Шымкент келбеті

Биыл «Shymkent city» қалашығындағы «Шымкент арена» спорт кешенінің, жалпы алаңы 18 450 шаршы метр болатын «Конгресс Холл» жобасының құрылысы басталмақ. Шымкент қаласын жан-жақты тұрғыда дамыту – Елбасының тікелей бақылауында тұрған мәселе. Соған сәйкес, негізгі жұмыстар қаланың сәулеттік келбетін жақсарту, инфрақұрылымын дамыту мен абаттандыру, көгалдандыруға бағытталуы тиіс.

«Түркістан» сарайында өткен есептік кездесуге ҚР Премьер-министрінің орынбасары Асқар Жұмағалиев, ҚР Президенті Әкімшілігінің мемлекеттік инспекторы Мұрат Имандосов және «Нұр Отан» партиясының хатшысы Ғабидолла Әбдірахымов қатысты. 

Облыс әкімі өткен жылдағы негізгі жұмыстарды баяндап, алда тұрған міндеттер мен маңызы ерек іс-шаралар жоспарымен таныстырды.

Былтыр облыста өнеркәсіп саласында 858,5 млрд. теңгенің өнімі өндіріліп, бұл көрсеткіш 2016 жылмен салыстырғанда 69,5 млрд. теңгеге өскен. Облыс экономикасына 482 млрд. теңге инвестиция бағытталып, 2016 жылмен салыстырғанда 20,2%-ға артты. 

Құрылыс жұмыстарының көлемі 5,3 пайызға өсіп, жыл басынан 721,2 мың шаршы метр тұрғын үй пайдалануға берілді. Жалпы, былтыр облыста 7 482 отбасы баспанамен қамтамасыз етілген. 

Оңтүстік – аграрлы аймақ. Ауыл шаруашылығына тартылған инвестициялардың көлемі 38,1 млрд. теңгені құрап, 3,4 есеге артқан. Осының нәтижесінде егіс көлемі 29 300 гектарға ұлғайып, тамшылатып суғару әдісі қосымша 8 100 гектар жерге ендіріліп, жалпы көлемі 59 100 гектарға жеткен.

Есепті жылы салаға 24,9 млрд. теңге субсидия бөлініп, 40 мыңға жуық шаруаға қолдау көрсетілген. 

Облыста руханият саласына да назар аударылып келеді. Яғни, бүгінде «Туған жер» арнайы жобасы негізінде 50 жоба дайындалып, 153 іс-шара жүзеге асырылды. 

– «Рухани жаңғыру» бағдарламасы аясында Ордабасы тауында үш биге монумент орнатылып, «Қазығұрт тауы» жобасы іске асады. Бұл екі тауда туристік инфрақұрылымдар қарастырылып, киелі, қасиетті орындарды аяқасты етпеу жақтары мұқият ескерілген. Ал Отырар қалашығы мен Арыстанбаб кесенесін байланыстыратын ежелгі жол қайта жаңғыртылып, оның бойына ұлттық қолөнершілердің шеберханалары бой түзейтін болады, – деді облыс әкімі.

"Шымкент Арена", "Конгресс Холл" – әлеуетті жобалар

Жиында облыс әкімі Шымкент қаласына да арнайы тоқталып өтті. Жуырда ғана Үкімет тарапынан Шымкент қаласымен қоса Бәйдібек, Қазығұрт, Ордабасы, Сайрам, Сарыағаш, Төлеби, Түлкібас аудандары мен Арыс қаласының стратегиялық қажеттіліктерін қамтитын «Шымкент агломерациясының аумақтарын дамытудың өңіраралық схемасы» бекітілген еді. Бұл облыс орталығы мен оның айналасында орналасқан аудан, қала аумақтарының қарқынды дамуына серпін беретіні анық. 

Одан бөлек, Шымкент тарихи қалашығын жаңғырту жобасына қаражат бөлінді. Қазір археологтар жұмыс жүргізілуде. Биыл қаланың бірнеше көшелерінен (А.Асқаров, Бекет батыр көшелері) Арбат жобасын іске асыру, Қошқар ата өзені жағалауын көріктендіру жұмыстары жүзеге аспақ. 

Сондай-ақ, аумағы 427 гектарды құрайтын «Shymkent city» шағын ауданында биыл құрылысы басталатын «Шымкент арена» спорт кешені әлеуетті жобаның бірі. Бұл спорттық нысанда сауда мен тамақтану және әкімшілік блогтары, қонақ үй, бассейн қарастырылған. Жобалық құны 17,2 млрд. теңге болатын кешен заманауи құрылғылармен жабдықталмақ. 

Оған қоса, қалашықта жалпы алаңы 18 450 шаршы метр болатын «Конгресс Холл» жобасының да қазығы қағылмақ. Құны 20,5 млрд. теңге болатын нысан құрылысы 2018-2021 жылдар аралығында жүргізілмек. 

«Қошқар ата» өзені жағалауын кеңейтіп, ондағы ескі үйлерді бұзу арқылы жаңа тұрғын үйлер салу да – басты жобалардың бірі. 

Сонымен қатар, Шымкент әуежайына жылдық жолаушы ағымы 2 миллионды құрайтын жаңа заманауи терминал салу жоспарда бар. 

– Өздеріңіз білетіндей, шатқалдарды игеріп, көгалдандыру жұмыстары жалғаса бермек. Шымкенттегі 6 шатқалға бүгінде 81 мыңға жуық ағаш көшеті отырғызылды. Енді оны халықтың мәдени демалыс орындарына айналдыру бойынша жұмыстарды жалғастыра береміз. Оған жастар мен қоғам белсенділерін, кәсіпкерлерді атсалысуға шақырамын. Алдымызда үлкен мақсаттар мен міндеттер тұр. Біздің облысымыз аграрлы, индустриалды аймақ. Ел дегенде емініп, жұрт дегенде жүгініп жұмыс істейтін сәт қазір. Ендеше, облысты озық өңірге айналдыру жолында талмай тер төккеніміз жөн. Бірлігімізді бекемдеп, тірлігімізді көркемдеп, Ұлт көшбасшысы белгілеген биіктерді бағындыруға барлық күш-жігерімізбен еңбек ете берейік, – деді облыс басшысы. 

Жалпы, облыстың туристік әлеуетін дамытуға басымдық беріліп отырғанын байқаймыз. Сонымен қоса, биыл рухани жаңғыру бағдарламасы аясында бірқатар тың жобалар да ұйымдастырылмақ. Яғни, биыл "Қымызмұрындық", "Қауын fest", "Агро fest", "Ақсу Жабағылының алқызыл қызғалдағы, " Туған жерге тағзым", т.б. іс-шаралар дәстүрлi түрде өткізілмек. 

Олардың қатарында облыстың туристік әлеуетін көтеру мақсатындағы қызықты жобаның тағы бірі – «Safari Шардара» туристік іс-шарасы және "Open Сарыағаш" гольф бәсекесі. Бұл іс-шараларды да жыл сайын өткізуге басымдық беріледі. 

Жалпы, мақсат айқын. Жоспар белгілі. Енді тек бірлесе жұмыс атқару керек.

Жалпы, аймақ басшысының есебін өңір жұртшылығы облыс әкімдігінің ресми сайты мен әлеуметтік желідегі facebook парақшасынан тікелей эфир арқылы да тыңдады. 

Кездесу соңында тұрғындар өз сауалдарын қойды. Арыс қаласының тұрғыны газдандыру, түркістандық шаруалар ағынсудың жетіспеуі сынды мәселелерін жеткізді. Сондай-ақ, Сарыағаш, Созақ ауданының тұрғындары онлайн режимде байланысқа шығып, жұмыспен қамту мәселелеріне назар аударды. 

Шымкент қаласының тұрғындары да көкейде жүрген сауалдарын қоюға мүмкіндік алды. Қала тұрғындарын мазалайтын мәселелер – көп балалы аналарды, жастарды қолдау, жолдарды жөндеу және қоғамдық көлік саласын дамыту, т.б. 

Облыс әкімі әрбір тұрғынның сауалына өзі нақты жауап берді. Жалпы, жиынға қатысушылар, жарыссөзге шығып сөйлеушілер облыс әкімінің есебін оң бағалады.

Шымкент қаласының әкімі Нұрлан Сауранбаев 2017 жылы атқарған жұмыстары бойынша тұрғындар алдында есеп берді. Өткен жылы бірқатар мәселелер шешімін тапқан, қол жеткізген нәтижелер де атап өтерлік. Қалада былтыр өнеркәсіп өнімінің көлемі 411 млрд теңгеге жеткен. «Нұрлы жер» бағдарламасы аясында 4310 отбасы баспаналы болды.

Есепті жиынға облыс әкімі Жансейіт Түймебаев, ҚР Президент Әкімшілігінің мемлекеттік инспекторы Мұрат Имандосов қатысты.

96 пайызға жеткізу көзделіп отыр

Қала әкімі алдымен атқарылған жұмыстарды баяндап, алға қойған жоспарларын таныстырды. Қала аумағының 89 пайызы электр жүйесімен толық қамтылған. 2017 жылы алты шағынауданға электр желісін тарту жұмысы жүргізіліп, оның екеуінің жұмысы аяқталды.

Нәтижесінде 1550 абонент сапалы электр желісіне қосылды. 335 трансформатор тұрғындардың өз қаржылары есебінен орнатылған. Биыл жеке трансформаторлар мәселесі шешіледі. 6 шағынауданда, нақты айтқанда «Самал-1», «Тассай», «Оңтүстік», «Бозарық», «Қайтпас-1» және «Нұртас» шағынаудандарына электр желісін тарту жоспарлануда. 

Қала аумағының 93 пайызы орталықтандырылған сапалы ауызсумен қамтылған. 16 елдімекенге кесте бойынша, 8 елдімекенге тасымал бойынша су беріледі. 2018 жылы бұл көрсеткішті 96 пайызға жеткізу көзделіп отыр. 

Былтыр алты мектеп және төрт қосымша ғимарат пайдалануға берілді. Тағы да жаңа бес мектептің құрылысы мен төрт қосымша ғимарат салу жұмыстары басталып кеткен. Құрылысты 2018 жылы аяқтау жоспарлануда.

«Ақылды қала» бағдарламасы шеңберінде қалада білім беру, тұрғын үй-коммуналдық шаруашылық салаларына жаңа технологиялар енгізілмек.

«Мәдени астана болуға дайынбыз ба?»

Жарыссөзге шыққан азаматтар әкімнің жұмысын оң бағалап, өз ұсыныстарын да жеткізді. Әуелі сөз алған Қазақстанның Құрметті журналисі Байдулла Қонысбек қала әкімінің келгеніне 90 күндей уақыт болғанын айта келе, өткен жылғы жұмыстарға жоғары баға берді. 

– Мен мына мәселеге ерекше тоқталғым келеді. Шымкент 2020 жылы ТМД елдерінің мәдени астанасы болмақ. Біз соған дайынбыз ба? Қаланың келбеті, сәулеті, оның тұрғындарының мәдениеті қай деңгейде? Міне, осы бағытта – қаланы гүлдендіру, абаттандыруда жүйелі жұмыстар атқарылуы тиіс. «Ескі қаланы» жөндеу де уақыт күттірмейді. 

Одан кейін қалаға Сайрам, Төлеби, Ордабасы ауданынан бірқатар елдімекендер қосылды. Осы елдімекендердің инфрақұрылым жағдайы нашар. Басталған істі соңына дейін жеткізу керек. Қала әкімі осы шағынаудандардың жағдайын өз көзімен көріп, тұрғындармен кездесіп, жалпы, мәселенің мәнісін БАҚ- арқылы түсіндіріп, тиімді шешсе деймін. Қалада балалар алаңшалары салынды. Бірақ қазір олар қараусыз қалып, футбол ойнайтын алаңшалар бүлініп жатыр. Осы мәселелерді қолға алсаңыздар. Халық демалатын көпшілік орындардың бүгінгі жағдайына да көңіл аударатын уақыт жетті деп ойлаймын, – деді ардагер журналист. 

Облыстық мәслихат депутаты Рәшкүл Оспанәлиева да атқарылған жұмыстарға көңілі толатынын жеткізіп, оның ішінде негізінен екі жағдайды ерекше атап өтті. Оның айтуынша, идеология саласына баса назар аударатын сәт қазір. Бұл мәселеге қоғам болып жұмыла атсалысқан жөн.

– Жалпы, өткен жылы қалада 4 мыңнан аса отбасының баспанамен қамтылғаны – өте қуантарлық жайт. Халықтың атынан осыған рахмет айтқым келеді. Біздің облыста балалар үшін оңалту орталықтары ашылып жатыр. Бұл да ерекше атап өтерлік жағдай. Бірінші адамға жарық пен су керек. Одан кейін жол керек. Сондықтан коммуналдық және инфрақұрылым мәселесіндегі кемшіліктерге жете көңіл бөлу керек. 

Халықты жұмыспен қамту жайы да әркез назарда болуға тиіс. Негізі біздің халық – еңбекқор. Жұмыспен қамтуға байланысты қаншама бағдарламалар бар. Жан-жақты бағдар беріп отырса, тұрғындар да мейлінше кәсіпке бет бұрар еді, – дейді халық қалаулысы. 

Қаланы жасыл қалаға айналдыру үшін оның әрбір көшесін, әрбір бұрышын қайта гүлдендіруге басымдық берсек. Қалалық мәслихат депутаты Еркін Сатқанбаев осыған назар аударды. Бұл жұмыстарды облыстық және қалалық мекемелерге бөліп беріп, тезірек шешуге әбден болады. Әрбір тұрғынның бойында қаланы гүлдендіруге деген ынта-ықыласы, патриоттық сезімі болуы ләзім.

Тұрғындарды коммуналдық мәселелер мазалайды

Есептік жиында тұрғындар талап-тілектерін айтты. Негізінен, сұрақтар коммуналдық жүйелер, балалар алаңшасы, жол салу, қоғамдық көлік, жер мәселелеріне қатысты. 

ҚР Мәдениет саласына еңбегі сіңген қайраткер Артықбай Үсенбай «Шымкент 2020 жылы ТМД елдерінің мәдени астанасы болмақ. «Бадамнан» «Манкентке» дейін пойызбен жүретін болсаңыз, жан-жақты қоқыс басып жатқанын көрер едіңіз. Осы жолдың бойын тазалау керек. Шетелден келетін қонақтарға тазалығымызбен үлгі болайық» десе, «Қазығұрт» шағынауданы Әулие ата көшесінің тұрғыны Әбдірәсіл Мұстафин «Газ келді. Ендігі мәселе – жарықтандыру. Жекеменшік трансформатордан бірқатар кемшіліктер туындап отыр» деген мәселе көтерді. 

«Құрсай» шағынауданы тұрғындары да өз шағымдарын айтты. Алматы–Ташкент айналма жолындағы мал базарына жақын жерде, «Бадам» өзеніндегі көпір апатты жағдайда. Сол көпір қашан жөнделмек?»

«2014 жылы электр желісін жүргізуге жоба жасалып еді. 2017 жылдың 31 қаңтарында жобасы аяқталыпты. Енді қаржының бөлінуіне жәрдем берсеңіз», -- дейді тұрғындардың бірі. 

«Қоғамдық көлік мәселесін шешіп берсеңіз. № 49 мектепте балалар үш ауысымда оқығандықтан, оларға көлік керек болып тұр» деген өтініш те айтылды. 

Ал «Көкбұлақ» шағынауданының тұрғыны, зейнеткер Нұржан Ибрагим жол мәселесіне назар аударды. «Жаңаталап» елдімекенінен «Көкбұлақ» тұрғын алабына дейінгі асфальт жол қашан жөнделеді?» дейді қария. 

«Ақжарда» су мәселесі, «Ақжайықта» қоғамдық көлік, «Базарқақпада» кәріз жүйесі мәселесін шешу керек. 

Қала әкімі Н. Сауранбаев тұрғындардың сауалына нақты жауап берді. 

– Қоқыс мәселесі бойынша өзімнің орынбасарым Б. Жанбосыновқа тапсырма бердім. Оны шешеміз. «Ақжар» елдімекеніне 2018 жылы сапалы ауызсу беріледі. «Қазығұрт» шағынауданы бойынша электр желілерінің құрылыс жұмыстары аяқталды. Наурыз айында сіздерде жарық болады. 

«Құрсай» шағынауданында электр жүйесі бойынша жобалық-сметалық құжаттар дайын. Жұмыс істеп жатырмыз. «Жұлдыз» тұрғын алабындағы кәріз жүйесінің мәселесі биыл шешіледі. Ал «Көкбұлақтағы» жолды келесі жылы бастаймыз. Биыл ол жерге су жүйелері тартылады, – деді қала әкімі. 

Нұрлан Ермекұлы көпір салу мәселесіне де нақты жауап берді. Яғни, құжаттар сараптамаға тапсырылған. Сол жұмыстар біткеннен кейін құрылыс басталмақ.

Шешімін табуы тиіс негізгі 20 бағыт

Баяндаманы әрі тұрғындардың сұрақ-жауаптарын тыңдаған облыс әкімі Ж. Түймебаев алда атқарылатын негізгі бағыттарға тоқталды. Шымкент қаласы бұрынғы келбетіне сай жасыл қалаға айналуы тиіс. Негізгі үлкен жолдар салынды. Жүйесіз салынған үйлер реттеліп жатыр. ТМД елдерінің мәдени астанасы болу бағытында қандай жұмыстар қолға алынуы тиіс? Міне, соған байланысты нақты жұмыстар істелінуі керек. 

– Қала әкімінің нағыз есебі келесі жылы болады деп есептеймін. Бұл – әкімдіктің, ұжымның есебі. Мәселелердің басым бөлігі коммуналдық сала бойынша. Жер, су электр, құрылыс, қоғамдық көлік...Аудандардан қосылған елдімекендерге байланысты қазір мәселе 2-3 есе көбейді. Олардың бәрі де қала деңгейіне сай болу үшін біршама уақыт керек. Барлық мәселені бір уақытта шешіп тастау мүмкін емес. 

Ендігі атқарылуы тиіс міндеттер жөнінде тапсырма бердім. Күні-түні жұмыс істеу қажет. Қаладағы кіші және орта бизнесті қарқынды дамыту арқылы қала экономикасын көтеріп, бюджеттің кіріс көзін ұлғайту – басым бағыттардың бірі. Биылғы қолға алынатын мемлекеттік-жекеменшік әріптестік аясында мектептер салу, емханалардың санын арттыру, қоғамдық көлік саласын дамыту, қаланың жасыл белдеуін қалыптастыру, ескі қалашықты реттеу, «Шымкент сити» жобасын жүзеге асыру, «Қошқар ата» өзенінің бойын абаттандыру сияқты, негізгі 20 бағытты белгілеп отырмыз. Қала ажарлы болсын. Соған барлығымыз бірге күш қосайық. Әр салада нақты жоспар бойынша жұмыс істелсін, – деді облыс әкімі.

Жоспар белгілі. Міндет айқын. Қала үшінші мегаполис атына сай дамып, тазалығымен, кәсіпкерліктің дамуымен алға өркендеуі тиіс. 

Жалпы, 2018 жылы жасыл белдеу, саябақтар, шатқалдар, қаланы көгалдандыру мәселелеріне мән беріледі. Әрбір азамат тұрып жатқан үйінің, жұмыс істеп жатқан жерін таза ұстаса... Сонда ғана қаламыз сәнді болады. Қаланың бас жоспарына сәйкес, «Қазыбек» әмбебап базары 2018-2020 жылдары аралығында басқа орынға көшірілмек. 

Мәдениет саласы бойынша да атқарар іс көп. Яғни, биыл «Фосфоршылар» және «металлургшілер» сарайын мемлекетке қайтару, «Қошқар ата» өзені бойын көріктендіру басты жоспардағы іс.

Еңбекші ауданының әкімі Ғалымжан Ильясовтың соңғы есептік кездесуі №24 мектепте өтті. Жиынға облыс әкімі Жансейіт Түймебаев, қала әкімі Нұрлан Сауранбаев, құрылымдық салаға жауапты бөлім басшылары, депутаттар және құқық қорғау органдарының өкілдері қатысты.

Сонымен бірге, «Теріскей», «Күншығыс», «Сайрам», «Ұлағат», «Шаңырақ», «Қарабастау», «Жұлдыз» елдімекендерінің тұрғындары көптеп жиналды. 

Ғалымжан Молдабайұлы алдымен аудандағы жаңадан салынған, жөндеуден өткен жолдар, аумақты көріктендіру мен санитарлық тазалығы, коммуналдық сала және тұрғындарға қажетті ауыз су, жарық, газбен қамтуда іске асырылған жұмыстарға тоқталды. 

– Аудандағы жаңадан қосылған елдімекендерде шешімін күтіп тұрған мәселелер бар. Сондықтан атқарылар жұмыстарды жүйелеп, алдағы жоспарды нақтыладық, – деді баяндамасында аудан әкімі. 

Жарыссөзде сөз алған Шымкент қалалық мәслихатының депутаты Ермек Дәрменов Сайрам және Уәлиханов көшелері қиылысындағы 9 қабатты үйдің жайы алаңдататындығын айтты.

– Тұрғын үйдегі жеделсатының (лифт) әбден тозығы жеткен. Жиі бұзылатындықтан тұрғындар өз қаражатымен жөндегенімен пайдасы болмай тұр. Апатты жағдайға жеткізе ме деген қауіп бар. Алайда бір жеделсатыны ауыстыруға 10 млн теңге қаржы керек. Сондықтан бұл тұрғын үйге биліктің көмегі қажет. Осы мәселені назарға алсаңыздар, – деді депутат. 

Апатты жағдайда тұрған тағы бір баспалдақтың жайы айтылды. «Теріскей» шағынауданындағы №49 көпқабатты үйдің тұрғыны Любовь Шевцова: «Көпқабатты үйлердің аулаларына бюджет қаржысына алаңшалар салынып, көшеге, әр аулаға жарық шамдар қойылды. Соның нәтижесінде бұрынғыдай емес, қорықпай жүріп-тұруға мүмкіндік алдық. Бұған алғыс айтамыз. Тек шағынаудандағы біз тұратын тұрғын үйлер арасында баспалдақ бар. Сол арқылы оқушылар №65 мектепке, балғындар №45 балабақшаға өтеді. Қазір баспалдақтың тасы мүжіліп, мініп-түскенде адамдар құлайды. Сондықтан ескі баспалдақты жаңартуға қол ұшын берсеңіздер», – деді.

«Шаңырақ», «Бадам», «Жұлдыз», «Қаратөбе» тұрғындарының атынан келген зейнеткер Оңғар Кенжеев жерлеріннің құжатын қосалқы шаруашылықтан тұрғын үй учаскесіне ауыстыруға көмек берсе деген өтінішін айтты.

Есептік жиынның сұрақ-жауап кезеңінде мектеп залына облыс әкімі Жансейіт Түймебаев кіріп келді. 

– Аудан әкімдерінің есеп беру кестесін жақсы білемін. Бүгін есепті тыңдап, қойылатын сұрақтарды бақылап, мәселелерді өздеріңізбен бірге ақылдаса шешсем деп келдім, – деді облыс әкімі. 

Тұрғындар ауданды көріктендіру, абаттандыру, қоғамдық көлік пен коммуналдық қызмет көрсететін мекемелердің қызмет көрсету сапасының тым төмен екендігін атап, оларды билік бақылауға алса деген ұсыныс айтты. Еңбекші ауданының әкімі Ғ. Ильясов халықтан келген сауалдардың ешқайсысын назардан қалдырмай, бірден жауабын берді. Жылдық есепті облыс әкімі қорытындылады. 

– Тұрғындардан келген сауалдардың барлығын жазып алдым. Оларды сала-саласымен, бағыт-бағытымен бөліп, сосын күрделілігіне байланысты жіктеп, 3 күндік,1 апталық, 2 апталық, 1 айлық мерзімдермен кесте жасап, олардың орындалауын бізге баяндап отыруға тапсырма берем. Бұл Еңбекші ауданы ғана емес барлық ауданға қатысты. Оны инспекторлар бақылайды, – деді Ж. Қансейітұлы. 

Еңбекші ауданы әкімінің есебін тыңдаған қос тарап қанағаттанарлық деген бағасын берді. Облыс басшысы есептен шыққан соң С. Ерубаев атындағы №24 мектептің жай-күйімен танысты. Мектептің тарихи-өлкетану және С. Ерубаев мұражайымен танысып, «Жас мемлекеттік қызметкер» жобасына қатысқан оқушылармен тілдесті.

Шымкент қаласы білім бөлімінің басшысы Жанат Тәжиева облыс, қала басшыларына аталған білім ордасында орналасқан электронды күнделік, бүлдіршіндерді электронды жүйемен балабақшаға тіркеу және мұғалімдерді қызметке қабылдау бойынша қызмет атқаратын базаның жұмысымен таныстырды.

Шымкент қаласының аумағы кеңейіп, халық санының артуына байланысты үш жыл бұрын жаңа әкімшілік-аумақтық бірлік – Қаратау ауданы құрылған болатын.

Жаңадан бой көтерген ауданның әлеуметтік жағдайын шешу біліктілікті, тынымсыз еңбекті қажет ететіні түсінікті. Аудан әкімі Ғабит Мәуленқұловтың жылдық есебіне қарағанда, ауданда жан-жақтылы өсім барлығы байқалады. Әрине, шешілмеген, қордаланған, кезегін күткен түйткілді істер де жоқ емес. 

Қаратау ауданының әкімі Ғабит Мәуленқұлов кеше «Асар» шағын ауданындағы №89 мектепте 2017 жылғы атқарылған жұмыстары бойынша халыққа қорытынды есебін берді. Есепті кездесуге Шымкент қаласының әкімі Нұрлан Сауранбаев қатысты. Кездесу барысында «Нұр Отан» партиясы ОҚОФ төрағасының бірінші орынбасары, облыстық мәслихат депутаты Н. Жолдасов, қалалық мәслихат депутаты Т. Әмірбеков, аудандық аналар кеңесінің төрайымы З. Бекмурзаева, жарыссөзге шығып, әкімнің атқарған жұмыстарын оң бағалады. Облыстық ардагерлер кеңесінің төралқа мүшесі Шерім Медеуовтың айтуынша, аудан тұрғындары әкімдікпен бірлесе отырып, қаланың көркейіп дамуына өзіндік үлестерін қосып келеді. Әр көктем мезгілінде олар өз аумағына ағаш отырғызып, абаттандыру ісіне атсалысуда. «Біз әкімдікке ғана мойын созып, қарап отырмай, осындай игі істерді жалғастырып отырайық», – дейді ардагер.

Кездесу барысында аудан тұрғындары өздерін алаңдатқан сұрақтарға жауап алды. Халықты толғандыратын мәселелердің басым бөлігі коммуналдық игіліктерге қол жеткізу. Жол жөндеу, жарықтандыру, ауыз су, газ, ирригация мәселесі мазалайды. Мәселен, есеп беруде сөз алған Я. Уалиханов шағын ауданда ауызсу, газ, көшелерге асфальт төсеу және қоғамдық көлік мәселесі әлі күнге дейін шешілмей келе жатқанын жеткізді. Қалалық мәслихат депутаты Н.Жаңабаев ауданда атқарылып жатқан істер мен атқарылуға тиіс, шаруаларды айтып өтті.

– Қаратау ауданы құрылғаннан кейін оған көптеген ауылдар қосылды. Соның салдарынан коммуналды мәселелерге байланысты көптеген проблемалар бар. Мәселен, «Достық» алабының бүгінгі халі өте ауыр десек болады. Көбінесе ауызсу берілуі тоқтап қалады, газ мәселесі әлі күнге дейін өз шешімін таппаған, электр қуатының басым бөлігін коммерциялық нысандардан алады. Мәселен, электр қуаты 15 теңгеден болса, оны жекеменшік нысандар халыққа 25 теңгеден сатады. Осы тұрғыдан көмек берсеңіздер екен – деді халық қалаулысы.

– Менің бірнеше өтінішім бар. Біріншісі, электр қуатын жекеменшік нысандардан қымбатқа сатып аламыз, осыны мемлекеттік коммуналдық меншікке өтуіне ықпал етуіңізді сұраймыз. Екіншісі, көшемізге асфальт төселмегендігінен әсіресе қыс айларында «жедел жәрдем» шақырғанда қиындыққа тап боламыз. Үшіншісі, қоғамдық көлік мәселесі де шешімін таппай келеді,–дейді «Таскен» алабының тұрғыны Н. Досымбетова.

Сондай ақ аудан тұрғыны С.Тастановтың айтуынша ағын суы жоқ болғандықтан, жылы жай өндірісін ауызсумен суарып отырған көрінеді. Ол өнім өндіруге қымбаттық етеді. Бұдан бөлек, кәріз жүйесінің сапасы сын көтермейтіні, қоғамдық көліктердің аздығы, жекеменешік трансформаторлардың сапасының төмендігі мен бағасының қымбаттығына байланысты тұрғындар көптеген сауалдар жолдады. 

Есеп барысында тұрғындар аудан басшыларының атқарған жұмысына оң бағасын берді. Өз ойларын ашық айтып, бірқатар ұсыныстарын жеткізді. Өз кезегінде аудан әкімі тұрғындардың сауалдарына нақты жауап берді. Қазір ауданда ирригация жүйесі, жаяу жүргіншілер жолы, бағдаршам, көшелерді электр жарығымен қамтамасыз ету мәселелеріне байланысты зерделеу жұмыстары жүргізіліп жатқанын мәлімдеді.

– Алдымызға қойылып отырған міндеттер жылдан-жылға артып келеді. Сол міндеттерді орындау халықтың талап-тілегіне сай жұмыс атқару, еліміздің көркейіп, дамуына нақты ісімізбен жауап беру-басты мақсатымыз. Ең бастысы оның барлығы халықтың әл-ауқатын арттыруы үшін жасалуда, – деп аудан әкімі Ғабит Мәуленқұлов алдағы жылы атқарылатын жұмыс жоспарымен таныстырды. Есептік кездесу соңында қала әкімі Н. Сауранбаев әрбір тұрғынның талап-тілектері ескерілетінін, шешімін таппаған мәселелер бюджетке байланысты кезең-кезеңімен шешілетінін жеткізді.

Бибайша НҰРЖАНҚЫЗЫ

Қала мектептері мен бала-бақша аумақтарындағы балалардың қауіпсіздігін қамтамасыз ету мақсатында жұмыстар жүйелі түрде жүргізілуі тиіс. Яғни, аяқжол салу, жол белгілері, бағдаршам орнату жұмыстары сол маңдағы тұрғылықты халықпен, мектеп басшыларымен бірге зерделеу жүргізілгеннен кейін қолға алынғаны жөн. Әл-Фараби ауданының әкімі Бауыржан Қалжанов халыққа есеп беру кездесуінде негізгі басымдықтарға тоқталып өтті. Жұмыстар таразыланып, алдағы міндеттер де белгіленді.

Аудан әкімдігінің ғимаратында өткен кездесуде тұрғындар толғандырған мәселелерін бүкпесіз айтты. Жиынға Шымкент қаласының әкімі Нұрлан Сауранбаев та қатысты. 

Көпшілік аудан әкімінің 2017 жылы атқарған жұмыстарын оң бағалады. Қалалық мәслихат депутаттары мен тұрғындардың, ардагерлердің пікірінше, есепті кезеңдегі жұмыстар көңіл қуантарлық. 

Алдымен жарыссөзге шыққан «Бадам» шағынауданының тұрғыны Әйгерім Беркінбайқызы осыны атап өтті. Шағынауданда асфальттау жүргізіліп, ауызсу мәселесі шешілген. Көшелерге жаңа атаулар берілді. Жарықтандыру, табиғи газ тарту мәселесі де шешімін тапқан. Ендігі кезекте балалар үшін аяқ жол салып берсе, дейді ол. 

Шымкент теміржол ардагерлер кеңесінің төрағасы Нұртай Нұрғалиев Қабанбай батыр көшесі бойыннан аллея салып беруді сұрады. Бұл – ардагерлердің ұсынысы. Оның айтуынша, бүгінде Шымкент теміржол вокзалында тәртіп орнаған. Сонымен қатар, ардагер «Наурыз» шағынауданына балалар ойын алаңшасы қажеттігін сөз етті. 

Қалалық мәслихат депутаты Хайрулла Сәрсенов те жүзеге асқан шаруалардан хабардар етіп, өз ұсынысын жеткізді.

– Қаладағы №79 орта мектептің әбден тозығы жеткен. Ғимарат 1934 жылы салынған. Мектеп күрделі жөндеуді қажет етеді. Осы мәселені шешіп берсеңіздер. Одан кейінгі көпшілікке айтарым – тазалықты сақтау жөнінде. Әлі де қоқысты бей-берекет тастайтындар азаймай тұр. Тұрғындардың мәдениеттілігін көтеру керек. Осыған тиісті бір шаралар қарастырған жөн-ау. Ал жалпы әкім тарапынан көңіл қуантарлық жұмыстар көп-ақ, – дейді ол. 

Жиын әрі қарай сұрақ-жауапқа ұласты. Негізінен, тұрғындар жарықтандыру, жолдарды асфальттау және тазалықты, қауіпсіздікті сақтау, кәріз жүйелерін жаңғырту, балалар үшін спорт алаңшалары және демалыс аллеяларын салу мәселелерін көтерді. Кей тұрғындар қалада муниципальді парк ашу қажеттігін де ұсынды. 

Қала әкімі Н. Сауранбаевтың айтуынша, ұсыныстар мен талап-тілектердің бәрі де бақылауға алынады. 

– Талдау жұмыстары көрсеткендей, айтылған мәселелердің бәрі де белгілі салаларды қамтиды. Ең алдымен тұрғын үй коммуналдық-шаруашылық саласы, қоғамдық көлік және жолдар мәселесі, мектеп-балабақша, қауіпсіздік, жаңа жұмыс орындарын ашу бойынша шағымдар көп. Біз осы бағытта жұмысты күшейтуіміз керек. Қала – ортақ үйіміз. Сондықтан да, тұрғындардан тазалық, қауіпсіздік мәселесінде белсенділік танытуы керек, – деді қала әкімі. 

Аудан әкімі Бауыржан Ахметәліұлы барлық сауалдарға тиянақты жауап берді. Жолдарды асфальттау мәселесі бюджетке байланысты кезең-кезеңімен шешілетінін құлағдар етті. Ал муниципальдық парк ашу бойынша алдымен зерделеу жұмыстарын жүргізу керек.

Ардагерлер аллеясы ретке келтіріледі

Сонымен қатар, аудан әкімі Б.Қалжановтың халыққа есеп беру кездесуі «Түркістан» шағынауданындағы №62 мектепте өтті. Онда да тұрғындардың тілегі тыңдалып, негізгі мәселелер айқындалды. Жиынға қала әкімінің орынбасары Бейсенбек Жанбосынов, облыстық және қалалық мәслихат депутаттары, аудан тұрғындары қатысты. 

Жарыссөзге шыққан «Нұр Отан» партиясының Әл-Фараби аудандық филиалының төрағасы Саттар Қуашбаев жақсы көрсеткіштерді айта келе, әр істің өз жүйесімен, рет ретімен шешілетінін меңзеді. Қол жеткізген жетістіктерді бағалай білген жөн. 

Жалпы, аудан тұрғындары әкімнің жұмысын оң бағалады. Оларды негізінен тазалық пен тәртіпті сақтау, қоғамдық көлік, жарықтандыру мәселелері мазалайды. Барлығына да нақты жауаптар берілді. 

Шағынауданның орам басқарушысы Қуандық Сауранбай көшелерді жарықтандыруды, ардагерлер аллеясын ретке келтіріп беруді өтінді. 

– Барлық көшелер түгел асфальттанып, орталық көшелерде жарықтандыру жүргізілді. Ал мектепке, мешітке баратын көшелердің жарықтандырылуы толық орындалған жоқ. Оны аудан басшыларына айтып келе жатырмыз. Одан кейін Орталық көшеміздегі ардагерлер аллеясын жөндеп берсеңіздер. Коммуналдық жүйелердің кесірінен демалыс аймағы бүлінген - тұғын. Көшелеріміз таза. Әр тұрғын өзінің көшелеріне тал егіп, көгалдандырса, өзіміздің игілігіміз үшін жасалған тірлік болар еді. Жақсы істер алдағы уақытта да жалғасын таба береді деп ойлаймыз, – дейді ардагер. 

Қала әкімінің орынбасары Бейсенбек Жанбосынов «негізінен әлеуметтік нысандар орналасқан орталық көшелерді жарықтандыруға басымдық беріледі» деді. Ал ардагерлер аллеясы наурыз айына дейін ретке келтіретінін мәлімдеді.

Шымкент қаласына жаңадан қосылған Жаңаталап елдімекенінде №125 маршруттың орнына көктем айларынан бастап әлеуметтік бағыттағы жаңа автобустар қатынайтын болады. Жаңаталаптықтар жағымды жаңалықты Абай ауданының әкімі Ахмет Татыбаевтың 2017 жылға халық алдында берген есебінде естіп, қуанып қалды.

Абай ауданының әкімі А. Татыбаевтың бір жыл ішінде атқарған жұмысының есептік кездесуіне Шымкент қаласы әкімінің орынбасары Нұралхан Көшеров, қалалық құрылымдық бөлімнің басшылары, халық қалаулылары және Самал-1, Жаңаталап, Көкбұлақ, Алтынтөбе, Тәуелсіздікке – 20 жыл, Игілік елдімекендерінің тұрғындары қатысты. 

Алдымен А. Татыбаев аудан көлемінде экономикалық-әлеуметтік бағытта атқарылған жұмыстардың жай-жапсарына әсіресе, қалаға қосылған жаңа елдімекендерге салынған жолдар, ауыз су, ел игілігіне берілген нысандар, абаттандыру жайына тоқталды. Баяндамадан кейін сұрақ-жауап кезеңінде сөз алған Көкбұлақ тұрғын алабының тұрғыны Нұржан Ибрагимов әкімдік тарапынан аудандағы шешімін тапқан тірліктерге куә болып жүргендігін айтып, ризашылығын білдірді.

– Көкбұлақта 350-дей түтін бар. Ордабасы ауданынан қалаға қарағанымызға біршама уақыт болды. Әр үйдің 15-20 соттық жері бар. Сол жерге көкөніс егіп, пайдамызға жаратсақ дейміз. Тек ағын су мәселесінде қиындық болып тұр. Осыны шешуге қол ұшын берсеңіздер, – деген өтінішін жеткізді. 

Ал №128 мектептің директоры Разия Бейсенбаева білім шаңырағындағы оқушылардың тағдырына алаңдайтындығын жеткізді. Мектеп маңындағы жолмен жүк көліктері көп жүретіндіктен оқушылардың қауіпсіздігінің алдын алу қажеттігін айтып, жолаяқ салынып, бағдаршам қойылса, дейді. 

А. Татыбаев мектеп басшысының талап-тілегін биылғы жылы ескеретінін атап өтті.

Бұл ауданда жекеменшік трансформатордан жарық алып, шарықтаған бағасынан бөлек қыс ауасында электрдің жиі өшетініне шағымданғандар көп болды. Солардың ішінде «Самал -1» шағынауданына келген тұрғындардың сауалына А. Татыбаев: «Биылғы жылы ауданда 504 абонентке жарық беру жоспарда бар. Оның сметалық-жобалық құжаты дайын. Мемлекеттік трансформатор «Самал-1» шағынауданына да қойылады» деп жауап берді. 

Жаңаталап елдімекенінде тұрғын үйдің құжатына әлі күнге дейін қол жеткізе алмай отырған үйлер көп екен. Әбдірахым Пашаев үйінің құжаты болмағандықтан, тіркеуге тұра алмай жүргеніне біраз жыл болғандығын айтты.

– Балаларды мектепке орналастырдық-ау. Бірақ қалаға тұрғылықты тіркелу болмағандықтан мемлекеттік жәрдемақылардың ешқайсысын ала алмай келеміз, – деді қария ашынып. Аудан әкімі жуырда прокуратура саласымен бірлескен жұмысшы тобы құрылғанын айтып, бұл мәселенің шешімін табар күн алыс емес екендігін жеткізді.

Жаңаталап елдімекенінің тұрғыны Надежда Меньшикованы мазалаған жайт қоғамдық көлік. «№125 маршрутқа адам сыймайды. Қала орталығына жетудің өзі мұң. Өткен жылы үлкен автобус жүреді деген едіңіздер. Әлі жоқ», – деді. 

Сауалға Шымкент қалалық жолаушылар көлігі және автомобиль жолдары бөлімі басшысының орынбасары Жарқын Байдуллаев: «Бұл көлік компаниясымен келісімшарт наурыз айында бітеді. Сосын бұл бағытқа үлкен автобустар қатынайды» деп жауап берді.

Жиналған тұрғындардың аудан әкімі, бөлім басшылары мен құқық қорғау органдарына бағытталған сауалдарының ешқайсысы жауапсыз қалмады. Есептік кездесуді қала әкімі қорытындылап, «тұрғындар тарапынан айтылған ауыз су, электр қуаты, газ мәселесі шешілсе деген ұсыныс-тілектері зерделеніп, қаралатын болады», – деді.

Еңбекші ауданының әкімі Ғалымжан Ильясовтың халыққа есеп беруінің кезекті кездесуі «Тоғыс» тұрғын алабындағы № 120 мектепте өтті. Есептік жиынды қала әкімінің орынбасары Нұралхан Көшеров, мәслихат депутаттары, құрылымдық бөлім басшылары мен аудан тұрғындары тыңдады. Атқарылған істер ауқымды. Шешімін күткен мәселелер де аз емес. Негізінен, бұл аумақтағы тұрғындарды жолдарды асфальттау, жарықтандыру, ағын су және жер мәселесі қинайды.

Аудан әкімінің есебіне көпшіліктің пікірі оң. Бәрі де ризашылық танытты. Дегенмен, әлі де болса жұмысты жандандыра түсу керек. 

Алдымен жарыссөзге шыққан қалалық мәслихат депутаты Марат Тамабаев та осыны меңзеді. 

– Өте жақсы деген баға беремін. 2-3 жылдың көлемінде көптеген жұмыстар істелді. Алда көп тірлік бар. Барлық мәселенің шешімі қаражатқа келіп тіреледі. Осыны дұрыс түсініңіздер. Бұл аумақта көптен бері айтылып жүрген мәселелерді білемін. Мәселен, Маятас, Елтайдағы стратегиялық маңызы бар көпірлерді жөндеу қажет. Оған биыл жобалық-сметалық құжат жасауға қаражат бөлуді сұраймын. Осы мәселе тезірек шешімін тапқаны жөн. Одан кейін, «Маятас», «Жыланбұзған» елдімекеніндегі мектепке баратын тасжол жаңадан салынған. Енді жолдың бойына аяқжол салу мәселесі туындап тұр. Балалар бір шақырым жаяу жүреді, – деді халық қалаулысы. 

Одан кейін сөз алған ардагерлер кеңесінің төрағалары да осы мәселелерді тезірек шешіп беруді сұрады. «Тоғыс» тұрғын алабы ардагерлер кеңесінің төрағасы Ермаханбет Түктібаев жарықтандыру және асфальт жол салуды өтінді. Оның айтуынша, Игілік көшесін жөндеуге өткен жылы сметалық құжаттар дайындалған. Тиісті асфальт жолдар салынбай қалыпты. «Елтайдағы» 12 шақырым жол асфальтталған. Бірақ аяқ жол мен жолдың арасында қалдық су жиналып, жауын шашынды күндері жүруге қиындық тудырады. 

«Маятас» тұрғын алабы ардагерлер кеңесінің төрағасы Б. Әшіров екі мәселеге көңіл аударды. Оның мәлімдеуінше, «Маятасқа» өтетін көпірдің салынғанына 50 жылға жуықтаған. Қазір «Бадам» суқоймасына адамдар көп барады. Бұл жерден ауыр көліктер өтуде. Қазір осы жағдай қауіпке айналған. Ардагер сонымен қатар, тұрғылықты жерлерін заңдастырып беруді өтінді. 

Жиында негізінен көтерілген мәселелердің реті осындай. Тұрғындар сұрақ-жауап кезінде сын-ескертпелерін бүкпесіз айтты. Аудан тұрғыны Темірбай Төребековтің айтар уәжі көпке мәлім. Бұған дейін де талай көтерілген. Бадам өзені қоқыстан қашан тазарады? 47 жылдан бері осында тұратын ардагерді өзеннің тағдыры ойлантады. 

Сонымен қатар, бірқатар тұрғындар «Тоғыс» су қоймасынан қашан ағын су берілетінін сұраса, енді бірін Елтайдағы көшелерді жарықтандыру және мектеп салу құрылысы қашан жүргізілетіні мазалайды. 

Қала әкімінің орынбасары Н. Көшеров аудан әкімінің жұмысына оң баға беріп, негізгі міндеттерден хабардар етті. Оның айтуынша, облыс әкімінің тапсырмасына сәйкес, «Тоғыс» тұрғын алабының айналасын демалыс аймағы ету міндеті тұр. Көпір жайы осылайша шешімін таппақ. Қазір қалалық тұрғын үй коммуналдық-шаруашылық бөлімі мамандары сараптама жұмыстарын жүргізуде. 

– Жол салынды, аяқ жол жоқ дейсіздер. Көшенің тұрғындары үйін жолға тақап салып қояды. Қоршауы да солай. Оны алдыру – мәселе. Осыған да мән берсеңіздер. Жерге қатысты сауалдарыңызды былай шешейік. Аудан әкімімен келісіп, уақытын айтыңыздар. Сол кезде жер қатынастары, сәулет бөлімі мамандарын осы жерге әкеліп, мәселені зерделеп, шешуді қарастырайық. Жалпы, көтерілген мәселелер кезең-кезеңімен шешіледі, – деді қала әкімінің орынбасары. 

Аудан әкімі Ғ. Ильясов та жиынды қорытындылай келе, кейбір проблемалар бюджеттің мүмкіндігіне қарай шешілетінін мәлімдеді. «Туған жерін түлету, перзенттік парызымыз». Тұрғындар бюджетке қарап отырмай, шағын мәселелерді кәсіпкерлермен бірлесе шешсе, құба-құп.

Абай ауданының әкімі Ахмет Татыбаевтың 2017 жылға есеп беру кездесуі №87 орта мектепте жалғасты. Кезекті жиынға Шымкент қаласының әкімі Нұрлан Сауранбаев және қалалық құрылымдық бөлімнің басшылары, депутаттар, құқық қорғау органдарының өкілдері қатысты. Әкімнің есебін тыңдауға «Солтүстік-Батыс», «Қызылжар», «Самал-3», «Жаңа талап», «Қатынкөпір», «Тельман» елдімекендерінен келген тұрғындардың қарасы көп болды.

Ахмет Татыбаев алдымен жыл бойы ауданның экономикалық жағдайын жақсарту, халықтың әл-ауқатын арттыру барысында атқарған жұмыстарына тоқталды. Әсіресе, тұрғындардың басты қажеттілігі – жол, жарық, ауыз су, қаланың тазалығы, көгалдандыру мен абаттандыруындағы нақты қолға алған шараларды тізбектеп жеткізді. Дегенмен, 300 мыңдай халқы бар Абай ауданына өңіріміздегі Ордабасы, Төле би аудандарынан жаңа елдімекендер қосылғандықтан шешілмеген мәселелер көп екендігі тұрғындармен сұрақ-жауап барысында белгілі болды. 

Алғаш жарыссөзге шыққан ««Қатынкөпір» шағынауданының тұрғыны Құдияр Салыбек әл-Фараби көшесінің асфальтталғандығын және «Самал» базары маңындағы жер асты өткелінің ел игілігі үшін пайдалануға берілгендігін айтып, алғысын білдірді. 

– Сыпарған ата көшесін асфальттау өткен жылы басталған болатын. Бірақ, бұл әлі күнге дейін созылып, жұмыс баяу жүруде. Осыны назарға алсаңыздар. Екіншіден, ауылдың биі болғандықтан елдегі жағдайларды бағамдап жүреміз. Балалардың білім алуы қиындауда, барлығы №87, 56, 52 мектептерге қатынап оқиды. Ол мектептердің өзінде оқушылар үш ауысымда білім алады. Қатынап оқуға қоғамдық көліктің жайы мәз емес. Бұрын қатынайтын №3,30 автобустарды алып тастап, орнына №118,91 газельдерін қойып, енді халық көп болғандықтан оған сыймайды. Осы мәселелерді шешуге көмектесеңіздер, – деген өтінішін жеткізді.

Ал Исмаил Бекәлі «Солтүстік-Батыс» шағынауданына мектеп мен медциналық тірек қажет екендігін айтты. – Жарық, ауыз су мүлдем жоқ. Шалғайдағы елдімекенге биліктің назары қашан түседі? – деген мұңын жасырмады. Жоғарыда аталған елдімекендерден келген тұрғындардың көбі мал ұрлығының өршіп тұрғандығын айтып, учаскелік полицияның қызметіне көңіліміз толмайды деді. Ауданда жекеменшік трансформатордан жарық алатындар көп болғандықтан тарифтің қымбаттығы қалтамызды қағып бітті деген шағымданушылар саны да көп болды. 

– Абай ауданы әкімдігіне бір жыл ішінде 105 шағым келіп түсіпті. «Нұр Отан» партиясының Шымкент қалалық филиалына 2000-нан аса арыз-шағымдар түскен. Халық билікке көбірек сенім артуы үшін аудандық әкімдік олармен тығыз қарым-қатынаста жұмыс істеуі қажет, – деді сөз алған облыстық мәслихаттың депутаты Ө. Мелдеханов. 

Жиынды Шымкент қаласының әкімі Нұрлан Сауранбаев қорытындылады. 

– Сіздер айтқан өтініш-шағымдардың 80%-ын бөлім басшылары кабинетінде отырып шешуге болатын жағдайлар. Қалған 20%-ы су, жарық, жол мәселелері екендігін аңғардым. Бұлар үлкен қаражатқа келіп тірелетіндіктен түсінікті жағдай. Көптеген тұрғындар балаларының қауіпсіздігі үшін мектеп алдындағы жолдарға жаяу жүргіншілер жолағын салуды сұрауда. Мұны уақытша жаяу жүргіншілерге арналған оқушы макетімен алмастыруға болады емес пе? 

Қазір халықтың төрт салаға, яғни қоғамдық көлік, коммуналдық-шаруашылық, білім нысандарының қажеттілігі және жергілікті полиция қызметінің жұмысына көңілі толмайтынын көріп тұрмын. Сондықтан осы төрт бағытта жұмыс жасайтын боламыз, – деді қала басшысы. 

Есептік жиын үш сағатқа созылды. Абай ауданының әкімі А. Татыбаев жиында көтерілген мәселелер ағымдағы жылы орындалатындығын айтып, уәде берді.

«Сайрам» тұрғын алабындағы №71 жалпы орта мектепте Қаратау ауданы әкімі Ғабит Мәуленқұловтың 2017 жылы атқарған жұмыстары бойынша аудан тұрғындарының алдында есеп беру кездесуі өтті.

Жиынды қала әкімінің орынбасары Бейсенбек Жанбосынов жүргізіп отырды. Іс-шараға жергілікті тұрғындардан бөлек Қаратау аудандық мемлекеттік мекеме басшылары, облыстық және қалалық мәслихат депутаттары, аудан ардагерлері мен партия өкілдері қатысты. 

Ғабит Патшаханұлы күн тәртібі бойынша 2017 жылы атқарылған жұмыстарға тоқталып өтіп, аудандағы өзекті мәселелердің бірі – ауыз сумен қамтамасыз ету екенін айтты. Қаратау ауданында жалпы 47 202 жеке тұрғын үй орналасқан. Оның ішінде 35 861 (75%) тұрғын үй тәулік бойы сапалы ауыз сумен қамтылса, 8 010 (16%) тұрғын үй кесте бойынша, ал 4 431 (9%) тұрғын үй тасымал сумен қамтылған. 

– Ауыз сумен қамтылмаған «Асар-2», «Тұран», «Достық» шағынауданы мен «Қайнарбұлақ» тұрғын алабы (жаңақұрылыс) аумақтарының жобалық-сметалық құжаттары әзірленген. Мемлекеттік сараптамадан өткізу жұмыстары 2018 жылғы І тоқсанда атқарылатын болады. Ал, Азат, Достық, Шапырашты, Исфиджаб және Өтеміс тұрғын алаптарын сапалы ауыз сумен қамту мақсатында жобалық-сметалық құжаттарын әзірлеу 2018 жылға жоспарланған,– деді аудан әкімі. 

Мұнан соң Шымкент қалалық мәслихатының депутаты Мүсірәлі Тоғызбаев, Қаратау ауданы бойынша «Өзбек этномәдени орталығы» төрағасы Файзахмет Тажиметұлы, «Шапырашты» тұрғын алабының ауыл биі Нұрмахан Баймаханұлы, «Сайрам» көмекші-мектеп интернатының мұғалімі Зарибжон Сұлтанмұратұлы аудан әкімінің есебіне оң бағасын беріп, бірқатар мәселелерге тоқталды.

– Жуырда көшелеріміздің біріне тас, енді біріне асфальт төсеп бердіңіздер. Рахмет. Ендігі бір айтатын өтінішім, балаларымыздың мектепке баратын жолында аяқ жол жоқ. Соны реттеп берсеңіздер екен. Және тұрғындар дем алатын саябақ салыса, – дейді Алатау көшесінің төрайымы К.Ділбар. 

Жол мәселесі бойынша, былтыр бюджеттен 134 млн теңге қаржы қаралып, аудандағы ұзындығы 51 шақырымды құрайтын 88 топырақ көшеге шағал тас төсеу жұмыстары «Алемтрансжол» мекемесі тарапынан атқарылса, аудан әкімі аппаратының ұйымдастыруымен бюджет қаражатынсыз кәсіпкерлердің әлеуметтік жауапкершілігі аясында 7 шақырымды құрайтын 6 көшеге шағал тас төселген. Сондай-ақ, аудан аумағындағы әлеуметтік нысандар орналасқан 32 көшеге аяқ жол салынса, 41 көшенің жобалық-сметалық құжаты әзірленіп 2018 жылдың бюджетін қалыптастыру мақсатында қалалық экономика және қаржы бөліміне ұсынылды.

– Біздің мәдениет үйіміздің іші суық. Жуырда мамандар керек жарақтарды есептеп, сметалық құжаттарын жасап кетті. Енді соның тез арада шешім табуын қадағаласаңыз. Екінші мәселе, қыс кезінде жолда жүру қиындап кетеді. Жолымызға тым болмаса құм төселсе екен, – дейді Сайрам мәдениет үйінің меңгерушісі А. Құдайбергенқызы.

– Менің екі өтінішім бар. Біріншісі, кәріз жүйесі. Бұл мәселе біздің жұмыс істеуімізге өте кедергі келтіреді. Осыны 2018 жылы түпкілікті шешсек. Екіншісі, ауруханамызда екі электр трансформаторы бар. Соның екіншісіне сапалы қуат күшін тартып берсеңіздер, – дейді №1 қалалық аурухананың бас дәрігері Бахыт Мырзабаев. 

Бұдан бөлек, жекеменшік электр трансформаторларының сапасы сын көтермейтіндігі және бағасы қымбат болуына байланысты тұрғындар тарапынан көптеген сауалдар жолданды. Осыған орай, аталған мәселені оңтайлы шешу мақсатында аудан әкімі аппаратының ұсынысымен «Қайтпас», «Нұртас» шағынаудандарын сапалы электр жарығымен қамтуға 2017 жылы бюджеттен 85 млн. теңге қаржы бөлініп, құрылысын «ЮжКазЭнергоРемонт» мекемесі жүргізуде. Сондай-ақ, «Бозарық» саяжайын сапалы электр жарығымен қамтуға 280 млн теңге қаржы қарастырылып, оның құрылыс жұмыстарын ХМСУ мелиорация мекемесі жүргізуде.

Есепті кездесу барысында аудан тұрғындары аудан басшысының есебіне жақсы бағасын берді. Сонымен қатар, ойларын ашық айтып, бірқатар ұсыныстарын жеткізді. Қойылған сұрақтарға Ғабит Мәуленқұлов және қала әкімінің орынбасары Бейсенбек Керімбекұлы жан-жақты жауап берді. Ауызша қойылған сұрақтардан бөлек, жазбаша түрде де 20-ға жуық сұрақ жіберілді. Оның 90 пайызға жуығы коммуналдық мәселелер. 

– Бүгінгі кездесу барысында айтылған барлық сұрақтар мен ұсыныстар бойынша іс-шаралар жоспары түзіліп, орындалуы бақылауға алынатын болады. Жауаптар тікелей сұрақ иелеріне жолданады немесе жергілікті БАҚ беттерінде жарияланады, – деді Б. Жанбосынов.

Әл-Фараби ауданы орталықта орналасқандықтан қаланың бет-бейнесі болуға тиіс. Мұнда ретсіз саудамен күрес, тазалық пен тәртіпті сақтауға жіті мән беріледі. Мәселен, ауданда өткен жылы Рашидов көшесі № 25 а үй «Үздік аула», «Забадам» шағынауданы Абат көшесі «Үздік көше» болып танылған-тұғын. Бұл жұмыстар одан әрі жалғасады.

Аудан әкімі Бауыржан Қалжанов «Сәуле» шағынауданындағы № 129 мектепте 2017 жылы атқарылған жұмыстар бойынша халыққа есеп берді. Көпшіліктің пікірі жұмыстар жүйелі түрде орындалып жатыр дегенге саяды. 

Еңселі білім ордасындағы есеп беру кездесуде аудандағы жүзеге асқан тірліктер баяндалып, халықтың талап-тілегі тыңдалды. Жиынға жергілікті тұрғындар, қалалық әкімдіктің түрлі бөлімдерінің басшылары мен жауапты мамандар, мәслихат депутаттары қатысты. 

Жалпы, аудан әкімінің есепті кезеңде атқарған жұмыстары оң бағаланды. Мұны әсіресе, жарыссөзге шыққан «Сәуле» шағынауданының орам басшылары да ерекше атап өтті. Мәселен, алғаш болып сөз алған орам басшысы Жүрсін Раевтың айтуынша, мұндағы тұрғындардың бірлігі бекем. Аумақты бірлесе абаттандыруға деген талап зор. 

– Азаматтардың арқасында көптеген жұмыстар атқарылды. Мектеп салынды. Су, жарық келді. Шағынауданымыз өркениетке қарай бет бұрған. Былтыр көшелерімізді жөндеп бердіңіздер. Оған көп рахмет. Бір өтінішім - қыс ауасында әсіресе балалар мектептен кеш қайтады. Екінші, үшінші ауысымда оқитындар бар. Енді біздің көшемізді жарықтандырып берсеңіздер, – дейді орам басшысы. Ол сондай-ақ, шағынауданды абаттандыруға үлес қосқан әкімдіктің мамандары мен бірқатар тұрғындардың елеулі еңбегін еске салып өтті. 

Қалалық мәслихат депутаты Данияр Үсенов те нәтижелі жұмыстарды жалғастыруға үндеді. Тазалық, тәртіп бар. Көп жерге бейнебақылау қойылған. Халық қалаулысы алға қойған мақсатқа қолжеткізуге жергілікті билікті де, халықты да бірге жұмыс істеуге шақырды.

Негізінен, шағынаудан тұрғындары жастар тәрбиесі, аяқжол салу, жарықтандыру мәселесін көтерді. Мәселен, Тұрсынай Барлыбаева 21 жылдан бері осында тұрады. Барлық жүзеленген жұмыстар көз алдында. Жақсы істің жаршысы бола білгендерге ризашылығы мол. Дегенмен, зейнеткердің де өз өтініші бар. Оның айтуынша, көшелерде аяқжолдар әлі аз. Оқушылар мектептен кеш қайтады. Мұнда енді жарық жүргізіліп, мектептің алдынан автобус аялдамасы мен бағдаршам орнатылуы қажет. 

Тұрсынай Орынбекқызының тағы бір талап-тілегі көпшіліктің көңілінен шықты. Шағынауданға көпшілік саялайтын аллея салу қажеттігі туындап тұр. Оған қоса, жастар үшін бір мәдениет үйі де керек. Іс-шаралар ұйымдастырып, байқаулар өткізілсе, жастарға берер тағылым сол болар еді. 

Ардагерлер кеңесінің төрағасы Нұрбек Жүнісбеков көшелердегі жөндеу жұмыстарының сапасыз орындалғанына наразы. Жалпы, аудан тұрғындарын негізінен коммуналдық мәселелер, жастар тәрбиесі, қоғамдық көліктегі кемшіліктер жайы алаңдатады. 

Тұрғындардың кейбірі апта бойы су берілмей қалған кездер болғанына шағымын айтты. «Қарасу» шағынауданының тұрғыны Нұрғали Асқаров болса, 2017 жылы жылу құбырларының изоляциясы жүргізілгенін, бұл жұмыстар 2018 жылы да жалғасса деген тілегін жеткізді. 

Жиын барысында тұрғындар тарапынан қойылған барлық сауалдар мен ұсыныстарға жауап берілді. Қалалық тұрғын үй-коммуналдық шаруашылық бөлімінің басшысы Н. Бектұрсынов, жолаушылар көлігі және автомобиль жолдары бөлімі басшысының орынбасары Ж. Байдуллаев та сала бойынша бірқатар міндеттерді таныстырып өтті.

– Бұл аумақта жұмыстар 2000 жылдары басталып еді. Жарықтандыру «Сәуле», «Бадам» шағынауданындағы көптен бері айтылып жүрген мәселе. Былтыр «Текесу» шағынауданына жарықтандыру жүргіздік. 2018 жылға да жобалар бар. Аудан бойынша 11 көшеге жарықтандыру бойынша жобалар дайындалды, – деді тұрғын үй-коммуналдық шаруашылық бөлімінің басшысы.

Жол мәселесі бойынша биыл Әл-Фараби ауданында 11 көше орташа жөндеуден өтеді. Бөлім басшысының орынбасары сапасыз істелген көшелерді қайта тексеретінін мәлімдеді. 

Өткен жылы аудан бойынша 26 шақырым жылу құбырлары ауыстырылған. «Қуатжылуорталық-3» мекемесінің мамандарының сөзінше, 2018 жылы да жұмыстар жалғасады. 

Аудан әкімі Б. Қалжанов та тұрғындардың сауалдарына нақты жауап берді. Қазір бағдаршам, аялдама бойынша зерттеу жұмыстары жүргізілуде. Демалыс орнын салу бойынша да бірқатар жобалар қарастырылуда. Жалпы, 2018 жылғы міндеттер де белгілі. Ол - аудан аумағын санитарлық тазалық сақтауды ұйымдастыру және қадағалау, балалар ойын алаңшалары, аулаларды ретке келтіру, ретсіз сауда, заңсыз жарнамамен күрес жұмыстарын күшейту, т.б. 

Әл-Фараби ауданы әкімінің келесі халыққа есеп беру кездесуі 19 қаңтар күні Н. Төреқұлов атындағы № 62 орта мектепте өтеді.