Мемлекет басшысы Қасым-Жомарт Тоқаев «Игілік баршаға! Сабақтастық. Әділдік. Өрлеу» сайлауалды бағдарламасында елде Президенттік кадрлық резервті қалыптастыру қажеттігі туралы мәлімдеген болатын. ҚР Президенті тарапынан елімізде алғаш рет дарынды жастар қатарынан іріктелген азаматтарды басшы лауазымдарға тағайындау мүмкіндігі беріліп отыр. Бұл бастаманың бас үйлестірушісі – ҚР мемлекеттік қызмет істері агенттігі.
Осыған орай 1 қыркүйектен бастап жас қазақстандықтар резервке іріктеуден өтуге және елдегі жоғары мемлекеттік, басқару лауазымдарына тағайындалу мақсатында онлайн платформа арқылы өтінімдерін жолдай бастады.
ҚР Мемлекеттік қызмет істері агенттігінің Шымкент қаласы бойынша департаменті мамандары Арбат демалыс аймағында «Президенттік жастар кадр резервіне» үміткер азаматтарға толық ақпарат ұсына отырып, құжаттарды онлайн платформаға енгізу бойынша көрнекі кеңес берді.
Іріктеу барынша ашық өтеді, оған жасы 35-тен аспаған, жоғары білімі және кемінде 5 жыл жұмыс өтілі бар жас азаматтар қатыса алады.
Резервке қосылуға ынталы азаматтар үшін бірнеше кезеңнен өтуі қажет:
* Кандидаттардың теориялық білімдерін тестілеу;
* Көшбасшылық қасиеттерді, сыни ойлау деңгейін, стратегиялық көзқарасын, үміткерлердің уәждемесі мен құндылықтарын бағалау (эссе жазу, жобаларды таныстыру, сұхбаттан өту және бағалаудың басқа да құралдары);
*ҚР Президенті Әкімшілігінің Сарапшылық комиссиясында әңгімелесу;
* ҚР Президенті жанындағы Кадр саясаты жөніндегі ұлттық комиссияның отырысында қарау.
Департамент басшысы Көмекбаев Әли Амантайұлы болашақ басшы жастармен кездесіп, олардың еліміздің дамуында шешуші рөл ойнайтын және ілгерілеудің қозғаушы күші саналатындарын айтып, пікір алысты.
