ҚР Президенті Қасым-Жомарт Тоқаев әкімдерге халықтың сауалдарына жедел жауап беруді тапсырғалы бері түрлі лауазымдағы мемлекеттік қызметкерлер әлеуметтік желілерге қосылуда.
Шымкент қаласының әкімі басшылық құрамға тұрғындармен тығыз байланыс орнату үшін әлеуметтік желіге тіркеліп, ондағы жұмысты жандандыруды тапсырды.
Ғабидолла Әбдірахымов қызметкерлеріне азаматтардың өтініштерін қабылдауды және оларға жедел жауап беруді, сондай-ақ әкімдік жүргізетін жұмыстар туралы қол жетімді нысанда түсіндіруді тапсырды.
Айта кету керек, бүгінде @akimat.shymkent парақшасы арқылы әкімдікке қатысты жұмыстар жарияланып тұрады. Үшінші мегаполис әкімі бұл бағыттағы жұмыс өзінің жеке бақылауымен күшейтілетінін атап өтті.
Осы ретте қаланың әкімі өзі бас болып, twitter парақшасын қайта жаңартты және Инстаграм желісінде @gabidullaabdrakhimov болып тіркелді.
Бұған қоса қала әкімінің орынбасарлары Бауыржан Мамыталиев, Данат Жумин, Гүлжан Құрманбековалар қостап, 4 аудан әкімі мен басқарма басшыларының да facebook, instagram, twitter әлеуметтік желілерінде парақшалары іске қосылды.