«ПетроҚазақстан Ойл Продактс» ЖШС-і «Шымкент – қайырымды қала» әлеуметтік қорымен бірлесіп, Covid-19 инфекциясымен күрестің алдыңғы сапында жүрген медициналық ұйымдарға гуманитарлық көмек көрсетті.
Аталмыш компания өкілдері № 2 қалалық ауруханаға қарасты провизорлық стационарға 10 мың медициналық бетперде мен 1000 қорғаныш костюмін тарту етті.
Жұқпалы індетпен күресте ерен еңбек етіп жүрген дәрігерлерге алғысын білдірген серіктестік өкілі Ринат Ақбердиев компания тарапынан алдағы уақытта тағы да қолдау болатынын жеткізді.
Айта кетейік, бүгінде қаладағы провизорлық орталықтарда 3610 төсек-орын болса, оның 260-сы осы №2 қалалық аурханаға қарасты. Бүгінгі таңда мұнда 200 науқас ем қабылдап жатыр. Бұл орталық қажетті дәрі-дәрмектер мен тыныс алу қондырғыларымен толық қамтылған. Қала әкімдігі тарапынан провизорлық стационарға қосымша 6 ИВЛ аппараты жеткізілген болатын.