10 айда оңды істер бар
Аудан, қала әкімдерінің қатысуымен селекторлық жиын өтті. Өңір басшысы Жансейіт Түймебаевтың төрағалығымен өткен мәжілісте облыс әкімінің орынбасарлары, әкім аппараты және облыстық басқарма басшылары болды.
Күн тәртібінде, 2016 жылдың 10 айының қорытындысы мен бюджеттің орындалуы және «Нұрлы жол» бағдарламасының іске асуы туралы мәселелер қаралды.
Атап айтқанда, осы жылдың 10 айында жергілікті бюджетке түсетін салықтар мен басқа да түсімдердің жоспары 108,2 пайызға орындалған немесе 6,6 млрд теңге артық түскен. Сондай-ақ, бюджет қаржысы 97 пайызға игерілген.
Жиынды қорытындылаған аймақ басшысы Ж.Түймебаев қаржыны кестеге сәйкес игере алмай отырған аудан, қала әкімдері жұмысты барынша жеделдетуі қажеттігін айтып, оның себебін нақтылап, түсініктеме беруі керектігін тапсырды.
Қаланың даму көрсеткіші тұрақты
Шымкент қаласының 2016-2020 жылдарға арналған даму бағдарламасының өткен 9 айдағы орындалу көрсеткішінде айтарлықтай өсім байқалады. Бұл жөнінде қала әкімі Ғабидолла Әбдірахымовтың төрағалығымен өткен мәжілісте кеңінен талқыланды.
Күн тәртібіне сәйкес, қаланың 2016-2020 жылдарға арналған даму бағдарламасының және қала бюджетінің өткен 9 айдағы қорытындысы бойынша қалалық экономика және қаржы бөлімінің басшысы Кенжебек Жанбосынов баяндама жасады.
Баяндамашы келтірген мәлімет бойынша, қалада өнеркәсіп өнімінің көлемі 239,6 миллиард теңгені құрап, нақты көлем индексі 4,5 пайызға жоғарылаған.
– Жекелей алғанда, ауыл шаруашылығы саласы бойынша өнім көлемі 17,5 млрд теңге болып, өткен жылдың тиісті кезеңімен салыстырғанда өсім байқалады. Қалада құрылыс жұмыстары қарқынды жүргізілуінің нәтижесінде өнім көлемі 55,4 млрд теңгені құрап, 8 пайызға артқан. Тұрғын үй көлемі 15,6 пайыз, автомобиль көлігімен тасылған жүк көлемі өткен жылмен салыстырғанда 5,8 пайызға ұлғайды. Жылдық жоспары орындалған 17 индикатордың 6-уы өнеркәсіп және кәсіпкерлік саласында, 3-уі білім, өзгесі халықты әлеуметтік қорғау және еңбекпен қамту саласында, мәдениет, құрылыс, демография, ішкі саясат, қоршаған ортаны қорғау салаларында уақытылы орындалған, – деді Кенжебек Керімбекұлы.
Жиынды қорытындылаған қала әкімі Ғ. Әбдірахымов күн тәртібіндегі мәселенің маңызы жоғары екенін айта келе, алдағы уақытта тиісті жұмыстардың атқарылатынын жеткізді. Сонымен қатар, сала мамандарына нақты міндеттер жүктеп, орындалу барысын өз қадағалауына алатынын айтты.
Бағдарламалардың орындалуы талқыланды
Облыс әкімі Жансейіт Түймебаевтың төрағалығымен аудан, қала әкімдерімен және облыстық басқармалар басшыларының қатысуымен селекторлық мәжіліс өтті. Күн тәртібінде облыстың 2016 жылдың 9 айындағы әлеуметтік-экономикалық даму қорытындысы, «Нұрлы жол» және «Жұмыспен қамту – 2020» бағдарламаларының орындалу барысы қаралды.
Бірінші мәселе бойынша сөз алған облыстық экономика және бюджеттік жоспарлау басқармасының басшысы Р. Мулкеманов есепті мерзім ішінде өнеркәсіп өнімінің көлемі 574,2 млрд теңгені құрап, ауыл шаруашылығының жалпы өнімі 319,6 млрд теңгеге, құрылыс жұмыстарының көлемі 125,3 млрд теңгеге жеткенін баяндады. Десе де, басқарма басшысының айтуынша, өңірге инвестиция тартуда нәтиже төмен. Яғни, 9 айда негізгі қорға 240,8 млрд теңге инвестиция бағытталып, 2015 жылдың тиісті кезеңіне 82,4% құрады.
Күн тәртібіндегі екінші мәселе аясында облыстық құрылыс басқармасының басшысы С.Полатов биылғы жылға жоспарланған 14 нысанның 7-нде құрылыс жұмыстары өндірістік кестеге сай жүріп жатқанын жеткізсе, «Нұрлы жол» мемлекеттік бағдарламасы бойынша 9 жобаны іске асыру жоспарланғанын айтқан облыстық энергетика және тұрғын үй-коммуналдық шаруашылық басқармасының басшысы М.Марайым бөлінген қаржының 96 пайызға игеріліп, жұмыстар жыл соңына дейін толық орындалатынын баяндады.
Селекторлық отырыста «Жұмыспен қамту – 2020» бағдарламасының орындалу барысы бойынша баяндама жасаған облыстық жұмыспен қамтуды үйлестіру және әлеуметтік бағдарламалар басқармасының басшысы Ә.Темірбаева жыл басынан бері 54570 адамға бағдарлама қатысушысы ретінде қолдау көрсетілгенін хабарлады. Оның ішінде, 19965 адам өздігінше жұмыспен қамтылып, жылдық жоспардың 113 пайызын құраған.
Баяндамашыларды мұқият тыңдаған аймақ басшысы күн тәртібінде қаралған әрбір мәселе бойынша сала жетекшілеріне тапсырмалар жүктеді.
Мектептер жаңа оқу жылына дайын
Шымкент қалалық әкімдігінің кезекті мәжілісі өтті. Күн тәртібінде негізінен екі мәселе – қала мектептерінің жаңа оқу жылына дайындығы және қаладағы жастар саясатын дамытуда атқарылып жатқан жұмыстар жайы талқыланды. Қала әкімі Ғабидолла Әбдірахымов тиісті сала басшыларына бірқатар міндеттер жүктеді.
Алдымен қалалық білім бөлімінің басшысы Жанат Тәжиева білім орындарының дайындығы жөнінде баяндады. Жанат Арысбекқызының мәлімдеуінше, жаңа оқу жылында 4 мектеп, 1 балабақша пайдалануға беріледі. «Қаратөбе» елдімекеніндегі жаңа мектептің құрылысы аяқталған. Бұдан бөлек, бүгінде 3 мектеп пен 3 балабақшаның күрделі жөндеу жұмыстары жүргізілді. Жалпы, 127 мектеп, 87 балабақша жаңа оқу жылына дайын.
– Оқу жылының басталуына бір апта қалды. Жұмысты тездетіп бітіруді қадағалаңыздар. Жасөспірімдердің қауіпсіздігі басты назарда тұр. Жолаушылар көлігі және автомобиль жолдары бөлімі мен жергілікті полиция қызметімен бірлесе қай жерлерге жол өткелдері қажеттігін зерделеңіздер. Сіздерде әлі уақыт бар. Бітпеген қауіпсіздік нысандарын тезірек аяқтау керек, – деді қала әкімі.
Екінші мәселе бойынша қалалық ішкі саясат бөлімі басшысының міндетін атқарушы Айгүл Сәрсеева атқарылған жұмыстардың барысымен таныстырды. Қала әкімі қаладағы жастар саясатын дамытуда үш негізгі бағытқа назар аударуды тапсырды. Бірінші, жастарға дұрыс білім берілуі тиіс. Одан кейін жұмыспен қамтуды үйлестіріп және спортпен жүйелі түрде шұғылдануға көңіл бөлу қажет.
Қоғамдық ахуал тұрақты
Шымкент қаласында бүгінде саяси-қоғамдық ахуал тұрақты. Бұл туралы қала әкімі Ғабидолла Әбдірахымовтың төрағалығымен өткен кезекті қала әкімдігінің мәжілісінде айтылды. Шымкент қаласындағы қоғамдық саяси жағдайды тұрақтандыру бойынша атқарылған жұмыстар туралы қалалық ішкі саясат бөлімінің басшысы Қанат Қалыбеков баяндама жасады.
Шымкент қаласының алғашқы жартыжылдағы әлеуметтік-экономикалық дамуының жағдайы туралы қала әкімінің орынбасары Гүлжан Құрманбекова айтып өтті. Яғни, осы жылдың 1 шілдесіндегі статистикалық мәліметке сәйкес, өнеркәсіп өнім көлемі 155,9 млрд. теңгені құрап, нақты көлем индексі 5 пайызға, тасымалданған жүк көлемі 7,2 пайызға, іске қосылған тұрғын үй 2,9 есе, кәсіпкерлік субъектілерімен шығарылған өнім көлемі 1,4 пайызға өскен. Ал, экономика салаларында 9 434 жаңа жұмыс орындары ашылып, жұмыссыздық деңгейі 5,1 пайызды құрады. Сонымен қатар, қала бойынша орташа айлық жалақы 11,2 пайызға өсіп, 95 220 теңгені құраған.
Қала әкімдігінің мәжілісінде шаһар тұрғындарын толғандырып отырған бірқатар мәселелер сөз болды. Өз кезегінде шаһар басшысы әкім орынбасарлары мен аудан әкімдерін, бөлім басшыларын халықпен кездесіп, түйіткілді проблемалар бойынша түсіндіру жұмыстарын жүргізуге шақырды.
Дүниежүзiлiк банк агломерациялық дамуды қолдайды
– Агломерациялық даму орталығы ретінде Шымкент қаласының таңдалуы бекер емес. Халқы өте тығыз орналасқан, басқа облыстарға қарағанда демографиялық өсу көрсеткіші жоғары, шаруашылыққа жайлы және ауа райы қолайлы. Агломерациялық даму бағытында Шымкент қаласы тек даму ядросы ғана болып қалмайды. Сонымен қатар, «Ұлы Жібек Жолының» жүрегіне айналу мүмкіндігі де зор, – деді қала әкімі Ғ.Рахматоллаұлы оңтүстіктегі жұмыс күшінің пәрменділігі мен өмір сүру сапасының жыл сайын жақсару тұрақтылығын да алға тартып.
«Орталықтары Шымкент және Ақтөбе қалаларында орналасқан қалалық агломерациялардың стратегиялық және институционалдық жол картасын әзірлеу» бағытын талқылаған жиында ОҚО сәулет және қала құрылысы басқармасы басшысының орынбасары С.Жаппарқұлов баяндама жасады. Шымкент қаласының бас жоспарымен және индустриялық аймақтардың жобасымен таныстырды. Ал ОҚО жолаушылар көлігі және автомобиль жолдары басқармасының басшысы Н.Байғұт агломерациялық даму орталығы болып табылатын Шымкент қаласы мен Арыс қаласын, Сайрам, Төлеби, Ордабасы, Бәйдібек, Түлкібас, Қазығұрт аудандарының арасын жалғайтын жолдардың жағдайын түсіндірді.
Осы орайда, қала әкімі Сарыағаш ауданын да агломерациялық даму аймағына қосуға ұсыныс білдіргенін мәлімдеді.
– Сарыағашта минералды су, шипажайлар, сауықтыру орталықтары, гольф клубы бар. Оның үстіне, Ташкентке жақын орналасқан. Осының бәрін ескерсек, Сарыағаш ауданын да агломерациялық даму аймағына енгізу дұрыс деп ойлаймын, – деді Ғ.Әбдірахымов.
Шымкенттің агломерациялық даму жоспарымен танысқан Дүниежүзілік банк өкілі Шаолян Ванг:
– Аталған ұсыныстарды тағы да қарастырып, жобаларды қаржыландыру мәселесін талқылайтын боламыз, – деді.
Еңбек қауіпсіздігін сақтау қажет
28 сәуір – Дүниежүзілік еңбекті қорғау күні. Осыған орай, Шымкенттегі Көрме орталығында ОҚО еңбек инспекциясы жөніндегі басқарма басшысы, еңбек инспекторы Бастар Есқараевтың қатысуымен еңбек қауіпсіздігі және еңбекті қорғау мәселелері бойынша мәжіліс өтті.
Мәжілісте еңбек қауіпсіздігі талқыға түсіп, оның шешу жолдары сараланды. Б. Есқараев қарапайым қағиданы сақтамаудың салдары қайғылы оқиғаға апарып соғатынын ескертіп, кейбір деректерді алға тартты. 2015 жылдың 12 айында 95 оқиға орын алған. Соның салдарынан 107 адам зардап шегіп қайтыс болды. Ал мекемелерде медициналық тексеруден өтпегендер де жұмысқа қабылданған. Кейбір мекемелерде сақтандыру компанияларымен келісім-шарты жоқ болып шыққан.
Жиында қызметкерлердің қауіпсіздігін қатаң сақтап отырған компаниялардың тәжірибесі үлгі ретінде көрсетілді. Сондай-ақ, еңбек қауіпсіздігін қамтамасыз ететін мамандардың біліктілігін көтеру, олардың жұмысын үйлестіру мәселесі де кеңінен айтылды. Жиын соңында қызметкерлерге лайықты жағдай жасаған мекемелердің өкілдері Алғыс хаттармен марапатталды.
