Шымкент қаласында 1200 орынды жаңа жекеменшік мектеп пайдалануға берілді. Ғимараттың ашылу салтанатына қала әкімі Ғабидолла Әбдірахымов қатысып, білім ордасының ашылуымен құттықтады.
Жаңа мектепке Абай Құнанбаевтың 175 жылдық мерейтойына орай ұлы ақынның есімі берілген. Екі ауысымда 2400 оқушы оқи алатын білім ошағында балалардың білім алуына, салауатты өмір салтын қалыптастыруға барлық жағдай жасалған. Мектепте оқушылардың қолөнермен, тігін тігумен айналысуына, түрлі өнер үйірмелері мен спорттық іс-шараларға қатысуына мүмкіндіктері бар.
ҚР Білім және ғылым министрлігінің жаңа жүйесі бойынша осындай жекеменшік мектептерге мемлекеттік тапсырыс бойынша жан басына шаққанда қаржы төленеді. Бүгінде бұл жүйеге қаладағы бірқатар мектептер көшкен. Мәселен, 2018-2019 оқу жылында қаладағы 11 жекеменшік мектеп 4200 оқушы бойынша мемлекеттік сатып алу аясында қаржыландырылған.
