Қымбатты қала тұрғындары мен қонақтары!
Ғасыр сахнасынан тағы бір жыл тарих қойнауына сіңіп, 2023 жыл есік қағып тұр. Баршаңызды келе жатқан Жаңа жылдарыңызбен шын жүректен құттықтаймыз!
Жаңа жыл – өткен уақытқа есеп, жаңа бастамаларға серпін беретін және өзгерістерге жол бастайтын жарқын мереке. Әр жыл өзінің ерекше оқиғалары және жақсы жаңалықтарымен есте қалады. 2022 жыл Шымқаланың шежіресінде өз бедерін қалдырған табысты да тынысты жыл болды.
Шаһарымыз экономикалық әлеуеті жағынан өркендей түсті, өндіріс саласында тың бастамалар өріс алды. Халықтың әлеуметтік-тұрмыстық жағдайы жақсарды. Биыл Қазақстанда «Инвестиция жасауға қолайлы өңір» жүлдесін жеңіп алған қаламыздың экономикасының көптеген саласында оң өзгерістер бар. Солардың ішінде қалада бір жылда атқарылған жұмыстарды атап айтсақ, 2 индустриалды аймақтың құрылысы жүріп жатыр, 14 өндіріс орны ашылып, тұрғындарға қаншама жұмыс орны ұсынылды. Белсенді жұмыс істейтін кәсіпкерлік субъектілер саны 107 мыңнан асып, өткен жылмен салыстырғанда 42 пайызға артты. Әлеуметік бағытта 36 мыңнан астам адам тұрақты жұмысқа орналасты. Пайдалануға берілген үйдің көлемі 1,06 миллион шаршы метрді құрады. Жаңа 41 мектеп
оқушыларға есігін айқара ашты.
Бірінші кезекте қала үшін маңызды жобалар Көмешбұлақ магистралды суаққысы, Бозарық қосалқы стансасы мен АГРС іске қосып, ауыз су, электр жарығы және табиғи газ тапшылығы шешілді.
Қоян жылында да халықтың игілігі үшін атқарылатын жұмыстар көп. Қаланың жаңа Бас жоспары бекітіледі, елді мекендерді ауыз су, электр жарығымен қамту деңгейі 100 пайызға шешіледі.
Білім, денсаулық, әлеуметтік салаларда жаңа нысандар ел игілігіне табысталады.
Қадірлі шымкенттіктер!
Қаламыздың келбеті келісті, әр ісі жемісті, болашағы өрісті бола берсін! Берекеміз бен бірлігіміз нығайып, әрқайсыңыздың шаңырағыңызды бақыт пен шаттық тербесін!
Еліміз тыныш, аспанымыз ашық болсын!
Мұрат ӘЙТЕНОВ, Бахадыр НАРЫМБЕТОВ
Шымкент қаласының Әкімі Шымкент қаласы мәслихатының хатшысы
