Қала тұрғындары мен қонақтары алдымен алаңды жүріп өткен «Ұлы Жібек жолы» керуенін тамашалап, «Тұран» этно-фольклорлық ансамблі мен жергілікті өнерпаздардың әндерін тыңдады.
— Бүгін қала тұрғындары мен қонақтарына Жібек жолы бойындағы көне Шымкент қаласын, тұрмыс-тіршілігін көрсеткіміз келді. Бұл іс-шараны жыл сайын ұйымдастыруды көздеп отырмыз. Біздің киіз басу, домбыра жасау, бесікке салу, тұсаукесер, қыз ұзату дәстүрлерін келушілерге таныстыратын арнайы бағдарлама түзілген. Осындай іс-шаралар арқылы Шымкенттің танымалдылығын арттырып, әрі халыққа есте қаларлықтай әсер қалдыруды ниет еттік, - деді қаланың туризм және сыртқы байланыстар басқармасының басшысы Ерлан Қыдыров.
Фестивальде Tary, Jeti tandyr, Bro Shashlyk және MaxPLOV мейрамханалары келушілерге ұлттық және шығыс тағамдарын ұсынды. Сондай-ақ этнодизайнерлердің дефиле шоуы, фото және кітап көрмелері, ұлттық тағамдарды әзірлеу бойынша шеберлік сағаттары ұйымдастырылды. ЭтноШымкентті тамашалауға келген голландиялық Рензо Костер қазақтың әдеп- ғұрыптарының тәрбиелік мәні жоғары екенін айтып, қолөнер шеберлердің туындыларына тәнті болыпты.
—Отбасымызбен Қазақстанға көшіп келгенімізге төрт жыл болды. Қазақтың үлкенге құрмет, кішіге ізет ұстанымдары, әдет-ғұрпы, салт-дәстүрі, тойлары маған қатты ұнады. Осындай тәрбиелік мәні зор қағидалар мен қолөнер шеберлерінің бұйымдары қазақ ұлтының ежелден келе жатқан жоғары мәдениетінің айғағы, - дейді шетелдік мейман.
Айта кетерлігі, фестивальде Шымкенттің тарихи, мәдени орындарына саяхаттайтын түрлі туристік маршруттар әзірленіп, олар жайлы ақпарат беретін гид-экскурсоводтар қызмет етті. Туристік автобустар да жолға қойылған.
Жауапты басқарманың мәліметінше, шаһарда әр мезгіл мен мерекелерге арналған іс-шаралар саны артады. Осы жылдың 9 айының экспресс көрсеткіші бойынша Шымкент қаласына 350 мыңға жуық адам келген. Соның ішінде шетелден келушілер саны 25 мыңнан асады. Аталған жоспарлы іс-шараларды өткізу арқылы туристік ағынды арттырып, жыл соңына дейін келушілер қатарын 400 мыңға жеткізу жоспары қойылған.