Шымкент келбеті

Шымкентте бос жұмыс орындары жәрмеңкесі өтті. Оның бір ерекшелігі – өңіріміз ғана емес, солтүстік облыстардан бос орындар ұсынылды.

Абай саябағындағы «Көркемсурет» галереясында өткен жәрмеңкеде жергілікті 214 жұмыс беруші 1 745 бос орын ұсынды. Ал Солтүстік өңірлерден 900-ден аса жұмыс беруші қатысып, 3 857 бос жұмыс орнына маман шақырды. Сондай-ақ, халықты жұмыспен қамту орталығы 4 мыңнан астам жұмыс іздеуші азаматты жәрмеңкеге шақырған.

Яғни, ол азаматтар ұсынылған бос орындар бойынша өзіне ыңғайлы кәсіпті таңдауға мүмкіндік алды. 2017 жылы еліміздің Солтүстік өңірлерінен ұсынылған бос жұмыс орындарына орналасу мақсатымен 360 отбасы қоныс аударуға ниет білдіріп, қазіргі таңда 51-і көшіп, жайғасып алды. Оның 28-і Солтүстік Қазақстанға, 2-уі Қостанай, 10-ы Павлодарға, 11-і Шығыс Қазақстан облысында қоныс тепкен.

Жалпы, Мемлекет басшысының тапсырмасына сәйкес, «Нәтижелі жұмыспен қамту және жаппай кәсіпкерлікті дамытудың 2017-2021 жылдарға арналған бағдарламасы» аясында соңғы екі жылда 23 мыңнан астам азамат әлеуметтік қолдауға ие болған. Сонымен қатар Бағдарлама шеңберінде 1100 жас түлек жастар практикасына қатысуға ниет білдірген және 2000-ға жуық жұмыссыз азамат қысқа мерзімді кәсіптік оқытуға қатысуда. «Тағы 700-ден астам азаматты ақылы қоғамдық жұмыстарға жолдау бүгінгі күннің басты мақсатына айналып отыр» дейді жәрмеңкені ұйымдастырушылар. Қалалық әкімдік өкілдері мұндай жәрмеңкені алдағы уақытта да ұйымдастырмақ.

Елбасы Нұрсұлтан Назарбаев Астана қаласында Индустрияландыру картасы жобаларын таныстыру және «Алтын сапа», «Парыз» сыйлықтарының жеңімпаздарын марапаттау рәсіміне қатысты. Бұл туралы Президенттің баспасөз қызметі хабарлады.

Телекөпір аясында еліміздің барлық өңірінен 11 тікелей көрсетілім жүргізіліп, соның барысында Қазақстан Президентіне Индустрияландыру картасының ең маңызды нысандары таныстырылды.

– Индустрияландырудың ең маңызды жобаларын іске қосу жыл сайынғы игі дәстүрге айналды. Біз бүгін металлургия, өнеркәсіп, құрылыс материалдары, машина жасау, көлік және логистика салалары бойынша 25 жобаны іске асыруды бастадық, – деді Елбасы.

Мемлекет басшысы ауқымды индустрияландыру бағытын ұстанғанымыздың дұрыс болғанын және оның уақыт талабына сай екенін атап өтті.

– Бүкіл еліміз бойынша бір мыңнан астам жаңа өндіріс іске қосылып, 100 мыңнан астам тұрақты жұмыс орны ашылды. Біз бүгін «Giessenhaus» жауапкершілігі шектеулі серіктестігінің алюминий қоспасын шығаратын, ал келешекте автомобиль дискілерін жасайтын жобасын іске қостық. POSKO, «Евразхолдинг», Tenaris, «Полиметалл» сияқты өз саласының көшбасшысы саналатын белгілі трансұлттық компаниялармен ынтымақтастық орнығуда, – деді Мемлекет басшысы.

Қазақстан Президенті өндірістік кооперация және автомобиль құрастыру саласындағы ынтымақтастық мәселелеріне назар аударып, еліміздің автозауыттарында электромобильдер құрастыру ісі басталғанын айрықша атап өтті.

– Бүгінде Қазақстанда 18 белгілі брендке тиесілі автокөлік құралдарының түрлі моделдері құрастырылады. Біз оларды Қытайға, Ресейге, Тәжікстанға, Өзбекстанға және басқа да елдерге экспорттаудамыз, – деді Елбасы.

Нұрсұлтан Назарбаев шикізаттық емес сектордағы өндіріс көлемін арттыруға және оның ел экономикасындағы маңыздылығына ерекше тоқталды.

– Химия өнеркәсібі саласында «Еврохим» трансұлттық компаниясы күрделі тыңайтқыштар шығару зауытының құрылысын бастады. 14 фармацевтикалық кәсіпорында халықаралық ДжиЭмПи стандарттары енгізілді. Бүгін «Химфарм» акционерлік қоғамы «Польфарма» ірі фармацевтикалық компаниясымен бірлесе атқаратын тағы бір жоба іске асырыла бастады. Құрылыс саласында негізгі құрылыс материалдары бойынша импортқа тәуелділікті жойдық. Heidelberg, KNAUF, Basf, Sika және басқа да шетелдік компаниялардың қатысуымен 180-нен астам жоба іске асырылды, – деді Мемлекет басшысы.

Қазақстан Президенті, сонымен қатар, экономиканы әртараптандыру үшін инфрақұрылымды дамытудың маңызы зор екенін атап өтіп, «Нұрлы жол» бағдарламасы аясында Еуразиялық мультимодальдік көлік дәлізінің іске қосылғанын және Батыс Еуропа – Батыс Қытай халықаралық көлік дәлізі құрылысының аяқталғанын айтты.

– Осы жылдар ішінде 2 мың шақырым теміржол, 5 мың шақырым автомобиль жолы салынды. Теңіз және әуе айлақтарына қайта жөндеу жұмыстары жүргізілді. Құрық портында теміржолға және автомобильге арналған паром кешені іске қосылды. «Қорғас – Шығыс қақпасы» арнайы экономикалық аймағы және Ляньюньган теңіз порты жобаларын жүзеге асыру нәтижесінде Азия-Еуропа бағытында Қазақстан арқылы жөнелтілетін контейнерлік жүк тасымалының көлемі жыл сайын еселеніп келеді. Бұл 2020 жылға қарай еліміздің тасымалдаудан түсетін табысын 5 миллиард долларға дейін арттыруға мүмкіндік береді, – деді Елбасы.

Іс-шара соңында Қазақстан Президенті «Алтын сапа» байқауы жүлдегерлерінің сыйлықтарын тапсырды.

Бүгінде «психологтың қабылдауына жазылдым» деген хабарды әрбіріміз үрейлене қабылдайтынымыз анық. Алайда, мұның еш әбестігі жоқ екенін айтады психолог-мамандар. «Психолог – адамның жан-дүниесіндегі ауыртпалықтан арылып, сезімдерін басқаруға көмектеседі, ал мінез-құлықтың ауытқуын емдейтін маманды «психиатр» деп атайды. Осы екеуінің айырмашылығын білген абзал», – дейді тәжірибелі психолог, коуч-тренер Айсұлу Бөрібаева.

Психолог – адам жанының айнасы

Біз шынында психологтың көмегіне санасында ауытқу байқалған адамдар ғана жүгінеді деп ойлаймыз.

– Психологиялық көмек – жан-дүниесі құбылып, өз сезімдері мен эмоциясын басқара алмай, кейде айтар ойын ішіне бүгіп, құсаланып жүргендерге қажет-ақ. Психолог және психотерапевт мамандары – дені сау адамдармен жұмыс істейді. Бұл тұрғыда менің психолог ретіндегі көмегіме мектеп жасындағы балалар мен отбасылық өмірдің қиындықтарын жеңе алмай жүрген жастар жүгінеді. Түптеп келгенде олардың жан-дүниесінде болып жатқан сезімдеріне ешкім мән бермегендіктен, жақын адамдарының назарын аудару мақсатын көздейді. Бірақ, сол назарын аударуға тырысып жасаған әрекеттері кейде сәтсіз аяқталып жатады, – дейді А. Бөрібаева.

Өңіріміздің психологтары «орта буын өкілдері жұмыстан босамайтын қоғамның жастары гаджетті дос тұтып үлгерген бүгінгі таңда психолог маманына деген қажеттілік күн санап артуда» деп дабыл қағады.
Балалар бұрынғыдай далада асыр салып ойнамайды. Біразы күн ұзақ сабақ оқыса, көпшілігі теледидар мен компьютердің алдынан тапжылмайтыны бізге мәлім.

Мектеп оқушыларына маман көмегі қажет пе?

Қала аумағындағы білім беру мекемелерінде психологиялық қызмет көрсету ҚР Конституциясы, ҚР «Білім туралы» Заңы және «Бала құқықтары туралы конвенциясы» мен ОҚО әкімдігінің 2015 жылғы 20 сәуірдегі № 111 қаулысымен бекітілген «Орта білім беру ұйымдарында психологиялық қызметінің жұмыс істеу қағидалары» шеңберінде жүзеге асырылуда.

Бөлім басшысы Жанат Тәжиеваның айтуынша, бүгінгі таңда қалалық білім бөліміне қарасты 132 мектептің барлығы психолог маманмен қамтылған. 

– Қазіргі таңда, жалпы 240 жоғары білімді педагог-психолог жұмыс істейді. Оның 132-сі күндізгі бөлімді бітірген, 108-і сырттай оқыған. 28-і жоғары санатты педагог-психолог болса, 35-і бірінші, 87-сі екінші санатты. Әзірге санатсыз тағы 90 психолог-маман сапалық құрамын жоғарылату бағытында жұмыс істеуде, – дейді Жанат Арысбекқызы.

Мектеп психологтары негізгі 5 бағыт бойынша қызмет көрсетеді. Атап айтқанда, психологиялық диагностика, психологиялық ағарту (профилактика), психотүзету (психокоррекция) және дамыту, психологиялық кеңес (консультация) жүргізу, кәсіби кеңес (консультация) жүргізу, сондай-ақ, әлеуметтік-диспетчерлік бағыттар.

Ж.Тәжиева Қоғамдық қеңесте қалалық білім бөлімінде атқарылған жұмыстар туралы баяндама жасаған болатын. Мәліметтерге сүйенсек, қалада 2017 жылдың 6 айында 18 суицид оқиғасы тіркелген. Оның 6-ы қала мектептерінің оқушылары. Өзіне қол жұмсамақ болған 18-дің 13-ін ажалдан арашалап қалғанымен, 5 суицид аяқталған. Аяныштысы сол, оның 4-і мектеп оқушысы, 1-і колледж студенті.

Сараптау нәтижесінде, оқиғалар отбасылық жағдайға байланысты орын алғаны анықталған.

Суицид, ерте жүктілік, аутодеструктивті мінез-құлықтың алдын алу, тәртібі өзгерген балалардың ата-аналарымен жұмыс жүргізу мақсатында қалалық және мектепішілік жоспарлар жасалған. Сондай-ақ, тоқсан сайын мектептің 3-11 сынып аралығында оқитын оқушыларына психодиагностикалық зерттеулер жүргізіліп, оның нәтижесі бойынша қобалжу деңгейі мен жүйкелік-психикалық тұрақтылық көрсеткіші назарға алынады. Қобалжу деңгейі жоғары балалармен арнайы топтық және жеке түзету-дамыту жұмыстарын психолог-педагог мамандар жүргізуде.

Үнемі тәжірибе арттыруға тура келеді

Білім бөлімі берген мәліметке сәйкес, жұмыс барысында мамандар балаларды салауатты өмір салтын қалыптастыруға үгіттейді. Негативті жағдайлармен түрлі тәуелділіктен арылуына көмектесуде. 

– «Педагог-психолог» мамандығы бойынша біліктілік алған мамандар жұмыс барысында кездескен қиындықты игеру мақсатында тұрақты түрде білімін жетілдіріп отырады. «Өмірдің қиын жағдайларына шыдамдылықты насихаттау», «Қиын жасөспірімдер және олармен жұмыс істеудің ерекшелігі», «Ата-ана махаббаты және ата-ана мінез-құлық стильдері», әлеуметтік педагогқа арналған «Ерекше назардағы оқушылармен және отбасымен жұмыс», «Қыз – ұлт мақтанышы және көркі», «ҰБТ-ға дайындық барысында психологиялық қолдау көрсету» тақырыптарындағы оқу-семинарларға тұрақты түрде қатысып, оқушылар арасында тренинг ұйымдастырып тұрады. Жалпы, балалардың мінез-құлқын дұрыс қалыптастырып, әр қадамын ақылмен басуға үйретуде, ой-өрісін дамытуда кәсіби психологтардың берері мол. Әйткенмен, біздің өңірде бұл мамандарды дайындайтын оқу орны жоқ, – дейді Ж. Тәжиева.

Ал тәжірибелі психолог, коуч-тренер Айсұлу Бөрібаева бұл салада көп ізденгенін айтады.

– Бізде психологтар емес, бұл маманды даярлайтын оқу орны болмай тұр. Педагог-психолог мамандығым теориямен шектеле берген соң бұл саланың қыр-сырын толық меңгергім келді. Тәжірибелі психология және психотерапия Еуразиялық институтында тәжірибе алдым. Бұдан кейін де адамның жан-дүниесі мен тәнін психологиялық тұрғыда зерделеп тағы 2-3 жыл психологияның қыр-сырын меңгердім. Жалпы, психолог деген – арт-терапия, құм-терапия, би-терапия, саз-терапия, гештальд-терапия болып түр-түрге бөлініп кете беретін өте терең мамандық. Бұрын психологтың атын естісе шошитын, қазір маман кеңесіне жүгінетіндердің саны артты. Олар жасөспірімдер, жас отбасылар, кәсібін немесе бір арманын жүзеге асыру жолында тәуекелге бел буа алмай жүрген жандар. Дегенмен, халық саны миллионға жақындаған қаламызда психолог мамандар саусақпен санарлық. Өйткені, бұл салада кадр даярлайтын бір де бір оқу орны жоқ. Мамандық алу үшін көп ізденіп, тіпті, шетелде оқып келуге тура келеді. Кәсіби психологтарды өзімізде дайындауды оқу орындары қолға алса жақсы болар еді, – дейді өзекті мәселені алға тартқан Айсұлу Бөрібаева.

Қазақстанда Президент Нұрсұлтан Назарбаев тапсырған, бес институционалдық реформаларды іске асыру үшін 100 нақты қадамды анықтап берген, жалпыұлттық  жоспарды  жүзеге асыру барысы толықтай жүргізіліп келеді.

Жалпыға Ортақ Еңбек Қоғамы идеясының көтерілуі басым бағыттардың бірі болып табылады. Жоба «Қазақстан-2050» стратегиясын іске асыруға және мемлекеттік саясатты индустрияландыру қажеттіліктеріне жауап беретін, жұмысшы және кәсіптік-техникалық мамандықтар қоғамындағы әйгілілікті және беделдерін арттыруға бағытталды.

ҚР Президенті Нұрсұлтан Назарбаев өзінің 2012 жылғы 10 шілдедегі «Қазақстанның әлеуметтік жаңғыртылуы: Жалпыға Ортақ Еңбек Қоғамына қарай 20 қадам» атты тұжырымдамалық бағдарламасының мақаласында  Жалпыға Ортақ Еңбек Қоғамы идеясын жариялады және оны республиканың әлеуметтік жаңғыртылу саясатының негізі деп атады. Елдің әлеуметтік жаңғыртылуының мәні біреудің асырауында болушылықтан белсенді өмірлік орнына жетуге – азаматтардың санасын түбегейлі өзгерту тұспалданады.  

«Бүкіләлем бұл тұтуыну идеологиясы құртатын болып табылатынына, барлық әлем ерекше шеленіске көздерін жеткізді. Ол әлемнің дамыған елдерінде бұқаралық әлеуметтік біреудің асырауында болуды тудырды және дағдарыстың ең басты себебінің бірі болып табылады. Бұндай жалған идея тек қана бүкіләлемде емес сонымен қатар дамыған елдерде де іске асырыла алмайтын, құрылымдық баламаны тауып алуға болады. Бұндай балама Жалпыға Ортақ Еңбек Қоғамының идеясы болып табылады», - деді мемлекет басшысы Н.Ә.Назарбаев.

Оның пікірінше, шетелдік тәжірибе осы үдеріс азаматтардың күшеюін қолдайтынын, олардың шығармашылықты шамаларына шатынын көрсетеді.

ҚР Президенті Н.Ә.Назарбаев өзінің мақаласында - адамдардың өз құқықтары мен еркіндіктерін белсенді қорғауға деген ұмтылысын көбейтеді, қоғамды өздігінен ұйымдастыру деңгейін арттыратынына тоқталып кетті.

Ол сондай – ақ қоғамда мемлекеттің шексіз емес екенін, ол азаматтардың жағдайының жақсаруына ықпал ететін серіктес деп түсіну керек екенін айтты.

Сондықтан да Президенттің Жалпыға Ортақ Еңбек Қоғамының идеясын құру туралы  идеясы өзінің мазмұны мен мағыналық жағынан ұлттық трендті көрсетеді. Бұл әр қазақстан халқы үшін де, мемлекеттік және қоғамдық құрылымдар үшін де әрекетке өзгеше жетекшілік ету.

Осы стратегиялық құжаттағы да мемлекет басшысының біздің елді дамыту бағытын дұрыс алып келе жатқанын көрсетеді. Бұл құжат маңызды және өзекті салаларды – еңбекті, білімді, жастардың әлеуметтік бағыттарын, денсаулықты, үй мәселелерін қозғайды.

Сондықтан елімізде жаңа мектептер,  ауруханалар, мәдени орталықтар салынып жатыр, бұған мемлекеттік кешенді бағдарламалар бағытталды. Әлемдік экономикадағы белгісіздікке қарамастан, оның ішінде сыртқы нарық, Қазақстан оң өзгеріске қол жеткізіп келеді.

С.ҚОЗИЕВ,
Шымкент қаласы Еңбекші аудандық әділет басқармасының 
бас маманы «Қазақстан заңгерлерінің одағы» РҚБ-нің мүшесі 

Жұмыс істеуге ниеті бар жандар үшін Шымкентте жұмыс көп. Мәселен, білім саласы бойынша қазірдің өзінде 100-ге жуық бос орын бар екен. Бұл «Нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған бағдарламасын» жүзеге асыру мақсатында Шымкент қаласының Халықты жұмыспен қамту орталығының ұйымдастыруымен «Орталық» саябақта өткен бос жұмыс орындарының кезекті жәрмеңкесінде белгілі болды.

Жәрмеңкеге қала аумағында орналасқан 256 кәсіпорын қатысып, 1666 бос жұмыс орындарын ұсынды. Атап айтқанда, білім саласы бойынша – 220, денсаулық сақтау саласы – 92, өнеркәсіп – 202, құрылыс – 62, транспорт және логистика – 21, мәдениет және спорт – 55, қызмет көрсету саласы 1014 бос жұмыс орындарын ұсынды. Сонымен қатар, 20 ірі кәсіпорын өндіріске қажетті мамандар іздеді.

– Сәуір айында өткізілген жәрмеңкеде 2 мыңға жуық бос орын ұсынылып, 520 адамға жолдама берілген болатын. Соңғы 7 айдағы қорытынды бойынша түрлі мекемелер ұсынған бос жұмыс орындарына 7 мың адам орналасты. «Нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған бағдарламасы» аясында кәсіби оқытуды дамыту жұмыстары да жүзеге асуда. Еңбек нарығына дайын болуы үшін бірінші жартыжылдықта 32 мамандық бойынша 1739 адамды 3 айлық курсқа оқуға жолдадық, – деді Шымкент қалалық жұмыспен қамту және әлеуметтік бағдарламалар бөлімінің басшысы Бауыржан Қуанышбаев. 

Жәрмеңкеге қатысушылардың да қарасы көп. Қолдарына енді диплом алған жастар ғана емес, ересектерді де байқауға болады. Шымкент қаласының тұрғыны Талғат Оразбаев 3 жылдан бері жұмыссыз екен. Жәрмеңкенің өтетіндігін кеше естіген. «Негізгі мамандығым дәнекерлеуші. Ата-анамның денсаулығына қараймын деп біраз жылдар жұмыссыз жүріп қалдым. Арнайы кітапшадағы тізімге қарасам «Химфарм» АҚ-да жүк тасушы қажет екен. Қазір сол жаққа жолдама берді», – дейді Т. Оразбаев.

Денсаулық сақтау, білім, өндіріс саласына жұмыс ұсынған мекемелер алдында жұмыс іздеушілер ұзын-сонар кезекте тұрды. Шымкент қаласының білім бөлімінің кадр бөлімінің маманы Нұрбол Елтаев мектептерге орыс тілі пәнінің мұғалімдері жетіспей жатқандығын алға тартты. Сондай-ақ, білім саласына жұмысқа қабылданудың жаңа жүйесі «T-Hunter» ресми сайты арқылы құжат тапсырудың жолдарымен таныстырды.

Бүгінде «екі қолға бір күрек іздеген жандар» үшін атқарар іс жетерлік. Ол үшін салаға сай мамандығың, біліктілігің мен білімің қажет болары сөзсіз. Бұл орайда, мемлекеттік «Жұмыспен қамту-2020» бағдарламасы жұмыссыз жандарды еңбекпен қамтуда оң нәтижесін беруде.

Бүгінде Шымкент қаласында жұмыспен тұрақты және нәтижелі қамтуға жәрдемдесу арқылы халықтың табысын арттыруды мақсат тұтқан бағдарламаның игілігін сезінгендердің қатары көп. Солардың бірі, кәсіби оқытудың қайта даярлау курсынан өткен қала тұрғыны Бақытжан Молдабеков Шымкент қаласы әкімдігінің «Халықты жұмыспен қамту орталығы» коммуналдық мемлекеттік мекемесінде электр құрылғыларын жөндеуші (электрик) мамандығын игерген. Және алған мамандығы бойынша «Оңтүстік Жарық Транзит» мекемесіне жұмысқа орналасты.

– Бүгінде «жұмыс жоқ» дегенді желеу етіп, бос жүрген жандардың әрекеті ақылға сыйымсыз дүние. Жұмыссыздық деңгейін төмендету бағытында мемлекеттік бағдарламаның баршаға берер тиімділігі мол. Мұнда қысқа оқу курстарынан өту арқылы арнайы мамандық алып, тұрақты жұмыс табуға мүмкіндік мол, – дейді Бақытжан Қамбарбекұлы.

Айта кетейік, бағдарламаның бірінші бағыты – қысқа мерзімді кәсіптік оқыту курстары бойынша биыл Шымкент қаласы бойынша мамандықтар тізбесі бекітіліп, онда 1739 білім алушы білім беру ұйымдарына жолданған. Онда талапкерлер аспаз, тігінші, электрик, кондитер, шаштараз, күтуші, визажист, жиһаз жинақтаушы, электргазбен дәнекерлеуші және тағы басқа жұмысшы мамандықтарын игеріп шығатын болады.

Шымкент қаласы бойынша 1739 білім алушы білім беру ұйымдарына жолданған. Онда талапкерлер аспаз, тігінші, электрик, кондитер, шаштараз, күтуші, визажист, жиһаз жинақтаушы, электргазбен дәнекерлеуші және тағы басқа жұмысшы мамандықтарын игеріп шығатын болады.

Еліміздің жұмыс күші көп Солтүстік өңірлеріне Оңтүстіктен қоныс аударуға ниет білдіргендер аз емес. Таяуда Шымкентке Павлодар облысы Екібастұз ауданының өкілдері келіп, бос жұмыс орындарын ұсынды.

Бүгінде Солтүстік өңірлерде ауыл шаруашылығы саласындағы мамандар үлкен сұранысқа ие. Бұл ретте Солтүстіктен келген жауапты сала жетекшілері Оңтүстік тұрғындарын бірлесе еңбек етуге шақырды. 

– Біздің Бестоған елдімекенінде екі шаруашылық егін салумен айналысады. Механизаторлар, малшылар, мектепке мұғалімдер қажет. Тіпті, электрик, мал дәрігері де тапшы. Осы ретте айтарым, мемлекеттен берілетін көмектен бөлек, шаруа қожалықтары еңбек ақысын тағайындайды. Қосымша үй-жай қарастырылады, – дейді Бестоған ауылының әкімі Жанат Ибраев. 

Айта кетерлігі, жұмыс іздеп барған азаматтар жүз пайыз жұмыспен қамтылады, сондай-ақ тұрғынүймен қамтамасыз етіледі. Еске сала кетсек, былтыр Оңтүстіктен 146 отбасы өңір басшыларының өзара келісімі бойынша Солтүстіктің төрт аумағына қоныс аударып, баспаналы болған. Олардың басым бөлігі қазір ауыл шаруашылығы саласында еңбек етуде.

Оңтүстіктікқазақстандық 300 азамат Ақмола облысында ірі кәсіпорындардың бірі болып табылатын «Новопэк» компаниясында жұмыс істеуге мүмкіндік алды.

Мұндай келісімге облыс әкімінің орынбасары Ербол Садыр мен «Новопэк» ЖШС-нің басқарушы директоры Айдар Жақыповпен болған екі жақты меморандум аясында қол жеткізілді.

Солтүстік өңірлерде бүгінгі таңда жұмыс қолының тапшылығы сезіледі. Бұл ретте Оңтүстіктен Ақмола облысына тұрғындарды қоныстандыру мақсатында жасалған меморандум аясында аталған зауыт басшысы Айдар Жақыпов облыстан баратын 300-ге жуық азаматты жұмыспен қамтып, баспана мәселесін шешуге көмектесетінін атап өтті.

Айта кетсек, 2003 жылы негізі қаланған «Новопэк» компаниясы полимерлік қаптама нарығында көшбасшылардың қатарында. Зауыт Австрия, Италия, Түркия және Тайвань елдерінің заманауи құрал-жабдықтарымен жабдықталған. Аумағы 45 мың шаршы метрді құрайтын кешен 600 адамды жұмыспен қамтуға мүмкіндігі бар. Бүгінде өндіріс орны айына 8 млн дана өнім шығарады.

Шымкентте «Жастар практикасы» жобасы аясында жас мамандар прокуратура, полиция қызметкерлерімен бірлесіп қоғамдық тәртіпті сақтауға үлес қоспақ. Бұл туралы Еңбекші аудандық прокуратурасында өткен жиында айтылды.

Басқосуға облыс прокурорының орынбасары Әбіл Қожахметов, қала әкімінің орынбасары Қайрат Нұртай қатысты. Жиында белгілі болғандай, бүгінде Шымкенттегі құқық қорғау органдарынан 40 орынға сұраныс беріліп отыр. Жауапты сала өкілдері алдағы уақытта жас мамандарға қажеттілік арта түсетінін айтады. Тиісінше, қоғамдық көмекшілердің жалақысы да көбейетін болады. 

Пилоттық жоба аясында жолдама алған жас маманның жұмыс кестесін жұмыс беруші мекеме анықтайды. Қазірдің өзінде облыс бойынша 200-ден астам халық жасақшысы қоғамдық тәртіпті сақтауға жұмылдырылып отыр. Айта кетерлігі, «Жұмыспен қамту-2020» бағдарламасының «Қоғамдық жұмыс» жобасы азаматтардың жасы мен біліміне қарамайды. Тек зейнеткерлік жасына жетпеген болуы тиіс. 

Облыс прокурорының орынбасары Ә. Қожахметовтың мәліметінше, полиция бекеттеріне қоғамдық көмекшілер әлі де жетіспейді. Бұл ретте құқық қорғау саласына қосымша жұмыс күшін тарту бағдарлама қатысушыларын тұрақты жұмыспен қамтуға септігін тигізбек.

Биыл «Жастар практикасы» негізінде Шымкентте 1300-ден астам жас маманды жұмыспен қамту жоспарланған. Тиімділігі сол, қоғамдық тәртіпті нығайтуға атсалысқан жастардың болашақта осы салада жұмысын ары қарай тұрақты түрде жалғастыруға мүмкіндігі мол.

Қазақстанда машина жасау, металлургия, химия өнеркәсібі, мұнайхимия, құрылыс материалдарын өндіру, азық-түлік өнімдерін өндіру сияқты Индустриалды-инновациялық даму мемлекеттік бағдарламасының алты басым саласы үшін кадрларды даярлау жүзеге асырылады.

– «Нұрлы Жол – болашаққа бастар жол!» Жолдауын және 2015-2019 жылдарға арналған ҚР ИИДМБ іске асыру аясында Қазақстан экономикасының басым салаларына білікті кадрларды даярлайтын ЖОО-лар анықталды, – деді ҚР Білім және ғылым министрлігі Жоғары және жоғары оқу орнынан кейінгі білім департаментінің директоры Дархан Ахмед-Заки.

Оның айтуынша, бүгінгі таңда базалық ЖОО-да 4 700 магистрант білім алуда. Соның ішінде 2015 жылы 1 900 адам, 2016 жылы 2 800 адам қабылданған.

Сондай-ақ, 2017 жылдың бірінші тоқсанында алғашқы 1 900 магистрант жұмыс істеу үшін ИИДМБ кәсіпорындарына жіберіледі. Әрбір магистрантпен олардың оқуға қабылданған сәтінен бастап бұдан арғы жұмысқа орналастыруды қамтамасыз ететін үшжақты шарттар (білім алушы-ЖОО-кәсіпорын) жасалынды.