Шымкент қаласының әкімдігі тың басқармашылық тәжірибеге өтті. Қала әкімінің орынбасары Данат Жуминнің айтуынша, шаһар басшысы Ғабидолла Әбдірахымов кәсіпкерлермен кездескен. Онда әкімдіктің бес басқармасында пилоттық режимде менеджмент әдісін өзгертуді тапсырды.
– Бұл нені білдіреді? Біріншіден, қала әкімінің орынбасары, яғни - мен және бес басқарма кабинеттік жүйеден алшақтап, ашық кеңселік кеңістікке (open space) өтеміз. Бұдан былай бір-бірімізге жақын орналаса отырып жұмыс істейміз.
Біздің арамызда қабырғалар мен қабылдау бөлімдері, хатшылар мен көмекшілер болмайды. Басшылардың кабинеттері әйнектен болады, - деді Данат Жумин.
Оның жазуынша, алдағы уақытта ашық есік саясаты жүзеге асырылады. 6 хатшының орнына бірыңғай рецепция болады.
– Екіншіден, біз халыққа және оның қажеттілігіне жақындай түсеміз. Есік алдын полиция қызметкерлері күзетпейтін болады. Мейлі кәсіпкер немесе инвестор болсын, қарапайым азамат болсын, ешқандай тексерусіз қабылдайтын боламыз, - дейді ол.
Қала әкімі орынбасарының сөзіне сенсек, «ашық» кеңседе барлық мемлекеттік органдар мен ұйымдардың өкілдері жиналады.
– Үшіншіден, «пилоттық» басқармаларда заманға сай менеджмент тәжірибесін қолданамыз. Ең бірінші кезекте, осы тәжірибе арқылы бірқатар мәселеге назар аударсақ дейміз.
Біріншіден, заманға сай амал-әдістер жергілікті атқарушы органда қаншалықты тиімді болады? Мемлекеттік секторға әлемнің үздік тәжірибелері сіңісіп кете ала ма? Осы сұрақтарға жауап іздейміз, - дейді Данат Жумин.
Эксперимент сәуір айында басталып, жыл соңында аяқталады. «Кейін қорытындысын шығарып, халыққа міндетті түрде хабарлайтын боламыз», - деп түйді Д. Жумин.