде 600 млн теңге үнемделді, – деді Ғ.Абишев.

Психиатриалық орталық ашылады

Медицина саласындағы тағы бір жаңалық – қалада психиатриалық орталық ашылады. Ал бюджет есебінен биылға қаралған 3,2 млрд теңгеге қалалық перзентхана мен 3,8 млрд теңгеге қалалық №2 аурухананың (бұрынғы Фосфор ауруханасы) ғимараты күрделі жөнделеді.

Ақ халаттылар аурудың алдын алуға арналған скринингтік тексерілулерге қалалықтар ыждаһаттылық танытса дейді. Қазір қалада скринингтік тексеру жүргізетін медициналық ұйымдар саны 35-ке көбейген (2018 жылы – 27).
– Өткен жылы 91 924 адам глаукомаға тексерілгенде 284-нен дерт анықталған.

Сол секілді сүт безінің патологиясына скринингтік тексеруден өткен 16 365 адамның 27-нен дерт белгісі табылды, – деді басқарманың бөлім басшысы Айгүл Иманалина. Салаға жауапты дәрігерлер сол үшін 40-70 жастағы тұрғындарға 2 жыл сайын қан айналым жүйесі, қант диабеті, глаукома, сүт безі обырын анықтау үшін; 30-70 жастағы әйелдер 4 жыл сайын жатыр мойны обырын анықтау үшін; 50-70 жастағы тұрғындарға 2 жыл сайын тоқ және тік ішек обырын анықтау үшін тексеруден өтуге кеңес береді.

Бақтыбай қажы Бейсенбаев,Қазақстан мұсылмандары діни басқармасының Шымкент қаласыбойынша өкіл имамы:

maxresdefault

Құран Кәрімде: «Сонда Мұса өз еліне: «Алланың сендерді Перғауынның әулетінен құтқарып, өздеріңе жасаған игілігін еске алыңдар. Олар, сендерді – ұлдарыңды бауыздап, әйелдеріңді тірі қалдырып, ең жаман азапқа салатын еді. Міне, осында сендерге, өздеріңнің Раббыңнан үлкен сынақ бар», – деген еді. Әрі сонда сендердің Раббың: «Егер шүкір етсеңдер, сендерге оны міндетті түрде арттыра беремін.

Ал, егер күпірлік етсеңдер, шын мәнінде азабым өте қатты», – деп жариялады», –(Ибраһим сүресі, 6-7 аяттар) деген аят Мұса (ғ.с.) пайғамбар халқының басынан өткерген адам төзгісіз қиыншылықтарынан Жаратқан Алла құтқарғанын ескерте отырып, тұтастай бір елдің бейбіт өмір сүруі өлшеусіз бақыт екенін жеткізуде. Ал, осы мамыражай шуақты күндердің баянды болуы шүкіршілікпен жалғасын табатыны да айтылуда.

Алғыс айту күні қазақ тарихының сындарлы шақтарымен тығыз байланысты. Қазақ халқы қиын-қыстау заманды басынан өткізді. Бұрын-соңды болмаған зұлматты заман болды. Бұған қоса, тұтас ұлттың басына қара бұлт үйірілген шақта тілі басқа, діні бөлек қаншама ұлттарға пана бола білді. Тағдыр тәлкегіне түсіп, жан сауғалап, қазақ жерінен пана тапқан өзге ұлттар қазақ халқына шексіз алғысын білдіреді. Өйткені, олар дархан даламыздан жылу тапты. Бүгінде олардың ұрпақтары Қазақстанды өз отаны деп біледі. Осынау кең байтақ даланы мұра етуіміздің бірден бір себебі Алла Тағала ата-бабамыздың дархан пейіліне берген болса керек.

Бұл мереке тарихымыздағы ең ауыр да, шешуші кезеңін ұмытпауға шақырады. Сонымен қатар, бұл мереке қазақ халқының дархандығы мен даналығын көрсететін айтулы күн. Біздің халық бас сауғалап келген ұлт өкілдерін Хәкім Абай: «Адамзаттың бәрін сүй бауырым деп...» дегендей бөліп-жармай қолындағы барымен бөлісті. Бұл әкенің қанымен, ананың ақ сүтімен һәм асыл діннің нәрімен біткен тектілік пен адамгершілік, дархандық мен кемеңгерліктің ең биік үлгісі. Мұндай ерлікпен мақтануға міндеттіміз.

Сондықтан Алғыс айту күні жай кезекті ұрандармен емес нақты тәрбиелік және тағылымдық іс-шаралармен өткізу керек. Қазақ тарихының алтын әріппен жазылған парақтарын жастарға жеткізу күні ретінде өткізу қажет. Жас ұрпаққа өнеге болатын ғибраты мол мереке. Ұлттық кодымызды қалпына келтіруде қажетті құрамдас бөлшегі. Аталмыш мерекенің де басты міндетінің бірі осы деп ойлаймын.

Жер бетінің дамылсыз соғыс соқыларынан алған жарақатынан емделу үшін әрі адамзат бүгінге мейірімділікке аса мұқтаж уақытта мұндай айтулы күн ауадай қажет. Сондықтан, Алғыс айту күні еліміздің азаматтары қазақ халқына алғыс айтуымен қатар баршамыздың өз ата-анамызға, бауырларымызға да қала берсе барша отандастарымызға алғыс білдіретін күн екенін ұмытпайық!

Бір шаңырақ астында

Пятница, 01 Март 2019 03:58

Шымкентте 22 ақпанда, яғни Алғыс айту күні қарсаңында басталған апталық 1 наурызға дейін жалғасты. Апталық аясында әр күннің атауы белгіленіп, түрлі іс-шаралар ұйымдастырылды.

6565656

Ұстаздарға мың алғыс!

Қалалық Қазақстан халқы Ассамблеясы славян этно-мәдени бірлестігімен бірге ұстаздарға құрмет көрсетті. Мерекелік жиынға құрметті, ардагер ұстаздар шақырылып, сый-құрмет көрсетілді.
– Ұстаз – ұлт пен ұрпақ үшін қасиетті ұғым. Шәкірттерді білім нәрімен сусындатып, адамгершілік рухта тәлім-тәрбие беріп, жақсы қасиеттерді бойына дарытуда ұстаздардың еңбегі зор. Осыны ескеріп, Алғыс айту күні мерекесі қарсаңында ардагер ұстаздарға алғыс білдіріп, ерекше ілтипат көрсетуді жөн санадық, – дейді қалалық славян этно-мәдени бірлестігінің төрайымы Наталья Романова.

Жиын соңы қалалық оқушылар сарайының өнерпаздары дайындаған концерттік бағдарламаға ұласты. Осындай іс-шаралар қалалық әзірбайжан этно-мәдени бірлестігінің ұйымдастыруымен М.Сапарбаев атындағы ОҚГИ-де жалғасып, жастар ұстаздармен кездесті, мәртебелі мамандық жөнінде оқушылар арасында шығармалар байқауы өтті.

«Тағдыр тоғыстырғандар»

Ал «Тарихқа тағзым» күні Қазақстан халқы Ассамблеясында депортация жылдары Қазақстанға қоныс аударған этностар туралы «Тағдыр тоғыстырған» атты кітап, фото, тарихи құжаттар көрмесі ұйымдастырылды. Көрмеге оқушылар, студенттер мен жалпы жастар қатысып, Қазақстанға күштеп қоныс аударылған этностардың бастан кешкендерін, жергілікті халық тарапынан қандай қолдауларға ие болғаны жөнінде деректермен танысты.

Көрмеге өңірлік қоғамдық-саяси тарихы мемлекеттік архиві, Шымкент қалалық саяси қуғын-сүргін құрбандары музейі, қалалық «Отырар» ғылыми-әмбебап кітапханасы, білім мекемелері және этно-мәдени бірлестіктер 200-ге тарта тарихи-мәдени құжаттарды ұсынған.

Арзу Гурбанова – қазақ жеріне күштеп қоныс аударған әзірбайжан этносының үшінші ұрпағы. Ол қиын-қыстау кезеңде қазақтың дархан даласына тап болмағанда ата-бабаларының тағдыры немен аяқталатынын болжап айтудың өзі қиын екенін айтады.

– Тұтастай алғанда ХХ ғасырдың басынан бастап Қазақстанға 5,6 миллион адам күштеп қоныс аударылды. Қазақ отбасыларының өздері ауыр экономикалық жағдайларды бастан кешіп, бұрын-соңды болмаған қудалауға ұшырап жатса да қоныстанушыларға қолдау көрсетті. Қазақ жерінен пана тапқандардың арасында біздің аға ұрпақ өкілдері де бар. Жергілікті халық бас сауғалап келгендердің тілін түсінбесе де өз бауырындай қарап, барымен бөлісті.

Мейірім жылуын берді. Қазір де түрлі этнос өкілдеріне ұдайы қамқор көзбен қарап, бәйтеректей сая болып келеді. Қазақ халқының жақсылығын этностардың бүгінгі ұрпақтары ұмытпауы тиіс, – дейді Арзу Арипқызы.
Басқосуда түрік, иран, кәріс, шешен секілді бірқатар этнос өкілдері қиын-қыстау кезеңде пана болған қазақ еліне ақеділ алғысын айтып, патриоттық тақырыпта өлеңдер оқыды.

Этнос өкілдері қазақ отбасыларында қонақта

Алғыс айту күні мерекесі қарсаңында басталған апталық «Ықылас күні» атауымен жалғасты. Бұл күні саяси қуғын-сүргін қасіретін бастан өткізген этнос өкілдерінің бүгінгі буыны қиын-қыстау жылдары пана болып, қолдау көрсеткен қазақтардың бүгінгі ұрпақтары тұратын шаңырақтарға барып, алғысын білдірді.

КХА-алғыс айту 2

Мысалы, түрік этносының өкілі Тұрымбек Османов ата-бабалары пана тапқан Ақылбек Ахметбай ақсақалдың отбасына барды. Зұлмат жылдары бауырына басып, айрықша қамқорлық танытқаны үшін ризашылығын жеткізді.
Жанына қалалық кәріс, грек, иран этно-мәдени бірлестіктері мен «Ынтымақ» этносаралық бірлестігінің жетекшілерін ерте барған ол үй иесіне достықтың белгісі ретінде арнайы сыйлық тарту етті.

– Солақай саясаттың салдарынан біздің ата-бабаларымыз 1944 жылы Грузияның Ахысқа аймағынан қазақ жеріне қоныс аударды. 8 баласымен Шымкенттің маңындағы Қызылсай ауылына тап болған біздің бабаларымыз, яғни, Османовтар әулетін сол кезде Ахметбай ақсақал қабылдап, қоржын тамының бір бөлмесін ұсынды. Өздерінің басындағы қиын жағдайға қарамастан бір үзім нанымен бөлісіп, аштықтан, аурудан титықтаған халықты аман алып қалды. Осындай мейірімділігі үшін қазақ халқына шексіз ризашығымды білдеремін, – дейді түрік ақсақалы Т.Османов.

Қайтпас шағынауданында тұратын қос әулеттің ұрпақтары бүгінде өсіп-өнген. Бір туған бауырлардай өзара тығыз байланыста өмір сүреді.
Алғыс айту мекерекесін асыға күтетіндердің бірі – шешен этносының өкілі Разван Амачев. 1944 жылы шешен-ингуш халықтары қазақ жеріне депортацияланғанда Равзан ақсақал 14 жаста болған. Шешен этносының қазақтардан көрген жақсылығын немерелеріне үнемі айтып отырады. Мереке қарсаңында өздеріне қамқор болған Тоғыс ауылындағы Рыскелдиевтердің отбасына арнайы барып, шынайы алғысын жеткізді.

Осы күні қаладағы 16 этно-мәдени бірлестіктердің төрағалары да Шымкенттегі Қуатбек Қабылбеков, Қуат Сүйеубаев, Өлмесхан Жаныбековтың отбасыларына барып, қазақ халқының жасаған жақсылығын еске алды.

Жәрдемақы қалай төленеді?

Пятница, 01 Март 2019 03:56

ҚР Президенті Әкімшілігінің Ішкі саясат бөлімінің меңгерушісі Аида Балаева көпбалалы отбасыларға 21 мың теңге жәрдемақы қалай төленетінін түсіндірді.

Аида Балаева

Аида Балаева Фейсбуктегі жазбасында ең алдымен «Нұр Отан» партиясының саяси кеңесіне сайланғанын айта келе, партияластарының жоғары сенімін ақтауға тырысатынын сөз етті.
«Іс жүзінде жаңа әлеуметтік доктрина ұсынылды десек те болады. Оның басты басымдықтары - бұл өмір сапасын арттыру және халықтың аз қамтылған тобына қолдау көрсету. Мені ең маңызды әлеуметтік бастамалардың осы жылдан-ақ жүзеге асырыла бастайтыны қуантты» деп жазды ол.

Аида Ғалымқызының айтуынша, Мемлекет басшысының тапсырмасына сәйкес, биылғы 1 шілдеден бюджет саласының ең төмен жалақы алатын қызметкерлерінің айлығы 30 пайызға көбейеді (санитар жұмысшылар, мейірбикелер, техникалық жұмысшылар және т.б.), атқарушы органдардың азаматтармен тікелей жұмыс істейтін төменгі сатыдағы қызметкерлерінің жалақысы орташа есеппен 25 пайызға көтеріледі.

«Бұл мақсаттарға шамамен 980 млрд теңге бөлінеді. Әкімнің бұрынғы орынбасары ретінде бұл цифрлардың тасасында көптеген адамның әл-ауқатын жақсартуға деген үміті тұрғандығын білемін. Мемлекет басшысы айтқандай, реформаның нәтижелерін бүгіннен-ақ әрбір қазақстандық отбасы сезінуі тиіс. Дегенмен, меніңше, ең бастысы – Елбасының балаларға арналған төлемді көбейту жөніндегі шешімі.
Көпшілік үшін төлем тәртібі қалай айқындалатыны түсініксіз. Түсіндіруге тырысып көрейін.

Қазіргі уақытта атаулы әлеуметтік көмек жан басына шаққандағы табысы бекітілген кедейшілік шегінен, яғни, 14,8 мың теңгеден немесе күнкөріс минимумының 50 пайызынан төмен азаматтарға көрсетіледі. Мемлекет басшысының тапсырмасына сәйкес, кедейшілік шегі күнкөріс минимумының 70 пайызына дейін көтерілді және 20 800 теңгені құрайды. Бұл атаулы әлеуметтік көмек алушылардың әрбір баласына 20 800 теңге аударылады дегенді білдіреді.
Бүгінде 4 және одан да көп баланы тәрбиелеп отырған отбасы көпбалалы саналады. Егер көпбалалы отбасыда 4 бала болса, онда жәрдемақының жалпы сомасы 83 мың теңге болады. Ал егер анасы үйде отырса, онда оның атаулы әлеуметтік көмегі қосылады. Мұндай отбасының жалпы табысы шамамен 103 мың теңге болады» деп жазды Аида Балаева.

Сонымен қатар ол мүгедек бала тәрбиелеп отырған ата-аналарға, қамқоршылар мен отбасыларға жәрдемақы 30 пайызға көтерілетінін атап өтті.
«Аз қамтылған отбасыларға арналған арнайы 40 мың жалдамалы пәтер құрылысына қатысты бастама да қатты қуантты. Бұған қоса, Тұрғын үй құрылысы жинақ жүйесі арқылы жылына 2-3 пайызбен тұрғын үй заемдерін берудің жеңілдетілген тетігі әзірленетін болады. Бұл аз қамтылған отбасыларды баспанамен қамтамасыз етуде проблемасын шешудегі маңызды қадам деп санаймын.

Бұл жұмысқа өмір сапасының жаңа стандарттары жалдамалы баспана салу, заманауи жергілікті жолдар желісін дамыту, газ тарту, ауыз суға қолжетімділік сынды жаңа стандарттарды енгізе отырып, барлық өңір жұмылады» делінген жазбада.
Бөлім басшысының атап өтуінше, егер бұрындары автобандар мен республикалық маңызы бар жолдардың құрылысына назар аударылса, ендігі уақытта облысаралық және аудандық деңгейдегі автомобиль жолдарының желісі қарқынды дамытылады. Бұл облысішілік көлік қатынасының деңгейін жақсартады.

«Қорытындысында бұл өңірлердің экономикасына да, дамуына да септігін тигізеді. Бүгін айтылған барлық бастамалар қазақстандықтардың әл-ауқатының артуына айтарлықтай үлес қосатынына сенімім мол. Бұл ретте партия рөлі – халықпен тиімді өзара іс-қимылды қамтамасыз ету және Мемлекет басшысы жүктеген барлық міндеттердің жүзеге асырылуын мониторингілеу», - деді Аида Балаева.

Страница 5 из 289