Шымкент келбеті

Шымкент тұрғындарына сапалы медициналық қызмет көрсететін «BEL MED» медициналық сауықтыру орталығының лентасы қиылды. Медициналық мекемеде бел-омыртқа, мойын жарығы, остехондроз ауруларын емдеуге басымдық берілген.

Орталықтың ашылу салтанатына қатысқан Қаратау ауданының әкімі
Рақымберді Мулкеманов қаламызда медициналық қызметтің сапасын жақсартуда мемлекеттік-жекешелік әріптестік аясында қызмет көрсететін емханалардың үлесі көп, деп атап өтті.

– Жеке клиникалардың көптеп ашылуы бәсекелестіктің артуына, нәтижесінде медициналық қызмет сапасының жақсаруына ықпал етеді, – деді аудан әкімі Р.Мулкеманов.

Медициналық мекемеде 40 пациентке дейін күндізгі және тәулік бойы қызмет алу мүмкіндігі бар. Орталықта тұзды шахта, әйелдер және ерлерге арналған бассейн, массаж, емдеу кабинеттері және электрофорез бөлімдерінде 22 маман-дәрігер қызмет көрсетеді.

–Біздің өзге орталықтардан ерекшелігіміз – тракциялық емдеу. Бұл терапия бел, кеуде және мойын жарығы немесе протрузиясын емдеу ісінде таптырмайтын әдіс. Орталықтың бірінші қабаты күндізгі стационарға арналса, екінші қабатында науқастар дәрігер-невропатолог, физиотерепевтерден тәулік бойы ем алады. Алдағы уақытта МӘМС арқылы тұрғындарға ақысыз қызмет көрсетуді де жоспарлап отырмыз, – дейді «BELMED» медициналық сауықтыру орталығының бас маманы, неврорпотолог-дәрігер Нұрсұлтан Қабатаев.

Шымкенттің көркіне көрік қосып, тұрғындардың қоршаған ортаға жанашырлығын арттырған «Менің гүлді аулам» байқауы өз мәресіне жетті. Өткен жылдың қазан айында бастау алған байқаудың жеңімпаздары анықталып, салтанатты жиында жүлделі сый-сияпат табысталды.

Жеңімпаздарды марапаттау жиыны Орталық саябақта өтті. Саябақта жылжымалы қолөнер жәрмеңкесі мен гүлдер көрмесі ұйымдастырылды. Флористер түрлі гүл шоқтарынан гүлдестелер жасаса, қылқалам шеберлері ең үздік туындыларын көрсетіп, балаларға шеберлік сағатын өткізді. Салтанатты жиында жүлдегерлерді жеңісімен құттықтаған қала әкімінің орынбасары Нұрсадық Ергешбек «Менің гүлді аулам» байқауының қаланың көркеюіне, туристік әлеуетінің артуына қосатын үлесі зор екенін атап өтті.

– Қаламыздың өсіп-өркендеуінде осындай байқаулардың маңызы зор. Бұл аға буынның жастарға өз ортасын көгалдандыруға, гүлдендіруге және еңбекке баулуға бастайтын бастамасы болмақ. Қаламызда 1300-ден астам аула бар. Байқауға қатысуға 92 аула тұрғыны өтінім берген екен. Оның 31-і жүлделі орыннан көрініп отыр. Жеңімпаздарды халық арасынан шыққан көгалдандыру саласының мамандары, қоғам белсенділері мен БАҚ өкілдері саралады. Алдағы уақытта өз ауласын көгалдандыруға ниетті тұрғындардың белсенділігі артып, жүлдегерлер қатарынан көрінеді деп үміттенеміз, – деді қала әкімінің орынбасары.

«Менің гүлді аулам» конкурсын бағалау үшін 3-5 сәуір аралығында 7 кісіден құралған бағалаушы қазылар алқасы аулаларды аралап, тұрғындардың еңбегін бағалап шыққан. Әрбір аула басқарушысы мен тұрғыны конкурс барысында атқарылған жұмыс, көріктендіруге тартылған жұмыс күші мен қолданылған тыңайтқыштар жөнінде ақпараттарымен бөлісті. Ал, қазылар алқасы 12 сәуірде өткен бағалау отырысында жеңімпаздарды анықтап, жүлделі орындардың иелерін анықтаған. Қазылар алқасының төрайымы, А.Асқаров атындағы дендрологиялық саябақтың директоры Гүлнар Сапарымбеттің айтуынша, байқауда жүлдегерлердің санын арттыру үшін қаржылай сыйлыққа өзгеріс енгізіліпті.

– Аулаларды аралау барысында тұрғындардың қоршаған ортаға, қаламызға деген сүйіспеншілігін көріп қуандық, ауызбіршілігіне тәнті болдық. Өзім көгалдандыру саласының маманы болғандықтан өсімдік пен ағаштың өсуіне қарай оған қандай күтім жасалғанын бірден байқаймын. Комиссияның алқа отырысында кеңесіп, байқауда белсенділік танытып, төңірегін гүл мен ағашпен көмкерген тұрғындарды ынталандыру мақсатында жүлдегерлердің санын 2 есеге арттырдық. Бес ауданнан үш орын бойынша 15 жүлдегер шығу керек болса, біз оны 31-ге жеткіздік, – дейді комиссия төрайымы.

Конкусқа қатысқан тұрғындар фестиваль шартына сәйкес, қаламыздың символына айналған қызғалдақты егуді назардан тыс қалдырған жоқ. Осы байқауда бақ сынау арқылы қала жұртшылығы тазалықпен бірге өз аулаларын көгалдандыру жұмыстарына машықтанды. Сонымен, салтанатты марапаттау рәсімінде 9 аулаға – 1 миллион теңге, 6 аулаға – 500 мың теңге, 9 аулаға – 250 мың теңге, 8 аулаға – 150 мың теңге, 1 аулаға – 100 мың теңге қаржылай сыйлық табысталды. Ауласын гүлге көмкеріп, жеңіске жеткен, 1 млн теңге қаржылай жүлдеге ие болған Абай ауданы Асар шағынауданының тұрғыны Нұрайым Жұмаділлаева бұл қаражатқа өзі тұратын көпқабатты үйдің екі подъезіне жөндеу жұмысын жүргізетінін айтты.

–Жастайымнан гүл өсіруге, бау-бақшаны баптауға қызығып өстім. Гүлге құмарлығым бүгінгі жеңісіме себепші болып отыр. 2017 жылы Асар шағынауданындағы көпқабатты үйден пәтерлі болдық. Алғашқыда үй айналасы құрылыс заттарының қалдығына толы еді. Көршілермен бірге айналаны қатты қалдықтардан тазарттық. Аула топырағын органикалық тыңайтқыштармен байытып, раушан гүлін отырғыздық. Алайда, еккен гүліміз қурап қалды. Екінші жылы да сол жағдай қайталанды. Үшінші жылы көшеттеріміз көгере бастады. Жыл бойы еккен көшеттердің күтімімен өзім айналыстым. Пәтер жалдап тұрған кездерде «өз үйім болса, сол үйдің ауласын гүлге толтырсам» деп армандайтынмын. Сол арманға да жеттік. Жүлдегерлер қатарында үйіміздің нөмірі аталғанда қуанышымызда шек болмады. Көршілеріме «байқауда жеңімпаз атансақ, екі подъезге жөндеу жасаймыз» деп уәде берген едім. Енді сол уәдемді орындаймын, – дейді Нұрайым Асанқызы.

Байқауға қатысқан әрбір жанның еңбегі елеусіз қалмады. Тұрғындардың құлшынысына қарай ынталандыру сыйлықтары да тапсырылды. Қаратау ауданы Тұран шағынауданындағы 53А үйдің ауласына гүл көшеттері жаңадан егілгендіктен өзге аудандағы гүлдерден айырмашылығы бар. Биыл ғана игеріліп, топырағы жаңадан қопсытылған жерге егілген көшеттер енді көгеріп, жапырақ жайып келеді. Комиссия аталған аула тұрғындарына ынталандыру сыйлығын тағайындаған.

— Берілген қаржыны ауланы көгалдандыруға жұмсаймыз. Қазір ынталандыру сыйлығын алсақ, келесі жылы жүлделі орыннан көрінуге әрекет жасаймыз. Ұйымдастырушыларға алғыс айтамыз. Бұл сыйлық бізді жігерлендірді, – дейді Тұран шағынауданы 53 А үйдің тұрғыны Қатира Ертай.

«Менің гүлді аулам» байқауы бір отбасының ғана емес, көпқабатты үйдің барлық тұрғындарының белсенділігін бағалауға арналған. Тұрғындар үйдің айналасындағы ағаштар мен гүлдердің күтімі, тазалығы үшін жұдырықтай жұмылып, бірлесе әрекет етті. Шымкенттіктердің бұл еңбегі – қаланың гүлденуіне, көркеюіне қосқан өлшеусіз үлесі.

Бізді қатты қуантқаны, адамдардың сүйікті қаласына деген жанашырлығы мен махаббаты. Асар шағынауданының тұрғыны Нұрайым Асанқызы өзіне берілген 1 млн. теңгеге екі подъезге жөндеу жұмыстарын жүргізбек. Жүлдегер болған Қатира Ертай қаржыны ауланы көгалдандыруға жұмсамақ. Былай қарасаң, өз еңбегіне берілген баға. Ақша өзінікі. Өз керегіне жұмсаса да болар еді. Бірақ, жүрегі үлкен адамдар халық игілігін таңдап отыр. Осындай қайырымды тұрғындары бар Шымкент еліміздегікөрікті қалалардың бірегейі болары сөзсіз.

Шымкент қаласының биыл жаңадан негізі қаланған Тұран ауданы 2023 жылдың қаңтарынан бастап өз жұмысына кірісті. Аз ғана уақыттың ішінде аудан әкімдігі тарапынан тұрғындардың инфрақұрылым мен әлеуметтік мәселелері кезекпен шешімін тауып отыр. Әйтсе де, атқарылатын жұмыстар да бар.

Бүгінде аудан әкімі аппаратында мамандар мен қызметкерлер белгіленген штатқа сай толықтырылған. Жуырда аудандағы мемлекеттік мекемелердің басқармалары мен бөлімшелері де өз жұмысын бастады. Олар – ауданның прокуратура, полиция, төтенше жағдайлар, мемлекеттік кірістер басқармалары және Тұран ауданы бойынша жұмыспен қамту бөлімдері.

Тұран ауданының жер көлемі мегаполис аумағының 32 пайызын құрайды. Халқының саны 220 мыңнан асады. Аудан 21 елді мекен мен тұрғын алаптан және орталық аумақтардан тұрады. Сондай-ақ оған 84 балабақша, 41 мектеп, 9 колледж және 6 денсаулық мекемесі мен 12 мешіт қарайды.

Аудандағы өзекті мәселелердің шешімін табу мен халыққа қолайлы орта қалыптастыру бойынша аудан әкімі Б.Болатбеков жыл басынан бері тұрғындармен 16 рет кездесу өткізген екен. Кездесу барысында 69 мәселе көтеріліп, оның 42-сі орындалыпты. Әр аптаның жұма күні сағат 15:00 – 19:00 аралығында аудан тұрғындарын жеке қабылдау да ұйымдастырылады. Бүгінге дейін өткен жеке қабылдауларда 81 мәселе қаралған. Оның 19-ы шешімін тауып, 62-сі орындалу сатысында.

–Тұрғындардың ең көп көтерген мәселесі – жол құрылысы мен балалар ойын алаңшасы. Биыл Құрсай елді мекенінде инфрақұрылым салынып, құрылыстары жүргендіктен жолдарын топырақ басты. Сондықтан, биыл Құрсайдың өзінде 40 жолға шағал тас төселеді. Бұдан бөлек, тұрғындардың өтініші бойынша өзге елді мекендердегі 45 көшеге де тас төсеу жұмысы жоспарланды. Сонымен қатар, 19,1 шақырымды құрайтын 29 көше орташа жөндеуден өтеді, -дейді Тұран ауданының әкімі Боранбай Болатбеков.

Ауданның ауыз су, электр қуаты және табиғи газбен қамтылуы – 99,5 пайыз. Таяуда аудан әкімдігі Құрсай елді мекенінде сауыз су құрылысы толық аяқталғанын хабарлады. Елді мекенде ауыз су құрылысы біткен соң құбырлар жуып-шайылып, дезинфекцияланды, енді тұрғындарды ауыз суға қосу жұмыстары рет-ретімен атқарылып жатыр. Нәтижесінде, 2023 жылы аудандағы елді мекендер толық сапалы ауыз сумен қамтылатын болады.

Ауданда мемлекеттік жүйедегі сапалы электр жарығын тұтынатын халық 100 пайызға жеткелі жатыр. Бүгінде мамандар Құрсай шағынауданының жаңақұрылыс аумағына сапалы электр желісін жеткізу мақсатында жобалау жұмыстарын жасауға кіріскен. Жоспар бойынша, екі жыл ішінде электр желісін тарту құрылысы жүргізіліп, елді мекен 2024 жылы толық сапалы электр қуатымен қамтылады.

–Ал, табиғи газ тарту жайына келсек, 2022 жылдың соңында Арғымақ және Ақтас, Ақтас-2, Ақжар елді мекендерінде табиғи газдың құрылысы толық аяқталды. Қазір «ҚазТрансГаз» АҚ тарапынан сынама жұмыстары жүргізіліп жатыр. Нәтижесінде, ауданға табиғи газ жеткізу көрсеткіші 99 пайыз болмақ. Құрсай мен Жаңаталапқа газ құбырын тарту бойынша жобалау жұмыстары жүргізілуде. Айкөл елді мекеніне жобалау жұмысы 2024 жылға жоспарланып отыр, - деді аудан әкімі.

Тұран ауданының аумағында қазіргі таңда 41 мектеп бар. Оның 16-сы инвестор есебінен салынған. Биыл Ақжар елді мекенінде 600 орындық мектеп салынғалы тұр. Білім мекемесінің құрылысы 2024 жылы аяқталады. Ауданда «Жайлы мектеп» құрылысына да көңіл бөлініп жатыр. Ақжарда 600 орынға лайықталған заманауи білім ошағының құрылысы осы жылы басталып, келер жылы пайдалануға берілмек. Дәл осындай «Жайлы мектеп» жобасы Жаңаталап елді мекенінде де жүзеге асыралады. 2024 жылы іргесі қаланатын мектептің ел игілігіне берілуі 2025 жылға жоспарланып отыр. Сонымен қатар, Құрсай елді мекенінде жеке инвестор есебінен 450 орындық жаңа емхана бой көтереді. Осы жылдың наурыз ауында басталған құрылыс 2024 жылы аяқталады деп жоспарланған.

Бұдан бөлек жаңа әкімшілік аумақта жалпы саны 296 балалар ойын алаңшасы бар. «Халық қатысатын бюджет» жобасы аясында 2023 жылы Тұран әкімдігі 10 балалар ойын алаңшасын салуды көздеп отыр. Мұнымен қоса жаңадан 4 ашық спорт алаңшасы да бой көтереді.

Денсаулық сақтау басқармасы басшысының орынбасары Бақытжан Абдуллев пен қалалық онкологиялық орталықтың бас дәрігері Жақсылық Мәуленов Шымкент қаласының ақпараттық-коммуникациялық орталығында БАҚ өкілдерімен кездесіп, жыл басынан бері салада атқарылған жұмыстар жөнінде баяндады.

Медициналық қызмет түрлерінің ішінде стационарлық көмектің алатын орны ерекше. Бұл көмектің екі түрі бар. Бірі – жоспарлы түрдегі стационарлық көмек, екінішісі – шұғыл түрдегі стационарлық көмек. Б.Абдуллаевтың айтуынша, Шымкентте қазір науқастарға стационарлық қызмет көрсету ісі жанданған. Қаладағы 15 медициналық ұйымдағы 3 407 орынға жыл басынан бері 35 мыңнан астам науқас орналасып, медициналық көмек алған. Оның ішінде 11 386 науқас жоспарлы түрде қабылданса, 23 756 науқас шұғыл жағдайда келген.

– Шымкент қаласының медициналық әлеуеті жылдан-жылға жаңарып, халықтың саулығын жақсартуда игі істер жүзеге асып жатыр. Соның ішінде мегаполис медицинасындағы стационарлық көмек көрсететін емдеу мекемелерінің жұмысын ерекше атап өтуге болады. Сондай-ақ, қазір қалада 1405 төсек орын әзірленген көпбейінді 4 стационар, 5 монопрофильді стационар, 2 босандыру мекемесі және 4 оңалту орталығы халықтың денсаулығын сақтауда сапалы қызмет көрсетіп келеді, - деді Бақытжан Жүсіпбайұлы.

Брифинг барысында қалалық онкология орталығының бас дәрігері Жақсылық Мәуленов те медициналық мекемеде атқарылған жұмыстар жайында баяндама жасады.

–Қалалық онкологиялық орталығында 261 төсек-орын бар. Оның 231 төсек-орны стационарлық ем алушыларға арналса, 30-ы күндізгі бөлімшеде. Ал, емхана күніне 150 науқасты қабылдай алады. Орталықта 2018 жылдан бастап заманауи эндовидеохирургиялық құрылғылырдың орнатылуымен науқастарға инвазивті емес жоғарғы технологиялық операциялар жасау күнделікті тәжірибеге енгізілген. Атап айтқанда, кеуде, іш қуысы органдарының қатерлі ісіктеріне жасалынатын кіші инвазивті операциялар саны жыл санап артып отыр. Былтыр орталығымызда осындай 115 күрделі операция жасалды. Қазіргі таңда орталықтың хирургия бөлімшесі Шымкент қаласы бойынша кеуде қуысы патологияларына кіші инвазивті операциялар жасайтын жалғыз орталық болып отыр, - дейді орталықтың бас дәрігері.

Өткен жылы онкологиялық орталықта 20 төсек-орынға арналған онкогематология бөлімшесі ашылып, қазір науқастарға жоғары дозалы химио-имунотерапиялық ем жүргізіліп жатыр.

Сонымен қатар, орталықтың жанынан ашылған ядролық медицина орталығында сәулелі емдеу жүйесінде 850 науқас ем алса, ал позитронды-эмиссиялық томография (ПЭТ/ КТ) аппаратынан 134 науқас тексеруден өткен.