Шымшаһарда ел алғысына бөленген ақ халатты абзал жандардың қатары аз емес. Дегенмен дәрігер Назира Ундаганова жайлы әңгіме бір басқа. Сырқат балаларды қоғамға бейімдеп, сауықтыруға күш салып келе жатқан үш баланың анасы бес жыл дегенде жаңа ғимарат алып, сауықтыру орталығын ашқан. Мемлекеттік қолдаудың арқасында өзі дайындаған жаңа тәсілмен ем-дом шараларын жүргізіп отырған дәрігермен біз де сұхбаттасуды жөн санадық. Кейіпкеріміз «Я сам» орталығының жұмысы мен созылмалы дертпен күресіп жүрген балалар жайында әңгімелеп берді.

DSC 1795

– Церебралды сал аурулармен ауырған науқастарға көмектесіп келе жатқаныма 20 жылдан асты, - деп бастады әңгімесін орталық директоры Назира Жұмабекқызы. – Институт бітіріп келгенімде балалармен сөйлесуге жүрегім дауаламайтын. Қорқынышым басым болды. Үшінші перзентіме декреттік демалыс алғанда осы орталықты ашуға кірістім. Шама-шарқымыз келгенше бар тірлікті өз күшімізбен бастадық. Бес жылдай ғимаратты жалға алып жүрдік. Себебі ғимарат салу үшін көп қаражат керек еді. Сондықтан «Даму» қоры арқылы кепілдендіріп, 7 пайызбен несие рәсімдеп, қазіргі Арғынбеков көшесінде орналасқан ғимаратқа көштік.

Орталық церебралды паралич ауруына және басқа да сырқаттарға ұшыраған, интеллектуалдық дамуы төмен, сонымен қатар Даун синдромына шалдыққан мүмкіндігі шектеулі балаларға арналған. Мекеменің бір ерекшелігі, мұнда әр бала үшін коррекциялық және реабилитациялық дамудың жеке әдісі жасалған.

– Емдеу барысында өздігінен отырып тұра алмайтын балаларға алғашқы қадамдарын жасауға көмектесеміз. Арнайы жаттығулар, массаж жасаймыз. Оңалту орталығына күніне орташа есеппен 20-30 науқас келеді. Олардың қатарында Тараз, Нұр-Сұлтан, Ақтау, Орал қалаларынан келушілер де бар. Әрине, барлық ем-домы ақылы түрде өтеді. Бірақ бұл біз дайындаған арнайы емдік тәсілдердің мүмкіндігі екенін айта кеткен жөн. Сауықтыру ұзақ әрі күрделі процесс. Реабилитациялық емдеу курсы 10 күнге созылады. Науқас күніне 2 сағаттан жаттығады.

Үзбей келушілердің ішінде қимыл-қозғалыстары жақсарғандарын байқаймыз. Бұл мен үшін бизнес демес едім. Осы салаға келіп, балалардың жағдайын көре тұра оларға көмектеспеу алдымен ана деген атыма, дәрігер деген антыма сын. Біз аналарға үміт, балаларға жаңа мүмкіндіктер сыйласақ дейміз. Кейде түскен қаражат қызметкерлердің жалақысы мен төлеп отырған несиеден артылмай қалады. Әуелгі мақсат көмектесу болған соң, бастысы бір бала болсын қуанса деймін. Сондай-ақ, балаларды арнайы көлікпен қамтамасыз етіп отырған Шымкент қалалық мүгедектер қоғамдық бірлестігінің төрағасы В.А.Тороповқа алғысымды білдіремін.

DSC 1788

Орталықта балалары созылмалы, туа бітті ауруға шалдыққан ата-аналардың қатары көп екен. Солардың бірі – Мадина Болатбекова. Ол қаладағы оңалту орталықтарында кезек күтіп, уақыт өткізіп алатынын айтады. Қызы Зара Ибрагим осы сауықтыру орталығына келгеннен кейін қимыл-қозғалысы жақсарып, аяққа тұрған.

– Келіп-жүргенімізге төрт жылға жуық уақыт болыпты. Орталықтағы дәрігерлермен бір отбасы болып кеттік. Бұған дейін елден естіген жерлердің біразын аралап, табанымыздан тоздырдық. Бірақ қызым осында келгенде қимылдары байқалды. Орталық аумағына айрықша инклюзивті балалар алаңы орналасқан, мұнда олар түрлі жаттығулар жасайды, өздерін тік ұстап, координацияларын, жалпы және шағын моториканы, күштерін, ептілігін, көру қабілеттерін, тактильді сезінулерін жетілдіреді және топ болып ойнауға бейімделеді.

Жалпы, орталық айналасында мүгедек арбасындағы және мүмкіндігі шектеулі балалардың еш кедергісіз қозғалуы үшін барлық жағдай жасалған. Өзгерістерді көрген соң үзбей келіп тұруға тырыстым. Қызым жүре алмайтын. Қазір аяққа тұрды. Жүруді үйренді. 11 жасар қызға қимылдарын әлі де жетілдіру керек. «Қасиетті жол», «Мейірім» оңалту орталықтары сияқты портал арқылы емдеуге мүмкіндік берсе, қане. Көп ата-аналардың ақшасы жоқ. Жолдаманың да есебі бар. Әркім өзінің мүмкіндігінше емдеп жүр. Бастысы баламыздың саулығы. Осылар жазылып кетсе, көз-алдымызда ойнап күлсе арман бар ма?! - дейді көз-жасына ерік берген ана.

Ал қалалық денсаулық сақтау басқарамасының штатан тыс бас реабилитологы Мейрамкүл Бауланқызының берген мәліметтеріне сүйенсек, шаһарда сал ауруына шалдыққан балалардың саны 1131-ді құраған. Оның ішінде 2018 жылы 967 бала мүгедек деп танылған. Дәрігердің сөзінше, жүйке жүйесі ауруларының ішінде церебралды паралич ауруына шалдыққандардың үлесі басым.

– Қаладағы мемелекеттік 3 оңалту орталығы жалпы 316 орынға лайықталған. Бұған қоса, «Қасиетті жол» қайырымдылық қорында 50 орын, Эскулап оңалту орталығында 22 төсек орын бар. Аталған сауықтыру орындарынан балалар тегін оңалтудан өтеді, - дейді М.Алтаева.
Мемлекет Басшысы Қ.Тоқаев өз Жолдауында қамқорлығында мүмкіндігі шектеулі балалары бар отбасыларға ерекше көңіл бөлінуі тиіс екенін атап өткен болатын.

– Үкімет БЦП диагнозы бар балаларға медициналық және әлеуметтік қолдау көрсетуді жақсарту үшін шаралар қабылдауы керек. Балаларға қолжетімді болуы үшін шағын және орташа оңалту орталықтарының желісін кеңейту қажет. Біз ерекше қажеттіліктері бар адамдар үшін бірдей мүмкіндік жасауға міндеттіміз. Мен бұл туралы өзімнің сайлау алдындағы бағдарламамда айттым. Үкіметке енді осы мақсатқа үш жыл ішінде кем дегенде 58 миллиард теңге бөлуді тапсырамын, – делінген «Сындарлы қоғамдық диалог – Қазақстанның тұрақтылығы мен өркендеуінің негізі» атты Жолдауында.

Түйін.

Осыдан бірер уақыт бұрын редакциямызға бір ана қоңырау соғып, мұңын шақты. Перзентінің ауыр дертімен алысқан ананың әңгімесін тыңдаудың өзі қиын еді. Тағдыр тауқыметін кешкен оны жолдасы тастап кеткен көрінеді. Үш перзентінің үлкені кәмелетке толса да өздігінен жүріп тұра алмайды. Бауыр еті баласын 18 жыл арқаласа да «шаршадым» демеген ол мұндай ерекше күтімді қажет ететін отбасыларға материалдық көмектен бөлек, моральдық қолдаудың өзі ауадай қажет екенін айтқан.Ал кейіпкеріміз Назира Жұмабекқызы мемлекеттік қолдаудың аясында бір оқпен екі қоян олжалағанын сөз арасында айтып қалды. Балаларды бауырына басып, олардың саулығын тілеген дәрігердің мейірімділігіне сүйсініп қалдық...

Құрылыс қарқыны бәсеңдемеген үшінші мегаполистегі өндіріс орындарында бүгінде еңбектің қара қазаны қайнап-ақ жатыр. Шаһардағы кәсіптің көзін тапқан іскер жандар «Еңбек етсем, ертеңгі арманыма жетсем» деп, барын салуда. Қай-қайсысының да бизнестің сан тарау жолдарында өзіндік ізі қалары сөзсіз. Оның ішінде саздың сан мың жылдық сырын ұққан Асан Қалымбетовтың кәсібі өзгерек. Ол басқаратын құрылысқа қажет материал шығаратын зауыттың жұмысы көңіл қуантарлық. Ал ел тұрғындары үшін отандық өнімнің маңызы зор.

DSC 4350

– «Егер ісім өнсін десең, ретін тап» демекші, бала күнімізден еңбек етуді ата-анамыздан үйреніп өстік, - деп бастады әңгімесін Асан Мұхтарұлы. – 2012 жылдың көктемінде қатты дауылдан Қазығұрт, Түлкібас аудандарындағы біраз үйлердің шатыры ұшқаны бар. Біз ол кезде құрылыс жұмыстарымен айналысып жүрген едік. Жұмыстың сапасы әрдайым басты назарға алған соң, шатыр ұшырмайтын материалды іздедік. Саздан жасалған жұқа қышты шетелдік құрылыс компаниялары пайдаланатынын көріп, соны өзімізде неге жасамасқа деген ой туды.

Ағам банк саласында жұмыс істейтін. Мемлекет тарапынан берілетін жеңілдетілген несиелер мен қайтарымсыз гранттардан хабардар етті. Қажетті жабдықтарды шетелден таптық. Шығындарды есептеп, бизнес жоспарын түздік. «Даму» қоры біздің жобаға қаржылай кепілдік жасап, бизнес бастауға қажет қаржыны алуға қолдау білдірді. Бұл «Startup» жобасы болатын. Содан, міне, кәсібімізді дөңгелетіп келеміз, - дейді кәсіпкер.

Орда бұзар жасты еңсерген жігіт бүгінде онға жуық адамды жұмыспен қамтып отыр. Шығарған өнімдері еліміздің барлық қалаларына жеткізіледі. Өзбекстанға да экспортталады. Себебі бұл екі елге ортақ жалғыз өндіріс орны көрінеді. Асан Мұхтарұлының айтуынша, өндіріс орнын ұлғайту жоспарда бар. Сондай-ақ, қосымша тағы жұмыс орындары ашылмақ. Үйлердің шатырын жабуға арналған құрылыс материалдары – черепица қызғылт түсте, біркелкі көлеммен шығарылып, сатылады. Бірнеше жылдан бері тоқтаусыз жұмыс істеп келе жатқан өндіріс орны бәсекелестікке толық төтеп бере алады. Себебі, өндірген өнімдерінің сапасы жоғары.

– Табиғи жабынқышқа сұраныс бар. Бұл ыстыққа төзімді, суықты өзіне жинайтын өнім болып есептеледі. Ғимарат пен үйлерге көрік беретінін де атап өтуге болады. Еуропадағы тұрғын үйлердің 86 пайызының шатыры табиғи өнімнен жасалған жабынмен жабылады. Қажет шикізаттар өзімізден табылады. Бояуын Финляндиядан алдырсақ, қажет бір-екі қоспаны Польшадан әкелеміз. Өнім Шымкентте өндіріліп, арнайы тапсырыспен сатылымға шығарылады. Тұтынушыларға қолжетімді десек те болады.

Сауда орындарында сатылып жатқан Ресей мен Қытайдан әкелінген металло-черепицаның бағасымен бірдей. Шаршы метрі 3000-3500 теңгеден түседі. Табиғи черепица 130 тонна қысыммен қатты тығыздау арқылы дайындалады. Соның нәтижесінде беріктігі, төзімділігі мен сапасы артады. Жарамдылық мерзімі – 100 жылға дейін, ұзақ сақталады, – дейді «Grand Development Group» компаниясының директоры.

Нарық заманында өзі оқыған салада қызмет ететіндер жыл санап азайып барады. Кейіпкеріміз де солардың кебін киген екен. Оқыған мамандығы – теміржолшы. Дегенмен, өзі кәсіпкерлікті таңдапты. Батыл қадамға барып, байыптылықпен үлкен істі қолға алған жігіт бірнеше отбасын асырап, өңіріміздегі кәсіпкерлік саласын дамытуға өз үлесін қосып жүргендердің бірегейі десек, артық айтқандық болмас. Дегенмен, кәсіпкер мұнымен шектелуді жөн көрмейді. Әлі де үйренсем, елге пайдам тисе деген ізгі ниетте екенін сұхбат барысында айтып қалды.

– Бизнесім енді ғана басталып келе жатқанда тәулігіне 4 сағат қана ұйықтайтынмын. Бар күшімді, қаражатым мен бос уақытымды осы іске арнадым. Әрине, қиындықсыз болмайды. Бірақ, сағыңды сындырмағанның бәрі бізге қуат бере түседі екен. Әр саланың өз қиындығы, өз қызығы болады. Бастапқы жылдары оңай соқпады.

Өңірдегі баламасы жоқ өндіріс орны болған соң, бір жолға түскенше біраз еңбек еттік. Қазір жыл санап, мүмкіндіктер артып келеді. Бір ғана жеңілдетілген несиемен ештеңе шешілмейді. Қағазбастылық жүйеден арылу керек секілді. Жүктемені азайтып, көпшілікке оңтайлы жолын қарастырса деген ұсынысымыз бар. Бизнестің биігіне шықсам деген кәсіпкерлеріміз көп, – дейді кәсіпкер.

ҚР Президенті Қасым-Жомарт Тоқаев Жолдауында тиімді шағын және орта бизнес – қала мен ауылды дамытудың берік негізі екенін атап өткен болатын. Мемлекет басшысы шағын және орта бизнеске мемлекет тарапынан қаржылай қолдау көрсету жүйесін жаңа жобаларға басымдық бере отырып, қайта құру қажеттілігін баса айтты. Үкіметке «Бизнестің жаңа жол картасы» аясында осы мақсатқа сәйкес алдағы үш жыл ішінде қосымша 250 миллиард теңге бөлуді тапсырды. Биылдан бастап, микро және шағын бизнес субъектілеріне тексеріс жүргізуге үш жылға тыйым салды. Байқап отырсақ, жыл санап елімізде кәсіпкерлікті қолдау шараларына ерекше көңіл бөлінуде. Ал кәсібін нәсібіне айналдыра білген кәсіпкердің қатары жаңа толқынмен толығып келеді. Бұл да сабақтастықтың ерекше үлгісі деуге болар.

Түйін

Соңғы кездері жаңадан тұрғызылған ғимараттардың сапасы жиі сынға ұшырап жатады. Тіпті, жаңа нысандардың ішінде қасбеті сөгіліп, қабырғасы қақ айырылып жатқандарын да көріп, естіп жүрміз. Бұл ең әуелі құрылыс материалдарының сапасы нашарлығын меңзесе, тұрғындардың қауіпсіздігі де ойландырмай қоймайды. Айтпағымыз, кәсіпкерлер алдымен пайданы емес, арды ойласа... Алатын азын-аулақ ақшаны емес, соңынан айтылатын жақсы сөз үшін қызмет етсе дейміз. «Ел үмітін ер ақтар, ер атағын ел сақтар» деген бар. Асан Мұхтарұлының бойында ондай жақсы қасиеттерді көріп, ішіміз жылып қалды.

Жанға жылу сыйлау – ізгілік

Среда, 29 Январь 2020 03:32

Шымкентте белсенді жастардың ұйытқы болуымен «Жанға жылу» қайырымдылық акциясы аясында әлеуметтік жағдайы төмен, көп балалы отбасыларға азық-түлік себеттері таратылды.

3

Кәсіпкерлер, ерікті жастар, қалалық жастар мәслихатының мүшелері мен өнер иелері бастаған қайырымды жандар Қайнарбұлақ саяжайы мен Достық тұрғын алабына арнайы барып, тұрмысы төмен 50 жанұяға азық-түлік пен тәтті тағамдар таратты. Ал демеушілер әлеуметтік аз қамтылған отбасылардың балаларына киім-кешек үлестірді.

Алдағы уақытта жалғасын табатын акцияға ерікті жастар қоғам белсенділерін, кәсіпкерлер мен халық қалаулыларын және танымал өнер азаматтары мен көмек қолын созуға ниетті барша жандарды атсалысуға шақырып, үндеу жолдады.

Ел Президенті Қ.Тоқаев қазақтың асар дәстүрі волонтерлықпен үндесетінін, сол себепті 2020 жылы қайырымдылық жасауды заманға сай жаңғырту қажет екенін мәлімдеген еді. Осы мақсатта Шымкент қалалық Жастар ресурстық орталығы «Жанға жылу» қайырымдылық акциясын тұрақты түрде ұйымдастыруды қолға алмақ.

Үшінші мегаполистегі жоғары оқу орындарына «Әлеуметтік студенттік кредит» жобасын іске асыру аясында жалпы 1635 орын бөлінген.

DSC 2410

Бұл туралы Жастар ресурстық орталығы басшысының орынбасары Жани Қамбар баспасөз брифингінде мәлім етті. Яғни, Волонтер жылында ерікті жастар қаржылай стипендияға ие болып, кредиттік сабақтары қысқарады.

Бұл жоба Білім және ғылым министрлігі мен Ақпарат және қоғамдық даму министрлігі арасында жасалған ынтамақтастық меморандумы аясында жүзеге асады. Жоба аясында жоғары оқу орындарының студенттері ақшалай сыйақы алып, қоғамдық пайдалы жұмыс нәтижелері үшін академиялық кредиттерді қайта есепке ала алады. Мәселен, күндізгі оқу нысанындағы жоғары оқу орындарының студенттеріне 20 сағат қызметі үшін 20 мың теңгеге, 50 сағат қызметі үшін 50 мың теңгеге дейінгі кредит ретінде әлеуметтік студенттік кредит түрлері ұсынылады. Яғни сабақтан тыс уақытта еріктіліктікпен айналысқан студенттер волонтер ретінде балалар үйлерінде, қарттар үйлерінде, білім беру және басқа да әлеуметтік мекемелерде көмек көрсетеді.

Спикердің айтуынша, бір реттік қаржылай сыйақы алатын волентерлер бірыңғай платформаға тіркеліп, өзі жайлы анкета толтырады. Qazvolunteer.kz сайтында тіркелген ұйымдарға барып кредиттік сағаттарын өтей алады. Бүгінде аталған платформаға Шымкент қаласынан 700-ге жуық жас, 57 ұйым тіркеліп үлгерген. Ерікті жастарға қолғабыс еткен әр күнгі іс-әрекетін фотоға немесе бейнежазбаға түсіруіне тура келеді. Қаржылай сыйлық есепті өткізген волонтерлерге бөлінеді екен.

Жиында БАҚ өкілдеріне орталық мамандары Birgemiz жобасының негізгі бағыттарын айтып, қала аумағында атқарылатын істермен бөлісті. Жастар ресурстық орталығы Волонтер жылына арналған бірыңғай жобаның 7 басымдығын ескере отырып, 100 іс-шара өткізбек. Бұдан бөлек, белсенді 40 жасқа еріктілер формасын алдыруды көздеп отыр. Орталық қызметкерлері тіпті, волонтерлерді қызметтік көлікпен қамтымақ.

Үшінші мегаполисте қаңтар басталғалы қаладағы аудан әкімдері есептік кездесулерін өткізуде. Осындай жиынның бірі Сансызбай Бекбосынов атындағы №70 жалпы білім беретін орта мектепте өтті. Кездесуде Қаратау ауданының әкімі Абзал Әліқұлов тұрғындарға 2019 жылы атқарылған жұмыстар туралы есеп берді.

қаратау

Кездесуде аудан әкімі өткен жылы атқарылған жұмыстарды баяндап берді. Нақтырақ айтсақ, 247 мыңнан астам халық тұратын ауданда 79,5% тұрғын үй тәулік бойы сапалы ауыз сумен қамтылса, 11,2%-ы кесте бойынша, ал қалғаны тіршілік нәрін тасымалдап ішіп отыр. Аумақ тұрғындарын сапалы электр жарығымен қамту үшін қазір қосалқы электр станциясы салынып жатыр. Халықты көгілдір отынмен қамту ісі де қарқынды. Биыл 110 шақырымды құрайтын 146 топырақ көшеге тас төселмек. Сонымен қатар, аудан аумағындағы орталық маңызы бар 79 көшені жарықтандыруға ұсыныс берілген.

Сұрақ қойып, өтініш-талаптарын жеткізген Сайрам тұрғын алабы мен Шапырашты, Өтеміс елдімекендерінің тұрғындары аудан басшысына шалғай елдімекендердің инфрақұрылымын дамыту, ауыз су және электр қуатымен қамту, көшелерді жарықтандыру мен ойын алаңдарын салып беру мәселелерін қозғады.

Жиында алғаш болып сөз алған Өтеміс ауылының тұрғыны Бердалы Райымбеков шешімін күткен біраз мәселенің барын айтты. Оның ішіндегі өзектісі – тазалық. Тұрғындардың қоқыс тазалаушы компанияларға деген өкпесі қара қазандай. Жұрт иісі қолқаны қабатын қоқыстың көше бойында айлап жатып қалатынын айтады. Ал, тиісті мекеме өкілдері төлемнің уақтылы жасалмауына тұрғындарды кінәлап отыр. Жиында қос тараптың дауына Қаратау ауданының әкімі ел алдындағы есеп беру кездесуінде нүкте қойды.

қаратау есеп

Шапырашты тұрғын алабының тұрғыны Нұрмахан Бекбосынов елдімекенге барар жол асфальтталғанын, ауыз су, көгілдір отыннан таршылық көрмейтіндерін баяндай келе ауылдағы мәдениет үйінің жағдайы мәз болмай тұрғанын айтты. Тіпті, балаларға мектептен тыс уақытта ойын ойнауға баратын жердің жоқтығын жеткізді. Тұрғындарды алаңдатып келген жер мәселесі еді. 300 үйдің тең жартысы қалаға қосылғалы құжаттарын ары-бері көтеріп сандалып жүр. Аудан әкімі сұрақтың орынды екенін, мәселеден хабары бар екенін білдіріп, тұрғындарды жағымды жаңалықпен қуантты.

– Биыл бюджеттен 94 млн теңге қаралып отыр. Бұл қаражат мәдениет үйінің құрылыс жұмыстарына жұмсалатын болады. Ал, ойын алаңшалары келер жылы толықтай шешіледі. Қазір ескі мектептің орны бос екені анықталды. Оны білім басқармасының балансынан шығарып, тиісті құжаттарды рәсімдеу үстіндеміз. Бұл мәселе кезек күттірмей шешіледі, - деді аудан әкімі.

Жиында Абзал Әліқұлов тұрғындардың сұрақтарына нақты жауап беріп, кейбір мәселелерді тиісті мамандарға тапсырды. Жергілікті халықтың жеке мәселелерін қағазға түртіп алып, заң шеңберінде жауап беретінін айтты.

Жаңа автобус бағыттары ашылды

Среда, 15 Январь 2020 04:03

Жаңа жылдан бастап қаладағы қоғамдық көліктер жаңа бағыттармен толықты. Бұл туралы «Shymkent bus» тасымалдаушы компаниясының әлеуметтік желідегі парақшасында жарияланды.

№108 автобус бағыты Ордабасы алаңы мен Шымкент сити қалашығын жалғаса, «Ордабасы – Сайрам» бағытында №139 автобус қатынайды. Ал №152 бағыт Алаш базары мен Фосфоршылар ауруханасына жол жүреді. Сонымен қатар, №21 бағыттағы автобус N.Nazarbayev даңғылынан Құрсай елдімекеніне жолға шықты.

Қоғамдық көліктердің жол жүру сызбасы Шымкент қаласының жолаушылар көлігі және автомобиль жолдары басқармасының басшылығымен бекітілген.

Айта кетейік, өткен жылы автобустарды жаңалау үшін қала әкімдігі жаңа автопарк ашып, 300 жаңа автобус алған-ды. Ал 2020 және 2021 жылдары жолаушыларға қызмет көрсету сапасын жақсарту үшін 590 жаңа автобус алуды жоспарлап отыр.

Жаңа жылдан бастап қайырымды қаладағы аз қамтылған отбасылар мемлекеттік жәрдемақыны жаңаша форматта ала бастады. Алғашқы онкүндіктің өзінде әкімдікті жағалаған мыңдаған отбасы атаулы әлеуметтік көмек алу үшін өтініш беріп үлгерген. Бұл жолы мемлекеттен берілетін жәрдемақыға жаңаша тәртіп енгізіліп отыр. Құжат қабылдау, жәрдемақы тағайындау мен тағысын тағылар электронды түрде жүзеге асырылады.

f722526e310f6b66fdd0011e8dcd9589

Үкімет тарапынан әлеуметтің әлеуетін көтеруге бағытталған жұмыстардың атқарылу барысын баяндаған қала әкімінің орынбасары Ербол Садыр ақпараттық-коммуникация орталығында өткен баспасөз брифингінде бүгінгі таңға 9 244 адамға кеңес беріліп, 2 765 отбасыдан өтініш қабылданғанын айтты.

– Қазіргі таңда қалалық жұмыспен қамту орталығында мемлекеттік жәрдемақыға өтініш білдірушілердің көптігін ескеріп, аудандық әкімдіктердің ғимараттарында, жалпы 5 орында құжаттар алфавиттік тәртіп бойынша қабылдануда. Алдағы уақытта қосымша орындар ашылады деп жоспарлануда. Ал атаулы әлеуметтік көмекке тоқталып өтсек, жаңа өзгерістерге байланысты үш түрлі бағытта төленіп жатқанын еске салайын.

Оның алғашқысы көп балалы аналарды қолдау мақсатында берілетін мемлекеттік жәрдемақы 4 немесе одан көп баласы бар отбасыларға табыс көзіне қарамастан төленуде. Жаңартылған атаулы әлеуметтік көмек өмірлік қиын жағдайға тап болған және өз бетінше шығуға мүмкіндігі жоқ адамдарға тағайындалады. Ең соңғысы – кепілдендірілген әлеуметтік пакет, – дейді спикер.

Жаңадан енгізілген өзгерістердің бірі – АӘК-ке үміткер отбасылардың материалдық жағдайын тексеру мерзімінің үш күннен жеті күнге ұзартылуы. Комиссияның қорытындысына сәйкес, мұқтаж емес отбасыларға атаулы әлеуметтік көмек тағайындалмайды. Тағайындалған жағдайдың өзінде еңбекке қабілетті отбасы мүшелері жұмыспен қамту шараларына міндетті түрде қатысуы қажет. Айта кетерлігі, өткен жылы 4000 адам қысқа мерзімді оқуын аяқтаса, 3480 азамат 200 АЕК (505 мың теңге) көлемінде мемлекеттік грантқа ие болған.

Республикалық бюджеттен бөлінетін жәрдемақы аясында биыл 74 мыңға жуық бала ыстық тамақпен қамтылса, АӘК алушылардың балаларына кепілдендірілген әлеуметтік пакет ұсынылады. Айта кетерлігі, ол үшін қосымша құжат өткізудің қажеті жоқ. Кепілдендірілген әлеуметтік пакет алушылардың тізімін қалалық әкімдік бекітеді. Ал мемлекеттік көмек азық-түлік және гигиеналық зат күйінде қаладағы сауда орындары арқылы үлестірілмек. Ербол Әбілхайырұлының айтуынша, аталған жұмыстар ақпан айының алғашқы онкүндігінде жүзеге асырылады.

Қазір заман дамыған сайын түрлі жаңа технологиялар өмірімізге енуде. Әрине, оның бәрі қажеттіліктен туындайтыны түсінікті. Сол дамыған технологияның пайдасы да көл-көсір. Әсіресе, кәсіпкерлерге бизнесін жүргізуге үлкен сеп. Оны жіті түсінгендер уақыт жоғалтпай, өз қызметтерін іске қосуда. Біздің кейіпкеріміз де мемлекеттік қолдаудың аясында ептеп кәсібін дөңгелетіп келеді.

80253718 1103672826506149 2227456093670342656 o

Шымкент қаласының тұрғыны Бекмұрат Оңалбай үшін өткен жыл табысты болды. Алдымен, Жұмыспен қамту орталығының жолдауымен «Атамекен» ұлттық кәсіпкерлер палатасының «Бастау бизнес» жобасы бойынша 21 күндік оқуын оқыса, кейін өзінің бизнес жобасын сәтті қорғап, 505 мың теңге мемлекеттік грантты жеңіп алды.

Халықты жұмыспен қамту орталығына жұмыссыз ретінде тіркеліп, екі қолға бір күрек ұстаған жас замандастарымен бірігіп, онлайн билет сатуды жүзеге асыратын easybus.kz интернет платформасын іске қосты. Яғни, онлайн платформа қалааралық бағыттарға жүретін автобустардың электронды билеттері мен автовокзалдардың жұмысын автоматтандыруға бағытталған.

– Жол азабын жүрген білер дейді. Өзіміз көріп, нарықты зерттеп жүргенде белгілі болғаны – кейде жолаушылар баратын жерге уақтылы жете алмай жатады. Ұшақ пен теміржолға билетті алдын ала табуға болады. Ал қалааралық бағытта жолаушы тасымалдайтын автобустардың жайы бөлек. Біз командамызбен осы мәселені шешу арқылы өз жобамызды бастадық.

Міне, жарты жылға жуық уақытта нәтижесін көріп жатырмыз. Алғашқыда 5-6 автобуспен келісіп бастаймыз деп ойладық, автобекеттерге барып басшыларымен сөйлесе келе автобустардың саны 200-ге жетті. Соның өзінде үш айда 250-ге жуық билет сатылды, – дейді easybus.kz интернет платформасының жетекшісі.

Бүгінде жас кәсіпкер өзінің командасымен Шымкенттен шығатын 15 бағыт бойынша тиісті бағдарламалық жұмысты және төлем жүйесін ретке келтіруде. Атап айтқанда, қаладағы 5 автобекет және Түркістан облысындағы автовокзалдармен келісімге отырған. Бекмұрат Айбасұлының айтуынша, онлайн билет сатып алу жүйелері тегін орнатылып, оның жұмысы автовокзал мамандарына ақысыз үйретілуде.

 DSC3469

– Бізде автобекеттердің ортақ автоматтандырылған базасы жоқ. Яғни, жолаушылар өзіне керек мәліметтер мен билеттерді оңай алудың жолы қарастырылмаған. Ал біз осы ретте бір оқпен екі қоян олжаладық десек те болады. Оның бірі – жол жүру билетін онлайн рәсімдеу болса, екіншісі – автовокзалдарды онлайн басқару жүйесін енгізудеміз, – дейді жас кәсіпкер.
Табыс тауып, атақты болуды емес, алдымен мемлекеттік бағдарламалардың аясында тұрмыстағы өзекті мәселелерді шешуді көздеген жас жігіт енді кәсіп бастаған азаматтар бизнесті дұрыс таңдаса екен деген ұсынысын жеткізді.

– Біздің қоғамда бір жаттанды түсінік бар. Біреу кафе ашып, ісі жүрсе, басқалары соның ісін қайталағысы келіп тұрады. Байқасаңыз, қалада тойхана мен мейрамхана, жеңіл тамақтану орындары көп. Ал қызметтері сайып келгенде бірдей. Өзгешеліктер байқалмайды. Оның орнына әлеуметтің әлеуетін жақсартуға арналған қызмет түрін ұсынғанда, басқаша болар ма еді? Бар нәрсені қайталай бергенше, жоқ нәрсені жасап, өмірімізді өзіміз жақсартсақ, нұр үстіне нұр емес пе?! Қазіргі замандастарымыз мемлекеттің ұсынып отырған мүмкіндіктерін пайдалануға, пайда тауып, экономикамызды жақсартуға асықпайды, - деді ол.

«Цифрлы Қазақстан» мемлекеттік бағдарламасын байыптылықпен жүзеге асыру бүгінде, бір жағынан, жаһандану үрдісінен туындаған уақыт талабы десек, екінші жағынан, онсыз технологиялық, экономикалық, әлеуметтік салалардағы терең өзгерістерді көзге елестетудің өзі қиын. Ал үшінші мегаполисте цифрландыру бойынша нақты жобасын ұсынып, мемлекеттік қолдаудың аясында кәсібін дөңгелетіп отырған Бекмұрат бастаған команданың жұмысын қаладағы IT саласын дамытуға қосқан үлесі деп қарауға болады. Аталған жоба қайырымды да ақылды қала тұрғындары үшін маңызды екені айтпаса да белгілі. Мұндайда «Істегенің еліңе жақсы, үйренгенің өзіңе жақсы» деген мақал ойға оралады.

Страница 5 из 33