Іс-шараға «Азаматтарға арналған үкімет» мемлекеттік корпорациясының мамандары, ҚР Мемлекеттік қызмет істері агенттігінің өкілдері, қалалық полиция департаментінің қызметкерлері қатысты. Бұл күні 1000-ға жуық көлік иесіне мемлекеттік қызметтерді «көмекшілерсіз» қалай алуға болатыны туралы түсіндірілді. Оларға жүргізуші куәліктерін беру және көлік құралдарын тіркеу қызметтерін онлайн алу процесі көрсетілді.
– Мұнда күн сайын 500-ге жуық жүргізуші куәлігі беріліп, 1500-ден астам көлік құралы тіркеледі. Көптеген мемлекеттік қызмет электронды форматқа көшуде. Онлайн тіркеу мамандандырылған ХҚО-ға жүгінбей-ақ, автокөлікті рәсімдеуге және жүргізуші куәлігін ауыстыруға мүмкіндік береді. Бұл азаматтардың уақытын айтарлықтай үнемдейді және кезек күту қажеттілігін жояды, - деді корпорация филиалының директоры Данабек Исабеков.
ҚР Мемлекеттік қызмет істері агенттігі департаментінің басшысы Әли Көмекбаевтың айтуынша, компьютерді пайдалану мүмкіндігі жоқ азаматтар мемлекеттік қызметтерді қалада орналасқан egov аймақтарында ала алады. Мұндай әр қызмет көрсету секторы қажет техникамен жабдықталып, электронды үкімет порталы мен басқа да мемлекеттік ресурстарды пайдалануға мүмкіндік береді. Шымкенттіктер өздеріне жақын нүктелерді 2ГИС қосымшасы арқылы таба алады.
Анықтама: 2020 жылы Шымкент қаласындағы мамандандырылған ХҚО қызметкерлері азаматтарға 52 мыңға жуық жүргізуші куәлігін беріп, автокөліктерді қайта тіркеу бойынша 195 мыңнан астам қызмет көрсетті.
Жыл басынан бері 7 мыңнан астам қызмет алушы жүргізуші куәлігін электронды өтініш беру арқылы ауыстырды. Сонымен қатар, көлікті қайта тіркеу бойынша 10 мыңға жуық автокөлік иесі онлайн қызметті пайдаланды.
Естеріңізге сала кетейік, Шымкент қаласында мамандандырылған 3 халыққа қызмет көрсету орталығы жұмыс істейді.
