Түрлі этнос жастарының мемлекеттік тілде сөйлеу мәдениетін дамытуды көздеген іс-шара Қазақстан халқы Ассамблеясының «Мен қазақша сөйлеймін» акциясы аясында өтті.
Оған қалалық Ассамблея жанында ашылған мемлекеттік тілді оқып-үйрету курсының оқушылары қатысып, теориялық білімді практика жүзінде қолдану дағдыларын дамытты.
Жастар өзара үш топқа бөлініп, Отан, тіл, достық, бірлік тақырыбында мақал-мәтелдер мен билердің даналық сөздерін айтудан, қара өлең оқудан сынға түсті.
Сондай-ақ, басылымдарда жарияланған мақалалардан үзінді оқып, мемлекеттік тілді қаншалықты меңгергендерін көрсетті.
Байқау барысында қазақтың отыздан астам мақал-мәтелдерін жатқа айтып, Абайдың өлеңдерін оқудан озып шыққан түрік этно-мәдени бірлестігінің мүшесі Сайфиддин Османов үздік деп танылды.
Шымкентте түрлі этнос өкілдеріне арналған мемлекеттік тілді оқып-үйрету курсы ақпан айында жұмысын бастаған. Игі бастаманы қалалық Қазақстан халқы Ассамблеясы мен «Тілдерді оқыту-әдістемелік орталығы» бірлесе жүзеге асыруда.
Арман СӘДУӘЛІ