Үшінші мегаполисте елімізге белгілі отандық BI Group компаниясы заманауи жаңа көпқабатты үй тұрғызады. Қала әкімі Ғабидолла Әбдірахымов Tamerlan residence тұрғын үй кешенінің жоба макетімен танысты.
Бизнес-класты тұрғын үй кешенінде 1,2,3 және 4 бөлмелі барлығы 349 пәтер бар. Жалпы көлемі 51 мың шаршы метрді құрайды. Кешенде 7 блок пен екі деңгейлі жерасты паркингі салынады.
Салтанатты іс-шараға қатысқан қала әкімі Ғабидолла Әбдірахымов көпшілікті 1 мамыр – Қазақстан халқының бірлігі күнімен құттықтады. Қаланың көркеюіне үлес қосып отырған компания басшылығына алғысын білдіріп, сәттілік тіледі.
– Жаңа тұрғын үй кешенінің құрылысын бастаған компания жетекшілеріне алғыс білдіремін. Бұл компания қалада бірнеше жобаны сәтті жүзеге асырып келеді. Оның бірі – келесі жылы салтанатты түрде ашылатын Конгресс холл.
Бұған қоса қала тұрғындарына жайлы баспана салу ісін қолға алып отыр, - деді қала әкімі.
Тұрғын үй кешені әкімшілік-іскерлік орталығында, Бәйтереков көшесінің бойында орналасқан. 12-16 қабатты кешеннің болашақ тұрғындарына шетелдік жүк және жолаушыларға арналған дыбыссыз лифтілер, бейнебақылау мен күзет қызметі тәулік бойы қызмет етеді.
– Құрылыстың бірінші кезеңі 2020 жылдың қазан айында бітеді деп жоспарланған. Онда тұрғын үй кешенінің 4 блогы салынады. Пәтердің бағасы 1 шаршы метріне 290 мың теңгеден басталады,– деді жоба жетекшісі Нышаналы Қалдыбаев.
Салтанатты іс-шарада эстрада жұлдызы Қайрат Нұртас пен «7-құрылық» би тобы өнер көрсетті. Сондай-ақ, ұтыс ойындары ұйымдастырылды.
