Среда, 08 Ноябрь 2017 05:41

Айбынды елдің ұланымыз

Биыл 16 мың жас ҚР Қарулы Күштерінің қатарын толықтырмақ

Қазіргі таңда ел аумағындағы қорғаныс істері жөніндегі жергілікті басқармалар қызметінде қарбалас шақ. Себебі, мұнда ел азаматтарын Қазақстанның Қарулы Күштеріне мерзімді әскери қызметке шақыру науқаны белсенді түрде жүріп жатыр. Мерзімді әскери қызметке шақырылушылар Қарулы Күштер қатарын, Ұлттық қауіпсіздік комитетінің Шекара қызметі, Мемлекеттік Күзет және Ішкі істер министрлігінің ұлттық Ұлан гвардиясының қатарын толықтырмақ.


DSC 0762

Күзгі әскерге шақыру науқаны кезінде Шымкент қалалық қорғаныс iстері жөніндегі басқармасынан 400-ге жуық азамат әскер қатарына жолданатын болады. Қазір олардың денсаулықтары тексерілуде. Сонымен қатар, жауынгерлік дайындықтары да пысықталып жатыр.

– Жоғары жауынгерлік дайындық жүргізу – біздің басты қағидамыз. Айбынды әскерді жасақтауда санға емес, сапаға мән беріледі. Дегенмен, әскерге шақырылушылардың ынта-ықыласы аса жоғары, – дейді Шымкент қаласы қорғаныс істері жөніндегі басқармасының басшысы Әбдіғабит Шегебаев.

DSC 0777Айта кететін жайт, азаматтарды Қарулы Күштердегі мерзімді әскери қызметке және өзге де әскери құрылымдарға күзгі шақыру алғаш рет қыркүйекте басталып отыр және бұл жұмыстар желтоқсан айының аяғына дейін жалғаспақ. Науқан мерзімінің 1 айға дейін ұзартылуы медициналық және арнайы тексерулерге кететін уақытпен байланысты болып отыр. Нәтижесінде, 4 ай бойы жергілікті тұрғындарының санына сәйкес бөлінген квота бойынша 18 бен 27 жас аралығындағы азаматтар толық медициналық тексеруден өтеді. Заң бойынша әскерге барудан себепсіз бас тартқандар екі жыл бас бостандығынан айырылады немесе 2 миллион теңгеге дейін айыппұл төлемек. Бұл орайда, шақырылушының қандай да бір мәселеге байланысты сауалы болса, Қорғаныс министрлігінің «жедел желідегі» 9898 (Activ және Kcell абоненттері үшін Қазақстан бойынша тегін) байланыс нөміріне хабарласуына болады. Жауапты лауазымды тұлғалар азаматтардың қызығушылығын тудырған сауалдарына жауап беріп, түсіндіреді. Тіпті, қажетті кеңестерді алуға да болады.

Қалалық Қорғаныс басқармасында арнайы тексерулерден өтіп жатқан жастардың қарасы көп. Әдетте, әскерге шақырылғандар 14 түрлі медициналық тексеруден өтеді. Мамандардың айтуынша, азаматтарды іріктеу барысында салмаққа байланысты түйткілдер көптеп кездеседі екен. Яғни, бірінің салмағы аз болса, келесісі артық салмақтан зардап шегеді. Тепсе темір үзетін жігіттердің ішінде жүрек-қантамыр ауруларына шалдыққандар да жетерлік.

– Көздің нашар көруі, аяқтың жалпақтабандығы, сонымен қатар, терапевтік және хирургиялық аурулар да жиі кездесіп жатыр. Оның барлығын біз тыңғылықты тексеріп жатырмыз, – дейді дәрігер-терапевт Күләндә Қылышбаева.

Бұдан бөлек, болашақ жауынгерлер психологиялық тест тапсырып, олардың суицидке қаншалық бейімділік деңгейі анықталады. Сонымен қатар, шақырылушы зиянды әдеттерден аулақ болуы қажет. Салауатты өмір салтын ұстануы шарт. Демек, еңбекқор, елжанды, отбасылық құндылықтары берік, азаматтық деңгейде ойлайтын адам болуы тиіс. Сол себепті, шақырылушы бұрын есірткі заттарын пайдаланғаны не пайдаланбағаны туралы тестілеуден өтеді. Есірткіге еліктеуі анықталса, онда ол азамат әскерге алынбайды.

shymkala-88-5

Биылғы күзде Қарулы Күштер және Қазақстанның басқа да әскерлері мен әскери құрылымдары қатарына 1990-1999 жылдары туған 16 мың жасөспірім әскери міндеттерін өтеуге шақырылады деп жоспарлануда. Ал жауынгерлік парызын өтеуден тек отбасылы болып, 1 баланың әкесі атанғандар мен жасы 27-ден асқандар ғана босатылады. ЖОО-да әскери кафедра бітіргендер мен ақылы әскери мектепті тәмамдағандар сарбаздық міндетін атқарған болып есептеледі.

Қалыптасқан үрдіске сай, шақырылушы әскери қызметін өтеу үшін алыс қашықтағы аймаққа жіберіледі. Әскер қатарын толықтыратын жас азаматтарды іріктеу және әскери бөлімдерге тарату кезінде олардың шақырылымға дейінгі алған мамандықтары ескеріледі. Бұл ретте, әскерге шақырылушының дені сау, бойы 160 сантиметрден төмен болмауы тиіс.

 

zhomart-1Жомарт НЫСАНБАЕВ,
әскер қатарына шақырылушы:

Әскери борышты өтеу – азаматтық парызым

– Дені сау, қажырлы азамат ретінде, мен де әскери борышымды өтеуге ниеттімін. Бүгінгі Қазақстанның әскері – қуатты, кемелденген, озық үлгідегі ұрыс қаруларымен жабдықталғанын естіп, біліп те жүрміз. Батырлығымен даңқы алысқа ұзаған ата-бабаларымыздың жолын қуып, бүгінгі бейбіт күнде шекара шебінің үздік қорғаушысы болғым келеді. Бойымда жастық жігерім, асқақ мұратым барда ел дамуына өз үлесімді қосуды қалаймын. Отан алдындағы борышты өтеуді әр азамат парызым деп түсінгені жөн.

Опубликовано в Қоғам

Оңтүстік өңірі әскери құрылымдарға, әскери қызметтерге азаматтарды шақыру бойынша ел аумағында үздік үштіктің қатарына енеді. Қазіргі уақытта жазғы оқу кезеңіне өткен әскери құрылымдар қызметінде оқу-жаттығу жиындары жаңа бағытта жүргізілуде. Осы орайда, Шымкент қаласы қорғаныс істері жөніндегі басқармасының басшысы, полковник Әбдіғабит Шегебаевпен сұхбаттасудың сәті түскен еді.

122

– Әскерге шақырылушылар Отан алдындағы парызын өтеуге қаншалықты дайын? Жастардың белсенділігі мен денсаулығының жарамдылық көрсеткішін қалай бағамдауға болады?

– Отан алдындағы борышын өтеуі тиіс жастардың денсаулығы жарамды, жарамсыз деп медициналық сараптама комиссиясының төрағасы анықтай алады. Облыстық Қорғаныс істері жөніндегі департаментінен біздің басқармаға жыл сайын қанша жасты әскерге жіберу туралы сұраныс келеді. Сол сұранысқа байланысты басқарма жұмыс атқарады, оның ішінде Қарулы күштер, Шекара қызметі, Ұлттық гвардия, Мемлекеттік күзет қызметі бар. Қалалық қорғаныс істері жөніндегі басқарма жастардың денсаулықтарына қарай отырып, осының бәріне сұраныс бойынша жібереді. Шымкент қаласы бүгінде үшінші мегаполис, республикадағы үлкен қалалардың бірі. Сол себепті, біздерге жүктелер талап та қатаң. Нағыз шыныққан, денсаулығы мықты, жан-жақты сауатты, спортпен шұғылданған жігіттер іріктеледі. ҚР Қорғаныс министрлігінің 96-шы бұйрығына сәйкес бізде әскерге шақыру комиссиясы жұмыс істейді. Елбасының өкімі, облыс, қала әкімінің қаулысы шыққаннан кейін әскер қатарына шақыру басталады. Медициналық сараптамадан өткіземіз. Кейбір жастар өткір, сауатты болғанымен денсаулығы жарамсыз болып шығады. Көз аурулары, сосын салмақ өлшемі жетіспеушілігі, одан кейін майтабан аурулары көп. Аға дәрігер бәрін қадағалап өткізеді. Жарамды болса облыстық медкомиссиядан өткеннен кейін ғана қай әскер түріне баратыны нақтыланады. Жастар психолог мамандардың сүзгісінен өтеді. Дегенмен, айта кету керек, жастардың басым бөлігі моральдық жағынан дайын болмай шығады. Психолог оның ішкі жан дүниесіне кірігіп, бәрін білуі керек. Суицид мәселесін жоққа шығара алмаймыз. Бәрін қадағалайтын мамант – психолог. Қорғаныс істері жөніндегі департаментте де, қалалық қорғаныс істері басқармасында да, әскери бөлімде де арнайы психолог штаты бөлінген. Шақырылым кезінде осылардың бәрі біріге жұмыс істейді. 

33

– Әскер қатарына шақырылушыларды медициналық сараптамадан өткізетін медицина мамандарының біліктілігі қандай?

– Арнайы өзінің санаттары бар. Медкомиссияның құрамындағы мүшелер облыстық денсаулық сақтау басқармасына қарайтын мекемелерден келеді. Басқармамызда жұмыс істеп жатқан дәрігерлердің тәжірибесі мол. 15-20 жылдан бері жұмыс атқарып келе жатқан тәжірибелі мамандар. Жоғары санатты, бірінші санаттағылар. Әр сатылы сұрыптаудан өткен жастар әскер қатарына кеткен кезде дәрігерлер бәріне жауап береді. Қандай да бір ақаумен, денасаулығында кінәраты болып баланы қайтаратын болса, оған қаншама шығын кетеді. Соның бәріне дәрігерлер жауапты. Медициналық сараптамадан қалай өтіп жатқанын соның бәрі тексеріледі. Егер қандай да бір кінәрат табылса заң шеңберінде бізге де жауап беруге тура келеді. 

Әскери бөлімдердегі командирдің тәрбие ісі жөніндегі орынбасарларына артылар жүк ауыр. Әскери бөлімде де өздерінің психологтары, дәрігерлері бар. Бұрынғыдай емес, қазір қанша сұраныс болса да, сапаға көп көңіл бөлінеді. Әскер қатарына шақырылушы жан-жақты болуы керек. Ата заңымыздың 36-шы бабында «Отанды қорғау – әр азаматтың парызы» деп көрсетілген. Алдын ала үгіт насихат жұмыстары жүргізіледі. Шақырылушылар көп, барамын деп тілек білдірушілер одан да көп. Бірақ соның ішінде көбісінің денсаулығы нашар, сол жағынан ақсап жатады. Жоғары оқу орнында оқитындар оқуын бітіргенше әскери кафедрада білім алады. Олар да қорғаныс істері жөніндегі басқарманың сүзгісінен өткеннен кейін ғана әскери кафедраға түсе алады. 18 бен 27 жас аралығындағы жастарды жылына екі рет шақырамыз. Көктемгі және күзгі шақырылушылар. Одан бөлек жасы 22 мен 27 жас аралығындағы жоғары білімді, орта арнауы оқу орнын бітіргендер әскери техникалық мектепке жіберіледі. Медкомиссия мүшелерінің, психологтың сараптауынан, одан кейін тестілеуден өтеді. Жарамдылығы анықталса, айлық курстарға жібереміз.

– Жасөспірімдер арасында әскери қызметке ынталандыруға қаншалықты көңіл бөлінеді?

– Әскери патриоттық тәрбиені кешенді жүргізіп, оны мектеп оқушыларына кеңінен насихаттау және жасөспірімнің бойына сіңіру – қазіргі уақыттың талабы. Жас ұрпақты отансүйгіштікке тәрбиелеу мақсатында қала мектептерінде «Ерлік сабағын» жүйелі түрде өткізіп тұрамыз. Сол сабақтардың аясында Қарулы Күштердің бүгінгі жағдайы, бағдары, келешегі түсіндіріледі. Нәтижесінде, келешекте әскерге барғысы келетінін айтып, ниет танытқан жасөспірімдердің қатары да арта түсуде. 

– Әңгімеңізге рахмет!

Опубликовано в Сұхбат

Кинолог мамандардың жұмысы – ит асырап, қызметке үйрету. Қарлы-боран, жауын-шашында итті ізге салып, жоғалғанды табу оңай емес. Әрі күн-түн демей, азаматтардың қауіпсіздігін, тұрғындардың тыныштығын қамтамасыз етуде кинологтардың біз білмейтін қырлары көп. ОҚО төтенше жағдайлар департаментінің жедел құтқару жасағының құтқарушы кинологы Рахымжан Сатылхановтан осы кәсіптің қызығы мен қиындығына қанықтық.

DSC 0845

Рахымжанды жедел құтқару жасағынан жолықтырдым. Ол: «Менің нағыз досым – Қайсар» – дейді, итін тордан босатып жатып. Кинолог жігіттің мұнда қызметке келгеніне көп болмапты. Оның итке қызығушылығы Ақтауда әскерде жүргенде-ақ байқалады. Рахымжан шекара қызметінде итпен жұмыс істейді. Кейін келісім-шартпен Шығыс Қазақстандағы Курчатов қаласында 35/14 әскери бөлімінде қызмет етіп жүргенінде овчарканы асырапты. 

Рахымжан күшігіне Қайсар деп ат қояды. Сөйтіп итпен бірге әскери бөлімде екі жыл қызмет атқарады. Кейін Алматыда ІІМ-нің кинология орталығындағы із кесу бағыты бойынша білімін жетілдіреді. Қайсар күшік кезінен алғырлығын байқатады. Курчатов қаласында овчарка пәтер тонаған ұрыны ұстап береді. Апат кезінде үйінді астында қалған адамды құтқарады. Өткен жылы Шығыс Қазақстан бойынша өңірлік кинологтар арасында өткен сайыста Қайсар үздік атанады. 

DSC 0876

Ит Рахымжанға қарап, құйрығын бұлғаңдатып қояды. Иесі досының басынан еркелете сипады. Неміс овчаркасының жасы 3-те. Өте зерек, батыл, әрі шыдамды ит. Бұл овчарка қазақша үйретілген. Рахымжан онымен адаммен сөйлескендей қазақша тіл қатса, Қайсар оның айтқанын мүлтіксіз орындайды.

Бұл мамандықты өзім таңдадым. Ел тыныштығы мен қауіпсіздігі үшін қызмет ететініме қуанамын. Мен үшін Отаннан ыстық ұғым жоқ. Өйткені Қазақстанның әрбір ер азаматы елінің тірегі, – дейді кинолог жігіт. 

DSC 0864Биыл ҚР Қарулы Күштеріне – 25 жыл. Осыдан ширек ғасыр бұрын, яғни 1992 жылы 7 мамырда ҚР Президенті Нұрсұлтан Назарбаевтың «Қазақстан Республикасының Қарулы Күштерін құру туралы» Жарлығына сай дербес әскеріміз құрылды.

Құтқарушылар жасағында 3 кинолог жұмыс істейді. Қазір жасақта неміс овчаркасынан бөлек, лавродор Рой мен Жасмин бар. Үш ит те епті. Олар – үйіндінің арасынан адам іздегенде немесе елсіз жерде кісі жоғалып кеткенде таптырмас көмекші. 

Рахымжан кинологтармен бірге жаттығуларға жиі шығады. Күн сайын иттердің қызметке дайындығын пысықтайды. Жуырда иттер сынақ тапсырады. Бұл ең алдымен олардың дағдыларын мықтап қалыптастыруы, апаттық жағдайда жақсы жұмыс істеуі үшін қажет.

Опубликовано в Әлеумет

Соңғы жылдары Қазақстан Қарулы күштерінің қатары білікті мамандармен толықты. Әскери бөлімдердің соңғы үлгідегі техникамен жарақтандырылуы, әр түрлі қажетті құралдармен қамтамасыз етілуі жоғары деңгейде. ҚР Парламент Сенатының Халықаралық қатынастар, қорғаныс және қауіпсіздік комитетінің төрайымы Дариға Назарбаева бастаған комитет мүшелері өңірімізге келген екі күндік жұмыс сапарында осыған көз жеткізді. Алдағы уақытта әскерилердің әлеуметтік жағдайы да жақсара бермек.

DSC 1780

Сенат депутаттары Дариға Назарбаева, Икрам Адырбеков, Мұхтар Алтынбаев, Серік Жақсыбеков, Ләззат Қиынов және Георгий Ким сапар барысында өңірдегі Әуе қорғанысы күштерінің әскери бөлімдері, Ұлттық ұлан және Шекара қызметі бөлімшелерінің жауынгерлік әзірлігі мәселелерін зерделеуді мақсат еткен. 

Алдымен, сенаторлар Қазақстан Қарулы Күштерінің Шымкент гарнизонында болып, жеке құрамның күнделікті тыныс-тіршілігімен танысты. Сонымен қатар, авиациялық базаның әскери бөлімдеріндегі жауынгерлік кезекшіліктің ұйымдастырылуын, Су-25, МиГ-29 ұшақтары мен Ми-17, Ми-171Ш және Ми-35М тікұшақтары тұрған әуе шабуылына қарсы қорғаныс әскерлерін көріп шықты. Радиотехникалық және зениттік зымыран бөлімшелері мен әскери авиация экипаждарының жауынгерлік мүмкіндіктерін де тамашалады. 

DSC 1863

Одан кейін делегаттар ҚР Ұлттық ұланы «Оңтүстік» өңірлік қолбасшылығының Шымкент қаласындағы 6506 әскери бөлімінде болды. Онда «Оңтүстік» өңірлік қолбасшылығының қолбасшысы, генерал-майор Қайрат Ақтанов депутаттарды әскери бөлімнің жауынгерлік қызметі мен әскердің жеке құрамына жүктелген құқық қорғау міндеттерін, қару-жарақ пен қорғаныс құралдарының жаңа үлгілерімен таныстырып, сондай-ақ, әскери құрылымды одан әрі дамытудағы келешекте атқарылатын істерден хабардар етті. 

Сондай-ақ, сенаторлар ішкі әскердің 1995 жылы тәжік-ауған шекарасында қаза тапқан жаужүрек 17 жауынгердің ескерткішіне гүл шоғын қойып, тағзым етті. «Жас бүркіт» әскери-патриоттық клубының жауынгерлік әдіс-тәсілдері де халық қалаулыларының көңілінен шықты. 

DSC 1726

– «Оңтүстік» бағыт – өте маңызды. Террористік қауіптің алдын алу, шекарамызды күшейту сынды жағдай баса назарда тұрғанын білесіздер. Сол себептен, бүгінгі әскери қорғанысымыздың, шекарашылардың, басқа да әскери құрылымдардың атқарып жатқан жұмыстарының деңгейін білуіміз керек. Әскерилердің қазіргі заман талабына сай қажетті құрал-жабдықтармен қамтылуына жоғары баға беруге болады. Әсіресе, кадрлар мәселесінің уақыт сәтімен шешімін табуы қуантады. Офицерлер өте тәжірибелі. Өздерінің мамандықтарын меңгерген, – деді Сенат депутаты Икрам Адырбеков. 

Бұл саладағы негізгі мәселелердің бірі – әскерлердің әлеуметтік жағдайы. Сенаторлар осы жағдайды терең зерттемек. 

DSC 2112

И.Адырбековтың айтуынша, Отан қорғаушылардың баспана, жалақы мәселесі, басқа да әлеуметтік қосымша төлемдеріне байланысты сауал болса, ол мәселе тиісті органдарға жеткізілмек. 

Жұмысшы топ екі күндік сапар барысында Сабыр Рахымов атындағы «Жас ұлан» республикалық әскери мектебі және Оңтүстік Қазақстан аумағындағы кедендік бекеттердің жұмысымен танысуды жоспарлап отыр. Сарыағаш ауданындағы әскери бөлімде комитеттің жылжымалы отырысы өтпек.

Опубликовано в Саясат
Пятница, 03 Март 2017 06:02

Қариялардың батасын алды

«Әжелер дәмі». Осындай атаумен Шымкент қаласындағы 65/06 әскери бөлімінде «Алғыс айту» күніне арналған шара өтті.

IMG 7644-02-03-17-10-35

Қалалық ардагерлер кеңесі мен әжелер алқасы ұйымдастырған мерекелік басқосудың мақсаты – әскерде борышын өтеп жүрген азаматтарға алғыс айтып, ауылдағы әжелердің тағамдарынан дәм татқызу.

– Біз жыл сайын атаулы күндерге байланысты түрлі шаралар өткіземіз. Алғыс күніне орай жас сарбаздармен кездесіп, ауылдағы әжелердің тағамының дәмін сағынып жүрген сарбаздардың көңілін көтеріп, сергіту үшін осындай жиын ұйымдастырдық, – дейді қалалық ардагерлер кеңесі төрағасының орынбасары Әбдіманап Ақмолда. 

Сарбаздар әжелер алып келген құрт, талқан, ет тамақ, тары секілді ұлттық тағамдардан дәм татты. Сонымен қатар, әжелер мен әскери бөлім қызметкерлері түрлі аспаптарда ән айтып, би биледі. Ардагерлер әскерде болған кездерінен сыр шертіп, ақ баталарын берді.

Опубликовано в Мәдениет
Среда, 02 Ноябрь 2016 05:24

Ерен ерлікке – құрмет

Облыс әкімі Ж. Түймебаев ОҚО ТЖД «Жедел құтқару жасағы» мемлекеттік мекемесінің құтқару бөлімшесінің бас құтқарушысы болған Жомарт Сәрсенбековтың отбасына жаңа үйдің кілтін табыстады.

baspana 87

Еске сала кетсек, осы жылдың 30 мамырында Төлеби ауданының Сайрам-Өгем тау жотасындағы «Ақмешіт» тау шатқалында ОҚО төтенше жағдайлар департаментінің бас құтқарушысы болған Жомарт Орынбасарұлы құтқару жұмыстарын жүргізу барысында биіктігі 100 м шамасындағы жартасты тік жардан құлап кетіп, мерт болған болатын. 

Марқұмның шаңырағында болған кездесуде Ж.Қансейітұлы төтенше жағдай қызметкерінің бұл әрекетін ерлікке балап, жаңа үйге көрімдік ретінде тұрмыстық техникалар сыйлады. Кәсіпкер демеушілер мен төтенше жағдай қызметкерлері сынды қайырымды азаматтардың атсалысуымен тұрғызылған үй бес бөлмелі. 

Аймақ басшысы Ж.Сәрсенбековтың артында қалған жұбайы Ұлжанға ендігі кезекте бекем болып, ұл-қыздарын жетілдіруде қайсар да қайратты болуы қажеттігін жеткізді.

Опубликовано в Қоғам
Пятница, 28 Октябрь 2016 06:37

Әскерде болу мерзімі – бір жыл

Елімізде Отан алдындағы борышты өтеу мерзімі ұзартылмайтын болды. Бұл туралы ҚР Қорғаныс министрі Сәкен Жасұзақов Парламент мәжілісінің жалпы отырысында мәлімдеді.

1335357601 soldaty

– Қазір жігіттер әскерде 1 жыл болады. Осы жеткілікті, оны өзгертудің қажеті жоқ деп санаймыз. Жалпы, әскерилердің 70 пайызы келісім-шартпен жұмыс істеп жүргендер. Қарулы күштер сапында 18 мыңнан астам офицер бар, – деді Қорғаныс министрі.
Айта кету керек, биыл еліміз бойынша 30 мың ер азамат әскер қатарына шақырылған.

Опубликовано в Қоғам
Пятница, 07 Октябрь 2016 07:35

Сертіне адал сардар

Ербол Отарбаев Шымкент қаласындағы ҚР Ұлттық ұланы «Оңтүстік» өңірлік қолбасшылығына қарасты 6698 әскери бөлімінде қызмет атқарады 

...Сол күнгі оқиға әлі есінен кетпейді. Мұздай қаруланған қылмыскерлермен бетпе-бет келіп, оның екеуін жайратып салуы, өзінің де жарақаттанып, алты ай госпитальда жатқаны...
Міне, осы оқиғадан кейін Отанға адал болу керектігін одан әрі тереңірек түсінеді: шыңдала түсті, білім-біліктілігін арттырды. Ербол Отарбаев бүгінде лейтенант шенінде. Тәуелсіздіктің төл құрдасы абыройлы қызмет етіп келеді.

Елбасымен екі рет кездесті

a7b2c64b72ab0d97c8eb157f744aed53 XL

Еліне қалқан болар сарбаздардың барына қуанасыз. 2010 жылы маусымның 22-де Ақтау колониясынан қашпақ болған 21 сотталушының жолын кескен қатардағы жауынгер Ербол Отарбаевтың ерлігі ел жадында. Жауынгерлік борышын атқару кезінде көрсеткен ерлігі үшін Елбасы Жарлығымен ІІІ дәрежелі «Айбын» орденімен марапатталған еді. Ол кезде Ақтауда № 6656 әскери бөлімінде Отан алдындағы борышын өтеп жүрген. Небәрі 19 жасар жігіттің ерлігі ел ішіне тарап кетіп еді...
Ол күнгі оқиға әлі көз алдында. Таңғы сағат 5-терде бір топ қылмыскер түзету мекемесінен қашпаққа әрекеттенеді. Ербол сол түні күзетте тұрған. Жарықты сөндіріп, қараңғылықты пайдаланбақ болған тұтқындарға қарсы оқ атады, өзі де иығынан жараланады. Бірнеше оқ атып, үшеуін қолға түсірді. Екеуі сол жерде көз жұмса, біреуі сол жерде жарақаттанады. Бытыра оғы өкпенің 25 пайызын тесіп өтіпті. Содан 4 күннен кейін есін жинаған.

444444444444444Елбасы 2010 жылы 15 желтоқсанда Ақордада Тәуелсіздік күніне орай бірнеше азаматты марапаттады. Солардың арасында генерал-лейтенант, генерал-майор, полковник, шенді әскерилермен бірге қатардағы жауынгер Ербол Отарбаев та болды.
Президент жас жауынгерге үшінші дәрежелі «Айбын» орденін табыс етті.
– Елбасымен кездесер сәтте қатты толқыдым, – дейді бүгінгінің батыры өткенді еске түсіріп. – Елбасы: «Құтты болсын. Ары қарай қызметіңді жалғастыра бер» деді. Сол сөз маған күш-қуат берді! Елбасыны көргенде бар қиындықты ұмытып, ауруымнан құлан таза айыққандай күй кештім.
Ол кезде екінші топтағы мүгедек-тін. Астанадағы әскери госпитальде алты ай емделіп шыққан. Медицина қызметкерлері қызметті жалғастыра алмайсың деп, үмітін үзгендей етіпті. Бірақ, ішкі түйсігі қызметке қайта оралатынына сенген.
Содан не керек, қызметті жалғастырмаққа бел буды. 2011 жылы келісім-шарт бойынша Шымкенттегі 6506 әскери бөлімінде бас маман болып қызметке орналасады. Ал осы жылы қыркүйек айында Петропавлдағы ҚР Ұлттық ұланының Әскери институтына оқуға аттанды. Әскери оқу орнын 2015 жылы абыроймен бітіріп шықты.
Бұл жолы да Елбасының қолынан лейтенант атағын алғаны одан әрі қанаттандырады. Елбасы 5 шілде күні Астана күніне орай өткен шарада жоғары әскери оқу орындарын үздік бітірген 12 сарбазға лейтенант әскери шенін табыс етті.
Е. Отарбаев міне, содан бері ҚР Ұлттық ұланы «Оңтүстік» өңірлік қолбасшылығына қарасты 6698 әскери бөлімінде рота командирінің тәрбие жұмыстары жөніндегі орынбасары қызметін атқарып жүр. Мұндағы міндеті – сарбаздардың тәрбиесіне тікелей жауап беру. Сарбаздың көңіл күйін, қиындықтарын, мұқтаждықтарын түсіну, қолдан келгенше көмектесуге жауапты.

Әскери тәрбиені көріп өсті...

Ербол жастайынан әскери жауынгер болуға құмартады. Бар қызығы, атасының ордендерін тағып алып, «мен қашан әскерге барамын», «қашан осындай медаль аламын» дейтін көрінеді. Мұны үнемі әжесі айтып отырады. Отарбайдан тараған 4 атасы да Ұлы Отан соғысына қатысқан. Екеуі соғыста із-түссіз жоғалған. Екеуі елге абыроймен оралған. Ал өзінің әкесі де әскери борышын 1978 жылы Хорватияда өтеген.
Бауырлары да осы саладан алысқа ұзай қойған жоқ. Үйдегі тәрбиенің әсері шығар. Үлкен ағасы Ақтөбеде Ішкі істер министрлігінде оқыса, одан кейінгі ағасы Сарыөзекте әскери міндетін өтеп қайтты. Екі ағасының ізінен еріп, 2009 жылы өзі әскерге аттанды. Үйдегі тәрбиенің ықпалы ақыры осы салаға мойнын бұрғандай...
Бүгінде ағасы Ерлан Шымкенттегі 6506 әскери бөлімде кинолог болып қызмет атқарса, ал Арман ұстаздық қызметте.
Антына адал жауынгер Қазығұрт ауданы Еңбекші ауылында туып өскен. Әкесі Есілбай – жеке кәсіпкер. Анасы – Күлайша Әбдікерімқызы үй шаруашылығында.

Қазақстан әскері ешбір елден кем емес

708c0124-c2ba-4956-b073-40c7d0101a0e

Әскери борышын өтеуге келген сарбаздарды отансүйгіштікке баулу, тарихын білуге, дәстүрін сақтауға тәрбиелеу – жауапты міндет. Әскери өмірге жаңадан қадам басқан сарбаздардан тарихта ата-бабаларымыз қандай ерлік жасағанын, Қазақ хандығының қалай құрылғанын, тарихтағы маңызды оқиғаларды сұрап шығатыны да сол себептен.
– Әскерге сарбаздар бізге аманат ретінде келеді. «Бір адам ішінен дара туады. Ал біреуі өмірді келе, көре ұғады» дегендей ғой. Әрқайсысы өзінің қателіктерінен сабақ алып, шыңдалады. Бүгінде қатардағы жауынгерлердің арасында нағыз азаматтар бар. Біздің берген насихатымыз құлағына жетсе, міне, соларды Отан қорғайтын азамат деп айтуға болады, – дейді өзі.
Қазақстан әскерінің қуаты жылдан-жылға артып келеді. Ресей, Қытай, Түркия, Беларусь елдерімен жауынгерлік, техникалық оқу-жаттығулар ұдайы жүргізіледі. Сол себептен де біздің әскеріміз ешкімнен кем емес.
Батыр ұл осылай ой сабақтады. «Малым жанымның садақасы, жаным арымның садақасы» деген ұранды ұлағат тұтқан.
– Қазақ бұрыннан батыр, дана халық. Жер көлемі бойынша дүниежүзінде тоғызыншы орын алады. Бабаларымыз осындай байтақ жерді ақ найзаның ұшымен, білектің күшімен қорғаған. Қазіргі жастар соны жақсы түсінеді деп ойлаймын, – дейді батыр ұл.
Иә, еліне қалқан болар сардарлар баршылық. Бүгінгінің батыр ұлдары осындай. 2015 жылы сәуір айында «Айтуға оңай» бағдарламасында да Ербол Отарбаевтың ерліктері баян етілген-ді. ҚР Ұлттық ұланының сардарларын дәріптеуді мақсат еткен бағдарламада.
Бұдан бөлек, еліміздің оқу орындарында шәкірттерге ержүрек сарбаз Отарбаев жайлы түсiрiлген фильм де көрсетіліп жүр.
«Еліңді сүйсең, ерлік істейсің» деген. Тәуелсіздіктің құрдасымен болған әңгімеміз осылайша өрбіді. Ширек ғасырда осындай жетістікке жеткен елімізді одан әрі тұғырлы ету өзі секілді азаматтардың қолында екенін ұғынғанына тәнті болдық.

Опубликовано в Қоғам
Среда, 28 Сентябрь 2016 05:54

Ұлттық ұлан – ұлт ұстыны

ОЛАР ҚАЛА ТЫНЫШТЫҒЫН КҮЗЕТЕДІ

Жарыс, той, мереке, байқау, түрлі іс-шара мен басқа да жиындарды жоғары деңгейде өткізуде, ұйымдастырушылық қызметтерінде біздің өңір қашанда үздік. Осындай шаралардың өз деңгейінде өтуіне  Шымкент қаласындағы ҚР Ұлттық Ұланының 6506 әскери бөлімі жауынгерлері де үлес қосып келеді. Себебі, мұндай кезде олардың тапсырмасы еселене түседі. Олар кімдерді қорғайды? Нендей жағдайдың алдын алады?

20160915 155239Осы мақсатта азаматтардың құқығын қорғап, қауіпсіздігін қамтамасыз ететін 6506 әскери бөлімі жауынгерлерінің жұмысымен жақынырақ таныстық.
Сіз бен біз жұмысқа барып-келіп, үйде тамақтанып, тынығып, саялы орындарда серуендеп жүргенде олар күн-түн демей қала тыныштығын күзетеді. «Атаның баласы болмай, адамның баласы болу» деген осы болса керек. Жауынгерлер темір тәртіпке бейімделген жандар.

Ұйқысынан тұрып жаттығуға кірісетін сарбаздар әрдайым шымырлығын шыңдап отыруға үйренген.

Таңғы астан кейін жауынгерлер тәрбиелік және нұсқамалық сабақтарына қатысады. Тәрбиелік сабақтарда сарбаздар қызмет барысында қала тұрғындарымен, қаладағы заң бұзушы азаматтармен қандай қарым-қатынаста болуды, сондай-ақ өздерінің құқықтарымен және міндеттерімен танысады. Әскери қызметтің құндылығы мен жауапкершілігін сезіндіре отырып, әрбір жауынгерді отансүйгіштікке баулу сағаттары да осында жүреді. Ал нұсқамалық сабақтарда Ұлттық Ұлан жауынгерлерінің қызметке дайындығы тексеріледі. Бұл – теориялық және практикалық бағытта өрбиді. Теориялық нұсқаулық сабақта заң бұзушылық әрекеттері болып табылатын ҚР Әкімшілік құқық бұзушылық кодексінің және ҚР Қылмыстық кодексінің баптары айтылады. Ал практикалық нұсқаулық сабағында сарбаздар дене шынықтырады. Өзін-өзі қорғауға жаттығады. Заң бұзу, қылмыс жасаумен шектелмей қарсылық білдірген азаматтарды құрықтау кезінде қолданатын әрекеттерді үйренеді. Бұдан басқа заң бұзушыны құрықтаған соң құжат рәсімдеу, оны ІІД қызметкерлеріне тапсыру сынды жұмыстар төңірегінде де өрбиді.

Сіз көшеде үш-үшеуден жүріп отыратын сарбаздарды күнде көресіз. Бірақ, сол әрбір үш сарбаздың бір маршрут екенін білмеуіңіз мүмкін. Осы маршруттың жұмыстары толығымен реттелген әрі уақыты санаулы. Бұл туралы 6506 әскери бөлімінің 5 жедел мақсаттағы рота командирінің нұсқаулық сабақтарынан білдік.

20160915 144037

– Қызметке шыққанға дейін жауынгерлерді жасақтап, пысықтаймыз. Бізден бұрын кезекшілікке шыққан немесе бір күн алдын орын алған оқиғаларды сараптаймыз. Егер қатаң бақылауды қажет ететін нүктелер анықталса, маңыздылығына қарай сол маңайға жауынгерлерді көбірек шоғырландырамыз. Кең көлемдегі іс-шаралар өткізу барысында да халық көптеп жиналатын орындарға жауынгерлер әдеттегіден артық бөлінеді, – дейді капитан Дархан Нұрмағанбетов.

20160915 144255

Оқу-жаттығу сабақтарынан кейін Ұлттық Ұланның 5 жедел мақсаттағы рота жауынгерлері сартылдата сап түзеп түскі асқа бет алды. Сарбаздардың тәртіппен қозғалып, тік жүргені көрген жанды тәнті етеді. Олар бұдан кейін кезекшілікке түседі. Қызмет – қала көшелеріндегі жауапты қызметке оларды өз маршруттары бойынша орналастырудан басталады.

Бекасыл ЖҰРЫНБАЕВ,
6506 Әскери бөлімінде тәрбие саласының офицері, капитан:

– Биылғы жылдың 8 айлық есебіне сүйенсек, Ұлттық Ұланның 6506 әскери бөлімі жеке құрамының қатысуымен 51 қылмыстық іс ашылды. Жауынгерлеріміз 2781 әкімшілік-құқықбұзушылық істердің алдын алды. Жол-көлік оқиғаларынан құтқару, адасқан, жоғалған жандарды отбасымен қауыштыру сияқты 35 үлгілі қызметтер көрсетті. Сондай-ақ, 6506 әскери бөлімінің жауынгерлері Мақтаарал ауданында 30, Жамбыл облысы, Бурыл ауылында 14 қызметтік міндеттерді орындаған.

20160915 145850Нұрлыбек ӘБІШ,
6506 әскери бөлімі, 5 жедел мақсаттағы ротаның қатардағы жауынгері:

 – Қызылорда қаласында 1995 жылы дүниеге келдім. 
Жақында ғана шағынаудандардың бірінде 3 жасар қыздың ата-анасынан адасып қалғанын анықтадық. Шошына жылаған қызды алдымен жұбатып, сөзге тарттық. Оның үстіндегі киімі мен өзге де белгілерін басқа бақылау нүктелерінде тұрған жауынгерлерге хабарладық. Біршама уақыт өткенде қызын іздеген ата-ананы да тауып алдық. Олар баланы далаға ойнауға жіберген екен. Қыз баланы ата-анасына тапсырып, қызметімізді қайта жалғастырдық. Елдің бақытты өмір сүруі үшін тер төгіп жүргеніме қуанамын. Әскери қызмет – мен үшін мақтанып айтуға лайықты абыройлы қызмет!

20160915 150317Алексей ШАПОВАЛ,
6506 әскери бөлімі, 5 жедел мақсаттағы
ротаның жауынгері, ефрейтор:

– Ақмола облысы, Көкшетау қаласынан келіп, Шымкентте әскери борышымды өтеп жүргеніме жылдан аса уақыт өтті. Қоғамдық тәртіпті бақылау барысында күнде қызметке шығамыз. Түрлі жайсыздықтар мен қақтығыстың алдын алудағы еңбегімді бағалаған басшылар ефрейтор әскери шенін берді. Біз осы Шымкент қаласының тыныштығын сақтау жолында аянып қалмаймыз. Әскери өміріммен тығыз байланысты Шымкентте қала күні аталып өтуде. Айтулы мерекемен қала тұрғындарын құттықтаймын. Әрқашан елімізде тыныштық, татулық орнасын, көк Туымыз көгімізде желбірей берсін.

Опубликовано в Әлеумет

Баспасөз хатшысы – өз мекемесі туралы оң пікір қалыптастыратын маман. Сонымен қатар, қалам ұстаған журналистер қауымының әр саладағы ақпараттарды дер кезінде халыққа жеткізуіне бірден-бір ықпал ететін көмекшісі. 28 маусым – байланыс және ақпарат қызметкерлерінің төл мерекесі қарсаңында ОҚО ІІД Мемлекеттік тіл және ақпарат басқармасының басшысы, полиция полковнигі Салтанат Қаракөзовадан сұхбат алған едік.

sqarakozova

– Салтанат Бегімбайқызы, сіздің полицияда қызмет еткеніңізге биыл 21 жыл болады екен. Ал ОҚО ІІД-нің баспасөз қызметін басқарғаныңызға биыл 11 жыл. Осыншама уақыт бір орында тапжылмай жұмыс істеудің сыры неде?

– Оңтүстікке 2005 жылы келдім. Ал оған дейін Ақтөбе, Алматы, Астана және Көкшетау қалаларындағы ішкі істер органдарында жұмыс істедім. Шымкентке майор шенімен келіп, қазір полковникке дейін өстім. Осы өңірдің журналистерімен де, халқымен де тез тіл табысып, сіңісіп кеттім. Менің ойымша, адам кішіпейіл болуы керек. Тек сонда ғана өз ортасында сыйлы болады.

– Сіз баспасөз қызметін басқарғалы бері төрт басшы ауысты. Әр басшының талабына сай жұмыс істеу қаншалықты қиын?

– Мен осы салаға келгелі бері жалпы 12 басшымен жұмыс істедім. Әрине, оңай емес. Өйткені, әр басшы өмірде өз орны бар, қалыптасқан сыйлы азаматтар. Полковниктер мен генералдар. Өз жұмысына тыңғылықты қарайтын мамандар. Көргені мен түйгені мол. Олардың маған қойған талаптары да жоғары болды. Ең алдымен өз жұмысыңды жақсы білуге тиіссің. Сол талаптарға сай болуға тырыстым. Менің адам ретінде, маман ретінде өсуіме тәжірибелері мол кісілердің септігі тиді. Осы өңірге алғаш келген жылы полиция полковнигі Құрманбек Артықбаевпен жұмыс бастадым. Одан соң, Хибратулла Досқалиев, Серімжан Досымовтан көп тағылым алдым. Ал қазір полиция генералы Асқар Оспанов басшылық етеді. Ол кісінің де қызметкерлерге қояр талабы күшті. Ең алдымен тәртіпті талап етеді.

– Баспасөз хатшысына қойылатын талаптар қандай?

– Ең алдымен қазақ және орыс тілдерін жетік меңгеруі тиіс деп ойлаймын. Журналистерге баспасөз мәслихатын өткізгеннен бөлек, өзіміздің сайтымызға және әлеуметтік желілерге ақпараттар саламыз. Айына бір рет ішкі істер органы қызметкерлерінің жұмысын насихаттайтын «102» атты газетіміз шығады. Сол кезде жазылған мәтін сауатты әрі онда толыққанды мәлімет берілуі керек. Ақпарат нақты жайттарға сүйеніп жазылуы тиіс. ОҚО ІІД Мемлекеттік тіл және ақпарат басқармасында қазір 10 адам жұмыс істейді. Қызметкерлеріміз күн-түн демей, өз міндеттерін атқаруда. Баспасөз қызметі ширақтықты талап етеді. Бізді аяғымыз асырайды. Департаменттің ішінде қажетті ақпаратты алу үшін шапқылап, қолда бар ақпаратты заңға сәйкес таратамыз.

– Сынға қалай қарайсыздар? БАҚ тарапынан департамент жұмысына қатысты сыни материалдар жиі шығады ма?

– Сынға байыппен қараймыз. Оны дұрыс қабылдаймыз. Егер шындыққа сәйкес келетін сын болса, одан сабақ алып, қорытынды шығаруға тырысамыз. Біз бұқаралық ақпарат құралдарындағы жарыққа шыққан немесе көрсетілген материалдарға мониторинг жүргіземіз. Кімнің не жазып отырғанын білуге тиіспіз. Журналистермен жұмыс бабы бойынша жақсы қарым-қатынас орнатқанбыз. Біздегі ақпараттар қолжетімді. Журналист ауызша немесе жазбаша түрде ақпарат сұраса, ол міндетті түрде берілуі тиіс. Мен осыны баспасөз қызметінде жұмыс істейтін қызметкерлерге жиі айтамын. Ақпаратты қолда ұстап, тілшілерді күттіруге болмайды. Өйткен жағдайда, жаңалық өз маңызын жойып алады. Уақытпен де санасып үйренуіміз қажет.

– Ауыр қылмыстар туралы ақпарат таратқанда оны жүрегіңізбен қабылдайсыз ба? Әлде оған да жан-дүниеңіз көндікті ме?

– Жанды ауыртатын жайттар көп кездеседі. Оларға көндігу мүмкін емес. Ұрлық-қарлық деген секілді қылмысқа бой үйретуге болар. Бірақ жас балаларға зорлық-зомбылық жасалып жатса, бір отбасыны түгелдей өлтіріп кетсе, оған қалай немқұрайлы қарайсың? Мәселен, жуырда ғана жанар-жағар май құю бекетінде үш азаматты өлтіріп кетті. Олардың артында қаншама адам тұр. Анасы, әйелі, балалары аңырап қалды. Қоғамдағы мұндай жайттарға бой үйретуге болмайды. Кейде «неге осындай жауыздыққа барды екен?» деп ойлаймын.

– Оңтүстікте өзіңіз секілді ер азаматтармен иық тірестіріп, полковник дәрежесінде қызмет етіп жүрген қыз-келіншектер бар ма?

– Жалпы, ОҚО ІІД-де 300-ден астам нәзік жанды азаматтар жұмыс істейді. Олардың барлығына да қойылатын талап бірдей, тәртіп ортақ. Полковник шенін алған алты азаматша бар. Олардың әрқайсысы өз ісінің маманы, ортасына сыйлы.

– Генерал болуды армандайсыз ба?

– Әрине! Кім біледі, нәсіп етсе ол да болып қалар. Қыз-келіншектер де генерал болғысы келеді. Психологтарды тыңдар болсақ, олар армандау қажеттігін жиі айтады. Жастайымнан ішкі істер саласында жұмыс істеуді армандадым. Сол бала арманым мені бүгінгі күнге жетелеп әкелді. Бірақ оңай болды деп айта алмаймын. Талай қиындықтарды еңсеруге тура келді.

– Жұмысыңызға сәттілік тілейміз. Әңгімеңізге көп рахмет.

Сұхбаттасқан
Эльмира МЫҚТЫБАЕВА

Опубликовано в Сұхбат
Страница 1 из 2