Өнер мен ғылым да түркі мәдениетінің басты бөлшегі болып келген. Ұланғайыр даланың ұлы тұлғасы Әбу-насыр Әл Фарабидің отаны Отырар қаласы өркениеттің орталығы болғандығы тарихтан аян. Әлемдегі ең үлкен әрі бай «Александрия» кітапханасы, түркі халықтарының рухани көшбасшысының бірі Қожа Ахмет Яссауидің Түркістан қаласында өмір сүріп, ілім таратқаны да біздің мәдениет көшіндегі ұлы жолымыздың жаңғырығы.
Дүниенің төрт бұрышын керуен көшімен жалғап, сауда қатынасын қалыптастырған «Ұлы Жібек жолы» «ежелден әртүрлі мемлекеттер мен өркениеттер арасында транзиттік «дәліздердің» пайда болуына септігін тигізді». Мақалада айтылған маңызды мәселенің бірі осы. Демек Ұлы даланың өркениет өрісін кеңейтуде өлшеусіз ізі жатқандығын осыдан-ақ аңғаруға болады.
Көркем табиғатымен қатар өсімдік әлемінің неше түрімен мақтана алатын Қазақстанның баурайы қызғалдақпен құлпырып, бөктері алма бауына көмкеріліп тұр. Мақалада «Асқақ Алатаудың баурайы алма мен қызғалдақтың «тарихи отаны» екені ғылыми тұрғыдан дәлелденген. Қарапайым, бірақ бүкіл әлем үшін өзіндік мән-маңызы зор бұл өсімдіктер осы жерде бүр жарып, жер жүзіне таралған» деп көрсетілген.
Еліміздің мәдени тарихы мен жетістіктерін саралап берген бұл мақаланың түйінінде Елбасы жаһандық жаңалықтар мен өзгерістер көшінен қалмаудың қағидатын айқындап, жаңғырудың жолы мен бағытын саралап беріп отыр.
Бану Ордабаева, «Ару аналар» қоғамдық бірлестігінің төрайымы
