Шымкент келбеті

ОҢТҮСТІКҚАЗАҚСТАНДЫҚ ЖАУЫНГЕРДІҢ СҮЙЕГІ ТУҒАН ЖЕРГЕ ЖЕТКІЗІЛДІ

Оңтүстікқазақстандық үшінші майдангердің сүйегі туған жерге жеткізілді. Екінші дүниежүзілік соғысқа қатысып, ерлікпен қаза тапқан Сайрам ауданының тумасы Пірәлі Ахмамбековтің сүйегі Ресейдің Курск облысынан табылды.

Қаза тапқан белгісіз батыр жайлы мәлімет «Айғақ» телеарнасына келіп түскен. Өңір басшысы Жансейіт Түймебаевтың қолдауымен телеарна журналистері шұғыл зерттеу жұмыстарын жүргізді. Ресей жерінен табылған майдангер Пірәлі Ахмамбековтың Сайрам ауданынан туыстары табылып, оларға хабар жіберілді.

Мамыр айының 1-5 күндері Қазақстанның Құрметті журналисі, облыстық мәслихаттың депутаты Дулат Әбіш «Айғақ» телеарнасының шығармашылық тобымен Ресейдің Курск облысы, Поныри ауданына аттанды. Онда батыр сүйегін табыстау қаралы митингісі өтті.

Шара барысында, соғысқа аттанып, қапыда көз жұмған аға сержанттың медальоны қазақстандық делегацияға салтанатты түрде табысталды.

Осындай игі іске қолдау танытқандардың қатарында ҚР Ресей Федерациясындағы төтенше және өкілетті елші Иманғали Тасмағамбетов те бар. Елші Ресейге барған делегация мүшелерін арнайы қабылдап, елге сәлемін жолдады. 

ҰОС-да хабарсыз кеткен майдангер Сайрам ауданы, Шапырашты ауылының тумасы. Жауынгер туған жеріне жерленіп, бұдан кейінгі шара «Даңқ» мемориалында жалғасты. Оңтүстік жұртшылығы батырды бір минут үнсіздікпен еске алып, құрмет көрсетті. 

– Отанын қорғау үшін қолына қару алған майдангерлердің тағдыры әрқилы. Олар туралы тарих ұл-қыздарымызды батылдыққа, батырлыққа баулуға тиіс. Жыл өткен сайын батыр бабаларға деген сый-құрмет артпаса, кеміген емес. Сүйегі елге жеткізілген ағамыздың жаны жәннатта, топырағы торқа болсын. Іс-шараға атсалысып, белсенділік танытып жүрген облыстық мәслихаттың депутаты Дулат Әбіш ағамызға облыс әкімдігі атынан алғысымызды білдіреміз, – деді облыстық ішкі саясат басқармасының басшысы Болатбек Төлеген. 

Сондай-ақ делегация мүшелері сұрапыл соғыста жер қойнауында қалған батырдың естеліктерін ертеңгі ұрпағына тапсырды. Өзіндік тарихы бар мұра білім ордасында таныстырылып, мектеп мұражайына қойылды. 

– Кешегі қиын-қыстау, Отан қорғау кезінде қазақстандықтар да қаһармандықтың ерен үлгісін көрсетті. Сондай ерлеріміздің бірі – Пірәлі Ахмамбетовтің сүйегі елге алып келінді – деді ОҚО Дін істері жөніндегі басқарма басшысы Батырбек Жалмұрзаев. 

Естелік – ертеңгі күнге жарқын үлгі. Ердің ерлігін насихаттау парыз бен міндет. Осылайша жауынгер атамекен топырағымен қайта қауышты. 

– Дулат Әбіш мырза бастаған топ жауынгердің жәдігерлерін әкеліп тапсырды. Ол кісінің аты мектеп тақтасына жазылған. Әкелінген заттардың барлығы музейге қойылды. Бұл жас ұрпаққа үлкен тәрбие болары сөзсіз, – дейді №71 Қаратай батыр орта мектебінінің директоры Бекжігіт Абуканиев. 

Батыр бабалардың қанымен, жанкешті ерлігімен келген Жеңістің құнын жас ұрпаққа ұғындырудың жарқын мысалындай осынау өнегелі іске бастамашы болған Дулат Әбіштің азаматтық әрекетіне жерлестері дән риза.

8 наурыз – Халықаралық әйелдер мерекесі қарсаңында Оңтүстік Қазақстан облысының әкімі Жансейіт Түймебаев Шымкент қаласында тұратын 108 жастағы Батыр Ана Назым Мамбетәлі әжейдің шаңырағына барды. Қазыналы қартты мейраммен құттықтап, ыстық лебізін білдірген өңір басшысы қарияға сыйлығын табыстады.

– Жер бетіндегі жақсылық атаулы аналардың үлкен жүрегімен әрленеді десек, жылына бір тойланатын мерекеде олардың еңбектерін бағалап, сый- құрмет көрсету – парызымыз. Әрқашан, шаңырақтарыңыздың берекесі болып, үйіңізден жылылық кетпесін. Жанұяңызға береке, бірлік тілеймін! – деген Жансейіт Қансейітұлы қарт анамен әңгімелесіп, естелік суретке түсті.

Екі ғасырдың куәсі болған, бүгінде 25 немере, 15 шөбере сүйіп отырған Назым әжей шаңырағына арнайы құттықтай келген облыс әкіміне алғысын білдіріп, ақ батасын берді. 

Айта кетейік, Оңтүстік Қазақстан облысы тұрғындарының 1,5 милионға жуығын нәзікжандылар құрайды. Ал өңірімізде 100 жастан асқан 88 қария өмір сүріп жатыр. Ғасырмен құрдас бұл жандардың көпшілігі Шымкентте, Мақтаарал мен Сарыағаш аудандарында тұрады. Олардың 70-ке жуығы тыл ардагерлері.

Шымкенттегі Бекзат Саттарханов атындағы дарынды балалардың спорт мектеп-интернатына биыл 20 жыл толып отыр. Осыған орай аталған спорт мектебінің ұжымы таяуда Ел Тәуелсіздігінің 25 жылдығына орайластырып, мерейтойларын атап өтті.

Ер Бекзаттың есімін иеленген мектеп 1996 жылы ашылған болатын. Мектептің іргетасының қалануына септігін тигізіп, қаншама таланттың топ жаруына Ақжол Асқар мен Сейітбек Құлбаевтар зор еңбек сіңірді.

Салтанатты жиында Бекзат жайлы естеліктер айтылып, оның өмір жолынан өнегелі әңгімелер айтылды. Бұл білім ордасының республика бойынша көш бастап келе жатқанын айтқан Облыстық денешынықтыру және спорт басқармасының басшысы Әлібек Нұртаев Олимпиада чемпионының жеткен жетістігін үлгі етіп, жастарды отаншыл, еңбекқор болуға шақырды.

Салауатты өмірді насихаттаған мерекеде футболдан спорт мектеп-интернаты мен облыстық футбол мектебінің жасөспірімдері шеберлік байқасты. Нәтижесінде спорт мектеп-интернатының командасы қарсыластарын 4:1 есебімен ұтты. Ал бокстан өткен жолдастық кездесуде оңтүстікқазақстандықтар 5:3 есебімен тараздықтарға басымдық байқатты.

«Қарты бар елдің, қазынасы бар» деген. Күншуақта отырған мұндағы қариялардың әңгімесі жарасып-ақ тұр. Елдің тыныштығы, ұрпақтарының амандығын тілеп, қауқылдасып отырған жайы. Өткен күніне шүкіршілігі мол. Бейнетінің зейнетін көрген тәубешіл қариялар өңірдің түкпір-түкпірінен келген. Тілектері де, ниеттері де бір. Қазір мекемеде демалып жатқан 200 ардагер төл мерекелерін асыға күтіп жүр.

«Тыныштықтан артық бақыт та, байлық та жоқ»

Облыстық «Ардагерлер үйі» мемлекеттік коммуналдық мекемесі – қарттарды қамқорлығына алған бірден-бір мекеме. Мереке қарсаңындағы әдеттегідей қарбалас. Мекеменің директоры Әлкен Абдуллаев іс-шараға дайындық жұмыстарының басы-қасында жүр. Концерттік бағдарлама өтпек.
Бізді мекеменің қазіргі тыныс-тірішілігімен директордың орынбасары Ғалия Махамбетова таныстырып шықты. Бүгінде мекемеде 200 ардагер ем қабылдап жатыр. Оның 4-і Ұлы Отан соғысының ардагері.

– Мекеме бір жылда 20 ардагерлер легін қабылдайды. Ардагерлер 15 күн демалады. Бәрі де ауданнан, қаладан жолдамамен келеді. Мемлекеттік мекеме болғандықтан бәрі тегін. Ең бірінші Ұлы отан соғысының ардагерлеріне басымдық беріледі. Одан кейін тыл ардагерлері, Батыр аналар, күміс алқа иегерлері, Ауған соғысына қатысушыларды қабылдаймыз. Аудан-қалалардағы тиісті мекемелер қадағалап, кезекпен жіберіп отырады. Ұжымның басты мақсаты – ата-әжелерді жақсы көңіл күймен күтіп алып, шығарып салу. Жыл сайын 4 мың адам демалып қайтады, – дейді директордың орынбасары.

Мұнда келушілерге барлық жағдай жасалған. Төрт мезгіл тамақпен қамтамасыз етіледі. Емдік-сауықтыру шараларының барлық түрі көрсетіледі.
Барлық ұлттың өкілдерін кездестіруге болады. Облыста қандай ұлт болса, бәрі де ем алып кетеді. Негізінен, келушілердің басым бөлігі әжелер екен.
Қарттардың көңіл күйі жақсы. Бөлмелерді аралап көрдік. Бірі тастаяқ ойнап, бірі шахматтың қызығына кірген. Шығармашыл қарттар көп-ақ. Бір бөлмеде ардагер газет-журнал тігінділерін ақтарып жатыр. Домбыра тартып, ән айтатындары да бар. Кейбірі әңгіме жазуға әуес. Жалпы, ардагерлер он бес күн бойы түрлі іс-шаралардың куәсі болады.
Мерекеге орай, мәдениет басқармасының қолдауымен өнерпаздар концерт қоймақ. Мерекелік дастархан жайылады. Әдет-ғұрып салт-дәстүр орталығының өз тартуы бар.

Мекеменің алдында, сыртта төрт ардагер қауқылдасып отыр. Олар – Шымкент қаласының тұрғыны Тілеуімбет Қожаназаров, Мүтәлхан Қалыбаев және Бәйдібек ауданынан келген Балабек Мырзабеков пен сарыағаштық Сүлеймен Шәменов. Тілеуімбет Қожаназаров 1925 жылы туған, Ұлы отан соғысына қатысқан ардагер. «Мемлекетіміз еңбегімізді бағалап, осындай қамқорлық көрсетіп жатқанына мың да бір рақмет. Қызмет етіп жүрген жастарға ризамын, айналайын. Басшының өзі де жібі түзу жігіт екен. Мен мұнда ашылғалы бері келіп тұрамын. Украина, Польша, Беларуссиядағы майдандарда болдым. Еліміз аман, жұртымыз тыныш болсын!», – дейді ардагер. 1922 жылы дүниеге келген Сүлеймен Шәменов те Ұлы Отан соғысының ардагері. 1942 жылы соғысқа аттанған. Небір зұлмат оқиғалардың куәгері. Жас еліміз үшін тыныштықтан асқан бақыт та, байлық та жоқ. Ол кісінің де айтары осы. Аузы дуалы ақсақалдың батасын алдық.
Қариясын қадірлеген халықпыз. Оларды қадірлеу – ертеңгі ұрпағыңды дұрыс тәрбиелеудің бірден-бір жолы ғой.

Қоғамдағы кеселдермен күресуші

Қаламыздың тұрғыны Мыңжасар Асқаровты көпшілік біледі. Созақ ауданының Құрметті азаматы, қалалық ардагерлер кеңесінің алқа мүшесі, ҚР Мәдениет қайраткері. Қоғамдағы теріс жағдайларға қасқайып қарсы тұрып, батыл бастама көтеріп жүрген бірден-бір ардагер. Ардагерді бүгінде жастар тәрбиесі ойландырады. Өзі тұратын 8 шағын ауданда үш-төрт жылдан бері пәтерін жалға берушілермен күресіп келеді. Үлес қосуымен сәл де болсын жағдайдың беті бері қараған жайы бар. Ақыры тәртіп орнатты.

Бүгінге дейін он кітап жазды. Оның төртеуі – поэзияға арналған. Екеуі прозалық. Үш кітабы – ұрпақ тәрбиесі, ұлт тағдыры жайында. Одан кейін «Менің елім Қазақстаным», «Ұлы дала – мәңгілік ел», «Ынтымақ, бірлік, келісім» тақырыбында кітаптары жарыққа шыққан. Көпшілігі ұрпақ тәрбиесі жөнінде. Жылдың аяғына дейін тағы бір еңбегі оқырманға ұсынбақ.
Ардагерлеріміз ардақты атқа лайық болып жүр ме? Қазіргі қоғамда қарттар қандай болу керек? Бұл – қоғамдағы өзекті мәселе. «Қарттарымыз бірінші кезекте саналы, дуалы ауыз болу керек», – деп бастады ол әңгімесін. Кім өзінің ұрпағын жаман болғанды қалайды дейсіз?! «Үлкен ізет білдірмесе, кіші сәлем бермейді» деген сөз бар. Қазіргі жаһандану кезеңінде әрбір ұлт өзінің ұлттық құндылықтарын сақтап қалу керек. Міне, осы мәселеге ең бірінші мән беретіндер біз. Әрбір ардагер өзіне жараса сөз айтып, жинындарда көпшілікті уағызымен ұйыта алса, ұрпағымыз ұлағатты болады.
Сонда ғана біз алпауыт елдердің қатарында тұра аламыз.
Қазыналы қарт 72-ге келді. Екі ұл, екі қыз тәрбиелеп өсірген. 20-дан аса немересі бар. Күнде кешкі «рейдке» шығуды әдетке айналдырған. Бәрі де өзі тұрған ауданның тыныштығы, тазалығы үшін. Әңгімеміз аяқталуға таяғанда Абай ауданы бойынша учаскелік аға инспектор Александр Меньшиков та келді. Екеуі бірлесе бүгін де тәртіпті қадағалауға шығып барады.

Жетпістен асқан жанартау

Бүгінде Орталық саябақтың көркеюіне үлес қосып жүрген Тәліпбек Әлжановтың да әрекеті көпке үлгі. 74 жасқа келсе де әлі қимылы ширақ. Пауэрлифтингтен Азия чемпионатының бірнеше дүркін жеңімпазы, әлем біріншілігінің жүлдегері. Жұмысымен қатар, жаттығуға да мән береді. Тәліпбек ақсақал 90-шы жылдан бері осы спорт түрімен шұғылданады.
Қазан айының 13 күні Ташкентте Азия чемпионаты басталады. Қазір сол байрақты додаға дайындалып жүр. 66 келіде күшін байқап қайтпақ. Былтыр Алматыда өткен ашық Азия чемпионатынан жеңіспен оралған еді.
– Аптаның үш күнінде ауыр салмақтарды көтеріп, жаттығамын. Бүгінде 85-90 келіні еңсеріп жүрмін. Бұл – өте жақсы нәтиже. Әліге дейін апталық режимді бұзбай, бір ырғақпен келе жатырмыз. Ташкентке әйгілі жапон қариясы да келуі тиіс. Соның әлеуетін байқауды асыға күтіп жүрмін, – дейді ол жеңіспен оралатынына сендіріп.
Білсеңіз, темір көтеруге құмартқан еліміздегі жалғыз қазақтың қариясы осы кісі.

Әлеуметтік қолдау артпақ

Шымкент қалалық ардагерлер кеңесінің төрағасы Исамуддин Рысбайдың айтуынша, қаламызда 70 мыңға жуық қарт бар. Оның 7 мыңы тыл ардагері болса, Ұлы Отан соғысы ардагерлерінің жалпы саны – 130-дан асады. Оның ішінде 39-ы өздігінен жүріп тұра алады. 35-і төсек тартып жатқандар. 69-ы үй ішінде жүре алатын ардагерлер. Олардың көпшілігінің әлеуметтік картасын жасау қолға алынған. Әлеуметтік карта – ардагерлердің хабарын алып, жәрдем керек болса соны ұйымдастыру үшін керек. Былайша айтқанда, ол – зейнеткердің айнасы.
Қазіргі таңда Шымкент қаласында 106 бастауыш ұйымы бар. Оларға қойылар бірінші талап та – алдымен өз аумағыңдағы зейнеткерлерді есепке алу. Зейнеткерлердің ешқайсысы тыс қалмау керек.

Халқымыз қариясын қазынаға балайды. Үлкенді ақылдың кені санап, құрмет көрсетеді. Сол бір тамаша дәстүр Қарттар күні жалғасын тапты.

Мереке күні ардагерлеріміз «Алтын сарай» мейрамханасында бас қосты. Шымкент қаласы әкімдігі ұйымдастырған шара жоғары деңгейде өткізілді. Қала басшысы Ғабидолла Әбдірахымов қариялар мен ақжаулықты аналарды мейрамымен құттықтады.

– Сіздерді БҰҰ Бас Ассамблеясы қарттар күні деп жариялаған, бүгінгі мейірім мен ізгілік мерекесімен шын жүректен құттықтаймын. Бәріңіз кейінгі ұрпақты ізгілік пен мейірбандылыққа, Отанымызға адал қызмет етуге үйретіп келесіздер. Араларыңызда бүгінге дейін ел игілігі үшін түрлі қоғамдық ұйымдарда еңбек етіп жүргендер аз емес. Сіз бен біздің қолдауымызға мұқтаж жандардан жүрек жылуын аямайық.Сіздерге зор денсаулық, берекелі ұзақ ғұмыр тілеймін. Әрқашан ықыласқа бөленіп, арамызда жүре беріңіздер! – деді Ғ. Әбдірахымов.

Бүгінде Шымкентте 70 мыңға жуық зейнеткер, соғыс және еңбек ардагерлері бар. Олардың 8 мыңы көпбалалы аналар, 141-і Ұлы Отан соғысының ардагерлері.

Қазіргі таңда Шымкентте 70 мыңға жуық зейнет жасындағы қарттар мен ардагерлер тұрады. Қала әкімдігі ардагерлерімізді ардақтап, оларды қашанда, қамқорлық аясынан тыс қалдырған емес. Осының айғағындай, мерекелер кезінде қарттарымызға түрлі әлеуметтік көмек көрсетіліп келеді. Сондай-ақ қалалық жұмыспен қамту және әлеуметтік бағдарламалар бөлімі тарапынан ҰОС мүгедектеріне, қаза болған әскери қызметкерлердің отбасына, тыл еңбеккерлеріне, ҰОС қатысушыларына теңестірілгендерге әлеуметтік көмектер берілді.

Салтанатты шарада сөз алған қалалық ардагерлер кеңесінің төрағасы И. Рысбай қарияларға жылы лебізін жеткізді.

– Біз жыл сайын мерекені атап өтуді жақсы дәстүрге айналдырдық. Жастық жалыны мен бойындағы күш-жігерін елдің дамуына жұмсаған қарияларымызды бүгінде жас буынның қамқорлыққа алып, сыйлауы орынды. Оларға қамқорлығымызды көрсету – біздің басты міндетіміз, – деді.

Қариялар мерекелік дастарханда бас қосып, арқа-жарқа болды.

Ш. Қалдаяқов атындағы «Тұмар» фольклорлық ансамблі, халықаралық байқаулардың жүлдегері Асыл Жандәулетов қарияларымызға әннен шашу шашты.

Осы орайда аға буын өкілдері мерекені ұйымдастырғандарға алғыстарын айтып, елімізде бейбітшілік пен тұрақтылық баянды болсын деген тілектерін жеткізді.

Қала күні мерекесінде Шымкенттің өсiп-өркендеуiне үлес қосқан азаматтар марапатқа ие болды. Оларға қалалық мәслихаттың шешiмiмен «Шымкент қаласының Құрметтi азаматы» атағы берілді.

Енді «Құрметтi азаматтар» қатарына тағы 10 адам қосылып отыр. Қала күнi мерекесiнде марапатталған азаматтар:

• Балабиев Қайрат Рахымұлы, «Әлем-БТ» ЖШС жобасының үйлестiрушiсi.
• Бейсеев Әнуарбек, «Ұстаз нұры-информ» газетiнiң бас редакторы.
• Егiзбаев Мұқан Кеңесбекұлы, ОҚО ДСБ «Облыстық клиникалық ауруханасы» МКҚК- ның бас дәрiгерi.
• Жүзбаева Нәбира Жүзбайқызы, зейнеткер, байырғы ұстаз.
• Көлбаев Ошақбай Оспанұлы, зейнеткер, Шымкент қалалық ардагерлер кеңесiнiң пленум мүшесi.
• Өмiрәлиев Әлiбек Кәденұлы, зейнеткер, ОҚО аумақтық сайлау комиссиясының төрағасы, Шымкент қалалық ардагерлер кеңесiнiң пленум мүшесi.
• Құрманбаев Алданазар, еңбек ардагерi.
• Сәрсенов Нұрдәулет Жұмағұлұлы, «Оңтүстiк капитал» Ассоциациясының бас директоры.
• Сұлтанбеков Әдiлхан Ысқақұлы, «Шымкент-Дезинфекция» ЖШС-нiң директоры.
• Темiр Өмiрбек Темiрұлы, зейнеткер, отставкадағы судья, Шымкент қалалық ардагерлер кеңесiнiң мүшесi.

Айта кетейiк, облыс орталығының «Құрметтi азаматы» атағын 95 азамат алған болатын. Қала әкімдігі мамандарының айтуынша, бұл атақ қаланың экономикалық-әлеуметтiк дамуына үлес қосқан азаматтарға қоғамдық ұйымдардың ұсынуымен, қалалық мәслихаттың шешiмiмен берiлiп келедi.

«Мемлекеттік тіл мерейімді өсірді» – дейді қазақ тіліне құрметпен қарайтын Николай Путилин

Қазақшаны ана тілдерінен жетік білетін этнос өкілдері көп. Солардың ішінде, тележүргізуші Оксана Петерс, Максим Рожин, қазақ келіні Татьяна Мартыненконың есімдерін мақтанышпен айтуға болады. Сондай тіл жанашырларының бірі, Шымкент қаласы әкімдігінің баспасөз қызметкері – Николай Путилин.

Ол көпшілікке қазақша сөйлейтін журналист ретінде таныс. Сөйлеп қана қоймай, қазақ тілін құрмет тұтады. Ал оның жатық сөйлегеніне қарап, өзге тілде оқыды дегенге сенбейсіз. Өйткені, ұлты орыс болса да, жан дүниесі – қазақ.

– Балабақшада орыс бөлімінде тәрбиелендім. Мектепте орыс сыныбында оқыдым. Көршілеріміз кәріс, грек ұлтының балалары еді. Қазақ тілін меңгеруге ұстаздарым Бибігүл Каниқызы, Гуля Бекманқызының ықпалы болды. Кәсіби мамандар ұстаздық міндетін бірінші кезекке қоятын. Алғашқыда қиын тигенімен, қазақша тіл сындырдым. Кейін қазақ тілі, қазақ әдебиеті, қазақстан тарихы сүйікті пәндеріме айналды. Ұстаздарым қазақ тілі бойынша пәндік олимпиадаларға дайындады. Қазір достарымның барлығы дерлік қазақтар. Маған Абайдың қара сөздері мен өлеңдері қатты ұнайды, – дейді Николай.

Қазақшаны ешкімнен кем сөйлемейтін жігітті әріптестері де, достары да жақсы көреді. Мемлекеттік тілдің арқасында Николайдың есімі қалалықтарға таныла бастады. Еңбек жолын «Отырар» телеарнасында сайт редакторы болып бастаған оның жұлдызы жарқырады. Қазақ, орыс тілдерінде бағдарламалар мен хабарлар жүргізді. ТВК телеарнасында, облыс әкімдігінің баспасөз қызметінде абыройлы еңбек етті. Мемлекеттік тілді насихаттауға көп үлес қосты.

Қазір ол Шымкент қаласы әкімдігінің баспасөз қызметінде жұмыс істейді. Мемлекеттік тілді білгендіктен жұмыс істеу де қиындық тудырмады. Тіл білгенінің арқасында Николай «Мен саған ризамын» деген мақтауды жиі естиді.

– Жұмыста мәтіндерді қазақша жазамын. Әрі қазақшадан орысшаға оңай аударамын. Мұнда қызмет мемлекеттік тілде жүргізіледі. Соңғы кездері менің байқағаным, этнос өкілдері арасында қазақ тіліне қызығушылық артып келеді. Мен оларға мемлекеттік тілдің негізі мектепте қалананатынын айтқым келеді, – дейді Николай.
Тіл жанашыры тек мемлекеттік қызметте ғана емес, қоғамдық жұмыстарға да белсене қатысады. Мерекелік кештерді ана тілімізде жүргізеді. Тілді ғана емес, салт-дәстүрімізді де жақсы біледі.

– Әкем Сергей, анам Алена Шевлякова менің болашағымнан үлкен үміт күтеді. Екі қарындасым бар. Мен үйдің үлкенімін, – дейді Николай Путилин.
Тілден артық қазына, тілден артық қасиет жоқ екенін Николай осылай дәлелдеп жүр. Ол мемлекеттік тілді білу парызым дейді.