Шетелдіктерге жер сатылмайды
Среда, 10 Июль 2019 04:11Қазақстанда шетелдіктерге жер сатылмайды және уақытша қолданысқа да берілмейді. Бұл туралы ҚР Ауыл шаруашылығы министрі Сапархан Омаров мәлімдеді.
ҚР Орталық коммуникациялар қызметінде өткен баспасөз мәслихатында министрге «Шетелдіктерге жер сатыла ма?» деген сұрақ қойылды.
«Шынында да, соңғы уақытта интернетте шетелдіктерге жердің сатылуы туралы қауесет тарады. Бірден айтқым келеді, қазіргі уақытта шетелдіктердің жеке меншігіне жер сатылмайды.
Уақытша қолданысқа да берілмейді. Алдағы уақытта да шетелдіктерге жер берілмейді», деп жауап берді С.Омаров.
УЕФА ойыны – Шымкентте
Среда, 10 Июль 2019 04:09Ертең, 11 шілде күні Шымкенттегі Қажымұқан атындағы орталық стадионда УЕФА Еуропа Лигасының іріктеу кезеңі аясында жергілікті «Ордабасы» клубы грузиялық «Торпедо» командасымен кездеседі.
Айта кетерлігі, «Ордабасы» клубы 3 жыл мерзімнен соң Шымкент қаласында Еуропа лигасының матчын өткізбек. Команда соңғы рет Шымкентте Еуропа лигасының матчын 2016 жылдың 7 шілдесінде сербиялық «Чукаричкиге» қарсы өткізген. Билет бағасына тоқталсақ, зейнеткерлерге, ҰОС ардагерлеріне, мүмкіндігі шектеулі жандар мен 7 жасқа дейінгі балаларға кіру тегін.
Мектеп оқушылары мен жоғары оқу орнында білім алатын жастарға билет бағасы 200 теңгеге дейін болса, ересектерге – 500 теңге. Ойын сағат 20:00-де басталады.
Касса сағат 09:00-ден 18:00-ге дейін жұмыс істейді. Сіздерді матчта күтеміз! Алға, «Ордабасы»!
ЕҢСЕЛІ ЕЛОРДАНЫҢ 10 СӘУЛЕТТІ ҒИМАРАТЫ
Пятница, 05 Июль 2019 04:57Өз заманында жерұйық іздеген Асан қайғы бабамыз желмаясына мініп желдіртіп, Сарыарқаны аралап жүргенде Есілдің бойын көріп, «Алты күнде ат семіртіп мінетін жер екен» деп бағасын беріпті. Одан беріректе Алаш арыстарының бірі Әлихан Бөкейхан «Қазақты автономия қылсақ, Қараөткел – Алаштың ортасы, сонда университет салып, қазақтың ұл-қызын оқытсақ, «Қозы Көрпеш – Баянды» шығарған, Шоқан, Абай, Ахмет, Міржақыпты тапқан қазақтың кім екенін Еуропа сонда білер еді-ау», деген екен.
Асыл бабалардың арманы ақиқатқа айналғаны осы шығар. Бұрын Қараөткел, Ақмола, Целиноград аталған қазіргі елорда заманауи сәулеттің мүмкіндіктері толық көрініс тапқан һәм көз жанарын алған көрікті шаһарға айналды. Әрине, әлемдегі кез келген қаланың келбеті дегенде, ең алдымен, сәулет көрінісі көзге түседі. Осы орайда назарларыңызға елордамыздың ең танымал 10 ғимараты туралы маңызды мәліметтермен бөлісуді жөн көріп отырмыз.
1. БӘЙТЕРЕК – БЕЙБІТШІЛІК ҰЯСЫ
Бәйтерек – Нұр-Сұлтан қаласындағы сәулет құрылыс кешені, сәулет өнерінің бірегей туындысы. Елорданың ең көрнекті ғимараттарының бірі. Негізгі идеясы Тұңғыш Президент Нұрсұлтан Назарбаевтың эскиз-нобайы негізінде өмірге келді. Елбасы қасиетті «Самұрық» құсы туралы ежелгі қазақ аңызына сүйеніп, осы алып ескерткіштің нобайын сызып берді.
Есіл өзенінің сол жағалауында 2002 жылы бой көтерген зәулім «Бәйтеректің» биіктігі – 97 м. Бұл сан кездейсоқ емес, 1997 жыл – ел астанасының Алматыдан Нұр-Сұлтан қаласына ауысқан жылы.
«Бәйтерек» қазақ халқының қайта өрлеуі мен түлеуінің, мемлекеттілігінің, биіктік пен тереңдіктің, кеңдіктің белгісі, дархандықтың көрінісі іспетті. Ол бейбіт өмір мен келісімге ұмтылған барлық қазақстандықтардың ғұмырлық мұратын білдіреді.
2. АҚОРДА – ЕЛІМІЗДІҢ БАСТЫ ОРДАСЫ
Ақорда – ҚР Президентінің Резиденциясы. Есілдің сол жағалауында орналасқан. Ақорданың құрылысы 2001 жылдың қыркүйегінде басталып, ресми тұсаукесері 2004 жылдың желтоқсанында өтті.
Ғимарат жер бетіндегі 5 және жер астындағы 2 қабаттан тұрады. Мемлекет басшысы резиденциясының атауында терең мағына бар. «Ақ» сөзі түркілік мәдениет семантикасында ең алдымен қасиеттілікті (киелілікті) білдіреді. Бұл ұғым шаттық пен сәттіліктің, шынайылық пен мәрттіктің, ар-ұят пен жақсылықтың нышаны.
3. «ХАН ШАТЫР» - НОРМАН ФОСТЕРДІҢ СӘУЛЕТ ҒАЖАЙЫБЫ
«Хан Шатыр» сауда және ойын-сауық кешені елорданың 12 жылдық мерейтойына орай 2010 жылы ашылды. Биіктігі - 200 метр. Бұл сауда және ойын-сауық орталығында ең үлкен қалалық бақ, ірі сауда орталықтары, кинотеатр, концерт залдары бар. Орталықтың ішінде тропикалық бақтар, гүлзарлар, субұрқақтар орналасқан.
Әйгілі сәулетші Норман Фостердің қиялынан туған сәулет ғажайыбы – «Хан Шатыр» Орталық Азиядағы баламасыз әрі ең ірі архитектуралық жоба. Тағы бір атап өтетін жайт, «Хан Шатыр» «Forbes Style» журналының нұсқасы бойынша әлемнің ең үздік 10 экоғимараттарының тізіміне енген.
4. «ПИРАМИДА» ПАРИЖДЕГІ ЭЙФЕЛ МҰНАРАСЫНДАЙ КӨЗ ТАРТАДЫ
Пирамида іспетті етіп тұрғызылған сарай 2006 жылы 2 қыркүйекте салтанатты түрде ашылды. Ғимарат ағылшын архитекторы Н.Фостердің жобасымен салынған. Бейбітшілік пен келісім сарайында Қазақстан халқы Ассамблеясының халықаралық және дінаралық келісім орталығы, мұражай, 1,500 орынды опера залы, қысқы бақ орналасқан.
Сарай ғимаратының құрылысы құбылмалы ауа райын ескере отырып салынған. 60 градус бұрышта қиғаш қозғалатын лифттер де сарайдың бірегейлігі саналады.
Бейбітшілік пен келісім сарайы – сәулет өнерінің бірегей туындысы. Болат пен тастан тұрғызылған сарай өзара рухани түсінушіліктің жаһандық орталығына айналды.
5. ОРТАЛЫҚ АЗИЯДАҒЫ ЕҢ ЗӘУЛІМ ҺӘМ ЕҢ ӘДЕМІ МЕШІТ
Елорда жамағатының иықтаса Аллаға сыйынар имандылық ордасы - Әзірет сұлтан мешіті. 12 мың адам сыятын мешіттің жалпы құрылыс аумағы 18 мың шаршы метрді құрайды. Ғибадат үйі үш қабаттан тұрады. 2012 жылы 6 шілдеде Нұрсұлтан Назарбаевтың қатысуымен салтанатты түрде ашылды.
Елбасы мешіттің ашылу салтанатында салмағы 40 келі болатын көне Құран Кәрімді сыйға тартты. Болжам бойынша XII ғасырда жазылған, Қазақстанға шамамен XIV ғасырда әкелінген Құран Кәрім кітабы қазіргі Түркістан облысынан табылған еді.
Ғибадат үйінің аумағында 745 көлікке арналған ашық автотұрақ тұр. Үлкен намаз залындағы биіктігі 51, ені 28 метрлік күмбезді Орталық Азиядағы ең үлкені екенін айта кету керек. Әйнегі таза хрустальдан, негізгі бөлігі жезден жасалған салмағы 3 тонналық люстра арнайы осы мешіт үшін дайындалған.
6. «НҰР ӘЛЕМ» – «МҰНАЙДЫҢ СОҢҒЫ ТАМШЫСЫ»
«Нұр Әлем» сферасы туралы бүгінде әрбір қазақстандық пен көптеген шетелдіктер біледі. Себебі, ол «ЭКСПО-2017» халықаралық мамандандырылған көрмесінің ең танымал нысаны болды. «Нұр Әлемді» елорданың ғана емес, тұтас Қазақстанның жаңа символы деп атауға болады.
Сфера ЭКСПО-2017 кешенінің дәл ортасында орналасқан. Шар тәрізді шыны ғимараттың диаметрі 80 метрді құраса, биіктігі 100 метрге жетеді. Жоба авторы, неміс сәулетшісі кіші Альберт Шпер «Нұр Әлемнің» «мұнайдың соңғы тамшысы» және барша адамзаттың болашақтың энергиясына өтетін дәуірі ретінде ойластырғанын айтқан еді. «Нұр Әлемге» саяхатты сегізінші қабаттан бастаған жөн.
Бұл қабатта туристердің сүйікті орнына айналған шолу алаңы бар, ол жақтан қаланың таңғажайып көрінісін тамашалауға болады. Сондай-ақ, қонақтар мұнда шыныдан жасалған көпірмен жүре алады. Бұл мөлдір көпір бір уақытта 7 тоннаға дейінгі салмақты көтере алады.
7. ЕЛІМІЗДЕГІ ЕҢ БИІК АНСАМБЛЬ
Қазақстан теміржолы ғимараты – елордадағы ең биік ғимараттардың бірі. Заманауи үлгіде жасалған зәулім үй астананың мақтанышына айналды.
2010 жылы пайдалануға берілген. Әр мұнараның биіктігін ескере отырып, екі нысанның арасындағы дәліздер арнайы шарнирлерге орнатылған. Жобаға сәйкес, қатты жел соққанда ғимараттың үстіңгі жағы қозғалып тұрады.
8. МИНИСТРЛІКТЕР ҮЙІ – ЕЛОРДАНЫҢ ЕҢ ҰЗЫН ҒИМАРАТЫ
Елорданың ең ұзын ғимараты саналатын Министрліктер үйі қаланың ажырамас бөлшегіне айналды. Ұзындығы 1,5 шақырым, жалпы аумағы 228 мың шаршы метрді құрайтын бұл ғимаратсыз Нұр-Сұлтан қаласын елестету мүмкін емес. 20 блоктан тұратын ғимарат 8 қабатты, 10 қабатты биіктіктен тұрады.
2006 жылы ашылған. Бұл ауқымды нысан Үкімет, Сенат, Мәжіліс, Ақорда және алаң айналасындағы өзге де ғимараттармен бір кешенде ойластырылған және Бас жоспарға әкімшілік-тұрғын үй кешені ретінде енгізілген.
9. «НАЗАРБАЕВ ОРТАЛЫҒЫ» ЖАСТАРДЫ ОТАНСҮЙГІШТІККЕ ТӘРБИЕЛЕЙДІ
Аспанмен таласқан ғимараттар арасында «Назарбаев орталығының» алар орны ерек. Бұл жерге жыл сайын алыс-жақын елдерден 200 мыңнан астам адам келеді. Келушілер ҚР Тұңғыш Президенті Нұрсұлтан Назарбаевтың жеке кітапханасымен танысып, Елбасыға табысталған түрлі сыйлықтарды көріп, әр кезде түскен естелік фотосуреттермен таныса алады.
Ғимаратқа кіру тегін. «Назарбаев орталығы» демалыс күндері де жұмыс істейді. Кешеннің жалпы аумағы 30 мың шаршы метрді алып жатыр. Бұл ғимараттың бірегейлігі – шатырының шыныдан жасалғанында. Әйнектен күннің жарығы мен жылуы түсіп тұрады.
10. АСТАНА ОПЕРАДА – ЕҢ САПАЛЫ АКУСТИКА
Бас қаланың сол жағалауында орналасқан «Астана Опера» театры келушілерді өзінің асқан әсемдігімен таңдандырады. Елбасы барша көрермендерді Орталық Азиядағы ең үлкен опера және балет театрының ашылуымен құттықтап, 2013 жылы елорданың 15 жылдығына арналған баға жетпес сыйлық болғанын атап өткен еді.
Жалпы аумағы 64 мың шаршы метрді құрайтын жаңа театр әу баста Миландағы «Ла Скала», Мадридтағы Корольдік опера, Мәскеудегі Үлкен немесе Нью-Йорктегі «Метрополитен-опера» сияқты әлемдік театрларының қатарына кіруге толық құқылы өнер шаңырағы ретінде ойластырылды. Оны тұрғызуда отандық мамандардан басқа Швейцария, Италия, Албания, Марокко, Ресей сынды 33 елдің шеберлері қатысты.
Айгүл ҚАПБАРОВА Ант қабылдады
Пятница, 05 Июль 2019 04:49ҚР Парламенті Сенатының жалпы отырысында жаңа сайланған депутат Айгүл Қапбарованың ант беру рәсімі өтті. ҚР Парламенті Сенатының төрайымы Дариға Назарбаева Айгүл Жарылқасынқызының алдағы жұмысына сәттілік тіледі.
– Құрметті әріптестер, Шымкент қаласынан Айгүл Жарылқасынқызы Қапбарова Сенат депутаты болып сайланып, қатарымызға қосылды. Мінекей, қазақтың әдемі қызы, оңтүстіктен келген. Менің ұсынысымды қабылдады. «Әйел кісі жіберіңіздер» дегенмін. Шымкент қаласының әкімдігіне, мәслихатқа көп рахмет айтамыз.
Айгүл Жарылқасынқызын құттықтаймыз. Депутаттық қызметіне табыс тілейміз, - деді Д.Назарбаева.
Осыдан кейін Айгүл Қапбарова мінберге шығып, ант берді.
– Қазақстан халқына адал қызмет етуге, Қазақстан Республикасының тұтастығы мен Тәуелсіздігін нығайтуға, оның Конституциясы мен заңдарына қатаң бағынуға, депутаттың өзіме жүктелген мәртебелі міндеттерін адал атқаруға ант етемін!, - деді А.Қапбарова.
Сенаттың жалпы отырысы депутаттың әлеуметтік-мәдени даму және ғылым комитетінде жұмыс істеу жөніндегі өтінішін қарап, бірауыздан қабылдады.
А.Қапбарова, сонымен қатар, Сенаттың тұрақты комитетінің құрамына сайланды.
Арыстағы нысандар қалпына келтіруде
Среда, 03 Июль 2019 03:48Арыс қаласын қалпына келтіру штабы жұмыс істеуде. Қалаға Қазақстанның барлық аймағынан мамандар келді.
Бұған дейін хабарлағанымыздай, қала 17 секторға бөлінген. Шымкенттің мамандары қалпына келтіретін секторға 579 нысан болса, арасында 449 үй, 130 әлеуметтік нысан, коммерциялық және тағы басқа жылжымайтын мүліктер бар. Жалпы қалада 7 708 үй тізімге алынды.
– Қазір қалпына келтіру жұмыстарының жол картасын жасап жатырмыз. Бұл құжатқа әр нысан бойынша тыңғылықты ақпарат енгізіледі. Шаруашылық жай да кіреді. Келтірілген шығын көлемі, қалпына келтіруге қажет атқарылатын жұмыс мәліметі болады.
Құрылыс басқармасы, Мемлекеттік сәулет-құрылыс бақылауы басқармасы мен сәулет және қала құрылысы басқармаларының мамандары үйлерді алғашқы тексерістен өткізді, - деді Шымкент қаласы әкімінің орынбасары Бауыржан Мамыталиев.
Еске сала кетсек, Арыстағы 449 үйдің 227-ін ағымдағы және күрделі жөндеу қажет. 6 үй толықтай қираған. Ол үйлерді қайта салу қажет. Штаб барлық нысандарды толықтай техникалық тексерістен өткізеді. Шымкент қаласы әкімдігі және Арыс қаласы әкімдігінің қызметкерлері бірге жұмыс істейді.
Шымкент әкімдігі жауапкершілігіне алған сектордың тұрғындары ақаулар жөнінде кез келген сәтте хабарлай алады. Бүгінгі таңда Шымкент әкімдігінің жауапты қызметкерлері үйлерді жөндеуге кірісіп кеткен.
«Журналистика – бұл миссия»
Пятница, 28 Июнь 2019 04:35«Журналистика – бұл миссия» дейді журналистика мен мультимедианың бүгінгі үрдістерін бағалаған жазушы, журналист Дебора Кемпбелл. Журналистика әрі кәсіп, әрі міндет. Қоғам алдындағы үлкен жауапкершілік. Елімізде жыл сайын 28 маусым күні қоғамдық маңызы бар дата ретінде республика журналистерінің кәсіби мерекесі аталып келеді.
Бұл кездейсоқ емес, өйткені БАҚ және журналистика қоғамның бөлінбейтін тұтас бөлшегі ретінде оның алға қарай үздіксіз дамуын қамтамасыз етудің бірден бір тиімді тетігі болып саналады. Рас, қоғамда әртүрлі мамандық болса, журналистика – сол қоғамның айнасы. Бұл мамандық иелерінің табиғатының өзі жаңалыққа жақын, қоғам үшін қызмет етуге құштар.
Сондықтан бұқаралық ақпарат құралдарына артылған сенім жүгі де ауқымды.
Журналистердің кәсіби мерекесі бекітілді
Таяуда ғана ел Үкіметі қазақстандық журналистердің кәсіби мерекесін бекітті. Енді Қазақстанда 28 маусым күні бұқаралық ақпарат құралдары қызметкерлерінің мерекесі аталып өтіледі. Осыған орай Үкіметтің тиісті қаулысы жарияланды.
«Үкіметтің 2017 жылдың 31 қазанындағы қаулысына келесі өзгертулер мен толықтырулар енгізілуі тиіс. 17 мамыр – ақпарат және байланыс қызметкерлерінің күні, 28 маусым – бұқаралық ақпарат құралдары қызметкерлерінің мерекесі», деп жазылған қаулыда.
Еске салсақ, Мемлекет басшысы Қ.Тоқаев 10 маусым күні БАҚ өкілдерімен кездесуінде алдағы уақытта Қазақстанның бұқаралық ақпарат өкілдері туралы заң қабылдануы мүмкін екенін айтқан болатын. Баспасөз мәслихаты барысында Қазақстанның БАҚ өкілдері Мемлекет басшысынан журналистердің мәртебесі туралы заң қабылдау мәселесін көтерген еді.
– Бұл өте өзекті мәселе. Бұл мәселені жақсылап тұрып қарауымыз керек. Мен Үкіметке тиісті тапсырманы беремін. Келешекте журналистердің мәртебесі туралы, егер қажет болса, тиісті заң қабылдаймыз. Не болмаса мен өзім Президент ретінде шешім қабылдаймын, – деді Қасым-Жомарт Тоқаев.
Байланысы мықты мемлекеттің
қорғанысы да қуатты
Осы аптада Мемлекет басшысы Қ.Тоқаев елордада бұқаралық ақпарат құралдары саласындағы сыйлықтар мен гранттарды тапсырды. Қасым-Жомарт Тоқаев сыйлық лауреаттары мен грант иелерін, алғыс жарияланған шығармашылық ұжымдарды және барлық журналистер қауымын келе жатқан кәсіби мерекелерімен құттықтады.
– Бұқаралық ақпарат құралдары – жаңалықтың жаршысы. Ел ішіндегі және әлемдегі оқиғалардан халыққа шұғыл әрі шынайы ақпарат тарату – Сіздердің кәсіби еңбектеріңіз. Сондықтан, Сіздердің қоғамдық маңызы зор қызметтеріңізге біз әрқашан құрметпен қараймыз, бағалаймыз. Менің тапсырмам бойынша Үкімет арнайы қаулымен Қазақстан журналистерінің кәсіби мерекесін бекітті, – деді Президент.
Қасым-Жомарт Тоқаев озық технология заманында медиа саласының мүмкіндіктері өте ауқымды екенін атап өтті. Мемлекет басшысы журналистиканың жаңа дәуірінде ғаламтор желісі мен әлеуметтік желілердің айрықша рөліне тоқталып, ақпараттың ашық, жедел және қолжетімді болуы жетістіктің басты өлшемдеріне айналғанын айтты.
– Мемлекеттің әлеуетін нығайту, экономиканы дамыту, азаматтардың тұрмыс сапасын арттыру – бүгінде еліміздің алдында тұрған маңызды міндеттер. Отандық медиа-қауымдастықтың сындарлы негізде ұйысуы, журналистердің белсенді азаматтық ұстанымы, олардың кәсіби деңгейі және әділдігі – ақпараттық кеңістіктегі табысты жұмыстың негізгі шарттары. Мемлекет өз тарапынан БАҚ-қа қолдау көрсете береді, – деп атап өтті Президент.
Салтанатты жиында «Жас Өркен» ЖШС бас директоры Жүсіпбек Қорғасбекке, «Комсомольская Правда-Қазақстан» газетінің бас редакторы Виктор Кияницаға, «Ана тілі» газетінің бас редакторы Жанарбек Әшімжанға, «Астана» телеарнасының редакторы Жайна Жақсылықоваға Мемлекет басшысының Өкімімен сыйлық тағайындалды. «Хабар 24» телеарнасының тілшісі Рауан Мыңбаевқа, «Qazaqstan» телеанасындағы «Мәселе» талдамалық бағдарламасының жүргізушісі Нартай Сәрсенғалиевке, «Қазақстан» телерадиокорпорациясы Маңғыстау облыстық филиалының шеф-редакторы Асем Сартбаеваға гранттар тапсырылды. «Егемен Қазақстан», «Экспресс К», «Знамя труда» және «Шалқар» радиосы шығармашылық ұжымдарына ҚР Президентінің алғысы жарияланды.
Қасым-Жомарт Тоқаевтың Алғыс хаттарын «Айқын» газетінің бас редакторы Нұртөре Жүсіп, «Хабар» телеарнасы талдамалық бағдарламалар бөлімінің шеф-редакторы Александр Трухачев, «Qazaqstan» телеарнасының жүргізушілері Қымбат Досжан және Дана Нұржігіт, «Хабар 24» телеарнасының шеф-редакторы Шалқар Қожаев, «Qazaqstan» телеарнасының ақпараттық-сараптамалық бағдарламалар дирекциясының директоры Ерлан Атамбай, «Литер» газеті бас редакторының орынбасары Жанна Ойшыбаева, «КТК» телеарнасының бас директоры Эльмира Джамилова, сондай-ақ «Қазақпарат» ХАА және «Жетісу» телеарнасы алды.
Қазақстан-Ресей және Қазақстан-Қытай ынтымақтастығын нығайтуға белсенді атсалысқаны үшін Бүкілресейлік мемлекеттік телевизия және радио хабарларын тарату компаниясы мен «CCTV» Халықаралық телеарнасы ҚР Президентінің Алғыс хаттарымен марапатталды. Мемлекет басшысының атынан еліміздің барлық өңірлеріне жіберілген алғыс хаттар үздік журналистерге салтанатты түрде табыс етілмек.
Баспасөз хатшылары департамент
директоры деңгейімен теңестірілмек
Бұл туралы еліміздің Ақпарат және қоғамдық даму министрі Дәурен Абаев мәлімдеді.
– Маңызды бағыт – бұл мемлекеттік органдардың БАҚ-пен өзара іс-қимылы. Баспасөз қызметінің жұмысына үлкен назар аударылып отыр. Соңғы уақытта мемлекеттік органдардың бірінші басшыларының баспасөз қызметтеріне қарым-қатынас қатты өзгергенін барлық жауапкершілікпен айта аламын, – деді министр.
Д.Абаевтың айтуынша, ендігі уақытта министрлер де, әкімдер де баспасөз хатшылардың жұмыстарына жауапкершілікпен қарайды.
– Бұл – уақыт талабы. Біз өз тарапымыздан жыл сайын баспасөз қызметтері қызметкерлерінің біліктілігін арттыру курстары мен семинарларын өткізіп, ең белсенді әрі сауатты баспасөз хатшыларды Astana Media week аясында ынталандырып отырамыз.
Біз алғаш рет баспасөз хатшыларының мәртебесін БАҚ туралы заңда жаздық. Қазіргі уақытта баспасөз хатшысы санатын департамент директорына дейін көтеру бойынша жұмыс жүруде, – деді ол.
Қазіргі кезең қарулы майданның емес, ақпарат майданы екенін ескерсек, тартыс күштілер қаруы саналатын БАҚ арасында болып жатқаны жасырын емес.
Сондықтан еліміздің дамуын, қарқынды өркендеуін насихаттау үшін БАҚ-тың тұрақты да жүйелі жұмыс істеуі ең маңызды міндет болып қала бермек.
Ардагерлер арасындағы сайыс
Пятница, 21 Июнь 2019 04:46Шымкенттегі «Ақарыс» стадионында Қазақстан полициясының 27 жылдығына арналған ардагерлер арасында шағын футболдан және шахматтан спорттық жарыс өтті.
Салауатты өмір салтын ұстану, уақытты ұтымды пайдалану, ұйымшылдық пен ынтымақтастықты қалыптастыру мақсатында жарысқа 6 команда қатысты. Бұл күні спорт кешеніндегі теңбіл допқа құмар ойыншылар арасында өте тартысты ойын болды. Сонымен қатар олардың бойындағы спортқа деген құмарлық, жеңіске деген талпыныс және спортшылар жүзіндегі достық көңіл-күй қуантты.
Жарыстың нәтижесінде шағын футболдан 1-орынды Әл-Фараби аудандық ардагерлер құрамасы, 2-орынды Шымкент қаласы Б.Момышұлы атындағы оқу орталығының ардагерлері иеленді. Сондай-ақ, үздік қақпашы болып Сапар Әлсейтов (Шымкент қаласы Б. Момышұлы атындағы оқу орталығы), үздік шабуылшы - Алмас Дүтбаев (Абай ауданы), үздік қорғаушы болып Бабыржан Полатов (Әл-Фараби ауданы) атанды.
Шахмат жарысында 1-орынды Шымкент қаласы жедел басқарма ардагерлері, 2-орынды Шымкент қаласы Абай ауданының ардагерлері, 3-орынды Шымкент қаласы Еңбекші ауданының ардагерлері иеленді.
Жол құрылысы – биліктің қадағалауында
Среда, 19 Июнь 2019 05:47Шымкент қаласының әкімі Ахмет Байтұрсынов көшесіндегі жөндеу жұмыстарының барысымен танысты. Ғабидолла Әбдірахымов бұл туралы әлеуметтік желідегі парақшасында жазды.
– Кезекті рет Байтұрсынов көшесіндегі жөндеу жұмыстарының барысымен танысып, қадағалап шықтым. Мұндағы мақсатымыз – бұл көшені қаланың ең көрікті көшелерінің біріне айналдырып, болашақта басқа көшелерді де осы үлгі бойынша жөндеу, қаламызға сән беру. Алайда, кейбір жеке тұлғалар өз бастарының мүдделерін қоғам мүддесінен жоғары қоюда.
Мысалы, жекеменшік Шымкент экономикалық колледжінің басшылығы жалға берілетін футбол алаңшасы көрінбей қалғандықтан, көше бойындағы ағаштарды кесіп тастаған. Бұл жағдай бойынша заң аясында қатаң шара қолдануды тапсырдым. Қаланың көркін бұзатын, тұрғындарға қолайсыздық тудыратын осындай келеңсіз іс-әрекеттердің барлығы қатаң жазаланады, - деді қала әкімі.
Айта кетейік, ағаш қырқу фактісіне қатысты ҚР әкімшілік-құқық бұзушылық туралы кодексі бойынша Шымкент экономикалық колледжінің басшысы әкімшілік жауапкершілікке тартылды.
