Шымкент келбеті

Шымкент қаласы Абай ауданының сот орындаушылар бөлімі 1 наурыз - алғыс айту күнінде қайырымды іс жасауға өз үлестерін қосты. Сот орындаушылары қаладағы көпбалалы Кенжебековтер отбасына қонаққа барып, балаларға мектепке қажетті құралдар мен киім-кешек сыйлады. Бұған қоса тәттілер тарту етті.

- Алғыс айту күнімен қатар 8 наурыз - халықаралық әйелдер күні мерекесінде де ұжымымызбен бірлесе отырып, көпбалалы әрі әлеуметтік тұрмысы төмен отбасыларына көмек беруді мақсат еттік. Балаларға да қуаныш сыйлағымыз келді, - дейді Абай аудандық сот орындаушылары бөлімі басшысының міндетін атқарушы Индира Досанбаева.

Ал Кенжебековтер отбасы мереке алдында жасалған ізгі іске ұйытқы болған ұжымға алғысын білдірді.

Шымкент қалалық әкімдігі ата-анасынан айырылған бес немересін қарауына алған әжейді барлық жағдайы қарастырылған 3 бөлмелі уақытша баспанамен қамтамасыз етті.

Шымкенттік көпбалалы ана Нағима Орманованың отбасындағы жағдай кім-кімді болсын бей – жай қалдырмасы анық. Ауыр дертке шалдыққан келіншек бес баласымен күні кеше ғана апатты ғимараттың қуықтай бөлмесінде бес баласымен жағдайсыз күйде күн кешіп жатқан еді. 

Ақ қан (лейкомия) дертіне шалдыққан келіншектің күйеуі ақша табу үшін Атырауға жұмысқа кетеді. Тапқан қаражатын жинап, отбасына келе жатқанда ол өткен жылдың желтоқсан айында жол-көлік апатына ұшырап, оқиға орнында көз жұмады. «Жығылғанға – жұдырық» дегендей, Нағиманың денсаулығы да күрт нашарлап, ауруханаға түскенде балаларды 70 жастағы нағашы әжесі Қызайым Байзақова қарауына алып, барлығы қуықтай бөлмеде тұрып жатты. Науқас қызын ауруханадан шығарғанда анасы оны сол бөлмеде күтуіне мәжбүр болды. Қызы мен балалар суықтап қалмас үшін қарт ана пештің отын күндіз-түні сөндірмеуге тырысты.

Қайғылы оқиға мен тұрмыстық ауыр жағдайдан қиналған отбасының жай-күйін Нағиманың анасы, Қызайым Байзақова қала әкімдігі тұрғын-үй қатынастары бөлімі өкілдерінің тұрғындармен таяуда өткен кездесуінде баян етіп, көмек сұраған болатын. Қызайым Байзақованың бұл мұң-мұқтажы билікті бей-жай қалдырмады. Шымкент қалалық әкімдігі сырқатқа шалдыққан Нағиманың отбасын барлық жағдайы қарастырылған 3 бөлмелі уақытша баспанамен қамтамасыз етті. Отбасының тұрмыстық халін естіген ізгі жандар оларға үйге киім-кешек, азық-түлік жеткізіп, қаржылай да көмектесті.

Негізі Нағима Орманова көпбалалы ана ретінде мемлекеттен тұрғын үй алу кезегінде тұрғанымен баспаналы болудың ауылы алыс еді, ол №6136-шы кезекте болатын.

Ал баспанаға қол жеткізіп, қуаныштан мәре-сәре болған отбасы жақында қоныс тойын тойламақ ниетте еді... Бірақ...

Газетіміздің беті қатталып жатқанда Нағима Орманованың қайтыс болғаны туралы суыт хабар естідік. Қайғылы жағдай әрине... Шырылдап бес баласы, аңырап анасы қалды. Тек бір сүйінеріміз – қала билігі оларды далада қалдырған жоқ. 

Бұл отбасыға көмек қолын созам деушілер 8 702 112 72 57 ұялы телефонына хабарласуына болады.

P.S. «Шымкент келбеті» газеті бұл отбасының алдағы тағдырын бақылауда ұстап, оның жайын оқырманға хабардар ететін болады.

Еліміз Тұңғыш Президент күнін атап өтті. Мерекеге орай «Нұр Отан» партиясының Оңтүстік Қазақстан облыстық филиалы қамқорлық шарасына ұйытқы болды.

Қарауында мүгедек балалары бар 30 анаға «нұротандықтар» «Кедергісіз келешек» партиялық жобасы аясында сый-сыяпат жасап, құрмет көрсетті.

– Елдегі экономикалық-әлеуметтік және саяси реформалар, халықаралық және өңірлік бастамалар, жаһандық жасампаз істердің барлығы Тұңғыш Президентіміз Нұрсұлтан Назарбаевтың есімімен тікелей байланысты. Қазақстанның Тұңғыш Президенті күнін атап өту, оны халықтық мерекеге айналдыру ұлттың мерейін өсіреді. Бұл жаңғырудың, жаңашылдықтың белгісі ғана емес, өткеннің өнегесі, ұлының ұлағаты, – деді «Нұр Отан» партиясы ОҚО филиалы төрағасының бірінші орынбасары Нұрмахан Жолдасов.

Мүмкіндігі шектеулі балаларын бағып-қағып отырған ардақты аналарға зор денсаулық, таусылмас күш-қуат тіледі. Маңыздысы, мерекелік жиынға келген аналар дөңгелек үстел басында Н.Жолдасовқа әлеуметтік көмек тағайындау, қоғамдық көліктегі жеңілдіктер, дәрі-дәрмекпен қамтамасыз ету бойынша сұрақтарын қойды. Партиялықтар толыққанды жауап беріп, ұсыныс-тілектерін қабылдады.

ҚМДБ-ның ОҚО бойынша өкілдігі әрдайым жақсы істің бастамашысына айналған. Таяуда облыстық өкілдік пен «Зекет» қоры бірлесіп, облыс деңгейінде «Асар» атты қайырымдылық акциясын ұйымдастырды.

Соның нәтижесінде Ордабасы ауданы, Шұбарсу елді мекенінде тұратын жағдайы төмен, көп балалы алтын құрсақты 4 отбасыға тегін зәулім үй салынды.

Жалпы, әрбір отбасыға бөлінген жер телімі – 8 сотық, салынған әр үйдің көлемі – 120 шаршы метр. Салынған әр жеке үйге 7 млн теңге көлемінде қаражат жұмсалды.

Әйгерім Асанова (5 баласы бар), Забира Оралова (7 баласы бар), Айнұр Төлегенова (5 баласы бар) және Насихат Батыроваға (2 баласы бар) пәтер кілтін ҚМДБ-ның төрағасы, Бас мүфти Ержан қажы Малғажыұлы өзі тапсырды. 

– Діни басқарма жыл сайын дәстүрлі түрде жағдайы төмен, көпбалалы алтын құрсақты, өмір тауқыметін тартқан отбасыларға үй салып беру қайырымдылық жұмысын қолға алуда. Биыл Оңтүстікте 8 үй салынды. Бұл шараларға жергілікті қолы ашық жомарт жандар демеушілік жасады. Мұндай игі істер жыл сайын жалғасады», – деді Бас мүфти БАҚ өкілдеріне берген сұхбатында. 

Сондай-ақ, ҚМДБ төрағасы қайырымдылық іс-шарасы кезінде 4 отбасыға азық-түлік, үй жиһаздары мен өзге де тұрмыстық қажетті заттарын сыйға тартты. 

Бас мүфти асыл дініміздің өркендеуіне жан-жақты үлес қосып, халықтың әлеуетін көтеруге атсалысып келе жатқан жергілікті қайырымды жандарға айрықша алғысын жеткізді.

Жетімін жылатпаған дархан көңілді қазақ елінің игі дәстүрін қалалық «Жастар ресурстық орталығы» КММ-нің қызметкерлері қайта жаңғыртты.

Жастардың бастамасымен жуырда «Жомарт жүрек» атты қайырымдылық жәрмеңкесінде жергілікті ақын-жазушылардың кітаптары, бірқатар кәсіпорындар мен мекемелердің қолөнер туындылары жәрмеңкеде өнерсүйер қауымның назарына ұсынылып, сатылымға шығарылған еді.

Нәтижесінде, жәрмеңкеден жиналған қаржы «Достық» шағынауданындағы мүмкіндігі шектеулі тұрғындардың мұқтаждығына бөліп берілді.

18 жастағы шағынаудан тұрғыны Айша әке-шешесінен ерте айырылған. Жетімдіктің тауқыметін тартқан жасөспірім ол аздай, 9 жасында көру қабілетінен айырылды. Қысылтаяң күндерде жанашырлық танытқан жәрмеңкені ұйымдастырушылар Айшаға қыстық киімдер алып берді. 

Сондай-ақ, мүмкіндігі шектеулі Мақсат есімді азаматтың цех ғимаратынан арнайы бөлме дайындалып, 2 бірдей тігін машинасы алынды. Ендігі жерде шағынауданның мүмкіндігі шектеулі тұрғындары цехта арнайы тапсырыстар бойынша тігін дизайнымен айналыспақ.

– Осылайша, кішігірім қолдау көрсете отырып, біздер табысы орта, мүмкіндігі шектеулі жандарды белгілі бір кәсіпке баулуды, осы арқылы жоғары табысқа қол жеткізуіне мүмкіндік беріп отырмыз, – дейді мекеме басшысы Абзалбек Убелтаев.

Тұрмыс жағдайы төмен отбасыларды әлеуметтік қолдауға бағытталған шара алдағы уақытта да игі жалғасын таппақ.

Келер жылдан бастап атаулы әлеуметтік көмек форматы өзгереді. Облыстық жұмыспен қамтуды үйлестіру және әлеуметтік бағдарламалар басқармасының өкілдері осынау жаңалықты  халыққа түсіндіру жұмыстарын бастап кетті.  Қазірдің өзінде Сайрам, Төлеби аудандарының салаға жауапты қызметкерлері оқыту семинарынан өткен. Енді олар  атаулы әлеуметтік көмек көрсету тәртібінің өзгерістерін халыққа жан-жақты түсіндіріп беретін болады.

Жаңаша атаулы әлеуметтік көмекті тағайындаудағы басты мақсат - халықты жалқаулықтан арылтып, жәрдемге мұқтажадарды кедейшілік құрсауынан шығару болып табылады. Бұл көмек табысы ең төменгі күнкөріс деңгейінің 50 пайызынан төмен отбасылар мен азаматтарға шартсыз немесе шартты ақшалай көмек түрінде тағайындалады. Шартсыз ақшалай көмек еңбекке қабілетті мүшелері жоқ отбасыларға тиесілі болады. Ал шартты ақшалай көмек жұмысқа қабілетті кем дегенде бір мүшесі бар аз қамтылған отбасыларға ұсынылады. Алайда бұл ретте олар жұмыспен қамтудың белсенді шараларына міндетті түрде қатыстырылады. Әлеуметтік келісімшартқа қол қоя отырып, тараптар өзара міндеттер алады. Әлеуметтік қызметтер – жұмыспен қамтуға жәрдемдесуге күш салуға және төлемдерді төлеуге, ал отбасының еңбекке қабілетті мүшелері – отбасын аз қамтылған топ құрамынан шығаруға бағытталған әлеуметтік бейімдеу мен жұмыспен қамтуға жәрдемдесу шараларына адал қатысуға міндеттенеді.

«Жаңаша формат тұрғынға жай ақшалай көмек беріліп қана қоймай, оның жұмысқа тұруына қолдау көрсетуге мүмкіндік береді. Түрлі қайта даярлау және біліктілігін арттыру курстарына жіберіліп, шағын несие де беріледі. Осылайша, отбасының кедейшілік шегінен шығуға әлеуеті ынталандырылады. Ал осынау кешенді шараларды жүзеге асыру үшін басқармаға бағынысты мекемелердің материалдық-техникалық мүмкіндіктерін күшейту қажет»,- дейді облыстық халықты жұмыспен қамтуды үйлестіру және әлеуметтік бағдарламалар басқармасының басшысы Мұхит Отаршиев.

Ол сондай-ақ,   көп құжаттамалардың электронды түрде жүргізілетінін жеткізіп, жергілікті билік өкілдеріне осы мәселені мықтап қолға алу қажеттігін атап өтті.

Айта кетейік, атаулы әлеуметтік көмек көрсетудің жаңа тәсілдері «Өрлеу» жобасы аясында сынақтан өткізіле отырып, өзінің тиімділігін көрсетті.  Облыста осыған дейін құрамында 100 мыңнан аса адамы бар 20 мыңдай отбасы осынау көмекке қол жеткізіпті. Оның ішінде жобаның 22 мыңнан аса еңбекке қабілетті мүшесі жұмыспен қамтудың белсенді шараларына қатысқан. Бұл жобаға қатысушылардың табысының 4,2 есеге дейін өсуіне мүмкіндік берді. Көңіл қуантарлығы сол, бұл бағыттағы шараларды іске асыруда облыс бүгінде республикада көш бастап тұр.

ОҚО әкімінің баспасөз қызметі

Жақсылыққа жол сілтейтін Ораза – мұсылман жамағатына нәсіп еткен бес парыздың бірі. Дәл осы Рамазан айында Кәлимаға тіл келтірген әрбір жан сауапты істің басы-қасынан табылуға асығады. Қасиетті айда алғашқылардың қатарында жомарттық танытқандардың бірі өңірімізге белгілі кәсіпкер Қайрат Сүлейменов болды. Дегдар азамат №3 балалар үйіне барып, жүрек жылуына зәру жәудіркөздерді құттықтады. Оларға тарту-таралғы жасады.

«Жетім көрсең, жебей жүр» деген халық нақылы тектен-текке айтылмаған. Қолы ашықтың – қашанда жолы ашық. Күнделікті қауырт жұмыстан қолы қалт етсе, кәсіпкер азамат бала жанын жадыратқысы келеді. Қамқор ағаны көріп, көз қуантқан балалар бүгін де әсем ән, тәтті күйін аямады. Қолдан келгенше балапандарды шаттыққа бөлеу, рухани демеу – сауаптың үлкені. Жомарт кәсіпкер: «Баланың тәтті ұйқысы мен риясыз күлкісі жан жадыратпай қоймайды», – дейді. Ата-ана мейірімі мен сүйіспеншілігіне шөліркеген бар баланы бауырына тартты. Қайырымдылық жасасаң, қайырын өзің көресің. Шымкенттік кәсіпкер Қайрат Сүлейменовтың келесі аялдаған жері -- Көксәйектегі тірек-қимыл жүйесі бұзылған балаларға арналған медициналық – әлеуметтік мекемесі болды. Жомарт азамат мекемені керек-жарақ заттармен қамтамасыз етті. Өздеріне көрсетілген қамқорлыққа балалар да мәз-мәйрам. Дәмі тіл үйірер тәттілер, бастан аяқ жаңа киім, ас үйде де жаңарған ыдыс-аяқ... Бұл балалардың денсаулығына байланысты туындайтын кейбір қиындықтарын, ине егу, дәрі ішу сынды процедураларын бір сәтке ұмыттырды. Бос уақытын сауапты іске сарп етуге ұмтылатын жанашыр жігіт денсаулығының кінәраты бар балалардың көңілін осылай аулады. 

Бұл орталықта өздігінен жүріп тұра алмайтын 130 бала тіркелген. Білікті дәрігерлердің емінің арқасында көпшілігі сырқатты жеңуге талпынуда. Жарымжан бұл балғындардың мұнда әлдебір дүниеге мұқтаж екендіктері байқалмайды. Өйткені, демеушілердің көмегі, жылы қабағы мен қамқорлығы олардың өмірін өзгертіп, бір сәтке қайғысын сейілткендей. «Жақсы сөз – жарым ырыс». Игі-жайсаңның жылы сөзі мен ыстық мейірімі жан семіртеді. Оны әсіресе, осы балалар анық сезеді.

«Біз біргеміз!». Шымкентте осындай атаумен мүмкіндігі шектеулі азаматтарға қолжетімді орта құруға арналған акция өткізілді.

Әл-Фараби ауданы әкімі аппаратының ұйымдастыруымен 2 жұмысшы топ құрылып, 5 көшені, атап айтқанда Т.Рысқұлов, А.Байтұрсынов, Ж.Тәшенов, Бәйдібек би, М.Х.Дулати көшелеріне рейд жүргізілді. 

– Шараны ұйымдастырудағы мақсат – мүмкіндігі шектеулі азаматтарды қоғам өміріне тең құқылы мүше ретінде қатысу жолындағы кедергілерді жою. Осыған орай, қазіргі таңда 5 көшедегі кәсіпкерлік нысандардың басшыларымен акция аясында меморандумға тұру бойынша түсіндіру жұмыстары жүргізілуде, – деді Әл-Фараби ауданы әкімінің орынбасары Құдайберген Қалдықараев. 

Айта кетейік, былтыр Әл-Фараби ауданы әкімдігі 127 кәсіпкермен меморандумға тұрып, 272 нысанға пандустар мен негізгі 25 көшенің қиылысына дыбыс сигналдарын орнатқан.

Оңтүстік тұрғындары көктемгі су тасқынынан зардап шеккен өңірлерге көмек көрсетуде. Осы орайда ОҚО Қазақстан халқы Ассамблеясының мүшелері Қарағанды облысының табиғат апатына тап болған тұрғындарына гуманитарлық көмек жіберді.

Облыстық Қазақстан халқы Ассамблеясының ұйымдастыруымен бастау алған «Ассамблея асары» акциясына этномәдени бірлестіктер, облыстық «Қоғамдық келісім» КММ-ның қала, аудандардағы филиалдары, өңір тұрғындары мен «Алтын адам» тігін фабрикасы, «NIK» корпорациясы қолдау білдірді.

Құны 10 млн теңгеге жуықтайтын азық-түлік, киім-кешек пен көрпе-төсек тиелген жүк көлігі Қарағанды облысының Шет ауданына жеткізілді.

– Біз зардап шеккен аймақтардағы халыққа қай кезде де олармен бірге екенімізді білдіргіміз келеді. Бұл – Ассамблея дәстүріне айналған шара. Қайырымдылық шарасына белсене қатысқан барша азаматтарға алғыс айтамын, – дейді Облыстық Қазақстан Халқы Ассамблеясы төрағасының орынбасары Мұратәлі Қалмұратов.

Оңтүстіктен ЭКСПО көрмесіне ауыл шаруашылығы өнімдері тиелген керуен аттанды. Керуенде жалпы құны 135 миллион теңгеден асатын 262 тонна азық-түлік өнімдері бар.

Жүк көліктеріне тиелген тауарлар 13-ші және 14-ші мамыр аралығында халықаралық көрме аясында өтетін жәрмеңкеде елорда тұрғындарына ұсынылады. 

Облыстық ауылшаруашылық басқармасының басшысы Серік Тұрбековтың айтуынша, өнімдердің бағалары арзандау болмақ. 

– Өнімдердің бағалары Астана қаласы әкімдігімен келісілген. Ол жердегі жалпы нарықтағы бағадан 10-15 пайыз төмен бағамен сатамыз деп отырмыз. Біздің шаруаларға Астанаға өнім жеткізу өте пайдалы. Елордада баға бізбен салыстырғанда жоғарылау болғандықтан өнімнің сапалысын жеткіземіз, – дейді Серік Тұрбеков. 

Айта кетейік, Оңтүстік Қазақстан облысы көрме аясында 6 жәрмеңке өткізбек. Онда 12 мың тоннадан астам ет, жұмыртқа, балық, сүт, қымыран және көкөніс секілді өнімнің 28 түрін саудалау жоспарланған. Бұл өнімдерді арнайы тоңазытқыштармен жабдықталған 25 жүк көлігі жеткізетін болады.