Шымкенттегі жеңіл атлетикалық манежде бокстан жастар арасында Шымкент қаласы әкімінің жүлдесіне арналған Қазақстан Республикасының чемпионаты басталды. Биыл 7-ші рет өткізіліп отырған чемпионатқа еліміздің барлық облыстарынан 180-нен аса спортшы қатысып отыр.
Былғары қолғап додасының ашылу салтанатына Шымкент қаласының әкімі Ғабидолла Әбдірахымов қатысып, жас боксшыларға сәттілік тіледі.
– Өздеріңіз білесіздер, бокс елімізде қарқынды дамып келе жатыр. Біздің боксшыларымыз әлемдік ареналарда жақсы нәтиже көрсетуде. Осы жылы біз қалалық №5 спорт мектебіне қаржылай көмек көрсетіп, шымкенттік жастарға жақсы жағдай жасадық. Алдағы уақытта жекпе-жек спортына да көңіл бөліп, жаңа кешен салуды жоспарлап отырмыз. Сондықтан, бокс өнері Шымкент қаласының атын шығарады деп сенемін. Бүгінгі жарысқа қатысушыларға сәттілік тілей отырып, жарысты ашық деп жариялаймын, – деді шаһар басшысы Ғабидолла Әбдірахымов.
Сонымен қатар, қала әкімі 2016 жылдың мамыр айында Павлодар қаласында өткен бокстан жастар арасындағы Азия чемпионатында еліміздің намысын қорғаған жерлесіміз Нұрдәулет Ұланұлына құрмет көрсетіп, бапкері екеуіне қаржылай сыйлық табыстады.
