Ерекше күтімдегі баланың  анасы инклюзивті бағыттағы сайт ашты

Жуырда «Nur Otan» партиясының Шымкент қалалық филиалында мүмкіндігі шектеулі жандардың мәселелеріне арналған кезекті жиын өтті. «Кедергісіз келешек» бастамасымен өткен бұл басқосуда инклюзивті бағыттағы balatimes.kz порталы көпшілікке таныстырылды.

Сайтты ерекше күтімдегі баланың анасы «Nur Otan» партиясының қолдауымен құрып, жұмысын жалғастыруда. Еліміздегі осындай бағыттағы алғашқы порталда балалардағы неврологиялық дерттердің алғашқы белгілері, оларды емдеу, оңалту орталықтарының мекенжайы, жалпы, ерекше балаларды тәрбиелеу секілді тақырыптар көтерілген. Сондай-ақ, бұл порталда дені сау балғындардың ата-аналарына қажет мәліметтер де жарияланып отырады дейді сайт өкілдері.

balatimes.kz порталының негізін қалаушы Жанель Жұмалинованың айтуынша, бұл қадамға басына түскен жағдайдан кейін барып отыр.

Көптеген қиындықты еңсерген келіншек енді білгенін өзі секілді ата-аналармен бөлісіп, көмектеспек. Осыдан үш жыл бұрын дені сап-сау баласы суық тиіп, ауруханаға жатып қалады. Одан арғы жағдайды Жанель күрсінбей еске ала алмайды.

– Ол кезде ұлым Сұлтан бір жас 3 айда болатын. Ауруханада тамшылатып дәрі салды. Сол-ақ екен, көз алдымда ұлым қимылсыз қалды. Дереу жансақтау бөліміне жатқыздық, - дейді Жанель Жұмалинова. – Содан ауруханадан ұлымның қол-аяғы мүлде қимылсыз күйінде шығарып алдық. Бұл жағдай біз үшін күтпеген соққы еді. Әсіресе, балаң осындай жағдайға душар болғанда не істеріңді білмей қаласың.
Дегенмен, қайсар әйел өзін-өзі қолға алып, ұлын емдетуге кіріседі. Сағат сайын, күн сайын жанынан шықпай, қолдан келген емнің бәрін істейді. Өзі үшін де, ұлы үшін де күреседі.

– Дәрінің барлығын уақтылы қабылдадық. Бөлмелерге препараттарды қабылдайтын, массаж жасайтын уақытты үлкен қағаздарға жазып, іліп қойдым. Барлық оңалту шарасын жіберіп алмай, емін қабылдадық. Тәулігіне 24 сағат, аптасына 7 күнім осылай өтетін. Осындай сәтте жұбайым мен анамның жанымнан табылып, қолдау көрсеткені үлкен демеу болды, - дейді жерлесіміз.

Осылайша тынымсыз күрестің нәтижесінде, арада 3 жылдан астам уақыт өткенде Сұлтан өздігінен жүре бастады. Ал Жанель емдеу және оңалтуды бір сәтке де тоқтатпайды. Ұлының әр қадамы, әр жеңісі туралы әлеуметтік желілерде жазып, өзгелермен бөлісуді қолға алады. Осылайша байланыс артып, WhatsАpp желісінде арнайы топ құрады. Онда өзі секілді 190 ата-ана бар.

– Мен тек әлеуметтік желімен шектелмей, өзім секілді ерекше балалардың ата-аналарына барынша көмектескім келді. Себебі, қиындыққа ұшыраған жанның күйзеліске батып кетуі мүмкін. Сондықтан, сайт құруды ойластырдық. Онда балалардың неврологиялық дертінің алғашқы белгілері туралы жаздық. Қажет мәліметті оқыған аналарда дер кезінде алдын алуға мүмкіндік болады, - дейді сайттың авторы.

Айта кетейік, арнайы сайтта түрлі тақырыптар көтеріледі. Мұнда денсаулыққа күтім жасаудан бастап ерекше балалардың ата-аналарының проблемалары, мүмкіндігінше оларды шешу жолдары қарастырылады.
balatimes.kz сайтын таныстыру барысында ақпараттық портал мен жергілікті атқарушы орган өкілдері арасында ерекше балалардың ата-аналарына қажет мәліметтер ұсыну туралы әріптестік меморандумына қол қойылды. Осылайша білім беру, денсаулық сақтау, әлеуметтік көмек және медициналық комиссиялар алдағы уақытта өздері көрсететін қызмет туралы ақпараттар ұсынып отырмақ.