Үшінші мегаполисте Жаңа жыл мерекесі қарсаңында жалынды жастарға құрмет көрсетілді. Салтанатты жиынға қатысқан қала әкімі Ерлан Айтаханов түрлі салада өз еңбегімен оқ бойы озық келе жатқандарды марапаттады. Шаһар басшысы білімді де өнерлі жандарға жылы лебізін білдіріп, диплом мен қаржылай сыйлықтар табыстады.

 DSC2465

Биыл тоғызыншы рет ұйымдастырылған байқау мәдениет, өнер, білім, ғылым, әлеуметтік, халыққа қызмет көрсету және т.б. түрлі салаларды қамтыған. Шымкент қаласы әкімінің «Үздік жастар - 2019» байқауының ережесіне сәйкес, 28 номинация бойынша 14-29 жас аралығындағы 126 үміткер бақ сынап, іріктелген болатын. Байқау комиссиясының ұсынысымен 34 жас өз салалары бойынша үздік деп танылған.

Номинация иегерлерін жеңістерімен құттықтаған қала басшысы жастар еліміздің болашағы екенін атап өтіп, ел мүддесі үшін еңбек ету әркімнің міндеті екенін айтты. Қала әкімі Ерлан Қуанышұлы жиын барысында «Үздік қоғамдық ұйым» номинациясына лайықты деп танылған «ХІІ Legion» салауатты өмір салтын қалыптастыру қоғамдық қорының мүшелеріне ерекше алғысын білдірді. Айта кетейік, «ХІІ Legion» салауатты өмір салтын қалыптастыру қоғамдық қоры - Қазақстан Республикасының Воркаут спорт түрі бойынша чемпион және Қазақстан рекордтар кітабына енген ұйым.

– Сіздер – шымкенттік жастарды салауатты өмір салтын ұстануға үгіттеп жүрген үздік ұйым ғана емес, сонымен қатар оларға үлгі болып жүрген азаматсыздар. Қазіргі уақытта ең көкейкесті мәселелердің бірі - жастар арасында салауатты өмір салтын қалыптастыру. Ал адамның өз денсаулығына көзқарасын өзгертуі, ең алдымен, тәрбиелік мәселе саналады. Осы тұрғыда сіздердің еңбектеріңіз орасан екенін атап өткім келеді, – деді Е.Айтаханов.

Жиын үздіктерді марапаттаумен қатар, Жастар жылын қорытындылауға арналды. Аталған жыл аясында атқарылған жұмыстар баяндалды.
«Жастар жылы» аясында қалада 3 мыңнан астам жас кәсіпкерлік курстарынан өтіп, олардың 1000-ға жуық жобасына гранттар берілді. 6 мыңнан астам жас жұмыспен қамтылды. Жұмыс істейтін жастарды қолдау мақсатында жүзеге асырылған жоба арқылы шаһарда 904 жас жалдамалы баспанамен қамтамасыз етілуде.

Бұдан бөлек, қалада студент жастарға арналған 3 жатақхана пайдалануға берілді. Ал дарынды жастарды шыңдау мақсатында республикалық жас ақындар айтысы мен «Көңілді тапқырлар алаңы» ұйымдастырылды. Жас ақындардың «Жаңа ғасыр әуендері» жыр жинағы жарық көрді. «Шабыт» жобасы аясында үздік жас әншілер мен би топтарына 10 бейнебаян түсіріліпті. Ерікті түрде еңбектеніп жүрген 1635 студентке әлеуметтік несие берілуде.

«Жастар жылы» жаңа леп сезілді ме?

Пятница, 27 Декабрь 2019 04:01

2019 жыл Қазақстан Республикасының Тұңғыш Президенті – Елбасының бастамасымен «Жастар жылы» деп жарияланғаны әмбеге аян. Ел Үкіметі оны жүзеге асырудың Жол картасын қабылдап, қазынадан 300 млрд теңге бөлген-ді. Елдің ертеңі саналатын жастар үшін бұл жылдың артықшылығы қандай болды? Біз өз тарапымыздан шымкенттік өрендердің есінде несімен есте қалғанын, не бергенін бағамдап көрдік.

DSC 2169

Жұмыс, баспана, отбасы – бұл жастардың ең басты қажеттіліктері. Олар бір-бірімен толығып тұрғанда жастардың еліміздің дамуына үлес қосатыны сөзсіз. Үкімет бекіткен Жол картасында жастарды қолжетімді баспанамен қамтамасыз ету, білім алу, жұмыспен қамту, бизнесті дамыту, жас отбасын қолдау сынды шаралар қарастырылған. Осы орайда, әр түрлі салада жетістікке жеткен жастардан аталған шаралардың қаншалықты жүзеге асқанын сұрап білген едік.

«Қалауым орындалып, тасым өрге домалады...»

Жастар жылында «Жас кәсіпкер» және «Жас маман» жобаларын қамтитын «Жастар ел тірегі» жобасы басталды. Аталған жобалар «Еңбек» мемлекеттік бағдарламасы аясында жүзеге асырылып келеді. Мемлекет басшысы жастар жылын қорытындылау салтанатты рәсімінде 209 мыңнан астам жас мемлекеттік қолдау шараларымен қамтылып, олардың 172 мыңы жұмысқа тұрғанын айтты. «Жас кәсіпкер» жобасы аясында 20 мың жас кәсіпкерлік негіздеріне оқытылған. Олардың ішінде 9,5 мыңы жаңа бизнес идеяларды жүзеге асыруға грант алған екен.

Солардың бірі – биыл құрылған Жастар мәслихатының депутаты әрі салауатты өмір салты дамыту қоры XIII LEGION орталығы басшысының орынбасары Тимур Шайдуллин өз ойын ортаға салды. Оның айтуынша, биыл табысты жыл болған көрінеді. Жүзден жүйрік шығып, халық қалаулысы атанған ол мемлекеттік бағдарлама аясында білімін жетілдіріп, қайтарымсыз грант арқылы өз кәсібін бастаған.

Тимур Шайдуллин

– Жастар жылының қабылдануы біз үшін қуанышты жаңалық болды. Қаланың үштен бір бөлігін алатын жас тұрғындардың біршама мәселелері билікке жетіп, шешімін табады деп қуандық. Бірақ, бізге бұл жыл не береді деп қарап отырмадық. Өз мүмкіндіктерімізді толықтай пайдаланудың жолын қарастыруымыз керек деп есептеймін. Біз бірнеше жылдан бері қала жастарын спортқа баулып, салауатты өмір салтын ұстануға шақырып келеміз.

– Жастар жылы аясында «Атамекен» кәсіпкерлер палатасының «Бизнес бастау» жобасына қатысып, білімімді жетілдірдім әрі өзім қалаған кәсіпті бастауыма қаржылай қолдауға ие болдым. Биыл жаңадан құрылған қалалық Жастар мәслихатына басым дауысқа ие болып сайлауда жеңіске жеттім. Бұл біздің жауапкершілігімізді күшейте түсті. Дегенмен, қажетсіз жиындарды азайтып, ресурстарды арттыруға көңіл аударылса, жастардың білім алып, өз-өзін дамытуына жағдайлар қарастырылса құба-құп болар еді,– дейді ол.

Жалдамалы баспана – тиімді бастама

Мемлекет басшысының тапсырмасына сәйкес, үш жылда еліміздің ірі қалаларында жұмысшы жастарға 9 мың пәтер беру шешімі қабылданды. Жыл соңына дейін Нұр-Сұлтан қаласы мен Алматы жастарына 1050 пәтер үлестірілсе, үшінші мегаполисте берілуі тиіс болған 904 пәтердің алғашқы легін алғандар бар.

Ы.Алтынсарин атындағы N65 мектеп-гимназияның мұғалімі, Стратегиялық зерттеулер және жастар саясаты институтының директоры Бидос Қалшабек жуырда қоныс тойын тойлаған жастың бірі. Ол еліміздің қастерлі мерекесі Тәуелсіздік күні қала әкімі Ерлан Айтахановтың қолынан баспана кілтін алды. Жас ұстаз бұл бастама өз үйін алуға ақша үнемдеуге беріліп отырған таптырмас мүмкіндік екенін айтады.

Бидос

– Жастар жылында елімізде жастарды қолдауға бағытталған елеулі шаралар іске асырылды. Соның ішінде маңыздысы жұмыс істеп жүрген жастарды баспанамен қамтамасыз ету мәселесі тиісті деңгейде өз шешімін тапты деп ойлаймын. Бұл жүргізіліп отырған мемлекеттік саясаттың нәтижелі әрі өзекті жобасы. Осы игіліктің жемісін 1000-ға таяу мегаполис жастары көруде. Ал, еліміз бойынша 3000-ға жуық жастың жастар жылында баспаналы болуы қуантарлық жағдай.

Осындай тұрғынжайлар арқылы жастар мен жас отбасылар аяққа тұрып, әлеуметтік жағдайын тіктеп, тұрақты баспана ала алады. Баспаналар ашық, әділ, объективті бағаланып, белгіленген талаптарға сәйкес келетін жастарға үлестірілді. Осы орайда, Қазақстан Республикасының Президенті Қ.Тоқаевқа жұмыс істеп жүрген жастарға қолдау көрсеткені үшін алғыс айтқым келеді,– дейді жас ұстаз.

«JasА»-мен жасадық...

Жыл бойы елдің әр өңірінде әртүрлі жобалар жүзеге асырылып келеді. Тиісінше, шымкенттік жастар да осы шаралардан тыс қалған жоқ. Мейілінше белсенділік танытып, жоғарыда аталған түрлі жобалардың ауқымын арттыруға атсалысты. Қалалық жастар ресурстық орталығының қызметкері Жани Қамбар Ақпарат және қоғамдық даму министрлігі мен жастар қызметкерлері қауымдастығының қолдауымен іске асқан JasА жобасына қатысып, грант иегері атанған.

Жани Қамбар

– Аталған жоба аясында мен «Upgrade-Sairam» жобасын ұсындым. Жоба бойынша Сайрам шағын ауданында Ерімбетов көшесі бойына қоқыс жәшіктерін қою, сонымен қатар «қарандаштардан» жасалынған орындықтар және «точилкаға» ұқсас қоқыс жәшіктерін қою жоспарланған болатын. Грант бойынша жалпы 400 000 теңге қаржы қаралған. Жалпы ұсынылған 700-ге жуық жоба арасында үздік жүздікке еніп жеңімпаз атандым. Жобаны дұрыс жазу, жүзеге асыру барысында кездесетін мәселелерді тез шешу және т.б. сұрақтарға жауап іздеу бойынша 6 күндік оқу семинар-тренингінен өттім.

«Аталған жоба қайдан келді?» деген сұраққа жауап берер болсақ, Сайрам шағын ауданы өте тыныш және әдемі аумақ болып саналады. Бірақ, соңғы кездері тұрғындарда қоқыстарды кез келген жерге тастап кетуі жиілеген. Сондықтан экомәдениетті дамыту, қоршаған ортамызды таза ұстау мақсатында осы жоба ойға келген болатын.

Сонымен қатар, келесі жыл Шымкент қаласы ТМД елдерінің мәдени астанасы болатынына орай «қарандаштардан» жасалынған скамейка» жасатып, қаланың ең көрікті жеріне орналастырылды. Қаланың дамуына кішкене де бір үлесіміз тисе қуанамыз. Қала тазалығы тазалық мекемелерін ғана емес, осы жердің тұрғылықты азаматы – біздерді көбірек алаңдатуы керек. Жыл жемісті болды. Жоспарлаған біршама жұмыстардың ойдағыдай жүзеге асқанына қуаныштымыз! - дейді жоба жетекшісі Ж.Сайдуллаұлы.

Түйін

Бір жылда атқарылған жұмыстар мен әлі де шешілуі тиіс мәселелерді тізбектей беруге болады. Жұмыс істеліп жатқан жерде сын да болуы заңды құбылыс. Алайда айтатын сәті түсіп тұрғанда айтпаса сөз жетім. «Жастар жылы шымкенттік жастардың есінде несімен есінде қалды?» деген сауалымызға көп жас жауап беру кезінде кідіріп қалғаны бар. Айтқаны, болса да – пәтер мен жас кәсіпкер жобасы.

Форумдар мен түрлі жиындар жыл сайын жоспарлы кестеге сәйкес өткізіліп келеді. Бірақ, ең үлкен мәселенің бірі – 250 мыңға жуық қала жастарының шоғырланатын һәм бос уақытын тиімді өткізуге арналған бір ғана орталықтың болуы осыншама жасқа аздық ететіндігі рас. Жаңа ғимарат салуға қыруар қаражат, біраз жыл кетері түсінікті жағдай.

Көп жылдан бері пайдаланылмай, қаланың сұрқын қашырып тұрған «Фосфоршылар» мәдениет үйін бір кәдеге жаратып «Жастар сарайы» етіп, пайдалануға берсе қане?! Түрлі үйірмелер жүргізіп, дарынды жастардың танылуына жол ашып, білімін шыңдауға үлкен септігін тигізер еді. Жастарды жырға қосқан Мағжанша айтқанда, «Мен жанбасам лапылдап, Сен жанбасаң лапылдап,Біз жанбасақ лапылдап, Аспан қалай ашылмақ?!.»

Шырша шаттығы

Среда, 25 Декабрь 2019 04:01

Үшінші мегаполисте қала әкімінің жаңа жылдық шыршасы өтті. «Біз – еліміздің жарқын болашағымыз!» атты мерекелік жиында балалардың қуанышын бөліскен қала басшысы Ерлан Айтаханов балғындарды мерекемен құттықтап, шырша шамын жақты.

 DSC1221

– Құрметті балалар! Сіздерді келе жатқан Жаңа жыл мерекесімен шын жүректен құттықтаймын! Жаңа жыл – жаңа ғажайыпқа толы мереке. Қазіргі таңда, біздің елімізде білім алуға, еңбек етуге және демалуға барлық жағдай жасалып отыр. Сондықтан, өздеріңізге сенімді болыңыздар. Отанды сүйіңіздер. Қашанда жақсылық жасап, мейірімді болуға тырысыңыздар. Сіздердің бүгінгі жасаған игі істеріңіз – бақытты болашақтың іргетасы. Еліміздің сенімін ақтайтын үлкен азамат болыңыздар. Жаңа жыл сіздерге көп қуаныш әкелсін, – деді Ерлан Қуанышұлы.

Балаларды жаңа жылдық мерекемен Шымкент қаласы мәслихатының хатшысы Ғани Ташқараев пен депутаттар да құттықтай келді.

Сән-салтанаты жарасқан мейрамда 250 оқушы бас қосты. Оқушылар сарайының басты залына түрлі кейіпкерлер болып киінген балалар жиналды. Олардың қатарында әлеуметтік жағдайы төмен отбасынан шыққан және дарынды балалар бар. Мерекелік тарту ретінде қала әкімі әр балаға 100 мың теңге қаржылай сыйлық сертификатын табыстады. Түрлі тәттілер үлестірді.

Балғындар салтанатты шарада ертегілер еліне саяхат жасап, әннен шашу шашты. Шыршаны шеңбер бойымен билеген оқушылар көтеріңкі көңіл-күйде тарқасты.

 DSC1235

Сауда академиясы құрылады

Пятница, 20 Декабрь 2019 04:14

Үшінші мегаполисте келер жылы Сауда академиясы өз жұмысын бастамақ. «Атамекен» Ұлттық кәсіпкерлер палатасы мен Silkway Халықаралық университеті екіжақты келісім аясында жаңа жобаны қолға алды.

WhatsApp Image 2019-12-19 at 09.07.55

Бұл келісім сауда қатынастары саласында сұранысқа ие және бәсекеге қабілетті кадрларды даярлауға, сатуды басқару, логистика, маркетинг, бизнесті жүргізу мәселелері бойынша Оңтүстік аймақтағы сауданы дамытуға бағытталған.

Silkway Халықаралық университеті оқу базасында 2020 жылдың ақпан айынан бастап тыңдаушыларға оқыту семинарлар, бизнес тренингтер, практикалық дағдыларды ұйымдастыру арқылы «Otau Group» холдингінің, «Эврика» ЖШС, «Шымкент плаза» сауда орталығы, «Фиркан» ЖШС, «Филип Моррис Казахстан» ЖШС-ның бизнес жаттықтырушыларын тарта отырып жүзеге асырылады.

Оқыту аясында тыңдаушыларға тағылымдамадан кейін жұмысқа орналасу мүмкіндігі мол. Зерттеудің алдыңғы қатарлы әдістерін әзірлеу, сондай-ақ бірлескен жобаларды құру бойынша тәжірибе алмасу өтеді. Бұл -- аймақтағы кәсіпкерлер мен компаниялардың қызметкерлерін бірлескен жобалар мен оларды іске асыруға кеңінен тартуға ықпал етеді.

30 жасқа баспана кілті табысталды

Пятница, 20 Декабрь 2019 03:37

Үшінші мегаполисте – Қазақстан Республикасының Тәуелсіздігі күні жастар мен жас отбасылар жалдамалы пәтерге ие болды.

DSC 2121

Түрлі салада жұмыс істейтін шымкенттік жастарға тұрғын үй кілтін қала әкімі Ерлан Айтаханов табыстады. Сатып алу құқығынсыз пайдалануға берілген үй Ақназар хан көшесінде орналасқан. Жалпы пәтерлер саны – 30.

Салтанатты жиында шаһар басшысы жастарды еліміздің қастерлі мерекесімен және жаңа қоныстарымен құттықтады.

– Бұл бағдарламаның ерекшілігі – жастарға өзінің болашақтағы жеке меншік үйінің бастапқы жарнасын жинақтауға мол мүмкіндік беретіні. Яғни, жастарымыз пәтерден-пәтерге көшіп, ай сайынғы нарықтағы пәтерақының орнына 5-7 мың теңге көлеміндегі төлемақыны төлейді, - деді Ерлан Қуанышұлы.

Осылайша қайырымды қалада Жастар жылы аясында жұмыс істейтін 30 жас баспаналы болды. Олардың қатарында дәрігерлер, мұғалімдер, инженерлер, коммуналдық және құқық қорғау органдары мен энергетика, мәдениет, спорт саласының қызметкерлері, кәсіпорын жұмысшылары бар.

Сондай-ақ қала басшысы Ерлан Айтаханов жыл соңына дейін жұмысшы жастарға берілетін, құрылысы аяқталып қалған жалдамалы пәтерлерді өз көзімен көріп, пысықтады. Әкім құрылыс компанияларының басшыларына үй құрылысын мерзімінде аяқтауды ескертіп, сапасына және инфрақұрылымдық жүйесі тұтынуға сақадай сай болу керегін қадап айтты.

Айта кетейік, жыл соңына дейін қалада жалпы 904 пәтер конкурс арқылы үлестіріледі. Ал алдағы екі жылда бағдарлама аясында 2704 жас жалдамалы баспанамен қамтылмақ.

Шымкентте көрнекті қоғам және мемлекет қайраткері Тұрар Рысқұловтың 125 жылдығына арналған «Қазақ елінің ұмытылмас ұлы тұлғалары» атты халықаралық ғылыми конференция өтті.

b68acc50-7545-40d9-bb31-acacb68fef20

М.Әуезов атындағы Оңтүстік Қазақстан мемлекеттік университетінің бас ғимаратында өткен республикалық конференцияға еліміздің әр аймағынан арнайы келген ғалымдар мен аталған оқу ордасының профессор оқытушылар құрамы қатысты. Бұл күні, Мәскеуден Владимир Рысқұлов, Алматыдан Адель Рысқұлова, Мұратәлі Төлепбергенұлы, Түлкібас ауданы Тұрар Рысқұлов ауылынан ұрпақтары арнайы шақырылған.

 

Конференция жұмысы қоғамдағы және мемлекет қайраткері - Шымкенттегі Тұрар Рысқұловтың ескерткішіне гүл шоқтарын қоюдан басталды. Халықаралық конференцияны Дария Пернешқызы жүргізіп отырды. Жиынға қатысқан экономика ғылымдарының кандидаты, мемлекет қайраткері, «Дүниежүзі қазақтарының қауымдастығы» Халықаралық ұйымының Төрағасының бірінші орынбасары Зауытбек Тұрысбеков шараның алғы сөзінде қатысушыларды құттықтап, конференция жұмысына сәттілік тіледі.

 

«Ұлы Дала тұлғалары» ғылыми-көпшілік сериясын жүзеге асыру барысында көпшілік қауымға қазақ ұлт тарихындағы ғалым, қоғам және мемлекет қайраткері Тұрар Рысқұловтың өмірі мен саяси қызметі, республиканың әлеуметтік-экономикалық жағдайын қалыптастыру және дамыту жөніндегі Тұрар Рысқұловтың рөлі мен орны турасында баяндамалар жасалды.

 

ХХ ғасырдың қазақ интеллегенциясының көзқарастарында тәуелсіздік үшін күрес және Түркістанның саяси дамуының маңыздылығы, жалпы Қазақстан мен Орталық Азияның халықаралық деңгейдегі сапалы ғылыми зерттеулерінің жаңа бағыттары мен ынталандырылуы және Еуразияның мәдени-тарихи мұрасы үшін Түркі әлемінің құндылықтары бойынша жаңа ғылыми зерттеулер таныстырылды.

Менің қалам – менің мақтанышым

Пятница, 13 Декабрь 2019 03:32

Шымкентте тазалық пен отансүйгіштікке баулитын дәстүрлі «Таза қала» акциясы өз мәресіне жетті. Тәуелсіздік күні қарсаңында өткен мерекелік шарада қала әкімі Ерлан Айтаханов қаланың тазалығын сақтауға үлес қосқан жандарға алғысын білдіре отырып, қайырымды шаһар тұрғындарын ТМД елдерінің мәдени астанасы атануымен құттықтады.

555

Қала басшысы өз сөзінде алдағы үш жылдық бюджетте санитарлық тазалық жұмыстарына жылдағыдан екі есе көп қаражат қаралғанын айтты.

– Көне заманнан Шымқала деп бекер аталмаған. Көкқала жайында Қожаберген жыраудың «Елімай» дастанында бір шумақ өлең жолдарымен айтылған. Ол 1600 жылдар еді. Өлең жолдарында Шымкент қаласының тұрғындарын еңбекқор деп сипаттап кетеді. Ал қаланы жасыл өлке деп бейнелеген. Біздің ТМД елдерінің мәдени астанасы атануымыздың өзі бекер емес. Бұл бізге жаңа серпін береді. Бір-біріміздің еңбегімізді бағалайық, қайырымды болайық, – деді қала басшысы Ерлан Қуанышұлы.

Жастар ресурстық орталығында өткен мерекелік кеште қала әкімі Ерлан Айтаханов пен қалалық «Азаматтық альянс» қауымдастығының төрағасы Жұмағали Білісбеков «Үздік көше», «Үздік аула» номинациялары бойынша Абай, Әл-Фараби, Еңбекші және Қаратау аудандарының тұрғындарын 1, 2, 3 орындармен және ынталандыру сыйлықтарымен марапаттады.

Ал жылдың үздік ауданы болып Еңбекші ауданы анықталды.Сонымен қатар, қаланың тазалығына белсене атсалысқан құқық қорғау органдарының өкілдеріне бағалы сыйлықтар табысталды.

Айта кетейік, үш айға созылған акцияны Шымкент қаласы ішкі саясат және дін істері басқармасының тапсырысы бойынша қалалық «Азаматтық альянс» қауымдастығы ұйымдастырды.

Жыл басынан бері қаладағы жоғары оқу орындарында қызмет ететін 9 оқытушының сыбайлас жемқорлыққа қатысы бары анықталған. Оның 4-і университет басшыларының шешімімен жұмыстан шеттетілсе, қалғаны қатаң сөгіс алған. Оқу орындарындағы жең ұшынан жалғасқан жемқорлықпен күрес қалай жүргізіліп жатыр? Бұл сауал санаулы күнде емтихан тапсырғалы отырған студенттер қауымын емес, көпшілікті алаңдатқан өзекті мәселенің бірі екені даусыз.

 DSC7320

Студенттерге қысым – акцияға кедергі

Өткен жылдан бері «Jas Otan» Жастар Қанаты мен Сыбайлас жемқорлыққа қарсы іс-қимыл агенттігі «Таза сессия» акциясын өткізуді қолға алған-ды. Аталған шара аясында ұйымдастырушылар Қазақстанда тіркелген ұлттық, мемлекеттік университеттерден бастап, жекеменшік оқу орындарында жең ұшыннан жалғасқан әрекеттерін, құқық бұзушылықтарды жасауға ықпал ететін себептер мен жағдайларды жоюға, осы бір өткір мәселені шешуге атсалысып жүр.

Осы мақсатта «Jas Otan» Жастар Қанаты орталық аппаратының қызметкері Болат Бұхарбай үшінші мегаполиске арнайы келгенін айтады.

– Негізгі мақсат – жастар арасында әлеуметтік осынау дертке «нөлдік» төзбеушілік мәдениетін қалыптастыру, парақорлыққа қарсы мінез-құлық үлгісін одан әрі дамыту, еліміздегі оқу орындарында сыбайлас жемқорлық жағдайын анықтау, оларды болдырмау үшін тетіктерді қарастыру. Акция нәтижесі ЖОО-дағы оқу үрдісінде сыбайлас жемқорлық әрекеттерінің туындауына себеп болатын негізгі мәселелерді анықтайды.

– Ағымдағы жылдың 21 тамызында «Nur Otan» партиясы Саяси кеңесінің отырысында Елбасы, партиямыздың төрағасы Нұрсұлтан Әбішұлы Назарбаев ЖОО-ғы сыбайлас жемқорлықпен күресті күшейту жұмыстарын жүргізуді тапсырған болатын. Осыған орай, Шымкент қаласындағы Оңтүстік Қазақстан медициналық академиясына «Jas Otan» Жастар қанаты ШҚФ және «Адалдық алаңымен» бірге «Таза сессия» акциясының аясында акционерлік және жеке меншік университеттерінен сауалнама жүргізуге келдік, – дейді Б.Дүйсенұлы.

Елордалық комиссия мүшесінің айтуынша, қаладағы 9 университетте «Таза сессия» акциясы өтеді. Оған білім алушы 1,2,3,4 курс, магистратура мен докторантура студенттері жұмылдырылған. Олар «құпия түрде сақталатындығына кепілдік берілетін» 21 сұрақтан тұратын сауалнамаға қатысады. Жиналған материалдар сыбайлас жемқорлыққа қарсы іс-қимыл департаментіне жөнелтілмек.

Ал, департамент мамандары қорытынды деректер бойынша тексеру амалдарын жүргізіп, жемқорлық фактісі анықталған жағдайда университет әкімшілігіне нәтижесін жолдайды. Болат Бұхарбай өңірлерді аралау барысында студенттерге көрсетілетін қысымның бар екенін жасырмады.

– Акция өткізу кезінде кедергі болған үлкен мәселе – студенттерге жасалатын қысым. Біз сауалнама алатын оқу орындары комиссия мүшелерін алдын ала дайындаған студенттерге кіргізеді. Бірақ университет қызметкерлерін аудиториядан шығарып, өзіміздің мақсатымыз бен осы сауалнаманың маңызын айтамыз. Бірінші кезең бойынша шыққан нәтиже Ақордаға «Қауіпсіздік кеңесіне» кірді. Сәйкесінше, министрліктерге тапсырмалар жүктеліп, шаралар қолданылды, – дейді ол.

«Сатып алу»

Ұстаздардың көңілінен шығып, емтиханнан «бес» алса, мәз болып, өзінен асқан бақытты жан жоқтай сезінетін де, дәрісін түгендеп, жыл бойы оқымаған сабақты бір аптада оқып, емтиханға сақадай сай тұратын да – студенттер. «Оқытушылардың қатал бола бастайтыны да нақ осы шақ» - дейді «Шымкент – Адалдық алаңы» жобалық кеңсесінің төрағасы Ерасыл Төлебаев.

Оның айтпағы да «қаталдыққа» келіп тіреледі. «Таза сессия» республикалық акциясы аясында жүргізілген сауалнаманың нәтижесінде белігілі болғандай, жоғары оқу орындарындағы кейбір оқытушы-профессорлар сессияны «сабақты ине сәтімен» пайдаланатынға ұқсайды. «Сыйлыққа баға қою, диплом жазудың өз құны» бар екен.

– Мен «Болашақ» бағдарламасымен оқып жүргенімде соңғы шәкіртақым 700 мың теңге болды. Жоғары оқу орнына жұмысқа орналасқанымда бірінші алған жалақым – 60 мың теңге. Айлық табысымды азсынып студенттерге қиянат жасамадым. Қосымша жұмыстар қарастырып, бос уақытта 2-3 жұмыс істейтінмін. Енді Үкімет оқытушылардың жалақысын 30 пайызға арттыруды тапсырды емес пе? Бұл қордаланған мәселе де алдағы уақытта шешімін табады деп сенеміз.

Бірақ кейде оқытушылардың сыйлық немесе ақша алғанын естігенде қынжыламыз. Тұрмыстық жемқорлықты жоймай, білім саласы мен сапасы дамымайды. Мұндай акцияларды күтпей-ақ сенім жәшіктері мен университет ректорларына тікелей орын алған жағдай болса, арыздануына болады. Бізді әлеуметтік желілер арқылы іздеп, арыз-шағымдары мен ұсыныстарын жолдаса қуанамыз, – дейді Е.Төлебаев.

Түйін

Мемлекет басшысы Қасым-Жомарт Тоқаев «Сындарлы қоғамдық диалог – Қазақстанның тұрақтылығы мен өркендеуінің негізі» атты Жолдауында: «Өз түлектерін жұмыспен қамту жағынан еліміздегі жоғары оқу орындарының жартысы ғана 60 пайыздық деңгейге қол жеткізіп отыр. Сондықтан олардың санын қысқарту мәселесін қарау керек. Терең білім берудің орнына диплом сатумен айналысқан университеттеріміз бар екені де жасырын емес.

Бірінші кезекте соларға тыйым салу арқылы біз оқу орындарындағы білім беру сапасын арттыруға күш саламыз» деген болатын. Ендеше терең тарихтан жарқын болашаққа ұмытылуды мақсат еткен мәңгілік елдің ұрпақтарының білікті маман болып қалыптасуы университет басшыларының жіті бақылауында болуы тиіс.

ФОТО: Серік ҚОСАЕВ

Страница 6 из 33