Қала көшелерінде ирригация жүйелері жаңартылуда
Климаттық жағдайы ылғалды болып келетін Шымкент қаласының көшелерінде әсіресе, көктем, жаз мезгілдерінде толассыз жауған жауын-шашын салдарынан түрлі қиындықтар орын алып жатады. Көп ретте, жергілікті тұрғындардың айтар арыз-шағымы да ұлғаятын кезі осы сәт. Жылдағы дәстүрге айналған осынау келеңсіздіктерді болдырмау мақсатында биыл облыс орталығында тозығы жеткен ирригациялық жүйелерді толығымен қалпына келтіру жұмыстары жүргізілуде.
Қала әкімі Ғабидолла Әбдірахымовтың тапсырмасына сәйкес, орталық санатындағы Желтоқсан, Қалдаяқов, Түркістан, Темірлан тас жолы, Жангельдин, Иляев, Рысқұлбеков, Момышұлы және Бейбітшілік көшелерінде күрделі жөндеу жұмыстары атқарылуда. Ол үшін жергілікті қазынадан 182 миллион теңге қаржы қаралған.
Жұмыс ауқымын арнайы зерделеген сала мамандары ирригация жүйесін жаңғыртудың арнайы бағдарламасын дайындапты. Бағдарлама шеңберінде шаһардағы көне арық-атыздардың орны сақталып, жүйе қайта жаңартылуда.
Қалалық тұрғын үй-коммуналдық шаруашылық бөлімі мамандарының айтуынша, орталық көшелерден жиналған жауын суы Қошқар ата мен Қарасу өзендеріне, ал Қорғасын зауыты мен «Самал» шағынауданында жиналған су Бадам өзеніне жіберіледі. Ал «Нұрсәт» пен Әкімшілік-іскерлік орталығынан келген су Дендросаябақ маңындағы арықпен бойлай келіп, «Самал» шатқалына бұрылмақ.
Мекемеге жүктелген міндет мол
Қазіргі таңда тапсырылған міндетті межелі мерзімде орындау үшін «ЛТД-Тұрмыс» ЖШС-нің арнайы жұмыс тобы Жангельдин көшесінің бойында қызу іске кіріскен. Қызметкерлерінің барлығы да өз ісінің шеберлері.
– Соңғы 25-50 жыл аралығында жаңарту жұмыстары жүргізілмеген жүйелер әбден тозғандықтан, тиісті деңгейінде су өткізуге қауқарсыз. Оған қоса, жергілікті тұрғындардың салғырттығынан арық-атыздар күл-қоқысқа жиі-жиі «тұншығып» жатады. Жүйелерді ауыстыру барысында кең тамыр жайып кеткен көше бойындағы емен ағаштар да жұмысымызға айтарлықтай кедергісін келтіруде. Дегенмен, мекеме қызметкерлері өз міндеттерін қыркүйек айының алғашқы күніне дейін толық орындауы тиіс, – дейді «ЛТД-Тұрмыс» ЖШС-нің ирригациялық жүйелер бөлімінің шебері Ербол Катенов.
Аталмыш мекеменің міндетіне кіретін орталық 7 көшенің ирригациялық жүйелері бүгінде аяқталуға таяу. Ондағы жүйелердің жалпы ұзындығы 19 шақырымды құрайды. Бұл жұмыстар үшін 65 қызметкері мен 16 техникасы жұмылдырылған.
Сондай-ақ, «ЛТД-Тұрмыс» ЖШС-і тарапынан Қошқар ата, Қарасу өзендері мен Шымкент, Жаңашек, Ақсай, Қарабастау арналарын тазарту жұмыстары да жүйелі түрде атқарылуда. Ондағы өзен арналарының жалпы ұзындығы 146,3 шақырымды құрайды. Бұдан бөлек, аталмыш мекеме тарапынан ұзындығы 566 шақырымнан асатын арық жүйелерін күтіп ұстау, жаңадан қосылған елді мекендердің аумағындағы каналдар мен ауылшаруашылығы мақсатындағы арықтарды тазалау және су бұру жұмыстары жүргізілуде.
