Шымкент келбеті

Шымкент қаласында ерекше білім беруді қажет ететін балаларға арналған психологиялық-педагогикалық түзету кабинеті ашылды.

Дамуында ауытқуы бар балаларды түзетумен айналысатын өңіріміздегі алғашқы мекеменің жұмысымен танысқан облыс әкімі Жансейіт Түймебаев орталықтың маңыздылығына тоқталды.

– Балалардың өмірін жақсартып, лайықты болашаққа қол жеткізуге мүмкіндік беру үшін білікті мамандардың дер кезіндегі көмегі ауадай қажет. Сондықтан ерекше оқытуды қажет ететін балаларға және олардың отбасыларына тиісті жәрдем көрсететін осындай орталық ашылып отыр. Енді бүлдіршіндеріміз білікті мамандардың демеуімен қатардан қалмай тиісті деңгейде білім ала алады, – деді Жансейіт Қансейітұлы.

Бұл орталық «Дара» қайырымдылық қоры, облыстық білім басқармасы, «Samruk-Kazyna Trust» қайырымдылық қорының қолдауымен ашылған еліміздегі сегізінші кабинет. Онда дефектолог, психолог, логопед, сурдопедагог, тифлопедагог сынды мамандар тегін қызмет көрсетеді. Түзету кабинеті жылына 150 балаға дейін қабылдай алады.

Өңір басшысы «Дара» қайырымдылық қорының құрылтайшысы Гүлнар Досаеваға осы орталықтың құрылуына қосқан үлесі үшін алғысын білдірді. Өз кезегінде Г.Досаева мұндай орталықта дәріс алған балғындарда қатарға тез қосылып кететуіне мол мүмкіндік болатынын айтты.

Айта кетейік, Шымкент қаласында ерекше білім беруді қажет ететін тоғыз мыңнан астам жеткіншек бар. Оның ішінде төрт мыңнан астам баланың мүмкіндігі шектеулі болса, 672 бала мектепке дейінгі дамуында ауытқуы бар балғындар санатына жатады. Енді оларға жаңа орталықтан толық көмек алуға мүмкіндік бар.

ОҚО әкімінің баспасөз қызметі

Оңтүстікте балаларға арналған екі неврологиялық оңалту орталығы ашылды. Нысандардың салтанатты ашылу рәсіміне өңір басшысы Жансейіт Түймебаев, облыстық денсаулық сақтау басқармасының басшысы Мұқан Егізбаев пен сала мамандары қатысты.

Жалпы қазіргі таңда облыста 2500-ге жуық бала неврологиялық аурумен арнайы есепте тұрады. Дәрігерлердің мәліметі осындай. Бұған дейін бұл балғындар оңалту емін алу үшін Астана қаласындағы балаларды оңалту орталығына, Алматыдағы неврологиялық ауруханаларға баруға мәжбүр еді.

Себебі облыста бүгінге дейін сал дертіне шалдыққан балаларды емдейтін арнайы мекеме болмаған. Енді ерекше балалар мен олардың ата-аналары уақтылы əрі кешенді оңалтуға қол жеткізе алады. Екі орталықта 100 орыннан қарастырылған.

Медициналық мекеменің бірі Елшібек батыр көшесіндегі 112А ғимаратта орналасқан. Бұған дейін мұнда балаларға арналған аурухана болған еді. Енді сол ғимарат қайта жөнделіп, ел игілігіне беріліп отыр. Мұнда ашылған №1 облыстық балаларды оңалту орталығында 3 жасқа дейінгі балаларды оңалтуға бар жағдай жасалған. Елімізде ең алғаш болып ашылып отырған орталық массаж жасау, ойын бөлмелері мен оңалту құралдары секілді керек-жарақпен толық қамтамасыз етілген. Арнайы есепте тұратын балғындар мұнда өздері қарайтын емханадан жолдама алып, мемлекеттік портал арқылы жата алады. Ата-ана мен баласы үшін жайлы палаталар қарастырылған.

Екінші оңалту орталығы «Химфарм» шағынауданы, 4А мекенжайында орналасқан. Осыған дейін мұнда болған оңалту орталығы №3 облыстық балалар оңалту орталығы болып қайта құрылып отыр. Бұл орталықтың ерекшелігі – мұнда неврологиялық дертке шалдыққан 3 жастан 14 жасқа дейінгі балалар емделеді. Қажет емдермен бірге мұнда суы жылы бассейн де қарастырылған. Ал ең бастысы – Германиядан арнайы алдырылған «Loko Station» құрылғысы. Роботтандырылған құрал жүріп-тұруы қиын балаларды сауықтыруға аса қажет. Құны 73 миллион теңге тұратын құрылғыға отырған балаларға арнайы аяқ киім кигізіліп, өздігінен қозғала бастайды. Сол арқылы бұлшықеттер қозғалып, мимен байланыс орнатылады дейді орталық мамандары. Ең бастысы – басқа қалаларға сабылудан арылған ата-аналар мен балғындар мұндай орталықтардың өзімізде де ашылғанына разы.

Қазақстан Президенті Нұрсұлтан Назарбаевтың қатысуымен «Жаңа индустрияландыру: қазақстандық барыстың қадамы» ұлттық телекөпір өтті. Оның барысында Шымкентте көлік-логистика орталығында жаңа алып кешен ашылды. А+ санатындағы «Continental Logistics Shymkent» кешенінің қуаттылығы жылына 1 миллион тонна тауар өткізуге жетеді.

Телекөпірге Оңтүстік Қазақстан облысының әкімі Жансейіт Түймебаев пен «Қазақстан теміржолы» ұлттық компаниясының вице-президенті Санжар Елубаев және орталық қызметкерлері қатысты. Жоғары лауазымды басшылар алдымен Елбасыға жаңа нысанның маңыздылығы туралы баяндады.

– Құрметті Президент! Біз Шымкент қаласында мультимодельді көлік-логистикалық орталығының құрылысын аяқтадық.

Мұнда жыл сайын шамамен 1 млн тонна жүк өткізуге болады. Біздің орталық – Шығыс-Батыс, Оңтүстік-Солтүстік ағынына қызмет ететін кеден аймағы мен толық сервистік желісі қамтылған заманауи кешен. Нұрсұлтан Әбішұлы, осы инфрақұрылымдық жобаны іске қосуға рұқсат етіңіз! – деді «Қазақстан теміржолы» ұлттық компаниясының вице-президенті Санжар Елубаев.

Кешенде құрғақ және климаттық жағдайды бақылайтын қоймалардан бөлек контейнер терминалы, кедендік ресімдеу аймағы мен ілеспелі құрылымдар бар. Жаңа көлік-логистикалық орталығының ерекшелігі - географиялық тұрғыдан тиімді орналасуында. Аймақтың жүк жөнелтушілер үшін артықшылығы – мұнда Cross Docking мультимодельді қызмет көрсету жүйесінің енгізілген. Бұл жүйе қоймалардағы шағын жүктермен қоса жеміс-жидек пен көкөніс сияқты бұзылатын тауар үшін өте маңызды.

Қазіргі кезде жалпы аумағы 92 гектар «Оңтүстік» көлік-логистикалық орталығында 8 жоба жүзеге асырылуда. Олардың инвестициялық құны – 35,6 млрд теңге. Мұнда кедендік рәсімдеу, фитосанитарлық және ветеринарлық бақылау қызметтері бір терезе қағидасымен жүргізілсе, бұған қоса уақытша сақтау қызметі де қарастырылған.

Мемлекет басшысымен телекөпір барысында Шымкент қаласындағы «Химфармның» дәрі шығаратын цехы да іске қосылды. Жалпы құны 13,5 млн АҚШ доллары болатын бұл жоба кәсіпкерлікті қолдау картасы аясында жүзеге асырылған. Өнімнің 80 пайызы ішкі нарыққа, қалған 20 пайызы экспортқа жіберіледі деп жоспарлануда. Өндіріс цехы заманауи құрылғылармен жабдықталған. Мұнда 72 адам жұмыспен қамтылып отыр. Бұл жоба Шымкенттегі инвестициялық жобаның маңызды бір бөлігі болып табылады. Компанияның бас директоры Ижи Урбанец осымен төртінші цехтың ашылып отырғанын жеткізді.

– Біз жалпы көлемі 108 млн доллар көлемінде инвестиция құюды жоспарлап отырмыз. Жаңа цехты іске қосқаннан кейін біз экспорттық әлеуетімізді 5 млрд теңгеге жеткізе аламыз. «Химфармның» атынан фармацевтикалық саланы қолдап, инвесторларға ыңғайлы жағдай жасағаныңыз үшін алғыс айтамыз, – деді Ижи Урбанец.

Бүгінгі таңда зауытта 1200-ден астам жоғары білікті маман жұмыс істейді. Өндірістің барлығы әлемдік сапа стандартына сай келеді. Салалық GMP стандарына толық сай келетінін бұл цехта жылына түрлі дертті емдеуге арналған 20 миллионнан астам қорап дәрі шығарылады.

Ақпан Батыр атындағы №10 жалпы орта мектебінде жаңа спорт алаңшасы ашылды. Салтанатты шараға мектеп директоры, ата-аналар, жергілікті тұрғындар қатысты.

Бұл оқушылардың көптен күткен алаңшасы. Аталған оқу орны бұрын ер балаларға арналған спорт мектебі болған. Директордың тәрбие ісі жөніндегі орынбасары Гүлжан Бегалиева алдағы уақытта осы мектептен мықты спортшылар шығады деген үмітте.

«Қызылжар» шағынауданында жаңа білім ордасының іргетасы қаланды. Қазіргі таңда, 900 орындық мектептің құрылысы қарқынды жүруде.

Бұл жаңалыққа жергілікті тұрғындар қуанды. Себебі, осы уақытқа дейін 9 мыңға жуық халық тұратын шағынауданның балалары «Жайлау», «Тұрлан» шағынаудандарындағы және орталықтағы мектептерге қатынайтын еді. 

Маусым айында басталған құрылысты мердігер «Тур-Ахмет және компания» ЖШС-і жүргізуде. Жаңа мектепке қалалық бюджеттен 942 млн теңге қаражат қаралған.

– Іргетасын бетондау жұмыстары жүріп жатыр. Үш қабатты мектептің төрт корпусы бар. Оқу, спорт зал, кітапхана мен асхана, шеберханасы болады. Құрылысқа отандық өнімдер пайдалануда. Бетонның өзі жергілікті зауыттан әкелінді. Қызылжарлықтарды келесі жаңа оқу жылында қуантамыз, – дейді серіктестіктің прорабы Сартай Сартбаев.

Мектеп салуға әзірге бетондаушы, дәнекерлеуші, краншылар секілді 30-дан астам жұмысшы жұмылдырылған. Қазір Абай ауданына қарасты 35 мектеп бар десек, 2018 жылдың маусымында тағы бір білім нысанымен толығады.

Қала мерекесіне орай Шымкентте балалар кітапханасы пайдалануға берілді. Қалалық орталықтандырылған балалар кітапханасы жүйесіне қарасты №2 кітапхана бөлімшесі 112 орамда орналасқан, іргетасы 1977 жылы қаланған.

Қырық жылдық тарихы бар мекеме 2013 жыл апатты деп танылып, жарамсыз болған. Десек те, кітапханада 34 мыңға жуық кітап қоры және 2 мыңға жуық оқырманы болған. Келушілер саны да аз емес, 20 мыңға жеткен.

Мерекеде рухани мекен оқырманымен қайта қауышуына мүмкіндік алды. Биыл бюджеттен 44 млн теңге қарастырылып, сәуірде кітапхана іргетасынан бастап қайта салынды. Құрылысты мердігер «Нұр таңстрой» ЖШС жүргізіп, қыркүйек айында мекеменің кілтін табыстады. 

Балалар кітапханасының ашылу салтанатына қала әкімінің орынбасары Қайрат Нұртай, белгілі жазушы, халықаралық Алаш сыйлығының иегері Мархабат Байғұт қатысып, лентасын қиды. Мерекеге кітапханашылар, оқушылар мен елдімекен тұрғындары қатысты. Қайрат Ырзақұлұлы: Кітапхана нағыз – білімнің құдығы. Бұл кітапхананың қоры аз емес, енді балаларымыз кітапты электронды түрінде оқуына мүмкіндігі бар. Оқушылардың бүгін көп жиналғанына қуанып тұрмын», – деп игі тілегін жеткізіп, қуанышын жасырмады.

– Бүгінде адамзат кітапқа салқындап, интернетке бет бұрды. Бірақ, бұл уақытша құбылыс. Кітап қазақтың қара наны секілді қала береді. Әлеуметтік желі, интернетті білген, үйренген жақсы, бірақ кітап қатар жүруі тиіс. Текетіреспей, екеуінің арасына соғыс жүрмей, қайшылық тумай, бір-бірімен ықпалдаса, ынтымақтаса, үйлесімді әрекет жасау керек. Оны жасайтын мына жастар. Елбасының өзі болашақты кітап оқыған жастар басқарады деді. Мына 112 орамда қалың тұрғындар арасында жарқыраған үй пайда болды. Мұны игілікке жарата білейік, – деді құттықтау сөзінде жазушы-журналист Мархабат Байғұт.

Қонақтар ғимаратты аралап, танысты. Жаңа кітапхана жиһаз, компьютерлік техникамен жабдықталған. Интернет желісіне қосылып, «РАБИС» электронды бағдарлама бойынша жұмыс жүргізіп келеді.

Шымкент қаласында халықаралық талаптарға сай келетін теннис корты бой көтеруде. Ол 100 орынды трибунасы бар 2 теннис корты, арнайы жатақханасы мен 50 адамдық асханасы бар бiрыңғай спорт кешенiнiң құрамына кiретiн болады.

Нысан құрылысының барысымен танысқан қала әкiмi Ғабидолла Әбдiрахымов тиісті сала мамандарына арнайы тапсырмалар жүктеді. Айта кетейік, жаңа нысан «Абай» саябағында салынуда. Жаңа теннис кортында халықаралық деңгейдегi жарыстар өткiзуге мүмкіндік бар. 

Құрылысты «А.Р.Т.-Құрылыс» компаниясы атқаруда.

Құрылыс жұмыстары жыл соңына дейін аяқталады деп жоспарлануда.

Шымкентте «Химфарм» зауытында жылына 200 миллион таблетка шағаратын жаңа цех іске қосылды. SANTO зауытының 135 жылдығы аясында іске қосылған цехтың ашылу салтанатына облыс әкімі Жансейіт Түймебаев, Шымкент қаласының әкімі Ғабидолла Әбдірахымов, сондай-ақ, ҚР ИДМ Инвестициялар комитетінің төрағасы Сапарбек Тұяқбаев, Польша мемлекетінің Экономикалық даму вице-министрі Тадеуш Костинский, ҚР Денсаулық сақтау министрлігінің Фармация комитетінің төрайымы Людмила Бюробековалар қатысты. 

Жаңа цехтың жобасы Polpharm тобы мамандарының қолдауымен жүзеге асырылып отыр. Польшалық компания фармацевтикалық өнімдердің жаңа түрлерін жаңғырту және өндіру мақсатында «Химфарм» АҚ-на 100 млн АҚШ долларынан астам инвестиция құйған. Қазіргі уақытта компания отандық дәрі-дәрмектер нарығының 40%-ын, ал еліміздегі жалпы дәрі-дәрмектер нарығының 4%-ын қамтып отыр.

Салтанатты шарада сөз алған облыс әкімі Ж.Түймебаев зауыт тарихына тоқталып, кәсіпорынның ел экономикасының дамуына қосар үлесі көп екендігін алға тартып, зауыт басшылығы мен жұмысшыларының істеріне сәттілік тіледі.

Жаңа цех фармацевтикалық өнімдерге қойылатын GMP талаптарына сай салынған. Қатты дәрі шығаратын өндіріс цехы заманауи құрылғылармен жабдықталған. Мұнда 72 адам жұмыспен қамтылса, олардың басым бөлігі арнайы барып Polpharma тобының үздік өндіріс орындарында оқып келген. Шымкенттегі инвестициялық жобаның маңызды бөлігі болып табылатын аталмыш өндірістің құны 13,5 АҚШ долларын құрайды. 

«Химфарм» зауытының өндіріс қоржынында терапияның түрлі салаларындағы ауруларды емдеуге арналған 12 фарамацевтикалық топқа жататын генериктік және түпнұсқалық 200-ден астам дәрі-дәрмек бар. Компания өз өнімдерінің 90% ішкі нарыққа жеткізсе, 10%-ын Ресей, Қырғызстан, Тәжікстан, Моңғолия және Түрікменстанға экспорттайды. 

Айта кетейік, «Химфарм» 1882 жылы құрылған республикадағы ескі фармацевтикалық кәсіпорындардың бірі. Аталған кәсіпорынға 135 жыл толып отыр. 2011 жылдың тамыз айынан кәсіпорынның серіктесі еуропалық «Polpharmagroup» компаниясы болып келеді.

Қалада халықаралық стандартқа сай тағы бір қонақүй пайдалануға берілді. «Aidana Plaza» – қаладағы қонақүй реестрінде 90-шы болып тіркелді. Бизнес нысаны барлық заманауи талаптарға сай. Қала тұрғындары мен қонақтарына ыңғайлы сервис қызметін ұсынады.

Қонақүйдің салтанатты ашылу рәсіміне бірқатар танымал кәсіпкерлер, отандық эстрада жұлдыздары қатысты.

Шымкентте соңғы жылдары қонақүйлердің қатары артқаны байқалады. Өткен жылғы ақпан айындағы мәлімет бойынша, қалада 58 қонақүй сервистік қызмет көрсететін еді. Бүгінге дейінгі мәлімет бойынша қалада қонақүйлердің саны 90-ға жетіп отыр. 

«Aidana Plaza» – бизнес нарығында әлеуеті зор бірден-бір мекеме. 84 бөлмелік қонақүйде барлық қызмет түрі бар. Сондай-ақ, қонақүйде мейрамхана, жаттығу залы, конференц залы да жұмыс істейді.

Алдағы қыркүйек айының 1 жұлдызында қасиетті Құрбан айт мерекесі басталады. Осы ұлық мейрам қарсаңында Шымкентте жаңа мал сою бекеті ашылды.

Бұл халал қасап «СПК» мекемесінің ашылуына қала әкімдігі тікелей қолдау көрсеткен. 

Бекетке арнайы жер телімі берілген, онда қалалықтарға тәулік бойы қызмет көрсетеді. Заман талабына сай бұл халал қасап бекетін ашуға 20 кәсіпкер өз үлесін қосқан. Бүгінде мұнда тәуілігіне 250 ұсақ, 50 ірі қара мен жылқыны сойып, жіліктеп беруге барлық жағдай қарастырылған. Қалалықтар кез келген уақытта осы қорадағы малды сатып осындағы ветеринар мамандардың қатысуымен сойғызып алуына болады. Тіпті сырттан әкелінген малды да адал бауыздап беруге мүмкіндік бар.

Естеріңізге сала кетсек, бұған дейін Шымкент қаласында Дулати көшесінің бойындағы жеке үйлерде мал заңсыз сойылып келген. Қала тазалығына ерекше мән берген шаһар басшысы Ғ. Әбдірахымов тап осындай бекет ашуға кәсіпкерлерге ұсыныс берген болатын.