Кері діни ағымдар әлеуметтік желілер арқылы өз қатарына діннен бейхабар жастарды көптеп тартуға тырысады. Осылайша, олардың санасын улау және дінді бұрмалап үйретіп, өз мақсаттары үшін пайдалану оңайға түседі.

Бұл туралы Әл-Фараби ауданы әкімдігі қызметкерлерінің ұйымдастыруымен Г. Титов атындағы №20 мектеп-гимназиясында өткен іс-шарада айтылды. Оған облыстық наркологиялық диспансерінің нарколог дәрігері Л.Маджуга, облыстық Дін істері басқармасының дін мәселелерін зерттеу орталығының теологы Ұ.Әлиақпаров және «Сана-Сезім» қоғамдық бірлестігінің үйлестірушісі Ш.Юсупжанова қатысып, қазіргі таңдағы көкейтесті мәселелерді талқылады. 

Облыстық Дін істері басқармасының дін мәселелерін зерттеу орталығының теологы Ұ.Әлиақпаров ғаламдану заманындағы басты қатер – ғаламтор екенін айтты. 

– Теріс ағымды ұстанғандар ұлтымызға жақын ислам діні атын жамылып кез келген бағыт бойынша, соның ішінде ғаламтор арқылы да жастарымыздың санасын улап, қоғамымызға іріткі салуда. Олар өздерінің қатарын толықтыру үшін әлеуметтік желі арқылы әсіресе, орыс тілді жастарды көптеп тартуға барын салатынын айтты. Сондықтан, әлеуметтік желіде дін тақырыбында әңгіме қозғалған сәтте-ақ, қарым-қатынасты тоқтату керек, – деді Ұ.Әлиақпаров.

Шара барысында оқушылар көптеген сауалдар қойып, тұщымды жауаптарын алды.