Жыл басында облыстық ауыл шаруашылығы басқармасы және Шымкент қаласының әкімдігі тарапынан «Даму» бағдарламасы түзілген-ді. Аталған бағдарламада қалалық ауыл шаруашылығы және ветеринария бөліміне қарасты 9 индикаторлық көрсеткіш негізге алынды. Соның бірі қала аумағындағы ауыл шаруашылығының жалпы өнімін 102,7%-ға жеткізу. Қуантарлығы сол, бұл көрсеткіш 2017 жылдың алғашқы 7 айында 107,3%-ға жетті. Яғни, жоспар мерзімінен бұрын артығымен орындалды.
Тамшылатып суарудың жемісі зор
Шымкент қаласының ауыл шаруашылық өнімінің жалпы көлемі 9 045,5 млн теңгені құрап, облыстағы жалпы өнімнің 6,5% үлесін қамтыды. Оның ішінде, 1 373,8 млн теңге егін шаруашылығының, ал 7 671,7 млн теңге мал шаруашылығының өнімі.
«Біз нақты нәтижеге қол жеткізуді көздедік» дейді қалалық ауыл шаруашылығы және ветеринария бөлімінің басшысы Ғ.Құрманбай.
– Биылғы жылдың жоспары бойынша ауыл шаруашылығындағы негізгі капиталға салынған инвестициялардың нақты көлемін 102,0 %-ға жеткізу, тамшылатып суару әдісін 200 гектар жерде ендіру тапсырмасы белгіленген болатын. Дегенмен, жыл толмай жатып, соңғы 7 айда бұл тапсырма артығымен орындалды. Қорытынды мәліметтерге сүйенсек, қаладағы ауыл шаруашылығы саласына салынған инвестиция көлемі 223 336 мың теңгені құрап, өткен жылдың тиісті кезеңімен салыстырғанда инвестиция көлемі 4,1 есеге артқан. Бұл тамшылатып суару тапсырмасын толық орындаудың нәтижесінде қол жеткізген жетістігіміз, – дейді Ғани Тұрысқұлұлы.
200 га жердің 148,91 гектарын қалалық тұрғын үй коммуналдық-шаруашылық бөлімі игерсе, қалған 51,09 га жердегі жылыжай, бау-бақша өнімін тамшылатып суару «Сайрам алма» ӨК, «Қос диірмен» ӨК, «Altyn Tur» ЖШС еншісіне тиген.
Сондай-ақ, жылыжай шаруашылығы бойынша тағы 13 шаруашылық 10,09 гектарға жаңа жылыжайлар құрылысын жүргізді. Ал қала аумағындағы егіс көлемін ұлғайту мақсатында елдімекендерде түсіндіру жұмыстары жүргізіліп, нәтижесінде индикаторлық көрсеткіштегі 30 900 гектарды игеру жұмыстары толығымен орындалды.
Үй іргелік жерлерді игеру тапсырмасы бойынша қалалық статистика басқармасымен бірігіп 9 тұрғын алап халқының 2 300 гектар жерді игергені анықталды.
Мал басын көбейтті
Қала аумағында мал шаруашылығын дамыту мақсатында «Алтын асық», «Сыбаға», «Құлан» атты 3 мемлекеттік бағдарлама іске асырылды.
Жыл басында «Алтын асық» бағдарламасы аясында қала аумағындағы қой басын 309-ға арттыру көзделген. Осыған орай, Абай ауданы Ақтас елдімекеніндегі «Момын» шаруа қожасы кәсібін жандандыру мақсатында өз қаржысы есебінен 401 бас ұсақ мал сатып алды.
Ірі қараның санын да 71 басқа арттыру жоспары «Сыбаға» бағдарламасы аясында жүзеге асты. Бұл салада белсенділік танытқан шаруалар «Интимоқ-7» шаруа қожалығы және «Назыров С.З» жеке кәсіпкерлігі. Ірі қара мал басы бүгінде 189-ға артып отыр.
2017 жылы «Құлан» бағдарламасы аясында «Альтаир», «Култаев» жеке кәсіпкерлігі мен «Асан», «Сейтаев К.Е» шаруа қожалықтары жылқы санын 135-ке арттырып, жоспарда көзделген тапсырманы 2,1 есеге артық орындады.
