Еңбекші аудандық әділет басқармасы басшысының 2016 жылы атқарылған жұмыстары туралы ақпарат
13.01.2017 жылы Шымкент қаласы Еңбекші аудандық әділет басқармасының басшысы халық алдында 2016 жылы атқарылған жұмыстарына есеп берді.
Жиынға Оңтүстік Қазақстан облысы Әділет департаменті басшысының орынбасары Тастанов Орынбасар Зайдинұлы, Шымкент қаласы Еңбекші ауданы әкімінің орынбасары Амангелдиев Досалы Жайлауұлы, Шымкент қаласы Еңбекші аудандық әділет баксқармасының басшысы Д.Ботан, Шымкент қаласы Еңбекші ауданының аумақтық сот орындаушылар бөлімінің басшысы Н.Серік және Еңбекші ауданы бойынша прокуратура,ІІБ,мемлекеттік кірістер басқармасы, «Нұротан»ХДП, Еңбекші аудандық заң консультациясының, Азаматтарға арналға Үкімет» мемлекеттік корпорациясы» КЕ АҚ ОҚО филиалы- «ХҚКО» департаментінің Шымкент қаласы №4,8 филиалдарының қызметкерлерінің және Шымкент қаласы Еңбекші ауданының тұрғындары.
Жиынды Шымкент қаласы Еңбекші ауданы әкімінің орынбасары Д.Амангелдиев ашып сөз кезегін Еңбекші аудандық әділет басқармасының басшысы Д.Ботанға берді.
Д.Ботан: Қазақстан Республикасының Әділет органдары мемлекет кепілдік беретін және Қазақстан Республикасы Конституциясындағы белгіленген адам құқықтарын жүзеге асыру негізінде әрекет етеді. Қазіргі таңдағы өмір шындығын ескере отырып, әділет органдары азаматтардың конституциялық құқықтарын жүзеге асыруға барлық жағдайды жасайды. Атап айтқанда, әділет органдарының қызметі көптеген әкімшілік тежеулерді азайтуға, халыққа көрсетілетін мемлекеттік қызмет түрлерінің, оның ішінде әртүрлі салалар бойынша қызметтің электрондық сапасын жақсартуға бағытталады. Әділет органдарының басым бағыттарына яғни атқаратын қызметінің негізгі түрлеріне: Жалпы мемлекеттік даму стратегиясын әзірлеу, заң жобасы жұмысын жүргізу, заңдарды талдау, жетілдіру, жүйелеу, нормативтік құқықтық актілер жобаларына заң сараптамасын жүргізу арқылы адамның және азаматтардың құқықтары мен бостандықтарының үстемдігін қалыптастыруға қатысу, заңды тұлғалардың тіркелуін жүзеге асыру, құқықтық көмекті және заң қызметін көрсетуді және құқықтық насихатты қамтамасыз ету, Қазақстан Республикасындағы заңдармен жүктелген басқа да қызмет түрлері жатады.
Басқарманың бөліміне жүктелген міндеттерге сәйкес төмендегі қызметтерді атқарады:
Басқарманың ұйымдастыру, жоспарлау, бақылау жұмыстарын қамтамасыз ету;
Заңды тұлғаларды мемлекеттік тіркеуде заңдылықты сақталуын қамтамасыз ету;
Жылжымайтын мүлікке құқықтарды мемлекеттік тіркеуде заңдылықты сақталуын қамтамасыз ету;
Құқықтық көмек пен заңгерлік қызмет көрсетуді ұйымдастыру және құқықтық насихатты қамтамасыз ету;
Зияткерлік меншік құқығын қорғау саласы бойынша іс-шараларды ұйымдастыру;
Халыққа қызмет көрсету орталығы арқылы жылжымайтын мүлікке құқықтарды тіркеу саласына қатысты 11922 құжат тіркеліп, осының салдарынан төленген алым сомасы 16 416 929 теңгені құрады.
Сонымен қатар, мемлекеттік тіркеуге құжаттарды беру мерзімінің кешіктірілуіне байланысты ҚР Әкімшілік құқық бұзушылық туралы кодексінің 460 бабына сәйкес 168 әкімшілік іс қозғалып, жеке тұлғадан 1 824 060 теңге, ал заңды тұлғадан 212 100 теңге өндірілген.
2016 жылғы 29 наурыздағы Қазақстан Республикасының «Қазақстан Республикасының кейбір заңнамалық актілеріне рұқсат беру құжаттарын қысқарту және рұқсат беру рәсімдерін оңайлату мәселелері бойынша өзгерістер мен толықтырулар енгізу туралы» Заңына сәйкес, Қазақстан Республикасының «Жылжымайтын мүлікке құқықтарды мемлекеттік тіркеу туралы» Заңының 23 бабының 1 тармағына, яғни жылжымайтын мүлікке құқықтарды мемлекеттік тіркеу тіркеуші өтініш келіп түскен сәттен бастап «бес жұмыс күні» дегеннің орнына «үш жұмыс күні» деп өзгертілген.
Аудан көлемінде 770 заңды тұлға, 669 шағын және орта кәсіпкерлік субъектілері, 52 филиалдар мен өкілдіктер тіркелген. осының салдарынан төленген алым сомасы 2 998 538 теңгені құрады.
«Электронды үкімет» веб-порталы арқылы 302 шағын және орта кәсіпкерлік субъектілері тіркелген.
Жеке кәсіпкерлік субъектілері үшін жарғыны ұсыну туралы талап жойылды, сонымен қатар тіркеу туралы куәлігі берілмейді.
Тіркеу туралы электрондық анықтаманы Халыққа қызмет көрсету орталығы арқылы алуға болады.
2015 жылдан бастап заңнамаға бизнесті құруды тіркеуді қандай да бір құжаттарды ұсынбай интернет арқылы 1 жұмыс күні орнына 1 сағатқа дейін қысқарту арқылы барынша оңайлатуды көздейтін түзетулер енгізілді; заңды тұлғаларды құру және қызметін тоқтату кезінде тіркеу жиыны жойылды және шағын кәсіпкерлік субъектілері үшін жарғылық капиталды қалыптастыру жойылды.
2016 жылға әділет органдарының қызметтері жөнінде БАҚ-на 32 мақала жарияланып, 6–телеарнадан шығу, 22–радиодан сұхбат беру, 19–дөңгелек үстел, 73–дәрістер мен семинар-кеңестер, 3–ашық есік күні ұйымдастырылды.
Әділет департаментімен зияткерлік меншік құқықтарын қорғау бойынша ҚР «Әкімшілік құқық бұзушылықтар туралы» Кодексінің 158 бабына сәйкес 2 әкімшілік іс қозғалып, соттарда қаралуда.
Соттардың қаулыларына сәйкес, құқықбұзушыларға 169 680 теңге мөлшерінде айыппұлдар салынды.
Заңсыз айналымнан 146 000 теңгенің 17 дана контрафактілік өнімдері алынды.
Жиын соңында Оңтүстік Қазақстан облысы Әділет департаменті басшысының орынбасары О.Тастанов қорытындылап атқарылған жұмыс нәтижесіне оң бағасын берді.
Ғ.ДЖАУТУРГАЕВ,
Шымкент қаласы Еңбекші аудандық әділет
басқармасының бас маманы
Тұрғындар талабы орындалады
Әл-Фараби ауданының әкімі Б. Қалжановтың жылдық есебінің кезекті жиыны Қ. Спатаев атындағы №7 мектеп-лицейде өтті. Аудан әкімі тұрғындарды бір жылда атқарған жұмыстарымен таныстырды.
Қаланың орталығы саналатын ауданда коммуналдық мәселелер біршама шешімін тапқан. Ауданда халыққа күнделікті қажетті инфрақұрылым толық шешілген деуге болады. Бүгінгі кездесуге келгендер әкім жұмысына баға беріп, ұсыныс-пікірлерін ортаға салды.
– Балакиреев көшесін жауып тастап, шағымданғанымыздан кейін қайта ашты. Біз Мәметова көшесінің бойына аяқжол салуды сұрадық, оны салып берді. Әсіресе, аулалардың жарықтандырылғаны көпшіліктің көңілінен шықты. Жоғарыға орнатылған жарық прожекторлар үшін қала басшылығына деген ризашылығымыз шексіз, – дейді зейнеткер А. Тазутдинов.
Дегенмен өзекті мәселелер де назардан тыс қалған жоқ. Мәселен, Рысқұлбеков көшесі жолының ойықтарын жөндеу жұмыстары қолға алынуы тиіс. Тұрғындар мұнда жөндеу жұмысының жыл сайын жүргізілетінін, нөсер жаңбырлардан кейін қайта ойылатынын, себебі ирригациялық қашыртқылардың жоқ екенін айтады. Ал, қаптаған жеке хабарландырулар бағаналарға, аялдамаларға, тіпті көпқабатты үйдің кіреберіс сыртқы есіктеріне дейін жапсырылып тасталуы шектен шыққандықтың көрінісі. «Хабарландыру иелерін бұл үшін ақы төлеуге міндеттейік, бұл да бюджет үшін қосымша кіріс көзі», – дейді А. Тазутдинов.
Жиынға келгендердің қатарында әкімге сауал жолдап, көмек сұрағандар да бар. Аудан тұрғындары кәріз жолдарына гараждардың кедергі келтіріп отырғанын жеткізді. Әкім бұл мәселені қарап, шешімін табатынын айтты. Сонымен қатар, кездесуге келген Меруерт Ашева №79 мектептің 1938 жылы салынғанын, ескі екенін, жаңа мектеп салуға өтінішін білдірді.
Екі сағатқа жуық өткен кездесуде аудан әкімі өткен жылы жасаған тірліктері мен алдағы жоспарын тәптіштеп түсіндіріп берді. Әкімнің 40 минуттық баяндамасын тыңдап, көкейдегі сауалдарын қойған көпшілік атқарылған жұмысқа жақсы деген баға берді.
Халықпен қоян-қолтық жұмыс істеуде
Аудан әкімдерінің жергілікті тұрғындарға есеп беруі жалғасуда. Қаратау ауданының әкімі Ғабит Мәуленқұловтың кезекті есеп беруі «Асар» мөлтекауданындағы №89 мектеп-лицейінде өтті. Жиынға Асар, Ақжайық, Қайнарбұлақ, Бозарық, Достық, Қайтпас, Тұран, Азат шағынаудандарының тұрғындары және қала әкімінің бірінші орынбасары Бейсенбек Жанбосынов қатысты.
Аудан әкімі Ғ.Патшаханұлы өз баяндамасында 2016 жылы атқарылған істердің негізгілеріне тоқталып өтті.
– Аудан аумағында есепті кезеңде – 2503 кәсіпкерлік субъектісі тіркелген. Оның: – 3 ірі кәсіпорын;
– 9 орта кәсіпкерлік субъектісі;
– 64 жылыжай;
– 25 жер қойнауын пайдаланушылар;
– 1266 шаруа қожалықтары және 1136 кіші кәсіпкерлік субъектілері жұмыс атқаруда. Осы кәсіпкерлік субъектілерінде Қаратау ауданының 23 148 тұрғыны жұмыспен қамтылған.
Таскен мен Бозарыққа – жаңа мектеп
Аудан бойынша жалпы орта білім беретін 30 мектеп, 2 Назарбаев зияткерлік мектебі мен 1 кешкі мектеп оқушыларға білім беруде. 2016 жылы республикалық бюджеттен Бозарық шағынауданы мен Сайрам тұрғын алабында 1200 орындық және Мирас шағынауданында – 900 орындық, ал, Сайрам тұрғын алабында №91 және №111 мектептерде 300 орындық қосымша құрылыс жүргізіліп, пайдалануға берілді.
Қазіргі таңда аудандағы үш ауысымды білім беретін мектептер санын азайту мақсатында Әкімшілік іскерлік орталығы, Қайнарбұлақ тұрғын алабы және Достық шағынауданынан 1200 орындық мектептің құрылысы мен Ақжайық шағынауданындағы №59 мектеп жанынан 600 орындық қосымша мектеп құрылысы жүргізілуде.
Сондай-ақ, Таскен тұрғын алабында орналасқан №103 мектеп жанынан 600 орындық қосымша құрылыс пен Бозарық саяжайынан 900 орындық мектеп құрылысын салу бойынша құзырлы мекемелерге ұсыныс берілді.
Аудан көлемінде 39 денсаулық сақтау мекемесі орналасқан болса, оның ішінде
– 3 облыстық аурухана,
– 4 емхана,
– 14 дәрігерлік амбулатория,
– 2 фельдшерлік бекет,
– 16 жедел жәрдем бригадалары аудан тұрғындарына сапалы қызмет көрсетіп келеді.
Тұрғындар көзімен
«Үй бетін көрмейтін әкім»
Ғ.Мәуленқұловтың баяндамасынан кейін халық қалаулылары, кәсіпкерлер мен жергілікті тұрғындар жарыссөзге шығып, өз пікірін айтты. Қалалық мәслихаттың депутаты Талғат Әмірбеков аудан әкімінің «күн-түн демей, үй бетін көрмей» атқарып жатқан жұмысына оң бағасын бере отырып, алғысын білдірді. Ал Ақжайық шағынауданының орам басшысы Бақыт Балтабеков:
– «Елбасының «100 нақты қадам» стратегиялық жоспары негізінде «Ақжайық» шағынауданында №59 жалпы орта мектеп пайдаланылуға берілді. Елдімекен 100% электр жарығы және көгілдір отынмен қамтамасыз етілді. 5 көшеге асфальт төселді. Мектептің алдына көптің сұрауымен бағдаршам да орнатылды. Ғабит Патшаханұлы аудан әкімдігіне келген аз уақыттың ішінде көптеген ілкімді істер атқарылды. Енді біздің шағынауданға бір үлкен емхана салып берсеңіздер!», – деді. Дәл осы ауданның ардагерлер кеңесінің төрағасы Оралбай Камалов мешітке барар жолды асфальттап беруді өтінді. Ақсақал: «Өздерің білесіңдер, алда «ЭКСПО-2017» көрмесіне келе жатыр, осы ауданнан белсенді 5-6 қарияны сол келелі шараға апарып, әкелсеңдер!» деп өз бұйымтайын да қоса кетті.
«Асар» шағынауданының тұрғыны Мұнайбек Салимбаев:
– 2015 жылдың тамыз айынан бері Ғабит Мәуленқұловпен қоян-қолтық жұмыс істеп келеміз. «Асарда» қылмыстың алдын алу мақсатында 6 көше жарықтандырылды. Алайда, әлі де атқарылар шаруа шаш етектен. Мысалы, мектептер мен бала-бақшалардың алдына жасанды жол кедергілерін орнату керек. Себебі, бала өмірдің мәні, ертеңгі келешегіміз. Сосын қоғамдық көлік мәселесін шешіп берсеңіз!, – деді асарлық ақсақал. Асарлық тұрғындарды бұлардан бөлек, аялдама және аяқжол, сондай-ақ бағдаршам мәселелері толғандырады.
Қаратау ауданының әкімдігі жергілікті кәсіпкерлерді әлеуметтік жұмыстарға тартып келеді. Мәселен, кәсіпкерлер аудан бойынша 22 көшеге шағал тас төсеп берген. Солардың бірі – «Феруз» ЖШС-і 16 км жерге тас төсеген. Сонымен қатар, аталған мекеме директорының орынбасары Нұрлыбек Жүсіпәлиев, Шапырашты ауылының тұрғындарына бір реттік көмек көрсеткендіктерін айта кетті.
«Қайнарбұлақ» шағынауданының орам басшысы Торғын Аширова елдімекенде атқарылған игі жұмыстарды тізе келе: «7 көшеге шағал тас төселді. Таза ауыз су жүргізілді. Жаңа мектеп салынды. Алайда, осы мектепке барар жолдар тар. Сосын аяқжолдар жоқ. Емхана мен балабақша мәселесінің әбден толғағы жетті», – деді.
Бозарықтық Уәлихан Юсупов жаңадан салынған 1200 орындық №57 жалпы орта мектепке барар жолдың жоқтығын, адамдардың әбден әбігерге түскендігін аудан әкімінің назарына жеткізді. «Асфальт төселеді» дегелі 3 жыл болады. Сол қашан шешімін табады?» деп сұрақты төтесінен қойды.
Ал «Достықта» жарық мәселесі шешімін тапқанымен, қоғамдық көлік және жол өте өзекті мәселе болып отыр.
Қала әкімінің орынбасары Б.Жанбосынов тұрғындардың сауалдарын мұқият тыңдай келе барлық сауалдарға тиянақты жауап беріп өтті.
– 2017 жылы қала аумағы бойынша 27 көше жарықтандырылып, асфальт төселетін болады. Оның басым көпшілігі осы Қаратау ауданына қарайды, – деп нақты қай көшелердің асфальтталатынын тізіп, атап берді. – 42 көшені жарықтандыру үшін жобалық-сметалық құжаттар әзірленуде. Балалардың қауіпсіздігі мақсатында 350 қашықтыққа жасанды жол кедергілері қойылатын болады. 17 бағдаршам обьектісі орналастырылмақ. Көгалдандыру мәселесіне келер болсақ, Төлеметов көшесінің бойы ретке келтірілмек. «Қайнарбұлақ» пен «Бозарықтың» арасындағы бос жатқан сай-сала демалыс аймағына айналады деп жоспарлануда. Емхана мәселесін облыстық денсаулық сақтау басқармасының назарына ұсынамыз, – деді Бейсенбек Керімбекұлы.
Мәселелер шешімін табады
Шымкент қаласы Еңбекші ауданының әкімі Ғалымжан Ильясовтың тұрғындар алдында есеп беру кездесуі М.Сапарбаев атындағы Оңтүстік Қазақстан гуманитарлық институында жалғасты. Қала әкімінің орынбасары Бейсенбек Жанбосынов, қалалық мәслихат депутаттары, қалалық құрылымдық бөлімдердің басшылары, үй комитетінің төрағалары қатысқан жиында бірқатар шешімін күткен мәселелер талқыға түсті. Аудан әкімінің айтуынша, тұрғындар алға тартқан уәждер бойынша нақты жұмыстар жүргізіледі.
Әдеттегідей, көпшілік назарына жыл бойы жүзеге асқан тірліктер бейнеролик арқылы көрсетілді. Аудан әкімі Ғалымжан Молдабайұлы да өткен жылы есте қалған оқиғалар мен жетістіктер жөнінде баяндап берді.
Алдымен жарыссөзге шыққан қалалық мәслихат депутаты Ермек Дәрменов ауданда атқарылған жұмыстар көңіл қуантарлық екеніне тоқталды. Өз ұсыныстары да бар екен. «Қазір көшелерге атау беру жұмыстары қолға алынған. Дұрыс-ақ. Дегенмен, мына жағдайға назар аударсаңыздар. Шалғайдағы елдімекен тұрғындарының жедел жәрдем қызметкерлерін шақыруда қиындықтар туындап жатыр. Бұл әсіресе, жеке сектордағы үйлерге қатысты. Яғни, енді қала көшелерінің атауларын гугл картасы жүйесіне енгізу керек. Қалаға келер қонақ көп. Сол себепті туристер үшін де, өзіміз үшін де жағдай жасайық. Екінші мәселе, пәтер, үй ұрлығы көбейген. Соның алдын алу үшін учаскелік полиция қызметкерлері тек орталық көшелермен жүрмей, шалғайдағы және көпқабатты үй аулаларын да араласа екен. Үшінші ұсынысым, соңғы кездері Ерімбетов көшесінің бойынан жол кедергісін орнату қажеттігі туындап тұр», – деді мәслихат депутаты.
«Нұр Отан« партиясы Еңбекші аудандық филиалы төрағасының орынбасары Бердіқұл Садықов таяуда ғана пайдалануға берілген Қ.Жандарбеков атындағы гүлзарды күтіп ұстауға, көздің қарашығындай сақтауға үндеді.
Ал соңғы болып мінберге шығып, сөз сөйлеген Ш. Уәлиханов көшесіндегі 231 а үй комитетінің төрайымы Надежда Пьянкова өз үйінің аулаларын ұқыпты ұстап, тазалыққа жіті көңіл бөлетінін айтады. Бүгінде өздерінің бастамасымен, әрі аудан әкімдігінің ұйытқы болуымен орнатылған жылу есептегіш құралының тиімділігін көріп отыр. Оған көз жеткізген көрші үй тұрғындары да жылу есептегіш құралын орнатып алып жатқанға ұқсайды.
Аудан тұрғындарының талап-ұсыныстары тыңдалды. Әуелі Алдияров көшесіндегі 72 үй тұрғыны Қалдарбек Назарұлы шағым айтты. Үй ауласындағы көшелер жөнделмепті. Одан кейін, балалар алаңы керектігін және жаттығу алаңын орнатып беруді сұрады. Ұлықбек көшесінің тұрғындары да осы мәселені көтере келген.
«Күншығыс» шағынауданы №22 үйдің тұрғыны Қалипа Батырқұлованы балаларының қауіпсіздігі алаңдатады. «Біздің үйдің ауласына бейнекамера қойсаңыздар. Кеш түссе болды, балаларымыздың жағдайын уайымдап жүргеніміз. Одан кейін, мектебіміздің күрделі жөндеу көрмегеніне 35 жыл болған. Және спорт кешені қажет» деді. Аудан әкімі «№ 22 үйдің ауласын абаттандыруға жобалық-сметалық құжаттар жасалынды, тек қаржысын күтіп отырмыз», деп жауап берді. Ақпан айында бюджетті нақтылау кезінде бұл мәселе шешілмек.
Ғалымжан Молдабайұлының айтуынша, қазіргі таңда № 5 спорт мектебіне күрделі жөндеу жүріп жатыр. Сол құрылыс аяқталса, ауданның біраз баласы спортпен шұғылдануға мүмкіндік алмақ. Сонымен қатар, аудандағы 25 спорт алаңшасын спорт мектебінің балансына алу жөнінде тапсырма берілгенін айтты.
№ 30 жалпы орта мектептің ата-аналар кеңесінің төрағасы Ғали Асанбековтың мәлімдеуінше, оқу орнының жанына аяқжолдар салынған. Мектеп толығымен сыртынан қоршалған. Тек қинайтын бір жағдай бар. Соғылғанына елу жылдан асқан мектеп қазіргі талапқа сай емес. Мектепте қосымша сабақ өткізуге сынып бөлмелері жетіспейді. Енді білім ошағының айналасы жарықтандырылып, күрделу жөндеу жүргізілуі керек.
Бұл мектептің мәселесі бойынша білім бөлімінің өкілдері өткен жылы техникалық зерделеу жұмыстары жүргізілгенін, биыл жобалық-сметалық құжаттары дайындалатынын атап өтті.
Негізінен, айтылған шағымдардың басым бөлігі аулаларды абаттандыру, спорт алаңшасын салу, мектептердің күрделі жөндеуден өткізу мәселелеріне қатысты.
Жиынды қорытындылаған қала әкімінің орынбасары Бейсенбек Жанбосынов жұмыстарды оң бағалап, биыл да инфрақұрылымдық жүйелер, қаланың шалғайдағы шағынаудандарына қоғамдық көлік жүргізу, т.б мәселелер шешілетінін айтты. Яғни, биыл Қапал батыр, Еламан, Жолан батыр, Ілияев, т.б., көшелер жарықтандырылады. Еңбекші ауданында бүгінде балалар алаңшасын салуға жобалық-сметалық құжаттар дайындалып, бюджеттік комиссияға тапсырылған.