Үшінші мегаполисте алғаш рет бірегей идеяларды таратуды мақсат тұтқан халықаралық лицензияланған TEDxOrdabasySquare конферециясы өтеді. Қалалық Жастар ресурстық орталығында өткен «Sóıle: Sen tur – men aıtaıyn» конференциясында Шымкенттегі TEDx конференциясының лицензианты Айжан Ергешова жоба туралы баяндама жасады.

Аталған басқосуда «Болашақ» бағдарламасының түлегі, «Shymkent adaldyk alany» жобасының басшысы Ерасыл Төлебаев, Шымкент қаласы бойынша соттар әкімшісінің басшысы Нұрсұлтан Байтілесов, «KZhol Shymkent» оңалту орталығы басшысының орынбасары Айгерім Жұмағалиева, Жастар ресурстық орталығының басшысы Нұрдәулет Тәңірберген, «Ажыраспа» блогының авторы Айна Досқызы сөз алып, өз ойларын ортаға салды, қайырымдылық, жемқорлық сынды бүгінгі жастарды алаңдатқан мәселелерге тоқталды.

– «Таратуға тұрарлық идеялар» деген айдармен өткізілетін конференцияның басты мақсаты – қалың көпшілікке қызықты идеяларды жеткізіп тарату. TED міндеті – идея тарату, соның аясында тегін білім беретін, ойшылдар ойынан шабыт алатын бір-біріне жақын қауымдастық құру. Идея адамның құлқын, өмірін өзгерту арқылы әлемді өзгерте алады.

Ал еліміздің үшінші мегаполисінде ондай ортаның болуы шарт. Биыл әлем бойынша лицензияланған 1500 TEDх концерециясы өткізу жоспарланған. Аталған конференцияларда әлемнің үздік ойшылдары бір ортаға тоғысып, 18 минут бойы өздерінің ең маңызды ойлары мен әлемдегі көкейтесті мәселелерін айтады. Шырайлы Шымкент қаласы сол тізімге енгеніне қуаныштымын.

Бірқатар кедергілерге қарамастан халықаралық ТЕD қауымдастығының рұқсатын алдық, – деді А.Ергешова.

Әр жылдары Билл Гейтс, Эл Гор, Гордон Браун, Билл Клинтон, Нобель сыйлығының иегерлері Джеймс Уотсон, Мюррей Гелл-манн және Уикипедияның негізін қалаушы Джимми Уэйлс секілді танымал тұлғалар TED-те сөз сөйлеген. Барлық лекциялар конференцияның www.TED.com сайтына орналастырылады. Ол 26 тілде аударылады (қазақ тілін қосқанда).

Айта кетейік, лицензияланған TED жиыны бүгінге дейін Алматы, Қарағанды, Ақтөбе қалаларында өтіп келген.TEDxOrdabasySquare ұйымдастырушыларының айтуынша, аталған жиынға қатысушылардың саны шектеулі.
– Бізге сан емес, сапа маңызды. Аудиториямыз белгілі бір мәселені шешуге, ой бөлісіп, күресуге ниетті жандар болғанын қалаймыз әрі сондай адамдарды қамтылуын қадағалаймыз. Конференция күзде болады, – дейді Айжан Ергешова.

Ел тірегі – Елорда

Среда, 10 Июль 2019 04:06

Шымкент тұрғындары Елорда күнін ерекше көңіл-күймен атап өтті. Шаһар аспанында ән мен күй әуеледі.

DSC 1282

Қала тұрғындары мен қонақтары Арбат демалыс аймағында өткен «Ел Астанасы – Нұр-Сұлтан» атты естен кетпес қызықтың куәсі болды. Салтанатты кешке қала әкімі Ғабидолла Әбдірахымов және Шымкент қаласы мәслихатының хатшысы Ғани Ташқараев қатысты.

Қала әкімі көпшілікті Елорда күнімен құттықтап, әлем бойынша ең жас қаланың 21 жыл ішінде бағындырған биік белестерін атап өтті. – Нұр-Сұлтан қаласы санаулы жылдар ішінде сәулеті мен дәулеті келіскен, ірі, ресми, мәдени, рухани орталыққа айналды. Бүгінде әлем Нұр-Сұлтан қаласын Қазақстанмен егіз ұғым ретінде танитын болды.

Ол барлық қазақтың символы деп айтар едім. Елбасы сіз бен бізге осындай керемет қала салып берді. Ендігі ел тұрғындарының әлеуеті жыл санап арта түседі. Шымкентті де үлкен өзгерістер күтіп тұр. Баршаңызды мерекемен құттықтаймын. Сіздердің қолдауларыңызды сезінемін! – деді қала әкімі.

DSC 1201

Мерекелік концертте «Нұр-Сұлтан» сазды хореографиялық композициясы ұсынылды. Еңселі Елордамызға арналған мерекелік іс-шара жиналған көпшілікке ерекше көңіл-күл сыйлады. Салтанатты жиын соңы Шымкент қаласының шығармашылық ұжымдарының мерекелік концерттік бағдарламасына ұласты. Өнерпаздар әннен шашу шашып, мың бұрала би билеп, мерекелік кештің көркін қыздырды.

Домбыра – қазақтың бренді

Пятница, 05 Июль 2019 05:15

Қазақстандықтар биыл екінші рет Ұлттық домбыра күнін атап өтеді. 2018 жылы Елбасы Н.Назарбаевтың Жарлығымен шілденің бірінші жексенбісі Ұлттық домбыра күні болып бекітілген болатын.

DSC 0052

Елбасының бастамасымен елімізде «Рухани жаңғыру» бағдарламасы қолға алынып жатқан бүгінгі тұста бабадан қалған төл өнеріміздің мерейін өсіріп, болашақ ұрпаққа аманат ету – маңызды іс. Сан ғасырлық тарихқа жалғасқан сондай ұлттық құндылығымыздың бірі – музыка аспабын жасау. Қос ішектен төгілген күй адамның жанын балқытып, қайталанбас ерекше әсерге бөлейді.

Осы орайда күйшінің шеберлігінен аспаптың бабына сай жасалуы тасада қалып жататыны да бар. Мұны айтып отырғанымыз, домбыраның құдіреті мен киесін ұғынған жан ғана аспапқа ұлттық нақыш беріп, «жан» бітіре алады. Шымкентте тұратын Өмірсерік Нұртай сондай хас шебердің бірі. 27 жылдан бері домбыра жасауды кәсіп еткен ағаш ұстасы Ұлттық домбыра күні қарсаңында домбыраның жасалу құпиясымен бөлісті.

Сурет – ағаш өнеріне жақын

М.Әуезов атындағы ОҚМУ-ді 1990 жылы суретші мамандығы бойынша тәмамдаған Өмірсерік Нәбиұлы алдымен бір-екі жыл басылымдарда карикатура салумен шұғылданған. Кейін Ресейге әскерге аттанып, сол жақта жүріп ағаш шеберлерінен өнер үйреніп, елге оралған бойда домбыра жасауға деген қызығушылығы осы салаға келуіне түрткі болған.

– Негізгі бұл атакәсіп деуге болады. Бірақ әкем домбыра құрастырмаған. Кейде мені қайрап, «Атаңа ұқсап темір ұстасы болмасаң да, домбыра құрастырсаң жаман болмас едің» дегенді жиі айтатын. Сол сөз де әсер еткен болар. 1992 жылы әскерден оралған тұста ағаштан аспап жасауға қатты көңілім ауды. Табиғи ресурстары мен кептіру технологияларын зерттеп, дауыстарын келтіруді үйрене келе алғашқы домбырамды құрастырдым.

Талдықорғандық Серік деген ағамыз болатын, сол кісі ақылын айтып аздап ұстаздық еткені бар. Кем-кетігін жүре келе түзедім. Тіпті, домбыра шертуді сол кездері үйрендім (күліп). Қазір соңымнан ерген Ертай інімді баулып, кішігірім шеберханада домбыра құрастырамыз. Ұлдарым да кейде қолқабыс жасайды, - дейді 48 жастағы шебер.

Ағаш ұстасының айтуынша, бүгінде қажет заттардың барлығын табу оңай, сауда орталықтары мен ағаш базарларында сатылады. Орташа есеппен бір домбыра жасауға 3-4 күн, кейде бір апта уақыт жұмсайды. Шебер әр дүниенің жасалу ерекшелігі мен саз үндестігін ұлттық таным түйсігі арқылы жеткізуге тырысады.

– Арзан домбыралар қарағаштан жасалады. Жаңғақтан жасалғаны қымбаттау жүреді. Жұмысы ауырлау болғандықтан, бағасын соған лайықтап айтамыз. Ал шетелден арнайы алдыратын қызыл ағаштан жасалған аспаптар одан да қымбат саудаланады. Бірақ, біз көбіне халықтың шама-шарқы келетін, қалтасы көтеретін домбыраларды құрастырамыз. Бағасы 7-10 мың теңгеден басталып 150 мың теңгеге дейін барады. Ағаштарды тақтайлап сатып аламыз.

Аспаптың тапсырысқа сай пішімі, өлшемі болады. Алдымен өлшеп сызасың, содан соң кесесің және суға салып қоясың. Мұнан кейін қалыпта иіледі. Шанағы жонылады. Құрастырылып, желімделеді. Кептіріп, 3 мм қалыңдықта бет тақтай дайындаймыз. Одан бөлек бас, құлақ, мойын, серіппе, тұғырын жеке-жеке қалыпқа келтіру арқылы домбыра құралады.

Барлығы өзінің технологиясына сай жасалады. Өзім кәсіби суретшімін. Ою-өрнек кескіндеу қиындық туғызбайды. Қазір ағаштарды сан түрлі қалыпта өңдейтін, миллиметрді мінсіз жонып шығаратын аппараттар бар. Соларға қол жеткізуді көздеймін, - дейді ұста.

Аспапты алдымен өздері сынайды

Ұлттық мұрамызды насихаттап, қазақтың бас аспабын құрастырып жүрген шебердің сөзінше, тапсырыс берушілердің ішінде домбыраны сыйға таруға алып жататындары жиі кездеседі. Ұста өзі жасаған дүниесінің көптігімен емес, сапасымен мақтанады. Қол жұмысы болған соң, мұқият, әр ұсақ-түйегіне дейін мән беріп жасайды. «Бұл аспап қателікті кешірмейді. Әуеннің дұрыс шығуы домбыраның сапасын көрсетеді», дейді шебер.

– «Кеңес», «Қосалқа», «Көңіл» толқыны сынды күйлерді тапсырыс берушілерге тартып, тексеріп береміз. Астыңғы, үстіңгі, орта ноталарды естіп, пернелердегі дыбыстың таза шығуына көз жеткізіп алып жатады. Жалпы, бұл қауіпсіздікті талап ететін кәсіп, - дейді қолөнер шебері.

Себебі домбыра жасауда кесетін, тілетін өткір жүзді құралдар пайдаланылады. Домбыраның шорт сынып, кейде тез бұзылуын шебер ұстаның қол жұмысы және оны қолданушының салғырттығы деп біледі. Аспап бірқалыпты температурада тұрып, арнайы қаптамада күтіп ұстауды қажет етеді. «Сонда ғана оны ұзақ жыл өнерге серік етуге болады», деді қолөнерші.

DSC 6893

Қазақты қазақ ететін ұстынның бірі – ұсталық. Ол қанмен келеді, тұқым қуалайды. Атадан балаға мирас болып келе жатқан ұлы өнерімізді ұлтымыз қашан да ұлықтаған. Өйткені, қолөнер – ешқашан өшпейтін өлшеусіз өнер. Осы бір қасиетті өнерді жанына серік еткен Өмірсерік Нәбиұлының айтуынша, ағаштың да жаны бар.

Ол ағашты қолына ұстағанда-ақ одан қандай домбыра шығатынын сезіп тұратынын айтады. Өзі әр ағаштың қадір-қасиетін бағалайды. Ал жасаған домбыраларын айтыскер ақын Мэлс Қосымбеков сынды ұлтымыздың қасиетін айғақтап жүрген дарындар ұстап жүр.

– Домбыра – әр қазақтың серігі, жолдасы. Қазақ бар жерде домбыра бар, домбыра бар жерде қазақ бар. Елдігімізді төл өнерімізбен ұстап тұра аламыз деп ойлаймын. Жұбайым екеуміз үш ұл, бір қыз тәрбиелеп отырмыз. Үлкені жоғары оқу орнын тәмамдаса, қалғандары мектеп жасында. Олардың бойына ұлттық өнерімізді, салт-дәстүрімізді сіңіру, мәдениетімізді таныту – біздің басты мақсатымыз, – дейді Өмірсерік ұста.

Түйін:

Бүгінде елімізде Елбасының «Рухани жаңғыру» бағдарламалық мақаласына баса мән беріліп, ұлттық жаңғыру тұрғысында көптеген іс-шаралар атқарылуда. Ұмытуға шақ қалған жауһарларымыз аршылып, көне дәстүрлеріміз қайта салтанат құруда. Соның бірі – 2018 жылы алғаш рет Ұлттық домбыра күнін атап өттік. Бұл да болса өшкеннің жанып, өткеннің қайтып оралғаны.

Азамат ЖАППАР
Фото – Серік ҚОСАЕВ

Нұр-Сұлтан – жастардың қаласы. Елорда тұрғындарының арасында еліміздің барлық аймақтарынан келген қыз-жігіттер жетерлік. Олардың бірі білімге талпынып, бірі жұмыс іздеп, арман қуып барған. Ал сол жастардың бір-бірімен танысып, жүректері табысып, шаңырақ құрып жатқаны көңіл қуантады.

IMG-20190702-WA0006

– Еліміздің бас қаласының бүгінгі ажарын жастардың кескін-келбет, бет-бейнесі, өмір салты, армандарымен салыстыру ләзім. Екеуіне де жастық жігер, албырттық, талпыныс, жаңаша ойлау еркіндігі, сұлулық пен сымбат тән, - дейді Нұр-Сұлтанға Шымкент қаласынан қоныс аударған жас дәрігер Ақылбек Қадырбекұлы. – Қолыма диплом алған күні-ақ жастардың қаласына аттану басты мақсатым болды.

Ол 2013 жылдың жазы еді. Нұр-Сұлтанда жұмыс табу қиынға соқпады. Тез-ақ ортаға үйреніп, ұжымға сіңісіп кеттім. Бәрі болмаса да біразы өзім сияқты еліміздің әр аймағынан жиналған қаракөздер еді.
Жұмыс істеп жүрген кезде әскерден шақырту келіп, 2015 жылы Отан алдындағы борышымды өтеп келдім. Одан кейін ҚР Президенті Іс Басқармасының медициналық орталығында қызмет етіп жүріп, өмірлік серігімді кездестірдім.

Наргизамен өткен жылы отау құрып, отбасылы болдық. Қуанышымыз еселеніп, тұңғышымыз дүниеге келді. Нұр-Сұлтан қаласы – менің барлық қуанышымның куәсі.
Мегаполистің қоғамдық-саяси, мәдени өмірі қыз-қыз қайнап жатыр. Елорда болған соң мемлекеттік ауқымдағы іс-шаралар таусылмайды. Қайда барам деп ойланып жатпайсың.

«Астана Опера», Қ.Қуанышбаев атындағы қазақ драма театры, М.Горький атындағы мемлекеттік академиялық орыс драма театры, Жастар театры, қалалық қуыршақ театры, түрлі концерттер, киноапталықтар үзілмейді. Спорттық сайыстар да солай.

Ал қаланың қатаң табиғаты да жұмсарып, ауа райы жылдан-жылға жылынып келеді. Сақырлаған аязы мен өкпек желі қазір бұрынғыдай әсер етпейді, мүмкін, біз үйреніскен шығармыз.
Еліміздің астанасында өмір сүру өзіме, отбасыма ұнайды, болашағы бар қала, жастардың талабын ұштайды, олардың армандарын жүзеге асыруына мүмкіндік береді. Бізге сонысымен ыстық, сонысымен қымбат.

Жаса, жастардың қаласы, армандарымның бастауы – Нұр-Сұлтан!

Шымкентте жаңа оқу жылынан бастап зерек балалар даярлайтын еліміздегі алғашқы мамандандырылған білім ошағы ашылады.

IMG-20190619-WA0048

«Асыл бала» мектеп-балабақша кешенінде жас бүлдіршіндер UCMAS халықаралық бағдарламасы мен DynEd ағылшын тілін меңгеру жүйесі арқылы білім алады. Бұл туралы есепке жүйрік оқушылардың жеңісімен бөліскен «Алиар» даму орталығының директоры Ұлжалғас Алиханова айтып берді.

– Оқу жылының соңында шымкенттік озат оқушылардан құралған топ Еуразиялық зияткерлер сайысына қатысып, үздік нәтиже көрсетіп қайтты. Елордада өткен білім сайысына UCMAS Халықаралық академиясының ТМД елдері мен Орта Азия мемлекеттерінен 1000-нан аса оқушы қатысты. Солардың ішінде Шымкенттен барған 34 өрен де бар.

Бұл олимпиаданың басты ерекшелігі – «Most People Solving Math Matrix Together» әлемдік рекордына қол жеткіздік. Бұл дода тарихқа әрі «World Records Union» және «Asia Book of Records» әлемдік рекордтар кітабына енеді. Аталмыш олимпиаданың ережеге сай өтуін рекордтар кітабының өкілі доктор Рой Човдхуры Бисварооп қадағалады, - дейді директор.

Сол білім сайысында Кирилл Ким мен Сафина Ерметова бірінші орыннан көрінген. Қалған балалар да жүлделі оралды. Бір қуантарлығы, санаулы жылда есепке жүйрік осындай «калькулятор балақайлардың» саны едәуір артады. Өйткені қаламызда мамандандырылған мектеп-балабақша кешені іске қосылмақ. Аталған жоба жекеменшік мектептерді қаржыландыру бойынша мемлекеттік бағдарлама арқылы жүзеге асады.

Бұл жоба балғындардың ой өрісін, есептеу қабілетін арнайы есеп құрылғысы арқылы жетілдіруге бағытталған.

Шымқаланың мизам шақтарын мәңгілікке сыйлаған белгілі қылқалам шебері Сұлтан Иляев қаланың мегаполис статусын алғанына бір жыл толуына орай жеке шығармашылық көрмесін ұсынды.

DSC 6172

Мылқау бейнені түсінікті тілмен сөйлетіп, тарихты туынды арқылы көрсете білу – тек суретші мен мүсіншінің қолынан келетін өнер. Осындай дарынымен дараланған таланттардың ішінде Сұлтан Иляевтің орны бөлек. Қазақстанның еңбек сіңірген қайраткері, Суретшілер одағы мен Дизайнерлер одағының мүшесі шығармашылығын көпшілікке тағы бір таныстырды.

Бейнелеу өнері музейіндегі көрмеге автордың соңғы жылдары салынған 100-ден астам туындысы қойылған. Атап айтқанда, «Оазис», «Ауыл», «Алтын ай», «Арнау», «Ағаш көлеңкесінде», «Қалыңдық», «Бесік», «Теңіздің жағасында», «Ұшу», «Айнаның алдында» сынды 28 әдемі полотно мен «Балалық шақ», «Бала түсі», «Идиллия», «Ұшу», «Ояну», «Күн мен түн», «Әуен», «Күн астындағы үй», «Балықтар мен құстар» сияқты графикалық кескіндемелер бар.

Өзбекстанның халық суретшісі, Гиннес рекордтар кітабына әлемдегі ең үлкен картинаның авторы ретінде енген Леким Ибрагимов, Мемлекеттік сыйлықтың иегері, суретші-монументалист Насыр Рүстемов, ҚР Мәдениет қайраткері, профессор Темірхан Ордабековтер сынды белгілі өнер иелері «Мегаполис» атты көрменің ашылу салтанатының құрметті қонағы болды.

Бұл күні дарынымен дараланған қылқалам шеберіне лайықты құрмет көрсетіп, жиналған жұрт шығармашылығына жоғары баға берді.
Суретшінің жұмыстары бүгінде Алматы, Мәскеу, Ташкент, Сочи қалаларындағы мұражайларда және әлемнің түрлі қалаларындағы жеке галереяларда сақтаулы. Айта кетейік, шуаққа толы шығармалар қойылған көрме 17 шілдеге дейін жалғасады.

Журналистің қаруы қалам болса, оператор Талғат ағаның камера деген «қаруын» қолына алғалы биыл 29 жыл толыпты.

IMG-20190627-WA0376

Еліміз егемендік алған жылдардың жаршысы, керегеміз кеңейіп, уығымыз нығая түскен шақтың жарқын куәгері, ширек ғасыр бойы телевизия саласында ақпаратпен біте қайнасып, бірігіп жатқан ағаның түсірген кадрлары «Оңтүстік» телеарнасының алтын қорында сақтаулы. Өз ісіне шын берілген шығармашыл жан бір мүлт кеткен кадр үшін уайымға түсетінін айтады.

Бұл журналистен кейінгі жаңалық жаршысына айналған телеоператор мамандығына тән қасиет болса керек. Бала жастан болашаққа даңғыл жол салып берген әкесінің себепкерлігімен бүгінде облысқа белгілі телеоператор болып қызмет етіп жүр.

– Камера – оператордың көзі һәм құлағы, - деп бастады әңгімесін Талғат Үркімбекұлы. – Түркістанда туып, Шымкентте өстім. Әкем Үркімбек Елеубеков сол жылдары «Оңтүстік Қазақстан» газетіне фототілші болып істеді. Үшінші сыныпта оқып жүргенімде алғаш рет фотоаппарат ұстап, сыныптастарымды суретке түсірдім.

Мұны байқаған әкем ақ батасын беріп, осы салада маман атануыма тілеулес болды. Байділдә Қонысбек ағамыз 1990 жылы қыркүйек айында «Қазақстан-Шымкент» телеарнасына телеоператор қызметіне қабылдаса, қараша айында телеарна ашылды.

Ол жылы облтелерадио комитеті еді. Келесі жылы Алматыға тәжірибе шыңдауға барып, онда жүзге жуық телеопреатордың арасынан Сарымса Қожагелді, Абай Омаров үшеуміз Мәскеудегі Бүкілодақтық телерадиохабарларын тарату қызметкерлерінің дәрежесін жоғарылату институтының корреспондент және телеоператорлардың бір жылдық толық курсынан өттік.

Сол кездері ұжымдағы ең жас оператор мен едім. Әкеммен қатар Сарымса Қожагелді, Абай Омаров, Құсан Азизов, марқұм Абай Заизов сынды аға буын жетелеп жүріп, маған ұстаздық етті. Солардан үйреніп жүріп, маман атандық.
Жастайынан тауда туып, таста өскен аға үшін бұл саланың орны ерекше. Мамандыққа деген махаббаты риясыз, еңбекке адал қасиетімен де көпке үлгі болып жүр.

Оның еңбегі бағалы, жұмысы құнды. Өзі айтпақшы, ең үлкен құрмет – телеарнаның 25 жылдығы тұсында алған ҚР журналистер одағы ОҚО филиалы Қарауылбек Қазиев атындағы сыйлық.

– Маған қайнаған өмірдің шынайы көрінісін көзбен көріп, кадрға алған ұнайды. Әр кез қоғамдағы болып жатқан әртүрлі оқиғаладың ортасында жүреміз. Түсірілімге барсаң, өзіңнен бір елі аттамай жаныңа серік болып жүретін әріптес журналистер болады. Түсірген кадрың тілшілердің жазған мәтінімен үйлесіп, көрерменің көңілінен орын тауып жатса, мен үшін қуаныш. Осы жылдар арасында жасаған жұмыстарым, телеарнаның алтын қорында сақтаулы, - дейді таспагер.

Білікті оператор бүгінде бір ұл, екі қызын өмірлік қосағымен бірге тәрбиелеп отыр. Телемаманның көрген қызықтары мен айтар әңгімесі де аз емес. Мамандықтың қызығы мен шыжығы мол. Осы саладан нәпақа тауып жүрген әріптестерін мерекемен құттықтайды.

– Ең алдымен өңіріміздегі қайғылы оқиғадан зардап шеккендерге көңіл айтамын. Бұл күндер де өтіп, алда жақсылықтар күтеді деп сенемін. Ал ұжымдастарым мен БАҚ өкілдерін, барша әріптестерімді 28 маусым – бұқаралық ақпарат қызметкерлері мерекесімен шын жүректен құттықтаймын. Елімізде тыныштық болсын!

Қазіргі таңда Шымкентте құрылған 49 эвакуациялық пункте Арыстың жалпы саны 26 мыңнан астам тұрғыны тіркелген. Бұл туралы Шымкент қаласының әкімі Ғабидолла Әбдірахымов арнайы брифингте мәлімдеді.

Арыс брифинг 1

Баспасөз жиынында Ғабидолла Әбдірахымов БАҚ өкілдеріне эвакуациялық пунктердегі жағдай мен онда тіркелген азаматтарға көрсетіліп жатқан медициналық және гуманитарлық көмектер туралы баяндады.

Брифингте айтылған мәліметтер бойынша Арыста орын алған төтенше жағдайлардан зардап шеккен 7 941 адам жатаханаларға жайғастырылған, арасында 2 870 бала бар. Медициналық көмекке жүгінген 47 адам қалалық, ал 70 адам облыстық ауруханада емделуде. Оның ішінде 43 бала бар.

– Бұл – өте ауыр жағдай. Жарылыста қаза тапқандардың жанұяларының қайғыларына ортақтасып, көңіл айтамын. Ол кісілердің отбасыларына материалдық көмек көрсетіледі. Ел басшыларынан бастап, барлық қазақстандықтар қолдан келген көмектерін көрсетуде, – деді Ғ.Әбдірахымов.

Қала әкімінің айтуынша, Арыс қаласының тұрғындарын эвакуациялау үшін қаладан 56 автобус жіберілген. Ал қауіпсіздік үшін теміржол вокзалында тоқтатылған пойыздардың 3100-ден астам жолаушысы Түркістан қаласына 43 автобуспен тасымалданды.

Екі күннің ішінде жоғалған 19 бала ата-анасына табысталғанын айтқан қала әкімі еріктілерге, қаражат аударған кәсіпкерлерге алғыс білдірді. Ғабидолла Әбдірахымов бұған қоса сын сағатта халыққа жалған ақпарат таратып, әлекке салмауға шақырды.

– Шымкент қаласы үшін ешқандай қауіп жоқ екенін қайталаймын. Өз кезегінде журналистер мен әлеуметтік желі белсенділеріне тек тексерілген, расталған ақпаратты пайдалануға шақырамын. Қазір біздің мамандар жарылыстан келген шығындарды есептеп жатыр. Министрліктің тапсырмасы түскен сәтте арыстық тұрғындарды үйлеріне жеткіземіз, – деді Ғ.Рахматоллаұлы.

Баспасөз жиынында қалалық полиция департаментінің басшысы Ералы Жұмаханбетов жалған ақпарат тартқан Арыс тұрғынының үстінен қылмыстық іс қозғалғанын, ал жалпы, тәртіп сақшылары қатаң режимде жұмыс істеп жатқанын айтты. Қалалық төтенше жағдайлар департаменті басшысының міндетін атқарушы Мадияр Жақсыбаев та Арыстағы жағдай тұрақты екенін хабарлады.

«Жолаушылар тасымалы» АҚ бас директоры Арман Сұлтанов Шымкентке келіп тоқтаған жолаушыларды жеткізу барысы тұрақты екенін айтты.

Страница 8 из 27