Әне-міне дегенше Олимпиада ойындарының алауы тұтанғалы тұр. Оңтүстік Қазақстан облысының Кешенді жоғары спорт шеберлігі мектебінің басшысы Балғабай Елшиев Рио-де-Жанейроға баратын спортшыларына сәт сапар тіледі. Олимпиада жолдамасын жеңіп алған Ю.Юрков, Б.Жақыпов, Р.Юнусметов, Л.Сайдиева, Қ.Ералиева, П.Алиев және Ж.Шекербекова Бразилия сапарына сақадай сай. Спорт мектебінің басшысы Б.Елшиев спортшыларға «Бата» дәстүрлі монетасын табыстап:
– Бұл біздің тілегіміздің жиынтығы. Спортшыларымызға дем берсін деген ниетпен сыйлап отырмыз. «Біздің спортшылар» дегенімізбен барлығыңыз Қазақстанның намысы үшін сынға түсесіздер. Сол үшін Олимпиадаға баратын баршаңызға ақ жол тілейміз, – деді.
Жиын соңында ОҚО ЖКСШ мектебінің ұжымы журналистерді де кәсіби мерекемен құттықтады. «Баласы атқа қонса, анасы үйде отырып тақымын қысады» демекші, 5 - 21 тамыз аралығында өтетін ХХХІ Олимпиада алдында толқымаған спорт жанкүйері жоқ шығар. Айта кетейік, қазақ спортшыларының жетістігін Риодан тікелей сүйіншілеу үшін Оңтүстік Қазақстан облысынан Бақтияр Тайжан тарихи сапарға аттанады.