Еліміздің қай жері де қастерлі, қайсы аймағы да елімен, жұртымен, ұлттық ұстанымдарға беріктігімен, салт-дәстүр ерекшелігімен ардақты. Солай десек те Шымкенттің жөні бөлек, Шымкенттің айдары, айбары ерек.
Шымкент десе, қаймағы бұзылмаған қазақы қалың елдің еңселі жұрты мәртебеңді биіктетеді.
Шымкент десе, қазақтың дәріпті салт-дәстүрлерін ұрпаққа өнеге етіп келе жатқан дәстүрлі жолы бар бекзат мекен алдыңнан шығады.
Шымкент десе, ұлттың уығын бекітетін ұрпақты көбейтіп жатқан алтын құрсақты асыл аналарымен ардақты елді мақтан тұтқың келеді.
Шымкент десе, қара жерді гүл еткен, берекелі даласын маңдай терімен түлеткен, егісіне алуан өнімін жайқалтып еккен еңбекқор да бейнетқор адамдар көз
алдыңа келеді.
Шымкент десе, тарих пен шежіре тұнған, мәдениеті мен рухани тіршілігі тұтас бір энциклопедиялық құндылықты құрған, Ескі қаланың орнына жаңа, көркейген, көрікті шаһар тұрған мерейлі мегаполиспен қауышатыныңыз анық.
Шымкент десе, қонақжай, жаны жомарт, мейманға мәрт, көкірегінен Күн күлген, мейірімді де қайырымды тұрғындар өмір сүретін көңілі салқар, жері шалқар шаһар қарсы алады.
Шымкент десе, жақсыны жатсынбайтын, келгендерді көпсінбейтін, іргесіне көрші қонса, ығысып орын беретін, алысты жақындататын, барша жұртты бауырына басатын, 100-ден астам ұлт пен ұлысты бір шаңырақ астына топтастырған, әлеуетті де салтанатты қоныс құрған өрісті өлкені көресіз.
Шымкент десе, Ұлы Жібек жолымен қиылысқан, ертедегі орта ғасырлық – Отырар, Исфиджаб (Сайрам), Яссы (Түркістан), Сүткент, Сығанақ, Сауран және тағы басқа аңызға айналған қалалар қоршаған, ежелгі өркениеттен тамыр тартқан, тағлымы мен тағдыры терең, таңғажайып кент ғасырлар қойнауынан қол бұлғайды.
Шымкент десе, Елбасы Нұрсұлтан Назарбаевтың «Бұл өмір бір-ақ рет беріледі, оны Шымкентте сүру керек» деген астарлы, әдемі сөзі, қазақтың абызы Әбіш Кекілбаев ағамның «Шалқайсам, арқамды Шымкентке сүйеймін» деген тәмсілі, жампоз жазушы
Мұхтар Мағауиннің «Шымкент Қазақстансыз өмір сүре алады, Қазақстан Шымкентсіз өмір сүре алмайды» деп әзілге жыға айтқан жылы пікірі, қоғам қайраткері Бекболат Тілеуханның «Кім Шымкентті жамандаса – сол бүкіл қазақтың жауы» деп елдікке шақырған үні, халық ақыны Әселхан Қалыбекованың:
«Қазақтың Шымкентте бестен бірі,
Ешқашан шығармаңдар естен мұны.
Әрқашан бізге қарап өлшенеді,
Қазақтың қаншалықты өскендігі»,-деп ұлысына ұйытқы болған аймақтың рухының биіктігін танытқан өлең жолдары еске түседі.
Шымкент десе, Алланың өзі мейірін иіп берген, өмір сүруге қолайлы, Күні де ыстық, көңілі де ыстық, аспаны шуақты, халқы қуатты, бірлігі тұрақты шат-шадыман шаһарда шалқып өмір сүретін тұрғындармен табысатындайсың.
Ұлы ойшыл, философ Әл-Фараби бабамыздың «Қайырымды қаланың тұрғындары» трактатындағы ізгілікті қоғам болмысының негізгі тетіктері мен қажетті шарттары Шымқаланың шырайы мен райына әбден келеді деп ойлаймын. Сондықтан Шымкентті қайырымды қала деген дұрыс. Себебі, әрбір адамның тіршілік етуі мен кемелділікке жетуі үшін қандай да болмасын қауым керек. Әл-Фарабидің пікірінше, соған «қайырымды қала» идеал болып табылады.
Ал, менің идеалым – Шымкент!
