Халықаралық жарыстарда Қытай құрамасының ең мықты боксшысы Қанат Ислам күндей күліп қазақ жігіттерінің ішінде жүреді. Бір қытай боксшысымен жүргенін көрмейсің. Біздің жігіттерде басы бас бапкер болып Қанатты құраманың бір мүшесіндей көреді. 2006 жылы Дохада Азия ойындары өтті. Азия деген аты болмаса бұл өзі осы құрлықта мекендейтін барлық мемлекеттердің олимпия ойындары. Сондықтан мұндағы жеңістің орны ерекше. Оның үстіне төрт жылда бір өтеді. Бокстан Қазақстан құрамасына бұйырған жалғыз алтынды Бақыт Сәрсекбаев әперді. Жартылай финалда ол өзбектің үкілеген үміті Ділшод Махмудовты жеңгенде қасымызда күндей жарқылдап амандасып жүретін өзбек журналистері кәдімгідей әбіржіп қалды. Онысы түсінікті де. Бақыт Сәрсекбаев ұзақ жылдар Өзбекстан құрамасының 64 және 69 келіге дейінгі салмақта бірінші орында болды. Азия чемпионатында үш рет топ жарды. Халықаралық жарыстарда шаппай бәйге алып жүрді. Ала топылы ағайындар біздей емес ұлттық мәселеге қатты қарайды. Афины олимпиадасының қарсаңында Сәрсекбаевқа қатал талап қояды. Олимпке қатысуға үмітің болса ұлтыңды өзгертесің. Яғни қазақ емес өзбек боласың. Осылай етсең жол ашық. Намысты жігіт әрине бас тартады. Афиныға өзінің көлеңкесінде жүрген Дилшод Махмудов кетеді. Құр қайтпайды. Қола медаль алып айдарынан жел есіп қайтады. Өзін шетке қаққанға қапаланған Бақыт тарихи Отанына қайтып бәрін қайтадан бастаған. Енді тағы да Махмудовты жолдан тайдырды. Қалың өзбектің қайғырып жүргені сол. Екі қазақтың финалда кездесуі мүмкін еді. Қытайлар аса ықылас таныта қоймаған, қазақ құрамасын шырғалап шықпайтын Қанатқа қола медаль бұйырған. Бас жүлде Бақытта. Қызығы жеңімпаздарды марапаттау кезінде болған. Әнұран ойналған соң жеңімпаз фото сессияда алдымен екінші орын алған боксшыны жанына тартады. Мұнда керісінше болды. Бақыт өзінен кем қуанбай, қазақ әнұраны ойналғанда жүзі нұрланып тұрған бауыры Қанатты жанына тартты. Қазақ байрағын жамылған қос қазақ Азия ойындарының ең биік тұғырында күндей жарқырап тұрды. Мұны қарап тұрып біз мейірлендік, тебірендік. Біреуінің Өзбекстаннан оралғаны кеше ғана. Екіншісі Қытай мемлекетінің азаматы. Бірақ екеуі де Алла тағаланың өздерін қазақ етіп жаратқанына соншалықты бақытты еді.
Осы жағдай 2008 жылы Бейжің олимпиясы ойындарында айна қатесіз қайталанды. Бұл олимпиадада Қанат Исламның мүмкіндігі зор еді. Бұған дейін Бақыт екеуі үш рет беттесіп Қанат екі рет жеңген. Бірінде нокдауын тіркелді. Оның үстіне Қанат Нұрғали Сафиуллиндей атақты бапкердің қол астында тер төкті. Қанат ширек финалда «осы жолы ма» деп ширығып келген Дилшод Махмудовты күмәнсіз жеңіп ауылына медальсіз қайтарып жіберді. Екі қазақ финалда жолығады деген пікір желдей есті. Қанат шыққанда қазақтар әруағын шақырып, қолдау көрсетеді. Бір қызығы, ауыздарына су толтырып алғандай үнсіз қалатын қытай жанкүйерлері жақ тартқан жоқ. Болмайтын боксшыларын сүйреген қытай бапкерлері құрамадағы орнын тастап қазақтармен біте қайнасып кеткен боксшысын керек қылмады. Қанат та мұны заңдылық деп қабылдағандай. Жартылай финалда аса талантты кубалық боксшы Карлос Бантеурамен жолы түйісті. Бірі өліп бірі қалатын нағыз жекпе жек болды. Кубалықтар өте адуынды. Сәл қорқыныш білдірсең, сәл шегініп бокстассаң күші тасып шыға келеді. Қоян-қолтық төбелесте ғана аздап аяқ тартады. Қанат сойқанды салды. Бір секундқа артқа шегінген жоқ. Гүрзі жұдырықтар дүрсілінен найзағай ойнап күн күркірегендей болады. Анау жойқын соққылардың бірі бокс әліппесін оқыған жас боксшыға тисе ауруханадан бір –ақ шығары кәдік еді. Екеуіне тимей жатқан жоқ. Екеуі де ердің сойы болғандықтан шыдап жүр. Бауыр, бүйрек жақтан опырып тиіп жатқан соққыларда есеп жоқ. Қандасымыз болған соң іш тартамыз ба, бізге Қанат жеңгендей көрінген. Рефери кубалықтың қолын көтерді. Жарыс арасындағы бір күнде боксшы өз-өзіне келіп үлгермейді. Финалда Бақытпен шыққан Карлос Бантеура сәл шаршағандай сезілген. Күшін Қанат алып қалыпты. Тағы да қаржысу. «Еділ үшін егескен, Жайық үшін жандасқан» айқас тағы болды. Атадан ер болып туған Бақыт Сәрсекбаев қазаққа өте қат болып тұрған алтынды берсе қолынан бермесе жолынан алуға дайын еді. Біздің батырдың құрметіне Қазақтың әнұраны ойналды. Содан соң Бақыт өзінен екі саты төмен тұрған Қанатқа қол созды. Қазақтың көлдей көк туын жамылған қос қазақ дүние жүзі жанкүйерлерінің алдында алтындай жарқырап тұрды. Дүйім жұрт тұғырдан қос қазақ ұланын көріп сүйсінді. Осындайда бәрі еске түседі. Бірі өкпесі қара қазандай болып Өзбекстаннан келді. Азияның да, Жер атты планетаның ең мықты спорт додасында алтыннан алқа тақты. Екіншісі Қытай азаматы. Алтын болмаса күміс, қоладан кемдігі жоқ. Бір салмақта бокстасатын осы екеуінің жеңіске жетсе жамылатыны қазақ байрағы. Табиғатымыздан көңілшектеу едік. Ешкімнен қымсынбастан жанардағы жасты құрғатып алдық. Қуаныштың көз жасы ғой.
Қанатқа Қытай қоныс болмады. Елге келгісі келді. Ағасына ақыл салған екен, құптамапты. «Онда сені күтіп отырған адам жоқ. Орныға алмай қайтып келесің. Барма» деген.
«Жоқ, аға, Қазақстанға барамын. Жұмыс табылмай қалса ең мықты аула сыпырушысы боламын. Өйткені, мен өз елімнің ауласын яғни, жерін тазалаймын». М.Әуезов атындағы ОҚМУ студенттерімен кездескенде Қанат осылайша айтқан. Оның жұлдызды спорттық ғұмырында бапкері ұйғыр жұрағатынан болды. Қанат ҚХР чемпионы болып қуаныштан асып-тасып тұрғанда, бапкері «шіркін, ең үлкен қуаныш жарысқа өз еліңнің атынан түсіп, әнұранын ойнатқанында ғой. Қалғаны бір сәттік қуаныш. Бұл жөнінен Қанат сен бақыттысың. Тарихи отаның – Қазақстаның бар. Сондай арқа сүйер отаным болса, сол жердің топырағын мойныма тұмар қылып тағып жүрер едім. Осы айтқанымды мәңгіге есіңе ұста». Ұстазының қыстығып айтқан осы сөзі бала Қанаттың жүрегіне мәңгілік жазылып қалған еді. Қытайда жағдайы жаман болған жоқ. Әлемдегі ең мықты боксшыға қалаған жағдайы жасалады. Егер айтқандарымен жүріп тұрса. Бірақ, Қазақстанға деген ұлы сағыныш жүрегін кернеп, байыз таптырмаған. Қазақ елі қайдан келдің деген жоқ. Алып ұшып жеткенде табанына алақанын төседі. Бауыржан Оспановтай ұлтжанды ағалары жанына тартты. Қалғаны белгілі ғой.
Алаштың асыл перзенті Әлихан Бөкейханов атасы «Ұлтқа қызмет ету - білімнен емес, мінезден» деген екен. Сөз басында Қанат Отан туралы тебіреніп айтқанда туған жер қадірін түсінбейтіндердің тойып секіретіні жайында айтқан едік. Нағыз жігітте бір ғана Отан болады. Сол оттан ыстық Отанын жамандағандар түбінде оңбайды.
Әлемдік додада «Qazaq» атауымен майданға түсіп, еліміздің мәртебесін асқақтатып жүрген Қанат Ислам Әлихан атасының өсиетін орындап жүрген жампоздардың бірі.
P.S.
Қанат Ислам – қазақ кәсіпқой боксшысы, Лақап аты – Қазақ (QAZAQ). WBA FedeCaribe тұжырымының чемпионы. Орташа жеңіл салмақ бойынша Кариб аймағының үздігі. Әуесқой боксшы ретінде Қытай Халық Республикасы Ұлттық құрама командасының құрамында Пекин Олимпиадасының қола жүлдегері болған. Чикагода өткен Әлем чемпионатының (2007) және Азия ойындарының (2006) қола жүлдегері. Қытайдың 10 дүркін чемпионы. 2010 жылы азаматтығын ауыстырып, атамекені Қазақстанға көшіп келді. «Астана Арландары» кәсіби клубында 2012 жылға дейін өнер көрсеткен. Бүгінде кәсіпқой бокста тамаша жеңістерге жетіп жүр. Еншісінде 25 айқас 25 жеңіс (20 нокаут).
«WBO intercontinental», WBA intercontinental», WBO NABO тұжырымдарының чемпиондық белбеуінің иегері. UBC тұжырымы бойынша әлем чемпионы.
Бақтияр ТАЙЖАН
