Шымкент келбеті

«Локомотив» стадионында футболдан жасөспірімдер арасында «Оңтүстік Қазақстан облысы әкімінің кубогы үшін» Халықаралық турнир өз мәресіне жетті. Жарысқа еліміздің барлық облысынан және Қырғызстан, Өзбекстан сонымен қатар Тәуелсіздік алғалы бері алғаш рет Түркіменстан футболшылары да қатысты.

– Жылдан-жылға жарысымыздың өрісі кеңейіп келе жатыр. Осындай жарыстардан келешекте өзіміздің ұлттық құрама сапында ойнайтын футболшылар шығады деп ойлаймын, – деді облыстық дене шынықтыру және спорт басқармасының басшысы Әлібек Нұртаев.

Турнир қорытындысы бойынша 1-орынды өзбекстандық «Бунедкор» командасы, күміс медальды ОҚО футбол мектебі, ал үшінші орынды Шымкенттік «Ордабасы» иеленді.

Футболдан Қазақстан Премьер-лигасының алғашқы туры 8 наурыз күні болып өтті. Шымкенттік «Ордабасы» командасы өз алаңында былтырғы ел чемпионы «Астананы» қабылдап, 3-0 есебімен басым түсті.

Ойын алаң иелерінің шабуылымен басталды. Сондай шабуылдардың бірін қонақтар әупірімдеп жүріп қайтарғанымен, төреші Эричтің қақпасына айып добын белгіледі. Мүмкіндікті мүлт жібермеген Мардан Төлебек есепті ашып, командаластарын алға шығарды. 

Елордалық клуб екінші таймды қарқынды шабуылдармен бастады. Допқа иелік ету басымдығы да қонақтарда болды. Дегенмен, қанша шабуылдаса да, Алмат Бекбаев қақпасына доп дарыта алмады. Ал керісінше Алексей Петрушин шәкірттерінің шабуылдары нәтиже бере бастады. Ойынның 74 минутында команданың жаңа ойыншылары есепті еселей түсті. Таңат Нөсербаевтың берген пасын Азат Нұрғалиев сәтті аяқтаса, Диакате ойынның бітуіне санаулы минуттар қалғанда тағы бір гол соғып, жанкүйерлердің қошеметіне бөленді. 

Айта кету керек, бірнеше күн бұрын облыс әкiмi Жансейiт Түймебаев «Ордабасы» командасымен кездесіп жаңа маусымға дайындығымен танысқан болатын. Кездесуде команда президентi Бақтияр Байсейiтов биылғы меже ҚПЛ-да үздік үштікке кіріп, Еуропа лигасына жолдама алу деген болатын.

Шымкенттік «БИІК-Қазығұрт» футбол клубы әйелдер арасындағы Еуропа Чемпиондар лигасының 1/8 финалы аясында алғашқы матчын өз алаңында Франция біріншілігінің жеңімпазы «ПСЖ» командасына қарсы өткізді. Ойынға Чехиядан келген Ольга Задинова төрелік жасады.

«БИІК» спорт кешенінде өткен кездесудің 17 минутында француз командасының сапынан Вероника Бокете есеп ашып, мергендігімен танылды. Алғашқы таймның соңында Ирене Парадес есепті еселеп, Железняк қорғаған шымкенттік клубтың қақпасынан саңылау тапты. Француздар мұнымен шектелген жоқ, кездесудің екінші жартысында сол Парадес дублдің авторы атанып, есепті 0:3-ке ұлғайтты.

Қарымта кездесу қараша айының 17-жұлдызында Париж қаласында өтеді. Ойын Астана уақытымен 23:00-де басталады.

Айта кетейік, «БИІК-Қазығұрт» Еуропа Чемпиондар лигасының 1/8 финалына дейін жеткен еліміздегі алғашқы команда. Бұған дейін шымкенттік клуб іріктеу раунды аясында ирландиялық «Уэксфорд Ютсты» – 3:1, литвалық «Гинтра Университетас» және молдавиялық «Криуляны» командаларын 3:0 есептерімен тізе бүктіріп, өз тобында бірінші орынға ие болған. Плей-офф кезеңінде Италия чемпионы «Веронаны» 3:1 есебімен ұтып, сырт алаңда 1:1 есебімен тең ойнаған. Ал бұл нәтиже қазақстандық аяқдоп шеберлеріне 1/8 финалда ойнауға мүмкіндігін алып берді.

Шымкенттік «Ордабасы» футбол клубы келер жылы тағы да Еуропа лигасында өнер көрсетеді. Мұндай мүмкіндікке шымкенттіктер ел біріншілігінің соңғы турында Қажымұқан атындағы орталық стадионда «Ақтөбені» 2:1 есебімен жеңгеннен соң ие болды.

Айта кетейік, біріншіліктің соңғы тур ойынында Керекуде жергілікті «Ертіспен» кездесіп, 0:0 есебімен тең ойнаған «Астана» 73 ұпайымен үшінші мәрте қатарынан жеңімпаз атанды. Көкшетаудың «Оқжетпесін» 5:0 есебімен ойсырата ұтқан алматылық «Қайрат» 71 ұпаймен екінші орынға тұрақтады. Үшінші жүлде – «Ертіске» бұйырды. Олардың еншісінде – 49 ұпай. Ал «Ордабасы» 48 ұпаймен төрттікті түйіндеді. Бесінші орынға тұрақтаған «Оқжетпестің» еншісінде 45 ұпай бар.

Биылғы біріншіліктің сұрмергені ретінде «қайраттық» Жерар Гоу үздік шықты. Ол 22 доптың авторы ретінде танылып отыр. Ал турнир кестесінде соңғы орындарға тұрақтаған «Тараз» бен «Жетісу» келер маусымды төменгі лигада өткізбек. Олардың орнын қызылордалық «Қайсар» мен өскемендік «Алтай» командалары басатын болады.

Шымкенттік «Ордабасы» Премьер-лигадағы 30-тур ойынын Қажымұқан атындағы орталық стадионда керекулік «Ертіске» қарсы өткізді. Турнир кестесінде тиісінше, 3 және 4-орындарға жайғасқан бұл қос команда арасындағы ойын шын мәнінде, іріншіліктің шешуші кездесуіне баланғандай еді. Сол себептен де, бұл ойынға қос команда ойыншылары да ерекше дайындықпен келгені байқалды. «Ертіс» командасының бас бапкері Димитар Димитров 5 қорғаушы жүйесіне көңіл бөлсе, шымкенттік команданың тізгінін ұстайтын Бақтияр Байсейітов шабуылға иек артатынын аңғартты.

Ойындағы бірінші қауіпті соққыны «ордабасылық» легионер ойыншы Симчевич жасаған. Дегенмен, доп Антон Цирин қорғаған қақпадан сәл жоғары кетті.
Алғашқы гол кездесудің 15-минутында соғылды. Айып алаңына еркін енген «Ертістің» жартылай қорғаушысы Карлос Фонсеканы «Ордабасы» қорғаушылары шалып жығудан басқа амал тапқан жоқ. Нәтижесінде, Алмат Бекбаев қорғаған қақпаға 11 метрлік айып добы белгіленді. Ал мұндай мүмкіндікті Роман Мұртазаев тек жіберген жоқ. Есеп ашылды. Екінші гол да көп күттірген жоқ. Араға 6 минут уақыт салып, тағы сол Карлос Фонсека алыс қашықтықтан соққы жасап, қақпашыны қапыда қалдырды. Есеп – 0:2! «Ертіс» командасы басымдыққа ие бола түскен. Осыдан кейін ойын тізгінін біржола қолға алған «Ордабасы» бір сәт есепті қысқартудың ретін тапты. Айып алаңында допты қолмен тоқтатқаны үшін қорғаушы Семир Керла төреші тарапынан сары қағазбен жазаланды. Нүктеге келген Александр Гейнрих допты қақпаға дәл бағыттады. Есеп – 1:2. Араға бірер минут салып, Ордабасы есепті теңестірді де. Көтерілген бұрыштама добын Диакате қақпаға дәл бағыттады. Үзіліске қос команда тең нәтижемен тарқасты.
Ойынның екінші кезеңінде де «ордабасылықтар» қарсылас команда қорғаушыларына тыныстауға мүмкіндік берген жоқ десе де болатындай. Толығымен шабуылға ден қойған Байсейітов шәкірттері бір сәт қорғанысты ұмыт қалдырды. Мүмкіндігін мүлт жібермеген керекулік команда Елдос Ахметовтің шеберлігінің нәтижесінде, тағы да алға шықты. Кездесудің 87 минутында төреші Артем Кучин дөрекі ойынымен дараланған керекуліктердің қақпасына тағы бір 11 метрлік айып добын белгіледі. Оны сәтті орындаған Александр Гейнрих маусымдағы өзінің 8-добын соқты. Осылайша, таблода 3:3 есебі тіркелді.
Бұл күні турдың орталық матчы ретінде алматылық «Қайрат» «Астананы» қабылдап, 2:0 есебімен жеңіске жетті. Нәтижесінде, турнир кестесінде тағы да шым-шытырық ахуал сақталып қалды. Яғни, көш бастаған «Астанада» – 68, «Қайратта» – 65 ұпай бар. Тиісінше, еурокубок ойындарында сәтті ойнап жүрген «Астананың» өзгелерден бір ойыны кем, яғни, әлі үш ойыны бар. Дегенмен, алғашқы қос жүлде осы аталған командаларға тиесілі болмақ.
Ал үшінші жүлденің кімге бұйырары да әзірге беймәлім. Жүлдеден үмітті «Ертіс» пен «Ордабасы» командаларының арасын 3 ұпай ғана бөліп тұр. Тиісінше, командаларда 48 және 45 ұпайдан бар. Алдағы қалған қос турда «Ертіс» көш басындағы «Қайрат» пен «Астананы» қабылдайды. Ал «Ордабасы» Көкшетауда «Оқжетпеспен», соңғы турда өз алаңында «Ақтөбемен» кездеседі. Яғни, қарсыластарының әлеует-деңгейіне қарап, «Ордабасының» жүлде алу мүмкіндігі зор деуге келеді.
Ел біріншілігі қазан айының 29-жұлдызында мәреге жетеді.

Алғашқы ойыннан алғашқы ұпайды иелендік. Футболдан Қазақстан ұлттық құрамасы 2018 жылғы әлем чемпионатының іріктеу кезеңін тең нәтижемен бастады. «Астана-Аренада» польшалықтарды қабылдаған Талғат Байсуфинов шәкірттері 2:2 есебімен тең тарқасты.

Қазақстан Әлем чемпионатының Еуропа құрлығы бойынша електік додасында Е тобына түскен. Біздің топта Польшадан бөлек, Дания, Черногория, Армения, Румыния құрамалары бар. 

Әуелден айта кететіні, бүгінде ұлттық құрама тізгіні – отандық бапкерде. Араға 11 жыл салып, жергілікті маман бас бапкерлікке келді. 

Польшаға қарсы ойында бас жаттықтырушының туған күні де қатар келіп, жанкүйерлер қуаныш қуанышқа ұласатынын болжап еді. 

Әттеген-айы, алғашқы тайм біз үшін сүреңсіз басталды. Футболшыларымыз білгенінен жаңылып, жиі-жиі қателесті. Қарсыластарға да керегі осы. Бірінші таймда польшалықтар 2:0 есебімен алға шықты. 10-минутта Бартош Капустка қазақстандық қорғаушылардың қателігін ұтымды пайдаланып кетті. Ал матчтың 35-минутында қорғаушыларымыз өз айып алаңында тәртіп бұзып, төреші 11 метрлік айып добын белгіледі. Қарсылас команданың капитаны Роберт Левандовски нысананы дәл көздеді. Бұдан кейін екі команда алма-кезек шабуылдар ұйымдастырғанымен, есеп өзгеріссіз қалды. 

Екінші таймда Қазақстан футболшылары сәтсіздіктен қорытынды шығаруға тырысып бақты. Матчтың 51-минутында сол қапталдан Дмитрий Шомконың әуелетіп берген добына бірінші жеткен Сергей Хижниченко қақпаны дәл көздеді. Жерлестеріміз осы қарқыннан таймай, арада сегіз минут өткенде екінші допты соқты. Бұл жолы да көзге түскен – Сергей Хижниченко. Сөйтіп, Қостанайдың «Тобыл» командасының шабуылшысы дубльдің авторы атанды. 25 жастағы шабуылшы ұлттық құрама сапында өзінің 39-шы ойынында сегізінші голын соққанын айта кетейік. 

– Шәкірттерімнің ойынына көңілім толды. Біз алғашқы ойыннан ұпайға қол жеткіздік. Командамызда бірлік бар. Футболшылардың ешқайсысы да аянып қалған жоқ. Әсіресе ардагер ойыншылардың атап өткім келеді. Олар бізге моральдық тұрғыда қолдау көрсетті, – деді Талгат Байсуфинов ойыннан кейінгі баспасөз мәслихатында. 

Е тобындағы басқа нәтижелерді айта кетсек, Дания Арменияны 1:0 есебімен жеңді. Ал Румыния мен Черногория 1:1 есебімен тең түсті. Қазақстан Ұлттық құрамасының келесі ойыны 8-ші қазан күні сырт алаңда Черногорияға қарсы өтеді.