Алматыда өтіп жатқан дүниежүзілік Қысқы Универсиаданың ақжолтай алғашқы жүлделері де қоржынға түсті. Әйелдер арасындағы фристайл акробатика сайысында екі жүлде иелендік. Көпшілікті қуантқан өз қаракөздеріміз – Жанбота Алдабергенова мен Жібек Арапбаева.
Дүниежүзілік бәсекеге үш жерлесіміз аттанған еді. Үшеуінен де үміт күткенбіз. Жарыстың алғашқы күнгі бәсекесінде отандастарымыз бар күш-қайратын көрсетті-ақ. Жанбота 77,14 ұпаймен соңғы финалдық сынға бірінші орынмен шыққан-ды. Жібек қарындасымыз 69,89 ұпаймен соңғы төртінші орынға тұрақтаған. Әттеген-айы, Ақмаржан Қалмұрзаева 5-і орында қалып қойды.
Соңғы шешуші сында жеңімпаздар мен жүлдегерлердің есімі анықталды. Қысқы Азия ойындарының күміс жүлдегері Жібек Арапбаева Универсиада аламанында да күміс жүлдені иеленді. Алдабергенова – қола жүлдегер!
Жібектің нәтижесі – 60,84 ұпай, ал Жанбота 60,48 нәтижемен үздік үшінші орынды түйіндеді.
Қазақстан құрамасы әзірге 1 күміс, 2 қола жүлдемен төртінші сатыға жайғасты. Қоржынға алтын мен күміс, қола жүлделер сыңғырлап түсе берсін дейміз!
Техникалық нәтижелер. Фристайл акробатика.Әйелдер.
1. Юнгжинг Жу (Қытай) – 64,09
2. Жібек Арапбаева (Қазақстан) – 60,84
3. Жанбота Алдабергенова (Қазақстан) – 60,48