ҚР денсаулық сақтау министрлігіне қарасты фармация мен қоғамдық денсаулық сақтау комитеттері біріктіріліп, Тауарлар мен көрсетілетін қызметтердің сапасы мен қауіпсіздігін бақылау комитеті болып құрылуда.
Бұл туралы Шымкент қаласы әкімдігінің ақпараттық-коммуникациялық орталығында «Дәрілік препараттарды сату мәселесі» тақырыбында өткен брифингте қалалық қоғамдық денсаулық сақтау департаментінің басшысы Ә.Төлебаев мәлімдеді.
Шымкент қаласы денсаулық сақтау басқармасы, қоғамдық денсаулық сақтау департаменті және Фармация комитетінің Шымкент қаласы бойынша департаменті ұйымдастырған брифингте дәріханаларда дәрілік заттарды рецепт бойынша сату мәселесі түсіндірілді.
– Дәрі-дәрмектердің рецепт бойынша сатылуы маңызды мәселе болып тұр. Дәріні тиімсіз қолданудан адамның денсаулығына зиян келген фактілер кездесуде. 2018 жылы дәріханаларда рецепсіз дәрі сатудың 24 фактісі тіркеліп, шара көрілді.
Заңды бұзғандарға 70-тен бастап 1000 АЕК айыппұл салынады. Әсіресе, тұрғындарға антибиотиктермен емделуде дәрігердің кеңесі мен олар жазып берген рецепт бойынша ем алуға кеңес береміз. Өйткені өз бетімен немесе тамыр-таныстардың айтуымен антибиотикпен емделу қауіпті ауруларға соқтырады, - деді ҚР ДСМ Фармация комитетінің Шымкент қаласы бойынша департаментінің басшысы Л.Қашқымбаева.
Мамандардың айтуынша, елімізде дәрілік заттардың 7 792 атауы тіркелген, оның 6 033-і дәрігердің рецептімен, 1759-ы рецепсіз сатылады.
Айта кетейік, Шымкентте 1180 дәріхана жұмыс істейді. Мамандар дәрілік препараттарды сату бойынша түсіндіру жұмыстары бастап кетті.
