БАЛА ТӘРБИЕСІ – ОРТАҚ ІС Избранное

Среда, 20 Октябрь 2021 04:27 Автор  Опубликовано в Қала Прочитано 347 раз

Үшінші мегаполисте «Ата-ана – ұлттың ұясы» атты форум өтті. «Сенімен болашақ» республикалық қоғамдық бірлестігі ұйымдастырған ауқымды іс-шараға Шымкент қаласының әкімдігі қолдау көрсеткен.

111

 

Алғаш рет оффлайн өткен форумға Шымкент қаласы әкімінің бірінші орынбасары Шыңғыс Мұқан, «Сенімен болашақ» қоғамдық бірлестігінің құрылтайшысы Нұркен Асанов, ҚР Ақпарат және қоғамдық даму министрлігі Жастар және отбасы істері комитетінің төрағасы Шахмардан Байманов, «Білім-Инновация» халықаралық қоғамдық қорының президенті Дархан Өте, Түркістан облыстың адами әлеуетті дамыту басқармасының басшысы Рақымбек Жолаев, ата-аналар мен қала тұрғындары, БАҚ өкілдері қатысты.
Пленарлық отырысқа «Сенімен болашақ» қоғамдық бірлестігінің төрағасы, педагог Ғалымбек Бермағанбетов модераторлық жасап, жүргізіп отырды. Форумға ҚР Білім және ғылым вице-министрі Шолпан Каринова онлайн қосылып, сәттілік тіледі.
«Сенімен болашақ» республикалық қоғамдық бірлестігінің құрылтайшысы, қоғам қайраткері Нұркен Асанов, әсіресе, пандемия ұрпақ тәрбиесіне салғырт қарауға болмайтынын ұғындырғанын, интернет дамыған заманда әр ата-ананың балалардың жанынан әрдайым табылу маңызды екеніне тоқталды. Ал Шымкент қаласы әкімінің бірінші орынбасары Шыңғыс Мұқан бала тәрбиесі әр ата-ананың өзіне тікелей байланысты екеніне баса назар аударды.
– Баланы тәрбиелеу үшін алдымен өзімізді тәрбиелеуіміз керек. Қарапайым мысал ретінде айтайын, барлығымызда дерлік ұялы телефон бар. Статистика бойынша адам әр 3 минут сайын сол телефонға қарап қоя береді. Сөйте тұра баласына гаджетке құмар болмауды ескертеді. Ал ол үшін ересек адам алдымен өзі үлгі болуы керек. Оқушылардың жанында мұғалімі 5-6 сағат болса, тәуліктің қалған уақытында ата-анасы болады. Сондықтан, ата-ана ретінде жауапкершілікті сезінуіміз керек, – деді Шыңғыс Жұмабекұлы.
Форум барысында, сонымен қоса, ҚР Ақпарат және қоғамдық даму министрлігі Жастар және отбасы істері комитетінің төрағасы Шахмардан Байманов, «Білім-Инновация» халықаралық қоғамдық қорының президенті Дархан Өте, Түркістан облыстың адами әлеуетті дамыту басқармасының басшысы Рақымбек Жолаев сөз сөйлеп, бала тәрбиесі жолындағы көзқарастарын, ұсыныстарын айтты.

Нұрлан БЕКТАЕВ

Қ.А.Яссауи атындағы халықаралық Қазақ-Түрік университетінің филология факультетін 2005 жылы тәмамдаған. Журналистика саласында 2006 жылдан бері еңбек етіп келеді. 2006-2017 жж аралығында "Отырар-TV" медиахолдингінде жұмыс істеген. 2017 жылдың қараша айынан бастап қалалық «Шымкент келбеті» қоғамдық-саяси газетінің тілшісі. 2018 жылдың наурыз айы мен 2019 жылдың тамыз айлары аралығында газеттің бас редакторының орынбасары қызметін атқарды.