Үшінші мегаполисте Наурыз мерекесі аясында «Ұлы дала хикаялары» атты заманауи өнер туындыларының жылжымалы көрмесі ашылды.

122

Бейнелеу өнері мұражайында еліміз бен шетелдерге белгілі Саид Атабеков, Смаил Баялиев, Сәуле Дүйсенбина, Виталий Симаков, Әлібай Бапанов, Рашид Нүрекеев, Молдағұл Нарымбетов, Алмагүл Меңлібаева сынды суретшілердің 100-ден астам туындысы көрермен назарына ұсынылып отыр.

Көрменің ашылу салтанатына халықаралық тәуелсіз тәлімгер, өнертанушы, «Asia Contemporary Art Week» директоры Лиза Ахмади, көрме тәлімгері, өнертанушы, арт-сыншы Юлия Сорокина қатысты.

Төрт экспозиция залына жасақталған өнер иелерінің шығармаларына Елбасының «Ұлы даланың жеті қыры» бағдарламалық мақаласы арқау болған.

Көрмеде дәстүрлі скульптура, көркем сурет, графика, сәулет қол өнер техникалары, сондай-ақ, инсталляция, преформанс, бейне және медиа-арт жанрларындағы дүниелер мен түрлі техникаларда орындалған еңбектер топтастырылған.

Айта кетейік, қала әкімдігінің ұйымдастыруымен басталған көрме 15 сәуірге дейін жалғасады.

Шымкенттегі «Тассай» индустриялдық аймақта құны 235 млн теңге болатын жаңа кәсіпорын іске қосылды.

zavod 5

Биотехнологиялық кешенде жүгеріден глюкоза-фруктоза шәрбәті, қантсыз сусындар мен кондитерлік тәттілер, жеміс консервілері шығарылады. Бұған қоса бөлек шикізат қалдықтарынан үй жануарларына жем тартылмақ.

Бұл жоба ҚР Білім және ғылым министрлігі, М.Әуезов атындағы Оңтүстік Қазақстан мемлекеттік университетінің химиялық технология және шикізаттық кешенді өңдеу ғылыми зерттеу институтының бір топ ғалымдары мен «АлиКа групп» ЖШС-нің үш жақты келісімімен жүзеге асырылып отыр.

Жоба 2016 жылы «Ғылым қоры» АҚ ұйымдастырған ғылыми жұмыстар байқауында грант жеңіп алған.
Қазақстандағы алғашқы глюкоза-фруктоза шәрбәтін шығаратын биотехнологиялық кешеннің ашылу салтанатына Шымкент қаласының әкімінің орынбасары Данат Жумин, «Ғылым қоры» АҚ төрағасы Әнуарбек Сұлтанғазин қатысты.

М.Әуезов атындағы ОҚМУ химиялық технология және шикізаттық кешенді өңдеу ғылыми зерттеу институтының директоры Абдуғани Азимовтың айтуынша, қант қоспасынсыз шығарылатын отандық өнім алдағы уақытта нарыққа шығарылады.

Биотехнологиялық кешеннің қуаттылығы тәулігіне 3 тонна глюкоза-фруктоза шәрбәтін, 6 тонна сусын, 4 тонна кондитерлік өнім мен жеміс консервілері, 2,5 тонна биокорм өндіруге жетеді. Шикізатқа өңіріміздің өнімдері қолданылады. Айта кетейік, жаңа кәсіпорында 40 жұмыс орны ашылып отыр.

Топ жарған Тоғжан!

Среда, 06 Март 2019 04:56

Соңғы жылдары елімізде көркем гимнастикамен шұғылданатын қаракөздеріміздің қатары артып келеді. Оның ішінде шымкенттік гимнастшылардың үлесі басым. 16 жасар Тоғжан Молдаханова – жақсы нәтижелер көрсетіп, болашағынан үміт күттіріп жүрген жастардың бірі. Осы кезге дейін көптеген жарыстан жүлделі оралып, жаңа белестерді бағындыруға тер төгіп жүр.

IMG-20190304-WA0016

Спорт шебері Тоғжан Молдаханова көркем гимнастикаға 4 жасында келген. 12 жыл бойы осы спортты серік етіп келеді. Спорттың нәзік те сұлу түрі - көркем гимнастика.

– Әдемі жүріс, ерекше киім үлгісі, ептілік, ырғақпен қозғалу. Өзгеге нәзік көрінгенмен, гимнастшы шымыр болу керек», - дейді ол. – Төрт жасымнан бастап ата-анамның қалауымен көркем гимнастика үйірмесіне бардым. Балалықтан болар, бастапқыда қиын көрінді. Ал кейін үйреніп кеттім.

Он екі жылдан бері кәсіби түрде осы спортпен айналысып келемін. Қазір аптасына алты күн жаттығу жасап, халықаралық жарыстарға дайындалып жүрміз. Жақында ғана Астанада өткен ҚР чемпионатында 2-орын алып келдім. Бұл – нағыз қыздарға арналған спорт түрі. Әуеннің ырғағымен түрлі қимыл-қозғалыс жасау маған ұнайды.

Қазақ көркем гимнастикасының қаһарман қызы Әлия Юсупова атындағы спорт мектебінен тәлім алып шыққан жас спортшының бағындырған белестері мен жеткен жетістіктері де аз емес. Ол 2016 жылдан бастап халықаралық сайыстарда бақ сынап, байрақты бәсекелерде жүлделі орындармен оралып жүр.

Түркия, Ресей, Белоруссия, Өзбекстан, Қырғызстан, Біріккен Араб әмірліктері мен елімізде өткен біріншіліктерде алдыңғы үштіктен көрінген ол енді Грекияда өтетін жарысқа дайындалуда.

– Ол турнирге қаламыздан 7 қыз барғалы жатыр. Мені Ольга Екатерина жаттықтырып жүрсе, хореографиядан Светлана Виторовна көмектесуде. Қазір барлық күш-жігерімді дайындыққа жұмсап жатырмын. Өйткені әзірлеп жатқан биіміз күрделірек. Үмітті ақтап, жүлделі ораламыз деп сенемін, - дейді жас спортшы.

Болашақта универсиада мен Олимпиада ойындарында өнер көрсетіп, ел мерейін асқақтатуды көздеген Тоғжанның спорттағы жетістігін оқу орны да лайықты бағалап жүр. Бүгінде ол академик Ә.Қуатбеков атындағы Халықтар достығы университетінде дене шынықтыру және спорт мамандығы бойынша бірінші курста тегін оқиды.

Жас спортшы көктемнің мерекесі – 8 наурыз Халықаралық әйелдер күнімен барша нәзік жандыларды құттықтауды ұмытпады.
– Қаламыздың барлық арулары мен апа-әпкелерімді шын жүректен төл мерекелерімен құттықтаймын.

Шаңырақтың ұйытқысы бола білетін әйел затының қоғамда алар орны ерекше екенін ескеріп, барша ханымдардың дендеріне саулық, отбасыларына амандық тілеймін! Бейбіт заманда берекелі жанұялар көбейсін!

Таяуда шымкенттік өрен «Зерде» XIV республикалық жас ғалымдар байқауынан жүлделі оралды. 1-7 сынып оқушылары арасындағы зерттеу жобалары мен шығармашылық жұмыстарының сайысында химия-биология бағытындағы Назарбаев Зияткерлік мектебінің оқушысы Әсем Әлімқұл екінші орынға ие болды.

558858

ХХІ ғасыр – зияткерлік пен жаңашылдықтың дәуірі. Заман өзгерістерінен тыс қалмай, өзінің жаңа технологиялық жетістіктерін паш ету – бүгінгі жас ұрпақтың үлесіне тиген үлкен мүмкіндік. Осыны ұғына білген Әсем де мектепте жүріп-ақ жаңалық ашуға болатынын тағы бір мәрте дәлелдеді. Нақтырақ айтсақ, ол аталған сайыста күнделікті тұтынатын ас-ауқаттағы C дәруменін тауып, әр түрлі тағамдағы витаминнің мөлшерін көрсеткен.

– Менің дәруменді нақтылау әдісім тек зертханаларда жүзеге асырылмайды. Оны үй жағдайында да кез келген адам сынап көруіне болады. Өзіме келер болсам, бір айды зерттеу жұмыстарына арнадым. Алдымен мектепте оқушылар арасында сауалнама жүргіздім.

Белгілі болғаны, біраз оқушылар дұрыс тамақтанбайтын болып шықты. Енді сыныптастарым бұл әдісті өз тәжірибесінде қолданып, тамақтанар алдында дәрумендердің мөлшеріне мән беретін болды, - дейді ол.

Әсем – оқуда озат, ізденімпаз оқушылардың бірі. Сондай-ақ, ол сабақтан тыс уақытта тенниспен кәсіби түрде шұғылданады. Болашақта химиялық зерттеу әдістерін меңгеріп, зертхана ашсам, дейді. Бұл жолғы жеңісін анасына арнап, барша нәзік жандылар мен аруларды алдағы мерекемен құттықтады.

– Көктем мерекесімен барлық қыздар қауымын шын жүректен құттықтаймын. Нәзіктік пен әдеміліктен тұратын арулар үнемі гүлдей құлпырып жүрсе деймін!

Ұрпағы батырды еске алды...

Пятница, 15 Февраль 2019 04:17

Осыған орай даңқты батырдың есімі берілген республикалық "Жас ұлан" мектебінің ұйымдастыруымен Ш.Қалдаяқов атындағы облыстық филармонияда «Қазақтың тұңғыш генералы – Сабыр Рахымов!» атты еске алу кеші өтті.

773333

Сабыр Омарұлы Рахымов 1902 жылы қазіргі Түркістан облысы Қазығұрт ауданы Көкбел ауылында өмірге келіп, 1945 жылы наурыздың 26-ында Польшаның Данциг (қазіргі Гданьск қаласы) қаласында қаза тапқан. Сүйегі Ташкенттегі бауырластар зиратына жерленген. Әскери қайраткер, генерал-майор (1943), Кеңес Одағының Батыры (1965). Әкесі ерте қайтыс болып, жас қалған Рахымовты шешесі (өзбек қызы) Өзбекстанға алып кеткен. Содан екі елдің ортақ батырына айналды.

Еске алу кешіне әскерилер мен Ұлы Отан соғысының ардагерлері, батырдың ұрпағы, ұлы тұлғаның атымен аталатын білім ошақтарының басшылары мен жас ұландар жиналды. Кеште Кеңес одағы батырының ерліктері дәріптеліп, естеліктер айтылды. Осы орайда майдангердің өмірінен сыр шертетін деректі фильмдер жұртшылық назарына ұсынылып, соғыс алаңында жасаған ерліктері тағы бір мәрте ұлықталды.

Салтанатты шарада батырға арналған жырлар орындалып, патриоттық әндер шырқалды. Жиын барысында еңбегі еленіп, оқуда көзге түскен жас ұландар марапатқа ие болды.

51931747 2385946588082006 4279105573753978880 n

Бүгінде басы ауырып, балтыры сыздамайтын жандар кемде-кем. Медицинаның дамыған тұсында халықтық емді де пайдаға жаратып жүргендер аз емес. Қазақтың дәстүрлі құндылықтарынан тамыр тартатын «Айкүне» халықтық емдеу тәсілі жайлы не білеміз? «Қазақ гимнастикасы» аталып кеткен жаттығулардың пайдасы қандай деген сауалдарға жауап іздеп көрдік.

2

«Айкүне» жаттығуымен айналысып дертінен дәрінің көмегінсіз құлан таза айыққандардың бірі – Динара Жақыпбекова. Осыдан 2-3 жыл бұрын дәрігерлерге қабырғаларының қисаюына шағым жасап барады. Оған ақхалаттылар сколиоз диагнозын қойып, емдік дене тәрбиесімен шұғылданып, суда жүзуге кеңес береді.

Бірақ науқас бұл емнен нәтиже байқамаған соң, Астанадағы «Айкүне» сауықтыру орталығына барып ем алады. Кейіннен «Айкүне» қазақ жаттығуының авторы, сынықшы Абай Баймағамбетовтің арнайы курсын оқып, франшизасын сатып алады. Бүгінде Динара Сапарқызы сауықтыру орталығын ашып, шаһардағы мұқтаж жандарға осы тәсілмен емделуге көмектесіп келеді. Өткен жылдан бері жүздеген жан осы жаттығудың көмегімен дертінен айыққан.

– «Айкүне» технологиясын, әсіресе, омыртқа және буын ауруларын емдеу үшiн қолданады. Сонымен қатар, оны омыртқааралық дисктердiң жарықтарын, энцефалопатия, семiру, невроздар, тартылулар, жарақаттанудан кейiнгi күйзелістер, тыныс демiкпесi, қояншықтың кейбiр түрлерi, тағы басқа ауруларды емдеуде қолдануға болады.

Сауықтыру орталығында емалушылардың ең жасы 8-ден басталады. Келушілер біздің нұсқаулығымызды қайталап отыруы тиіс. Жаттығу курсы базалық, классикалық, арнайы үш сатыдан тұрады,–дейді Д.Сапарқызы.
Ал сал ауруына шалдығып, төсек тартқандар осы жаттығудың арқасында аяққа тұра алады. Жалпы аурудың көпшілігі остеохондроздан (сүйек шеміршек ауруы) басталады.

Атап айтсақ, ішкі құрылыс және буын аурулары, бас аурулары, қан қысымы, қуық жолы, тағы да басқа аурулар. Адамда көпшілігіне сыртқы бұлшық еттер ғана жұмыс жасайды. Ал ішкі бұлшық еттер ұйқыда болады. Айкүне жаттығулары осы ішкі бұлшық еттерді оятып, адамның денсаулығын нығайтуға септігін тигізеді.

Қазақ және түркі сынықшылары қолданған мыңнан астам тәсілді жинақтап, «Айкүне» деп аталатын жаттығу түрін ойлап тапқан емші Абай Баймағамбетовке «Ресейдің ең үздік шипагері» деген атақ берілген. Баймағамбетов ойлап тапқан Айкүне жаттығуына 1998 жылы Ресейдің Жалпы патология ғылыми-зерттеу институтында және 2005 жылы Санкт-Петербург Мемлекеттік Педиатрлық медицина академиясында тәжірибе жасалған.

Бұл жаттығуға екі рет патент алынған. 2005 жылы Санкт-Петербург қаласының Денсаулық сақтау комитеті Айкүне жаттығуын емдік дене шынықтыру әдісі ретінде бекіткен.

2003-2006 жылдары Абай емшінің денсаулық шеберханасы негізінде медициналық және оқу мекемелерінде Айкүне технологиясын оқыту және енгізуде ғылыми-зерттеулер мен конференциялар ұйымдастырылған.

Айкүне – көне түрік тілінде «жаныңды аш, шынайы сөйле» деген мағынаны береді екен. Дегенмен жаттығудың қимылдары да, атауы да қазақы. Мұндағы қимыл түрлері бір-бір рудың атауымен аталып, рулық таңбасын алған. Сондықтан, бұл байырғы сынықшылық өнерімізді жаңғыртуға негізделген емдік тәсіл.

Бүгінде бойды тіктеп, сымбаттылықты арттыруға септігі тиетін сауықтыру орталықтар елімізбен қатар, Ресей, Ұлыбритания, Польша, Украина мемлекеттерінде дертке шалдыққандарды аурудан айықтырып, аяқтан тік тұруғызуда оң нәтижесін беріп келеді.

Еріктілердің еңбегі еленсе...

Пятница, 08 Февраль 2019 04:53

Қоғамда өзгеге көмектесіп, игі іске жақын жүретін жандар аз емес. Олар әртүрлі іс-шараларға қатысып, ерікті болып қызмет етеді. Сондай іске жастық ерік-жігерін арнаған жастың бірі Данара Сарановамен әңгіме «ASAA» жастар қоғамдық бірлестігі төңірегінде өрбіді.

Москва1

Ұйым президенті облыс, қала көлемінде үздіктер қатарында көрініп, нәтижелі жұмыс жүргізіп жүрген жастар қоғамдық бірлестігінің қалай құрылғанын, бүгінге дейін жеткен жетістіктерімен бөлісті.

– Бұл ұйым 8 жыл бұрын жастарды дамыту мақсатында құрылған болатын. Қоғамдық бірлестік өз жұмысын бастағаннан күні бүгінге дейін жастармен бірге өсіп, өркендеп келеді. Бұл – бізді оқытқан ұстаздардың идеясынан туындаған ұйым, – дейді Д.Саранова. – Дәлірегі мектепті бітірер жылы Access бағдарламасы арқылы екі жыл тегін ағылшын тілін үйрену грантын жеңіп алып, сәтті бітіріп шықтым. Ұстаз тілегі біздің қатысуымызбен жастардың дамуына септігін тигізетін ұйым құру болатын.

Ол біз үшін бастапқыда қорқынышты болып көрінді. Ол кезде елімізде жастар қоғамдық ұйымын құруға көмек беріп, қажетті құжаттарды толтыру, басқа да мәселелермен ақыл-кеңес айтып, жөн сілтейтін орталықтың болмады. Бірақ бұл біздің аяқтан нық тұрып кетуімізге, өз жобаларымызды жүзеге асуына кедергі бола алмады. Құрылған жылдардан бастап-ақ, АҚШ елшілігі ұйымдастырған гранттарын жеңіп алып, түрлі салалардың спикерлерінің тренингтерін ұйымдастырып келеміз.

Біздің қоғамдық бірлестік әртүрлі саланың өкілдерінен құралған. Еріктілер сапында Өзбекстан, Қырғызстан, Ресей, АҚШ елдерінің белігі ұйымдарымен серіктес болып жұмыс істейміз. Бұл ұйым менің екінші отбасыма айналып үлгерді. Тіпті, ортамызда жүріп өз бақытын тапқандар бар. Қазір олар болашақ перзенттерін күтіп жүр (күліп).

Армения 2

«АSAA» жастар қоғамдық бірлестігі өткен жылдың өзінде 2000-ға жуық жастың қатысуымен түрлі іс-шаралар ұйымдастырған. Жылда жұртшылықты ең көп қызықтырған тақырыптар аясында оңтүстіктегі аудан-қалаларда тернингтер өткізіп, өңірдегі жастар мәселесін шешуде жан-жақты атсалысуда.

– Былтыр «Самұрық Қазына Trust» қолдауымен әлеуметтік-кәсіпкерлік бағытында өткен «Әрекет» байқауында жеңіске жеттік. Біз «Дамыту орталығының» жобасын ұсынған едік. Аталған жоба аясында қызықты тренингтер ұйымдастырып, жастарды жұмысқа тарту көзделді. Бұл жоба биыл да жыл соңына дейін жалғасады.

Жақында жастарды дамту орталығын ашу жоспарда бар, - дейді жастар көшбасшысы. – Бұл мақсаттарды іске асыруда жастар ұйымдарының көмегі аз емес. Өйткені, жастар саясатындағы басты орынды алатын, жастар тарапынан көтерілген мәселелердің қыр-сырын білетін солар. Жастар ұйымдары әлемдік тәжірибеде жастар саясатын орындаушы аса маңызды субъектінің қызметін атқарады.

Оларға тиісті құқықтар беріп, тең қарастыру, пікірімен санасу қажет. Бірлестіктердің жұмысы көлеңкеде қалып қоймауы тиіс, сонда ғана олардың жұмысы жемісті болады.
Үш тілді жетік меңгерген Данара Саранова студенттік кезінен бастап ерікті болу арқылы өзіне жарқын орта қалыптастырып, үлкен тәжірибе жинағанын айтты. Сондай-ақ, Мәскеуде заңтану мамандығы бойынша магистратурада оқып жүріп, елшілікте тағылымдамадан өту мүмкіндігіне ие болған.

– Университет бітіргеннен кейін бір жыл заңгер болып жұмыс істедім. Кейін Мәскеуде магистратурада оқуға шешім қабылдап, көп уақыт созбай сол жаққа аттандым. Сабақтан тыс уақытты бос өткізбеу үшін Қазақстанның Мәскеудегі елшілігіне барып, тегін тәжірибе алдым. Тәжірибе жинау барысында түрлі ауқымды жиындарға қатыстым. Австрия, Швецария, Сербия, АҚШ сынды елдерді көріп, танымым кеңейді. Бастысы адамның өзіне деген сенімділігі. Бұл кез келген адамды алға жетелейді.

Өзіңе толық сенімді болу үшін білімің мен қатар өмірлік тәжірибең де мол болғаны абзал. Еріктілік бұл жәй ғана хобби деп қарайды. Ал негізінен бұл қоғамдық қызмет. Елдің игілігіне еңбектену деп түсінемін. Елбасының Үкіметке еріктілер қызметімен белсенді айналысатын ЖОО студенттерінің стипендиясын 30%-ға дейін көтеруді тапсырғанына қуаныштымын. Бұл үлкен қолдау деп есептеймін, - дейді Данара.

«АSAA» жастар ұйымы жастардың бойындағы көшбасшылық қасиетті дамытуға және оларға бүкіл әлем бойынша тәжірибеден өтуге жағдай жасауға бағытталған. Бұдан бөлек, АҚШ елшілігі ұсынған әлеуметтік жобалар байқауына шымкенттік жастардың тың идеяларын қосып, жеңген жағдайда оны жүргізуге көмектеседі. Аталған үкіметттік емес бірлестіктің Жастар жылына арналған жоспарлары айқын әрі сол ойға алған жобалардың жүзеге асыруға дайын.

Үшінші мегаполисте алғаш рет «U:projects» қоғамдық бірлестігі және «Shymkent» әлеуметтік-кәсіпкерлік корпорациясының ұйымдастыруымен  «U:hack» инновациялық идеялар фестивалі өтті. «U:hack» ағылшын тілінен аударғанда «Сен түзет» деген мағынаны білдіреді. Яғни, жастарға жалқаулығын жеңіп, өз өмірі мен қалаға өзгеріс жасауға шақырған мотивация. Жастар жылы аясында бастау алған жобаға көршілес Ресей, Өзбекстан, Қырғызстан және елімізден жалпы саны 1000-ға жуық адам қатысты.

DSC 1239-1-1

Екі күнге жалғасқан фестивальде ақпараттық технология, контент пен медиа, кино және видео, кәсіпкерлік тақырыбында секциялар ұйымдастырылып, танымал спикерлер арнайы тренинг өткізді.

«U:hack» инновациялық идеялар фестивалінің алғашқы күні әр секцияда өте өзекті мәселелер қозғалып, жастар тәлімгерлерді тапжылмай тыңдады. Әсіресе, контент және медиа, кәсіпкерлік бөлімдеріне қызығушылық танытқан жастардың қарасы қалың болды. Кездесу барысында кәсіп бастау мен медиа салаларын дамыту бойынша елімізге белгілі медиа-маман, блогер Әлішер Елікбаев WOWtоyotacamry70 жобасын мысалға ала отырып, жастарға қалай қызықты мәтін жазып, ол арқылы қаржы табуға болатынын айтты.

Зәуре Розмат «The steppe» жастар порталының жетекшісі ретінде бүгінгі онлайн журналдар туралы кеңінен әңгімеледі. Ал «Давай сходим» сайтының маманы Жәнерке Баубекқызы smm және копирайтертинг жайында толыққанды мағлұмат берді. Жас бизнесмен Фархат Әбдіқадыр болашақ кәсіпкерлерге қалай бизнес жүргізу керек екеніне тоқталып өтті.

Жастарды бір мақсатқа біріктірген ауқымды жобаға режиссер Серік Таласов пен Қыран Талапбек, колорист Виталий Бужан спикер ретінде қатысты. Олар кино жəне видео саласына қызығушылық танытқан əрбір жасқа идея беріп, тәжірибелерімен бөлісті.
Жастар қазақ киносының бүгіні мен ертеңі, режиссер мамандығының қыр-сыры, сапалы кино түсіру жайлы ұтымды кеңестерді тыңдады. Сондай-ақ өздерін қызықтырған сұрақтарға да жауап алды.

«ChocoFamily» холдингінің негізін қалаушы Рамиль Мухоряпов пен «Thousand IT» компаниясының жетекшісі Айболат Құлатай бағдарламалау, сайт және робот құрастыру жайын баяндады.
Айта кетейік, түнгі уақытта да жұмыс істеушілер үшін «Chaplin’s Coffee» және «Global Coffee» кофейнялары ашық болды.

DSC 0824

Бұл фестивалде жергілікті жастардың да туындылары таныстырылды. Шымкент қалалық №65 мектептің оқушыларынан құралған INO командасы қазақша сөйлейтін роботын таныстырды. Мобильді қосымшамен басқарылатын сервистік робот өздігінен қозғалып, қазақша қойылған сұрақтарға жауап бере алады. Жоба авторы Елдос Тұранның айтуынша, бұл робот құрастыруға 1 апта уақыт жұмсаған. Оны Ino.Lab инновациялық зертханасында жасап шыққан. Жас өнертапқыштар бүгінде аталған зертханада ақпараттық технология саласын меңгеріп жүр. Олар болашақта жасанды интеллектпен жұмыс істейтін осындай роботтарды көптеп жасамақ.

Осылайша бір жетіде құлтемірді қазақша «сайратқан» жасөспірімдердің еңбегін елге таныстырған фестиваль мәресіне жетті. 24 сағаттық бәсекеде үздік шыққан жоба авторлары анықталып, жас жеңімпаздарды Шымкент қаласының әкімі Ғабидолла Әбдірахымов марапаттады.
Іс-шараға қатысқан шаһар басшысы алғаш рет ұйымдастырылып отырған байқауға оң бағасын беріп, қаланың жалынды жастарына сәттілік тіледі.

– Республикалық маңызы бар қала барлық жағынан бәсекеге сай болуы керек. Бүгінгі байқауға еліміздің үздік жастары қатысып отырғанына сенімдімін. Біз жастарға қолдау көрсетуге әрқашан дайынбыз. Биыл Жастар жылы аясында ауқымды жобалар жүзеге асырылады, - деді Ғабидолла Рахматоллаұлы.

Сонымен IT бөліміне ұсынылған 50 жұмыстан үздік үш жоба іріктелді. Нәтижесінде бірінші орынды ақылды арба ойлап тапқан «Jastar-INOLAB» өнертапқыштар командасы, екінші орынды «Solvet team» тобы, ал ақылды жылыжай жобасын ұсынған «Creat IT» үшінші орынды иеленді. Контент және медиа секциясында 30 жоба ішінен білім беру саласын дамытуға бағытталған «Doge komek» командасының жұмысы үздік деп танылды. Екінші орын «Speak Up» тобына, ал үшінші орын заманауи граффит бейнелеу өнерін қолға алған «Steet art» қыздар командасына бұйырды.

Кәсіпкерлік бөлімінде 74 жоба әділ қазылардың назарына ұсынылды. Сабын өндіру бизнесін қорғаған «Tean dream» тобы бірінші орынды жеңіп алса, ұлттық нақыштағы зергерлік бұйымдар орталықтарын жандандыруға ниетті «Шашбау» командасы екінші орынға ие болды. Ал жастар арасындағы ажырасуды азайтудың оңтайлы жолын ұсынған тараздық «Kelin Master» командасы үштікті қортындылады. Кино және видео секциясында алғашқы орнынан «Cross crew» командасы көрінсе, «Hucking perfect» тобы екінші, елордалық команда үшінші орынды еншіледі.

Бұл реткі озық идеялар байқауының ерекшелігі өте қысқа уақыт ішінде ойда жүрген дүниелерді жобаға айналдырып, оны дамытуға қаржылай қолдау алуға мүмкіндік беріп отыр. Осы ретте жоба жеңімпаздарымен қатар үздік инновациялық жұмыстар ұсынған 3 командаға жалпы жүлде қоры 2 миллион теңгені құрайтын ақшалай сыйлық табысталды.

Ұйымдастырушылар фестивалді жылына екі рет өткізуді жоспарлап отырғанын және оның кез келген жастың креативті идеясын жоба прототипіне айналдыратын жастар алаңына айналатынын айтады. Аталған алаңда ең үздік әлеуметтік жобаларға баса назар аударылып, бастамашыл жастардың тың ұсыныстарына қолдау көрсетілетін болады. Бұл өз кезегінде жастарды кәсіпкерлікке баулуда тиімді құралға айналады. Іс-шара соңы Darkhan Juzz бен Chaplins music station тобы ұсынған музыкалық бағдарламаға ұласты.

DSC 1121

Страница 1 из 14